O Le Nonofo Faatasi ma Isi i le Filemu ma le Lotogatasi

“Tatou te mananao e ola i le filemu ma tagata uma.”

Mai le Soifuaga o Iosefa Samita

O se tasi o naunautaiga o le uluai Au Paia o le tau lava ina faatagaina i latou e ola i la latou lotu i le filemu. Ae soo se mea lava na latou siitia i ai, sa leai lava so latou filemu. I le 1833, i le na o le lua tausaga talu le faapaiaina o se nofoaga e potopoto i ai i Misuri, na faamalosia le Au Paia e tagata leaga ina ia o ese mai Jackson County, Misuri (tagai itulau 301). Sa maua e tagata o le Ekalesia se sulufaiga e lei tumau i Clay County, Misuri, ona oo foi lea i le 1836, sa amata ona latou masii atu i Misuri i matu. O le toatele lava o i latou sa to’ai taunuu i Caldwell County, o se itumalo na faatulagaina e le fono faitulafono a le setete e nonofo ai le Au Paia. O Sisifo Mamao, lea na avea ma laumua o le itumalo, e le i umi ae avea ma nofoaga olaola o le Au Paia o Aso e Gata Ai.

Na faaauau ona nofo le Perofeta o Iosefa Samita i Katelani, Ohio, ae ia Ianuari 1838, na faamalosia o ia e malaga ese, ona ua lamatia lona soifua. Faatasi ai ma lona aiga, na ia malaga ai i le 900 maila agai i Sisifo Mamao, lea na ia faatasi ai ma le Au Paia na nonofo ai iina. Mulimuli ane i le 1838, o le toatele o le Au Paia i Katelani na faatau atu pe tia’i foi o latou fale ma mulimuli atu i le Perofeta i Misuri. Ina ia i ai ni nofoaga mo tagata o le Ekalesia ia na gasolo mai i le eria, na filifilia e le Perofeta ia eria e latalata i Sisifo Mamao i le mea na mafai ona faamautu ai le Au Paia. Ia Iulai 1838, na faapaiaina maatulimanu mo le malumalu i Sisifo Mamao, ma maua ai e le Au Paia le faamoemoe o le a mafai ona faatuina se nofoaga mautu tumau lea e mafai ona latou maua ai le fiafia o le faamanuiaina ma le filemu. Ae peitai, na vave ona oo mai feeseeseaiga ma tagata o le nuu e pei lava o ia na tutupu i Jackson County, ma i le tautoulu o le 1838, na toe amata ai foi ona faalavelaveina ma osofaia le Au Paia e tagata leaga ma fitafita.

I se tasi aso na asiasi atu ai le Perofeta i le fale o ona matua i Sisifo Mamao ae oo mai loa se vaega o fitafita faaauupegaina ma faasilasila mai ua latou o mai e fasioti ia te ia ona o se solitulafono. Na faamatalaina e Lusi Maki Samita, le tina o le Perofeta, le meaalofa [a Iosefa] o le tausi o le filemu:

“Na vaai atu [Iosefa] ia te i latou ma se foliga ataata matua faamalieloto ma, laalaa atu ia te i latou, ma tuuina atu lona lima ia i latou taitoatasi i se auala na tauina atu ai ia te i latou e le o ia o se tagata solitulafono pe o se tagata pepelo foi o loo fefe. Na tutu i latou ma sioa e peiseai ua savalia lo latou ala e se agaga.

“Na nofo ifo i lalo Iosefa ma amata loa se talanoaga ma i latou ma faamalamalama ia i latou talitonuga ma lagona o tagata ua ta’ua o Mamona ma le mea na i ai lo latou faagasologa mai, ma faapena foi faiga na latou feagai mai o latou fili talu mai le uluai faatuina o le Ekalesia. Na ia tau atu ia te i latou o loo mulimuli pea ia i latou le lotoleaga ma le taufaaleaga talu mai lava ona latou ulufale mai i Misuri, ae o i latou o se nuu e lei solia lava le tulafono i lona iloa. Ae afai na latou faia, ua latou sauni lava ina ia faamasinoina i latou e le tulafono. …

“Ina ua maea, na ia tulai ma faapea mai, ‘Tina, ou te talitonu o le a ou alu i le fale. O loo faatali mai Ema ia te au.’ E toalua alii na tutu vave ae, ma faapea mai, ‘E le tatau ona e alu na o oe, aua e le saogalemu. O le a ma o faatasi ma oe e puipui ia te oe.’ Na faafetai atu Iosefa ia i laua, ona latou o ai lea faatasi ma ia.

