Nofouta i Fua Oona o le Liliuese

“I o outou tofotofoga, puapuaga ma ma’i uma, i o outou mafatiaga uma, e oo lava i le oti, ia outou faaeteete aua nei outou faalataina le Atua, … ia outou faaeteete aua nei outou liliuese.”

Mai le Soifuaga o Iosefa Samita

I vaiaso i luma atu ma tua mai o le faamaeaina o le Malumalu i Katelani i le tautotogo o le 1836, na oo ai se aafiaga i le Au Paia o se taimi o le lotogatasi ma se oa o le matua sasaaina mai o meaalofa o le Agaga. Peitai na lapataia e le Perofeta o Iosefa Samita ia le Au Paia, afai latou te le tumau i le ola amiotonu, o le a le umi lo latou olioli ma le nonofo faatasi. Na ta’ua e Daniel Tyler e uiga i lena taimi: “Na lagonaina uma e tagata na latou maua se uluai tofo o le lagi. O le mea moni lava, na i ai ni nai vaiaso na le i tofotofoina ai i matou e le tiapolo; ma na matou manatu ai pe ua amataina le meleniuma.” I se [fonotaga a uso o le perisitua], na saunoa mai ai le Perofeta o Iosefa ia i matou. Faatasi ai ma nisi o mea, na ia saunoa ai: ‘Uso e, mo sina taimi ua le i ai ia Satani se mana e faaosoosoina ai outou. Ua manatu nisi o le a le toe i ai se faaosoosoga. Ae o le a oo mai le faafeagai; ma sei vagana ai ua outou faalatalata atu i le Alii o le a faatoilaloina outou ma o le a outou liliuese ai.”¹

A o faasolo pea lena tausaga, na tupu ai se agaga o le liliuese i totonu o nisi o le Au Paia i Katelani. Na faasolo ina faafefeteina, manao lasi, ma ua le usiusitai nisi o tagata o le Ekalesia i poloaiga. Na tuuaia e nisi taitai o le Ekalesia mo faafitauli tautupe na mafua mai i le faaleaogaina o se faletupe i Katelani na faatuina e tagata o le Ekalesia. Na tupu lea tulaga i le 1837, le tausaga lava e tasi lea na sosolo ai se faaletonu i tulaga tau tupe i le Iunaite Setete atoa, ma faaopoopo ai i faafitauli tau tupe a le Au Paia. E toatele e tusa ma le lua i le tolu selau tagata o le Ekalesia na pauu ese ma le Ekalesia i Katelani, o nisi taimi na latou au faatasi ma i latou o e na tetee i le Ekalesia e faatiga ma oo lava i le faamata’u o le Au Paia. O nisi o e na liliuese na latou folafola mai faalauaitele o le Perofeta ua pau ma sa latou taumafai e tuu isi tagata i lona tulaga. Na manatuaina e Uso Eliza R. Snow: “O le toatele o e na lotomaualalo ma faamaoni i le faatinoina o tiute uma lava—saunia e o atu ma o mai i taimi uma e valaau mai ai le Perisitua—na amata ona femitai i o latou agaga, ma sii a’e i le faamaualuga i o latou loto. A o feinu ai le Au Paia i le fiafia ma le agaga o le lalolagi, na toesea le Agaga o le Alii mai o latou loto.”²

I le tulaga o le Ekalesia ia Me 1837, na saunoa ai ma le faanoanoa le Perofeta: “Na foliga mai na tuu faatasia uma mana o le lalolagi ma seoli i a latou uunaiga i se auala faapitoa ina ia faatamaia atoa le Ekalesia i le taimi lava lena. … O fili i nuu mamao, ma le au liliuese i totonu o la matou faapotopotoga, na tuufaatasia uma ia latou fuafuaga, … ma e toatele na le fiafia ia te a’u e peiseai o a’u lava o le mafuaaga o na mea leaga uma ia na matua ou finafinau malosi e tetee atu i ai.”³

