Mataupu 47: ‘Viia Lē na Fetaia’i ma Ieova’: Ua Molimau Mai Perofeta o Aso e Gata Ai i le Perofeta o Iosefa Samita

Mataupu 47

“Viia Lē na Fetaia’i ma Ieova”: Ua Molimau Mai Perofeta o Aso e Gata Ai i le Perofeta o Iosefa Samita

“O le Perofeta o Iosefa Samita … na valaauina e le Atua, e ala i le siufofoga o le Atua Lava Ia, e tatalaina le augatupulaga o le Talalelei i le lalolagi mo le toe taimi.” (Iosefa F. Samita)

Mai le Soifuaga o Iosefa Samita

Ina ua mavae le maliu o le Perofeta o Iosefa Samita ma lona uso o Ailama, na toe foi mai i le vave e mafai ai i Navu uso o le Korama a le Toasefululua o e na malaga ia latou misiona i le Iunaite setete. Na valaauina e uso o le Toasefululua se fonotaga a le Au Paia i le aso 8 o Aokuso, 1844, lea na saunoa ai Polika Iaga, o le Peresitene o le Korama a le Toasefululua. A o ia lauga, na tupu se mea e matua tulaga ese lea na molimauina e le toatele o le Au Paia. Na faavavega ona suia Peresitene Iaga ina ia foliga ma leo faapei o Iosefa Samita. “Afai na toetu Iosefa mai le oti ma toe saunoa mai ia i latou,” na manatua ai e George Q. Cannon, “atonu o le a le sili atu le tulaga faateia nai lo le tulaga na oo i ai le toatele na i ai i lena faatasiga. O le leo lava o Iosefa lava ia; ma na le gata o le leo lava o Iosefa na faalogoina; ae na foliga mai i le vaai a tagata faapei o le tagata lava lea o Iosefa lea na tu mai i o latou luma. Matou te lei faalogo lava i se isi mea na tupu e sili atu lona matagofie ma le faavavega nai lo le mea na tupu i lena aso i luma o lena faapotopotoga. Na tuuina mai e le Alii i Lona nuu se molimau na leai ai se avanoa e masalosalo ai po o ai le tagata na Ia filifilia e taitaiina i latou.”¹

I le faaiuga o lena fonotaga, na siilima le Au Paia e pulefaamalumalu le Toasefululua ia i latou. Ina ua siliga laitiiti atu i le tolu tausaga mulimuli ane, ia Tesema 1847, na toe faatulagaina le Au Peresitene Sili, ma sa lagolagoina ai Polika Iaga e avea ma Peresitene o le Ekalesia.

Talu mai le taimi o Polika Iaga, o perofeta taitoatasi ua pulefaamalumalu i le Ekalesia ua molimauina le tulaga ofoofogia o le misiona a le Perofeta o Iosefa Samita. O Iosefa Samita na tofia i le Aufono i le Lagi e avea ma perofeta ma tagatavaai maoae i aso e gata ai. O lana misiona na matua taua o lea na valoia ai e perofeta anamua, e aofia ai ma le perofeta o le Feagaiga Tuai o Iosefa o le na faatauina atu i Aikupito. O Iosefa o Aikupito o ia lava o se tagatavaai, ma na mulimuli ane vavalo o ia e uiga ia Iosefa Samita.

“E faatuina e le Alii lo’u Atua le tagatavaai, e fai ma tagatavaai filifilia i le fua o o’u sulugatiti. … E igoa foi o ia i lo’u igoa; o le igoa foi lea o lona tama. E tusa foi i maua ma ia, aua o le mea e faataunuuina e le Atua i lona lima e aumaia ai lo’u nuu i le olataga i le mana o le Atua” (2 Nifae 3:6, 15; tagai foi 2 Nifae 3:6–22).

