Ipahayag ang Maayo nga mga Balita ngadto sa Tibuok Kalibutan

“Ang bili sa mga kalag mahinungdanon sa panan-aw sa Dios sukad pa gayud sa sinugdan; ug ang mga Elder [mao] … ang modani ug modapit sa tanan nga mga tawo sa tanan nga mga dapit sa paghinulsol, aron sila mahimo nga manununod sa kaluwasan.”

Gikan sa Kinabuhi ni Joseph Smith

Human matukod ang Simbahan niadtong Abril 6, 1830, si Joseph Smith mipadayon sa pagpahayag og mga maayong balita sa ebanghelyo. Panahon sa bulan sa Abril, mibiyahe siya ngadto sa Colesville, New York, aron bisitahon ang iyang higala nga si Joseph Knight Sr., kinsa uban sa iyang pamilya nahimong interesado sa ebanghelyo. Ang Propeta mipahigayon og mga miting diha sa kasilinganan, ug “daghan ang misugod sa matinguhaon nga pag-ampo ngadto sa Makagagahum nga Dios, nga unta tagaan sila og kaalam sa pagsabut sa kamatuoran.”¹ Wala madugay sa paglabay sa duha ka mga bulan, sa ikaduhang pagbisita ngadto sa Colesville, nahibaloan sa Propeta nga daghan ang mga tawo kinsa nakadungog sa ebanghelyo nagtinguha na karon nga mabunyagan. Alang niini nga bag-ong mga kinabig, ang pagdawat sa ebanghelyo nagkinahanglan og hugot nga pagtuo ug kaisog, sumala sa pagrekord sa Propeta:

“Among gitakda ang miting alang sa adlaw nga Igpapahulay, ug sa pagka Sabado sa hapon naghimo kami og diki [dam] sa usa ka sapa, nga duol ra, alang sa katuyoan sa ilang pagtuman sa ordinansa sa bunyag, apan nianang pagkagabii giguba sa nagkapundok nga mga manggugubot ang among diki, nga nakabalda kanamo sa pagtambong sa bunyag sa adlaw nga Igpapahulay…. Pagka sayo sa Lunes sa buntag nangandam kami, ug sa wala pa makabantay ang among mga kaaway sa among gipangbuhat, among giayo ang diki, ug ang mosunod nga trese ka mga tawo [ang] nabunyagan, ni Oliver Cowdery, nga sila si: Emma Smith; Hezekiah Peck ug asawa; Joseph Knight, Sen., ug asawa; William Stringham ug asawa; Joseph Knight, Jun.; Aaron Culver ug asawa; Levi [Hall]; Polly Knight; ug Julia Stringham.”²

Nianang tinglarag [fall] ang Ginoo mipadayag ngadto ni Joseph Smith nga si Oliver Cowdery, Peter Whitmer Jr., Parley P. Pratt, ug Ziba Peterson ang “moadto ngadto sa mga Lamanites ug mosangyaw sa akong ebanghelyo ngadto kanila” (D&P 28:8; 30:5–6; 32:1–3). Kini nga mga misyonaryo mipanaw og mga 2,400 ka kilometros, nagsangyaw og kadali taliwala sa nagkalainlaing mga tribo sa mga Indian, lakip ang Seneca didto sa New York, ang Wyandot sa Ohio, ug ang mga Delaware ug Shawnee didto sa teritoryo sa mga Indian. Bisan pa niana, ang pinakadako nga kalampusan sa mga misyonaryo miabut sa dihang mihunong sila sa dapit sa Kirtland, Ohio. Didto ilang gibunyagan ang mga 130 ka mga kinabig, ang kinadak-an gikan sa kapunongan sa Reformed Baptist ni Sidney Rigdon, nga sa ingon nag-abli sa nahimo nga pundokanan nga dapit alang sa gatusan ka mga miyembro sa Simbahan sa mosunod nga mga tuig. Ang mga misyonaryo nakakaplag usab og pipila ka mga kinabig taliwa sa mga nanglalin didto sa lungsod sa Jackson County, Missouri, diin ang siyudad sa Zion sa dili madugay pagatukuron.

