Taitaiina i le Ala a le Alii

“Ou te aoao ia i latou mataupu faavae sao, ona latou pulea lea o i latou lava.”

Mai le Soifuaga o Iosefa Samita

Ao amata e le Au Paia i Katelani ona galulue ma ositaulaga i le fausiaina o le malumalu i lo latou nofoaga, na feagai le Au Paia i Jackson County, Misuri, ma sauaga matautia. Ao faateleina le numera o tagata o le Ekalesia ua agai mai i Misuri, ua tupu foi feteenaiga ma e ua leva ona nonofo ai. Ua popole tagata Misuri i le faaitiitia o le pulega faapolokiki, sa latou masalosalo foi ona o talitonuga faalelotu a le Ekalesia e le masani ai, ma sa latou le fiafia i amioga a le Au Paia o le fefaatauai o i latou lava. O le au faatupu vevesi ua faateleina lo latou matau’a i lo latou faasauaina lea o le Au Paia, ma ia Novema 1833, sa faamalolosia [le Au Paia] e o ese ma o latou aiga. I le tuua ai o le tele o a latou mea fafaga ma meatotino, sa sosola le Au Paia i le itu i matu mo Clay County, Misuri, lea sa latou maua ai sina toomaga mo sina taimi.

Sa matua popole le Perofeta o Iosefa Samita, lea sa nofo i Katelani, e uiga i mafatiaga o le Au Paia i Misuri, ma sa ia manao ai e fesoasoani ia i latou. Ia Fepuari 1834, sa faaali atu e le Alii ia te ia e tatau ona ia faatulagaina se vaega o le Au Paia ma o atu i Jackson County. O lenei vaega ua taua o le Tolauapiga a Siona, sa o atu e fesoasoani i le toe mauaina mai o eleele ma fanua ia sa aveeseina sese mai tagata o le Ekalesia. (Tagai MFF 103: 21–40.) O lenei tolauapiga sa faavaeina aloaia i le aso 6 o Me, 1834, ma na oo atu lava i le 200 tagata. O le au savavali, o e ua faaaupegaina ma faatulagaina o se vaegaau faamiliteli, sa taunuu e latalata i Jackson County i le ogatotonu o Iuni, ina ua maea le savalia o le sili atu ma le 900 maila.

O tagata o le tolauapiga sa savavali i se mamao tele i aso taitasi, i le tele o taimi i le malosi o le vevela ma le le lava o meaai ma le leaga o vai e tausia ai i latou. O le fegalegaleaiga vavalalata o le tasi i le isi i le tele ai o vaiaso o le faigamalaga, faatasi ai ma le vaivai ma le fia aai, ua faaosofia ai nisi o alii e fetauai le tasi ma le isi ma faitioina ai le Perofeta.

E ui i nei faafitauli uma o lenei malaga lamatia ma le faigata, sa aoao atu e Iosefa Samita i tagata o le tolauapiga ia mataupu faavae taua o le taitaiga ao ia taitaia i latou i lea aso ma lea aso. O Uilifoti Uitilafi, o se tasi o le Tolauapiga a Siona lea sa mulimuli ane avea ma Peresitene o le Ekalesia, sa faapea mai: “Sa matou maua se faaagavaaina e le mafai ona matou maua i se isi lava mea. Sa matou maua le avanoa e vaai ai i foliga o le Perofeta, ma sa matou maua le avanoa mo le malaga i le afe maila faatasi ma ia ma vaai i le galuega a le Agaga o le Atua ia te ia, ma faaaliga a Iesu Keriso ia te ia ma le faataunuuina o na faaaliga.”¹

Ina ua taunuu le vaega i Misuri, sa amata ona latou feutagai ma taitai o le setete, ae o nei taumafaiga mo se taunuuga filemu sa le faamanuiaina. Ina ua foliga mai o le a oo i se tulaga o le fetauai, sa tatalo le Perofeta mo se taitaiga ma, i le aso 22 o Iuni, 1834, sa maua ai se faaaliga e faataapeapeina ai le tolauapiga ma faalauiloaina ai o Siona ua le mafai ona faasaoina i lena taimi (tagai MFF 105). E tusa ai ma tagata o le tolauapiga sa faapea mai ai le Alii, “Ua ou faalogoina a latou tatalo, ma o le a talia foi la latou taulaga; e tatau foi ia te au ona aumaia i latou iinei e fai ma tofotofoga o lo latou faatuatua” (MFF 105:19).

