Ang Organisasyon ug Kapalaran [Destiny] sa Tinuod ug Buhi nga Simbahan

“Wala kamo’y mas labaw pa nga nahibaloan kabahin sa mga kapalaran niini nga Simbahan ug sa gingharian kaysa usa ka gamay nga bata diha sa sabakan sa inahan. Wala ninyo kini masabti…. Kini nga Simbahan mopuno sa Amihanan ug Habagatang Amerika—pun-on niini ang kalibutan.”

Gikan sa Kinabuhi ni Joseph Smith

Niadtong Hunyo 1829, si Propeta Joseph Smith nakahuman sa paghubad sa Basahon ni Mormon. “Sa dihang ang among paghubad hapit na mahuman,” ang Propeta namahayag, “nangadto kami sa Palmyra, balangay sa Wayne, New York, mikuha og katungod sa sinulat, ug nakigsabut uban ni Mr. Egbert B. Grandin sa pag-imprinta og lima ka libo ka mga kopya alang sa kantidad nga tulo ka libo ka dolyar.”¹ Si Egbert B. Grandin mao ang usa ka batan-on nga lalaki, manghud lang og usa ka tuig ni Joseph Smith, nakapanag-iya og imprintahanan didto sa Palmyra. Bag-ohay pa lang siya nga nakapalit og bag-o nga kahimanan sa pag-imprinta uban sa teknolohiya nga nakahimo sa pagpahigayon sa pag-imprinta nga mas labaw ka paspas. Talagsaon gayud kini nga ang Propeta nakahimo sa pagkakaplag og tig-imprinta diha sa lungsod sa Palmyra nga makahimo sa pag-imprinta og daghan kaayo nga mga kopya sa mga libro sama sa Basahon ni Mormon. Tungod kay ang pag-imprinta sa Basahon ni Mormon usa ka dako ug mahal kaayo nga proyekto, si Martin Harris miprenda sa iyang umahan ngadto ni Mr. Grandin aron masiguro ang bayad sa galastohan sa pag-imprinta.

Sa naghinapos nga ting-init niadtong 1829, si Joseph Smith, Martin Harris, ug uban pa nagpundok didto sa imprintahanan aron sa pagtan-aw sa pasiunang kopya sa ulohan nga pahina sa Basahon ni Mormon, nga maoy unang pahina sa libro nga paga-imprintahon. Sa dihang mideklarar ang Propeta nga nakauyon siya sa hulagway sa pahina, ang pag-imprinta paspas kaayo nga gipadayon kutob sa mahimo. Ang trabaho miabut og pito ka mga bulan sa pagkompleto, ug ang mga kopya sa Basahon ni Mormon nahatag ngadto sa publiko pagka-Marso 26, 1830.

Uban sa trabaho nga paghubad sa Basahon ni Mormon nga nakompleto na karon, si Joseph Smith mipadayon sa pagtukod sa Simbahan. Diha sa pagpadayag nga karon makita sa seksyon 20 sa Doktrina ug mga Pakigsaad, ang Ginoo mipadayag ngadto sa Propeta “ang tukma nga adlaw diin sumala sa Iyang kabubut-on ug sugo, kinahanglan nga mopadayon kita sa pagtukod sa Iyang Simbahan sa makausa pa dinhi sa yuta.”² Ang adlaw nga gitagal mao ang Abril 6, 1830.

“Kami … mipahibalo ngadto sa among mga kaigsoonan,” ang propeta miingon, “nga kami nakadawat og sugo sa pagtukod sa Simbahan; ug tungod niana nanagtagbo kami alang niana nga katuyoan, didto sa balay ni Mr. Peter Whitmer, Sen., (nga unom ang gidaghanon,) niadtong Martes, ika-unom nga adlaw sa Abril, A.D., mil otso siyentos traynta.”³ Gibanabana nga 60 ka mga tawo ang nagpundok didto sa panimalay ni Whitmer sa Fayette, New York, hingpit nga mipuno sa duha ka mga lawak niana nga panimalay. Unom sa mga tawo nga mitambong maoy nailhan isip miyembro sa nagtukod sa bag-ong Simbahan aron pagtuman sa balaod sa New York—si Propeta Joseph Smith, Oliver Cowdery, Hyrum Smith, Peter Whitmer Jr., Samuel Smith, ug David Whitmer.⁴

