Mataupu 23: ‘E Maeu le Lelei ma le Matagofie … o le Nonofo Faatasi i le Lotogatasi’

Mataupu 23

“E Maeu le Lelei ma le Matagofie … o le Nonofo Faatasi i le Lotogatasi”

“O se toso umi, o se toso malosi, ma se toso faatasi.”

Mai le Soifuaga o Iosefa Samita

I le aso 27 o Tesema, 1832, sa mauaina e le Perofeta o Iosefa Samita se poloaiga mai le Alii mo le Au Paia ina ia amata ona fauina se malumalu i Katelani (tagai MFF 88:119). I le aso 1 o Iuni, 1833, sa tuuina atu ai e le Alii nisi faatonuga faaopoopo i le Perofeta: “O lenei, o le mea tonu lenei, ma le manatu o le Alii—, ia faia i le ala o le a ou faaali atu ai ia te outou e toatolu” (MFF 95:13–14).

I ni nai aso mulimuli ane, sa faataunuuina e le Alii ana folafolaga, i le tuuina atu ia Iosefa Samita ma ona fesoasoani i le Au Peresitene Sili se faaaliga maoae lea sa latou vaai ai i fuafuaga patino mo le malumalu. O Frederick G. Williams, le Fesoasoani Lua i le Au Peresitene Sili, sa toe faamatala mai: “O Iosefa Samita sa mauaina le upu a le Alii ina ia aveina atu ona fesoasoani e toalua, o Frederick G. Williams ma Sidney Rigdon, ma o mai i luma o le Alii, ma o le a Ia faaali atu ia i latou le fuafuaga po o le ata o le fale e fia fauina. Sa matou o ifo i o matou tulivae, ma valaau atu i le Alii, ma o le fale sa faaali mai e tusa ai ma la matou vaai, ma o au sa muamua iloaina. Ona matou vaai uma faatasi ai lea i ai. Ina ua maea ona matou vaai i le tino i fafo o le malumalu, sa foliga mai sa alu ae le fale i o matou luga.”¹

Ina ua faamalamalama atu e le Perofeta o Iosefa Samita i le aufono a faitaulaga sili le fuafuaga matagofie sa faaalia i le Au Peresitene Sili, sa matua fiafia le usoga ma faapea ona o atu faavave e filifilia se fanua—o se vaega i le toga saito sa totoina e le au uso o Samita i le amataga o le tautoulu. I lea lava taimi sa tamoe atu ai Ailama Samita e aumai se naifi pio sele saito e amata ai ona faamama le fanua mo le galuega, ma folafola atu, “Ua matou sauni e fau le fale mo le Alii, ma ua ou naunau e avea ma tagata muamua i le galuega.”²

O lenei lagona faafiafiaina sa avea ma uiga soofaatasi ao galulue le Au Paia ma ositaulaga e fausia le uluai malumalu i lenei tisipenisione. I lalo o le vaaiga a Ema Samita, o tina sa faia ni totini, ofuvae uumi mafanafana, ma ni peleue mo e faigaluega i le malumalu. O tina foi sa latou faia pupuni ma kapeta mo le malumalu, faatasi ai ma galuega i totonu o le malumalu lea sa faatautaia e Polika Iaga. O Uso John Tanner sa faatauina atu lana faatoaga e 2,200 eka i Niu Ioka, ma taunuu ai i Katelani i le taimi tonu e tuuina atu ai i le Perofeta le $2,000 e totogi ai le mokesi o le fanua mo le malumalu, lea sa toetoe lava a aveeseina e le au ao aitalafu. I le puipuia o le malumalu mai faamatau a le au faatupu faalavelave, sa leoleoina e alii le malumalu i le po, ma momoe ai lava i lavalava sa faigaluega ai i le ao.

