O Iesu Keriso, o le Faaola Paia o le Lalolagi

“E le mafai ona oo mai le Faaolataga i le lalolagi e aunoa ma le puluvaga o Iesu Keriso”

Mai le Soifuaga o Iesu Keriso

I tausaga a o lei fanau mai Iosefa Samita, na uunaia lagona o le tama o lona tama faapea e i ai se mea o le a tupu i lona aiga “o le a suia ai le lalolagi”¹ O loo faapea mai le talaaga o Iosefa Samita: “O lo’u tama matua, o Asaeli Samita, ua leva lava ona ia vavalo o le a i ai se perofeta e faatuina mai i lona aiga, ma na atoatoa ona faamalieina lo’u tina matua o lea na faataunuuina ia te a’u. Na maliu lo’u tama matua o Asaeli i East Stockholm, itumalo o St. Lawrence, Niu Ioka, ina ua maea ona ia mauaina le Tusi a Mamona, ma toeitiiti lava a maea ona ia faitauina; ma na ia folafola mai o a’u lava le Perofeta ua leva ona ia iloaina o le a sau mai lona aiga.”²

I le avea ai ma Perofeta o le Toefuataiga, o se tasi o matafaioi sili ona taua a Iosefa Samita o le molimau ia Iesu Keriso. Na faamanuiaina o ia e fiafia i le malamalama o ia lava i le tulaga Atua o Iesu Keriso ma malamalama i Lana matafaioi o le Faaola o le lalolagi. O lenei malamalama na amata mai le Uluai Faaaliga, lea na vaai ai le taulealea o Iosefa i le Tama Faalelagi ma Iesu Keriso ma faalogo ai i le Tama o folafola mai, “O Lo’u Atalii Pele lenei. Faalogo ia te Ia!” (Iosefa Samita 2:17). O lenei aafiaga paia, na faamanuiaina ai Iosefa e maua ni faatonuga mai le Faaola o le lalolagi.

Toeitiiti atoa le sefululua tausaga mulimuli ane, i le aso 16 o Fepuari, 1832, na faaliliuina ai e le Perofeta le Tusi Paia, faatasi ai ma Sidney Rigdon o lana failautusi, i le fale o John Johnson i Hiram, Ohio. Ina ua mavae le faaliliuma e le Perofeta o le Ioane 5:29, lea e faamatala mai ai le toetutu o e amiolelei ma e amioleaga, na tatala mai se faaaliga ia Iosefa ma Sidney, ma sa vaai ai i laua ma talanoa ma le Faaola:

“O le mana o le Agaga na tatalaina ai o ma’ua mata ma ua faapupulaina ai lo ma’ua malamalamaaga, ina ia iloa ma malamalama ai i mea a le Atua—o mea lava e mai le amataga a o lei i ai le lalolagi, ua faauuina e le Tama i Lona Alo na Fanaua e Toatasi, o le sa i ai i le fatafata o le Tama, e mai le amataga lava; o le ma te molimau i ai, o le tala foi ma te molimau atu ai nei, o le atoatoaga lea o le tala lelei a Iesu Keriso, o le Alo, o le na ma vaaia ma matou fetautalatala’i i le faaaliga vaaia mai le lagi. …

“Na ma vaai i le mamalu o le Alo, i le itu taumatau o le Tama, ma maua lona atoatoa; na ma vaaia foi agelu paia, ma e ua faapaiaina i luma o lona nofoalii, o loo tapuai atu i le Atua, ma le Tamai Mamoe, o e tapuai ia te ia e faavavau, faavavau lava.

“O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te ia: O loo soifua o ia!

“Aua na ma vaaia o ia, i le itu taumatau lava o le Atua; na ma faalogoina foi le siufofoga o molimau mai o ia lava lea o le Toatasi na Fanaua e le Tama—e mai ia te ia, ma ui mai ia te ia, ma o ia, na foafoaina ai lalolagi uma, o e nonofo ai foi o atalii ma afafine na fanaua e le Atua” (MFF 76:12–14, 20–24).

