Mahimong mga Manluluwas sa Bukid sa Zion

“Unsaon nila nga mahimong mga manluluwas sa Bukid sa Zion? Pinaagi sa pagtukod sa ilang mga templo, pagpabarug sa ilang mga bunyaganan, ug pagpadayon ug pagdawat sa tanan nga mga ordinansa … alang sa tanan nilang mga kaliwatan nga patay na.”

Gikan sa Kinabuhi ni Joseph Smith

Alang sa mga miyembro sa Simbahan nga nagpuyo sa Nauvoo niadtong 1840, ang paghimo og pagpuli [proxy] nga buhat alang sa ilang mga patay nga mga kaliwatan usa ka labing dakong tumong. Sukad sa unang pagpuli nga mga bunyag niini nga dispensasyon nga gibuhat niadtong 1840, ang mga Santos nakasiksik og impormasyon sa kagikanan kalabut sa ilang mga katigulangan, ug daghan ang nagpabunyag puli niining mga hinigugmang nangamatay.

Sa una, ang mga bunyag alang sa patay gihimo sa Suba sa Mississippi o sa lokal nga mga sapa. Apan pagka Enero 1840, sa panahon nga ang mga Santos naghimo og mga plano alang sa Templo sa Nauvoo, ang Ginoo mipadayag: “Usa ka bunyaganan wala diha sa yuta, nga sila, ang akong mga santos, makabunyag alang niadto kinsa mga patay—kay kini nga ordinansa pagahimoon diha sa akong balay, ug dili madawat ngari kanako, gawas lamang sa mga adlaw sa inyong kakabus, diin kamo dili makatukod og balay ngari kanako” (D&P 12:29–30).

Pagpuli nga mga bunyag diha sa suba gihunong sa Oktubre 3, 1841, sa dihang ang Propeta mi-anunsyo: “Wala nay mga bunyag alang sa mga patay, hangtud ang ordinansa pagahimoon didto sa Balay sa Ginoo…. Kay sa ingon namulong ang Ginoo!”¹ Ang mga Santos nagdali sa pagtukod og temporaryong kahoy bunyaganan sa bag-ong gikalot ilawom sa Templo sa Nauvoo. Ang bunyaganan, nga hinimo sa kahoy sa Wisconsin, gipahiluna sa mga buko-buko sa 12 ka kahoy nga baka. Kini gipahinungod sa Nobyembre 8, nga gamiton, “hangtud ang Templo mahuman, kon usa ka mas lig-on mopuli sa lugar niini.”² Pagka Nobyembre 21, 1841, unom ka mga miyembro sa Korum sa Napulog Duha nakabunyag og 40 ka mga tawo nga patay na, ang unang mga bunyag alang sa mga patay nga gihimo diha sa bunyaganan.

Ang unang mga kasinatian sa mga Santos sa bunyag alang sa mga patay nagtudlo kanila sa importansya sa pagtipig og rekord diha sa Simbahan sa Ginoo. Bisan og ang pagpuli nga bunyag diha sa lokal nga mga suba gihimo sa tukma nga awtoridad sa priesthood, wala kini opisyal nga gi-rekord. Sa ingon niana, kadto nga mga bunyag gihimo pag-usab. Sa usa ka pakigpulong nga gihatag niadtong Agosto 31, 1842, ang Propeta mipasabut: “Ang tanang mga tawo nga gibunyagan alang sa mga patay kinahanglan nga adunay tig-rekord nga motambong, nga siya mahimong mosaksi sa pag-rekord ug mopamatuod sa kamatuoran ug kalig-unan sa iyang rekord…. Busa himoa ang pag-rekord ug pagsaksi sa mga bunyag alang sa mga patay nga mainampingong tambungan sukad karon.”³ Ang Propeta mihisgot niining butanga og maayo diha sa usa ka sulat ngadto sa mga Santos sa sunod nga adlaw, ug sa lain nga sulat nga gihimo niadtong Septyembre 6. Kining duha ka mga sulat mao karon ang mga seksyon 127 ug 128 sa Doktrina ug mga Pakigsaad.