Sa folafola mai e le Perofeta: “Sa faia ni sauniuniga e tele mo le amataina o le fale o le Alii; ma e ui lava sa mativa le Ekalesia, ae ona o lo matou lotogatasi, au faatasi ma le agalelei faateleina ua faamalosia ai i matou e tausia poloaiga a le Atua.”³

O Heber C. Kimball, lea sa avea ma se tasi o le Korama a le Toasefululua i le tausaga ao lei faapaiaina le malumalu, sa faamatalaina le taumafaiga tele: “Sa tutu faatasi le Ekalesia atoa i lenei taumafaiga, ma sa tuuina mai e tagata uma se fesoasoani i le galuega. O i latou sa leai ni manu e lau ai uta sa galulue i le mea e asu mai ai le maa ma saunia maa mo le lauina atu.”⁴ Sa toe faamatala mai foi e Elder Kimball: “Sa faapea mai Iosefa, ‘O mai, le au uso e, tatou o atu ia i le mea e sua mai ai maa ma galulue mo le Alii.’ Ma o le Perofeta sa alu atu o ia lava i ona ofu e fai i manoa, o le ofutino talaloa, ma le ofuvae faigaluega ma galue i le mea e sua mai ai maa e pei lava o i matou. O iina i Aso Toonai uma matou te aumaia ai taavale toso uma mo le lauina o maa mo le malumalu, ma o lea sa matou faaauau ai pea seia oo ina maea lena fale; ma o o matou taitoalua e suisui pea i lea taimi atoa, o le faiga o filo, suisui ma le … faia o galuega eseese uma.”⁵

O taumafaiga a le Au Paia i Katelani sa faaalia ai le galulue faatasi, ositaulaga, ma le naunautai lea e mafai ai ona faataunuuina faamoemoega o le Alii i tausaga o le a oo mai. O le tasi lenei o le tele o taimi sa tutu faatasi ai le Au Paia, ma gauai atu i le apoapoaiga a le Perofeta o Iosefa Samita: o “Se toso umi, se toso malosi, ma se toso uma faatasi.”⁶

Aoaoga a Iosefa Samita

Pe a tatou galulue faatasi i le tutu faatasi, o le a sili atu le lelei o le faataunuuina o le faamoemoega o le Atua.

“[Tatou] te lagona le fiafia e feiloai ma le Au Paia i le isi Konafesi Aoao [Oketopa 1840]. … O le Au Paia ua matua vilivilitai, le faavaivai, ma malolosi pea, i le galuega tele o aso e gata ai; ma o [lenei mea] ua aumaia ai le fiafia ma le toafilemu, ma le faamalosiau malosi ia i tatou, ao fetaiai ai ma faigata lea e mafai ona i ai i o tatou ala.

“Ia tuuina i le au uso ia faaalia pea lenei agaga, ma lagolagoina i tatou, ma e tatau, o le a tatou alualu i luma; o le galuega a le Alii o le a taavale atu i luma, o le Malumalu o le Alii ia faatuina, o Toeaina o Isaraelu ia faamalosia, ia fausia i luga Siona, ma avea ma viiviiga, fiafiaga, ma le mamalu o le lalolagi uma, ma o le pese o le faaneetaga lea ia te Ia o Le tietie i le nofoalii atoa ma le Tamai Mamoe, o le faamanu ma le faaneetaga ma le viiga ma le malosi e faavavau, faavavau lava, o le a toe lagonaina mai lea mapuepue i lea mapuepue, mai lea mauga i lea mauga, mai lea motu i lea motu, ma mai lea konetineta i lea konetineta, ma o malo o lenei lalolagi ua avea ma malo o lo tatou Atua ma lona Keriso [tagai Faaaliga 11:15].

