Pagbantay sa Mapait nga Bunga sa Apostasiya

“Sa tanan ninyong mga pagsulay, mga kalisdanan ug mga sakit, sa tanan ninyong mga pag-antus, bisan ngadto sa kamatayon, pag-amping nga dili kamo moluib sa Dios, … pag-amping nga dili kamo mobiya sa kamatuoran.”

Gikan sa Kinabuhi ni Joseph Smith

Sa mga semana sa wala pa ug pagkahuman sa Templo sa Kirtland niadtong tingpamulak sa 1836, ang mga Santos nakasinati og panahon sa panaghiusa ug kabuhong sa pagbubo sa mga gasa sa Espiritu. Apan si Propeta Joseph Smith nagpasidaan sa mga Santos nga kon dili sila magpadayon sa matarung nga pagpuyo, ang ilang kalipay ug panaghiusa dili molungtad. Si Daniel Tyler miingon niini nga panahon: “Ang tanan gibati nga nakatilaw na og langit. Sa pagkatinuod, duna kadtoy pipila ka semana nga wala kami gitintal sa yawa; ug nahibulong kami kon ang usa ka libo ka tuig [millennium] nagsugod na ba. Diha sa [miting sa mga kaigsoonan sa priesthood], si Propeta Joseph namulong kanamo. Taliwala sa ubang mga butang miingon siya: ‘Mga kaigsoonan, sa mubong panahon si Satanas walay gahum sa pagtintal kaninyo. Ang uban naghunahuna nga wala na gayuy pagtintal pa. Apan ang kaatbang moabut; ug gawas kon kamo mopaduol sa Ginoo kamo mabuntog gayud ug mobiya sa kamatuoran.’ ”¹

Samtang ang tuig nag-irog, usa ka espiritu sa apostasiya mitubo taliwala sa pipila ka mga Santos sa Kirtland. Ang ubang mga miyembro nahimong mapagarbuhon, hangol, ug dili masulundon sa mga sugo. Ang uban mibasol sa mga lider sa Simbahan sa ekonomikanhon nga mga problema nga misangput sa pagkapakyas sa pinansyal nga institusyon sa Kirtland nga gi-establisar sa mga miyembro sa Simbahan. Kini nga pagkapakyas nahitabo niadtong 1837, ang samang tuig nga dunay panic sa banko nga mikatap sa Estados Unidos, nakapasamot sa ekonomikanhong problema sa mga Santos. Ingon ka daghan sa duha o tulo ka gatus ka mga miyembro ang mipalayo sa Simbahan sa Kirtland, usahay moapil niadtong mibatok sa Simbahan aron sa pagpasakit ug gani sa pisikal nga panghadlok sa mga Santos. Ang ubang mibiya sa kamatuoran maisugong miingon nga ang Propeta wala na ug mobutang og laing tawo sa iyang dapit. Si Sister Eliza R. Snow mihinumdum: “Daghan kaniadto nagmapailubon ug matinud-anon sa pagpahigayon sa matag katungdanan—andam moadto ug moabut sa matag tawag sa Priesthood—nagmapagarbohon sa ilang mga espiritu, ug nagpataas sa garbo sa ilang mga kasingkasing. Samtang ang mga Santos midawat sa gugma ug espiritu sa kalibutan, ang Espiritu sa Ginoo mipalayo sa ilang mga kasingkasing.”²

Sa kahimtang sa Simbahan niadtong Mayo 1837, ang Propeta nasubo: “Kini daw ang tanang gahum sa yuta ug sa impyerno nagkahiusa sa linain nga paagi sa pagpalagpot sa Simbahan diha diha dayon…. Ang kaaway sa layo, ug ang mga mibiya sa kamatuoran taliwala kanato, nagkahiusa sa ilang mga pamaagi, … ug daghan ang dili na mahigalaon ngari kanako mora ba og ako ra gayud ang hinungdan sa mga dautan kaayo nga ako man gani ang naninguha pag-ayo sa pagbatok niini.”³