O le Tolauapiga a Siona sa le mafai ona faataunuuina lona faamoemoega faapolokiki, ae sa maua ai le tulaga loloto faaleagaga. Ia Fepuari 1835, ina ua faatulaga e le Perofeta le Korama a Aposetolo e Toasefululua ma le Korama a Fitugafulu, o le toaiva o Aposetolo e Toasefululua ma Fitugafulu uma sa auauna atu i le Tolauapiga a Siona. E pei ona toe manatua ai e Iosefa Iaga, o se tasi o uluai uso o le Au Fitugafulu, sa faamalamalama atu e le Perofeta i se vaega o nei au uso: “Sa le finagalo le Atua tou te tau. E le i mafai ona Ia faatulagaina lona malo ma le Toasefululua o alii e tatalaina faitotoa o le Talalelei i malo o le lalolagi, ma le fitusefulu o alii i lalo o la latou taitaiga e mulimuli i o latou ala, seiloga na te aveina i latou mai se vaega o alii ua ofoina atu o latou ola, ma ua latou faia se osigataulaga tele e pei ona faia e Aperaamo.”²

O iina i le Tolauapiga a Siona lea sa maua ai e Polika Iaga, Heber C. Kimball, Uilifoti Uitilafi, ma isi ni aoaoga faatino ua mafai ai e i latou ona taitai le Au Paia mai Misuri i Ilinoi i le 1839 ma mulimuli ane i le Vanu o Sate Leki. Mai lo latou tomai i le faatasi ai ma le Perofeta o Iosefa Samita, sa aoao ai e nei uso le taitaiga i le auala a le Alii.

Aoaoga a Iosefa Samita

O taitai e aoaoina mataupu faavae sao ma fesoasoani ia i latou o loo latou taitaiina e aoao e pulea i latou lava.

O Ioane Teila, le Peresitene lona tolu o le Ekalesia, sa lipotia mai: “I ni nai tausaga talu ai, i Navu, o se alii sa ma faatasi, o se tagata o sui o le Au Faitulafono, sa fesili atu ia Iosefa Samita pe mafai faapefea ona ia pulea nei tagata e toatele, ma faatumauina lenei faatulagaga atoatoa, ma sa faapea mai i lea lava taimi o se mea faigata tele mo i latou e faia i soo se mea lava. Sa faapea atu le Susuga a Samita o se mea faigofie tele le faia o lea mea. ‘E faapefea?’ o le tali mai lea a lea alii; ‘ia i matou o se mea faigata tele.’ Sa tali atu le Susuga a Samita, ‘Ou te aoao ia i latou mataupu faavae sao, ona latou pulea lea o i latou lava.’ ”³

O Polika Iaga, le Perofeta lona lua o le Ekalesia, sa lipotia mai: “O le fesili sa fesiligia pea i le tele o taimi ia Iosefa Samita, e alii sa o mai e vaai ia te ia ma ona tagata, ‘E faapefea ona e faatonutonuina ou tagata i lenei tulaga faigofie? E foliga mai e latou te le o faia lava nisi mea sei vagana mea ua e fai atu ai; e faapefea ona mafai ona e pulea i latou i lenei faigofie?’ Sa faapea mai o ia, ‘Ou te le pulea i latou. O le Alii sa faaalia mai ni mataupu faavae mai le lagi e tatau ona matou ola ai i nei aso e gata ai. O le taimi ua latalata mai o le a faapotopotoina ai e le Alii lona nuu mai e amioleaga, ma o le a Ia faapuupuuina lana galuega i le amiotonu, ma o mataupu faavae ua Ia faaalia ua ou aoaoina atu i tagata ma ua latou taumafai e ola e tusa ai ma ia mataupu faavae, ma pulea ai i latou lava.’ ”⁴

I le tali atu i tuuaiga o loo ia sailia le pule, sa saunoa mai le Perofeta o Iosefa Samita: “I le faatatau ai i le mana ma le mafaufau o le tagata ola o loo ou umia, ou te faapea atu, o le taunuuga o le mana i mataupu faavae lea sa avea ai au ma meafaigaluega i aao o le Atua i le tuuina atu lea ia i latou, ae le faia ona o sa’u pule … Ou te fesili atu, Pe sa ou faia ea i sa’u pule se mea i se isi? Pe ou te lei tuuina atu ea ia te ia le saolotoga o le le talitonuina o soo se mataupu faavae sa ou folafolaina, pe a ia vaai ua tatau ai? Aisea ua le mafai ai e ou fili ona faasagatau i mataupu faavae? E le mafai ona latou faia: ma ou te luitauina tagata uma ina ia latou taumafai e faasese i ai.”⁵

