Ang Wentworth Letter

Ang Wentworth Letter mao ang asoy ni Propeta Joseph Smith kabahin “sa pagsaka, pag-uswag pagpanggukod, ug hugot nga pagtuo sa mga Santos sa Ulahing mga adlaw, “lakip ang mga pamahayag nga naila nga mga Artikulo sa Hugot nga Pagtuo.

Gikan sa Kinabuhi ni Joseph Smith

Agi og dugang sa pagka-Presidente sa Simbahan, si Joseph Smith adunay daghang mga responsibilidad sa Nauvoo. Pagka Mayo 1842, nahimo siyang mayor sa Nauvoo, nagpasabut nga siya usab ang pangulong maghuhukom sa Nauvoo Municipal Court. Siya usa ka tenyente heneral ug kumander sa Nauvoo Legion. Ug pagka Pebrero 1842, iyang giabaga ang tahas sa pagka-editor sa Times and Seasons, usa ka peryodiko sa Simbahan nga gimantala kaduha sa usa ka bulan. Ang Times and Seasons naghatag og paagi alang sa mga pangulo sa Simbahan sa pakigbalita uban sa mga Santos, pagmantala og mga padayag ug importanteng mga pakigpulong, ug pakigbahin og mga balita kalabut sa Simbahan. Si John Taylor, sakop sa Korum sa Napulog Duha, gitudlo sa pagdumala sa daghang mga aspeto sa publikasyon ubos sa direksyon sa Propeta.

Sa unang edisyon nga gimantala samtang siya ang editor, ang Propeta misulat nga ang peryodiko mohatag og mga artikulo kabahin “sa mga importanteng panghitabo nga nahitabo libut kanato; ang kusog nga pag-uswag sa kamatuoran; sa daghang mga komunikasyon nga among nadawat, matag adlaw, gikan sa mga elder gawas sa laing nasud; dinhi sa nasud, sa Inglatera, gikan sa kontenente sa Uropa, ug ubang mga bahin sa kalibutan; ang gubot nga kahimtang sa mga nasud; ang mga epistola ug mga pagtulun-an sa Napulog Duha; ug ang mga padayag nga atong madawat gikan sa Labing Halangdon.”¹

Samtang ang Propeta nag-alagad isip editor, ang Times and Seasons nagmantala og mga dokumento nga mahinungdanon kaayo. Ang teksto sa basahon ni Abraham ug duha sa mga hulad [fascimiles] gimantala niadtong Marso 1842, uban sa ikatulong hulad nga gimantala niadtong Mayo. Usab sa Marso, ang Propeta misugod sa pagmantala sa “History of Joseph Smith,” ang asoy nga sa kadugayan nahimo nga History of the Church.

Sa Times and Seasons nga isyu sa petsa Marso 1, 1842, ang Propeta mimantala sa nailhan nga Wentworth Letter. Naghulagway sa iyang mga katarungan sa paghimo niini nga dokumento, ang Propeta mipasabut: “Sa hangyo ni Mr. John Wentworth, Editor ug Tag-iya sa Chicago Democrat, ako nakasulat sa mosunod nga mubong pagpasabut kabahin sa pagsaka, pag-uswag, pagpanggukod, ug hugot nga pagtuo sa mga Santos sa Ulahing mga Adlaw, diin ako nakabaton og dungog, ubos sa Dios, ingon nga tigtukod. Si Mr. Wentworth nag-ingon nga siya nanghinaut sa paghatag ni Mr. [George] Barstow, iyang higala, kinsa mao ang nagsulat sa kasaysayan sa New Hampshire, niini nga dokumento. Ingon nga si Mr. Barstow nakahimo sa angay nga mga lakang sa pagkuha sa hustong impormasyon, ang ako lamang pangayoon sa iyang mga kamot, mao, nga iyang imantala ang tibuok asoy, walay pagdugang, ug walay sayop nga pagpasabut.”²