Bisan pa niini nga mga paghagit, ang kinabag-an sa mga lider ug mga miyembro sa Simbahan nagpabiling matinud-anon. Si Brigham Young, usa ka miyembro sa Korum sa Napulog Duha ka mga Apostoles sulod niadtong walay pihong panahon, nahinumdum sa usa ka miting diin ang ubang mga miyembro sa Simbahan naghisgut unsaon sa pagpapahawa ni Propeta Joseph: “Mibarug ako, ug sa yano ug sa kusganong paagi misulti kanila nga si Joseph usa ka Propeta ug ako nasayud niini, ug nga sila tingali motamay ug mobutang-butang ingon sa ilang ikalipay, [apan] dili gayud sila makaguba sa pagtudlo sa Propeta sa Dios; makaguba lamang sila sa ilang kaugalingong awtoridad, moputol sa nagsumpay kanila ngadto sa Propeta ug sa Dios, ug magpaka-unlod sa ilang kaugalingon sa impyerno. Daghan ang naglagot sa akong determinadong oposisyon sa ilang mga gibuhat….

“Kini nga miting nabungkag nga walay mga mibiya sa kamatuoran nga nakahimo sa paghiusa sa bisan unsang pihong buhat sa oposisyon. Usa kadto ka krisis nga ang yuta ug ang impyerno daw nagkahiusa sa pagpalagpot sa Propeta ug sa Simbahan. Ang hugot nga pagtuo sa daghang pinakalig-on nga mga tawo sa simbahan nagduha-duha na. Atol niini nga pag-ataki sa kangitngit lig-on akong misuporta ni Joseph, ug uban sa tanang kaalam ug gahum nga gibubo ibabaw kanako, akong gihatag ang tanang gahum aron pagpaluyo sa sulugoon sa Dios ug sa paghiusa sa mga korum sa Simbahan.”⁴

Mga Pagtulun-an ni Joseph Smith

Ang pagkawala sa kompiyansa sa mga lider sa Simbahan, pagsaway kanila, ug pagpasagad sa bisan unsang katungdanan nga gikinahanglan sa Dios mahimong modala ngadto sa apostasiya.

“Mohatag ako kaninyo sa usa sa mga Yawe sa mga misteryo sa Gingharian. Kini usa ka mahangturong baruganan, nga anaa na sa Dios gikan sa tanang kahangturan: Kana nga tawo kinsa mibarug aron paghukom sa uban, nangitag sayop diha sa Simbahan, moingon nga sila anaa sa dili maayong dalan, samtang siya sa iyang kaugalingon maoy matarung, nan hibaloi pag-ayo, nga kanang tawhana nagpaingon sa dalan sa apostasiya; ug kon siya dili maghinulsol, mobiya sa kamatuoran, ingon nga ang Dios buhi.”⁵

Heber C. Kimball, samtang nag-alagad isip magtatambag ni Presidente Brigham Young, mi-report: “Ako mohatag kaninyo og usa ka yawe nga maoy gihatag usab ni Brother Joseph Smith didto sa Nauvoo. Miingon siya nga ang mismong lakang sa apostasiya nagsugod uban sa pagkawala sa kompiyansa sa mga lider niini nga simbahan ug gingharian, ug kon kamo makamatikod niana nga espiritu hibaloi nga kana modala sa mismong tawo sa dalan ngadto sa apostasiya.⁶

Wilford Woodruff, samtang nag-alagad sa Korum sa Napulog Duha ka mga Apostoles, miingon: Si Brother Joseph sagad motambag kanamo sama niining paagiha. Sa oras nga inyong tugotan ang inyong kaugalingon sa pagbaliwala sa bisan unsang katungdanan nga ang Dios mitawag kaninyo sa pagbuhat, aron pagtagbaw sa inyong kaugalingong tinguha; ‘sa oras nga kamo magpasagad, inyong gipahiluna ang pondasyon sa apostasiya. Pag-amping; sabta nga kamo gitawag sa usa ka buhat, ug kon ang Dios nagkinahanglan kaninyo nga mobuhat niana nan buhata kini.’ Lain pang butang siya miingon: ‘Sa tanan ninyong mga pag-sulay, mga kalisdanan ug mga sakit, sa tanan ninyong mga pag-antus, bisan ngadto sa kamatayon, pag-amping nga dili kamo moluib sa Dios, pag-amping nga dili kamo mobiya sa kamatuoran.’ ”⁷