Bisan tuod kon ang Simbahan gamay pa kaayo sa sinugdanan, Si Joseph Smith adunay mapanagnaon nga salabutan sa mahinungdanon nga kapalaran niini. Si Wilford Woodruff nahinumdom nga atol sa miting sa priesthood didto sa Kirtland, Ohio, niadtong Abril 1834, ang Propeta naninguha sa pagtabang sa mga kaigsoonan nga makasabut sa kamatuoran sa umaabut nga kahimtang sa gingharian sa Dios dinhi sa yuta:

“Ang Propeta nanawagan ngadto sa tanan kinsa naghupot sa Priesthood sa pagpundok ngadto sa gamay’ng eskwelahan nga binuhat sa troso nga gihimo nila didto. Gamay kini nga balay, tingali mga 14 pye kwadrado. Apan nakapahiluna kini sa tibuok Priesthood sa Simbahan ni Jesukristo sa mga Santos sa Ulahing mga Adlaw sa dihang didto pa sa lungsod sa Kirtland…. Kon magkapundok kami ang Propeta manawagan sa mga Elder sa Israel uban kaniya sa paghatag og pagpamatuod niini nga buhat…. Dihang nahuman na sila ang Propeta miingon, ‘Mga kaigsoonan, napalig-on kaayo ako ug natudloan sa inyong mga pagpamatuod dinhi karong gabhiona, apan gusto ko nga mosulti kaninyo sa atubangan sa Ginoo, nga wala kamoy mas labaw pa nga nahibaloan kabahin sa mga kapalaran niini nga Simbahan ug sa gingharian kaysa usa ka gamay nga bata diha sa sabakan sa inahan. Wala ninyo kini masabti.’ Ingon og nakalitan ako. Miingon siya, ‘Dyutay ra kaayo nga priesthood ang inyong makita dinhi karong gabhiona, apan kini nga Simbahan mopuno sa Amihanan ug Habagatang Amerika—pun-on niini ang kalibutan.’ ”⁵

Mga Pagtulun-an ni Joseph Smith

Ang tinuod nga Simbahan ni Jesukristo gitukod pinaagi ni Joseph Smith sa dispensasyon sa kahingpitan sa mga panahon.

Si Joseph Smith mi-report sa mga panghitabo sa miting nga gihimo niadtong Abril 6, 1830, aron tukuron ang Simbahan: “Gisugdan ang miting pinaagi sa usa ka maligdong nga pag-ampo ngadto sa atong Langitnong Amahan, mipadayon kami, sumala sa miagi nga sugo, sa pagtawag sa atong mga kaigsoonan aron masayud kon dawaton ba nila kami isip ilang mga magtutudlo sa mga butang sa Gingharian sa Dios, ug kon uyon ba sila nga kinahanglang mopadayon kami ug ma-organisar isip usa ka Simbahan sumala sa mao gihapon nga sugo nga among nadawat. Ngadto niadtong pipila ka mga sugyot miuyon sila pinaagi sa nagkahiusa nga boto.

“Ako dayon nga gipandong ang akong mga kamot diha ni Oliver Cowdery, ug gi-orden siya isip usa ka Elder sa ‘Simbahan ni Jesukristo sa mga Santos sa Ulahing mga Adlaw;’ nga sa pagkahuman, iya usab ako nga gi-orden ngadto sa office sa usa ka Elder sa mao nga Simbahan. Mikuha dayon kami og pan, gipanalanginan kini, ug gipikaspikas kini uban kanila; ang bino usab, gipanalanginan kini, ug giinom kini uban kanila. Dayon among gipandong ang among mga kamot ngadto sa tagsa-tagsa ka mga miyembro sa Simbahan nga mitambong, nga unta sila makadawat sa gasa sa Espiritu Santo, ug makumpirmahan nga mga miyembro sa Simbahan ni Jesurkristo. Ang Espiritu Santo gibu-bu diha kanamo ngadto sa hilabihan ka makabayaw nga kahimtang—ang pipila nanagna, samtang kaming tanan midayeg sa Ginoo, ug nagmaya sa hilabihan….