Na toe vaai foi Iosefa Samita i le Faaola i le aso 3 o Aperila, 1836. Na tuumuli atu le Perofeta ma Oliva Kaotui i le pulelaa i sisifo o le Malumalu i Katelani. Na punonou i laua i le tatalo faatauanau ma le le leoa, ma mulimuli ane afio mai le Faaola ia te i laua. Na tautino mai e le Perofeta:

“Na aveeseina le ie puipui mai o ma’ua mafaufau, ma vaaiga o o ma’ua malamalama ua faaavanoaina. Ua ma vaaia le Alii o lo o tu mai i luga o le si’o o le pulelaa, i o ma’ua luma; o lalo ifo foi o ona aao ua i ai se galuega teuteuina o le auro lelei, ua lanu faapei e mumu sesega. O ona fofoga e pei o le afi mumu; o lauao o lona ao e sinasina e pei o le kiona mama; a e sili le pupula o ona fofoga i lo le pupula o le la; ma o lona si’ufofoga e pei o le taalili o vai tetele, o le si’ufofoga lava o Ieova, ua fa’apea mai: O a’u le muamua ma le mulimuli; o a’u o le o lo o ola, o a’u o le na fasiotia; o a’u o lo outou fautua i le Tama.” (MFF 110:1–4).

Mai nei ituaiga o aafiaga, na maua ai e le Perofeta le malamalama tuusa’o ma avea ai ma molimau faapitoa o le tulaga Atua o le Faaola.

Aoaoga a Iosefa Samita

I augatupulaga uma, ua faalagolago lava le nuu o le Atua i le Togiola a Keriso mo le faamagaloina o a latou agasala.

“E le mafai ona oo mai le Faaolataga i le lalolagi e aunoa ma le puluvaga o Iesu Keriso.”³

“Na saunia e le Atua se taulaga i le meaalofa o Lona lava Alo, o le e tatau ona auina mai i le taimi atofaina e saunia le ala, pe tatala se faitotoa e ulufale atu ai le tagata i le afioaga o le Alii, lea na tulia mai ai o ia ona o le le usiusitai. Mai lea taimi i lea taimi na faaleoina nei talalelei i taliga o tagata i tupuaga eseese o le lalolagi e oo mai lava i le taimi o le afio mai o le Mesia.

“E ala i le faatuatua i lenei togiola po o le ata o le faaolataga, na osia ai e Apelu i le Atua se taulaga lea na taliaina, o le faapolopolo o le lafu. Na osia e Kaino fua o le laueleele, ma e lei taliaina, aua e le i mafai ona ia faia i le faatuatua; e le i mafai ona i ai sona faatuatua, pe e le mafai foi ona faatinoina le faatuatua e feteenai ma le foafoaga a le lagi. E tatau lava ona faamaligiina le toto o le Alo Pele e Toatasi e togiola ai le tagata, aua o le ata lea o le faaolataga, ma a leai le faamaligiina o le toto e leai foi se faamagaloga. Ma e pei ona faatulagaina le taulaga mo se faatusa e mafai ai e le tagata ona iloatino le Taulaga silisili na saunia e le Atua, o le osi ai o se taulaga e feteenai ma lena, e leai se faatuatua e mafai ona faaaogaina, aua o le faaolataga e le’i faatauina mai i lena auala, pe na faatulagaina foi le mana o le togiola e mulimuli i lena faatulagaga; o le iuga e le i mafai e Kaino ona i ai se faatuatua; ma soo se mea lava e le ala i le faatuatua, o le agasala lea. Ae na osia e Apelu se taulaga tatau, lea na auala mai ai le mauaina o molimau o ia e amiotonu, o le Atua Lava Ia e molimau mai i ana meaalofa [tagai Eperu 11:4].

“E moni lava, o le faamaligiina o le toto o se manu e le mafai ona aoga i le tagata, vagana ai na fai i le faataitai, po o se faatusa po o se faamatalaga e tatau ona osia e ala i le meaalofa o le Atua Lava Ia—ma o lenei gaoioiga e faia ma le faamoemoe i le mea e tasi i le faatuatua i le mana o lena Taulaga silisili mo le faamagaloina o agasala. …

