Aoaoga a Peresitene
Mataupu 17: O Le Ata Maoae o le Faaolataga

Mataupu 17

O Le Ata Maoae o le Faaolataga

“O le ata maoae o le faaolataga o se autu e tatau ona mataituina ma le toto’a, ma ia avea o se tasi o meaalofa sili a le lagi i le tagata.”

Mai le Soifuaga o Iosefa Samita

Ia Setema 1831, sa siitia atu ai le Perofeta o Iosefa Samita ma lona aiga i le 30 maila i saute sasae o Katelani i Hiram, Ohio, lea sa latou nonofo ai mo se tausaga e tasi i le fale o John ma Alice Johnson (lea foi sa faaigoa o Elsa). I lenei fale, sa faia ai e le Perofeta le tele o lana galuega o le Faaliliuga a Iosefa Samita o le Tusi Paia.

O lenei galuega taua, lea sa taua e le Perofeta o se “lala o lou valaauga,”1 ua faatupulaia maoae ai lo tatou malamalama i le ata o le faaolataga. Sa amataina e le Perofeta lenei galuega ia Iuni 1830 ina ua poloaiina o ia e le Alii e amata ona faia se toe iloiloga musuia o le Tusi Paia o le faaliliuga a le King James. Ua leva ona silafia e le Perofeta o le Tusi Paia e le o manino lelei i nisi o mataupu taua. Sa ia matauina sa tauina atu e Moronae ia te ia nisi o vaega pupuu faaletusi paia “ma sina eseesega laitiiti mai le mea [o loo i ai] i la tatou Tusi Paia” (Iosefa Samita—Talafaasolopito 2:36). Ao ia faaliliuina le 1 Nifae 13:23–29, sa ia aoao ai o le tele o “vaega ua malamalama ma le taua” ua aveeseina mai le Tusi Paia, e aofia ai ma le “tele o feagaiga a le Alii” (1 Nifae 13:26).

Sa faapea mai mulimuli ane le Perofeta: “Ou te talitonu i le Tusi Paia i le faitauina mai i tusitusiga a uluai tusiupu. O le au faaliliu le magafagafa, o le au tusitusi faatamala, po o ositaulaga taufaasese ma le le faamaoni ua latou faia mea sese e tele. … Tagai i le [Eperu 6:1] mo se feteenaiga o i ai—‘O le mea lea ina tatou tuua ai ia o mataupu muamua a Keriso a ia tatou faaoo atu i le faaatoatoaga.’ Afai e tuua e se tasi le mataupu faavae o sauniga a Keriso, e faapefea ona faasaoina o ia i mataupu faavae? O se feteenaiga lenei mea. Ou te le talitonu i ai. O le a ou tuuina atu e pei ona tatau ona i ai—‘O le mea lea i le lē tuua ai o mataupu faavae o sauniga a Keriso, tatou faaoo atu ia i le faaatoatoaga.’”2

I le taitaiina ai e le Agaga, sa faaaluina ai e Iosefa le tolu tausaga e galue ai i le Tusi Paia, i le faia o le afe ma afe o faasaosaoga i le tusi ma toe tuu i ai faamatalaga sa leiloloa. O ia faamatalaga toefuataiina ua aumai ai se malamalama taua i le tele o mataupu faavae ua le o manino lelei lona tuuina mai i le Tusi Paia e pei ona i ai nei. O nei toe iloiloga musuia i le aano o le Tusi Paia, ua faaigoaina o le Faaliliuga a Iosefa Samita o le Tusi Paia. O le selau ma selau o vaega mai le Faaliliuga a Iosefa Samita, ua i ai nei i totonu o le lomiga a le Au Paia o Aso e Gata Ai o le Tusi Paia o le faaliliuga a le King James.

O le faaliliuga a le Perofeta o le Tusi Paia o se vaega taua o lona lava ia aoaoga faaleagaga ma le tatalaina o le toefuataiina mai o mea moni o le talalelei. Ao ia toe iloiloina le Feagaiga Tuai ma le Feagaiga Fou, sa tele ona ia maua faaaliga e faamanino pe faalautele ni vaega faaletusi paia. I lenei auala, sa mauaina ai e le Perofeta le tele o mataupu faavae mai le Alii, e aofia ai faaaliga o loo ua maua i le Mataupu Faavae ma Feagaiga 74, 76, 77, 86, ma le 91, ma ni vaega o le tele o isi vaega o le Mataupu Faavae ma Feagaiga.