Sa seksyon 127, ang propeta mi-rekord sa mosunod nga mga panudlo gikan sa Ginoo: “Sa panahon nga bisan kinsa kaninyo mabunyagan alang sa inyong mga patay, himoa nga adunay tigsulat, ug himoa siya nga usa ka saksi sa inyong mga bunyag; himoa nga siya makadungog uban sa iyang mga dunggan, aron siya magpamatuod sa kamatuoran, miingon ang Ginoo; aron sa inyong tanan nga mga pagsulat masulat didto sa langit…. Usab, himoa ang tanan nga mga talaan nga mahan-ay, aron sila mabutang sa tipiganan sa mga dokumento diha sa akong balaan nga templo, aron makuptan nga handumanan sa kaliwatan ngadto sa kaliwatan” (D&P 127;6–7, 9).

Samtang ang mga Santos nagpadayon niining sagrado nga buhat, ‘kini wala madugay natataw nga ang uban adunay taas nga listahan sa ilang mga patay, nga kinsa sila nanghinaut nga maalagaran,” mihinumdum si Elder George A. Smith, usa ka miyembro sa Korum sa Napulog Duha. “Kini nakita nga sinugdanan lamang sa usa ka dakong buhat, ug ang pagpangalagad sa tanang mga ordinansa sa Ebanghelyo ngadto sa mga panon sa patay dili sayon nga buluhaton. Ang pipila sa Napulog Duha nangutana ni Joseph kon wala bay laing mubo nga paagi sa pagpangalagad alang sa daghan kaayo. Si Joseph agig tubag miingon: “Ang mga balaod sa Ginoo dili mausab; kinahanglan nga kita mobuhat diha sa hingpit nga pagsunod uban sa unsay gipadayag ngari kanato. Dili kinahanglan nga kita magpaabot sa pagbuhat niining dako kaayong buhat alang sa mga patay sulod sa mubong panahon.”⁴

Mga Pagtulun-an ni Joseph Smith

Ang doktrina sa kaluwasan alang sa mga patay nagpakita sa pagkahalangdon sa kaalam ug kapuangod sa Dios

“Tanan kadto kinsa walay oportunidad sa pagpamati sa Ebanghelyo, ug gipangalagaran ngadto sa usa ka dinasig nga tawo sa unod, kinahanglan nga makaangkon niini sa laing kinabuhi, sa dili pa ang katapusan nilang paghukom.”⁵

“Kini dili na katingalahan nga ang Dios kinahanglang moluwas sa mga patay, kay sa siya kinahanglan nga mobuhi sa mga patay.

“Walay usa ka panahon sukad nga ang espiritu tigulang ra kaayo sa pagduol sa Dios. Ang tanan anaa sa sulod sa mapasayloong kalooy, kinsa wala makabuhat sa dili mapasaylo nga sala, diin walay kapasayloan, ni dinhi niini nga kalibutan, ni sa kalibutan nga moabut. Adunay paagi sa pagpagawas sa mga espiritu sa mga patay; kana pinaagi sa gahum ug awtoridad sa Priesthood—pinaagi sa pagbugkos ug sa pagbadbad dinhi sa yuta. Kini nga doktrina nagpakita nga mahimayaon, ingon nga kini nagpasundayag sa kagamhanan sa balaang kapuangod ug kalooy diha sa tumong sa plano sa kaluwasan sa katawhan.

“Kining mahimayaon nga kamatuoran hingpit nga gituyo aron sa pagdugang sa panabut, ug sa pagtabang sa kalag nga anaa sa mga kasamok, mga kalisud ug mga kasakit. Aron sa paghulagway, sama pananglit sa duha ka mga lalaki, nga managsoon, pareho nga intelihente, makinaadmanon, mahiyason ug maayo, naglakaw sa katarung ug sa tanang maayo nga konsiyensya, samtang sila makahimo sa pag-ila unsay husto ug angay gikan sa usa ka lubog nga tinubdan sa sayop nga tradisyon, o gikan sa namansahan nga mga pahina sa basahon sa kinaiyahan.