“… E le mafai ona tatou talitonu o toeaina o tupuaga uma na latou nofo pogisa i le faatulagaga o le lagi e pei ona manatu i ai le toatele, talu ai o i latou uma lava na faaolaina, na faaolaina e ala i le mana o lenei ata o le faaolataga silisili, e pei lava ona i ai muamua a o lei afio mai Keriso ma talu mai lava le afio mai o Keriso; ana leai, ua i ai fuafuaga eseese a le Atua, o le faagaoioiina (pe a mafai ona faaupuina faapena), e toe aumaia ai tagata e nonofo faatasi ma Ia. Ma e le mafai ona tatou talitonuina, talu ai e leai se suiga i le natura o le tagata talu ona ia pa’ū; ma o le sauniga po o le faatulagaga o le osia o le taulaga i le toto na mamanuina ina ia faatinoina seia oo ina ofoina atu Keriso ma faamaligi ai Lona toto—e pei ona ta’ua muamua—ina ia mafai e le tagata ona vaai i luma ma le faatuatua i lena taimi. …

“O le tulaga o le osia o feagaiga sa na ona faavaai ai i luma le mafaufau ia Keriso, tatou te toina mai nei fetalaiga ofoofogia a Iesu i Sa Iutaia: ‘O Aperaamo lo outou Tama, na matua fiafia o ia ina ua iloa e ia lo’u nei aso, na ia iloa foi, ma olioli ai [Ioane 8:56]. O le mea lea, talu ai sa osia taulaga a toeaina e le i faalavelavea lo latou faalogo ai i le Talalelei; ae sa auauna, e pei ona tatou fai atu muamua, e tatala ai o latou mata, ma mafai ai e i latou ona taulai i luma i le taimi o le afio mai o le Faaola, ma olioli i Lana togiola. … Tatou te faaiu ai o le a lava le taimi e faaali ma ai Ia lava i tagata i na aso anamua, ma poloaiina i latou e osi taulaga ia te Ia, ma ina ia mafai ai ona taulai i luma i le faatuatua e oo i le taimi o Lona afio mai, ae faamoemoe i le mana o lena togiola mo le faamagaloina o a latou agasala. Ma o le mea lenei ua latou faia, le afe ma afe o e na muamua ia i tatou, o o latou laei e mama atoatoa, ma o e, e pei o Iopu, o loo faatali mo se faamaoniga e pei o lana, o le a latou iloa atu o Ia i aso amuli i le lalolagi, e oo lava i o latou tino [tagai Iopu 19:25–26].

“E mafai ona tatou faaiu faapea e ui lava na i ai augatupulaga eseese, ae o mea uma lava na faafesootaia e le Atua i Lona nuu, na fuafuaina e tata’i atu ai o latou mafaufau i le faamoemoega sili, ma aoao i latou e faalagolago tau lava o le Atua o ia o le tupuga o lo latou faaolataga, e pei ona aofia i Lana tulafono.”⁴

Ona ua toetu mai Iesu Keriso mai le oti, o le a toetutu tagata uma.

“O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai. Ae i le fesootaiga ma nei mataupu faavae, matou te talitonu i le mea foaifua a le Agaga Paia, le mana o le faatuatua, le talisapaia o mea foaifua faaleagaga e tusa ai ma le finagalo o le Atua, le toefuataiina o le nuu o Isaraelu, ma le manumalo faaiu o le upumoni.”⁵

“ ‘Aua faapei ona oti uma ia Atamu, e faapea foi ona faaolaina uma ia Keriso;’ e toetutu uma lava mai le oti [1 Korinito 15:22]. Ua aumaia e le Tamai Mamoe a le Atua le toetutu, ina ia toetutu uma lava mai le oti.”⁶

“Ua tofia e le Atua se aso o le a Ia faamasinoina ai le lalolagi, ma o lea ua Ia faamautinoa mai i le faatuina mai o Lona Alo o Iesu Keriso mai le oti—le faatumutumuga lea ua faavae ai le faamoemoe o i latou uma o e talitonu i tusitusiga musuia mo lo latou fiafia ma le faafiafiaina i le lumanai; aua, ‘Afai foi ua le toe faatuina Keriso,’ na faapea ai Paulo i Korinito, ‘ua faaleaoga lo outou faatuatua; ua nofo sala pea outou; i le ma lea foi, ua fano e ua momoe ia Keriso’ [1 Korinito 15:17–18]. …