“O se uso e galue i le ofisa o le St. Louis Gazette … sa mananao e fiailoa po o le a le mataupu faavae ua ou maua ai le mana tele. … Sa ou tau atu ia te ia ua ou maua le mana i luga o mataupu faavae o le mea moni ma le amiotonu, lea e tumau pe a ou oti ma alu ese atu.”⁶

O taitai e maua le atamai latou te manaomia mai le Agaga ma faailoa faamanuiaga a le Alii ia i latou.

“O le tagata o le Atua e tatau ona faaee i ai le atamai, poto, ma le malamalama, ina ia mafai ona aoao ma taitai le nuu o le Atua.”⁷

O Iosefa Samita sa tusi atu i le Korama a le Toasefululua ma isi taitai o le perisitua o loo faia ni misiona i Peretania: “Ou te faapea atu, e tusa ai ma lou iloa o a outou gaoioiga, ua matua ou fiafia o loo outou faia ma le atamai; ma e leai so’u masalosalo, ae o le Agaga o le Alii ua taitaiina outou; ma o lea ua faamaonia i lo’u mafaufau ua outou lotomaualalo, ma o outou naunautaiga, e mo le faaolataga o outou uso a tagata, ae le mo o outou lava viiga, ma manaoga faaletagata. Pe a faaalia pea e le Au Paia le manaomia o aoaoga, o a latou fautuaga o le a faatagaina pea, ma o lona faatinoina o le a faapaleina i le manuia.

“E tele mea e sili ona taua, lea tou te fesiligia ai se fautuaga, ae ou te manatu ua outou agavaa atoatoa e filifili ai i se faaiuga o na mea, aua o loo sili lo outou iloa i le feagai ai ma na tulaga patino nai lo au; ma ou te matua lagona le faatuatuaina o lo outou atamai soofaatasi. …

“Le au uso pele e, e tatau ona outou iloa nisi o ou lagona, pe a ou manatunatu loloto i le galuega tele lenei ua taavale atu, ma le sootaga lea ou te lagolagoina ai, ao sosolo atu i atunuu mamao, ma le afe ma afe o loo ua taliaina. Ua ou iloa i nisi o tulaga i lau matafaioi, ma le manaomia o loo i ai i le mauaina o le fesoasoani mai luga, ma le atamai mai luga, ina ia mafai ona ou aoao i nei tagata, lea ua avea nei ma ni tagata maoae, le mataupu faavae o le amiotonu, ma taitaiina i latou ia tasi i le finagalo o le Lagi; ina ia faaatoatoaina ai i latou, ma saunia ai e feiloai ma le Alii o Iesu Keriso pe a Ia afio mai i le mamalu silisili. Pe mafai ona ou faalagolago ia outou tatalo i lo tatou Tama oi Le Lagi mo au, ma faapea foi ma tatalo uma a o’u uso ma tuafafine i Egelani, (lea ou te lei vaai i ai, ae ua ou alofa i ai), ina ia mafai ona ou sola ese mai fuafuaga uma a Satani, manumalo mai faigata, ma aumaia nei tagata i le fiafiaga o na faamanuiaga lea o loo faapolopolo mo e amiotonu? Ou te ole atu i nei mea mai ia te outou i le suafa o le Alii o Iesu Keriso.”⁸

I le 1833 sa tusi atu ai le Perofeta ma isi taitai o le Ekalesia i tagata o le Ekalesia i Thompson, Ohio, ma tauina atu ia i latou o Uso Salmon Gee ua tofia e pulefaamalumalu ia i latou: “O lo tatou uso pele o Uso Salmon. …ua matou faauuina e taitaia outou ma aoao mea e faatatau i le faaleatua, lea e i ai lo matou faatuatuaga tele, e pei foi ona matou manatu ua outou faatuatuaina foi. O le mea lea matou te fai atu ai ia te outou. … ioe, e le na o i tatou, ae ma le Alii foi. … talia o ia e avea ma o outou taitai ua tofiaina, i le iloa ai o le Alii sa tofia o ia i lenei valaauga mo lo outou lelei, i le lagolagoina ai o ia ia outou tatalo, i le tatalo ai mo ia ia faifai pea ina ia faaeeina ia te ia le atamai ma le malamalama, i le poto o le Alii, ina ia auala atu ia te Ia ma ia taofia ai outou mai agaga leaga, ma feteenaiga uma ma feeseeseaiga, ma ola ai i le agalelei ma le poto o lo tatou Alii ma le Faaola, o Iesu Keriso.

