Mga Gasa sa Espiritu

“Kon mosunod kamo sa Ebanghelyo uban sa matinuoron nga mga kasingkasing, ako mosaad kaninyo sa pangalan sa Ginoo, nga ang mga gasa nga gisaad sa atong Manluluwas moabut kaninyo.”

Gikan sa Kinabuhi ni Joseph Smith

Ang ulohan nga pahina sa Basahon ni Mormon nagpasabut kon sa unsa nga paagi nga kining talagsaon nga libro sa kasulatan magamit sa kalibutan. Sa karaang panahon, ang bulawan nga mga palid “gisulat ug gisilyohan, ug gitipigan ngadto sa Ginoo, aron kini dili maunsa.” Sa ulahing mga adlaw, kini “moabut pinaagi sa gasa ug gahum sa Dios” ug mahubad” pinaagi sa gasa sa Dios.” Sa katumanan niini nga mga panagna, ang Dios mipili ni Joseph Smith sa paghubad sa sagrado nga mga rekord. Klaro kaayo, nga ang abilidad ni Joseph Smith sa paghubad sa karaan nga mga karakter wala magagikan sa edukasyon: elementarya ra siya igo nga makabasa, makasulat, ug arithmetic. Ang iyang abilidad sa paghubad og mga rekord nga gisulat sa milabayng mga gatusan ka tuig sa usa ka pinulongan nga wala niya mahibaloi nagagikan sa Dios.

Si Emma Smith, unang tigsulat sa trabaho sa iyang bana, mipamatuod niining balaan nga gasa: “Walay tawo nga makadiktar sa sinulat sa mga manuskrito gawas kon siya nadasig; sa dihang [ako] nahimo niyang tigsulat, si [Joseph] modiktar ngari kanako sa tibuok oras; ug mobalik na human mokaon, o human makahunong, siya mosugod na usab diin siya mihunong; nga dili na motan-aw sa manuskrito o ipabasa pa ang bahin niini ngadto kaniya.”¹

Ang Ginoo mihatag sa Propeta og importante nga temporal nga tabang nga nakahimo kaniya sa pagpadayon sa buhat sa paghubad. Si Joseph Knight Sr., usa ka higala sa Propeta, mihatag ni Joseph og kwarta ug pagkaon sa daghang mga higayon. Sa usa ka malisud nga higayon, si Brother Knight mibiyahi ngadto sa panimalay sa Propeta aron hatagan si Joseph ug Oliver og “de lata nga sardinas ug mga papel nga kasulatan,” uban sa “siyam o napulo ka balde sa bugas ug lima o unom ka balde sa mga patatas.” Si Brother Knight nahinumdom, “Si Joseph ug Oliver … mipauli ug nakakita kanako nga nagdala og pagkaon, ug nalipay sila, kay nahutdan na sila.²

Niadtong Abril ug Mayo 1829, ang pagpanggukod nakabalda pag-ayo sa trabaho sa Propeta sa paghubad diha sa iyang panimalay sa Harmony, Pennsylvania. Si Oliver Cowdery misulat ngadto sa usa ka higala, nga si David Whitmer, nagsulti kaniya mahitungod sa sagrado nga buhat ug mihangyo kaniya sa pagtugot nga mapadayon ang buhat sa panimalay sa Whitmer sa Fayette, New York. Sa ulahing bahin sa Mayo o sayo sa Hunyo 1829, ang Propeta ug si Oliver mibiyahe uban ni David Whitmer sa iyang usa ka kabayo nga karwahe ngadto sa panimalay sa umahan sa amahan ni David, nga si Peter Whitmer Sr. Sa bulan sa Hunyo, sa kwarto sa taas sa panimalay sa Whitmer, ang paghubad nakompleto pinaagi sa gasa ug gahum sa Dios.

Gihulagway ni Oliver Cowdery ang talagsaong kasinatian sa pagserbisyo isip tigsulat sa Propeta: “Kini ang mga adlaw nga dili gayud makalimtan—nga naglingkod ubos sa tunog sa usa ka tingog nga gidiktahan pinaagi sa lamdag gikan sa langit, nakapahigmata sa tuman nga pagpasalamat niini nga dughan! Adlawadlaw ako mipadayon sa walay hunong, sa pagsulat gikan sa iyang ba-ba, samtang siya mihubad uban sa Urim ug Thummim … ang kasaysayan o rekord nga gitawag og ‘Ang Basahon ni Mormon.’”³

