Hugna 33: Ang Espirituhanong mga Gasa sa Pag-ayo, mga Pinulongan, mga Panagna, ug Pag-ila sa mga Espiritu

Hugna 33

Ang Espirituhanong mga Gasa sa Pag-ayo, mga Pinulongan, mga Panagna, ug Pag-ila sa mga Espiritu

“Walay tawo nga mahimong usa ka ministro ni Jesukristo gawas kon siya adunay pagpamatuod ni Jesus; ug kini mao ang espiritu sa panagna.”

Gikan sa Kinabuhi ni Joseph Smith

Human sa usa ka mubo nga panahon nga pagdangop sa Quincy, Illinois, atol sa unang mga bulan niadtong 1839, ang mga Santos misugod sa paglakaw og mga 80 kilometros sa habagatan ngadto sa pamuy-anan sa Commerce, Illinois. Human sa iyang pag-eskapo gikan sa iyang pagkabilanggo sa Missouri, ang Propeta nagsugod sa pagpalit og mga luna sa yuta sulod ug palibut sa Commerce isip mga dapit nga pundokanan alang sa liboan kinsa mipahawa sa Missouri ug karon nagkinahanglan og dapit nga tukoran pag-usab sa ilang mga kinabuhi. Pagka Hulyo 1839, gatusan ka mga Santos ang nag-kampo ginamit ang mga tolda ug mga karwahe didto sa sidlakang dapit sa Suba sa Mississipi sa Commerce, samtang ang uban nakakita og kapasilongan sa gibiyaan nga mga barracks sa militar sa pikas bahin sa Suba sa Montrose, Iowa. Niini nga bag-ong panimalay, ang mga Santos nitrabaho aron paghinlo ug pagpahubas sa lamakan nga dapit duol sa suba. Daghan sa mga miyembro sa Simbahan gipamaak sa mga lamok ug grabe nga nangasakit og malarya ug uban pang mga sakit. Uban nga mga Santos nangamatay, ug ang uban hapit namatay. Si Joseph ug si Emma Smith mipasulod og daghan ngadto sa panimalay nga hinimo sa troso aron sa pag-atiman diin ang propeta mihatag sa iyang higdaanan hinungdan nga siya matulog sa gawas diha sa usa ka tolda.

Pagka-Hulyo 22, taliwala sa mga sakit nga mitakboy sa kadaghanan, ang mga Santos nakasaksi og usa ka gitawag ni Elder Wilford Woodruff nga “usa ka adlaw sa gahum sa Dios.”¹ Nianang buntaga ang Propeta mibangon, mitawag sa Ginoo diha sa pagampo, ug, napuno sa espiritu sa Ginoo, nangalagad sa mga masakiton diha sa iyang balay, sa nataran sa gawas, ug sa ubos dapit sa suba. Mitabok siya sa suba ug mibisita sa panimalay ni Brigham Young sa Montrose aron paghatag kaniya ug panalangin nga mamaayo. Dayon, kauban si Sidney Rigdon, Brigham Young, ug ubang mga sakop sa Napulog duha, siya mipadayon sa iyang misyon sa kalooy ngadto sa ubang mga Santos sa Iowa. Si Elder Woodruff nakahinumdom sa usa sa pinaka halandumon nga mga pag-ayo nianang adlawa:

“Mitabok kami sa plaza, ug misulod sa balay ni Brother [Elijah] Fordham. Si Brother Fordham naghingutas sulod na sa usa ka oras, ug nagpaabut mi nga ang matag minuto iya nang katapusan. Akong nabatyagan ang gahum sa Dios nga milukop sa Propeta. Dihang misulod kami sa balay, si Brother Joseph mipaingon ngadto ni Brother Fordham, ug mikuha kaniya sa tuong kamot…. Iyang nakita nga ang mga mata ni Brother Fordham lubog na, ug siya dili na makasulti ug walay panimuot.

“Human guniti sa iyang kamot, [ang Propeta] mitan-aw sa ubos ngadto sa nawong sa himatyon nga tawo og miingon: ‘Brother Fordham, wala ka makaila kanako?’ Sa una wala siya motubag; apan kaming tanan nakakita sa epekto sa Espiritu sa Dios diha kaniya.