Ia Tesema 1834, na tuuina atu ai e Iosefa Samita Le Matua i le Perofeta o Iosefa se faamanuiaga, ma faamaonia ai o ia o le tagatavaai o le na valoia e Iosefa anamua: “Ou te faamanuiaina oe i faamanuiaga a ou tama o Aperaamo, Isaako ma Iakopo; ma faapea foi ma faamanuiaga a lou tama o Iosefa, le atalii o Iakopo. Faauta, na ia vaavaai atu i lana fanau i aso e gata ai … ; na ia saili ma le filiga e iloa po o fea e tatau ona sau ai le atalii o le e tatau ona aumaia le afioga a le Alii, lea atonu o le a auala mai ai le faamalamalamaina o i latou ma toe aumaia ai i le lotoa moni, ma na vaaia e ona mata oe, lo’u atalii e; na olioli lona loto ma na faamalieina lona agaga, ma ia faapea mai, … ‘Mai la’u fanau, o loo taapeape faatasi ma Nuu Ese, o le a tulai mai ai se tagatavaai filifilia …, o lē mafaufau loloto i le poto maoae i lona loto, o lona atamai e aofia ai ma faamalamalama ai mea loloto a le Atua, ma o lona gutu o le a tauina mai ai le tulafono o le amiotonu’ … O le a e umia ki o lenei galuega, e oo lava i le au peresitene o lenei ekalesia, faatasi i le taimi nei ma le faavavau.”³

Na auala mai ia Iosefa Samita, le tagatavaai filifilia o aso e gata ai, na faaalia mai ai aoaoga faavae ma sauniga faaola, ma sa toe faatuina ai le Ekalesia moni a Iesu Keriso i le fogaeleele. Ua tuufaatasia ai molimau a perofeta o anamua ma ona po nei e folafola atu ai o Iosefa Samita o le tufugaaao lea na toefuataiina mai ai e le Atua le atoaga o le talalelei mo le manuia o le “aiga atoa o le tagata soifua, mai le vavau e oo atu i le faavavau.”⁴

O Molimau a Perofeta o Aso e Gata Ai

Na muai faauuina Iosefa Samita i lona valaauga faaperofeta a o lei fanau mai.

O Peresitene Polika Iaga: “Na folafolaina i aufono o le faavavau, ae lei taitai faataatiaina faavae o le lalolagi, o [Iosefa Samita] e tatau ona avea ma tagata, i le augatupulaga faaiu o lenei lalolagi, e aumaia le afioga a le Atua i tagata ma mauaina le atoatoaga o ki ma mana o le Perisitua a le Alo o le Atua. Na tulimatai le fofoga o le Alii i ona luga, ma luga o lona tama, ma luga o le tama o lona tama, ma luga o o latou tuaa e oo lava ia Aperaamo, ma mai ia Aperaamo e oo atu i le lolo, mai le lolo e oo atu ia Enoka ma mai ia Enoka e oo atu ia Atamu. Na Ia tulimataiina lena aiga ma lena toto a o salalau atu mai lona puna faavae e oo atu i le fanau mai o lena tagata. [O Iosefa Samita] sa muai faauuina i le faavavau e pulefaamalumalu i lenei tisipenisione mulimuli.”⁵

O Peresitene Iosefa Filitia Samita: “O Iosefa na filifilia e tu i le ulu o le galuega a le alii i aso e gata ai, ma o lana galuega na tofia i ai o ia e ala i le silafia mamao o lo tatou Tama e Faavavau i faavavau a o lei fanau mai o ia. Na oo mai i le agaga o Elaia e saunia le ala mo le afio mai o lo tatou Alii. E leai se perofeta talu mai aso o Atamu, sei vagana ai lo tatou Faaola, ua tuuina i ai se misiona e sili atu lona maoae.”⁶

O Peresitene Ezra Taft Benson: “Ina ia maua se faaaliga o le maoae tele o le misiona faalelalolagi a le Perofeta e tatau ona tatou vaavaai i ai ma se malamalamaaga o le faavavau. Na i ai o ia i le lotolotoi ‘o e tautaua ma le maoae’ o e na faamatalaina e Aperaamo faapea:

“ ‘O lenei sa faaali mai e le Alii ia te au, o Aperaamo, agaga na foafoaina a o lei i ai le lalolagi; ma sa i ai faatasi ma i latou uma na le toatele o e tautaua ma le maoae; ma sa silasila atu le Atua i ia agaga ua lelei, ma sa ia tu i lo latou lotolotoi ma fai atu: O le a ou faia ia avea i latou nei ma au faipule; aua sa ia tu i le lotolotoi o i latou o e o ni agaga, ma sa ia silasila atu ua lelei i latou; ona ia fetalai mai lea ia te au: Aperaamo e, o oe lava o se tasi o i latou ia; na filifilia lava oe ao e te lei fanau mai.’ (Aperaamo 3:22–23.)

“Na faapena foi ia Iosefa Samita. Na i ai foi o ia iina. Na auai foi o ia i le aufono faatasi ma e tautaua ma maoae. I lona tu ai i se tulaga mamalu ma le aloaia e le taumateina na ia fesoasoani i le fuafuaina ma le faataunuuina o le galuega taua a le Alii o le ‘faataunuu [o] le faaofuina o le tagata i le tino ola pea ma le ola faavavau,’ le faaolataga o fanau uma lava a lo tatou Tama [Mose 1:39]. Na i ai i lana misiona, ma o le a i ai, le aafiaga mo tagata uma lava o e na o mai i le lalolagi; tagata uma o e na i ai i le taimi lena i le lalolagi faatasi ai ma le miliona ma miliona o e e lei fananau mai. …

“E le gata o le Perofeta o Iosefa Samita o se ‘tasi o e tautaua ma le maoae,’ ae na ia tuuina mai ma o loo faaauau pea ona tuuina mai lona finagalo i mataupu taua iinei i le lalolagi e oo mai lava i le aso mai malo i luga. Aua i fofoga o le Alii … o mea uma lava o se polokalama faavavau maoae e tasi lea o loo i ai se vaega taua a le Perofeta o Iosefa—e auala uma lava i le perisitua e faavavau ma le pule a le Atua.”⁷

O le Uluai Faaaliga a Iosefa Samita o se vaega faavae o a tatou molimau taitoatasi.

O Peresitene Iosefa F. Samita: “O le mea silisili ona maoae na tupu i le lalolagi talu mai le toetu o le Alo o le Atua mai le tuugamau, ma lona afio ae i le lagi, o le afio mai lea o le Tama ma le Alo i lena alii talavou o Iosefa Samita, e saunia le ala mo le faataatiaina o le faavae o le malo [o le Atua]—e le o le malo o le tagata—e le toe taofia pe toe suia lava.

“I lo’u talia ai o lenei upumoni, ua ou iloa ai e faigofie ona taliaina isi upumoni uma lava na ia tautalagia ma folafolaina mai i le taimi o lana misiona … i le lalolagi. Na te lei aoaoina lava se mataupu faavae na le moni. Na te lei faatinoina lava se mataupu faavae e lei poloaiina o ia e faatino. Na te lei lagolagoina lava ni mea sese. E lei faaseseina o ia. Na ia vaai; na ia faalogo, na ia faia e pei ona poloaiina ai o ia e faia; ma, o le mea lea, o le Atua e ona le galuega na faataunuuina e Iosefa Samita—e le o Iosefa Samita. O le Alii e ana, e le o le tagata.”⁸

O Peresitene Heber J. Grant: “Pe na vaai tino lava Iosefa Samita i le Atua ma talatalanoa ma Ia, ma na faailoa moni e le Atua lava Ia ‘ia Iesu Keriso i le taulealea o Iosefa Samita, ma na ta’u moni lava e Iesu Keriso ia Iosefa Samita o ia o le a avea ma meafaigaluega i aao o le Atua i le toe faatulagaina i luga o le fogaeleele o le Talalelei moni a Iesu Keriso—po o le faa-Mamona, e pei ona ta’ua, o se tala fatu. Ae o le faa-Mamona e le o se tala fatu! O le mana lea o le Atua i le faaolataga; o le Ekalesia lea a Iesu Keriso, na faatulagaina i lalo o Lana taitaiga, ma o le le talitonu uma lava o le lalolagi e le mafai ona suia ai tulaga moni faavae o loo fesootai ma le Ekalesia a Iesu Keriso o le Au Paia o Aso e Gata Ai.”⁹