Ina ua faatoa amata ona faaliliuina e le Perofeta le Tusi Paia ia Iuni 1830, sa faaali atu e le Alii ia te ia se fuaitau umi mai tusitusiga a Mose. O lea vaega ua avea nei ma mataupu 1 o le tusi a Mose i le Penina Tau Tele. O loo tusi faamaumau ai se faaaliga sa vaai ai Mose ma talanoa ma le Atua—o se faaaliga ua maoae tele lea ua taua e Iosefa Samita o se “vaega meaai taua” ma se “faatupuina o le malosi.”3 I lenei faaaliga, sa aoao ai e le Atua Mose i le mafuaaga autu o le ata maoae o le faaolataga:

“Ona fetalai mai lea o le Alii le Atua ia Mose, ua faapea mai: … Aua faauta o lau galuega ma lou mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:37, 39).

O mataupu faavae, sauniga, ma folafolaga o loo aofia ai i le ata o le faaolataga sa faailoa i le lalolagi i nei aso e gata ai e ala mai i le Perofeta o Iosefa Samita. I le avea ai ma se tasi ua malamalama manino i le taua o lenei fuafuaga, sa folafola mai e le Perofeta: “O le ata maoae o le faaolataga o se autu ua tatau ona mataituina ma le toto’a, ma ia avea o se tasi o meaalofa sili mai le lagi i tagata.”4

Aoaoga a Iosefa Samita

I le muai olaga, sa filifilia ai Iesu Keriso o le Faaola, ma sa tatou filifili ai e talia le ata o le faaolataga.

“I le muai faapotopotoga i le lagi sa tatou i ai uma faatasi ma vaai ai i le Faaola ua filifilia ma tofia ma le ata o le faaolataga ua faia, ma tatou taliaina.”5

“O le Alii [o le] ositaulaga e faavavau, e tusa ai ma le faatulagaga a Mekisateko [tagai Salamo 110:4], ma o le Alo o le Atua faauuina, ao lei faavaeina le lalolagi [tagai Salamo 110:4]”6

“O le faaolataga a Iesu Keriso ua galueaiina mo tagata uma, ina ia manumalo ai i le tiapolo. … O tagata uma o le a tigaina seiloga latou te usiusitai ia Keriso lava ia.

“O le feteenaiga i le lagi ina ua—fetalai Iesu o le a i ai ni agaga o le a le faasaoina; ma o le tiapolo sa faapea mai o le a ia faasaoina uma lava agaga, ma faataatia lana fuafuaga i luma o le fono tele, o e na tuuina atu la latou filifiliga mo Iesu Keriso. Ona tulai lea o le tiapolo ma le tetee atu i le Atua, ma sa tulia ai i lalo, ma i latou uma o e sa lagolagoina o ia.”7

O i tatou o ni tagata faavavau; ma e mafai ona tatou agai i luma i le faaeaina ao tatou usiusitai i tulafono a le Atua.

O le Perofeta o Iosefa Samita sa mauaina lenei faaaliga mai le Alii ia Me 1833, mulimuli ane faamauina i le Mataupu Faavae ma Feagaiga 93:29: “Sa i ai foi tagata faatasi ma le Atua i le amataga. O le malamalama po o le malamalama o le upu moni, sa le foafoaina pe gaosia, e le mafai foi ona faia.” Ia Aperila 1844 sa aoao mai ai le Perofeta: “O loo i ai se isi mataupu ou te talanoa atu ai, lea e fuafuaina o le a faaeaina ai le tagata. … E o faatasi ma le mataupu o le toe tutu o e ua oti—ua ta’ua, o le agaga—o le mafaufau o le tagata—o le agaga ola pea. O fea na sau mai ai? O tagata aoaoina ma fomai o le mataupu tau le Atua o loo faapea mai o le Atua na faia ia mea i le amataga; ae le o le tulaga lea: o le manatu lea ua taumāmāina ai le tagata i lo’u iloa. Ou te le talitonu i le mataupu faavae; ou te iloa sili atu. Faalogo ia, outou o i tulimanu uma o le lalolagi; aua ua tauina mai e le Atua ia te au; ma afai e te le talitonu ia te au, o le a le tuua ai le mea moni e aunoa ma ni aafiaga. …