Si Wilford Woodruff usab miingon: “Akong mahinumduman nga si Brother Joseph Smith mibisita kanako, ni Brother [John] Taylor, ni Brother Brigham Young ug pipila sa ubang mga misyonaryo, sa dihang hapit na kami molarga sa misyon ngadto sa England. Kami nagkasakit ug nagguol, daghan gayud kanamo. Sa samang higayon gibati gayud namo nga moadto. Ang Propeta mipanalangin kanamo, ingon man usab sa among mga asawa ug mga pamilya…. Mitudlo siya kanamo sa pipila ka importante kaayong mga baruganan, pipila kanila akong hinganlan. Si Brother Taylor, ako, George A. Smith, John E. Page ug ang uban nga gitawag nga puli niadtong [mga apostoles] kinsa nahisalaag. Si Brother Joseph mipahibalo diha sa among atubangan sa hinungdan niadtong mga tawo nga misalikway sa mga sugo sa Dios. Naglaum siya nga kami makakat-on og kaalam kon unsa ang atong makita sa atong mga mata ug mopatalinghug uban sa dalunggan, ug nga kita makahimo sa pag-ila sa mga espiritu sa ubang mga tawo nga dili mapugos sa pagkat-on pinaagi sa subo nga kasinatian.

“Dayon siya misulti nga bisan kinsa nga tawo, bisan kinsa nga elder niini nga Simbahan ug gingharian, kinsa mosubay sa dalan diin siya mobaliwala o, sa laing pulong, modumili sa pagsunod sa bisan unsang balaod o sugo o katungdanan –kon ugaling usa ka tawo mobuhat niini, nagpasagad sa bisan unsang katungdanan sa gipangayo sa Dios diha sa iyang kamot sa pagtambong og mga miting, pag-alagad sa mga misyon, o pagsunod sa tambag, siya naghimo og pundasyon nga modala kaniya sa apostasiya ug kini mao ang rason niadtong mga tawhana nga nahisalaag. Wala nila gamita sa maayo ang priesthood nga gi-seal ibabaw sa ilang mga ulo. Mibaliwala sila sa pagpahimo sa ilang mga tawag isip mga apostoles, isip mga elder. Gigamit nila kana nga priesthood aron pagsulay sa pagpalambo sa ilang mga kaugalingon ug sa paghimo og laing buhat gawas sa pagtukod sa gingharian sa Dios.”⁸

Niadtong 1840, usa ka gamay, gi-organisar nga grupo sa mga miyembro sa Simbahan nagpadayon sa pagpuyo didto sa Kirtland, Ohio, bisan tuod kadaghanan sa mga Santos nagpundok didto sa Nauvoo, Illinois. Agi og tubag sa balita nga usa ka miyembro sa Simbahan didto sa Kirtland misulay sa pagguba sa kompiyansa sa mga Santos sa Unang Kapangulohan ug ubang mga awtoridad sa Simbahan, ang Propeta misulat sa usa ka lider sa Simbahan didto sa Kirtland: “Aron pagdumala sa mga tulumanon sa Gingharian diha sa pagkamatarung, kini mahinungdanon gayud kaayo nga ang pinaka-hingpit nga panaghiusa, maayong mga pagbati, maayong pagsinabtanay, ug kompiyansa maana gayud sa mga kasingkasing sa tanang mga kaigsoonan; ug nga ang tinuod nga putling gugma, paghigugma sa usag usa, kinahanglan mao ang kinaiya sa tanang mga kahimoan. Kon adunay bisan unsang dili putling gugma nga mga pagbati, bisan unsa nga pagkawalay kompiyansa, nan ang garbo, pagka-arogante ug kasina makita gayud dayon; dili malikayan ang pagkalibog maoy magpasulabi, ug ang mga awtoridad sa Simbahan walay nada….