Si George Barstow sa katapusan wala molakip sa asoy sa Propeta diha sa iyang kasaysayan tungod kay siya mihukom sa pagsagap lamang og mga hitabo sa tibuok tuig 1819 diha sa iyang libro.³ Apan ang Wentworth Letter adunay dako kaayo nga bili sa mga Santos sa Ulahing mga Adlaw. Kini usa ka orihinal nga asoy ni Joseph Smith nga nagpamatuod sa iyang sagrado nga tawag gikan sa Dios, iyang mga panan-awon, ug sa iyang pangalagad ug mga pagtulun-an. Kini nagsugilon sa pagsaka ug pagtubo sa Simbahan ug sa mga pagpanggukod sa mga Santos. Kini naglangkob sa mapanagnaong deklarasyon kabahin sa umaabot nga kalampusan sa Simbahan dinhi sa yuta ubos sa mapanalipdanong kamot sa Halangdong Jehova. Kini usab naglangkob og importanteng mga detalye nga dili makaplagan bisan asa diha sa mga pagtulun-an sa Propeta, lakip sa paghulagway sa bulawang mga palid ug usa ka dibuho sa mga sulod sa Basahon ni Mormon. Sa dakong kahulugan, kini mao ang unang higayon nga si Joseph Smith sa iyang kaugalingon mimantala sa asoy sa iyang Unang Panan-awon.

Gitapos uban sa 13 ka mga deklarasyon sa doktrina sa Simbahan nga karon gitawag og Mga Artikulo sa Hugot nga Pagtuo, kini nagbarug isip usa ka gamhanan nga saksi sa balaang calling sa Propeta Joseph Smith.

Mga Pagtulun-an ni Joseph Smith

Ang Dios nga Amahan ug si Jesukristo mipakita ngadto ni Joseph Smith agi og tubag sa iyang pag-ampo.

“Ako natawo sa lungsod sa Sharon, Lalawigan sa Windsor, Vermont, sa ika-23 sa Disyembre, A.D. 1805. Dihang [ako] nagedad og diyes anyos, ang akong mga ginikanan mibalhin ngadto sa Palmyra, New York, diin kami mipuyo og mga upat ka tuig, ug dayon kami mibalhin ngadto sa lungsod sa Manchester. Ang akong amahan mag-uuma ug gitudloan ako sa pamaagi sa pagpatubo ug pag-atiman sa mga hayop. Sa dihang mga katorse anyos ang edad, nagsugod ako og pamalandong sa kamahinungdanon sa pagkaandam alang sa umaabut nga kahimtang, ug diha sa pagpangutana [kabahin] sa laraw sa kaluwasan, akong nahibaloan nga dihay dagkong panagbangi sa mga opinyon sa nagkalain- laing mga relihiyon; kon ako moduol og usa ka denominasyon sila motudlo kanako og usa ka plano, ug ang lain ngadto sa lain; matag usa nagtudlo sa iyang kaugalingong piho nga tinuhoan isip ang summum bonum [ang pinakamaayo] sa kahingpitan. Gihunahuna nga dili ang tanan mahimong husto, ug nga ang Dios dili mahimong mao ang gigikanan sa daghan nga kalibug, ako nakahukom sa pagsusi og maayo sa hilisgutan, nagtuo nga kon ang Dios adunay Simbahan kini dili magkabulag ngadto sa mga grupo, ug nga kon Siya motudlo og usa ka grupo sa pagampo sa usa ka paagi, ug mangalagad og usa ka han-ay sa mga ordinansa, Siya dili motudlo og mga baruganan sa laing grupo, diin sukwahi sa Iyang gitudlo.

“Nagatuo sa pulong sa Dios, ako adunay pagsalig sa gipahayag ni Santiago—‘Kon aduna man kaninyoy nagkulang og kaalam, papangayoa siya sa Dios nga nagapanghatag ngadto sa tanang mga tawo sa madagayaon gayud ug sa walay pagpamoyboy, ug kini igahatag kaniya’ [Santiago 1:5]. Ako miadto sa usa ka sekreto nga dapit sa kakahoyan, ug misugod sa pag-ampo sa Ginoo; samtang mainitong nangamuyo, ang akong hunahuna mipalayo gikan sa mga butang nga naglibut kanako, ug ako natabunan sa usa ka langitnong panan-awon, ug nakakita og duha ka mahimayaon nga mga personahe, kinsa managsama gayud ang usag-usa sa hitsura ug pamayhon, giliyokan og sulaw nga kahayag nga milabaw sa adlaw sa kaudtohon. Sila misulti kanako nga ang tanan nga relihiyusong mga denominasyon nagtuo sa sayop nga mga doktrina, ug walay usa kanila nga giila sa Dios isip Iyang Simbahan ug gingharian; ug gimandoan ‘sa dili gayud pagpasakop kanila,’ sa samang panahon nagdawat og saad nga ang kahingpitan sa Ebanghelyo kinahanglan sa umaabot nga panahon ipahibalo ngari kanako.