“O loo ou talanoa pea i le agaga ola pea o le tagata. Pe foliga talafeagai le faapea atu o le malamalama o agaga e ola pea, ae peitai e i ai lona amataga? O le malamalama o agaga e leai se amataga e leai foi se iuga. O se manatu lelei talafeagai lena. O se mea e i ai sona amataga e mafai ona i ai sona iuga. E lei i ai lava se taimi sa le o i ai ni agaga. …

“… Ua ou aveeseina la’u mama mai lo’u lima ma faatusaina i le mafaufau o le tagata—le vaega e ola pea, aua ua leai se amataga. A faapea o le a vaeluaina; ona i ai lea o le amataga ma le iuga; ae a toe sosoo faatasi, ona faaauau lea o lona taamilosaga faavavau. E faapena le agaga o le tagata. E pei ona soifua le Alii, afai o le a i ai sona amataga, o le a i ai foi lona iuga. O tagata valea uma ma tagata aoaoina ma le atamamai mai le amataga o le foafoaga, ua faapea mai o le agaga o le tagata e i ai lona amataga, ia faamaonia mai e tatau ona i ai sona iuga; ma afai o lena mataupu faavae e moni, o lona uiga o le mataupu faavae o le faaitiitia i le faaleagaina o le a moni. Ae afai e sa’o au, o le a ou folafolaina ma le malosi mai tumutumu-o-fale, e lei i ai i le Atua se mana e gaosia ai le agaga o le tagata. O le Atua e le mafai ona ia toe gaosia o ia lava.

“O le malamalama, e faavavau ma e faatinoina i luga o se mataupu faavae o loo ola lava ia. O le agaga e mai lea tausaga i lea tausaga ma e le foafoaina. O mafaufau ma agaga uma ua auina mai e le Atua i le lalolagi ua mafai ona faateleina.

“O le uluai mataupu faavae o le tagata o le ola lava ia faatasi ma le Atua. O le Atua lava ia, i le silafia ai ua i ai o Ia i le lotolotoi o agaga ma le mamalu, ma talu ai e sili atu lona atamai, sa silasila atu ai e tatau ona faatulagaina ni tulafono e mafai ai e le toatele ona maua le avanoa e alualu ai i luma e pei o Ia lava. O lo tatou sootaga ma le Atua ua tuuina ai i tatou i se tulaga e alualu ai i luma i le poto. O loo ia te Ia le mana e faatulagaina ai ni tulafono e faatonu ai malamalama e vaivai, ina ia faaeaina i latou faatasi ma Ia, ina ia i ai lo latou mamalu e faaopoopoina i luga o le tasi, ma le poto uma, mana, mamalu, ma le malamalama, o le mea e tatau ona mauaina mo le faaolaina o i latou i le lalolagi o agaga.”8

“Tatou te manatu o le Atua sa foafoaina le tagata ma le mafaufau e mafai ona faatonutonuina, ma le tomai faalemafaufau e mafai ai ona faateleina faatatau i le tulaga o le usitai ma le ma’-elega e tuuina atu i le malamalama e fesootai mai le lagi i le mana o le mafaufau; ma o le latalata atili o le tagata i le atoatoa, o le manino tele foi lea o ona manatu, ma faateleina foi lona fiafia, seia ona faatoilaloina le leaga o lona olaga ma aveesea uma naunauga i le agasala; ma faapei ai o e faamaoni anamua, ua taunuu atu i le vaega o le faatuatua ua fusia ai o ia i le mana ma le mamalu o le na faia ia, ma aveina atu i luga e faatasi ma Ia. Ae ua tatou manatu o se nofoaga lea e lei mafai lava e se tagata ona oo atu i ai i se taimi vave.”9

Ua tatou o mai i le lalolagi ina ia maua se tino, ina ia maua le atamai, ma manumalo e ala i le faatuatua.