“O le isi vaega o fitafita na tutu i le faitotoa ae ua o ese atu i latou, ma na ou faalogo ai i la latou talanoaga lea:

“Fitafita Muamua: ‘Pe le’i ese ea lau faalogo ina ua uu e Samita lou lima? Ou te lei lagonaina lava faapea i lo’u olaga.’

“Fitafita Lona Lua: ‘Na ou lagonaina e peiseai e le mafai ona ou gaioi. E le tatau ona ou taia se lauulu se tasi o lena alii mo le lalolagi atoa.’

“Fitafita Lona Tolu: ‘O le taimi mulimuli lava lenei e te mauaina ai a’u o o’u sau e fasioti Joe Samita po o Mamona foi.’ …

“O na alii na o ese atu ma lo’u atalii na folafola mai o le a o e faataape fitafita i lalo o la la’ua vaavaaiga ona o ai lea i le fale, ma faapea mai afai lava na te manaomia i laua, o le a toe foi mai ma mulimuli ia te ia i mea uma e alu i ai.”¹

I lona tautala i le upu moni i se auala agalelei ma le tuusao, na faatoilalo ai e Iosefa Samita faiga le tonu ma uiga leaga ma faatupuina ai le filemu ma le toatele o i latou o e na avea ma ona fili.

Aoaoga a Iosefa Samita

E ala i le finafinau e avea ma faatupu filemu, e mafai ai ona tatou ola i le lotogatasi ma le alofa sili atu faatasi ma isi.

“Na fetalai mai Iesu: ‘Amuia e faatupuina le filemu: aua e taua i latou o atalii o le Atua.’ [Mataio 5:9.] O le mea lea afai e tatau ona faafetai se nuu, se Setete se tasi, se faalapotopotoga, po o se aiga mo se mea lava se tasi, o le filemu lea.

“O le filemu, le atalii lelei e o le lagi!—o le filemu e pei o le malamalama mai lena tamā sili, e faamalieina, faaolaina, ma faafiafiaina le amiotonu ma le la amiotonu, ma o le autu tonu lea o le fiafia i le lalolagi, ma le olioli i le lagi.

“O lē e le taumafai i lona mana uma i le tino ma le agaga, ma lana uunaiga uma i le aiga ma fafo atu—ma faatupuina ai i isi ia latou faia foi—le saili atu i le filemu ma faatumauina mo lona lava lelei ma lona aoga, ma le tauleleia o lona Setete, nuu, ma le atunuu, e leai sana aia i le alofa tunoa o tagata; pe agavaa foi o ia mo le faauooga a tamaitai po o le puipuiga a le malo.

“O ia lava o le anufe-faatupu-papala e atiatia ona lava totoga; ma o le manu feai e fafaga i lona lava tino; ma o ia foi, e tusa ai ma ona lava faamoemoega ma faamanuiaga i le olaga, o se [faaumatiaga faatautala] o lona lava fiafiaga.

“O se faapotopotoga o ia ituaiga o tagata e le o mamao lava mai le seoli i le lalolagi, ma e tatau ona tuua na o ia e le agavaa mo faiga lelei a le au saoloto po o le viiga a le au totoa.

“Ae o le tausi le filemu, e faalogo ia ia te ia! Aua o afioga o lona fofoga ma lana mataupu faavae e pau pei o le timu, ma mamā e pei o le sau. E pei i latou o le puao malu i luga o laau, ma pei o le timu vasagamalie i luga o le vao.

“O le ola fiafia, amiolelei, alofa, lotomalie, lotoalofa, agalelei, agaalofa, alofa fua ma le faauo atu e uunaia le olaga i le fiafia: ma o tagata, e maualalo teisi ifo nai lo agelu, a faaaogaina o latou mana, avanoa, ma le poto e tusa ai ma faatulagaga, tulafono, ma aiaiga o faaaliga, mai ia Iesu Keriso, e nonofo faatasi i le lotogatasi; ma o le manogi manaia lea e aumaia e le mānava o le olioli ma le faamalieina mai la latou usoga amiotonu e pei o le manogi malosi mai le suauu paia na liligi i luga o le ulu o Arona, pe e pei o le manogi matagofie e sasala mai le faatoaga o laau manogi a Arapi. Ioe, o le leo o le faatupu filemu e sili ona pei o nei mea uma—