“[Si Joseph] miingon na usab: ‘Elijah, wala ka ba makaila kanako?’ Uban sa hinay nga hagawhaw, si Brother Fordham mitubag, ‘Oo!’ Ang Propeta dayon miingon, ‘Ikaw ba walay hugot nga pagtuo aron maayo?’

“Ang tubag, nga mas klaro kay sa una, mao: ‘Nahadlok ako nga ulahi na kaayo. Kon miabut ka pa unta og sayo, nagtuo ko nga mamaayo pa ako.’ Siya adunay panagway sa usa ka tawo nga mimata gikan sa pagkatulog. Kadto mao ang katulog sa kamatayon. Si Joseph dayon miingon: ‘Wala ba ikaw motuo nga si Jesus mao ang Kristo?’ ‘Ako mituo, Brother Joseph,’ mao ang tubag.

“Dayon ang Propeta sa Dios misulti sa makusog nga tingog, ingon sa kahalangdon sa Dios nga Kapangulohan: ‘Elijah, ako nagmando kanimo, sa pangalan ni Jesus ang taga Nazaret, sa pagbangon ug pagpakaayo!”

“Ang mga pulong sa Propeta dili sama sa mga pulong sa tawo, apan sama sa tingog sa Dios. Alang kanako mao ra og ang balay natay-og gikan sa pundasyon niini. Si Elijah Fordham milayat gikan sa iyang higdaanan sama sa usa ka tawo nga gibangon gikan sa pagkamatay. Usa ka himsog nga kolor diha sa iyang nawong, ug makita ang kinabuhi sa matag lihok. Ang iyang mga tiil giputos sa mga hampol nga ginaling sa mais [corn meal]. Iya kining gipalagpot gikan sa iyang mga tiil, nga nakatag ang mga sulod, ug unya nangayo sa iyang mga sinina ug gisul-ob kini. Nangayo siya og panaksan sa pan ug gatas, ug mikaon niini; dayon gisul-ob ang iyang kalo ug misunod kanamo ngadto sa dalan, aron pagbisita sa uban nga nangasakit.”²

Sa panahon nga labihan kadako ang panginahanglan, ang mga Santos nakasinati og usa ka pagbubo sa gasa sa pag-ayo sa mga kamot sa Propeta.

Mga Pagtulun-an ni Joseph Smith

Ang masakiton mamaayo pinaagi sa hugot nga pagtuo ug sa paggamit sa gahum sa priesthood, sumala sa kabubut-on sa Ginoo.

“Unsa ang timailhan sa pag-ayo sa masakiton? Ang pagpandong sa mga kamot mao ang timailhan o paagi nga gipasabut og maayo ni Santiago, ug ang kinaiya sa karaang mga Santos sumala sa gimando sa Ginoo, ug kita dili makaangkon og panalangin pinaagi sa pagtinguha og bisan unsa nga paagi gawas sa paagi nga gilagda sa Ginoo [tan-awa sa Santiago 5:14–15].”³

Pagka-Hulyo 1839, diha nga ang mga Santos bag-o pa lang nakabalhin sa Commerce, Illinois, ug daghan ang nangasakit kanila, si Joseph Smith mi-rekord: “Kadaghanan sa mga sakit nagsugod sa pagtakboy diha sa mga kaigsoonan, ingon man sa mga nanagpuyo sa dapit, mao nga niini nga semana ug ang mga misunod pa tanan gigahin sa pagbisita sa masakiton ug sa pagpangalagad ngadto kanila; ang uban adunay igong hugot nga pagtuo ug nangaayo; ang uban wala….

“Dominggo 28.—Ang miting gihimo sama sa kasagaran…. Ako namulong, ug mitambag sa mga miyembro sa Simbahan sa paghan-ay sa ilang mga panimalay, hinloan ang sulod nga bahin sa mga baso ug pinggan, ug sa pagtigum sa sunod nga igpapahulay aron pag-ambit sa Sakramento, aron pinaagi sa among pagkamasulondon ngadto sa mga ordinansa, kami tingali mahimong molampus uban sa Dios batok sa tiglaglag, ug nga ang masakiton mamaayo. Sa tibuok semana nga gigahin sa mga masakiton, kinsa sa kinatibuk-an nagkaanam na kalig-on, ug nagkaarangarang na ang panglawas.”⁴