Bisan kon nagsangyaw niadtong naglibot kaniya o magpadala og mga misyonaryo ngadto sa kalibutan, si Propeta Joseph Smith nahigugma sa misyonaryo nga buhat. Si Elder Parley P. Pratt mi-rekord sa mosunod nga kasinatian nga nahinabo niadtong 1839: “Samtang nagbisita uban ni Brother Joseph didto sa Philadelphia, [Pennsylvania,] usa ka dako nga kongregasyon ang giablihan alang kaniya aron mosangyaw, ug gibanabana nga tulo ka libo ka mga tawo ang nagpundok aron maminaw kaniya. Si Brother Rigdon ang una nga namulong, ug nagsulti kabahin sa Ebangyelyo, naghulagway sa iyang doktrina pinaagi sa Biblia. Sa diha nga natapus siya, si Brother Joseph mitindog nga sama sa leon nga kusog nga mingulob, ug puno sa Espiritu Santo, namulong sa hilabihan ka gamhanan, nagpamatuod sa talan-awon nga iyang nakita, ang pagpangalagad sa mga anghel nga iyang nasinati; ug sa unsa nga paagi nga iyang nakaplagan ang mga palid sa Basahon ni Mormon, ug mihubad niini pinaagi sa gasa ug gahum sa Dios. Siya misugod pinaagi sa pag-ingon: ‘Kon walay laing tawo nga may kaisog sa pagpamatuod sa ingon ka mahimayaon nga mensahe gikan sa Langit, ug sa pagkakaplag sa hilabihan ka mahimayaon nga rekord, siya mibati sa paghatag og pagpamatuod niini sa kaangayan ngadto sa katawhan, ug itugyan ngadto sa Dios ang mga panghitabo kon sa unsa nga paagi ang iyang pagpamatuod pagadawaton.’

“Ang tibuok kongregasyon nahingangha, nahatiurok, nga sama kini, og gisanapan sa salabutan sa kamatuoran ug gahum sa iyang pagpamulong, ug ang mga katingalahan nga iyang gihulagway. Usa ka malungtaron nga pagtuo ang nahimo, daghang mga kalag ang nakabig ngadto sa panon. Ug ako magpamatuod, nga siya, pinaagi sa iyang matinuoron ug gamhanan nga pagpamatuod, milimpyo sa iyang mga saput sa ilang mga dugo. Daghang mga tawo ang nabunyagan didto sa Philadelphia ug sa naglibut nga mga rehiyon.”³

Mga Pagtulun-an ni Joseph Smith

Tungod kay ang kalibutan anaa sa espirituhanon nga kangitngit, kinahanglan nga makugihon kita sa pagsangyaw sa ebanghelyo.

Niadtong 1834, si Joseph Smith ug ubang mga elder sa simbahan didto sa Kirtland mipadala sa mosunod nga sulat ngadto sa mga kaigsoonan sa ubang mga dapit: “Bisan tuod kon ang among pagpadala og mga sulat kaninyo makanunayon, hinoon nagtuo kami nga dawaton kini diha sa inyong bahin uban sa inigsoon nga mga pagbati, ug gikan kanamo nga inyong dili takus nga mga igsoon, tugoti ninyo nga ang usa ka pulong sa pag-awhag makabaton og dapit diha sa inyong mga kasingkasing, samtang inyong nakita ang hilabihan ka lapad nga gahum ug kamandoan sa prinsipe sa kangitngit, ug makaamgo kon unsa ka lapad ang gidaghanon nga nagdasok sa agianan nga nagpaingon sa kamatayon nga wala gani manumbaling sa nag-awhag nga tunog sa Ebanghelyo sa atong Ginoo nga si Jesukristo.