“Unya mipadayon kami sa pagtawag ug mi-orden sa pipila sa mga kaigsoonan ngadto sa nagkalain-lain nga mga office sa Priesthood, sumala sa pag-aghat sa Espiritu ngari kanamo: ug human sa malipayon nga higayon nga gigahin sa pagsaksi ug pagbati sa among mga kaugalingon sa mga gahum ug mga panalangin sa Espiritu Santo, pinaagi sa grasya sa Dios nga gitugyan diha kanamo, gitapos namo ang miting uban sa makapahimuot nga kahibalo nga kami karon indibidwal na nga mga miyembro, ug giila sa Dios, ‘Ang Simbahan ni Jesukristo,’ nga gitukod sumala sa mga sugo ug mga pagpadayag nga gihatag Niya sa among mga kaugalingon niining katapusang mga adlaw, ingon man usab sumala diha sa pagkahan-ay sa Simbahan maingon sa narekord diha sa Bag-ong Tugon.”⁶

Sa unang kinatibuk-ang komperensya sa Simbahan, nga gihimo didto sa Fayette, New York, niadtong Hunyo 9, 1830, ang sakrament gipahigayon, daghang mga tawo ang gikumpirmahan nga mga miyembro sa Simbahan, ang uban gi-orden ngadto sa mga office sa priesthood, ang Espiritu Santo gibu-bu diha sa mga Santos. Ang Propeta nga si Joseph Smith mi-rekord: “Ang ingon nga mga talan-awon nga sama niini gibanabana nga modasig sa atong mga kasingkasing uban sa hingpit nga kalipay nga dili ikasulti, ug sanapan kita uban sa katingala ug balaan nga pagtahud alang nianang Makagagahum nga Nilalang, kang kinsang grasya kita gitawag nga mahimong instrumento sa pagpahinabo, alang sa mga anak sa katawhan, ang pagpahimulos sa ingon ka mahimayaon nga mga panalangin maingon nga karong higayona gi-bubu nganhi kanato. Sa pagtan-aw sa atong kaugalingon nga naapil sa sama gayud nga han-ay sa mga butang nga gibuhat pinaagi sa mga karaang Apostoles; aron makaamgo sa kamahinungdanon ug kaligdong sa sama nga mga buhat; ug sa pagsaksi ug sa pagbati sa atong kaugalingong natural nga mga salabutan, sa sama nga mahimayaong mga pagpadayag sa mga gahum sa Priesthood, sa mga gasa ug mga panalangin sa Espiritu Santo, ug sa kamaayo ug kaangayan sa maloloy-on nga Dios ngadto sa pagsunod sa walay katapusan nga Ebanghelyo sa atong Ginoong Jesukristo, nga gilangkob sa pagmugna sa atong kahiladman og mga pagbati sa malipayon nga pagpasalamat, ug modasig kanato uban sa lunsay nga kaikag ug kalagsik kabahin sa kamatuoran.”⁷

Ang Simbahan ni Kristo gitukod sumala sa sugo sa Dios.

“Si Kristo mao ang pangulo sa Simbahan, ang punoang tukurang bato, ang espirituhanon nga bato diin ang Simbahan pagatukuron ug ang mga gahum sa kamatayon dili gayud makabuntog niini [tan-awa sa Mateo 16:18; Mga Taga-Efeso 2:20]. Gitukod Niya ang Gingharian, mipili og mga Apostoles ug mi-orden kanila ngadto sa Melchizedek Priesthood, naghatag kanila og gahum sa pagpangalagad sa mga ordinansa sa ebanghelyo.”⁸

“‘Si Kristo … migasa ngadto sa uban nga mahimong mga Apostoles, ang uban mga Propeta, ang uban mga Ebanghelista ang uban mga Pastor, ug mga Magtutudlo’ [Mga Taga-Efeso 4:11]. Ug sa unsa nga paagi gipili ang mga Apostoles, mga Propeta, mga Pastor, mga Magtutudlo ug mga Ebanghelista? Pinaagi sa pagpanagna (pagpadayag) ug pinaagi sa pagpandong sa mga kamot:—pinaagi sa balaanon nga komunikasyon, ug sa balaanon nga gitudlong ordinansa—pinaagi sa Priesthood, nga gitukod sumala sa kapunongan sa Dios, pinaagi sa balaanon nga pagtudlo.”⁹