“… I le faaiuga, le au uso e, tatalo mo i matou, ina ia mafai ona matou faia le galuega lea ua valaauina ai i matou, ina ia outou fiafia ai i mea lilo a le Atua, e oo lava i le atoatoaga.”⁹

Sa tuuina atu e le Perofeta lenei fautuaga i se vaega o taitai perisitua e taitaiina ai i latou ia latou talanoaga: “E tatau ona taitoatasi ma saunoa i lona lava taimi o lona tulaga, ma i lona taimi ma le tau, ina ia i ai le faatulagaga atoatoa i mea uma; ma … tagata taitasi … e tatau ona mautinoa e mafai ona ia tuuina atu se manatu pupula i le mataupu ae le o le faasalalau o le pogisa, … lea e mafai ona faia e tagata o loo tuuina faalatalata i latou lava i le aoaoina o le mafaufau ma le finagalo o le Alii, o lona Agaga o loo faailoa mai ai pea ma faataitai ai le mea moni i le malamalamaga o i latou uma ua mauaina le Agaga.”¹⁰

“Pe afai o le Toasefululua po o nisi lava molimau e tulai i luma o se faapotopotoga o le lalolagi, ma latou folafola atu i le mana ma le faatinoina e le Agaga o le Atua, ma o tagata ua le mautonu ma ua maofa i mataupu faavae, ma faapea mai, “O lena tagata ua folafola mai se lauga malosi, o se lauga maoae,’ ia ta’u atu i lena tagata po o na tagata ia faaeteete ina ia aua nei o latou tuuina atu i viiga mo i latou lava; ae ia faaeteete ina ia latou lotomaualalo, ma tuuina le viiga ma le mamalu i le Atua ma le Tamai Mamoe; aua e mai le mana o le Perisitua Paia ma le Agaga Paia ua latou maua ai le mana e saunoa ai. O ai oe le tagata, ua na o se efuefu? Ae mai ia te ai ua e maua ai le mana ma faamanuiaga, ua mai le Atua?”¹¹

O taitai i le malo o le Alii e alolofa ia i latou o loo latou auauna i ai.

“I lo’u agai atu ai i le matua, o lou loto ua faatupuina le agaalofa mo outou. O au i taimi uma ua ou naunau e tuuese uma mea o loo sese, ona ou te manao i nei tagata ia i ai se taitai amiotonu. Ua ou faasaolotoina o outou mafaufau e ala i le tau atu ia te outou o mea a Keriso Iesu. … E leai se isi mea o i lo’u loto ae na o lagona lelei.”¹²

“O ositaulaga a isi ekalesia o loo faitio mai e uiga ia te au, ma faapea mai, ‘Aisea ua maua ai e lenei tagata fai tala sese le tele o e mulimuli ia te ia, ma faatumauina i latou? Ou te tali atu, Ua mafua ona o loo ia te au le mataupu faavae o le alofa. Pau lava le mea e mafai ona ou ofoina atu i le lalolagi o se loto lelei ma lima lelei.”¹³

I ni nai aso ao lei malaga atu o ia i le falepuipui i Karefasi, sa faaalia e le Perofeta lona alofa mo le Au Paia: “Ua tofotofoina outou e le Atua. O outou o ni tagata lelei; o le mea lea ou te alofa ai ia te outou ma lou loto atoa. E le sili lava le alofa o se tasi i lenei alofa, ia tuuina atu e se tasi lona ola e sui ai ana uo [tagai Ioane 15:13]. Sa outou tutu ma au i taimi o faalavelave, ma ua ou naunau e tuuina atu lo’u ola e ositaulaga ai mo lo outou faasaoina.”¹⁴

O taitai i le malo o le Alii e aoao atu e ala i a latou auaunaga ma faataitaiga.