E ui i nei lu’i uma, o le toatele lava o taitai ma tagata o le Ekalesia na tumau i le faamaoni. O Polika Iaga, o se sui o le Korama a Aposetolo e Toasefululua i le taimi tonu o lenei vaitaimi le mautonu, na ia manatuaina se fonotaga lea na talanoaina ai e nisi o tagata o le Ekalesia pe faapefea ona faate’a ese le Perofeta o Iosefa: “Na ou tulai, ma i se auala manino ma le malosi na ou ta’u atu ai ia te i latou o Iosefa o se Perofeta ma na ou iloaina, ma e fiu lava i latou e matua faifai ma faaleaga ia te ia, [ae] e le mafai ona latou faaleaogaina ai le tofiga o le Perofeta a le Atua; na o le latou faaleaogaina ai o la latou lava pule, ma momotu eseina ai le sootaga na fusifusia ai i latou i le Perofeta ma le Atua, ma faamagoto atu ai i latou lava i seoli. E toatele na matua faateteleina lo latou ita tele i la’u filifiliga maumaututu ou te tetee atu ia latou fuafuaga. …

“Na faataapeina lenei faatasiga a o le i mafai e le au liliuese ona lotogatasi i sa latou fuafuaga tetee maumaututu. O se tulaga faigata lenei o le ‘au‘au faatasi o le lalolagi ma seoli ina ia faatoilaloina le Perofeta ma le Ekalesia a le Atua. Ua vaivai le faatuatua o le toatele o tagata sili ona malolosi i le Ekalesia. I lenei taimi o le malosi o le pogisa na ou tu latalata ai ia Iosefa, faatasi ai ma le poto ma le mana uma na faaee mai e le Atua i o’u luga, na ou tuuina atu lo’u malosi sili uma e lagolago ai le auauna a le Atua ma faatasia korama o le Ekalesia.”⁴

Aoaoga a Iosefa Samita

O le leai o se faatuatuaga i taitai o le Ekalesia, faitioina o i latou, ma le faatalale i soo se tiute o loo finagalo ai le Atua e mafai ona oo atu ai i le liliuese.

“Ou te tuuina atu ia te oe Ki o mea lilo o le Malo. O se mataupu faavae faavavau lea, na i ai ma le Atua mai le faavavau atoa: O lena tagata o le a tulai atu e ta’usalaina isi, sailiili leaga i le Ekalesia, ma faapea mai ua sese ese, ae o ia lava ia ua amiotonu, ona iloa ai lea ma le mautinoa, o lena lava tagata ua ui i le auala o le liliuese; ma afai e le salamo o ia, o le a liliuese, a o loo soifua le Atua.”⁵

Na lipotia mai e Heber C. Kimball, a o auauna o ia o se fesoasoani ia Peresitene Polika Iaga: “Ou te tuuina atu ia te oe se ki lea na masani ona tuuina mai e Iosefa Samita i Navu. Na ia faapea mai o le laasaga tonu lava o le liliuese e amata lava i le leai o se faatuatuaga i taitai o lenei ekalesia ma le malo, ma soo se taimi lava e te iloa ai lena agaga e mafai ona e mautinoa ai o le a taitaia le ua i ai lena agaga i le auala o le liliuese.”⁶

Na saunoa mai Uilifoti Uitilafi, a o auauna ai i le Korama a Aposetolo e Toasefululua: “Na masani ona fautuaina i matou e Uso Iosefa faapenei: ‘O le taimi lava e te faatagaina ai oe lava e faataatia ese soo se tiute ua valaauina ai oe e faatinoina, ina ia faamalieina ai o oe lava manaoga; o le taimi lava e te faatagaina ai oe lava e te le faaeteete, ua e faataatiaina le faavae mo le liliuese. Ia faaeteete; malamalama lelei ua valaauina oe i se galuega, ma a oo ina finagalo le Atua e te faia lena galuega, ia faia loa.’ O se isi mea na ia fai mai ai: ‘I o outou tofotofoga, puapuaga ma ma’i uma, i o outou mafatiaga uma, e oo lava i le oti, ia outou faaeteete aua nei outou faalataina le Atua, ia outou faaeteete aua nei outou le faamaoni i le perisitua, ia outou faaeteete aua nei outou liliuese.’”⁷