“Hunahunaa sa makadiyut, mga kaigsoonan, ang katumanan sa mga pulong sa propeta, tungod kay among nakita nga ang kangitngit nga nagtabon sa yuta ug ang mabaga nga kangitngit sa mga hunahuna sa mga lumulupyo didto [tan-awa sa Isaias 60:2], nga ang mga krimen sa tanang matang nagkadugang diha sa mga tawo, hilabihan ka daghan nga mga bisyo gibuhat, nga atong nakita sa nagsaka nga mga henerasyon nagtubo diha sa kahingpitan sa garbo ug pagkamapahitas-on, ang mga edaran nawad-an na sa tanang salabutan sa pagtuo, ug ingon og nawad-an sa matag hunahuna sa adlaw sa panudya; pagkawalay pagpugong, imoralidad, pagka-usikan, mapagarbuhon, pagkawalay pagbati sa kasingkasing, pag-ampo sa mga dios-dios, ang pagkawala sa natural nga pagbati, ang paghigugma niini nga kalibutan, ug ang pagkawalay pagtagad ngadto sa mahangturon nga mga butang ang nagkadugang niadtong kinsa nag-angkon og pagtuo sa relihiyon sa langit, ug ang pagkawalay pagtuo nga naghikyad sa kaugalingon agi og sangputanan niini, mga lalaki nga motugot sa ilang mga kaugalingon sa pagbuhat og pinakalaw-ay nga matang ug mga kalihokan sa pinakadautan nga matang, pagpasipala, pagpangilad, pagpakaulaw sa dungog sa mga silingan, pagpangawat, pagpanglungkab, pagbuno, pagpasiugda og kasaypanan ug pagbatok sa kamatuoran, pagbiya sa pakigsaad sa langit, ug pagsalikway sa hugot nga pagtuo kang Jesus—ug taliwala niining tanan, ang adlaw sa Ginoo paspas nga nagsingabut sa dihang walay usa gawas niadtong kinsa nagsul-ob og biste sa pangkasal ang pagatugutan sa pagkaon ug pag-inum diha sa atubangan sa Pamanhonon, ang Prinsipe sa Kalinaw!

“Nadani sa pagkatinuod uban niini nga mga kamatuoran, unsa kaha ang mga gibati niadtong kinsa mga nakatilaw sa langitnong gasa ug nakatagamtam na sa pagkamaayo sa pulong sa Dios ug mga gahum sa kapanahunan nga umaabut? [Tan-awa sa Mga Hebreohanon 6:4–5.] Kinsa pa kondili kadtong kinsa makakita sa makuyaw nga kahimtang nga giatubang sa mga katawhan niini nga henerasyon, ang makahimo sa pagbudlay diha sa ubasan sa Ginoo sa walay pag-ila sa makalolooy nga kahimtang sa kalibutan? Kinsa pa kon dili kadtong tinuod nga naghunahuna sa pakigangay sa Amahan sa atong mga espiritu sa paghatag og usa ka sakripisyo alang sa Iyang mga nilalang—usa ka plano sa pagtubos, usa ka gahum sa pag-ula, laraw sa kaluwasan, ang pagbaton sa mahinungdanon nga mga katuyoan niini, ang pagdala sa mga tawo og balik ngadto sa atubangan sa Hari sa langit, koronahan sila didto sa celestial nga kahimayaan, ug maghimo kanila nga mga manununod uban sa Anak ngadto sa usa ka panulondon nga dili madunot, dili mabuling, ug dili malawos [tan-awa sa 1 Pedro 1:4]—kinsa pa kon dili ang ingon nga makaamgo sa kamahinungdanon sa usa ka hingpit nga pamatasan atubangan sa mga tawo, ug makugihon sa pagtawag sa mga tawo sa pag-ambit niini nga mga panalangin? Unsa ka dili ikasulti nga himaya kini nga mga butang ngadto sa mga katawhan! Sa pagkatinuod mahimo nga hunahunaon nga maayong balita sa dakong kalipay sa tanang katawhan; ug maayong balita usab, nga unta mopuno sa yuta ug lipayon ang mga kasingkasing sa matag usa kon makadungog siya niini.”⁴