“Daghan sa mga matarung masugamak sa mga sakit, sa kamatay, ug uban pa, tungod sa katarungan nga ang unod huyang, apan sa gihapon maluwas diha sa Gingharian sa Dios. Mao nga kini usa ka dili maayo nga baragunan ang pag-ingon nga kini nga tawo ug kana nga tawo nakasala tungod kay sila nabiktima sa sakit o kamatayon, kay ang tanan nga unod moagi gayud sa kamatayon; ug ang Manluluwas nag-ingon, ‘Ayaw kamo pagpanghukom sa uban, aron dili kamo pagahukman.’ [Tan-awa sa Mateo 7:1.]”⁵

Ang katuyoan sa gasa sa mga pinulongan mao ang pagtudlo sa ebanghelyo ngadto sa uban.

Ang Propeta namulong sa usa ka komperensya sa mga elder niadtong 1834: “Si Joseph Smith dayon mihatag og pagpasabut sa gasa sa mga pinulongan, nga kini gihimo ilabi na gayud sa pagsangyaw sa Ebanghelyo ngadto sa uban nga mga nasud ug mga pinulongan, apan kini wala ihatag alang sa pangagamhanan sa Simbahan.”⁶

“Mahitungod sa gasa sa mga pinulongan, ang amo lang masulti mao, nga niining dapita, kami nakadawat niini sama sa nadawat sa mga anciano: kami nagtinguha nga kamo, hinoon, mag-amping kay basin niini kamo malingla…. Si satanas walay duda nga mosamok kaninyo kalabut sa gasa sa mga pinulongan, gawas kon kamo mag-amping; kamo dili makabantay kaniya og maayo, ni makaampo og maayo. Unta ang Ginoo mohatag kaninyo og kaalam sa tanang mga butang,”⁷

“Ako mibasa sa ika-13 nga kapitulo sa Unang Mga Taga-Corinto [sa usa ka miting nga gihimo niadtong Disyembre 26, 1841], ingon man ang usa ka bahin sa ika-14 nga kapitulo, ug misulti nga ang gasa sa mga pinulongan gikinahanglan sa Simbahan; … ang gasa sa mga pinulongan pinaagi sa gahum sa Espiritu Santo diha sa Simbahan, alang sa kaayohan sa mga sulugoon sa Dios aron pagsangyaw ngadto sa mga dili tumutuo, sama sa adlaw sa Pentecostes.”⁸

“Mga pinulongan gihatag sa katuyoan sa pagsangyaw ngadto niadtong kinsang mga pinulongan dili masabtan; sama sa adlaw sa Pentecostes, ug uban pa, ug dili kinahanglan alang sa mga pinulongan nga itudlo ilabi na sa Simbahan, kay bisan kinsa nga tawo nga anaa ang Espiritu Santo, makasulti sa mga butang sa Dios sa iyang kaugalingong pinulongan ingon man sa pagsulti sa lain; kay ang hugot nga pagtuo moabut dili pinaagi sa mga timailhan, apan pinaagi sa pagpaminaw sa pulong sa Dios.”⁹

“Ayaw kaayo pagkakuryuso mahitungod sa mga pinulongan, ayaw pagsulti sa mga pinulongan gawas kon adunay tighubad; ang katapusang katuyoan sa mga pinulongan mao ang pagpakigsulti sa mga langyaw, ug kon ang mga tawo ganahan kaayo magpakita sa ilang kahibalo, tugoti sila nga mosulti sa ingon sa ilang kaugalingong pinulongan. Ang tanan nga gasa sa Dios magamit sa ilang dapit, apan kon kini gamiton ngadto sa katuyoan nga dili sa Dios, kini makita nga makadaot, usa ka laang ug usa ka tunglo imbis nga usa ka panalangin.”¹⁰

“Duna usab kitay mga kaigsoonan nga mga lalaki ug mga babaye kinsa nakabaton og sayop nga gasa sa pinulongan; sila mosulti nga nagyamyam nga dili masabtan, dili natural nga tingog, ug ang ilang mga lawas mahiwi …; nga unta, wala may dili natural diha sa Espiritu sa Dios.”¹¹