Na saunoa mai foi Uilifoti Uitilafi: “Ou te manatuaina le asiasi mai ia te au o Uso Iosefa Samita, Uso [Ioane] Teila, Uso Polika Iaga ma isi foi faifeautalai, ina o le a matou sauni e ave la matou misiona i Egelani. Na mamai ma mafatia i matou, le toatele o i matou. Ae i le taimi lava e tasi, na matou mananao matou te o. Na faamanuiaina i matou e le Perofeta, faapea foi o matou taitoalua ma aiga. … Na ia aoao mai ia i matou ni mataupu faavae taua, ma o nisi nei o i latou. Na valaauina Uso Teila, o a’u, Siaosi A. Samita, John E. Page ma isi e faatumuina tulaga o i latou [o aposetolo] o e na pauu ese. Na faamalamalama mai e Uso Iosefa le mafuaaga o le liliuese o na alii mai poloaiga a le Atua. Na faamoemoe o ia ua matou aoaoina le poto mai mea na vaai ai o matou mata ma faalogo i ai o matou taliga, ma o le a mafai ona matou iloa le agaga o isi tagata e aunoa ma le faamalosia o i matou e aoao mai aafiaga tiga.

“Ona ia faapea mai ai lea o soo se tagata, soo se toeaina o lenei Ekalesia ma le malo, o lē savali i le ala lea na te le amanaiaina ai pe, i se isi faaupuga, e musuā ai e usitaia soo se tulafono po o se poloaiga po o se tiute—soo se taimi lava na faia ai e se tagata lenei tulaga, o le faatalale i soo se tiute na finagalo ai le Atua na te faataunuuina e ala i le auai i fonotaga, faataunuuina o misiona, po o le usitaia o fautuaga, na ia faataatiaina le faavae e taitaia ai o ia i le liliuese ma o le mafuaaga lea na ala ai ona pauu ese na alii. Na latou faaaoga seseina le perisitua na faamauina i luga o o latou ulu. Ua latou faatalale i le faalauteleina o o latou valaauga o aposetolo, ma toeaina. Na latou faaaogaina lena perisitua e taumafai ai e faaeaina i latou lava ma faatinoina ai nisi galuega nai lo le fausiaina o le malo o le Atua.”⁸

I le 1840, na faaauau ai ona nonofo se tino itiiti ma le maoopoopo o tagata o le Ekalesia i Katelani, Ohio, e ui lava o le toatele o le Au Paia na faapotopoto atu i Navu, Ilinoi. Ina ia tali atu i tala faapea o se tagata o le Ekalesia i Katelani o loo taumafai e faaleaogaina le faatuatuaga o le Au Paia i le Au Peresitene Sili ma isi pulega o le Ekalesia, na tusi atu ai le Perofeta i se taitai o le Ekalesia i Katelani: “Ina ia taitaia fuafuaga a le Malo i le amiotonu, e matua taua le i ai o le lotogatasi atoatoa, lagona o le agalelei, malamalama lelei, ma le faatuatua i loto o le usoga uma; ma o le alofa mama moni o Keriso, alofa o le tasi i le isi, e tatau ona tino mai ai a latou faiga uma. Afai e i ai ni lagona o le le alofa, le le faatuatua, ona aliali mai ai lea o le faamaualuga, fia sili ma le fuā; e mautinoa lava o le a manumalo le lē mautonu ma ua faaleaogaina [e i latou] ia pulega o le Ekalesia. …

“Afai e manatu le Au Paia i Katelani ou te le agavaa mo a latou talosaga pe a latou faapotopoto faatasi, ma faatalale e tuuina atu a’u i luma o nofoalii o le agalelei faalelagi, o se faamaoniga malosi ma le mautinoa lea ia te a’u ua leai ma i latou le Agaga o le Atua. Afai e moni faaaliga ua matou maua, o ai e tatau ona taitaia le nuu? Afai ua tuuina mai i o’u lima ki o le Malo, o ai e tatau ona faamalamalamaina atu mea lilo o le Malo?

“Afai lava e tutu mai pea la’u usoga i o’u tafatafa e lagolago ma faamalosiau ia te a’u, e mafai ona ou faafeagai ma faiga le tonu a le lalolagi, ma mafai ona ou faapalepaleina ma le olioli faiga leaga ma le matuia; ae a tutu mamao mai la’u usoga, pe a amata ona latou faavaivai, ma taumafai e faagesegeseina lo’u alualu i luma ma a’u taumafaiga, ona ou lagona ai lea o lo’u matua faanoanoa, ae peitai e le faavaivaia ai lo’u naunautaiga e faataunuu la’u galuega, ma lo’u faatuatuaga e ui lava ina o ese uma a’u uo faalelalolagi, ia e oo lava ina tetee mai ia te a’u, ae o le a siitia a’u i le manumalo e lo’u Tama faalelagi.