O Peresitene Howard W. Hunter: “Ou te faafetai mo lo’u auai i le Ekalesia; ma o la’u molimau i lona tulaga faalelagi e faalagolago i le tala faigofie i le taulealea i lalo o laau, sa tootuli ai ma talia ai tagata na asiasi mai le lagi—e le tasi le Atua, ae e toalua peresona taitoatasi mavaevae, o le Tama ma le Alo, sa toe faaalia mai i le lalolagi ia peresona o le Aiga Atua. O lo’u faatuatua ma la’u molimau e faalagolago i luga o lenei tala faigofie, aua afai e le moni, e pa’ū le faa-Mamona. Ae afai e moni—ma ou te molimau atu e moni lava—o le tasi lea o mea tutoatasi silisili ona maoae i le talafaasolopito atoa [o le lalolagi].”¹⁰

O Peresitene Tavita O. MaKei: “O le faaali mai o le Tama ma le Alo ia Iosefa Samita o le faavae o lenei Ekalesia. O iina o loo taoto ai le mea lilo o lona malosi ma lona malosiaga. E moni lava lenei mea, ma ou te molimau atu ai. O lea faaaliga e tasi ua tali uma ai fesili o le faasaienisi faatatau i le Atua ma Lona peresona faalelagi. Tou te le vaai ea i le uiga o lena mea? Ua talia le fesili pe O le a ea le Atua. Ua manino Lana sootaga i Lana fanau. O Lona naunautaiga mo tagata e ala i le pule ua tuuina mai i tagata o loo iloa lelei. Ua faamautuina le lumanai o le galuega. Ua faamalamalama manino mai e lena Uluai Faaaliga mamalu nei upumoni ma isi foi.”¹¹

O Peresitene Ezra Taft Benson: “O le Uluai Faaaliga a le Perofeta o Iosefa Samita o le mataupu faavae autu lea i le Ekalesia. O loo iloa e le fili lenei mea ma na osofaia le faamaoni o Iosefa Samita mai le aso na ia faasilasila atu ai le asiasiga a le Tama ma le Alo. … E tatau ona outou molimau atu i taimi uma i le moni o le Uluai Faaaliga. Na vaai moni lava Iosefa Samita i le Tama ma le Alo. Na laua talatalanoa ma ia e pei ona ia fai mai ai. O le mea silisili lea ona mamalu na tupu talu mai le toetu o lo tatou Alii. O soo se taitai o lē e le mafai ona folafola atu atoatoa e aunoa ma se masalosalo lana molimau faapea na faaali mai le Atua ma Iesu Keriso ia Iosefa Samita, e le mafai ona avea ma taitai moni, se leoleo mamoe moni. Afai tatou te le taliaina lenei upumoni. … afai tatou te lei mauaina se molimau faatatau i lenei faaaliga taua, e le mafai ona tatou faatupuina le faatuatua i e tatou te taitaia.”¹²

O Peresitene Siaosi Alapati Samita: “Ina ua vaai le perofeta, i le Vao i Palamaira, i le Tama ma le Alo, ma iloa ai o i laua lava o peresona, e mafai ona faafofoga ma tali mai i mea na ia fai atu ai, na amata se tupuaga fou i le lalolagi, ma faataatia ai le faavae mo le faatuatua o le fanau a tagata. Ua mafai nei ona latou tatalo i lo tatou Tama i le lagi ma iloa ai e mafai ona ia faafofoga ma tali mai i a latou tatalo, ma o lea na i ai se fesootaiga i le va o le lagi ma le lalolagi.”¹³

Na aoaoina le Perofeta o Iosefa Samita e le Atua ma agelu.