“Ayaw pagsulti pinaagi sa gasa sa mga pinulongan nga dili makasabut niini, o walay paghubad. Ang demonyo makasulti og mga pinulongan; ang kaaway moabut sa iyang gimbuhaton; siya mahimong motintal sa tanang matang sa tawo; makasulti og Ininglis o Dutch. Ayaw itugot nga adunay mosulti og mga pinulongan gawas kon siya mohubad, gawas kon adunay pagtugot sa tawo nga gibutang aron sa pagdumala; dayon siya mahimong mahibalo o mohubad, o lain ang mohimo.”¹²

“Kon kamo adunay butang nga angay ipadayag, himoa kini sa imong kaugalingong pinulongan, ayaw pagpalabi sa paggamit sa gasa sa mga pinulongan, o tingali ang yawa mopahimulos sa inosente ug sa wala makahibalo. Kamo mahimong mosulti og mga pinulongan alang sa kaugalingon nimo nga gusto, apan ako kining ihatag isip usa ka lagda, nga kon aduna man gani itudlo pinaagi sa gasa sa mga pinulongan, kini dili pagadawaton nga doktrina.”¹³

Bisan kon usa ra ka tawo ang mosulti isip propeta sa Simbahan, ang espiritu sa pagpanagna makapahimo sa tanan nga mopamatuod ni Jesukristo.

“Walay tawo nga tig-alagad ni Jesukristo nga dili usa ka Propeta. Walay tawo ang mahimong tig-alagad ni Jesukristo gawas kon siya adunay pagpamatuod ni Jesus; ug kini mao ang espiritu sa pagpanagna [tan-awa sa Pinadayag 19:10].”¹⁴

“Si Juan ang Tigpadayag nag-ingon nga ang pagpamatuod kang Jesus mao ang espiritu sa pagpanagna [tan-awa sa Pinadayag 19:10]. Karon kon anaay tawo nga adunay pagpamatuod ni Jesus, wala ba kaniya ang espiritu sa pagpanagna? Ug kon siya aduna nianang espiritu sa pagpanagna, ako mangutana, dili ba siya usa ka propeta? Ug kon siya usa ka propeta, dili ba siya makadawat og pagpadayag? Ug kon adunay tawo nga dili makadawat og pagpadayag alang sa iyang kaugalingon kinahanglan nga tunglohon, kay ang pagpamatuod kang Jesus mao ang espiritu sa pagpanagna. Kay si Kristo nag-ingon, pangayo ug kamo makadawat; ug kon mahitabo nga makadawat siya og bisan unsa, ako mangutana, dili ba kini pagpadayag? Ug kon adunay tawo nga walay pagpamatuod ni Jesus o sa espiritu sa Dios, dili siya iya; nga ginganlan og Kristo. Ug kon dili iya, siya kinahanglan nga pagatungluhon.”¹⁵

Usa ka bisita sa Nauvoo mi-rekord nga si Joseph Smith mitudlo sa mosunod panahon sa usa ka panagsultihanay: “Si Propeta Joseph [miingon nga] … aron mahimong usa ka alagad ni Jesus, ang tawo kinahanglan mopamatuod kang Jesus; ug pagpamatuod ni Jesus ang tawo kinahanglan adunay espiritu sa pagpanagna; kay diha sumala ni Juan, ang pagpamatuod kang Jesus mao ang espiritu sa pagpanagna.

“Kon ang tawo moangkon nga usa ka alagad ni Jesus ug walay espiritu sa pagpanagna, mahimong siya usa ka dili tinuod nga saksi, kay wala siya niana nga gasa nga makapasarang kaniya niana nga katungdanan; ug ang kalainan tali ni [Joseph Smith] ug sa pari niini nga henerasyon mao, nga siya miangkon nga aduna niana nga espiritu sa pagpanagna nga makapahimo kaniya sa pagpamatuod kang Jesus ug sa Ebanghelyo sa kaluwasan; ug ang pari molimud niana nga espiritu, bisan ang espiritu sa pagpanagna, nga mao ra gayud ang mopamatuod nga sila tinuod nga mga saksi o tigpamatuod sa Ginoong Jesus, ug gani miangkon nga matuod nga mga alagad sa kaluwasan.”¹⁶

“Ang hugot nga pagtuo moabut pinaagi sa pagpaminaw sa pulong sa Dios, pinaagi sa pagpamatuod sa mga suluguon sa Dios; kana nga pagpamatuod kanunay nga giubanan sa Espiritu sa pagpanagna ug pagpadayag.”¹⁷

Ang gasa sa espiritu sa pag-ila nagtugot sa mga matinud-anon sa pag-ila tali sa impluwensya sa maayo ug sa dautan nga mga espiritu.