“Ae peitai, ou te faamoemoe e oo lava i e oi Katelani o loo i ai nisi o e latou te le faasalaina se tagata i lana upu [tagai Isaia 29:21], ae o loo naunau e tulai mai e puipuia le amiotonu ma le upu moni, ma auai atu i tiute uma ua poloaiina ai i latou; ma e o le a i ai le poto e taitaiina i latou e tetee atu i soo se faiga po o se uunaiga ua faia e aumai ai le le mautonu ma le fefinauai i totonu o le tolauapiga a Isaraelu, ma mafai ona iloa le eseesega i le va o le agaga o le upu moni ma le agaga o le sese.

“O le a matua faamalieina lo’u mafaufau i lo’u vaavaai atu o loo manuia le Au Paia i Katelani, ae ou te manatu e le i oo mai le taimi; ma ou te faamautinoaina outou o le a le mafai lava seiloga e faatuina se isi faiga ese ma faaalia mai se isi agaga ese. A toefuataiina mai le faatuatua, a oo ina pa’ū le faamaualuga, ma faaofuina mafaufau losilosivale uma i le lotomaualalo e pei o se ie pulupulu, ma suia le manatu faapito i le uiga lelei ma le alofa mama o Keriso, ma i ai se naunautaiga tuufaatasia e ola ai i upu uma e tulei mai i le fofoga o le Alii, ona oo mai lea o le taimi, ma e seiloga lava e oo mai i lea taimi, ona mafai lea e le filemu, tulaga maopoopo ma le alofa ona manumalo.

“O le taunuuga lea o tagata manaonao ua mafua ai ona lafoa’i Katelani. Ua faafia ea ona inosia la outou auauna maualalo i lona tofiga e nei ituaiga o tagata, o e taumafai e sii i latou lava i tulaga maualuluga i lona malaia, ma o lo latou vaai atu i le faigata ona faia, ona aapa loa lea i faiga leaga o le taufaaleaga ma sauaga, ma isi foi faiga ina ia faataunuu ai le faatoilaloina o ia. O nei ituaiga o tagata na muamua lava faatuiese i le Au Peresitene, ma faasalalauina o latou sese ma vaivaiga laiti i matagi e fa o le lagi.”⁹

O i latou o e liliuese e aveesea mai ai le Agaga o le Atua, e motusia a latou feagaiga, ma masani lava ona latou sauaina tagata o le Ekalesia.

“Atonu e uiga ese i le manatu muamua, ae e moni foi, faapea e ui lava i taumafaiga uma a le au liliuese e ola faaleatua, ae e maea loa ona liliuese mai le faatuatua ia Keriso, sei vagana ai ua vave lava ona latou salamo, ua vave lava pe tuai mai foi ona pauu atu i togafiti uma a le tiapolo, ma ua faaogea i latou i le Agaga o le Atua, ina ia faaalia a latou amioleaga i luma o le motu o tagata. Ua sili atu ona matuia sauaga ua oo i le au faatuatua ai lima o le au liliuese. Na a’oa’i atu Iuta ae i le taimi lava lena na ia faalataina ai lona Alii i lima o Ona fili, aua na ulufale Satani ia te ia.

“E i ai se poto maoae ua faaeeina i luga o i latou o e usitai i le Talalelei ma le faamoemoega atoatoa o le loto, lea, afai e agasala ai, o le a tuua ai le tagata liliuese ua faaogea ma ua aunoa ma le Agaga o le Atua, ma e moni, ua lata o ia i le faamalaiaga, ma o lona iuga o le susunuina. O le taimi lava e aveesea mai ai ia te i latou lena malamalama lea na i totonu ia te i latou ona toe pouliuli lava lea o i latou e pei ona sa i ai muamua a o lei faamalamalamaina i latou, ona oo lea i le taimi e le taumateina, o le a faaaogaina uma lo latou mana e tetee atu ai i le upu moni, ma o le a latou sailia le faaumatiaina o i latou o e na avea ma o latou lagolago silisili, e pei foi o Iuta.