“Ua moni lava ua toetu Keriso lava Ia mai le oti; ma afai ua toetu o Ia mai le oti, o le a Ia, i Lona mana, aumaia tagata uma e tutu i Ona luma: aua afai ua Ia toetu mai le oti, ua motusia noataga le tumau o le oti ma e leai se manumalo o le tuugamau. Afai la, e leai se manumalo o le tuugamau, o i latou o e tausia afioga a Iesu ma usitai i Ana aoaoga ua le gata ina ia i latou le folafolaga o se toetutu mai le oti, ae faapena foi ona faamaonia lo latou ulufale atu i Lona malo mamalu; aua o Ia lava na fetalai mai, ‘O le mea ou te i ai a’u, e i ai foi la’u auauna’ [Ioane 12:26].”⁷

“O i latou o e ua oti ia Iesu Keriso e mafai ona faamoemoe e ulufale atu i na fua o le olioli pe a latou toe tu mai, o lea na latou umia pe faatalitali i ai iinei. … Ou te fiafia ua ou maua le avanoa e faamatala atu ai ia te outou nisi o mea, afai e malamalama lelei i ai, o le a fesoasoani ia te outou pe a lulu mafuie, faapotopoto ao, emo mai uila, ma sauni afa e agi mai i outou luga e pei o le gogolo o faititili. Taofi mau i nei mea ae aua le gatete o outou tulivae po o sooga, pe faavaivai o outou loto; o a la mea e mafai ona fai e mafuie, taua ma asiosio? E leai se mea. O a outou mea uma e leiloloa o le a toe faatutumu atu ia te outou i le toetu, pe afai tou te tutumau i le faamaoni. E ala i le faaaliga a le Silisili Ese ua ou vaai i ai. …

“Na faaali mai e le Atua Lona Alo mai le lagi faapea foi ma le aoaoga faavae o le toetu; ma ua i ai so tatou malamalama e faapea o i latou ua lagomau iinei o le a toefaatuina e le Atua, ua faaofuina ma faaolaina e le Agaga o le Atua silisili; ma o le a le afaina pe tatou te faataooto latou i lalo, pe tatou te taooto faatasi ma i latou, pe a fai ua le toe mafai ona tatou tausia i latou? Ia faagoto ifo i o tatou loto nei upu moni, ina ia mafai ona amata atu lava iinei ona tatou fiafia na o mea o le a atoatoa i le lumanai”⁸

E ala i le Togiola a Keriso ma le usiusitai i le talalelei, e mafai ai ona avea i tatou ma suli faatasi ma Iesu Keriso.

“Ou te talitonu i le Tulaga Atua o Iesu Keriso, ma na Ia maliu mo agasala a tagata uma, ia na pauu ia Atamu.”⁹

Mataupu Faavae o le Faatuatua 1:3: “Matou te talitonu e faaolaina tagata uma lava i le Togiola a Keriso pe a tausia poloaiga ma sauniga o le Talalelei.”¹⁰

“Ina ua maea ona foafoaina e le Atua le lagi ma le lalolagi, na ia afio mai ma i le aso ono na fetalai mai, “Ina tatou faia ia le tagata i lo tatou faatusa.” I le faatusa o ai? I le faatusa o Atua na fausia ai i latou, tane ma le fafine, e mama, agamalu, ma e le pona, tauaveina uiga tutusa ma foliga tutusa ma Atua [tagai i le Kenese 1:26–27]. Ma ina ua pau le tagata e lei aveesea lona faatusa, ae na faatumauina i ona uiga le faatusa o Le na faia o ia. O Keriso, o lē o le faatusa o le tagata ma e matua tusa lava ma le peresona o lona Tama [tagai i le Eperu 1:3]. … E ala i le togiola a Keriso ma le toetu, ma le usiusitai i le talalelei, o le a tatou toe foliga ai foi i le faatusa o lona Alo, o Iesu Keriso [Roma 8:29]; ona tatou maua ai lea o lona faatusa, mamalu, ma uiga o le Atua.”¹¹