Ang Basahon ni Mormon gisulat sa karaan diha sa bulawan nga mga palid ug gihatag ngadto ni Joseph Smith pinaagi sa usa ka balaang pinadala nga mensahero.

“Sa gabii sa ika-21 sa Septyembre, A.D. 1823, samtang ako nagampo ngadto sa Dios, ug naningkamot sa paggamit og hugot nga pagtuo diha sa bililhon nga mga saad sa Kasulatan, sa kalit lang usa ka hayag nga sama sa adlaw, nga walay labaw katin-aw ug labaw ka mahimayaon ang panagway ug kahayag, mitungha sa akong lawak; sa pagkatinuod sa unang pagtan-aw ingon nga ang balay nalukop sa makapaugdaw nga kalayo; ang pagpakita nakamugna og kakulba nga nakaapekto sa tibuok kalawasan; dayon usa ka personahe mibarug sa akong atubangan nga giliyokan sa himaya gani labaw pa kay sa niana nga nagliyok kanako. Kini nga mensahero mipaila sa iyang kaugalingon nga anghel sa Dios, gipaanhi aron sa pagdala sa malipayon nga mga balita nga ang pakigsaad nga gihimo sa Dios ngadto sa karaang Israel hapit na matuman, nga ang igpangandam nga buhat alang sa ikaduhang pag-anhi sa Mesiyas sugdan og dali, nga ang panahon hapit na moabut kay ang Ebanghelyo sa tanan niining kahingpitan isangyaw nga may gahum, ngadto sa tanang mga kanasuran nga ang katawhan unta maandam alang sa Milenyal nga paghari. Ako gipahibalo nga ako ang gipili nga mahimong instrumento diha sa mga kamot sa Dios sa pagpahinabo sa pipila sa Iyang mga katuyoan niining mahimayaon nga dispensasyon.

“Ako gipahibalo usab kalabut sa orihinal nga mga lumulupyo niini nga nasud ug gipakita kinsa sila, ug diin sila gikan; usa ka mubo nga asoy sa ilang gigikanan, pag-uswag, sibilisasyon, mga balaod, mga panggobyerno, sa ilang pagkamatarung ug pagkadautan, ug ang mga panalangin sa Dios nga sa katapusan gikuha gikan kanila isip usa ka katawhan, gipahibalo ngari kanako; ako usab gisultihan diin gitago ang pipila sa mga palid nga diha gisulat ang minubo nga mga rekord sa karaang mga Propeta nga nagpuyo dinhi niining dako nga yuta. Ang anghel mipakita kanako sa tulo ka mga higayon sa samang gabii ug mipahibalo kanako sa samang mga butang. Human makadawat og daghang pagbisita gikan sa mga anghel sa Dios nagpahibalo sa kahalangdon ug sa kahimaya sa mga panghitabo nga kinahanglang mahitabo sa katapusang mga adlaw, sa buntag sa ika-22 sa Septyembre, A.D. 1827, ang anghel sa Ginoo mitugyan sa mga rekord ngari sa akong mga kamot.

Kini nga mga rekord gikulit diha sa mga palid nga may panagway sa bulawan; kada palid unom ka mga pulgada ang gilapdon ug walo ka mga pulgada ang gitas-on, ug dili kaayo ingon ka baga sa ordinaryo nga lata. Puno sila sa mga kinulit, sa Ehiptohanong letra, ug gibugkos kini nga usa ka bolumin [volume] sama sa mga palid sa usa ka basahon, nga may tulo ka mga tuhogan sa tibuok bolumin. Ang bolumin mga unom ka pulgada ang gibagon, may bahin nga gi-seal. Ang mga letra sa wala i-seal nga bahin mga gagmay, ug nindot nga pagkakulit. Ang tibuok basahon nagpakita og daghan nga mga ebidensya sa pagkakaraan niini nga pagkahimo, ug maayong kahanas sa arte sa pagkulit. Uban sa mga rekord nakaplagan ang usa ka kahibulungan nga instrumento, nga gitawag sa karaan og ‘Urim ug Thummim’, nga naglangkob og duha kabuok sihag nga mga bato nga gipahimutang sa ngilit sa usa ka gapasan nga gitaod ngadto sa taming. Gigamit ang Urim ug Thummim gihubad nako ang rekord pinaagi sa gasa ug gahum sa Dios.