“Ua matou fiafia lava i le iloa ai o loo i ai se agaga o le faatasia o loo i ai i le ekalesia iinei ma le lautele i fafo atu, i luga o lenei konetineta, ae faapea foi i atumotu o le vasa; ona o lenei mataupu faavae, ma faapea foi le tulimatai i le galulue faatasi, o le a mafai ai ona tatou tauaveina le faatinoina o le faamoemoega o lo tatou Atua.”⁷

“[O le Malumalu i Navu] ua agai i luma ma le vave tele; ua tuuina atu le faamalosiau e tele i lima uma mo le faatinoina o lona fausaga, ma o mea mo le fausiaina o ituaiga eseese uma ua i ai i se tulaga alualu i luma, ma e oo atu i le amataga o le isi tautoulu ua tatau ona puipui atoa le fale. … O lea sa i ai pea, i le taimi o le taumalulu, le toatele e tusa ma le selau o lima sa suaina mai le maa, ae i lea lava taimi o le toatele o isi o loo feagai ma le la’uina, ma isi ituaiga o galuega. …

“Ao feagai ai le toatele i vaega esese ma le faataunuuina o a latou matafaioi i aso taitasi, ma galueaiina le tasi vaesefulu o o latou taimi, o isi ua le o saunia i le aumaia i totonu o a latou sefuluai ma le faapaiaina mo lenei lava faamoemoega tele e tasi. E lei i ai lava se taimi talu mai le faavaeina o lenei Ekalesia, ua vaaia ai le faaalia o naunautaiga tele ina ia usitaia mea e [manaomia] mo Ieova, ma le tele o le malosi o le naunautaiga ia faia le finagalo o le Atua, le tele o le faamalosiau e faaaogaina, po o le tele o le ositaulaga ua faia i lo se isi taimi talu ona saunoa mai le Alii, ‘Ia atiina ae le Malumalu i le sefuluai a lou nuu.’ [Tagai MFF 97:10–11.] E foliga mai o le agaga o le atiina ae, foai atu ma le alofa i se mafuaaga lelei ma le usiusitai ua i ai lea i luga o e matutua ma e iti, ma uso ma tuafafine, tama ma teine, e faapea foi i tagata ese, e le o ni tagata o le Ekalesia, ua tutu faatasi ma le agaga foai mo le faataunuuina o lenei galuega tele; ua faapea foi i e ua maliliu taitoalua, i le tele o mea tutupu, ua le mataofia, i lo latou le tagolima, i le foai mai o a latou tupe iti e lua.

“Ua matou lagona i lenei taimi e ofoina atu i tagata uma, o e matutua ma e iti, i totonu o le Ekalesia ma fafo atu foi, la matou faafetai tele mo lo latou agaga saoloto foai, agalelei, naunautai, ma le usiusitai, lea sa o latou faatinoina i se taimi tatau e tusa ai ma lenei galuega. E le faapea ua matou maua ai ni faamanuiaga mo i matou lava i se vaaiga i tulaga tau tupe, ae o le au uso, e pei o lenei mea ua tupu, ua faaalia ai le galulue faatasi mo le faamoemoega ma le fuafuaga, ma ua tuuina uma tauau i le uili, o o tatou manaoga, auaunaga, galuega mamafa, ma popolega ua matua faaitiitia lava, o la tatou amo ua avegofie ma la tatou avega ua mama ia [tagai Mataio 11:30].”⁸

“O lenei, ou te fai atu tasi ia te outou uma, e pei o le fai Salamo ua mavae, ‘Faauta, o le mea e matua lelei ma le matagofie lava, pe a nonofo faatasi o uso.’ ‘E tusa ma le suauu lelei i luga o le ulu, na tafe ifo i lalo o le ava a Arona, ma tafe ifo i le ua o ona ofu, e tusa ma le sau i Heremoni, ua toto ifo i luga o mauga o Siona,’ o se faatasiga mautu; ‘aua na poloai Ieova ia oo i ai lana faamanuia, o le ola lava lea e faavavau!’ O le lotogatasi o le malosiaga lea. [Tagai Salamo 133:1–3.]”⁹

Tatou te ola i le tutu faatasi ao tatou taumafai e usiusitai i tulafono a le Atua ma faatoilaloina o tatou manatu faapito ma le faailoga tagata.