“[Ang Basahon ni Mormon] nagsulti kanato nga ang atong Manluluwas mihimo sa Iyang pagpakita dinhi niining kontinente sa Amerika human sa Iyang pagkabanhaw, nga gitukod Niya ang Ebanghelyo dinhi sa tanang kahingpitan niini, ug pagkabuhong, ug gahum, ug panalangin, nga sila adunay mga Apostoles, mga Propeta, mga Pastor, mga Magtutudlo, ug mga Ebanghelista, ang sama nga kapunongan, ang sama nga priesthood, ang sama nga mga ordinansa, mga gasa, mga gahum, ug mga panalangin sama sa gipahimuslan didto sa dakung kayutaan sa silangan.”¹⁰

“Ang usa ka ebanghelista usa ka Patriarch…. Bisan hain ang Simbahan ni Kristo matukod dinhi sa yuta, kinahanglan aduna gayu’y usa ka Patriarch alang sa kabulahanan sa kaliwatan sa mga Santos, sama kang Jacob kaniadto sa paghatag sa iyang patriyarkal nga panalangin ngadto sa iyang anak nga mga lalaki.”¹¹

Mga Artikulo sa Hugot nga Pagtuo 1:6: “Kami nagtuo sa sama nga kapunongan nga diha sa karaan nga Simbahan, sa ato pa, ang mga apostoles, mga propeta, mga pastor, mga magtutudlo, mga ebanghelista, ug uban pa.”¹²

Ang Simbahan gipangulohan sa First Presidency, sa Korum sa Napulog Duha ka mga Apostoles, ug sa mga Korum sa Seventy.

“Hugot ako nga nagatuo diha sa mga propeta ug mga apostoles, si Jesukristo mao ang punoan nga tukurang bato, ug nagasulti ingon nga may gahum diha kanila, ug dili sama sa mga eskriba.”¹³

“Ang mga Presidente o [First] Presidency mao ang mga pangulo sa Simbahan, ug ang mga pagpadayag sa hunahuna ug kabubut-on sa Dios ngadto sa Simbahan, moabut pinaagi sa Presidency. Mao kini ang kapunongan sa langit, ug ang gahum ug kahigayunan sa [Melchizedek] Priesthood.”¹⁴

“Unsa ang mahinungdanong butang nga gilakip sa katungdanan niining Napulog Duha ka mga Apostoles, nga lahi sa ubang mga katungdanan o mga opisyal sa Simbahan? … Sila ang Napulog Duha ka mga Apostoles, kinsa gitawag sa buhatan sa Tigbiyahe nga High Council, kinsa mao ang modumala ibabaw sa mga simbahan sa mga Santos…. Sila ang mohupot sa mga yawe niini nga pangalagad, sa pag-abli sa pultahan sa Gingharian sa langit ngadto sa tanang kanasuran, ug mosangyaw sa Ebanghelyo sa matag binuhat. Mao kini ang gahum, awtoridad, ug hiyas sa ilang pagka-apostol.”¹⁵

Si Orson Pratt, kinsa mi-serbisyo sa Korum sa Napulog Duha ka mga Apostoles, mi-report: “Ang Ginoo … misugo nga ang Korum sa Napulog Duha ka mga Apostoles kinahanglan nga tukuron, kansang mga buluhaton mao ang pagsangyaw sa Ebanghelyo ngadto sa mga nasud, una sa mga Hentil dayon ngadto sa mga Judeo. Ang Priesthood gihiusa sa pagtawag human sa pagtukod sa Templo sa Kirtland, ug kabahin sa Napulog Duha ka mga Apostoles, si Propeta Joseph miingon nadawat nila ang Pagka-apostol uban sa tanang mga gahum kabahin sa ingon, sama sa karaan nga mga Apostoles.”¹⁶