“Ang tiglaglag nga anghel mosugod sa paglaglag sa mga lumulupyo sa yuta sa dili pa ang mga sulugoon sa Dios magsangyaw og pasidaan sa tanang mga nasud sa mga Hentil, ug sama sa gisulti sa propeta, ‘Walay bisan unsa gawas ang kalisang sa pagsabut sa balita.’ [Tan-awa sa Isaias 28:19.] Nagsulti ako sa ingon tungod kay mibati ako alang sa akong isigkatawo, gibuhat ko kini diha sa ngalan sa Ginoo, nga giaghat sa Balaang Espiritu. O, nga mahimo nako ang pagluwas kanila gikan sa masulog nga lilo sa kaalautan, nga akong nakita sila nga mipatihulog sa ilang mga kaugalingon, tungod sa ilang mga sala, nga unta makahimo ako pinaagi sa tingog sa pasidaan nga mahimong instrumento sa pagdala kanila ngadto sa kinasingkasing nga paghinulsol, nga unta sila adunay hugot nga pagtuo sa pagbarug sa adlaw sa kalisdanan!”⁵

“Hinaut unta nga ang Dios makahimo kanato sa pagtuman sa atong mga saad ug mga pakigsaad ngadto sa usag usa, sa tanang pagkamatinuoron ug pagkamatarung sa Iyang atubangan, nga ang atong impluwensya mahimo nga bation tali sa mga nasud sa yuta, sa hilabihan ka gamhanan, gani sa paglaglag sa mga gingharian sa kangitngit, ug modaug batok sa mga dautan nga espirituhanong panon diha sa mga dapit sa kalangitan, ug buakbuakon ngadto sa pagkapiraso ang tanang mga gingharian nga mibatok sa gingharian ni Kristo, ug isabwag ang kahayag ug kamatuoran sa walay katapusan nga Ebanghelyo gikan sa mga suba ngadto sa kinatumyan sa yuta.”⁶

Si Wilford Woodruff, ang ikaupat nga Presidente sa Simbahan, mihinumdom sa mosunod nga mga pulong ni Propeta Joseph Smith: “Ang kalibutan napuno sa kangitngit. Ang sala ug kadautan misanap sa kalibutan sama sa mga tubig nga mitabon sa dakung lawod. Ang yawa nagmando sa tibuok kalibutan sa hilabihan ka dako. Ang kalibutan mohimo sa pakiggubat batok kaninyo, ang yawa mohimo, ang yuta mohimo, ug ang impyerno mohimo. Apan … kinahanglan gayud nga kamo mosangyaw sa Ebanghelyo, buhata ang inyong katungdanan, ug ang Ginoo magpaluyo kaninyo. Ang yuta ug impyerno dili makabuntog batok kaninyo.”⁷

Ang atong katungdanan mao ang pagdapit sa tanang katawhan sa paghinulsol, pagpabunyag, pagdawat sa Espiritu Santo, ug mahimong mga manununod sa kaluwasan.

“Nagtuo kita nga atong katungdanan—sa pagtudlo sa tanang katawhan sa doktrina sa paghinulsol, diin atong paningkamutan sa pagpakita gikan sa mosunod nga mga kinutlo:

“ ‘Ug Iyang gibuksan ang ilang mga salabutan aron makatukib sila sa mga kasulatan, ug miingon kanila, Sa ingon niini nahisulat, nga ang Kristo kinahanglan gayud magaantus, ug sa ikatulo ka adlaw mabanhaw siya gikan sa mga patay: ug nga sa iyang ngalan ang paghinulsol ug ang pagpasaylo sa mga sala kinahanglan igawali ngadto sa tanang kanasuran, sugod sa Jerusalem’ [Lucas 24:45–47].