“E pei o le musika o tino faalelagi—
E faafiafia o tatou agaga ma faafilemu o tatou atuatuvalega;
E liua le lalolagi i le Parataiso,
A o tagata i penina e sili atu lona tau.”2

“Uso pele e, faaauau pea i le alofa faauso; savali i le agamalu; mataala i le tatalo, ina ia le faatoilaloina outou. Tausisi i mea e tupu ai le filemu, e pei ona fai mai lo tatou uso pele o Paulo, ina ia avea outou ma fanau a lo tatou Tama Faalelagi [tagai Roma 14:19].”³

“O le alofa fua i tagata uma, mafaufau ma le amiomama e faamalosia le amio lelei, ma le faia o mea lelei mo le leaga ua. … faatulagaina ma le manatu maualuga o le a togafitia le tele o faafitauli o tagata nai lo se aapa i mea tau, pe oo lava i finauga e aunoa ma se agaga o le faauo atu … O la tatou faataoto, la, o le Filemu ma tagata uma! Afai e ia i tatou le olioli i le alofa o le Atua, ia tatou taumafai e tuuina atu se mafuaaga o lena olioli, lea e le mafai e le lalolagi ona faatuiese i ai pe teena.”⁴

“Tatou te mananao e ola i le filemu ma tagata uma.”⁵

E mafai ona tatou faatupuina le filemu e ala i le faamamaluina e le tasi o le isi ma le tetee atu i le saili masei.

“Tatou te [faamoemoe o] o tatou uso o le a faaeteete le tasi i lagona o le isi, ma savavali i le alofa, ia sili atu lo latou faamamaluina o isi nai lo i latou lava, e pei ona finagalo ai le Alii.”⁶

“O le tagata e naunautai ina ia faia le lelei, e tatau ona tatou viia ona uiga lelei, ma ia le talatalanoa faalilolilo e uiga i ona leaga.”⁷

“O lenei, i lenei lalolagi, o le natura o le tagata o le manatu faapito, matapeapea ma le tauivi ina ia sili atu i isi; ae o loo naunau isi e atiina a’e isi pei o i latou lava.”⁸

“Ia naunau uma le Toasefululua ma le Au Paia e ta’uta’u atu a latou agasala, ae aua nei taofia se vaega; ma ia i a [i latou] le lotomaualalo, ae aua le faamaualuluga, ma ia faaeteete i le faafefeteina, ma aua nei saili ia sili atu i isi, a ia galue mo le lelei o le isi, ma tatalo le tasi mo le isi, ma viia o tatou uso pe viia lona igoa, ae le o le tauleagaina ma olopalaina o tatou uso.”⁹

“Afai tou te tuu ese mai ia te outou le tautala leaga uma, faatuaupua, ma manatu ma lagona le lelei: faamaualalo outou lava, ma faatupuina mataupu faavae uma o le amio lelei ma le alofa, ona oo mai ai lea i o outou luga o faamanuiaga a Ieova, ma o le a outou vaai ai i aso lelei ma le mamalu; o le a i totonu o outou faitotoa le filemu, ma le manuia i o outou tuaoi.”¹⁰

E mafai ona tatou faatupuina le lotogatasi i o tatou nuu e ala i le amanaiaina o le saolotoga o tagata uma e talitonu ai e tusa ai ma o latou lava lagona.

Mataupu Faavae o le Faatuatua 1:11: “Matou te tautino atu e a matou le aia tatau matou te tapuai atu ai i le Atua mamana e tusa ai ma o matou lava loto fuatiaifo, ma matou te tuuina atu foi lea lava aia tatau i tagata uma lava e faitalia i latou, pe faapefea, po o fea, po o le a foi latou te tapuai atu i ai.”¹¹

“Tatou te talitonu o se mataupu faavae tonu lea, ma o se tasi o ona malosiaga tatou te talitonu e tatau ona sa’o ona mafaufau i ai tagata taitoatasi uma, na faia tutusa tagata uma, ma e i ai uma lava le avanoa e mafaufau ai mo i latou lava i mataupu e fesootai ma lagona o le loto fuatiaifo. O le taunuuga, la, e le o ia i tatou se aia, pe ana ia i tatou le mana, e aveesea ai le aia a soo se tasi e faaaogaina ai lena saolotoga tutoatasi o le mafaufau lea na alofaina e le lagi e tuuina mai i luga o le aiga o tagata e avea o se tasi o meaalofa silisili [a le lagi].”¹²