Niining higayona, si Joseph Smith nakakat-on nga ang balaan nga gasa anaa lamang kaniya kon siya takus nga magiyahan sa Espiritu. Si David Whitmer nahinumdom: “Usa niana ka buntag si [Joseph Smith] nag-andam aron mopadayon sa paghubad, dihay dili maayong nahitabo sa balay ug siya nasuko mahitungod niini. Butang nga nabuhat ni Emma, iyang asawa. Si Oliver ug ako miadto sa taas, ug si Joseph misunod aron ipadayon ang paghubad, apan wala gayud siya makahimo. Dili siya makahubad bisag usa ka silabo. Mikanaog siya, miadto sa tanaman ug nangamuyo sa Ginoo; mibiya siya og mga usa ka oras—mibalik sa balay, nangayo og pasaylo ni Emma ug misaka diin kami mahimutang ug ang paghubad nagpadayon nga maayo ra. Wala siyay mahimo gawas kon siya magpaubos ug magmatinud-anon.”⁴

Pinaagi sa pagpaubos ug pagmatinud-anong paggamit sa gasa sa Dios nga gihatag kaniya, ang batan-ong Propeta nakahimo sa ingon ka imposible nga buhat sa paghubad sa hapit tibuok nga Basahon ni Mormon sa sayong bahin sa Abril ug sa katapusan sa Hunyo 1829.

Mga Pagtulun-an ni Joseph Smith

Kitang tanan gihatagan og mga gasa sa Espiritu, ang mga gasa sa matag tawo gikinahanglan diha sa Simbahan.

Mga Artikulo sa Hugot nga Pagtuo 1:7: “Kami nagtuo sa gasa sa mga pinulongan, pagpanagna, pagpadayag, mga panan-awon, pagpang-ayo, pagpanghubad sa mga pinulongan, ug uban pa.”⁵

“Kita … nagtuo sa panagna, sa mga pinulongan, sa mga panan-awon, ug sa mga pagpadayag, sa mga gasa, ug sa mga pagpang-ayo; ug nga kining mga butanga dili maangkon kon wala ang gasa sa Espiritu Santo.”⁶

Si Amasa Potter nahinumdom: “Ako nahinumdom sa Propeta nga mibarug aron sa pagsangyaw sa usa ka dako nga katiguman didto sa kakahoyan sa kasadpan sa Templo sa Nauvoo. Siya mipahayag nga siya mosangyaw sa espirituhanong mga gasa…. Mipahayag si Joseph nga ang matag Santos sa Ulahing mga Adlaw adunay usa ka gasa, ug pinaagi sa pagpuyo og matarung nga kinabuhi, ug sa pagpangayo niini, ang Balaan nga Espiritu mopadayag niini ngadto kaniya.”⁷

“Si Pablo miingon, ‘Sa usa gihatag ang gasa sa pagsulti og mga dila, sa lain ang gasa sa panagna, ug sa lain ang gasa sa pagpang-ayog mga sakit;’ ug usab: ‘Ang tanan ba nanagna? Ang tanan ba nagsulti og mga pinulongan? Ang tanan ba makahubad?’ karong nagpakita nga ang tanan wala makaangkon niining daghang mga gasa; apan nga ang usa nakadawat og usa ka gasa, ug ang lain nakadawat og laing gasa—ang tanan wala managna, ang tanan wala magsulti og mga dila, ang tanan wala magbuhat og mga milagro; apan ang tanan nakadawat og gasa sa Espiritu Santo; usahay sila mamulong sa mga pinulongan ug managna sa panahon sa mga Apostoles, ug usahay sila dili makahimo….

“Ang Simbahan usa ka lig-on nga pundok nga naglangkub sa lain-laing mga miyembro, ug matandi gayud ngadto sa tawhanong sistema, ug si Pablo, human maghisgot sa lain-laing mga gasa, miingon, ‘Karon kamo ang lawas ni Kristo ug mga miyembro; ug ang Dios mipahimutang sa uban sa Simbahan, una mga Apostoles, ikaduha mga Propeta, ikatulo mga Magtutudlo, human niana nga mga milagro, dayon mga gasa sa pagpang-ayo, mga tabang, mga gobyerno, nagkalain-lain nga mga pinulongan. Ang tanan ba Magtutudlo? Ang tanan ba nagbuhat og mga milagro? Ang tanan ba nagsulti og mga dila? Ang tanan ba mohubad?’ Klaro nga dili ang tanan; hinoon silang tanan mga miyembro sa usa ka lawas. Ang tanang mga miyembro sa natural nga lawas dili ang mata, ang dunggan, ang ulo o ang kamot—hinoon ang mata dili makasulti sa dunggan nga wala ko magkinahanglan kanimo, ni ang ulo ngadto sa tiil, wala ko magkinahanglan kanimo; kining tanan kabahin sa daghan kaayo nga mga bahin sa hingpit nga makinarya—ang usa ka lawas; ug kon ang usa ka miyembro mag-antus, ang tibuok mga miyembro mag-antus uban niini: ug kon ang usa ka miyembro malipay, ang tanan maapil niini [Tan-awa sa 1 Mga Taga-Corinto 12:9–10, 18–21, 26–30.]