Ua iloa e tagata uma e tatau ona oti. Ma e taua lo tatou malamalama i mafuaaga ma pogai o lo tatou faailoa atu i suiga o le olaga ma le oti, ma le faatulagaga ma faamoemoega o le Atua i lo tatou o mai ai i lenei lalolagi, lo tatou tigaina ai iinei ma lo tatou tuua ai o lenei lalolagi. O le a le autu o lo tatou o mai ai i lenei olaga, ona oti lea ma tuua lenei lalolagi ma lē toe i ai iinei? O le mea lea e talafeagai ai i le faapea o le Atua o le a faaalia se mea e uiga i lenei mataupu, ma o se mataupu e tatau ona tatou suesue atili i ai i lo se isi lava. E tatau ona tatou suesue i ai i le ao ma le po, ona o le lalolagi ua valelea i le feagai ai ma lo latou tulaga moni ma le feagai ai ma le [Atua].”10

“O le faatulagaga a le Atua ao lei faavaeina le lalolagi o le tatau lea ona i ai ni o tatou malumalu [tino] faaletino, ma e ala atu i le faamaoni e tatau ona tatou manumalo ona faapea lea ona tatou maua le toe tutu mai le oti, ma i lea tulaga e maua ai le mamalu, viiga, mana, ma malo.”11

“Ua tatou o mai i lenei lalolagi ina ia tatou maua ni tino ma tuuina atu ma le mama i luma o le Atua i le malo selesitila. O le mataupu faavae sili o le fiafia e aofia ai le i ai o le tino. O le tiapolo e leai se tino, o lona faasalaga lena. E fiafia o ia pe a ia mauaina le tino o le tagata, ma ina ua tuliesea e le Faaola sa ia talosaga ina ia ulu atu i le lafu puaa, ua faaalia ai lona manao i le tino o le puaa i lo o le leai o se tino. O tagata uma e fai tino e i ai le mana ia i latou o e leai ni tino.”12

“O le Faaolataga e mo le tagata ina ia faasaoina mai i ona fili uma; aua sei vagana ua manumalo le tagata mai le oti, ua le faasaoina o ia. …

“O agaga i le lalolagi e faavavau ua pei o agaga i lenei lalolagi. Pe a o mai agaga i lenei lalolagi ma maua tino, ma ua maliliu ma ua toe tutu ma maua tino faamamaluina, o le a latou maua le mana e pulea ai agaga e lei mauaina ni tino, po o e ua le tausia o latou mamalu muamua, e pei o le tiapolo. O le faasalaga o le tiapolo ua ia le maua se tino e pei o le tagata.”13

“O le mataupu faavae o le atamai o le mataupu faavae lena o le faaolataga. O lenei mataupu faavae e mafai ona malamalama i ai e faatuatua ma naunautai, ma o i latou uma e le mauaina le atamai e tatau ai mo le faaolaina, o le a faasalaina. O le mataupu faavae o le faaolataga e tuuina mai ia i tatou e ala i le malamalama o Iesu Keriso.

“O le Faaolataga e leai se isi mea ua na o le manumalo lea i o tatou fili uma ma tuuina i lalo o o tatou vae. Ma pe a tatou maua le mana e tuu ai o tatou fili uma i lalo o o tatou vae i lenei lalolagi, ma le malamalama e manumalo ai i agaga leaga uma i le lalolagi a sau, ona faasaoina lea o i tatou, e pei o le tulaga o Iesu, lea sa nofotupu seia tuuina uma ona fili i lalo o Ona aao, ma o le fili mulimuli o le maliu [tagai 1 Korinito 15:25–26].

“Masalo o loo i ai ni mataupu faavae iinei e toaitiiti ni tagata e mafaufau i ai. E leai se tagata e mauaina lenei faaolataga sei vagana ua auala atu i le tino.

“O le taimi nei, i lenei lalolagi, ua masani tagata i le manatu faapito, ua fiasili ma ua tauivi ina ia sili a’e le tasi i le isi, ae o nisi o loo naunau e atiina ae isi faapea foi ma i latou lava. O lea, i le isi lalolagi o loo i ai ni agaga eseese. O nisi e saili ina ia maoae. Ma o le tulaga foi lena na i ai Lusifelo ina ua pau. Sa ia saili mo mea e le faatagaina i le tulafono. O le mea lea sa tulia ai o ia i lalo, ma o loo taua sa ia taitaiesea ai le toatele faatasi ma ia; ma o le malosi o lona faasalaga o le a ia le maua ai sona tino. O lona faasalaga lena.”14

O le Atua ua tuuina mai ia i tatou le saolotoga ma le mana e filifili ai le lelei mai le leaga.