O Peresitene o Ioane Teila: “O ai Iosefa Samita? Ua taua mai e le Tusi a Mamona o ia e mai le fanau a Iosefa lea na faatauina i Aikupito, ma o lea na filifilia ai o ia e faapei ona filifilia Aperaamo e faataunuuina se galuega i luga o le fogaeleele. Na filifilia e le Atua lenei alii talavou. Na le aoaoina o ia e pei ona iloa e le lalolagi, ae o ia o le tagata matua silisili le maoae o lona aoaoina ma lona atamai ua ou feiloai i ai i lo’u olaga, ma ua ou femalagaai i le selau ma selau afe o maila, ua ou i ai i konetineta eseese ma faifai mea faatasi ma vasega uma ma ituaiga uma o tagata, ae ou te lei feiloai lava i se tagata e matua atamai e pei o ia. Ma o fea e aumai ai lona atamai? E lei aumaia i tusi; e lei aumaia i le faalemafaufau po o le faasaienisi po o le faafilosofia o nei aso, ae na te mauaina e ala i faaaliga a le Atua o loo faailoa mai ia te ia e ala i le talalelei faavavau.”¹⁴

O Peresitene Uilifoti Uitilafi: “Ou te lei faitauina lava i se mea, ua ou iloaina, o faaalia le mana lava lea e tasi i se isi lava augatupulaga i le fanauga a tagata, lea na faaalia mai i le Perofeta a le Atua i le faatulagaina o lenei Ekalesia, ina ua faaali uma mai le Tama ma le Alo i le Perofeta o Iosefa e tali ai i lana tatalo, ma ina ua fetalai mai le Tama, ‘O Lo’u Atalii Pele Lenei; vaai ia te Ia; faalogo ia te Ia.’ O se faaaliga taua lenei, lea e lei faaalia lava i le auala lea e tasi i se isi lava augatupulaga i le lalolagi, ua tuuina mai e le Atua e faatatau i Lana galuega. O lea la i lona faatulagaga, na taitaiina ai e agelu o le lagi le Perofeta a le Atua. O i latou o ona faiaoga, o i latou o ona faatonu, ma o mea uma lava na ia faia, ma mea uma lava na ia faatinoina mai le amataga, mai lena aso e oo i le aso o lona maliu faamaturo, na faia uma lava e ala i le faaalia mai o Iesu Keriso.”¹⁵

O Peresitene Lorenzo Snow: “O Iosefa Samita, o le na filifilia e le Atua e faatulagaina lenei galuega, na mativa ma le aoaoina, ma e lei auai i se tasi o lotu Kerisiano taatele. O ia sa na o se tamaitiiti, e faamaoni, ma tumu i le amiotonu. … Faapei o Mose na ia lagonaina le le agavaa ma le le talafeagai mo le galuega, e tulai atu ai o se taitai faalelotu, i se tulaga e sili ona inosia, e feagai ai ma manatu ma faiga ua leva ona tu mai mo tupuaga e tele, ua taliaina e tagata, e sili ona loloto i le usiusitai faale-ekalesia; ae ua valaauina o ia e le Atua e tuuina atu i e matitiva ma faamaoni i o latou loto i nuu uma mai o latou noanoataga faaleagaga ma le faaletino. Ma na folafola mai e le Atua ia te ia po o ai lava o le a taliaina ma usitaia lana savali, ma o ai lava o le a taliaina le papatisoga mo le faamagaloina o agasala, faatasi ai ma le faamaoni o le faamoemoe, e tatau ona mauaina faaaliga faalelagi, e tatau ona mauaina le Agaga Paia, e tatau ona mauaina le talalelei lava e tasi ma faamanuiaga e pei ona folafolaina mai ma mauaina e ala i le talalelei, e pei ona folafolaina mai e aposetolo anamua, ma lenei savali, lenei folafolaga, e tatau ona aoga po o fea lava po o ai lava e tatau ona tauaveina atu i ai e Toeaina, o avefeau tofia a le Atua. O le saunoaga lea a Iosefa Samita, le taulealea e lei aoga, e le faigata, e faatauvaa, e faigofie, ma faamaoni.”¹⁶