“Ang usa namatay ug gilubong, nga wala gayud makadungog sa napahiuli nga Ebanghelyo; ngadto sa usa, ang mensahe sa kaluwasan gipadala, nadungog ug gidawat niya kini, ug nahimong manununod sa kinabuhing dayon. Ang usa ba mahimong tig-ambit sa himaya ug ang usa itambog sa walay paglaum nga kaalautan? Wala bay higayon alang sa iyang paglingkawas? Ang Sektaryanismo motubag nga ‘wala.’ …

“Kini nga doktrina nagpakita og usa ka tin-aw nga kahayag sa kaalam ug kalooy sa Dios sa pag-andam og ordinansa alang sa kaluwasan sa patay, nga bunyagan pinaagi sa pagpuli, ang ilang mga ngalan gi-rekord sa langit ug sila mohukom sumala sa mga buhat nga gihimo sa lawas. Kini nga doktrina kanunay nga gibalik-balik sa mga kasulatan. Kadtong mga Santos kinsa wala magtagad alang sa ilang namatay nga mga kabanay, naghimo niini sa kakuyaw sa ilang kaugalingong kaluwasan.”⁶

Niadtong Disyembre 1840 si Joseph Smith misulat ngadto sa mga sakop sa Korum sa Napulog Duha ug ubang mga lider sa priesthood kinsa nag-alagad og mga misyon sa Great Britain: “Ako nagatuo nga ang doktrina sa bunyag sa mga patay nadunggan na ninyo sa wala pa madawat kini nga sulat, ug tingali adunay pipila ka mga pangutana diha sa inyong mga hunahuna kabahin niini. Dinhi niini nga sulat dili ako makahatag sa tanang impormasyon nga inyong gitinguha kabahin sa hilisgutan; apan … ako moingon nga kini sa tinuoray gihimo sa mga simbahan sa karaan; ug si San Pablo naningkamot sa pagmatuod sa doktrina sa pagkabanhaw gikan niini, ug miingon, ‘Sa lain nga paagi, unsa ba ang pagabuhaton sa mga nanagpabautismo sunod sa mga minatay? Kong ang mga minatay dili gayud mangabanhaw, ngano man nga nanagpabautismo sila sunod kanila?’ [1 Mga Taga-Corinto.]

“Una nakong gihisgutan ang doktrina diha sa publiko atol sa sermon sa lubong ni Brother Seymour Brunson; ug sukad niadto gihatagan og kinatibuk-ang mga panudlo ang Simbahan kalabut niini nga hilisgutan. Ang mga Santos adunay pribilihiyo nga mabunyagan alang niadtong ilang mga kabanay kinsa namatay…. Sa walay dugang nga pagpasabut kabahin sa hilisgutan, kamo sa walay duhaduha makakita sa iyang pagkamakanunayon ug pagkamakatarunganon; ug kini nagpakita sa Ebanghelyo ni Kristo tingali sa mas dako nga gidak-on kaysa mahunahuna sa uban niini.”⁷

Kita mahimong mga manluluwas sa Bukid sa Zion pinaagi sa paghimo sa sagradong mga ordinansa alang sa mga patay.