“Pinaagi niini atong nakat-unan nga gikinahanglan alang kang Kristo ang mag-antus, ug ilansang, ug mobangon pag-usab sa ikatulo ka adlaw, alang sa piho nga katuyoan nga ang paghinulsol ug kapasayloan sa mga sala kinahanglan nga isangyaw ngadto sa tanang mga nasud.

“ ‘Ug si Pedro mitubag kanila, Paghinulsol kamo ug pabautismo kamo ang matag-usa kaninyo sa ngalan ni Jesukristo tungod sa kapasayloan sa inyong mga sala, ug madawat ninyo ang gasa sa Espiritu Santo. Kay ang saad alang kaninyo ug sa inyong mga anak ug sa tanan nga atua sa halayo, sa matag-usa nga pagatawgon sa Ginoo nga atong Dios’ [Mga Buhat 2:38–39].

“Tungod niini atong nasayran nga ang saad sa Espiritu Santo gihimo ngadto sa matag usa kinsa ang doktrina sa paghinulsol gisangyaw, ngadto sa tanang mga nasud…. Busa nagtuo kita sa pagsangyaw sa doktrina sa paghinulsol ngadto sa tanang kalibutan, edaran ug batan-on, adunahan ug kabus, ulipon ug gawasnon.”⁸

“Ang bili sa mga kalag mahinungdanon sa panan-aw sa Dios sukad pa gayud sa sinugdan; ug ang mga Elder wala gayud tawaga sa pagtukmod ni binsa kinsa ngadto sa impyerno, apan sa pagdani ug pagdapit sa tanang mga tawo sa bisan asa aron sa paghinulsol, nga unta sila mahimo nga mga manununod sa kaluwasan. Kini mao ang madawaton nga tuig sa Ginoo: pagluwas sa mga binihag nga sila unta mokanta og hosanna [tan-awa sa Isaias 61:1–2].”⁹

“Katungdanan gayud kini sa Elder sa pagbarug nga maisugon alang sa katuyoan ni Kristo, ug pasidan-an [ang] mga katawhan uban sa hiniusa nga pag-uyon sa paghinulsol ug sa pagpabunyag alang sa kapasayloan sa mga sala, ug alang sa Espiritu Santo.”¹⁰

“Mopadayon ako sa pagsulti kaninyo kon unsay gikinahanglan sa Ginoo alang sa katawhan, halangdon ug mapainubsanon, dato ug pobre, lalaki ug babaye, mga ministro ug mga tawo, mga nagpahayag og relihiyon ug wala magpahayag, aron nga sila unta makapahimulos sa Balaang Espiritu sa Dios sa hingpit ug makalingkawas sa mga paghukom sa Dios, nga hapit na moabut diha sa mga nasud sa yuta. Hinulsuli ang tanan ninyong mga kasalanan, ug magpabunyag sa tubig alang sa kapasayloan sa inyong mga sala, diha sa pangalan sa Amahan, ug sa Anak, ug sa Espiritu Santo, ug modawat sa ordinansa sa pagpandong sa mga kamot kaniya kinsa gi-orden ug gi-seal ngadto niini nga gahum, nga unta kamo makadawat sa Balaang Espiritu sa Dios, ug kini sumala sa Balaang mga Kasulatan, ug sa Basahon ni Mormon, ug sa mao lamang nga paagi nga ang tawo makasulod sa celestial nga gingharian. Mao kini ang mga gikinahanglan sa bag-ong pakigsaad, o unang mga baruganan sa Ebanghelyo ni Kristo.”¹¹

“Gikinahanglan kini sa tanang mga tawo, sa pagbaton og hugot nga pagtuo diha ni Ginoong Jesukristo, sa paghinulsol sa tanan nilang mga kasal-anan ug magpabunyag (pinaagi sa usa ka tawo nga may awtoridad) diha sa pangalan ni Jesukristo alang sa kapasayloan sa mga sala, ug makabaton og mga kamot nga ipandong kanila alang sa gasa sa Espiritu Santo, aron himoon sila nga usa ka miyembro sa Simbahan ni Jesukristo sa mga Santos sa Ulahing mga Adlaw.”¹²

Ang mga sulugoon sa Ginoo mangadto sa tibuok kalibutan aron pangitaon kadtong kinsa andam nga modawat sa ebanghelyo ni Jesukristo.