Si Wilford Woodruff, ang ikaupat nga Presidente sa Simbahan, mi-report: “Si Joseph mitawag og napulog duha ka mga Apostoles. Kinsa sila? Ang Ginoo miingon ngadto kaniya: ‘Ang napulog duha mao ang magtinguha sa pagdala diha kanila sa akong ngalan uban sa hingpit nga katuyoan sa kasingkasing, sila gitawag sa pagpanglakaw ngadto sa tibuok kalibutan sa pagsangyaw sa akong ebanghelyo ngadto sa matag linalang.’ [D&P 18:27–28.] … Sa dihang si Propeta Joseph mitukod sa Korum sa Napulog Duha ka mga Apostoles, iyang gitudlo [ang] baruganan sa pagkahiusa ngadto kanila. Iyang gihatag ngadto kanila ang salabutan nga sila kinahanglan gayud nga usa ka kasingkasing ug usa ka hunahuna, ug kinahanglan gayud nga ilang dad-on sa hingpit ang pangalan ni Kristo; nga kon ang Dios mosugo kanila sa pagbuhat sa bisan unsa nga butang kinahanglan gayud nga sila moadto ug mobuhat niini.”¹⁷

“Ang mga seventy mao ang maglangkob sa tigbiyahe nga mga korum, sa paglakaw ngadto sa tibuok kayutaan, bisan kanus-a ang Napulog Duha ka mga Apostoles motawag kanila.”¹⁸

“Ang mga Seventy wala tawga aron sa pag-apud-apud sa mga pagka-on [tan-awa sa Mga Buhat 6:1–2], … apan mosangyaw sa Ebanghelyo ug motukod sa [mga simbahan], ug mopahiluna sa uban, kinsa walay labut niini nga mga korum, sa pagdumala ibabaw [sa mga simbahan], kinsa mga High Priest. Ang Napulog Duha kinsa usab … modala sa mga yawe sa Gingharian ngadto sa tanang mga nasud, ug moabli sa ganghaan sa Ebanghelyo ngadto kanila, ug motawag sa mga Seventy aron mosunod kanila, ug moabag kanila.”¹⁹

Bisan kon ang mga gahum sa dautan magtinguha sa paglaglag sa Simbahan, “walay dili balaanong mga kamot ang makapahunong sa buhat aron molambo.”

“Sukad sa pagkatukod sa Simbahan ni Kristo, … niadtong ika-6 sa Abril, 1830, naangkon na nato ang katagbawan sa pagsaksi sa pagsabwag sa kamatuoran ngadto sa nagkalain-laing mga dapit sa atong kayutaan, bisan pa man og ang mga kaaway niini nanglimbasog sa ilang walay hunong nga kakugi sa pagpahunong sa padulnganan niini ug pugngan ang paglambo niini, bisan kon ang dautan ug maliputon nga mga tawo naghiusa aron paglaglag sa walay sala, … hinoon ang mahimayaon nga Ebanghelyo diha sa kahingpitan niini mikaylap ug matag adlaw nga nakaangkon og mga kinabig, ug ang atong pag-ampo ngadto sa Dios, mao nga ang Simbahan makadugang og mga kinabig sa matag adlaw ug nga kadtong mga tawo kinsa mipasakop sa Simbahan mao ang maluwas sa kahangturan.”²⁰

“Ang Sumbanan sa Kamatuoran natukod; walay dili balaan nga kamot ang makapugong sa buhat sa paglambo; mga pagpanggukod mahimong magkakusog, ang mga manggugubot mahimong maghiusa, mga kasundaluhan magpundok, mga pasangil mahimong modaot sa kadungganan, apan ang kamatuoran sa Dios magpadayon nga maisugon, halangdon ug gawasnon, hangtud nga kini makasulod sa matag yuta, makabisita sa matag dapit, molukop sa matag nasud, ug makasulti sa matag dunggan, hangtud ang mga katuyoan sa Dios matuman, ug ang Halangdong Jehova moingon nga ang buhat nahuman na.”²¹