“… Kini nga basahon … nagsaysay kanato nga ang atong Manluluwas mihimo sa Iyang pagpakita dinhi niining dako nga yuta human sa Iyang pagkabanhaw; nga Iyang gitanom ang Ebanghelyo dinhi sa iyang tibuok kahingpitan, ug kabuhong, ug gahum, ug panalangin; nga sila adunay mga Apostoles, mga Propeta, mga Pastor, mga Magtutudlo, ug mga Ebanghelista, sa mao gihapon nga kapunongan, sa mao nga priesthood, sa mao nga mga ordinansa, mga gasa, mga gahum, ug mga panalangin, ingon nga napahimuslan sa dakong yuta sa silangan; nga ang mga tawo gisalikway agig sangputanan sa ilang mga kalapasan; nga ang katapusan sa ilang mga propeta kinsa nagpuyo uban kanila gimandoan sa pagsulat og minubo sa ilang mga panagna, kasaysayan, ubp., ug pagtago niini diha sa yuta, ug nga kini kinahanglan nga ipagula ug ihiusa sa Biblia alang sa katumanan sa mga katuyoan sa Dios sa katapusan nga mga adlaw. Alang sa dugang mga detalye sa asoy ako modangup sa Basahon ni Mormon, nga mapalit sa Nauvoo, o gikan ni bisan kinsa sa atong Tigpanaw nga mga Elder.

“Diha-diha dayon ang balita kalabut niini nga pagkakaplag nahibaloan, ang bakak nga mga report, pagtuis ug pagbutang-butang kusog nga mikaylap sa tanang dapit; ang balay kanunay nga gisamok sa mga panon nga manggugubot nga may dautang tuyo. Daghang higayon ako gipusil, ug halos gayud wala makaikyas, ug tanang paagi gihimo sa pagkuha sa mga palid gikan kanako; apan ang gahum ug panalangin sa Dios nagpanalipod kanako, ug daghan ang misugod sa pagtuo sa akong pagpamatuod.

Bisan og ang pagpanggukod mohasmag batok sa Simbahan, walay makahunong sa pag-uswag sa kamatuoran.