“Pagpadala og pipila ka mga tawo ngadto sa Tunga-tungang Amerika ug ngadto sa tanang Kinatsila nga pinulongang mga nasud sa Amerika; ug ayaw tugoti nga may usa ka dapit sa kayutaan nga walay nagmisyon.”¹³

“Wala kita mangayo ni bisan kinsa nga mga tawo sa pagsalikway sa bisan unsa nga maayong anaa kanila; mohangyo lamang kita kanila sa pagduol ug makakuha og dugang pa. Unsa kaha kon ang tanan sa kalibutan modawat niining Ebanghelyo? Nan sila magkasinabot, ug ang mga panalangin sa Dios mabu-bu diha sa mga tawo, nga mao ang tinguha sa tibuok nakong kalag.”¹⁴

“Mga kaliboan kinsa nakadungog sa Ebanghelyo nahimong masulundon niini, ug nanagmaya sa mga gasa ug mga panalangin. Ang katahap, ug ang mga kadautan nga nag-uban niini, nagkakunhod pinaagi sa gahum sa kamatuoran, kansang makaayo nga mga impluwensya nagsugod na nga gibati sa lagyo nga mga nasud…. Sa panahon nga, dihang gihusgahan kita nga isip mga malinglahon, ug nga ang ‘Mormonism’ molabay ra sa dili madugay, mahanaw ra, ug makalimtan. Apan ang panahon milabay na sa dihang gihunahuna kini isip usa ka lumalabay nga butang, o usa ka bula sa balud, apan karon nakagamot diha sa mga kasingkasing ug mga pagbati sa tanan niadtong kinsa adunay igong halangdon nga hunahuna sa pagsalikway sa mga pagduda nga diha kanila, ug susihon ang hilisgutan uban sa kaangay ug kamatinuoron.”¹⁵

“Ang pipila sa Napulog Duha ug uban nakasugod na sa pag-adto sa Uropa [niadtong Septyembre 1839], ug ang nahibilin niadtong gitawag sa misyon gipaabut namo nga molakaw na niadtong higayona sa pipila ka mga adlaw…. Ang buhat sa Ginoo mipadayon sa makapahimuot kaayo nga paagi, dinhi ug sa karaan nga nasud. Didto sa England bag-ohay pa lang mga gatusan ang nadugang sa atong gidaghanon, apan bisan pa niana, gani, sama kini, kang, ‘Ephraim, siya nakig-ipon sa iyang kaugalingon sa mga katawhan’ [Oseas 7:8]. Ug ang Manluluwas miingon Siya, ‘Ang akong mga karnero nagapatalinghug sa akong tingog’ [Juan 10:27]; ug usab, ‘Ang magapatalinghug kaninyo, magapatalinghug kanako’ [Lucas 10:16]; ug, ‘Ania karon, dad-on ko sila gikan sa amihanan nga yuta, ug tigumon ko sila gikan sa kinatumyang mga bahin sa yuta’ [Jeremias 31:8]. Ug sa pagkadungog ni Juan sa tingog nga nagaingon, ‘Gomowa kamo kaniya, mga tawo ko,’ [Pinadayag 18:4], bisan pa man niana kinahanglan gayud ang tanan matuman, aron ang katawhan sa Ginoo mabuhi sa diha nga ‘Nagun-ob, nagun-ob ang bantugang Babilonia’ [Pinadayag 18:2].”¹⁶