Ia Tesema 1840 sa tusi atu ai le Perofeta i le Korama a le Toasefululua ma isi taitai perisitua o e o loo faia ni misiona i Peretania: “Ua matua. … faamalieina lou mafaufau, o loo i ai se matua malamalamaga lelei ia te outou, ma o le Au Paia ua latou usitaia ma le fiafia fautuaga, ma [ua taumafai malosi] o le tasi i le isi i lenei galuega o le alofa, ma i le faaalualuina i luma o le mea moni ma amiotonu. O lenei tulaga ua tatau ona i ai i totonu o le Ekalesia a Iesu Keriso; o le lotogatasi o le malosiaga lea. ‘Se mea ina a lelei o uso ae nonofo faatasi!’ [Salamo 133:1.] Ia tuu atu i le Au Paia a le Silisili Ese ia latou atiina ae lenei mataupu faavae, ma o faamanuiaga mamalu o le a fai ma taui, e le gata mo i latou taitoatasi, ae o le Ekalesia atoa—o le faatulagaga o le malo o le a faatumauina, o ona ofisa e faaaloalogia, ma o ona manaoga o le a usitaia vave ma le fiafia. …

“Ia manatua e le Au Paia o mea tetele e faalagolago ia latou taumafaiga taitoatasi, ma ua valaauina i latou ia galulue faatasi ma i tatou ma le Agaga Paia i le faataunuuina o le galuega tele o aso gataaga; ma i le manatu i ai i lenei tulaga, o faamanuiaga ma mamalu o lenei galuega i le gataaga, ia le gata e tanumia uma manatu faapito, ae ia matua aveesea; ma ia faasili le alofa i le Atua ma tagata, ma pule manumalo i mafaufau uma, ina ia avea o latou loto e pei o le loto o Enoka ua mavae, ma iloa mea uma, i le taimi nei, tuanai ma le lumanai, ma tutusa uma i meaalofa, ma faatalitali mo le afio mai o le Alii o Iesu Keriso [tagai 1 Korinito 1:7].

“O le galuega o loo tatou galulue faatasi ai e le o se tasi o galuega masani. O fili e tatau ona tatou tauivi e faatoilalo e maaleale ma ua i ai le tomai e fe’alo’alofa’i; e tatau ai ia i tatou ona mataala e faatulaga lo tatou malosi, ma o le lagona sili e tatau ona i ai i la tatou faatasiga, ma o lea, i le fesoasoani a le Silisili ese, tatou te o atu ai ma le manumalo i le manumalo, i le faatoilaloina i lea faatoilaloina, o o tatou fiafiaga leaga o le a faatoilaloina, o lo tatou faailoga tagata o le a tea ese; o le a le maua i o tatou loto se avanoa mo le ita; o amio le mama o le a le toe vaaia, ma o le a tatou tutu ma le faamaoni i le silafaga a le lagi, ma ta’ua o atalii o le Atua.

“Ia tatou iloa tatou te le ola mo i tatou lava, ae mo le Atua; i le faia ai o lena mea, o le a i o tatou luga le faamanuiaga sili i le taimi nei ma le faavavau.”¹⁰

“O le a tatou fai atu i le Au Paia lea e o mai iinei [i Navu], ua matou faataatia le faavae mo le faapotopotoina o le nuu o le Atua i lenei nofoaga, ma e [matou] te faamoemoe pe a o mai le Au Paia, o le a latou i lalo o le fautuaga ua tofia e le Atua. … O loo matou taumafai iinei e fusi a’e i luga o tatou sulugatiti; ma aveese mai i la tatou faatasiga le aufaigaluega o le agasala, ma e tatou te faamoemoe pe a taunuu mai o tatou uso mai fafo, o le a latou fesoasoani ia i tatou i le tauaveina atu o lenei galuega lelei, ma faataunuuina lenei fuafuaga tele, ina ia mafai ona fausia Siona i luga o le amiotonu; ma o malo uma o le a lolofi mai i lana tagavai;’ ma i le avea ai ma tagata o le Atua, i lalo o lana taitaiga, ma le usiusitai i Lana tulafono, e mafai ona tatou ola ae ai i le amiotonu ma le mea moni; ma i le faataunuuina o Lona faamoemoega, e mafai ona tatou maua le nofoaga faatasi ma i latou ua faapaiaina.”¹¹