“Sa ika-6 sa Abril, 1830 ang ‘Simbahan ni Jesukristo sa mga Santos sa Ulahing mga Adlaw unang gitukod sa lungsod sa Fayette, lalawigan sa Seneca, estado sa New York. Pipila ka mga tawo gitawag ug gi-orden pinaagi sa Espiritu sa pagpadayag ug pagpanagna, ug misugod sa pagsangyaw samtang ang Espiritu namulong kanila, ug bisan huyang, sila gilig-on pinaagi sa gahum sa Dios, ug daghan ang nadala ngadto sa paghinulsol, gipaunlod sa tubig, ug napuno sa Espiritu Santo pinaagi sa pagpandong sa mga kamot. Sila nakakita og mga panan-awon ug nanagna, mga yawa gihinginlan, ug ang masakiton giayo pinaagi sa pagpandong sa mga kamot. Sukad niana nga panahon ang buhat miuswag sa kahibulungan nga kakusog, ug mga simbahan sa wala madugay gitukod sa mga estado sa New York, Pennsylvania, Ohio, Indiana, Illinois, ug Missouri; ang ulahing gihinganlan nga estado may igong gidaghanon sa pamuy-anan nga natukod sa lalawigan sa Jackson: daghan ang nagpasakop sa Simbahan ug kami dali nga midaghan; kami namalit og daghang yuta, ang among mga umahan daghan og abut, ug kalinaw ug kalipay gipahimuslan sa among mga banay, ug sa among tibuok kasilinganan; apan tungod kay dili kami makig-uban sa among mga silingan (kinsa, daghan kanila, salawayon nga mga tawo, ug milayas gikan sa pundok sa sibilisadong katilingban, ngadto sa utlanan sa nasud aron sa pag-eskapo sa hustisya,) diha sa ilang tibuok gabiing hudyaka, sa ilang paglapas sa Igpapahulay, karera sa kabayo ug pagsugal; sila nagsugod sa pagbiay-biay, dayon sa pagpanggukod, ug sa katapusan usa ka gitukod nga panon sa manggugubot nagtigum ug misunog sa among mga balay, mibutang og alkitran ug balhibo ug milatos sa daghan namong mga kaigsoonan, ug sa katapusan, supak sa balaod, hustisya ug pagkatawo, mipapahawa kanila gikan sa ilang mga gipuy-an; kinsa, wala nay panimalay ug walay balay naglibudlibod sa tugnaw ug mingaw nga mga yuta sa kasagbutan hangtud nga ang mga kabataan mibilin og mga agi sa ilang dugo diha sa yuta sa kasagbutan. Kini nahitabo niadtong bulan sa Nobyembre, ug wala silay lain nga salipud gawas sa atop sa langit, niining tingunos nga panahon sa tuig; kini nga panghitabo gibaliwala sa gobyerno, ug bisan tuod kami adunay dokumento sa kalig-unan sa among yuta, ug wala makalapas og balaod, kami wala makakuha og tabang.

“Dihay daghan nga masakiton, kinsa sa walay kalooy gipapahawa gikan sa ilang mga pinuy-anan, ug milahutay sa tanan niini nga pang-abuso ug sa pagpangita og kapuy-an kon asa man kini makaplagan. Ang resulta mao, nga daghan kaayo kanila ingon nga gihikawan sa mga kaharuhay sa kinabuhi, ug sa mga panginahanglanon aron mabuhi, nangamatay; daghan sa mga kabataan ang nailo, mga asawa [nahibilin nga] mga biyuda, ug mga bana, mga biyudo; ang among mga umahan giilog sa mga pundok sa manggugubot, daghang nga kaliboan nga baka, karnero, mga kabayo ug mga baboy gipanguha, ug ang among katigayunan sa panimalay, mga igbabaligya sa tindahan, ug imprentahan ug makinilya gibuak, o giguba.

“Kadaghanan sa among kaigsoonan mibalhin ngadto sa lalawigan sa Clay, diin sila milungtad hangtud sa 1836, tulo ka mga tuig; walay kapintas nga gihimo, apan dihay mga pagpanghulga sa kapintas. Apan sa ting-init sa 1836 kini nga mga pagpanghulga misugod sa paghimo og labaw ka grabe nga matang, gikan sa mga panghulga, pang-publiko nga mga miting gihimo, mga resolusyon gipasaka, panimalos ug pangguba gibahad, ug ang mga kalihokan nagsagubang na usab og makahahadlok nga kahimtang. Ang lalawigan sa Jackson igo na nga nag-unang panig-ingnan, ug ingon nga ang mga awtoridad niana nga lalawigan wala mangilabut, sila [ang mga awtoridad sa lalawigan sa Clay] nanghambog nga sila dili mobuhat niini; diin human sa paghangyo og proteksyon ngadto sa mga awtoridad among nahibaloan ang tinuod, ug human sa daghang kadaot ug pagkawagtang sa kabtangan, kami gipapahawa na usab gikan sa among mga panimalay.