Sa usa ka sulat gikan sa Bilanggoan sa Liberty niadtong Marso 1839, si Propeta Joseph Smith namahayag sa mosunod, nga sa kaulahian narekord sa Doktrina ug mga Pakigsaad 123:12: “Kay aduna pay daghan sa ibabaw sa yuta diha sa tanan nga mga tinuohan, mga pundok, ug mga pundok sa relihiyon, kinsa nabutaan pinaagi sa maliputon nga paglingla sa mga tawo, diin sila naghulat aron sa pagpangilad, ug kinsa natago gikan sa kamatuoran tungod kay sila wala masayud asa kini pangitaa.”¹⁷

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Ribyuha ang ikatulo ug ikaupat nga mga paragrap sa mga pahina 176–77. Ngano nga usahay magkinahanglan og kaisug sa pagpakigbahin sa atong mga pagpamatuod sa Pagpahiuli ug sa Basahon ni Mormon? Sa unsa nga paagi atong mapalambo kini nga kaisug?
Si Joseph Smith mihulagway sa espirituhanon nga kangitngit sa kalibutan; dayon siya mipamatuod sa “maayong balita sa dakong kalipay” sa gipahiuli nga ebanghelyo (mga pahina 177–80. Sa unsa kaha nga paagi kining duha ka mga panghunahuna makadasig kanato sa pagbukas sa atong mga baba ug mopakigbahin sa ebanghelyo?
Basaha ang ikatulong paragrap sa pahina 180. Kanus-a ang Ginoo mibarug uban kaninyo sa inyong misyonaryo nga mga paningkamot?
Palandunga ang mga tudling sa kasulatan nga gikutlo ni Joseph Smith aron sa pagpahinumdum kanato sa atong mga katungdanan sa pagtudlo sa ebanghelyo ngadto sa tanang katawhan (mga pahina 180–82). Paghunahuna o paghisgut kon unsa ang mabuhat ninyo o sa inyong pamilya aron sa pagpakigbahin sa ebanghelyo ngadto sa uban.
Basaha ang ikalima nga paragrap diha sa pahina 181, diin nagsulti ang Propeta kabahin sa misyonaryo nga buhat isip usa ka paningkamot sa pagpalingkawas sa mga bihag. Sa unsa kaha nga mga paagi ang pipila ka mga tawo gihunahuna nga mga binihag? (Alang sa pipila ka mga ehemplo, tan-awa sa mga pahina 177–80.) Sa unsa nga mga paagi ang unang mga baruganan ug mga ordinansa sa ebanghelyo makapalingkawas kanila?
Ribyuha ang pagdapit sa Propeta diha sa katapusan nga paragrap sa pahina 182. Sa unsa kaha nga paagi kini nga pagdapit makaawhag sa mga tawo nga makakat-on mahitungod sa gipahiuli nga ebanghelyo? Ribyuha ang ikaduha nga paragrap sa pahina 183 ug ang katapusang paragrap sa hugna. Unsa ang atong mabuhat aron pagtabang sa mga tawo nga “isalikway ang [ilang] pagduda” mahitungod sa Simbahan? Sa unsa kaha nga paagi ang atong mga lihok makatabang sa mga tawo asa pangitaa ang kamatuoran?
Unsa nga mga panalangin ang miabut sa inyong kinabuhi isip katumanan sa inyong mga paningkamot sa pagpahayag sa ebanghelyo?

May Kalabutan nga mga Kasulatan:Marcos 16:15–20; 2 Nephi 2:8; Alma 26:1–9, 26–37; D&P 42:6–9, 11–14; 88:77–83

Joseph preaching — Bisan kon nagsangyaw siya ngadto sa naglibut kaniya o magpadala og mga misyonaryo ngadto sa kalibutan, si Propeta Joseph Smith nahigugma sa misyonaryo nga buhat.

missionaries teaching — Ang Propeta nga si Joseph Smith mipahimangno sa mga Santos sa pagtawag sa tanang mga tawo sa pag-ambit sa mga panalangin sa ebanghelyo. “Unsa ka dili ikasulti nga himaya kini nga mga butang ngadto sa katawhan!”