Sa unang mga panahon sa gipahiuli nga Simbahan, ang mga miyembro sa Simbahan, ingon man ang mga miyembro sa laing relihiyusong mga grupo, usahay molihok diha sa impluwensya gikan sa dautan o bakak nga mga espiritu, nagtuo nga sila anaa ubos sa impluwensya sa Espiritu Santo. Si Propeta Joseph Smith nagtudlo: “Bag-ong mga panghitabo nga nanghitabo diha kanato naghimo niini nga mahinungdanon nga katungdanan nga gipasa diri kanako sa pagsulti og usa ka butang kalabut sa mga espiritu diin ang mga tawo naagni sa paglihok.

“Dayag kini gikan sa mga sinulat sa mga Apostoles [diha sa Bag-ong Tugon], nga daghan sa mga mini nga mga espiritu diha sa ilang panahon, ug mikatap ngadto sa kalibutan, ug nga kini nagkinahanglan og salabutan diin ang Dios lamang ang makahatag aron makaila og mini nga mga espiritu ug sa pag-ila kon unsa nga mga espiritu ang iya sa Dios [tan-awa sa 1 Juan 4:1–4]. Ang kalibutan sa kinatibuk-an mahimong labihan ka ignorante mahitungod niini nga mga butang, ug ngano nga sila lahi man—‘kay kinsa bang pagkatawhana ang nasayud sa mga hunahuna sa Dios, gawas sa espiritu sa Dios.’ [Tan-awa sa 1 Mga Taga-Corinto 2:11.] …

“Aduna gayud kanunay, sa matag panahon, nga ingon og kulang sa kahibalo mahitungod niini nga hilisgutan. Mga espiritu sa tanang matang gipakita, sa matag panahon, ug sa hapit diha sa tanang tawo…. Ang tanang tawo nagtuo sa ilang kaugalingong matang sa mga espiritu ug silang tanan nagtuo nga ang ilang mga espiritu adunay gahum sa Dios. Kinsa ang makahatag og solusyon niini nga misteryo? ‘Sulayi ang mga espiritu,’ miingon si Juan [1 Juan 4:1], apan kinsa ang mobuhat niini? Ang mga makinaadmanon, ang batid nga mamumulong, ang batid sa pangatarungan, ang maalamon, ang diosnon—ang tanan walay kahibalo…. Kinsa ang makadala ngadto sa kahayag ug makabutyag sa mga tinagoang misteryo sa mini nga mga espiritu nga kanunay gayud nga makita diha sa mga Santos sa Ulahing mga Adlaw? Kami motubag nga walay tawo nga makahimo niini kon walay Priesthood, ug ang pagbaton og kahibalo sa mga balaod nga diin ang mga espiritu gidumala; kay walay tawo nga nasayud sa mga butang sa Dios, gawas sa Espiritu sa Dios,’ sa ingon walay tawo nga nasayud sa espiritu sa yawa, ug sa iyang gahum ug impluwensya, kon dili pinaagi sa pagbaton og salabutan nga labaw pa sa tawo, ug nahimong napadayag pinaagi sa Priesthood sa misteryosong mga paglingla sa iyang mga plano….

“Ang usa ka tawo kinahanglan magbaton og espiritu sa pag-ila sa dili pa siya makaganoy ngadto sa kahayag sa adlaw niining yawan-ong impluwensya ug mobutyag niini ngadto sa kalibutan sa tanan niining makadaut sa kalag, yawan-on, ug makalilisang nga mga kolor, kay walay mas dako og kadautan ngadto sa mga anak sa tawo kay sa mahimutang ubos sa impluwensya sa usa ka mini nga espiritu kon sila nagtuo nga anaa kanila ang Espiritu sa Dios. Liboan ang mibati sa impluwensya sa mangitngit nga gahum ug makadaut nga epekto….