“Dayon mipuyo kami sa mga lungsod sa Caldwell ug Davies, diin kami naghimo og dako ug lapad nga mga pamuy-anan, naghunahuna sa paglingkawas sa among mga kaugalingon gikan sa gahum sa pagpanglupig pinaagi sa pagpuyo diha sa bag-ong mga lalawigan, nga adunay gamay lamang kaayo nga lumulupyo niini; apan dinhi kami wala tugoti sa pagpuyo sa kalinaw, apan niadtong 1838 kami giatake na usab sa mga manggugubot, usa ka sugo sa paglaglag gipagula ni Gobernador Boggs, ug ubos sa pagtugot sa balaod, pinundok nga mga tulisan mikaylap sa tibuok nasud, mikawat sa among mga baka, mga karnero, mga baboy, ubp., daghan sa among mga katawhan walay kalooy nga gipamatay, ang kaputli sa among mga kababayen-an gipanamastamasan, ug kami gipugos sa pagpirma og dokumento nga naghatag sa among kabtangan ubos sa tumoy sa espada; ug human makalahutay sa matag pakaulaw nga mahimong gitipun-og ngari kanamo pinaagi sa walay tawhanong kalooy, dili maka-diosnong panon sa mga tulisan, ang gikan sa dose ngadto sa kinse ka libong mga tawo, mga lalaki, mga babaye,ug mga kabataan gipapahawa gikan sa ilang kaugalingon nga mga panimalay, ug gikan sa mga yuta diin sila adunay dokumento sa kalig-unan, wala nay mga balay, wala nay mga higala, ug wala nay panimalay (ubos sa grabeng tingtugnaw) sa paglibud-libod ingon og mga hininginlan sa yuta, o sa pagpangita og dangpanan nga mas mabination ang kahimtang, ug uban sa dili kaayo bangis nga mga tawo. Daghan ang nangasakit ug nangamatay agi og sangputanan sa katugnaw ug mga kalisud nga ilang giantus; daghang mga asawa nga nabiyuda, ug mga kabataan [nabiyaan nga] mga na-ilo, ug kabus. Mokabat pa og daghang panahon kay sa gihatag kanako dinhi ang paghulagway sa pagkawalay hustisya, sa mga kasaypanan, sa mga pagpamatay sa pagpaagas sa dugo, sa pagpangawat, pagkamakalolooy ug pagkaalaut nga nahimo tungod sa kahayopan, walay kalooy, ug walay balaod nga mga pamaagi sa estado sa Missouri.

“Sa sitwasyon nga gipasabut kaganiha, kami miabut sa estado sa Illinois pagka 1839, diin kami nakakita og maabi-abihon nga mga tawo ug mahigalaon nga panimalay: mga tawo kinsa andam nga pangulohan pinaagi sa mga baruganan sa balaod ug pagkamakatawhanon. Nagsugod kami sa pagtukod og usa ka siyudad nga gitawag og ‘Nauvoo,’ sa lalawigan sa Hancock. Kami may gidaghanon gikan sa unom ngadto sa walo ka libo dinhi, walay labot sa daghan kaayo nga naglibut sa lalawigan, ug hapit sa tanang mga lalawigan sa estado. Kami adunay lagda sa katukuran nga gihatag kanamo, ug lagda sa katukuran alang sa Legion [pundok militar], ang kasundalohan nga sa karon may gidaghanon nga 1,500. Kami usab adunay lagda sa katukuran alang sa usa ka Unibersidad, alang sa Kapunongan sa Agrikultura ug Pabrika, adunay among kaugalingon nga mga balaod ug mga tigdumala, ug aduna sa tanan nga mga pribiliheyo nga ang uban nga adunay kagawasan ug nalamdagan nga mga lumulupyo nagpahimulos.

“Ang pagpanggukod wala makapahunong sa pag-uswag sa kamatuoran apan nakadugang hinoon sa kalig-on, nga gipakaylap uban sa nagtubo nga kakusog. Mapasigarbuhon sa kalihokan nga ilang gidapigan, ug nasayud sa among pagka-inosente, ug sa kamatuoran sa ilang sistema sa relihiyon, taliwala sa pagbutangbutang ug pagsaway, nakapahimo sa mga Elder niining Simbahan sa pag-adto, ug sa pag-establisar sa Ebanghelyo diha sa hapit tanan nga estado sa America; kini nakasulod sa among mga siyudad, kini nakakaylap sa among tibuok nga mga balangay, ug nakahimo sa mga liboan sa among utokan, dungganon, ug patriotikong tagilungsod sa pagsunod sa iyang balaang mga mando, ug pagadumalahon pinaagi sa iyang sagradong mga kamatuoran. Kini usab mikaylap ngadto sa England, Ireland, Scotland, ug Wales, diin, sa tuig 1840, pipila sa atong mga misyonaryo gipadala, ug labaw sa lima ka libo mipasakop sa Sumbanan sa Kamatuoran; adunay daghang mga tawo karon nga nagpasakop sa matag dapit.