“O loo ia te a’u lagona sili ona matamau, ma lagona o le alofa mama i ituaiga lotu uma, o vasega, ma ekalesia; ma o aia tatau ma saolotoga o le loto fuatiaifo, ou te matua taofia i le paia ma le pele, ma ou te le ita fua i se tagata e ese mai ia te a’u i mataupu o lagona ma manatu.”¹³

“E mafai ona molimau le Au Paia pe ou te naunau e tuuina atu lo’u ola mo o’u uso. Afai ua faaalia na ou naunau ou te oti mo se ‘Mamona,’ ou te toa e folafola atu i luma o le Lagi ua tutusa lava ma lo’u saunia ou te oti i le puipuia o aia tatau a se Peresipetiriane, o se Papatiso, po o se tagata lelei o soo se ituaiga lotu; mo le mataupu faavae lava e tasi lea e solia ai aia tatau a le Au Paia o Aso e Gata Ai lea foi e solia ai aia tatau a le Katoliko Roma, po o soo se isi lava ituaiga ekalesia o lē atonu e le ta’uta’ua pe e vaivai tele e puipuia i latou lava.

“O le alofa o le saolotoga lea e musuia lo’u agaga—o saolotoga faaletagata ma le faalelotu o tagata uma lava. O le alofa o le saolotoga na sasaaina mai i lo’u fatu ma lo’u agaga e o’u tama matutua a o laua faataaloina a’u i luga o la tulivae. …

“Afai ou te manatu e sese tagata, e tatau ea ona ou sauaina ma tuu i latou i lalo? Ou te siiina i latou i luga, ma i la latou lava foi auala, ma afai e le mafai ona ou faatalitonuina i latou e sili atu la’u auala, ou te le saili e faamalosia soo se tagata ina ia talitonu e pei ona ou talitonu, e na o le malosiaga o le fefulifulisa’i o le mafaufau, aua e asaina lava e le upu moni lona auala.”¹⁴

“E tatau ona tatou nofouta i taimi uma lava i na faiga le tonu ia e i ai taimi e tei lava ua aliali mai i latou lava, ma e ese le fiafia i le natura faaletagata, e tetee atu i a tatou uo, tuaoi, ma uso o le lalolagi, o e filifili ina ia ese mai ia i tatou i lagona ma manatu ma tulaga o faatuatuaga. O la tatou ekalesia e i le va o i tatou ma le Atua. O la latou ekalesia e i le va o i latou ma lo latou Atua.”¹⁵

“A tatou vaai atu i uiga lelei i tagata, e tatau i taimi uma ona tatou amanaia i latou, ae tuu ai pea po o a lava o latou malamalamaaga e faatatau i o latou lava talitonuga ma mataupu faavae; aua o tagata uma lava e tatau ona saoloto, ma i ai a latou aia tatau tumau, ma o latou agavaa maualuluga ma mamalu mo tulafono faalenatura ma le puipuiga faaletagata lava ia, ina ia mafaufau ma galulue ma tautatala e pei ona mananao ai i latou, a o latou faatumauina pea foi lo latou ava i aia tatau ma avanoa o isi tagata ola uma, e aunoa ma le faalavelavea e i latou o soo se isi. Ou te matua tautino atu i lenei mataupu faavae ma mulimuli ai ma le naunautai.”¹⁶

“E aia tagata uma lava i o latou saolotoga, aua o le ala lena na faauuina ai e le Atua. Ua ia faia tagata uma o ni tagata saoloto, ma tuuina atu ia i latou le mana e filifili ai le lelei po o le leaga; e saili atu le mea ua lelei, e ala i le mulimuli i le auala paia i lenei olaga, lea e aumaia le filemu o le mafaufau, ma le olioli i le Agaga Paia iinei, ma se atoatoaga o le olioli ma le fiafia i Lona itu taumatau pe a mavae le olaga lenei; po o le mulimuli i se auala leaga, ma agai atu ai i le agasala ma le tetee i le Atua, ma aumaia ai le ta’usalaina o o latou agaga i lenei lalolagi, ma le aveesea o faamanuiaga faavavau i le lalolagi a sau.Talu ai ua tuua e le Atua o le lagi nei mea i le filifiliga a tagata taitoatasi, tatou te le mananao e faaogea ai i latou. Na o lo tatou mananao e faia le vaega a se tagatavaai faamaoni, e tusa ai ma le afioga a le Alii ia Esekielu le Perofeta (Esekielu mataupu 33, fuaiupu 2, 3, 4, 5), ma tuu ai i isi e faia le mea e lelei ia te i latou.”¹⁷