“Ua [saunia] e le Tama o o tatou agaga se taulaga mo Ona tagata, se ala sili o le togiola, se mana o le togiola, o se ata o le faaolataga, ma avea ma ona faamoemoega taua, le toe aumai o tagata e nonofo faatasi ma le Tupu o le lagi, ma faapaleina i latou i le mamalu selesitila, ma avea i latou ma suli faatasi ma le Alo i lena tofi e le oti, e le faaleagaina, ma e le mou ese lava.”¹²

“Ua faapea mai tusitusiga paia o i latou o e o le a usitai i poloaiga o le a avea ma suli o le Atua ma suli faatasi ma Iesu Keriso. … ‘O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Iesu Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.’ [Tagai i le Roma 8:16–17.]”¹³

“O se faamafanafanaga sili lea i e faanoanoa pe a valaauina e tetea ma se tane, ava, tama, tina, fanau, po o se aiga pele, i le iloa lea, e ui lava ina ua tuua le tino faaletino ma ua nofo eseese, ae o le a toe tutu mai i latou ma mau i le malamalama e faavavau i le mamalu e le mavae, e le toe i ai le faanoanoa, ma le tiga, e le toe i ai foi le oti, ae o le a avea i latou ma suli o le Atua ma suli faatasi ma Keriso.”¹⁴

O Iesu Keriso e atoatoa, mama, ma paia, ma ua Ia valaau mai ia i tatou ia tatou pei o Ia.

“O ai, i le Au Paia uma lava i nei toe aso, e mafai ona manatu ia te ia lava e lelei e pei o lo tatou Alii? O ai se ua atoatoa faapena? O ai se ua mama atoatoa? O ai se e paia e pei o Ia? Faamata ea e maua i latou? Na te lei agasala lava pe solia se poloaiga po o se tulafono o le lagi—e lei i ai foi se taufaasese i Lona fofoga, e lei i ai foi se poto leaga i Lona loto. … O fea o i ai se tasi e lei o Keriso? E le mafai ona maua o ia i le lalolagi.”¹⁵

“Aua ua faatoilaloina mea uma na faia i le iu vale, (e le o lona loto lea, a e peitai ona o ia na na faatoilaloina ai ma le faamoemoe [Roma 8:20]—e faatoilaloina tagata uma i le iu vale a o ui i ala piopio ma faigata o loo siomia i tatou. O fea le tagata o loo saoloto mai mea le aoga o le lalolagi? E leai lava se tasi na atoatoa vagana Iesu; ae aisea na Ia atoatoa ai? Aua o Ia o le Alo o le Atua, ma na i ai le atoatoa o le Agaga, faapea ma le mana sili atu nai lo le tagata.”¹⁶

“A o laitiiti lava o ia [Iesu Keriso] sa ia te ia le poto atoatoa e mafai ai ona ia pulea ma vaaia le malo o tagata o Iutaia, ma mafai ai ona feutagai ma tagata popoto ma aoao sili lo latou tomai i le tulafono ma mea faalelagi, ma avea ai o latou malamalama ma galuega e foliga e leai se taua e fuafua i le poto o lo o ia te Ia.”¹⁷

“O poloaiga a le Alii, matou te faamoemoe o loo [outou] mafaufau loloto i ai i o outou loto, ma aoaoina ai outou, e le gata i Lona finagalo i le folafola atu o Lana Talalelei, ae o Lona agamalu ma ona ala atoatoa i luma o tagata uma, e oo lava i taimi o puapuaga ma sauaga sili ona matautia ia na faaoo atu i ona luga e se tupulaga leaga ma le mulilulua. Ia manatua, uso e, ua Ia valaauina outou ina ia faapaiaina; ma e tau faapea atu ea, ia pei o Ia i le mama a’ia’i? E maeu le poto, e maeu le paia; e maeu le mama, e maeu le atoatoa, o lona uiga e tatau ona taitaia outou lava i Ona luma; ma manatua, foi, o Ona fofoga o loo i luga pea o outou. ”¹⁸