Ao savavali ai tagata o le Tolauapiga a Siona mai Katelani, Ohio, agai i Misuri, sa latou aoao le tele o mataupu faavae o le taitaiga i lo latou fegalegaleai ai ma le Perofeta o Iosefa Samita. O Siaosi A. Samita, o se tasi o le vaega a le Tolauapiga a Siona, sa toe faamatala mai: “O le Perofeta o Iosefa sa tauaveina se vaega atoa o le tiga o le malaga atoa. I le faaopoopo ai i le vaaia ua saunia mea mo le Tolauapiga ma le pulefaamalumalu ai, sa ia savali i le tele o le taimi ma sa afaina ona aao i le mafoe o le pa’u, vae tiga ma le totoulia, o se taunuuga o le savavali mo le 25–40 maila i le aso i se tau vevela o le tausaga. Ae i le taimi o le malaga atoa sa ia le tomumu lava pe tuuina mai se faitioga, ao faitio mai ai pea alii o le Tolauapiga ia te ia ona o le tiga o o latou tamaivae, o le mafoe o pa’u o vae, umi o le savaliga, utiuti o meaai, leaga o le tulaga o falaoa, leaga o falaoa saito, manogi leaga o pata, malosi o le hani, o fasi puaa ma sisi ua i ai ilo, ma isi mea faapena. E oo lava i se taifau e ou atu i nisi o alii e tomumumu lava ia Iosefa. Afai latou te tolauapi ae leaga vai, e toetoe lava ona mafua ai se faatuiesega. Ae peitai o i matou o le Tolauapiga a Siona, ma o le toatele o i matou e le faia ni tatalo, leai se magafagafa, faatamala, le faalogo, valea, po o le tiapoloa, ae matou le i iloa lava ia mea. O Iosefa sa onosaia i matou ma aoao i matou e pei o ni tamaiti. Peitai ane, sa toatele sa i ai i le Tolauapiga e le tomumumu lava ma sa saunia i taimi uma ma naunau e faia e tusa ai ma le manao o lo matou taitai.”¹⁵

O mea o le a taua o ni faamaumauga mai le talaaga o le Perofeta ia Me 1834: “I po uma ao lei taoto e malolo, i le leo o le pu, matou te punonou i luma o le Alii i totonu o matou faleie, ma tuuina atu la matou faafetai e ala atu i le tatalo ma le olega faamaulalo; ma i le leo o le pu i le taeao, e tusa o le ta o le fa, e toe i ai uma alii i o latou tulivae i luma o le Alii, i le talosagaina o ana faamanuiaga mo le aso.”¹⁶

27 Me, 1834: “E ui lava ina sa faaauau pea e o matou fili ona pua’iina mai le taufaamata’u o le faatupu vevesi, sa matou le fefefe lava, pe matou te tau faavaivai e faaauau la matou malaga, aua o le Atua sa faatasi ma i matou, ma o ana agelu sa muamua ia i matou, ma o le faatuatua o la matou vaega toaitiiti ua le maluelue lava. Ua matou iloa o agelu o a matou paaga, aua sa matou vaai ia i latou.”¹⁷

29 Me, 1834: “Sa ou mauaina o se vaega o lau au malaga sa tuuina atu i ai ni falaoa ua leaga, ae ua tuuina mai ia te au falaoa lelei, falaoa suamalie mai le kuka lava e tasi. Sa ou otegiaina Uso Zebedee Coltrin ona o lenei faiga faailoga tagata, aua sa ou manao i ou uso ia tutusa e pei lava o au.”¹⁸

O John M. Chidester, o se tasi o le Tolauapiga a Siona, sa toe faamatala mai: “O le Tolauapiga a Siona, i le malaga atu ai i totonu o le Setete o Indiana, sa savalia ai ni taufusi e matua leaga lava; o lea tulaga sa matou nonoaina ai maea i taavale solofanua e fesoasoani ai ia oo atu i le isi itu, ma o le Perofeta o le tagata muamua lava sa i ai i ia maea e aunoa ma ni ona seevae. O se masani lea ua ia te ia i taimi uma o faigata.

“Sa faaauau pea la matou malaga seia matou taunuu i le Vai o le [Wakenda], i le malaga ai mo le luasefululima maila e aunoa ma se malologa po o se meaai. E manaomia lo matou malaga i luga o se vaa i lea vai; ma sa matou maua i le isi itu o le vai se vaega talafeagai mo le tolauapiga, lea sa avea o se tulaga o le faafiafiaina i le vaega lea ua vaivai ma fia aai. Ina ua taunuu i lea nofoaga sa faailoa mai e le Perofeta i le Tolauapiga ua ia lagona le musuia e faaauau le malaga; ma i lana taitaiga, sa ia valaaulia le au uso e mulimuli atu ia te ia.