O Peresitene Harold B. Lee: “O Iosefa Samita, le alii talavou e lei a’oga i mataupu faalelotu o lena taimi, e lei a’oga i aoaoga maualuluga o aoaoga o ona aso, … na avea [o se] tasi o le na mafai ona usitai i aoaoga ma musumusuga a le Agaga. Semanu e le mafai e Iosefa Samita ona faatulagaina lenei Ekalesia. Semanu e le mafai ona ia aumaia i luma le afioga a le Alii, le Tusi a Mamona. Atonu latou te faifai i le perofeta ona o ia o se tagata. Atonu latou te fesiligia pe faapefea ona amataina lenei Ekalesia, ae o ‘i e tulai ai lea mea o se maa faamanatu—o le Tusi a Mamona lava ia. O Iosefa, le tagata, na semanu e le mafai ona ia faia lenei mea, ae o Iosefa, na taitaiina i le mana o le Atua Silisili Ese, na mafai ona ia faatinoina lava le auaunaga faavavega o le aumaia i luma o le malo mai le pouliuli e ala i le talalelei toefuataiina a Iesu Keriso.”¹⁷

O Peresitene Tavita O. MaKei: “O Iosefa Samita, e le gata i le avea o ia o se tagata maoae, ae o le avea o se auauna musuia a le Alii lea ou te naunau ai ou te tautala atu i lenei sauniga. E moni, o le tulaga maoae o Iosefa Samita e maua mai musumusuga faalelagi. …

“ ‘Pe faapefea ona poto lenei tagata, ae lei aoaoina o ia? o le fesili lea a Iutaia a o latou ofo i le poto o Iesu [Ioane 7:15]. Sei o tatou toe fesili la e uiga ia Iosefa Samita, a o tatou mafaufau i ona taunuuga mataina i lona taimi puupuu o le [sefulufa] tausaga i le va o le faavaeina o le Ekalesia ma lona maliu faamaturo; a o tatou mafaufau loloto i le talafeagai lelei atoatoa o le Talalelei Toefuataiina ma le Ekalesia anamua lea na faavaeina e Iesu ma ona Soo; a o tatou matauina lona mafaufau atu i aoaoga ma mataupu faavae; ma a o tatou vaai i le fuafuaga le mafaatusalia ma le maopoopo a le Ekalesia, na faatuina e ala i musumusuga a le Keriso o le ona Lona suafa o loo tauaveina [e le Ekalesia]. O le tali i le fesili ‘O fea e aumai ai e lenei tagata le poto?’ ua tuuina i le fuaiupu ootia lea:

“Viia le na fetaiai ma Ieova!
Le Perofeta na tofia e Iesu.
Na te tatala le toe autupulaga,
Tupu ma nuu latou te viia.”18

O Peresitene Howard W. Hunter: “Tatou te viia [Iosefa Samita] mo lona agavaa e fesootai e le gata ma Ieova ae faapea foi ma isi peresona o le lagi. E toatele naua na asia, tuuina i ai ki, ma aoaoina lena ‘tagatavaai filifilia’ na faatuina mai i aso e gata ai. … Tatou te viia foi Iosefa Samita mo lona filiga ma le agavaa e faaliliuina ma mauaina le selau ma selau o itulau o tusitusiga paia faaalia. O ia na auala mai ai faaaliga. E ala ia te ia, ua taumateina, e sili atu le tele o itulau ofoofogia o tusitusiga paia na ui mai ai nai lo se isi lava tagata ola i le talafaasolopito [o le lalolagi].”¹⁹

Na valaauina le Perofeta o Iosefa Samita e le Atua e tatalaina le augatupulaga faaiu ma toefuatai le atoatoaga o le talalelei.

O Peresitene Spencer W. Kimball: “Ou te molimau atu i le lalolagi i le aso, e sili atu nai lo se seneturi ma le afa ua tea na tata’eina ai le papupuni i le va o le lagi ma le lalolagi; na toe tatalaina ai le lagi, ma talu mai lena taimi ua faaauau mai pea faaaliga.