“Kon ang mga Santos nagtuo nga dili ako takus sa ilang mga pag-ampo kon sila magpundok, ug moagwanta kanako didto sa trono sa langitnong grasya, lig-on kini kaayo ug makapadani nga pruweba ngari kanako nga sila wala sa Espritu sa Dios. Kon ang mga pagpadayag nga atong nadawat tinuod, kinsa man ang modumala sa mga tawo? Kon ang mga yawe sa Gingharian gihatag sa akong mga kamot, kinsa man ang moabli sa mga misteryo niana?

“Hangtud nga ang akong mga kaigsoonan mosuporta kanako ug modasig kanako, ako makaagwanta sa mga pagdapig sa kalibutan, ug makasugakod sa mabangis nga pagtagad ug pag-abuso uban sa kalipay, apan kon ang akong mga kaigsoonan magsugod sa pagkabugnaw, ug maninguha sa pagpahinay sa akong pag-uswag ug mga paningkamot, nan bation nako ang kaguol, apan dili makuhaan ang akong kadeterminado nga mopadayon sa akong tahas, kay masaligon nga bisan tuod ang akong yutan-ong mga higala mahimong mapakyas, ug gani motalikod batok kanako, hinuon ang akong langitnong Amahan mosapnay kanako nga madaugon.

“Bisan pa niana, naglaum ako nga bisan didto sa Kirtland adunay pipila nga dili mopahamtang sa usa ka tawo nga sad-an tungod sa pulong [tan-awa sa Isaias 29:21], apan sila andam nga mobarug pagdepensa sa pagkamatarung ug kamatuoran, ug moatiman sa tanang katungdanan nga gisugo ngadto kanila; ug kinsa adunay kaalam sa pagdumala kanila batok sa bisan unsang kahimoan o impluwensya diin gibanabanang modala og kalibog ug panagbingkil sa kampo ni Israel, ug sa pag-ila sa espiritu tali sa kamatuoran ug sa espiritu sa sayop.

“Kini makapahimuot sa akong hunahuna nga makita ang mga Santos sa Kirtland nga moasenso, apan nagtuo ako nga ang panahon wala pa moabut; ug mopasalig ako kaninyo nga dili gayud kini moabut hangtud nga adunay lahi nga han-ay sa mga butang nga ma-establisar ug lahi nga espiritu ang maipakita. Kon ang pagsalig mapahiuli, kon ang garbo mapukan, ug ang tanang matinguhaon nga hunahuna masul-oban sa pagkamapainubsanon ingon sa bisti, ug ang kahakog pulihan sa maayong mga pagbati ug gugmang putli, ug nagkahiusa nga determinasyon sa pagpuyo sa matag pulong nga mogawas gikan sa ba-ba sa Ginoo makita, nan, ug dili hangtud moabut kana, nga ang kalinaw, kahapsay ug ang gugma mopatigbabaw.

“Kini maoy sangputanan sa nangandoy nga mga tawo nga ang Kirtland gisalikway. Kanunay gayud nga kining inyong ubos nga sulugoon gikasinahan sa iyang katungdanan tungod sa ingon nga mga kinaiya, kinsa naninguha sa pagpabayaw sa ilang mga kaugalingon sa gahum pinaagi kaniya, ug kay nakita nga kini imposible nga buhaton midangup sa pagpakaulaw ug pag-abuso, ug ubang mga pamaagi aron mosangput sa pagpalagpot kaniya. Ang ingon nga mga kinaiya mao gayud ang unang misinggit batok sa Kapangulohan, ug mimantala sa ilang mga sayop ug mga kahuyang sa upat ka suok sa langit.”⁹

Kadtong kinsa mibiya sa kamatuoran mawad-an sa Espiritu sa Dios, maguba ang ilang mga pakigsaad, ug sagad manggukod sa mga miyembro sa Simbahan.