“O lea tulaga ua avea ma mafuaaga e vaevaeina ai le tolauapiga. O Lyman Wight ma isi sa uluai mumusu e mulimuli i le Perofeta, ae sa toe o mai. O lenei tulaga ua faailoa ai i le Perofeta sa musuia e o atu i le mamao e tusa ma le fitu maila. Sa lipotia mai ia i matou mulimuli ane e tusa ma le valu maila i tua atu lea sa matou asaina ai le vai sa i ai se vaega o tagata sa fuafua e osofaia i matou i lena po.”¹⁹

I le taimi o le savaliga a le Tolauapiga a Siona, o nisi sa i ai sa tomumumu ma faitio. Sa a’oa’i ma lapataia e le Perofeta i latou sa aafia, o le a oo mai mala pe a latou le salamo. E ui o lea, o nisi sa taliaina ana fautuaga, ao nisi e leai. E lei umi ae oo mai le faamai o le palagaau ma sa maliliu ai nisi o tagata o le tolauapiga. O Orson Hyde, lea sa mulimuli auauna atu i le Korama a le Toasefululua, sa toe faamatala mai: “Pe ua faaitiitia ea le manatu popole o le Perofeta mo le saogalemu o le tolauapiga? Pe ua ia aveesea ea ona lagona mo ana uo i o latou taimi o le a’oa’i ma tofotofoga? Pe ua avea ea o ia ma o latou fili ona ua ia saunoa atu ni mea faigata e faasaga ia i latou? Leai! O lona loto ua vaivai i le alofa mutimutivale—o lona agaga ua faapupulaina i le alofa, loto fia fesoasoani ma le agalelei; ma i le vilivilitai ma le tumau faamaoni i le avea ai ma uo faatuatuaina i le taimi o mafatiaga, sa ia auauna atu ai i e mamai ma e o le a maliliu; ma fesoasoani i le tanuina o e ua oti. O ana gaoioiga uma i na taimi faigata o tofotofoga ua tuuina atu ai le faamaoniga i le tolauapiga e ui lava i o latou vaivaiga, e alofa pea o ia ia i latou.”²⁰

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau vii–xii.

Faitau le parakalafa muamua i le itulau 303. O le a le malosi o loo e vaaia i le auala o le taitaiga a le Perofeta o Iosefa Samita? O le a sou manatu i le tele o tagata ma la latou tali atu i lea ituaiga o taitaiga?
Toe iloilo le aoaoga a le Perofeta e uiga i le manaomia e taitai ona maua le atamai mai le Agaga (itulau 304–306). O le a se mea e fesoasoani ai i taitai ia maua le atamai o loo latou manaomia?
Toe iloilo le parakalafa atoa lona lua i le itulau 304. Aisea e avea ai le lotomaulalo ma le le manatu faapito o ni uiga moomia mo se taitai? O a nisi uiga e te manatu e tatau ona i ai i se taitai?
O Iosefa Samita sa saunoa manino i lona alofa ma lagona lelei mo le Au Paia (itulau 306). E faapefea ona e iloa ua alofa moni le taitai ia te oe? O anafea na faamanuiaina ai oe e ala i le alofa o se taitai?
Suesue lipoti o le Tolauapiga a Siona i le itulau 301–303 ma le 307–09. O le a se tulaga lelei o le taitaiga sa faaalia e le Perofeta?
Mafaufau e uiga i lau matafaioi faataitai i totonu o lou aiga, le Ekalesia, lau galuega, lau aoga, le nuu, po o soo se mea. Manatunatu po o le a se mea e mafai ona e faia e mulimuli ai i faataitaiga a Iosefa Samita.

Mau E Faatatau I Ai: Esoto 18:13–26; Faataoto 29:2; Mataio 20:25–28; Alema 1:26; MFF 107:99–100

council meeting — O taitai i le malo o le Alii “e tatau ona faaeeina i le poto, atamai, ma le malamalama, ina ia mafai ai ona aoao atu ma taitai le nuu o le Atua.”

men pulling wagon — “O le Perofeta o le tagata muamua lea na tago i le maea ma e leai ni ona seevae,” na toe manatua ai e se tasi o le Tolauapiga a Siona. “O ona lava na uiga i taimi uma o faigata.”