“Kon kita makahimo, pinaagi sa awtoridad sa Priesthood sa Anak sa Dios, pagbunyag og tawo diha sa ngalan sa Amahan, sa Anak, ug sa Espiritu Santo, alang sa kapasayloan sa mga sala, kini sama ra nga atong pribilihiyo ang paglihok ingon nga tinugyanan, ug magpabunyag alang sa kapasayloan sa mga sala tungod ug alang sa mga patay nga mga kaliwatan, kinsa wala makadungog sa Ebanghelyo, o sa kahingpitan niini.”⁸

“Ang Biblia nag-ingon, ‘Akong ipadala kaninyo si Elias ang Propeta, sa dili pa moabut ang dako ug makalilisang nga adlaw sa Ginoo; ug iyang pabalikon ang kasingkasing sa amahan ngadto sa mga anak, ug ang kasingkasing sa mga anak ngadto sa ilang mga amahan; tingali unya ako moanhi ug samaran ko ang yuta pinaagi sa usa ka panghimaraut.’ [Malaquias 4:5–6.]

“Karon, ang pulong pabalikon dinhi kinahanglan nga hubaron ug pagabugkoson, o i-seal. Apan usa ang katuyoan niining mahinungdanong misyon? o unsaon kini pagtuman? Ang mga yawe itugyan, ang espiritu ni Elijah moabut, ang Ebanghelyo i-establisar, ang mga Santos sa Dios pundukon, ang Zion pagatukuron, ug ang mga Santos motungas ingon nga mga manluluwas sa Bukid sa Zion [tan-awa sa Obadias 1:21].

“Apan unsaon nila nga mahimong mga manluluwas sa Bukid sa Zion? Pinaagi sa pagtukod sa ilang mga templo, pagpabarug sa ilang mga bunyaganan, ug pagpadayon ug pagdawat sa tanan nga mga ordinansa, mga bunyag, mga kumpirma, mga paghugas, mga pagdihog, mga pag-orden ug mga gahum sa pag-seal maanaa sa ilang mga ulo, alang sa ilang tanan nga mga katigulangan kinsa namatay, ug luwason sila nga sila unta mobangon sa unang pagkabanhaw ug pagabayawon ngadto sa mga trono sa kahimayaan uban kanila; ug dinhi niini ang kadena nga nagbugkos sa mga kasingkasing sa mga amahan ngadto sa mga anak, ug sa mga anak ngadto sa mga amahan, nga natuman ang misyon ni Elijah….

“Ang mga Santos walay daghan kaayong panahon sa pagluwas ug pagtubos sa ilang mga patay, ug pagpundok sa ilang buhi nga mga kaliwat nga sila usab, maluwas sa dili pa ang yuta pagahampakon, ug ang paglumpag nga gitakda moabut sa kalibutan.

“Ako motambag sa tanang mga Santos sa pagpanlimbasug sa tanan nilang mahimo ug mopundok sa tanan nilang buhi nga mga kaliwat ngadto [sa templo], nga sila unta ma-seal ug maluwas usab, nga sila mahimong maandam batok sa adlaw nga pag-abut sa tiglaglag nga mga anghel; ug kon ang tibuok Simbahan mohimo uban sa tibuok nilang gahum sa pagluwas sa ilang patay, o i-seal ang ilang kaliwatan, ug mopundok sa ilang buhi nga mga higala, ug dili mogahin sa ilang panahon alang sa kalibutan, sila maglisod sa pagpadayon sa dili pa moabut ang kagabhion, sa panahon nga wala nay tawo nga makahimo sa pagtrabaho.”⁹

“Anaa ang bunyag, ug uban pa, nga maggamit niadtong mga buhi, ug bunyag alang sa patay kinsa namatay nga walay kahibalo sa Ebanghelyo…. Dili lamang kay kamo kinahanglan nga mabunyagan alang sa inyong mga patay, apan kamo moagi sa tanang mga ordinansa alang kanila, sama sa inyong naagian sa pagluwas sa inyong mga kaugalingon….