“Tingali mahimo kining salikwaot sa unang paghunahuna, apan dili kini salikwaot kay kini tinuod, nga bisan pa sa tanang gisulti nga determinasyon sa pagpuyo nga makidiosnon, ang mga mibiya human motalikud gikan sa hugot nga pagtuo ni Kristo, gawas kon sila maghinulsol dihadiha dayon, sa madugay o sa madali mahulog sa laang sa yawa, ug timawa nga biniyaan sa Espiritu sa Dios, nga magpakita sa ilang mga kadautan diha sa mga mata sa kadaghanan. Gikan sa mga mibiya ang mga matinud-anon nakadawat sa pinakasakit nga pagpanggukod. Si Judas gibadlong ug dihadiha dayon nagluib sa iyang Ginoo ngadto sa mga kamot sa Iyang mga kaaway, tungod kay si Satanas misulod kaniya.

“Adunay pinakataas nga salabutan nga gihatag niadtong mihupot sa Ebanghelyo uban sa hingpit nga katuyoan sa kasingkasing, diin, kon magpakasala batok niini, ang mibiya sa kamatuoran biniyaan nga hubo ug timawa sa Espiritu sa Dios, ug kini siya, sa tinuod, hapit na itunglo, ug ang iyang katapusan pagasunogon. Kon kaniadto ang kahayag nga anaa kanila kuhaon gikan kanila ingon nga kaniadto sila nahayagan, ug unya, dili ikatingala, kon ang tanan nilang gahum gitampo batok sa kamatuoran, ug sila, sama ni Judas, mosiksik sa kalaglagan niadtong kinsa mao ang ilang mga pinakadakong tigtabang.

“Unsa ka suod nga higala nga aduna si Judas dinhi sa yuta, o sa langit, kaysa sa Manluluwas? Ug ang iyang unang katuyoan mao ang paglaglag Kaniya. Kinsa, taliwala sa mga Santos niining ulahing mga adlaw, makaisip sa iyang kaugalingon nga ingon ka buotan sama sa atong Ginoo? Kinsa ang ingon ka hingpit? Kinsa ang ingon ka putli? Kinsa ang ingon ka balaan sama Kaniya? Sila mahimo bang makit-an? Siya wala gayud makasala o makalapas og sugo o balaod sa langit—walay bisan unsa nga panglimbong diha sa Iyang ba-ba, ni dautan nga makit-an sa Iyang kasingkasing. Ug gani ang usa ka tawo nga nagkaon uban Niya, kinsa sagad moinum sa samang kopa, mao ang unang mibatok Kaniya. Hain ang usa ka tawo nga sama ni Kristo? Dili Siya makit-an dinhi sa yuta. Unya nganong ang Iyang mga sumusunod moreklamo, kon gikan niadtong kinsa ilang gitawag kaniadto og mga kaigsoonan, ug giisip nga adunay pinakaduol nga relasyon diha sa walay katapusang pakigsaad, mahiagum sila og pagpanggukod?

“Gikan sa unsang tinubdan naggikan ang baruganan nga sukad gipakita sa mga grupo nga mibiya sa kamatuoran gikan sa tinuod nga Simbahan aron paggukod uban sa dobleng kakugi, ug pagsiksik uban sa dobleng paglahutay, aron paglaglag niadtong kinsa kaniadto ilang giangkon nga gihigugma, uban kang kinsa sila kaniadto nakig-istorya, ug uban kang kinsa sila kaniadto nakigsaad nga maningkamot uban sa tanang gahum sa pagkamatarung aron pag-angkon og kapahulayan sa Dios? Tingali ang atong kaigsoonan mosulti og sama nga nakapasangput ni Satanas sa pagsiksik sa pagpalagpot sa gingharian sa Dios, tungod kay siya mismo dautan, ug ang gingharian balaan.”¹⁰