“Sama sa atong namatikdan kaniadto, ang pinakadakong kalisod anaa sa pagkawalay nahibaloan sa kinaiyahan sa mga espiritu, sa mga balaod diin sila gidumala, ug sa mga timailhan diin sila nailhan; kon gikinahanglan sa Espiritu sa Dios nga masayud sa mga butang sa Dios; ug ang espiritu sa yawa mapakita lamang pinaagi niana nga pamaagi, dayon kini mosunod isip usa ka natural nga sangputanan gawas kon ang tawo o mga tawo adunay komunikasyon, o pagpadayag gikan sa Dios, magpakita ngadto kanila sa mga lihok sa espiritu, sila magpabilin gayud nga walay mahibaloan niini nga mga baruganan; kay ako moingon nga kon ang usa ka tawo dili makasabut niining mga butanga apan pinaagi sa Espiritu sa Dios, napulo ka libong mga tawo dili makahimo; kini usab dili maabut sa kaalam sa mga makinaadmanon, ang pinulongan sa batid nga mga pulong, ang gahum sa gamhanan. Ug kita sa katapusan moabut na gayud niini nga panapos, bisan unsa ang atong pagtuo sa pagpadayag, nga kon wala kini dili kita masayud ug dili makasabut sa bisan unsa nga butang sa Dios, o sa yawa; ug bisan unsa ka walay tinguha ang kalibutan sa pagdawat niini nga baruganan, dayag kaayo gikan sa nagkalain-laing pagtuo ug mga opinyon mahitungod niini nga butang nga wala gayud silay nahibaloan niini nga baruganan, ug kini sama ka tin-aw nga kon wala ang balaan nga komunikasyon, sila magpabilin nga walay nahibaloan….

“Ang tawo kinahanglan adunay espiritu sa pag-ila, sama sa among gisulti sa una, aron makasabut niining mga butanga, ug unsaon niya pag-angkon niini nga gasa kon walay mga gasa sa espiritu? Ug unsaon man sa pag-angkon niini kon wala ang pagpadayag? ‘Si Kristo misaka sa langit, ug mihatag og mga gasa ngadto sa mga tawo; ug ang uban mahimong mga Apostoles, ug uban mga Propeta, ug ang uban mga tigwali sa ebanghelyo, ug ang uban mga Pastor ug mga magtutudlo’ [tan-awa sa Mga Taga-Efeso 4:8, 11]. Ug giunsa pagpili ang mga Apostoles, mga Propeta, mga Pastor, mga magtutudlo ug mga magwawali? Pinaagi sa pagpanagna (pagpadayag) ug pinaagi sa pagpandong sa mga kamot:—pinaagi sa balaang pakigsulti, ug usa ka balaanong gitudlo nga mga ordinansa—pinaagi sa pamaagi sa Priesthood, gi-organisa sumala sa pagmando sa Dios, pinaagi sa balaanong pagkatudlo. Ang mga Apostoles sa karaang mga panahon naghupot sa mga yawe niini nga Priesthood—sa mga misteryo sa gingharian sa Dios, ug sa ingon makahimo sa pag-abli ug pagsulbad sa tanang mga butang mahitungod sa pamunoan sa Simbahan, sa kaayohan sa katilingban, sa umaabut nga padulngan sa mga tawo, ug sa kabubut-on, gahum ug impluwensya sa mga espiritu; kay sila makahimo sa pagpugong kanila kon gusto, makapapahawa kanila sa pangalan ni Jesus, ug makakita sa ilang minaldito ug misteryoso nga mga kalihokan sa pagpaningkamot sa paglingla sa Simbahan pinaagi sa pagpakita og pagka-relihiyoso, ug makig-away batok sa interes sa Simbahan ug pagpakatap sa kamatuoran….