“Afai e mauaina e tagata le faaolataga, e tatau ona mulimulitai i latou, ao latou te le i tuua lenei lalolagi, i ni tulafono ma mataupu faavae patino, lea na faatulagaina i se tulaga le mafai ona suia ao lei i ai le lalolagi. … O le faatulagaina o ni lalolagi faaleagaga ma le faalelagi, ma ni tagata faaleagaga ma le faalelagi, sa faia e tusa ai ma le faatulagaga atoatoa ma le o gatasi: o o latou gataaga ma tuaoi sa faatumauina e le masuia, ma taliaina e aunoa ma le faamalosi i o latou tulaga faalelagi e i latou lava, e pei ona faia e o tatou uluai matua i le taliaina ao i ai i luga o le fogaeleele. O le taua lena o le faamaopoopoina ma le taliaina o mataupu faavae o le faavavau moni e tagata uma i luga o le fogaeleele o e o manatu i le ola e faavavau.”15

“O tagata uma e aia i o latou saolotoga, aua sa faauuina ai e le Atua. Sa ia faia le tagata e fai ma sui, ma tuuina ia i latou le mana e filifili ai le lelei po o le leaga; ia saili atu i mea e lelei, i le tuliloaina lea o le auala o le paia i lenei olaga, e aumai ai le filemu o le mafaufau, ma le fiafia i le Agaga Paia iinei, ma le faatumuina i le fiafia ma le olioli i Lona itu taumatau pe a mavae lenei olaga; po o le tuliloa o se auala leaga, i le faia lea o le agasala ma le tetee atu i le Atua, ma faapea ona aumaia ai le faasalaga i o latou agaga i lenei lalolagi, ma le leiloloa e faavavau i le lalolagi a sau.”16

“E le mafai e Satani ona maileia i tatou i ana faatosinaga sei vagana ua tatou ioe i o tatou lava loto ma gauai atu i ai. O lo tatou lava natura o loo i ai le mafai e tatou te tetee atu i le tiapolo; ana faapea e lei foafoaina i tatou faapena, ua le avea i tatou ma ni tagata saoloto.”17

“O le tiapolo e leai sona mana ia i tatou sei vagana ua tatou faatagaina ai o ia; o le taimi lava tatou te tetee ai i soo se mea e mai le Atua, ua pule le tiapolo.”18

“I le aso 16 o Me, 1841, sa lauga atu ai le Perofeta i le Au Paia: “O Peresitene Iosefa Samita… sa matauina ua tuuaia pea Satani mo mea leaga ua tatou faia, ae afai o ia o le mafuaaga o mea leaga uma, e le tatau ona faasalaina le tagata. O le tiapolo e le mafai ona faamalosia le tagata e faia le leaga; o mea uma lava e faia i le faitalia. O i latou e teena le Agaga o le Atua, o le a mafai ona taitaiina i faaosoosoga, ma o le sootaga o le lagi o le a aveeseina mai ia i latou e mumusu e avea ma e mauaina lena mamalu sili. O le Atua e na te le uunaia ni mea faia faamalosi, ma e le mafaia foi e le tiapolo; ma o ia manatu e pei ona i ai [i nei mataupu] i le toatele ua le talafeagai.”19

O Eliza R. Snow sa tusi faamaumauina: “O [Iosefa Samita] sa faapea mai e le popole o ia pe o le a le saoasaoa i luma tatou te tamomoe ai i le ala o le amiotonu. Tetee i le tiapolo, ma o le a leai se matautia; o le Atua, tagata, ma agelu o le a le faasalaina i latou e tetee i mea uma e leaga, ma o tiapolo foi e le mafai ona faasalaina i latou e tetee i mea uma e leaga; ma e faapea foi i le tiapolo o le a itiiti se mafaia i le faatoilaloina o se agaga lelei ua teena mea uma e leaga e pei ona ia taumafai ai e faatoilalo Ieova.

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau vii–xii.

  • O a ni mea moni patino e uiga i le ata o le faaolataga ma le faamoemoega o le olaga ua tatou iloa ona o faaaliga i le Perofeta o Iosefa Samita? E faapefea ona fesoasoani nei mea moni ia te oe?