“Aduna gayud kanunay, sa tanang kapanahonan sa simbahan, kadtong kinsa mosupak sa mga baruganan sa kamaayo, kinsa ganahan mopahimulus niining kalibutan karon, nagsunod sa mga baruganan sa pagka dili matarung, ug mga kaaway sa kamatuoran…. Kadtong kinsa nakig-uban kanato ug nakahimo sa pinakanindot nga pakighigalaay, kanunay gayud nga mao ang atong pinaka dakong kaaway ug ang atong pinaka determinadong mga kaaway; kon sila nahimong dili inila, kon ang ilang interes o dignidad natandog, o kon sila nadiskobrehan sa ilang dinautan, sila gayud kanunay ang mosugod sa pagpanggukod, sa pagpakaulaw [paghimo og bakak nga mga pasangil] ug pagdaut sa ilang mga kaigsoonan, ug magtinguha sa kaparutan ug kalaglagan sa ilang mga higala.”¹¹

“Ang mibiya sa kamatuoran nga masupilong mga ‘Mormon’ anaa sa tibuok kalibutan ug nagpakatap sa lainlaing bakak ug mabutangbutangon nga mga taho batok kanato, naghunahuna pinaagi niana sa pag-angkon og kahigalaan sa kalibutan, tungod kay sila nahibalo nga kita dili mouban sa kalibutan, ug nga ang kalibutan naglagot kanato; busa sila [ang kalibutan] gihimo nga himan niining mga tawhana [nga masupilon]; ug pinaagi kanila sila maninguha sa tanang pagpasakit taman sa ilang mahimo, ug human niana mas maglagot sila kanila kay sa sila ngari kanato, tungod kay nakita nila sila nga maluibon ug paitoy-itoy [mga tig-bulatik].”¹²

Wilford Woodruff mi-report: “Mitambong ako og [usa ka] miting didto sa Templo sa [Kirtland] [niadtong Pebrero 19, 1837]. Si Presidente Joseph Smith wala didto kay adunay giatiman alang sa Simbahan, apan wala makatunga sa gidugayon ni Moises didto sa bungtod nga layo gikan sa Israel [tan-awa sa Exodus 32:1–8]; apan daghan sa mga tawo didto sa Kirtland, kon wala sila mohimo og nati nga simbahon sama sa gibuhat sa mga Israelites, mitalikod sa ilang mga kasingkasing gikan sa Ginoo ug gikan sa iyang sulugoon nga si Joseph, ug naghunahuna og espekulasyon ug mihatag og dalan sa mini nga mga espiritu, hangtud nga sila nangitngitan sa ilang mga hunahuna; ug daghan ang mibatok ni Joseph Smith, ug ang uban nangandoy nga motudlo ni David Whitmer nga modumala sa Simbahan puli kaniya. Taliwala niining panganod sa ngitngit nga mga espiritu, si Joseph mibalik didto sa Kirtland, ug nianang buntaga mibarug sa pulpito. Makita siya nga naguol pag-ayo; apan wala madugay ang Espiritu sa Dios mikunsad diha kaniya, ug siya namulong sa kongregasyon sa tumang kayano sulod sa tulo ka oras, ug ang iyang mga kaaway nangahilum.

“Sa iyang pagbarug siya miingon, ‘Ako pa gihapon ang Presidente, Propeta, Manalagna, Tigpadayag ug Lider sa Simbahan ni Jesukristo. Ang Dios, ug dili ang tawo, ang mitudlo ug mibutang kanako niini nga katungdanan, ug walay tawo o hugpong sa mga tawo nga adunay gahum sa pagpapha kanako o motudlo og lain nga puli kanako, ug kadto kinsa mopahigayon niini, kon dili sila maghinulsol dayon, mosunog sa ilang mga tudlo ug moadto sa impyerno.’ Maisugon siya nga mibadlong sa mga tawo tungod sa ilang mga sala, sa kangitngit ug sa ka walay pagtuo; ang gahum sa Dios mikunsad diha kaniya, ug mihatag og pagpamatuod nga ang iyang gipanulti tinuod.”¹³