“O i tatou uma lava, e i ai a tatou uo, tatou sootaga, o tatou aiga ma e masani; ma ua tatou iloa o le sootaga faaleuo … ma le faaleuso ua mafai ai ona faatasia mausali i tatou faatasi ma le afe o masaniga faapelepele; ua tatou fusia le faatuatuaga masani e tasi, e pei lava o lea sa ‘tuuina mai faatasi i le au paia.’ [Iuta 1:3.] Ua faamanuiaina i tatou i le faalogo ai i le talalelei e faavavau, lea sa tuuina mai ia i tatou e le agaga o valoaga, e ala i le tatalaina o le lagi, e le meaalofa a le Agaga Paia, i le auaunaga a agelu, ma le mana o le Atua. … O se lagona ootia o loo alu atu i le tino, e oo lava i le tino o Keriso, lea, e pei ona taua e Paulo, i lana ekalesia; ma e le mafai e se vaega e tasi o le tino ona tiga e aunoa ma le lagonaina e le isi vaega le tiga, e pei ona fai mai Paulo, afai e tiga se vaega e tasi, e tiga faatasi uma vaega o i ai, ma a fiafia se vaega e tasi o vaega uma foi o le a faamamaluina faatasi ai [tagai 1 Korinito 12:12–27].”¹²

O faamanuiaga sili faaletino ma le faaleagaga e masani ona maua mai i taumafaiga faatasi.

Ia Ianuari 1841 sa tuuina mai ai e le Perofeta o Iosefa Samita ma ona fesoasoani i le Au Peresitene Sili ni faatonuga i le Au Paia o e o le a o mai i Navu mai vaega eseese o le lalolagi: “E ala i le faaatoatoaina o le galue, ma le tutu faatasi i taumafaiga, ua na ona tatou faataunuuina ai le galuega tele o aso gataaga …, ae o mea tatou te fiafia i ai, i le faaletino ma le faaleagaga, o le a tele lona alualu i luma, ma o faamanuiaga o le lagi e tatau ona tafe atu ia i tatou i se tafe e le faalavelaveina; o lenei mea, matou te manatu o le a le fesiligia.

“O faamanuiaga sili faaletino ma le faaleagaga lea e masani ona tafe mai le faatuatua ma taumafaiga tuu faatasi, e le i ai se faamalosiau po o se tulaga atiina ae toatasi. O le talaaga o tausaga uma ua mavae, ua lava lea e faamaonia ai lea tulaga. …

“Matou te moomoo i le Au Paia ia malamalama i lea mea, pe a o mai iinei, e le tatau ona latou faamoemoe i le atoatoa, po o le manatu o mea uma o le a sologa lelei, filemu, ma alofa; afai latou te tuu atu i nei manatu, o le a le pine ona faaseseina i latou, aua o iinei o loo i ai tagata, e le gata e mai i setete eseese, ae mai malo eseese, o e, e ui latou te lagona se sootaga tele i le mafuaaga o le mea moni, o loo i ai o latou manatu faapito i aoaoga, ma, e tusa ai, e manaomia sina taimi e faatoilaloina ai nei mea. O lea e toe fai atu ai, e toatele e fetolofi mai i totonu ma le le iloa, ma taumafai e faatupuina le feeseeseai, feteenai, ma le feitagai i lo tatou lotolotoi, ma i le faia ai o ia mea, e aumaia ai le leaga i luga o le Au Paia. … O le mea lea, ia tuuina atu ia i latou o e ua o mai i lenei nofoaga ia naunautai e tausia poloaiga a le Atua, ae aua nei faavaivaiina i mea ua tatou tausia, ma o le a latou ola manuia—o le poto o le lagi o le a fesootai ia i latou, ma o le a latou oo lava i le vaai o le mata i le mata, ma fiafia ai i fua o lena mamalu lea ua faasaoina mo e amiotonu.