  • Sa aoao mai e Iosefa Samita o le ata o le faaolataga “o se mataupu e tatau ona tatou suesue atili i ai i lo se isi lava mataupu” itulau 222 ma “o se autu e tatau ona tatou mataituina ma le toto’a” itulau 222. O a ni auala tatou te suesue ai i le ata o le faaolataga? Ao tatou feagai ai ma a tatou galuega o aso taitasi, o le a se mea tatou te faia e tuuina atu ai i le ata o le faaolataga le mataituina ma le toto’a? O a ni auala e mafai ona tatou aoao atu ai le ata o le faaolataga i isi?

  • Toe iloilo aoaoga a Iosefa Samita e uiga i le Aufono i le Lagi ma e uiga i lo tatou natura e faavavau itulau 222–24. E faapefea ona avea le iloa o nei mataupu faavae o se faamanuiaga ia te oe i lou olaga i luga o le fogaeleele?

  • Sa molimau mai le Perofeta o Iosefa Samita, “O mafaufau uma ma agaga ua auina mai e le Atua i lenei lalolagi e mafai ona aafia i le faateleina” itulau 223. O le a sou manatu o le a le uiga o lenei mea? E faapefea ona avea lenei mea moni e aafia ai le auala e te faafeagai ai ma luitau? le auala e te lagonaina e uiga i lou agavaa ma mea e te mafaia? le auala e te feagai ai ma isi tagata?

  • Faitau le parakalafa muamua i le itulau 222. Mafaufau loloto i faamanuiaga tatou te maua ao tatou tuuina atu le “usiusitai ma le faamaoni… i le malamalama ua fesootai mai le lagi.”

  • Toe iloilo aoaoga a Iosefa Samita e uiga i le taua o le mauaina o se tino fai tino (itulau 224–25). E faapefea ona avea lenei malamalama e aafia ai le auala tatou te tausia ai o tatou tino?

  • Faitau le parakalafa mulimuli i le itulau 226 ma le parakalafa muamua i le itulau 227. Mafaufau po o le a le uiga o nei aoaoga ia te oe ao e faatinoina lou saolotoga. O a ni mea patino e mafai ona tatou faia e tetee ai faatosinaga a Satani?

Mau E Faatatau I Ai: 2 Nifae 2:25; 9:6–12; Alema 34:31–33; MFF 76:25–32; 101:78; Aperaamo 3:22–25

Faamatalaga

  1. History of the Church, 1:238; mai le “History of the Church” (manuscript), book A-1, i. 175, Church Archives, O Le Ekalesia a Iesu Keriso o le Au Paia o Aso e Gata Ai, Aai o Sate Leki, Iuta.

  2. History of the Church, 6:57–58; ua suia le vavaega o parakalafa; mai se aoaoga na tuuina atu e Iosefa Samita ia Oke. 15, 1843, i Navu, Ilinoi; lipotia mai e Uiliata Risati; toe tagai foi i le faaopoopoga, itulau 562), vaega 3.

  3. History of the Church, 1:98; mai le “History of the Church” (manuscript), book A-1, pepa eseese, Church Archives.

  4. History of the Church, 2:23; mai le “The Elders of the Church i Katelani, to Their Brethren Abroad,” Ian. 22, 1834, lomia i le Evening and Morning Star, Ape. 1834, i. 152.

  5. Sii mai e William Clayton, lipotia mai o se aoaoga e le iloa le aso sa tuuina atu ai e Iosefa Samita i Navu, Ilinoi; i le L. John Nuttall, “Extracts from William Clayton’s Private Book,” i. 7, Journals of L. John Nuttall, 1857–1904, L. Tom Perry Special Collections, Brigham Young University, Provo, Utah; kopi i Church Archives.

  6. Papatisoga,” se faamatalaga lomia i le Times and Seasons, Set. 1, 1842, i. 905; ua faaonaponei le sipelaga ma mataitusi tetele; o Iosefa Samita o le faatonu o le lomiga.

  7. History of the Church, 6:314; mai se aoaoga na tuuina atu e Iosefa Samita ia Ape. 7, 1844, i Navu, Ilinoi; lipotia mai e Uilifoti Uitilafi, Uiliata Risati, Thomas Bullock, ma William Clayton.

  8. History of the Church, 6:310–12; ua faaonaponei mataitusi tetele; mai se aoaoga na tuuina atu e Iosefa Samita ia Ape. 7, 1844, i Navu, Ilinoi; lipotia mai e Uilifoti Uitilafi, Uiliata Risati, Thomas Bullock, ma William Clayton; tagai foi i le faaopoopoga, itulau 562), vaega 3.