Wilford Woodruff mireport: “Si Presidente Smith namulong pagkahapon [niadtong Abril 9, 1837], ug miingon diha sa ngalan sa Ginoo nga ang paghukom sa Dios mokunsad niadtong mga tawo kinsa miangkon nga iyang mga higala, ug mga higala sa katawhan, ug sa pagtukod sa Kirtland, usa ka stake sa Zion, apan mitalikod og nagluib kaniya, ug sa mga interes sa gingharian sa Dios, ug mihatag og gahum ngadto sa mga kamot sa atong mga kaaway batok kanato; ilang gidaug-daug ang pobreng mga Santos, ug nagdala og kasakitan diha kanila, ug nahimong malapason sa pakigsaad, diin niana bation nila ang kasuko sa Dios.”¹⁴

Si Daniel Tyler mihinumdum: “Wala madugay human sa pag-abut sa Propeta didto sa Commerce (human sa Nauvoo) gikan sa prisohan sa Missouri, si Brother Isaac Behunin ug ako mibisita kaniya sa iyang pinuy-anan. Ang iyang pagkaginukod mao ang gihisgutan. Iyang gisubli ang daghang mga bakak, dili husto ug nagkasumpaki nga mga pamahayag nga gihimo sa mga miapostasiya, nakapahadlok sa mga miyembro sa Simbahan ug sa dili mga miyembro. Misulti usab siya nga kadaghanan sa mga opisyal kinsa malipay nga mohunos sa iyang kinabuhi, sa dihang siya gidakop, nakapabali sa pabor dapig kaniya sa iyang pagkaila. Gibutang niya ang tanang pagbasol sa dili tinuod nga mga kaigsoonan….

“Sa dihang ang Propeta nahuman na sa iyang pagsugilon kon giunsa siya pagtratar, si Brother Behunin misulti: ‘Kon mobiya ako niini nga Simbahan dili ako mohimo sama sa gihimo niadtong mga tawhana: Moadto ako sa laing layong lugar diin ang Mormonism wala gayud igdungog, mopahimutang didto, ug wala gayuy usa nga makahibalo nga ako nasayud sa bisan unsa mahitungod niini.’

“Ang buotang Manalagna mitubag: ‘Brother Behunin, dili gayud ikaw mahibalo unsa unya ang imong buhaton. Sa walay pagduhaduha kining mga tawhana kaniadto naghunahuna sama sa imoha. Sa wala ka pa mopasakop niini nga Simbahan nagbarug ikaw sa neyutral nga kahimtang. Sa dihang ang ebanghelyo gisangyaw, ang maayo ug ang dautan gipakita sa imong atubangan. Mahimong mopili ka o dili. Aduna kadtoy duha ka managlahing mga agalon nga nagdapit kanimo sa pag-alagad kanila. Sa dihang ikaw mipasakop niini nga Simbahan misaad ikaw nga moalagad sa Dios. Samtang imo kadtong gibuhat imong gibiyaan ang neutral nga kahimtang, ug wala na gayud ikaw mobalik pa niadto. Kon ikaw mobiya sa Agalon nga ikaw misaad nga moalagad, kini tungod sa paghulhog gikan sa dautan, ug ikaw mosunod sa iyang pagdikta ug mahimong iyang sulugoon.’ ”¹⁵

Kon kita mosunod sa mga propeta ug sa mga apostoles ug sa mga pagpadayag sa Simbahan, dili gayud kita mahisalaag.