“O se tasi lea o uluai mataupu faavae o lo’u olaga, ma o se mea na ou fafagaina ma faaleleia mai lava i lo’u laitiiti, aua na aoaoina ai a’u e lo’u tama, ina ia tuuina atu i tagata uma le saolotoga o le loto fuatia ifo. … I o’u lagona ua ou saunia i taimi uma ou te oti mo le puipuia o e vaivai ma sauaina i a latou aia tatau.”¹⁸

“Aua nei aia fua i le ekalesia a le isi tagata: e tatau i malo uma ona faatagaina tagata taitoatasi e fiafia i lana ekalesia e le faalavelavea. E leai se pule i se tagata e aveesea ai le ola e fai ma taunuuga o le eseesega o ekalesia, lea e tatau i tulafono ma malo uma ona faapalepale i ai ma puipuia, e tusa lava pe sa’o pe sese.”¹⁹

“O le a tatou … faatupuina le filemu ma le faauooga ma tagata uma, faia a tatou lava fuafuaga e aunoa ma le aiaina o isi, ma matua faamanuiaina ai, faaaloalogia, aua, i lo tatou faaaloalo atu i isi, ua tatou faaaloaloina i tatou lava.”²⁰

“E ui lava ou te le lagona e tatau ona ou faamalosia la’u mataupu faavae i luga o se tagata, ou te olioli pe a ou vaai atu ua manumalo le upu moni i faiga le tonu, ma aveesea faiga tuai a tagata e mataupu faavae mama o le Talalelei a Iesu Keriso.”²¹

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau vii–xii.

Toe iloilo le tala ia Iosefa Samita a o ia saunoa atu i sui o fitafita (itulau 364–65). Aisea e te manatu ai na mafai ona faato’- ato’a le Perofeta i lenei tulaga? Mafaufau i isi faataitaiga ua e vaai ai i tagata o tumau i le faato’ato’a ma le filemu i taimi o tulaga faigata. O le a le taunuuga mai mea na faia e nei tagata?
Toe iloilo itulau 365–67, ma vaavaai upu ma faaupuga na faaaogaina e le Perofeta e faamatalaina ai le filemu ma le tagata faatupu filemu. O a ni uiga e mafai ona fesoasoani ia i tatou e avea ai ma faatupu filemu i o tatou aiga ma nuu?
Faitau le parakalafa lona lua i le itulau e 367. O le a sou lagona ina ua e faitauina leaga o isi? O le a sou lagona ina ua e faitauina uiga faaleatua o isi? O le a sou manatu i lagona o isi tagata pe a e faaavanoaina se taimi e faailoa atu ai o latou uiga faaleatua?
Faitau le parakalafa lona tolu i le itulau 367. O a ni auala e mafai ona tatou atiina ae e le tasi le isi? O a ni mea ua faia e isi tagata e atiina ae ai oe? O a ni auala e mafai ai e ia gaoioiga ona taitai atu i le filemu?
Toe iloilo itulau 368–70, ma vaavaai mo aoaoga a le Perofeta e uiga i auala e tatau ona tatou faia ai tagata e ese o latou talitonuga faalelotu mai ou talitonuga. O a ni auala e mafai ai ona tatou faamamaluina aia a isi “pe faapefea, po o fea, pe o le a foi latou te tapuai atu i ai”?
Faitau le parakalafa faaiu i le itulau 370. E faapefea ona tatou faasoaina le talalelei toefuataiina ma isi a o tatou faaali atu le faaaloalo mo o latou talitonuga?

Mau E Faatatau I Ai: Efeso 4:31–32; Mosaea 4:9–16; 4 Nifae 1:15–16; MFF 134:2–4, 7

Joseph with militiamen — I Sisifo Mamao, i Misuri, ina ua o mai se vaega o fitafita faaauupegaina e pue faapagota atu Iosefa Samita, sa ia “tilotilo atu ia te i latou ma se laufofoga fiafia, ma savali atu ia i latou, ma ofo atu lona lima e faatalofa atu ia i latou taitoatasi.”

Sermon on the Mount — I le Lauga i luga o le Mauga, sa aoao mai ai le Faaola, “Amuia i latou e faatupuina le filemu; aua e ta’ua i latou o atalii o le Atua.”