“… Ang atong Manluluwas, ang mga Apostoles, ug bisan ang mga miyembro sa Simbahan gitugahan niini nga gasa, kay, miingon si Pablo, ‘Ngadto sa usa gihatag ang pagpanulti’g lainlaing mga pinulongan, ug ngadto sa usa ang paghubad sa panultig mga pinulongan, nga sa usa ang gahum sa paghimo’g mga milagro, ug ngadto sa usa ang panagna, ngadto sa usa ang katakus sa pag-ila sa nagkalainlaing mga espiritu’ [tan-awa sa 1 Mga Taga-Corinto 12:10.] Kining tanan gikan sa samang Espiritu sa Dios, ug mao kini ang mga gasa sa Dios…. Walay tawo o walay pundok sa mga tawo nga wala hatagi og awtoridad, sa Priesthood ug pag-ila sa nagkalainlaing mga espiritu, ang makaila sa matuod gikan sa mini nga mga Espiritu.”¹⁸

“Bakakon nga mga espiritu ania sa kalibutan. Adunay daghan nga mga pagpakita sa mga espiritu, mga mini ug tinuod…. Matag espiritu, o panan-awon, o pagpanganta, dili iya sa Dios…. Ang gasa sa pag-ila og mga espiritu ihatag ngadto sa Tigdumala nga Elder. Pag-ampo alang kaniya nga siya makaangkon niini nga gasa.”¹⁹

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon sa hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Ribyuha ang asoy sa mga pahina 459–62 Sa unsa nga paagi nga makatabang kini nga asoy sa nanaghupot sa Melchizedek Priesthood nga maandam sa pangalagad ngadto sa nasakit? Sa unsang paagi kini makatabang kanato kon kita nagkinahanglan og priesthood nga panalangin? Sa imong hunahuna ngano nga importante alang ni Brother Fordham sa pagpadayag sa iyang hugot nga pagtuo ni Jesukristo nianang panahona?
Ribyuha ang mga Pagtulun-an ni Propeta Joseph sa mga pahina 462–63. Unsa nga mga kasinatian ang nakatabang kanimo nga makasabut sa gahum sa priesthood diha sa pag-ayo og masakiton? Unsa ang mga baruganan nga angay mogiya kanato sa pagpakigbahin sa atong mga kasinatian sa pag-ayo og masakiton? Ngano nga ang uban nga mga tawo dili maayo, bisan kon sila adunay hugot nga pagtuo ug nakadawat og mga panalangin sa priesthood?
Si Joseph Smith miingon nga ang gasa sa mga pinulongan “gihatag alang lamang gayud sa pagsangyaw sa Ebanghelyo ngadto sa ubang mga nasud ug mga pinulongan” (tan-awa sa mga pahina 463–65). Sa unsang paagi kini nga gasa nakatabang sa pagpakatap sa ebanghelyo sa tibuok kalibutan? Giunsa nimo o sa laing tawo nga imong kaila pagdawat ang gasa sa mga pinulongan aron sa pagtabang sa pagsangyaw sa ebanghelyo?
Ribyuha ang mga Pagtulun-an sa Propeta mahitungod sa espiritu sa pagpanagna (mga pahina 466–67). Unsa ang buot ipasabut niini alang kanimo nga masayud nga ang matag miyembro sa Simbahan makabaton sa espiritu sa pagpanagna?
Ribyuha ang mga Pagtulun-an sa Propeta mahitungod sa gasa sa pag-ila og mga espiritu (mga pahina 467–70). Unsa ang gasa sa espiritu sa pag-ila? Sa unsa nga paagi kita makalikay nga malingla sa mga impluwensya sa dautan? Sa unsa nga paagi ang atong propeta karon ug ang ubang mga lider sa Simbahan makatabang kanato sa pag-ila sa dautang mga impluwensya?

May Kalabutan nga mga Kasulatan: 1 Mga Taga-Corinto 12:1–31; 14:1–6, 22–28; Santiago 5:14–15; Moroni 10:8–17; D&P 46:1–33; 50:1–36, 40–44; 52:14–19

Joseph healing Elijah Fordham — Niadtong Hulyo 22, 1839, si Elijah Fordham mibangon gikan sa “katulogon sa kamatayon” human si Joseph Smith nisulod sa iyang panimalay ug mi-deklarar, “Elijah, ako nagmando kanimo, sa ngalan ni Jesus ang taga Nazaret, sa pagbangon ug pagpakaayo!”

missionaries teaching — “Ang gasa sa pagsulat og mga pinulongan pinaagi sa gahum sa Espiritu Santo diha sa Simbahan, alang sa kaayohan sa mga sulugoon sa Dios aron pagsangyaw ngadto sa mga dili tumotoo.“