Orson Hyde, usa ka miyembro sa Korum sa Napulog Duha, mi-report: “Si Joseph ang Propeta … miingon, ‘Mga kaigsoonan, hinumdumi nga ang kinabag-an niini nga mga tawo dili gayud mahisalaag; ug kon kamo magpabilin uban sa kinabag-an kamo siguro gayud nga makasulod sa celestial nga gingharian.’ ”¹⁶

William G. Nelson mireport: “Nakadungog ako sa Propeta nga namulong diha sa publiko sa daghang mga okasyon. Sa usa ka miting nakadungog ako nga miingon siya: Mohatag ako kaninyo og usa ka yawe nga dili gayud motaya,—kon kamo mopabilin uban sa kinabag-an sa Napulog Duha ka mga Apostoles, ug sa mga talaan sa Simbahan, dili gayud kamo mahisalaag.’ Ang kasaysayan sa Simbahan mipamatuod niini nga kini tinuod.”¹⁷

Ezra T. Clark mihinumdum: “Nakadungog ako ni Propeta Joseph nga miingon nga siya mohatag sa mga Santos og usa ka yawe diin dili gayud sila mahisalaag o malingla, ug nga mao kana: Ang Ginoo dili gayud makaantos nga ang kinabag-an niini nga mga tawo mahisalaag o malingla sa mga impostor, ni nga Siya motugot sa mga talaan niini nga Simbahan nga mapunta sa mga kamot sa kaaway.”¹⁸

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Ribyuha ang asoy sa mga pahina 381–384. Sa inyong huna-huna ngano man nga ang mga tawo makahimo sa pag-usab gikan sa pagkamatarung ngadto sa apostasiya sa ingon ka mubong panahon? Unsa ang pipila ka mga impluwensya nga mosangput sa mga tawo sa pagbiya sa kamatuoran karon? Unsa ang atong mabuhat aron pagpanalipod batok sa ingon nga mga impluwensiya?
Unsa ang pipila ka mga kakuyaw kon mawala ang kompiyansa nato sa atong mga lider sa Simbahan ug mosaway kanila? (Alang sa pipila ka mga ehemplo, tan-awa sa mga pahina 384–387.)

Unsa ang atong mabuhat aron sa pagpabilin sa usa ka pagbati sa pagrespeto ug pasalamat sa atong mga lider? Unsaon sa mga ginikanan sa pag-awhag sa ilang mga anak sa pagrespeto sa mga lider sa Simbahan?
Ang Propeta mitudlo, “Sa higayon nga kamo motugot sa inyong mga kaugalingon sa pagbaliwala sa bisan unsang katungdanan nga ang Dios mitawag kaninyo sa pagpahigayon, sa pagtagbaw sa inyong kaugalingon nga mga tinguha …, kamo nagbutang og pundasyon alang sa apostasiya” (pahina 384). Unsa ang kahulugan niini nga pamahayag alang kaninyo?
Basaha ang istorya nga gisugilon ni Daniel Tyler (pahina 391). Ngano sa inyong hunahuna nga kadtong kinsa mibiya sa kamatuoran gikan sa Simbahan kasagaran kusog kaayong makiglalis batok niini? (Alang sa pipila ka mga ehemplo, tan-awa sa mga pahina 387–392.) Sa inyong hunahuna unsaon nato pagtubag ang mga pulong ug mga aksyon sa ingon nga mga tawo?
Basaha ang katapusang tulo ka mga paragrap sa hugna (mga pahina 392–393). Ngano nga kini mahinungdanon alang kanato sa pagsabut ug paggamit niining “yawe” nga gihatag ni Joseph Smith?

May Kalabutan nga mga Kasulatan:1 Nephi 8:10–33; Helaman 3:33–35; D&P 82:3, 21; 121:11–22

sacrament meeting — Si Joseph Smith mitudlo sa importansya sa pagpaluyo sa atong mga lider sa Simbahan: “Kana nga tawo kinsa mibarug aron paghukom sa uban, nangitag sayop diha sa Simbahan, moingon nga sila anaa sa dili maayong dalan, samtang siya sa iyang kaugalingon maoy matarung,…. kanang tawhana nagpaingon sa dalan sa apostasiya; “

Judas betraying Jesus — “Unsa ka suod nga higala nga aduna si Judas dinhi sa yuta, o sa langit, kaysa sa Manluluwas? Ug ang iyang unang katuyoan mao ang paglaglag Kaniya.”