“Ina ia faatuina le Malumalu o le Alii, e matua manaomia le faamalosiau i le tulaga manaomia o le Au Paia, ina ia latou fausia se fale e taliaina e le Silisili Ese, ma lea e i ai lona malosi ma le mamalu e tatau ona faaalia ai. O le mea lea o i latou e mafai ona osigataulaga saoloto mo o latou taimi, o a latou taleni, ma o latou fanua, mo le tulaga manuia o le malo, ma lo latou alofa o loo i ai i le pogai o le mea moni, … ia faatasi ma i tatou i lenei galuega tele o aso gataaga, ma fetufaai i le puapuaga, ona mafai lea ona o latou fefaasoaai i le mamalu ma le manumalo.”¹³

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau vii–xii.

Mafaufau e uiga i le faamatalaga a le Perofeta , “O se toso umi, o se toso malosi, ma se toso faatasi uma” (itulau 292). O le a se mea e tupu pe afai o se taumafaiga e le lava le umi pe e le lava le malosi? O le a le mea e tupu pe a taufai toso uma tagata i itu eseese? E faapefea ona tatou faatinoina le sunoaga a le Perofeta i totonu o o tatou aiga? i o tatou valaauga i le Ekalesia?
Faitau le parakalafa atoa muamua i le itulau 294. Aisea e mama ai a tatou avega pe a tatou galulue faatasi? (Mo ni faataitaiga, tagai itulau 289–93. O le a se mataupu faavae ua fesoasoani ia te oe ia aoga i le faateleina o le tutu faatasi ma isi?
Toe iloilo le parakalafa atoa muamua i le itulau 295. O a nisi o faigata o le manatu faapito? O le a se mea tatou te faia e aveeseina ai le lagona faapito i totonu ia i tatou lava? O le a sou lagona pe a e “tuuina le alofa i le Atua ma [tagata] e faatumuina” lou loto?
Toe iloilo le parakalafa o loo amata i le pito i lalo o le itulau 296. O a ni auala ua faamanuiaina ai oe mai “sootaga faaleuo” ma “fegalegaleaiga tausaafia” i la outou uarota po o le paranesi? E faapefea ona manuia uarota ma paranesi pe afai o ni uiga “agalelei faaaloalo o loo i ai i totonu o le tino atoa”?
Suesue le parakalafa o loo amata i le pito i lalo o le itulau 296. Aisea e te manatu ai e le atamai le faamoemoe i le atoatoa o tagata o tatou uarota ma paranesi? O anafea na e vaai ai i se vaega o tagata e le atoatoa ua faaaoga a latou taleni eseese ma agavaa mo se mafuaaga tatau? O le a se taunuuga o lea taumafaiga soo faatasi?

Mau E Faatatau I Ai: Mataio 18:19–20; Ioane 17:6–26; Mosaea 18:21; 3 Nifae 11:29–30; MFF 38:24–27; Mose 7:18

Hyrum Smith — Ina ua uma ona faamalamalama e Iosefa Samita le ata o le Malumalu o Katelani, e pei ona sa faaalia mai ai e le Alii, sa tamoe Ailama Samita e aumai se naifi pio selesaito ma folafola atu, “Ua matou sauni e fausia se fale mo le Alii, ma ua ou naunau e avea ma tagata muamua i le galuega.”

men — “O le lotogatasi o le malosiaga lea.‘Se mea ina a lelei o uso ae nonofo faatasi!’ Ia tuu atu i le Au Paia a le Silisili Ese ia latou atiina ae lenei mataupu faavae.”