“Ang atong mga misyonaryo nangadto sa nagkalain-laing mga nasud, ug sa Germany, Palestine, New Holland [Australia], sa East Indies, ug sa uban nga mga lugar, ang Sumbanan sa Kamatuoran natukod; walay dili balaan nga kamot ang makapugong sa buhat sa paglambo; mga panggukod mahimong magkakusog, ang mga manggugubot mahimong maghiusa, mga kasundaluhan magpundok, mga pasangil mahimong modaot sa kadungganan, apan ang kamatuoran sa Dios magpadayon nga maisugon, halangdon ug gawasnon, hangtud nga kini makasulod sa matag yuta, makabisita sa matag dapit, molukop sa matag nasud, ug makasulti sa matag dunggan, hangtud ang mga katuyoan sa Dios matuman, ug ang Halangdong Jehova moingon nga ang buhat nahuman na.

Ang mga Artikulo sa Hugot nga Pagtuo naghulagway sa sukaranang mga doktrina ug mga baruganan sa atong relihiyon.

“Kami nagtuo sa Dios, ang Amahan sa Kahangturan, ug sa Iyang Anak, si Jesukristo, ug sa Espiritu Santo.

“Kami nagtuo nga ang mga tawo pagasilotan sa ilang kaugalingon nga mga sala, ug dili tungod sa mga kalapasan ni Adan.

“Kami nagtuo nga pinaagi sa pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod ug ordinansa sa Ebanghelyo.

“Kami nagtuo nga ang unang mga baruganan ug mga ordinansa sa Ebanghelyo mao ang: una, Hugot nga pagtuo diha sa Ginoong Jesukristo; ikaduha, Paghinulsol; ikatulo, Bunyag pinaagi sa pagpaunlod alang sa kapasayloan sa mga sala; ikaupat, Pagpandong sa mga kamot alang sa mga gasa sa Espiritu Santo.

“Kami nagtuo nga ang usa ka tawo kinahanglan gayud pagatawgon sa Dios, pinaagi sa pagpanagna, ug pinaagi sa pagpandong sa mga kamot niadto kinsa adunay pagtugot sa pagsangyaw sa Ebanghelyo ug sa pagpangalagad sa mga ordinansa niini.

“Kami nagtuo sa sama nga kapunongan nga diha sa karaan nga Simbahan, sa ato pa, ang mga apostoles, mga propeta, mga pastor, mga magtutudlo, mga ebanghelista, ug uban pa.

“Kami nagtuo sa gasa sa mga pinulongan, pagpanagna, pagpadayag, mga panan-awon, pagpang-ayo, pagpanghubad sa mga pinulongan, ug uban pa.

“Kami nagtuo sa Biblia nga pulong sa Dios kon kini tukma nga pagkahubad; kami nagtuo usab sa Basahon ni Mormon nga pulong sa Dios.

“Kami nagtuo sa tanan nga gipadayag sa Dios, sa tanan nga gipadayag niya karon, ug kami nagtuo nga siya mopadayag pa og daghan nga dagko ug mahinungdanon nga mga butang kalabut sa Gingharian sa Dios.

“Kami nagtuo sa tinuod nga panagtigum sa Israel ug sa pagpahiuli sa Napulo ka mga Tribo; nga ang Zion (ang Bag-ong Jerusalem) pagatukuron diha sa kayutaan sa America; nga si Kristo mohari dinhi sa yuta; ug, nga ang yuta pagabag-ohon ug makadawat sa iyang paraisohanon nga himaya.

“Kami nag-angkon sa kahigayunan sa pagsimba sa Dios nga Makagagahum sumala sa pagmando sa among kaugalingon nga tanlag, ug nagtugot sa tanan nga mga tawo sa sama nga kahigayunan, sa pagpasimba kanila sa bisan unsa nga paagi, asa, o unsa ang ilang buot simbahon.

“Kami nagtuo sa kamandoan ubos sa mga hari, presidente, mga magmamando, ug sa mga maghuhukom, sa pagsunod; pagtahod; ug sa paghupot sa balaod.