“O ai se uo sili ona latalata na ia Iuta i lenei lalolagi, po o i le lagi, nai lo le Faaola? Ae o lona faamoemoega muamua o le faaumatia lea o Ia. O ai se, i le Au Paia uma o nei aso e gata ai, e mafai ona manatu ane ia te ia lava ua lelei e pei o lo tatou Alii? O ai se ua faapena ona atoatoa? O ai se ua faapena le mama? O ai se ua paia e pei o Ia? E ono maua ea i latou? Na te lei agasala lava pe na te solia se poloaiga po o se tulafono o le lagi—e leai se pepelo i Lona fofoga, e leai foi se faaoleole o maua i Lona loto. Ae peitai o se tasi na aai faatasi ma Ia, o le na feinu faatasi i le ipu e tasi, lea na muamua ona sii ae lona mulivae e faasagatau ia te Ia. O fea o i ai se tasi e pei o Keriso? E le mafai ona maua o ia i le lalolagi. Aisea la na tatau ai ona faitio i latou o e mulimuli ia te Ia, pe afai e mai ia i latou o e na latou ta’ua o uso, ma manatu i ai o loo tutu mai i le fesootaiga silisili ona vavalalata i le feagaiga faavavau, latou te maua mai ai sauaga?

“Mai le a le autu na tupu mai ai le mataupu faavae lea ua faaalia pea lava pea e le au liliuese mai le Ekalesia moni ma ua faaluaina lo latou filiga ina ia sauaina, ma ua faaluaina foi le saili ma lo latou finafinau, ina ia faaumatia i latou o e na latou molimau mai muamua latou te alolofa i ai, o e na latou talatalanoa muamua, ma e na latou osifeagaiga ai muamua latou te finafinau faatasi i le mana uma o le amiotonu ina ia maua le malologa o le Atua? Atonu o le a fai mai e o tatou uso le mafuaaga lava e tasi lea na saili ai Satani e faatoilaloina le malo o le Atua, aua o ia lava ia e leaga, ae o le Malo o le Atua e paia.”¹⁰

“Ua i ai pea lava pea, i tupuaga uma o le ekalesia, i latou o e na tetee i aoaoga faavae o le lelei, o e na mananao i le oa o lenei lalolagi, na mulimuli i aoaoga faavae o le amioletonu, ma avea ai o fili o le upu moni. … O e na galulue faatasi ma i tatou ma maua ai ni faauooga silisili, na masani lava ona avea ma e silisili ona ita ia i tatou ma avea ma o tatou fili e sili ona finafinau; afai na le amanaia i latou, afai na faaleagaina lo latou mamalu, pe na molimauina a latou amioleaga, na masani ona muamua lava latou i le sii a’e o le lima o sauaga, i le faia o moliaga sese ma le faaleagaina o o latou uso, ma le sailia o le faatoilaloina ma le faaumatiaina o a latou uo.”¹¹

“O le au tetee ‘Mamona’ liliuese ua faasoloatoa i le lalolagi ma faasalalau ai lipoti leaga e tele ma le sese taufaaleaga e tetee ai ia i tatou, ma le manatu faapea e maua ai a latou faauooga o le lalolagi, aua ua latou iloa e le ā le lalolagi i tatou, ma e ita le lalolagi ia i tatou; o le mea lea latou [le lalolagi] te avea ai nei tagata [liliuese] ma meafaigaluega; ma auala mai ia i latou ona taumafai e faia uma ni manu’a latou te mafai, ma a maea ona sili atu lea ona latou itagia i latou nai lo i tatou, aua ua latou iloa ane o i latou o le au taufaalata ma le au taufaavalea [taufaasese].”¹²