“Ug usab, lain nga sambingay ang mibutang [sa Maluluwas] sa dayag ngadto kanila, nga naghatag og pasumbingay ngadto sa Gingharian nga kinahanglang ipahimutang sa dili pa o sa panahon sa ting-ani, nga mabasa sa mosunod—‘Ang Gingharian sa Langit sama’g liso sa mustasa nga gidala sa usa ka tawo ug gipugas niya diha sa iyang uma: kini mao ang labing gamay sa tanang mga liso, apan sa nakatubo na, kini mao ang labing daku sa tanang tanum nga ulotanon ug nahimong kahoy nga tungod niana ang mga langgam sa kalangitan modugok ug magahimo’g mga batuganan diha sa iyang mga sanga.’ [Mateo 13:31–32.] Karon yano nato nga nadiskubrehan nga kining paghulagway nagrepresentar sa Simbahan maingon nga moabut kini sa katapusan nga mga adlaw. Tan-awa, ang Gingharian sa Langit gipakahisama ngadto niini. Karon, unsa man ang sama niini?

“Atong basehan ang Basahon ni Mormon, nga gikuha sa usa ka tawo ug gitagoan didto sa iyang umahan, gipanalipdan kini pinaagi sa iyang hugot nga pagtuo, aron motunga sa katapusan nga mga adlaw, o sa tukma nga panahon; tan-awon nato kini nga mitunga gikan sa yuta, nga sa pagkatinuod giila nga pinakaubos sa tanang mga liso, apan sud-onga kini nga nanalingsing, oo, gani nagpatigbabaw uban sa mahabog kaayo nga mga sanga ug sama sa Dios nga kahalangdon, hangtud, nga sama sa liso sa mustasa, nahimong pinakataas sa tanang mga tanum. Ug tinuod kini, ug mogitib gikan sa yuta, ug ang pagkamatarung magsudong gikan sa langit [tan-awa sa Salmo 85:11; Moises 7:62], ug ang Dios nagpadala sa Iyang mga gahum, mga gasa, ug mga anghel aron mopuyo diha sa mga sanga niini.

“Ang Gingharian sa Langit maoy sama sa liso sa mustasa. Karon, tan-awa, dili ba kini mao ang Gingharian sa Langit nga mipataas sa iyang ulo sa katapusang mga adlaw diha sa kahalangdon sa iyang Dios, nga mao ang Simbahan ni Jesukristo sa mga Santos sa Ulahing mga Adlaw, ingon sa usa ka dili madutlan, dili mairog nga bato taliwala sa gamhanang lawod, nga nagsagubang sa mga unos ug mapintas nga pagpanggubot ni Satanas, nga nahimo, sa ingon ka dugay, diin nagpabilin nga makanunayon, ug sa gihapon maisugon nga mibarog sa nagpadayon ug hilabihan nga pagpanggukod, nga giduot sa mapintas nga mga hangin sa nagkakunhod nga kalihokan sa malimbungon nga buhat, nga [misablig] ug sa gihapon nagsablig diha sa malampuson nga panagway uban sa hilabihan nga kasuko; nga gidasig sa pagpadayon luyo sa gipilo-pilo nga kapintas sa kaaway sa pagkamatarung?”²²

Isip kabahin sa iyang pag-ampo didto sa pagpahinungod sa Templo sa Kirtland, nga gi-rekord diha sa Doktrina ug mga Pakigsaad 109:72–76, si Propeta Joseph Smith miingon: “Hinumdumi ang imong tanan nga simbahan, o Ginoo, uban sa ilang tanan nga mga banay, ug sa ilang tanan nga labing duol nga mga kabanay, uban sa tanan nila nga mga masakiton ug kadto nga mga sinakit, uban sa tanan nga mga kabus ug maaghup sa yuta; aron ang gingharian, diin ikaw mipabarug nga walay mga kamot, mahimong usa ka dako nga bukid ug makapuno sa tibuok yuta; aron ang simbahan moguwa gikan sa kangitngit sa kamingawan, ug mosiga nga mahayag sama sa usa ka bulan, tin-aw sama sa adlaw, ug makalilisang sama sa usa ka kasundalohan uban sa mga bandila; ug dayandayanan ingon sa usa ka pangasaw-onon alang niana nga adlaw sa panahon nga ikaw mokuha sa tabil sa mga langit, ug mosugo sa kabukiran nga magpaubos sa imong atubangan, ug ang mga walog pagabayawon, batoon nga mga dapit mahimo nga mahapsay, nga ang imong himaya mopuno sa yuta; nga sa higayon nga ang trumpeta motingog alang sa mga patay, kami pagabayawon diha sa mga panganod aron sa pagsugat kanimo, aron kami sa kanunay mag-uban sa Ginoo; aron ang among mga saput mahimo nga putli, nga aron kami masul-uban sa mga kupo sa pagkamatarung, uban ang mga palad sa among kamot, ug mga korona sa himaya sa among mga ulo ug moani sa walay katapusan nga hingpit nga kalipay alang sa among tanan nga mga pag-antus.”²³