“… Kinahanglan nga adunay dapit diin ang tanang mga nasud motungas matag karon ug unya aron sa pagdawat sa ilang mga endowment; ug ang Ginoo nag-ingon nga kini mao ang dapit alang sa bunyag sa mga patay. Ang matag tawo nga nabunyagan ug sakop sa gingharian adunay katungod nga mabunyagan alang niadtong kinsa miuna na; ug human nga ang balaod sa Ebanghelyo gituman dinhi sa ilang mga higala kinsa naghimo isip puli alang kanila, ang Ginoo adunay mga tigdumala didto nga mopalingkawas kanila. Ang usa ka tawo mahimong mohimo isip puli alang sa kaugalingong mga kaliwat; ang mga ordinansa sa Ebanghelyo nga giandam sa wala pa ang mga katukuran sa kalibutan sa ingon natuman pinaagi kanila, ug kita mahimo nga bunyagan alang niadto kinsa suod kaayo nato nga higala.”¹⁰

“Tanan kadto kinsa namatay diha sa pagtuo moadto sa bilanggoan a sa mga espiritu aron sa pagsangyaw sa mga patay sa lawas, apan buhi sa espiritu; ug kadto nga mga espiritu magsangyaw ngadto sa mga espiritu [kinsa anaa sa pagkabilanggo] nga sila mahimong mopuyo uyon sa Dios diha sa espiritu, ug mga tawo ang nangalagad alang kanila diha sa unod; … ug sila mahimong malipayon tungod niini nga paagi [tan-awa 1 Pedro 4:6]. Busa, kadto kinsa gibunyagan alang sa ilang mga patay mao ang mga manluluwas sa Bukid sa Zion, ug sila kinahanglan nga makadawat sa ilang mga paghugas ug sa ilang mga pagdihog alang sa ilang mga patay nga sama alang sa ilang mga kaugalingon.”¹¹

Ang Dios mihatag kanato og dako nga responsibilidad sa pagsiksik alang sa atong mga patay.

“Akong bukhon ang inyong mga mata kalabut sa mga patay. Ang tanan nga bisan unsang butang diin ang Dios sa Iyang walay katapusang kaalam nakakita nga angay ug tukma nga ipadayag ngari kanato, samtang kita nagpuyo sa mortalidad, kalabut sa atong mortal nga mga lawas, gipadayag ngari kanato diha sa hunahuna, ug walay labot niining mortal nga tabernakulo, apan gipadayag sa atong mga espiritu sa tukma ingon og kita walay mga lawas gayud, ug kadtong mga pagpadayag nga moluwas sa atong mga espiritu moluwas sa atong mga lawas. Ang Dios mipadayag niini ngari kanato mahitungod sa walay katapusan nga pagkabulag sa lawas, o tabernakulo. Busa ang responsibilidad, ang dakong responsibilidad, nga anaa kanato kalabut sa atong mga patay; kay ang mga espiritu kinsa wala motuman sa Ebanghelyo diha sa unod kinahanglan nga motuman niini diha sa espiritu o panghimarauton. Ligdong nga hunahuna!—kuyaw nga hunahuna! Wala bay mahimo?—walay pangandam—walay kaluwasan alang sa atong mga kagikan ug mga higala kinsa namatay nga wala makabaton og oportunidad sa pagtuman sa mga balaod sa Anak sa Tawo? …

“Unsa nga mga saad ang gihimo kalabut sa hilisgutan sa kaluwasan sa mga patay? ug unsa nga matang sa mga tawo kadto kinsa mahimong maluwas, bisan og ang ilang mga lawas nangadugmok ug nangadunot sa lubnganan? Kon ang Iyang mga sugo nagtudlo kanato, kini naglantaw sa kahangturan; kay kita gitan-aw sa Dios ingon og kita anaa sa kahangturan; ang Dios nagpuyo sa kahangturan, ug wala maglantaw sa mga butang sama sa atong paglantaw.