“A tatou tomanatu i le paia ma tulaga atoatoa o lo tatou Matai sili, o le ua tatalaina se ala e mafai ai ona tatou o mai ia te ia, e oo lava i le ositaulaga o ia lava, e liu suavai ai o tatou loto i totonu ia i tatou ona o lona faamaualalo. Ma a tatou toe tomanatu foi, o lea ua ia valaauina i tatou ina ia atoatoa i mea uma, ina ia saunia i tatou e feiloai ma ia i le filemu pe a ia afio mai i lona mamalu faatasi ma agelu paia uma, tatou te lagona le tatau ona apoapoai ma le malosi i o tatou uso, ina ia faamaualalo ma tatalo, ia savavali mautinoa ai o le fanau o le malamalama ma le ao, ina ia i ai le alofa tunoa e tetee ai i faaosoosoga uma, ma faafoia ai mea leaga uma i le suafa mamalu o lo tatou Alii o Iesu Keriso. Aua, ia mautinoa, uso e, ua lata mai le aso o le a tulai ai le Matai o le fale ma tapuni le faitotoa, ma e leai lava se tasi ua na o i latou ua i ai se ofu o le tausamaaga o le a faatagaina e faafiafiaina i se nofoaga i le tausamaaga o le faaipoipoga! [Tagai i le Matai 22:1–14]”¹⁹

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau vii–xii.

Toe iloilo tala i faaaliga o le Faaola ia Iosefa Samita (itulau 45–51). O a ou mafaufauga ma lagona a o e mafaufau loloto i nei aafiaga?
O aso anamua, na fesoasoani osigataulaga i manu i le nuu o le Alii “e tatala ai o latou mata, ma mafai ai e i latou ona taulai i luma i le taimi o le afio mai o le Faaola, ma olioli i Lana togiola.” (itulau 52 O a nisi o mea e fesoasoani ia te oe e tulimatai ai i le Faaola i le aso?
Faitau le parakalafa o loo amata i le pito i lalo o le itulau 53. Matau ane mai i lenei faamatalaga, o se faaopoopoga fesoasoani o se mea lea e fesootai ma se isi mea e sili atu lona taua, e pei o se lala e pipii i le tino o se laau. Aisea e te manatu ai o molimau a aposetolo ma perofeta e uiga i le Togiola ma le Toetu o le Faaola o “mataupu faavae autu ia o la tatou lotu”? Faamata e faapefea ona e faatinoina lau auaunaga i lou aiga ma le Ekalesia pe a fai e te manatua o isi mea uma lava o faaopoopoga fesoasoani ia i nei mataupu faavae?
Toe iloilo aoaoga a le Perofeta o Iosefa e uiga i le toetu (itulau 53–56. O le a se faamafanafanaga e te maua mai lou iloaina “o a outou mea uma e leiloloa o le a toe faatutumu atu ia te outou i le toetu, pe a fai tou te tumau i le faamaoni”? O a ni auala e mafai ai e se malamalamaaga o le toetu ona fesoasoani ia i tatou “ina ia mafai ai ona amata atu lava iinei ona tatou talisapaiaina na mea o le a atoatoa i le lumanai”?
A o e iloiloina le itulau 54–55, mafaufau loloto i le mea na faia e le Faaola ina ia mafai ai ona avea i tatou ma suli faatasi ma Ia. Mafaufau i auala e mafai ona e faaali atu ai ia te Ia lou agaga faafetai mo Lana taulaga togiola.
I itulau 56–57, o loo taua e le Perofeta o Iosefa Samita le tele o uiga o le Faaola. O a nisi uiga e te manatu i ai pe a e mafaufau loloto i le soifuaga ma le misiona a le Faaola? Mafaufau i se mea e mafai ona e faia e atili ai ona e pei o Ia.

Mau E Faatatau I Ai: Isaia 53:1–12; 2 Nifae 9:5–26; MFF 20:21–29

Jospeh and Oliver — Na afio ifo le Faaola ia Iosefa Samita ma Oliva Kaotui i le Malumalu i Katelani. “Na aveeseina le ie puipui mai o ma’ua mafaufau,” na saunoa ai Iosefa, “ma vaaiga o o ma’ua malamalama ua faaavanoaina. Ua ma vaaia le Alii o lo o tu mai i luga o le si’o o le pulelaa”

resurrected Lord — “Ua aumaia e le Tamai Mamoe a le Atua le toetutu, ina ia toetutu uma lava mai le oti ”

Christ with children — A tatou tomanatu i le paia ma tulaga atoatoa o lo tatou Matai sili,. … e liu suavai ai o tatou loto i totonu ia i tatou ona o lona faamaualalo.