“Kini, mao ang tanang mga gasa, nagagikan kini sa Dios; iya kini sa Dios; kining tanan mao ang mga gasa sa Espiritu Santo.”⁸

Kita makadawat og mga gasa sa Espiritu pinaagi sa pagkamasulundon ug hugot nga pagtuo.

“Tungod kay kulang ang hugot nga pagtuo, kulang usab ang mga bunga. Walay tawo sukad sa paglalang sa kalibutan ang adunay pagtuo nga walay butang nga nag-uban niini. Ang matinud-anon sa karaang panahon mipahunong sa kapintas sa kalayo, miikyas gikan sa espada, ang mga babaye nakadawat sa ilang mga patay, ug uban pa. Pinaagi sa hugot nga pagtuo ang mga kalibutan nabuhat. [Tan-awa sa mga Hebreohanon 11:3, 34–35.] Ang tawo nga walay mga gasa walay hugot nga pagtuo; ug iyang giilad ang iyang kaugalingon, kon siya nagdahum nga siya aduna. Ang hugot nga pagtuo kulang, dili lamang sa mga pagano, apan sa nagpatuo usab nga kristohanon, mao nga ang mga pagsulti og mga pinulongan, mga pagpang-ayo sa sakit, panagna, ug mga propeta ug mga apostoles, ug ang tanang mga gasa ug mga panalangin nakulangan.”⁹

“Kini nga tingtugnaw [1832–33] gigahin sa paghubad sa mga Kasulatan; sa Tulunghaan sa mga Propeta; ug sa pagtambong sa mga komperensya. Ako adunay daghang mahimayaon nga mga panahon nga malagsik. Ang mga gasa nga misunod kanila nga mituo ug misunod sa Ebanghelyo, isip mga timaan nga ang Ginoo walay pagkausab sa Iyang pagpakig-atubang sa mapainubsanon nga mga mahigugmaon ug mga sumusunod sa kamatuoran, gisugdan sa pagbu-bu nganhi kanato, sama sa karaang mga adlaw.”¹⁰

Si Edward Stevenson diha sa dihang si Joseph Smith nagsangyaw didto sa Pontiac, Michigan, niadtong 1834. Nahinumdom siya niini nga mga pulong sa Propeta: “Kon kamo mosunod sa Ebanghelyo uban sa matinuoron nga mga kasingkasing, ako mosaad kaninyo sa pangalan sa Ginoo, nga ang mga gasa nga gisaad sa atong Manluluwas inyong madawat, ug pinaagi niini kamo makapamatuod kanako nga usa ka tinuod nga sulugoon sa Dios.”¹¹

Mga Gasa sa Espiritu sa kasagaran madawat sa hilom ug sa pribado, nga walay dayag nga mga pagpangita.

“Nagkalain-lain ug nagkasumpaki ang opinyon sa mga tawo kabahin sa gasa sa Espiritu Santo. Nahimong kinaiya sa ubang mga tawo ang pagtawag sa katingalahang mga pagpakita nga mga epekto sa Espiritu sa Dios, samtang adunay uban nga naghunahuna nga walay mga pagpakita konektado niini; ug nga kini walay hinungdan apan bunga lamang sa hunahuna, o pagbati, impresyon, o sekreto nga pagpamatuod o ebidensya, nga gihuptan sa mga tawo, nga wala ang mao nga butang nga dayag nga pagpakita.