Na lipotia mai e Uilifoti Uitilafi faapea: “Na ou auai i se sauniga i le Malumalu [i Katelani] [i le aso 19 o Fepuari, 1837]. Na le auai Peresitene Iosefa Samita ona o nisi mataupu mo le Ekalesia, ae e le i tutusa le umi ma le afa o le umi na i ai Mose i le mauga mai Isaraelu [tagai Esoto 32:1–8]; ae o le toatele o tagata i Katelani, afai latou te le i faia se povi auro e ifo i ai e pei o Isaraelu, na liliuese o latou loto mai le Alii ma mai lana auauna o Iosefa, ma auai i le faitala faatupu ma taliaina agaga sese, seia oo ina faapouliuligia ai o latou mafaufau; ma e toatele na tetee atu ia Iosefa Samita, ma mananao ai nisi ina ia tofia Tavita Uitimera e taitaiina le Ekalesia e sui ai o ia. I le ogatotonu o lenei ao o agaga pogisa leaga, na taliu mai ai Iosefa i Katelani, ma tulai ai i lenei taeao i le pulelaa. Na foliga matua faanoanoa tele o ia; ae e lei umi ae oo mai le Agaga o le Atua ia te ia, ma na ia laugaina ai le faapotopotoga i le matua manino tele pe mo le tolu itula, ma faafilemuina ai ona fili.

“Ina ua ia tulai na ia faapea mai, ‘O loo avea pea a’u ma Peresitene, Perofeta, Tagatavaai, Talifaaaliga ma le Taitai o le Ekalesia a Iesu Keriso. O le Atua, ae le o le tagata, na tofiaina ma faatuina a’u i lenei tulaga, ma e leai se tagata po o ni vaega o tagata e i ai se mana latou te aveesea ai a’u pe tofiaina se isi e suitulaga ia te a’u, ma o i latou o e latou te faia lea tulaga, afai latou te le vave salamo, o le a mu o latou lima ma o atu i seoli.’ Na ia aoa’iina le nuu ma le malosi mo a latou agasala, pouliuli ma le le talitonu; na i ona luga le mana o le Atua, ma na molimau mai e moni ana saunoaga.”¹³

Na lipotia mai e Uilifoti Uitilafi: “Na saunoa Peresitene Samita i le aoauli [9 Aperila, 1837], ma faapea mai i le suafa o le Alii o le a oo mai ai i luga o nei tagata le faamasinoga a le Atua o e na molimau muamua mai o ana uo, ma uo a tagata, ma le fausiaina o Katelani, se siteki o Siona, ae na liliu ma avea ma e faalata ia te ia, ma le tulaga lelei o le malo o le Atua, ma tuuina atu le mana i lima o o tatou fili e tetee mai ai ia i tatou; na latou sauaina tele le Au Paia vaivai, ma aumaia le faanoanoa tele ia te i latou, ma avea ma soli feagaiga, ia o le a latou lagonaina ai le toasa o le Atua.”¹⁵

Na toe manatua e Daniel Tyler: “E lei umi ona taunuu le Perofeta i Commerce (ae mulimuli ane Navu) mai le falepuipui i Misuri, na ma asiasi atu ai ma Uso Isaac Behunin ia te ia i lona fale. O ona sauaga na avea ma autu o talanoaga. Na ia tau maia le tele o tala sese, le fetaui ma feteenai na faia e le au liliuese, e tagata o le Ekalesia na fefefe faapea ma tagata mai fafo atu. Na ia ta’u mai foi faapea o le toatele o tagata fai tofi o e na naunau e faaumatia lona ola ina ua molia o ia na faafoliga e au mai ia te ia ma fia faamasani ia te ia. Na ia tuuina atu le mamafa o le tuuaiga i luga o uso e lē moni. …

“Ina ua maea ona faamatalaina e le Perofeta le faiga o ia, na faapea atu Uso Behunin: ‘Afai ou te tuua lenei Ekalesia ou te le faia e pei ona faia e na tagata: Ou te alu i se nofoaga tuufua e le i faalogoina ai lava se tala e uiga i le faa-Mamona, ou te faamautu ai, ma o le a le iloa lava e se isi ou te iloaina se mea e tasi e uiga i ai.’

“Na tali atu le Tagatavaai sili i le taimi lava lena: ‘Uso Behunin, e te le iloa le mea e te faia. E leai se masalosalo na faapena foi ona manatu nei alii e pei o oe. Ae e te le i auai i lenei Ekalesia na e tu i le va o le lelei ma le leaga, ma e le mafai nei ona e toe foi i ai. A e tuueseina le Matai ua uma ona e ioe e te auauna i ai, o le a e faia e ala i le faaosoosoga a le taipolo, ma o le a e mulimuli i ana faatonuga ma avea oe ma ana auauna.’”¹⁵

Afai tatou te mulimuli i perofeta ma aposetolo ma faaaliga a le Ekalesia, o le a le taitaieseina i tatou.