  9. History of the Church, 2:8; mai le “The Elders of the Church in Kirtland, to Their Brethren Abroad,” Ian. 22, 1834, lomia i le Evening and Morning Star, Fei. 1834, i. 135.

  10. History of the Church, 6:50; mai se aoaoga na tuuina atu e Iosefa Samita ia Oke. 9, 1843, i Navu, Ilinoi; lipotia mai e Uiliata Risati ma le Times and Seasons, Set. 15, 1843, i. 331; o lenei lomiga o le Times and Seasons sa tuai ona lolomiina.

  11. Sii mai e Martha Jane Knowlton Coray, lipotia mai o se aoaoga na tuuina atu e Iosefa Samita ia Me 21, 1843, i Navu, Ilinoi; Martha Jane Knowlton Coray, Notebook, Church Archives.

  12. Sii mai e William Clayton, lipotia mai o se aoaoga e le o maua le aso sa tuuina atu ai e Iosefa Samita i Navu, Ilinoi; i le L. John Nuttall, “Extracts from William Clayton’s Private Book,” i. 7–8, Journals of L. John Nuttall, 1857–1904, L. Tom Perry Special Collections, Brigham Young University, Provo, Utah; kopi i Church Archives.

  13. History of the Church, 5:403; mai se aoaoga na tuuina atu e Iosefa Samita ia Me 21, 1843, i Navu, Ilinoi; lipotia mai e Uiliata Risati; tagai foi i le faaopoopoga, itulau 562), vaega 3.

  14. History of the Church, 5:387–88; mai se aoaoga na tuuina atu e Iosefa Samita ia Me 14, 1843, i Yelrome, Ilinoi; lipotia mai e Uilifoti Uitilafi; tagai foi i le faaopoopoga, itulau 562), vaega 3.

  15. History of the Church, 6:50–51; ua suia le vavaega o parakalafa; mai se aoaoga na tuuina atu e Iosefa Samita ia Oke. 9, 1843, i Navu, Ilinoi; lipotia mai e Uiliata Risati ma le Times and Seasons, Set. 15, 1843, i. 331; o lenei lomiga o le Times and Seasons sa tuai ona lolomiina; tagai foi i le faaopoopoga, itulau 562), vaega 3.

  16. History of the Church, 4:45, faamatalaga lagolago; mai se tusi a le Au Peresitene Sili ma fautua maualuga i le Au Paia sa nonofo i le itu i sisifo o Katelani, Ohio, Tes. 8, 1839, Commerce, Ilinoi, lomia i le Times and Seasons, Tes.1839, i. 29.

  17. Sii mai e William I. McIntire, lipotia mai o se aoaoga na tuuina atu e Iosefa Samita i le amataga o le 1841 i Navu, Ilinoi; William Patterson McIntire, Notebook 1840–45, Church Archives.

  18. Sii mai e William Clayton, lipotia mai o se aoaoga e le o maua se aso sa tuuina atu ai e Iosefa Samita i Navu, Ilinoi; i le L. John Nuttall, “Extracts from William Clayton’s Private Book,” i. 8, Journals of L. John Nuttall, 1857–1904, L. Tom Perry Special Collections, Brigham Young University, Provo, Utah; kopi i le Church Archives.

  19. History of the Church, 4:358; o upu o loo faapuipui i lona uluai tusiaina; ua suia le vavaega o parakalafa; mai se aoaoga na tuuina atu e Iosefa Samita ia Me 16, 1841, i Navu, Ilinoi; lipotia mai e le Times and Seasons, Iuni 1, 1841, i. 429.

  20. History of the Church, 4:605; ua faaonaponei faailoga; mai se aoaoga na tuuina atu e Iosefa Samita ia Ape. 28, 1842, i Navu, Ilinoi; lipotia mai e Eliza R. Snow.

Christ speaking to Moses

“Ma sa fetalai atu le Alii le Atua ia Mose, ma faapea atu: … Aua faauta, o lau galuega ma lou mamalu lenei—ia faataunuu le faaofuina o le tagata i le tino ola pea ma le ola faavavau.”

father reading

“O le faatulagaga a le Atua ao lei faavaeina le lalolagi o le tatau lea ona i ai ni o tatou malumalu [tino] faaletino, ma e ala atu i le faamaoni e tatau ai ona tatou manumalo.