“Ang pinakadakong responsibilidad niini nga kalibutan nga gibutang sa Dios kanato mao ang pagsiksik sa atong mga patay. Ang apostol nag-ingon, ‘Sila nga wala kanato dili mahimong hingpit [tan-awa sa Mga Hebreohanon 11:40]; tungod kay kini gikinahanglan nga ang gahum sa pag-seal maanaa sa atong mga kamot aron sa pag-seal sa atong mga anak ug sa atong mga patay alang sa kahingpitan sa dispensasyon sa mga panahon—usa ka dispensasyon aron sa pagtagbaw sa mga saad nga gihimo ni Jesukristo sa wala pa ang katukuran sa kalibutan alang sa kaluwasan sa tawo.

“… Kini gikinahanglan nga kadto kinsa namatay sa wala pa kita ug kadtong kinsa mamatay human kanato kinahanglan adunay kaluwasan sama kanato; ug sa ingon gihimo sa Dios kini nga mando diha sa tawo. Sukad niini, ang Dios miingon, ‘Akong ipadala kaninyo si Elias ang manalagna, sa dili pa moabut ang dako ug makalilisang nga adlaw ni Jehova: iyang pabalikon ang kasingkasing sa mga amahan ngadto sa mga anak, ug ang kasingkasing sa mga bata ngadto sa ilang mga amahan, tingali unya ako moanhi ug samaran ko ang yuta pinaagi sa usa ka panghimaraut’ [Malaquias 4:5–6].”¹²

Si Propeta Joseph Smith mihimo sa mosunod nga sulat ngadto sa mga Santos, sa kaulahian gitala sa Doktrina ug mga Pakigsaad 128:15–18, 22, 24: “Ug karon, akong hinigugma nga mga igsoon, himoa nga ako mopasalig kaninyo nga kini mao ang mga baruganan kalabut sa mga patay ug sa mga buhi nga dili mahimong hatagan og gamay lamang nga pagtagad, mahitungod sa atong kaluwasan. Kay ang ilang kaluwasan gikinahanglan ug mahinungdanon sa atong kaluwasan, sama sa gisulti ni Pablo mahitungod sa mga amahan – nga sila kon wala kita dili mahingpit—ni kita kon wala ang atong mga patay mahingpit.

Ug karon, kalabut sa bunyag alang sa mga patay, ako mohatag kaninyo og lain nga kinutlo ni Pablo, 1 Mga Taga-Corinto 15:29: Kon dili unsa man ang ilang buhaton kinsa gibunyagan alang sa mga patay, kon ang mga patay dili na mobangon? Ngano nga sila gibunyagan alang sa mga patay?

Ug usab, agi og sumpay niini nga kinutlo ako mohatag kaninyo og kinutlo gikan sa usa sa mga propeta, kinsa mitumong sa iyang mga mata diha sa pagpahiuli sa pagkapari, sa mga himaya nga ipadayag sa katapusan nga mga adlaw, ug sa usa ka talagsaon nga paagi kini nga labing mahimayaon sa tanan nga mga hilisgutan nga naapil sa walay katapusan nga ebanghelyo, nga mao ang bunyag alang sa mga patay; kay si Malaquias nag-ingon, sa katapusan nga kapitulo, ikalima ug ikaunom nga bersikulo Tan-awa, Ako mopadala kaninyo ni Elijah ang propeta sa dili pa moabut ang mahinungdanon ug makalilisang nga adlaw sa Ginoo: Ug siya mopabalik sa kasingkasing sa mga amahan ngadto sa mga anak, ug ang kasingkasing sa mga anak ngadto sa ilang amahan, basin unya ako moabut ug mohampak sa yuta uban sa tunglo.

“Ako tingali makahatag og labing yano nga paghubad niini, apan kini igo na ang kayano nga nahiangay sa akong katuyoan ingon nga kini karon mao. Kini igo na aron masayud, niini nga higayon, nga ang yuta hampakon uban sa tunglo gawas kon adunay nagsumpay nga pipila ka matang o lain tali sa mga amahan ug sa mga anak, diha sa pipila ka mga hilisgutan o lain—ug tan-awa unsa kana nga hilisgutan? Kini mao ang bunyag alang sa mga patay. Kay kita kon wala sila dili mahimo nga hingpit; ingon nga sila kon wala kita mahimo nga hingpit….