Matag usa kanato adunay responsibilidad sa paglig-on sa Simbahan ug mobuhat sa atong bahin sa pagtukod sa gingharian sa Dios.

“Ang katuyoan sa Dios maoy usa ka naandan nga katuyoan, diin managsama nga gitinguha sa mga Santos; kitang tanan mga kabahin sa lawas, ug ang tanan moambit sa sama nga espiritu, ug nabunyagan ngadto sa usa ka pagbunyag ug managsama nga nagbaton sa samang mahimayaon nga paglaum. Ang pagpadayon sa katuyoan sa Dios ug ang pagtukod sa Zion sama ra ka mahinungdanon nga buluhaton sa usa ka tawo ngadto sa uban. Ang kalainan lamang mao, nga ang usa ka tawo gitawag sa pagtuman sa usa ka buluhaton, ug ang laing tawo lain na usab nga buluhaton; ‘kon ang usa ka bahin magaantus, nan ang tanan magadungan sa pag-antus, ug kon ang usa ka bahin pasidunggan nan ang tanan magadungan sa pagkalipay, ug ang mata dili makaingon ngadto sa dalunggan, wala ako magkinahanglan kanimo, ni ang ulo ngadto sa tiil, wala ako magkinahanglan kanimo;’ ang masupakon nga pagbati sa lain nga pundok, lahi nga mga interes, ang maako-akohon nga mga kinaiya kinahanglan nga wagtangon diha sa komon nga katuyoan, alang sa kaayohan sa tanan [tan-awa sa 1 Mga Taga-Corinto 12:21, 26].”²⁴

“Mga kaigsoonang lalaki ug mga babaye, pagmatinud-anon, pagmakugihon, pakigbisog nga matinguhaon alang sa tinuohan nga sa makausa pa gitugyan ngadto sa mga Santos [tan-awa sa Judas 1:3]; himoa nga makaamgo ang matag lalaki, babaye ug bata sa ka mahinungdanon sa trabaho, ug mobuhat nga daw ang kalampusan nag-agad diha sa iyang kaugalingon nga paningkamot lamang; himoa nga ang tanan mobati og kaikag alang niini, ug dayon hunahunaa nga nagpuyo sila sa usa ka adlaw, nga ang pagpamalandong diin nagpadasig sa kinasingkasing nga pagbati sa mga hari, mga Propeta, ug matarung nga mga lalaki kaliboan ka mga tuig na nga milabay—ang pagpaabut nga nakadasig sa ilang pinakatam-is nga mga nota, ug ang pinakamahimayaon nga mga kanta, ug ang hinungdan niini sa pagpadayag sa ingon ka mahimayaon nga paagi sa pagpahayag sama sa girekord diha sa mga Kasulatan; ug sa dili madugay magkinahanglan usab kita nga mopahayag, diha sa pinulongan sa kadasig—

“‘Ang Ginoo mipahiuli sa Zion,

Ang Ginoo mitubos sa Iyang mga katawhan, ang Israel.’ [D&P 84:99.]”²⁵

Ingon sa nahinumduman ni Wilford Woodruff, si Joseph Smith mihimo sa mosunod nga pamahayag ngadto sa mga miyembro sa Napulog Duha kinsa mibiya aron magmisyon ngadto sa Great Britain niadtong 1839: “Bisan og unsa pay mahitabo diha kaninyo, lig-ona ang inyong mga abaga ug pas-ana kini, ug kanunay nga paluyohi ug panalipdi ang mga katuyoan sa Simbahan ug sa Gingharian sa Dios.”²⁶