Na lipotia mai e Orson Hyde, o se sui o le Korama a Aposetolo e Toasefululua: “O Iosefa le Perofeta … na faapea mai, ‘Uso e, ia manatua o le toatele o lenei nuu o le a le o ese lava; ma afai lava e te tumau ai ma le toatele o le a e mautinoa lava o le a e ulufale atu i le malo selesitila.’ ”¹⁶

Na lipotia mai e William G. Nelson: “Ua ou faalogo i le Perofeta o lauga i nofoaga faitele i le tele o taimi. I se tasi o ia sauniga na ou faalogo ai o ia faapea mai: ‘O le a ou tuuina atu ia te outou se ki e le mafai ona elea,—afai e te tumau faatasi ma le toatele o Aposetolo e Toasefululua, ma faamaumauga a le Ekalesia, o le a le mafai lava ona taitaieseina oe.’ Ua faamaonia e le talafaasolopito o le Ekalesia e moni lenei tulaga.”¹⁷

Na manatuaina e Ezra T. Clark: “Na ou faalogo i a Perofeta Iosefa o faapea mai o le a i a tuuina mai i le Au Paia ki ia o le a le mafai ai lava ona taitaieseina pe faaseseina i latou, ma o lena saunoaga na faapea: O le a le tuua lava e le Alii se vaega toatele o lenei nuu ina ia taitaieseina pe faaseseina e ni tagata taufaasese, pe Na te tuuina foi faamaumauga a lenei Ekalesia e pau atu i lima o le fili.”¹⁸

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau vii–xii.

Toe iloilo le tala i itulau 337–339. Aisea e te manatu ai e mafai ona suia tagata mai le amiotonu i le liliuese i sina taimi puupuu lava? O a nisi o uunaiga e mafai ona maileiina tagata i le liliuese i aso nei? O a ni mea e mafai ona tatou faia e puipuia ai mai nei ituaiga uunaiga?
O a nisi o tulaga leaga o le aveesea o lo tatou faatuatuaga mai o tatou taitai faaleEkalesia ma lo tatou faitioina o i latou? (Mo nisi faataitaiga, tagai itulau 339–42). O a ni mea e mafai ona tatou faia e faatumauina ai se lagona o le ava ma le talisapaia o o tatou taitai? E faapefea e matua ona faamalosiau a latou fanau e ava i taitai faaleEkalesia?
Na aoao mai le Perofeta, “O le taimi lava e te faatagaina ai oe lava e faataatia ese soo se tiute ua valaauina ai oe e le Atua e te faatinoina, ina ia faamalieina o oe lava naunautaiga …, ua e faataatiaina se faavae mo le liliuese” (itulau 339). O le a le uiga o lenei faamatalaga ia te oe?
Faitau le tala na faamatalaina e Daniel Tyler (itulau 345–46). Aisea e te manatu ai o i latou o e ua liliuese mai le Ekalesia e masani ona matua malosi lo latou tetee i ai? (Mo nisi faataitaiga, tagai i itulau 342–46.) O le a lou manatu e faapefea ona tatou tali atu i upu ma faiga a ia ituaiga tagata?
Faitau parakalafa mulimuli e tolu o le mataupu (itulau 346). Aisea e taua ai ona tatou malamalama ma faaaoga lenei “ki” na tuuina mai e Iosefa Samita?

Mau E Faatatau I Ai: 1 Nifae 8:10–33; Helamana 3:33–35; MFF 82:3, 21; 121:11–22

sacrament meeting — Sa aoao mai e Iosefa Samita le taua o le lagolagoina o tatou taitai o le Ekalesia: “O lena tagata e tulai ae e tausalaina isi, ma saili masei i le Ekalesia, ma faapea mai ua sese ese ma le ala, ae o la e amiotonu lava ia. … ua i ai lena tagata i le alatanu agai atu i le liliuese.

Judas betraying Jesus — “O ai se uo sili ona latalata na ia Iuta i lenei lalolagi, po o i le lagi, nai lo le Faaola? Ae o lona faamoemoega muamua o le faaumatia lea o Ia.”