“Dili ikatingala nga ang mga tawo ignorante, kaayo, sa mga baruganan sa kaluwasan, ug ilabi na sa kinaiya, katungdanan, gahum, impluwensya, mga gasa, ug mga panalangin sa gasa sa Espiritu Santo; kon atong hunahunaon nga ang tawhanong pamilya gitabunan sa dakong kangitngit ug ka ignorante sa daghang mga katuigan, nga walay pagpadayag, o bisan unsa nga tukma nga sumbanan [diin] aron makahibalo sa mga butang sa Dios, nga mahimo lamang nga mahibaloan pinaagi sa Espiritu sa Dios. Mao nga kanunay nga mahitabo, nga kon ang mga Elder niini nga Simbahan mosangyaw ngadto sa mga lumulupyo sa kalibutan, nga kon sila mosunod sa Ebanghelyo sila makadawat sa gasa sa Espiritu Santo, nga ang mga tawo makapaabot nga makakita og pipila ka talagsaong pagpakita, ang uban nagpakita og hilabihan nga gahum o dili ordinaryo nga gihimo nga milagro….

“Ang tawhanong pamilya adunay kalagmitan nga magpasulabi, ilabi na sa relihiyoso nga mga butang, ug mao nga ang mga tawo sa kasagaran gusto og ubang milagroso nga pagpakita, o sila dili motuo sa gasa sa Espiritu Santo. Kon ang usa ka Elder mopandong sa iyang mga kamot diha sa usa ka tawo, nagdahom ang kadaghanan nga kana nga tawo mobarug dayon ug mosulti og mga pinulongan ug managna; kini nga ideya gikuha gikan sa hitabo sa pagpandong ni Pablo sa iyang mga kamot sa usa ka indibidwal kinsa nabunyagan na (sumala sa ilang gipahayag) sa bunyag ni Juan; nga iyang gibuhat, sila namulong sa mga pinulongan ug nanagna.’ [Tan-awa sa Mga Buhat 19:1–6.] …

“Kita nagtuo nga ang Espiritu Santo ihatag pinaagi sa pagpandong sa mga kamot niadtong adunay awtoridad, ug nga ang gasa sa mga pinulongan, ug usab ang gasa sa pagpanagna mga gasa sa Espiritu, ug naangkon pinaagi niana nga paagi; apan sa pag-ingon nga ang mga tawo kanunay nga nanagna ug nagsulti og mga pinulongan kon napandungan sila sa mga kamot, mao ang pagsulti niana nga dili tinuod, supak sa gibuhat sa mga Apostoles, ug nagsukwahi sa balaan nga kasulatan….

“ … Ang tanang mga gasa sa Espiritu dili makita sa natural nga pagtan-aw, o pagsabut sa tawo; sa pagkatinuod pipila lang kanila…. Pipila lang niini ang mailhan sa kadaghanang mga tawo. Si Pedro ug si Juan mga Apostoles, bisan pa ang korte sa Judeo mipasangil kanila nga mga impostor. Si Pablo usa ka Apostol ug Propeta, bisan pa sila mibato kaniya ug mibalhug kaniya sa prisohan. Ang mga tawo walay nasayran mahitungod niini, bisan og anaa kaniya ang gasa sa Espiritu Santo. Ang atong Manluluwas gidihogan og lana sa kalipay labaw sa iyang mga kauban’ [Mga Hebreohanon 1:9], apan ang mga tawo layo ra kaayo nga makaila Kaniya, sila miingon Siya si Beelzebu, ug ilansang Siya isip usa ka impostor. Kinsa ang makatudlo sa usa ka Pastor, usa ka Magtutudlo, o usa ka Ebanghelista pinaagi sa ilang panagway, apan sila aduna sa gasa sa Espiritu Santo?

“Apan sa paghisgot sa ubang mga miyembro sa Simbahan, ug mosusi sa mga gasa nga gihisgutan ni Pablo, atong mahibaloan nga ang kalibutan walay nahibaloan mahitungod niini, ug nga adunay usa o duha nga mahibaloan dayon, kon kining tanan ibu-bu dayon pinaagi sa pagpandong sa mga kamot. Sa [1 Mga Taga-Corinto 12:4–11], si Pablo miingon, ‘Adunay nagkalain-lain nga mga gasa, apan adunay mao rang usa ka Espiritu; ug adunay nagkalain-laing pag-alagad, apan mao rang usa ka Ginoo; ug adunay nagkalain-laing kalihokan, apan mao rang usa ka Dios nga nagadasig niining tanan diha sa matag usa. Apan ngadto sa matag usa gikahatag ang kahibalo sa Espiritu alang sa kaayohan sa tanan. Ngadto sa usa gihatag ang pulong sa kaalam pinaagi sa Espiritu, ug ngadto sa usa gihatag ang pulong sa kahibalo sumala sa mao ra nga Espiritu; ngadto sa usa gihatag ang pagtuo pinaagi sa mao ra nga Espiritu, ug ngadto sa usa gihatag ang mga gasa sa pagpang-ayog sakit pinaagi sa mao rang usa ka Espiritu; ngadto sa usa gihatag ang gahum sa paghimo’g mga milagro, ug ngadto sa usa ang paghimo’g panagna, ug ngadto sa usa ang katakus sa pag-ila sa mga nagkalain-laing espiritu, ug ngadto sa usa ang nagkalain-laing pagpanulti’g mga dila, ug ngadto sa usa ang paghubad sa panulti’g mga dila. Kining tanan nadasig pinaagi sa usa ug mao rang Espiritu nga nagaapud-apod niini ngadto sa matag usa sumala sa iyang kabubut-on.’