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Hunahunaa kon sama sa unsa ang pagtambong sa miting sa priesthood nga gihulagway sa pahina 160–61. Unsa sa inyong hunahuna ang inyong bation kon makadungog kamo ni Joseph Smith nga nanagna nga ang Simbahan mopuno sa kalibutan sa umaabot? Maghunahuna karon niana nga panagna, unsa ang inyong mga hunahuna o mga pagbati?
Ribyuha ang mga pahina 161–63, nga magtan-aw sa mga kalihokan nga gihimo diha sa kapunongan sa Simbahan ug ang unang kinatibuk-ang komperensya, si Joseph Smith miingon, “Ang ingon nga mga talan-awon nga sama niini gihunahuna nga modasig sa atong kasingkasing uban sa hingpit nga kalipay nga dili ikasulti, ug sanapan kita uban sa katingala ug balaan nga pagtahud alang sa [Dios]” (pahina 163). Kanus-a ninyo gibati ang mga pagbati nga gihulagway ni Joseph Smith?
Ribyuha ang mga pagtulun-an ni Joseph Smith mahitungod sa Simbahan sa panahon ni Jesus ug sa mga panahon sa Basahon ni Mormon (mga pahina 163–64).). Sa unsa nga paagi gisunod karon sa Simbahan ang sama nga sumbanan?
Ngano sa inyong hunahuna nagkinahanglan kita og mga lider kinsa modumala ibabaw sa tibuok kalibutan nga Simbahan? (Alang sa pipila ka mga ehemplo, tan-awa sa mga pahina 165–66.) Sa unsa nga paagi kamo napanalanginan pinaagi sa serbisyo sa First Presidency, sa Korum sa Napulog Duha ka mga Apostoles, sa mga Korum sa Seventy, ug sa Presiding Bishopric?
Unsa ang inyong mga hunahuna o mga pagbati samtang nagbasa kamo sa mga pananagna ni Joseph Smith mahitungod sa kapalaran sa Simbahan? (Tan-awa sa mga pahina 166–169.) Sa unsa nga mga paagi kita makaapil niini nga trabaho? (Alang sa pipila ka mga ehemplo, tan-awa sa mga pahina 169–71.)
Si Joseph Smith nagtudlo, “Himoa nga makaamgo ang matag lalaki, babaye ug bata sa ka mahinungdanon sa trabaho, ug mobuhat nga daw ang kalampusan nag-agad diha sa iyang kaugalingon nga paningkamot lamang” (mga pahina 169–70). Paghunahuna kabahin sa partikular nga mga paagi diin magamit ninyo kini nga tambag sa inyong kinabuhi.
Kon ang usa ka tawo mangutana kaninyo kon nganong miyembro ikaw sa Ang Simbahan ni Jesukristo sa mga Santos sa Ulahing mga Adlaw, unsay inyong ikasulti?

May Kalabutan nga mga Kasulatan: Daniel 2:31–45; Mosiah 18:17–29; D&P 20:1–4; 65:1–6; 115:4–5

printing press — Sa naghinapos nga ting-init niadtong 1829, si Joseph Smith, Martin Harris, ug uban pa nagpundok uban sa tig-imprinta sa Basahon ni Mormon, nga si Egbert B. Grandin, aron sa pagtan-aw sa pasiunang kopya sa ulohan nga pahina sa Basahon ni Mormon, ang unang pahina nga paga-imprintahon.

organization of Church — Ang Simbahan ni Jesukristo sa mga Santos sa Ulahing mga Adlaw pormal nga gitukod pinaagi sa Propeta nga si Joseph Smith niadtong Abril 6, 1830, didto sa panimalay ni Peter Whitmer Sr. sa Fayette, New York. Ang Ulahing Adlaw nga Simbahan gitukod sa sama nga paagi sa Simbahan sa panahon sa Manluluwas, nga may mga apostoles, mga propeta, mga pastor, mga magtutudlo, mga ebanghelista, ug uban pa.”

Sunday School — “Ang pagpadayon sa katuyoan sa Dios ug ang pagtukod sa Zion sama ra ka mahinungdanon nga buluhaton sa usa ka tawo ngadto sa uban. Ang kalainan lamang mao, nga ang usa ka tawo gitawag aron pagtuman og usa ka buluhaton ug ang laing tawo lain na usab nga buluhaton.”