“… Himoa ang inyong mga kasingkasing nga magmaya, ug paglipay sa hilabihan. Himoa ang yuta sa kalit motungha ngadto sa pag-awit. Himoa ang mga patay nga mopahayag og mga awit sa walay katapusan nga pagdayeg ngadto ni Hari Immanuel, kinsa na-orden, sa wala pa ang kalibutan, niana nga nakahimo kanato sa pagtubos kanila gikan sa ilang bilanggoan; kay ang binilanggo mahimo nga gawasnon….

“… Kita kinahanglan, busa, ingon nga usa ka simbahan ug usa ka katawhan, ug isip mga Santos sa Ulahing mga Adlaw, halad ngadto sa Ginoo og usa ka halad sa pagkamatarung; ug kita mohalad sa sulod sa iyang balaan nga templo, sa panahon nga kini mahuman, usa ka basahon nga naglangkob sa mga talaan sa atong mga patay, nga takus sa tanan nga pagdawat.”¹³

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Ribyuha ang mga pahina 567–70,, nagtimaan giunsa ni Joseph Smith ug sa bag-ong mga Santos pagtubo sa ilang pagsabut sa doktrina alang sa mga patay. Hunahunaa kon unsa kahay gibati sa mga Santos sa dihang una nilang nahibaloan ang kabahin sa kaluwasan alang sa mga patay. Unsay inyong gibati panahon sa una ninyong pag-apil sa mga ordinansa alang sa mga patay?
Basaha ang ikatulo ug ikaupat nga mga paragrap sa pahina 570. Sa unsa nga paagi ang doktrina sa kaluwasan alang sa mga patay nagpakita sa kapuangod ug kalooy sa Dios? Sa unsa nga paagi kini nga doktrina “makadugang sa panabut” ug “makatabang sa kalag”?
Unsay gipasabut nga mahimong manluluwas sa Bukid sa Zion? (Alang sa pipila ka mga ehemplo, tan-awa ang mga pahina 572–74.) Sa inyong hunahuna ngano nga imposible alang sa atong namatay nga mga katigulangan nga mahimong hingpit nga wala kita? Sa inyong hunahuna ngano nga imposible alang kanato nga mahimong hingpit nga wala sila?
Ribyuha ang pipila sa mga pagtulun-an ni Propeta Joseph Smith mahitungod sa atong dakong responsibilidad sa “pagsiksik sa atong mga patay” 575–77. Unsa nga mga kasinatian ang inyong nasinati dihang ikaw nakakat-on kalabut sa inyong mga katigulangan? Sa unsa nga paagi nga ang inyong gugma alang sa inyong pamilya ug ang inyong hugot nga pagtuo sa Dios nalig-on sa dihang kamo nakakat-on mahitungod sa inyong mga katigulangan? Sa unsa nga paagi nga ang inyong paghimo og mga ordinansa sa templo alang sa inyong mga katigulangan nag-impluwensya sa inyong mga pagbati kanila?
Unsay atong mabuhat aron pagtabang sa mga anak nga mohatag og bili sa ilang kabilin sa pamilya? Unsay atong mabuhat sa pagtabang sa mga anak pagpaapil sa templo ug buhat sa family history?

May Kalabutan nga mga Kasulatan: Mga Taga-Roma 14:9; D&P 128:8–11

Nauvoo Temple baptistry — Ang bunyaganan sa gitukod pag-usab nga Templo sa Nauvoo. Sa mga bunyaganan sama niini, ang mga Santos modawat sa mga ordinansa sa bunyag alang niadto kinsa nangamatay.

family doing genealogy — “Ang pinakadakong responsibilidad niini nga kalibutan nga gibutang sa Dios kanato mao ang pagsiksik sa atong mga patay.”