“Adunay daghang mga gasa ang gihisgutan dinhi, apan hain niining tanan ang mailhan sa nagtan-aw sa dihang gipandong ang mga kamot? Ang alamag sa Espiritu, ug ang pulong sa kahibalo,mga gasa sama sa uban, apan kon ang tawo nakaangkon niini nga mga gasa, o nakadawat niini pinaagi sa pagpandong sa mga kamot, kinsa ang makahibalo niini? Ang lain mahimong makadawat sa gasa sa pagtuo, ug sila ignorante niini. O pananglit ang usa ka tawo adunay gasa sa pagpang-ayo o gahum sa pagbuhat og mga milagro, dili kana mahibaloan, nagkinahanglan kini og panahon ug mga kahigayunan sa paggamit niini nga mga gasa. Pananglit ang tawo makaila sa mga espiritu, kinsa ang makaila niini? O siya makahubad sa panulti’g mga dila, gawas kon ang usa ka tawo nagsulti’g wala mahibaloi nga pinulongan, siya mismo magpakahilom; adunay duha lamang ka mga gasa nga mahimong makita—ang gasa sa mga pinulongan ug ang gasa sa pagpanagna. Kining mga butanga nga maoy kanunay nga gihisgutan, ug bisan pa kon ang usa ka tawo namulong sa wala mahibaloi nga pinulongan, sumala sa pagpamatuod ni Pablo, siya mahimong usa ka luog niadtong mga nanambong [tan-awa sa 1 Mga Taga-Corinto 14:11]. Sila moingon nga kini walay kapuslanan; ug kon siya managna sila motawag niini nga walay hinungdan. Ang gasa sa mga pinulongan mao ang labing gamay nga gasa tingali sa tanan, ug bisan pa kini mao ang labing pinangita.

“Busa sumala sa pagpamatuod sa Kasulatan ug sa mga pagpakita sa Espiritu sa karaang mga adlaw, gamay ra ang mahibaloan niini sa mga katawhan sa palibut, gawas sa pipila ka dili ordinaryo nga mga okasyon, sama sa adlaw sa Pentecostes. Ang labing dako, labing maayo, ug ang labing mapuslanon nga mga gasa dili mahibaloan sa usa ka nag-obserbar….

“Ang mga pagpakita sa gasa sa Espiritu Santo, ang mga pagpangalagad sa mga anghel, o ang kalamboan sa gahum, kaharianon o himaya sa Dios panagsa ra ipakita sa publiko, ug nga sa kasagaran ngadto sa mga katawhan sa Dios, sama ngadto sa mga Israelite; apan sa kasagaran kon ang mga anghel moabut, o ang Dios mopadayag sa Iyang kaugalingon, nahitabo kini sa mga indibidwal sa pribado, sa ilang kwarto, sa kamingawan, sa kaumahan, ug nga sa kasagaran walay kasaba o kaguliyang. Ang anghel miluwas ni Pedro gikan sa prisohan sa tungang gabii, nagpakita ni Pablo nga wala mamatikdi sa ubang mga tawo; nagpakita ngadto ni Maria ug ni Elizabeth nga wala mahibaloi sa uban; nagkigsulti ni Juan Bautista samtang ang mga tawo sa palibut wala masayud niini.