“Kami nagtuo sa pagkamatinuoron, pagkamatinud-anon, pagkaputli, pagkamanggiloy-on, mahiyason ug sa pagbuhat sa matarung ngadto sa tanan nga mga tawo; sa pagkatinuod, kami mahimo nga moingon nga kami nagsunod sa tambag ni Pablo—Kami nagtuo sa tanan nga mga butang, kami naglaum sa tanan nga mga butang, kami nakalahutay sa daghan nga mga butang, ug naglaum nga makalahutay sa tanan nga mga butang. Kon adunay mga butang nga mahiyason, matahum, o maayo og dungog o dalaygon, kami naninguha sa pagpangita niining mga butanga. [Tan-awa sa Mga Artikulo sa Hugot nga Pagtuo 1:1–13].

“Matinahuron, ug uban pa,

“JOSEPH SMITH.”

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Si Joseph Smith misulat sa Wentworth Letter agi og tubag sa usa ka hangyo gikan ni John Wentworth ug George Barstow (pahina 529). Kanus-a mo napangutana sa mga tawo kalabut sa kasaysayan o mga tinuohan sa Simbahan? Samtang kamo magtuon o maghisgot niini nga hugna, paghunahuna mahitungod sa paagi nga mahimo nimong tubagon ang maong mga pangutana sa umaabot. Unsa ang atong makat-onan sa mga pulong ni Joseph Smith diha sa Wentworth Letter mahitungod sa paagi sa pagtubag sa mao nga mga pangutana?
Basaha unsa ang gisulti sa Propeta mahitungod sa iyang Unang Panan-awon pahina 530. Sa sunod panahon nga kamo mosulti ngadto sa usa ka tawo mahitungod sa Unang Pananawon, unsaon ninyo sa pagtabang, nga kanang tawhana makasabut sa Unang Panan-awon ug unsa ang kahulugan niini nganha kaninyo?
Basaha ang paghulagway sa Propeta mahitungod sa pagtungha sa Basahon ni Mormon mga pahina 531–33. Unsay kalainan nga nahimo sa Basahon ni Mormon sa inyong kinabuhi? Unsa ang pipila sa mga paagi nga kita makapaambit sa atong mga pagpamatuod kalabut sa Basahon ni Mormon?
Sa mga pahina 533–38, si Joseph Smith naghatag og mubo nga kasaysayan kalabut sa mga sinugdanan sa Simbahan ug dayon nagpamatuod sa padulngan sa Simbahan. Unsa ang inyong mga gibati samtang kamo nagtuon sa ikaduhang tibuok paragrap sa pahina 538? Sa inyong hunahuna ngano nga ang mga panggukod wala makahimo sa paghunong sa pag-uswag sa Simbahan? Unsa ang pipila ka mga ehemplo sa pag-uswag sa tawo bisan pa sa mga oposisyon? (Hunahunaa ang mga ehemplo gikan sa mga kasulatan, kasaysayan sa Simbahan, ug sa imong kaugalingong kinabuhi.)
Ribyuha ang mga Artikulo sa Hugot nga Pagtuo sa mga pahina 538–40. Sa unsa nga paagi ang mga Artikulo sa Hugot nga Pagtuo nakatabang kanimo? Sa imong hunauna ngano nga hangyoon man nato ang mga bata sa Primary sa pagmemorya niini? Hunahunaa ang paghimo og eskedyul aron kamo makatuon o makamemorya sa mga Artikulo sa Hugot nga Pagtuo.

May Kalabutan nga mga Kasulatan: Joseph Smith—Kasaysayan 1:1–75

Prophet Joseph writing — “Sa hangyo ni G. John Wentworth,… ako nakasulat sa mosunod nga mubong pagpasabut kabahin sa pagsaka, pag-uswag, pagpanggukod, ug hugot nga pagtuo sa mga Santos sa Ulahing mga Adlaw, diin ako nakabaton og dungog, ubos sa Dios, ingon nga tigtukod.”

Joseph receiving gold plates — “Sa buntag sa ika-22 sa Septyembre, A.D. 1827, ang anghel sa Ginoo mitugyan sa mga rekord ngari sa akong mga kamot.”