“Sa dihang si Eliseo nakakita sa mga carro sa kalayo sa Israel ug sa mga nanagkabayo niini, kini wala mahibaloi sa uban. Sa dihang ang Ginoo nagpakita ngadto ni Abraham didto kini sa pultahan sa iyang tolda; sa dihang ang mga anghel miadto kang Lot, walay tawo nga nakaila kanila gawas kaniya, nga mao tingali ang hitabo uban ni Abraham ug sa iyang asawa; sa dihang ang Ginoo nagpakita ngadto ni Moises, diha kini sa nagsiga nga sampinit, sa tabernakulo, o sa ibabaw sa bukid; sa dihang si Elijah gidala sa carro sa kalayo, wala kini mamatikdi sa kalibutan; ug sa dihang siya diha sa liki sa usa ka bato, dihay makusog nga dugdog, apan ang Ginoo wala diha sa dugdog; dihay linog, apan ang Ginoo wala diha sa linog; ug dayon dihay hinay ligdong nga tingog, nga mao ang tingog sa Ginoo, nag-ingon, ‘Unsay gibuhat nimo dinhi, Elijah?’ [Tan-awa sa 1 Mga Hari 19:11–13.]

“Ang Ginoo dili kanunay mailhan pinaagi sa dugdog sa Iyang tingog, pinaagi sa pagpakita sa Iyang himaya o pinaagi sa pagpakita sa Iyang gahum; ug kadtong naghinamhinam nga makakita niining mga butanga, mao ang labing dili andam sa pagtan-aw kanila, ug kon ang Ginoo mopakita sa Iyang gahum sama sa Iyang gibuhat sa mga anak ni Israel, ang mao nga mga tawo mao ang unang mosulti, “Ayaw pasultiha kanamo ang Ginoo aron kami dili mamatay.’ [Tan-awa sa Exodo 20:19.]”¹²

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Ang Ginoo mihatag ni Propeta Joseph Smith og gasa aron makahimo sa paghubad sa bulawan nga mga palid (mga pahina 135–37). Kanus-a ang Ginoo mihatag kaninyo og mga gasa sa pagtabang kaninyo sa pag-apil sa Iyang buhat?
Unsay atong makat-unan gikan sa istorya nga gisaysay ni David Whitmer sa pahina 136? Unsa nga mga kasinatian sa inyong kaugalingong mga kinabuhi ang nakatudlo kaninyo nga kamo kinahanglan nga magpakatakus aron makagamit sa inyong espirituhanong mga gasa?
Ribyuha ang seksyon nga nagsugod sa pahina 137. Sa unsa nga mga paagi nga ang Simbahan matabangan sa mga miyembro nga adunay lain-laing mga gasa sa Espiritu? Sa unsa nga paagi kamo natabangan gikan sa espirituhanong mga gasa sa uban? Kanus-a kamo nakakita og mga tawo nga adunay lain-laing mga gasa nga naghiusa sa pagtabang sa usag usa?
Tun-i ang seksyon sa mga pahina 138–39. Hunahunaa ang pipila ka espirituhanong mga gasa nga personal nga makapalig-on kaninyo o makatabang kaninyo sa pagserbisyo sa Ginoo ug sa uban. Tinoa kon unsay inyong mahimo sa “pagpangita sa matinguhaon nga paagi sa labing maayo nga mga gasa” (D&P 46:8).
Ribyuha ang seksyon nga nagsugod sa ubos nga pahina 139. Hunahunaa ang mahitungod o hisguti ang piho nga tambag nga inyong makaplagan mahitungod kon sa unsa nga paagi nga ipakita ang espirituhanong mga gasa. Ngano nga importante nga mahinumduman nga ang espirituhanong mga gasa “panagsa ra ipakita sa publiko”? (pahina 142). Ngano sa inyong pagtuo nga daghan sa espirituhanong mga gasa moabut sa hilom ug sa pribado nga paagi? Ngano nga importante nga mahinumdom nga daghan sa mga gasa nagkinahanglan og “panahon ug mga kahimtang aron [kini] magamit”? (pahina 142).
Human mabasa kini nga hugna, unsa ang inyong ikasulti nga pipila ka mga katuyoan sa espirituhaong mga gasa?

May Kalabutan nga mga Kasulatan: 1 Mga Taga-corinto 12:1–31; 3 Nephi 29:6; Moroni 10:6–23; D&P 46:8–33

Book of Mormon manuscript — Usa ka porsyon sa usa ka pahina gikan sa orihinal nga manuskrito sa Basahon ni Mormon. Ang mga pulong nga gipakita kabahin sa asoy ni Lehi sa iyang panan-awon sa kahoy sa kinabuhi, nga makita sa 1 Nephi 8:11–23.

Abraham receiving inspiration — “Ang gahum, kaharianon o himaya sa Dios panagsa ra ipakita sa publiko…. Sa dihang ang Ginoo nagpakita ngadto ni Abraham didto kini sa pultahan sa iyang tolda [see Genesis 18:1].”