“Na tafa mai lena aso fou ina ua tatalo [se] tagata ma le naunautaiga loloto mo se taitaiga faalelagi. Na maua se nofoaga natia patino, na tootuli ai tulivae, ma faamaualalo ai se loto, na faaleoina ai tauanauga, ma faamalamalamaina ai le lalolagi e se malamalama sili atu le pupula nai lo le la i le aoauli—ma e le toe tapunia ai lava le pupuni i le va o le lagi ma tagata soifua.

“O se alii talavou …, o Iosefa Samita, e le mafaatusalia lona faatuatua, na ia faamutaina le lamala [o le leai o ni faaaliga], na nutililiiina le ‘lagi o uamea’ ae toefaatulaga fesootaiga. Na faamanuiaina ai e le lagi le lalolagi, na faate’a ai e le malamalama le pouliuli, ma toe fetalai mai le Atua i le tagata, i le toe faafouina lea o le faaalia mai o ‘lona finagalo i ana auauana perofeta.’ (Amosa 3:7.) Na i ai se perofeta fou i le nuu ma o ia na ala mai ai le faatuina e le Atua o lona malo, e le toe faaumatia lava pe tuua i se isi nuu—o se malo o le a tu e faavavau.

“O le tulaga faavavau o lenei malo ma faaaliga ia na faatuina ai, o tulaga e matua moni atoatoa. E le toe goto lava le la; e le toe tulaga le agavaa foi tagata uma e fesootai ma Le Na Faia i latou. O le a le toe natia lava le Atua mai lana fanau i le lalolagi. Ua iinei faaaliga e le toe aveesea.”²⁰

O Peresitene Gordon B. Hinckley: “O tala o le soifuaga o Iosefa o le tala o se vavega. Na fanau o ia i le mativa. Na ola ae i tulaga faigata. Na fetulinai o ia mai lea nofoaga i lea nofoaga, sa molia seseina, ma faafalepuipuia faasolitulafonoina. Na fasiotia i le 38 o ona tausaga. Ae peitai i le taimi puupuu lava o le 20 tausaga ao lumanai lona maliu, na ia faataunuuina ai mea e le mafai lava e se tasi ona faataunuuina i lona olaga atoa. Na ia faaliliuina ma lolomi le Tusi a Mamona, o se voluma lea talu mai lena taimi ua toe faaliliuina i le tele ma le tele o gagana ma ua taliaina e le miliona ma miliona i le lalolagi le afioga a le Atua. O faaaliga na ia mauaina ma isi tusitusiga na ia aumaia ua faapena foi ona avea ma tusitusiga paia i nei miliona ma miliona [o tagata]. O le aofaiga o lautusi ua aofia ai, e tusa e faaluaina le voluma atoa o le Feagaiga Fou o le Tusi Paia, ma na aumaia uma lava e ala mai i le tagata e toatasi i le vaitaimi na o ni nai tausaga. I lenei vaitaimi lava e tasi na ia faatuina ai se faalapotopotoga lea … na tatalia faigata uma lava ma lui ma o loo aoga pea i le taimi nei i le puleaina o tagata auai o le ekalesia i le lalolagi atoa … e pei lava o le puleaina o tagata auai e 300 i le 1830. O loo i ai le au masalosalo o e ua tigaina e tau faamatala lenei faalapotopotoga ofoofogia faapea o se fua lea o taimi na ia soifua mai ai. O lena faalapotopotoga, ou te faapea atu ai, na tutusa lava le tulaga ese, le tutoatasi, ma le ofoofogia i le taimi lena e pei ona i ai i le taimi nei. E le o le fua lea o taimi [na ia soifua mai ai]. Na oo mai o se faaaliga mai le Atua. …

“I totonu o le vaitaimi o lena 20 tausaga a o lumanai lona maliu, na faagaoioia ai e Iosefa Samita se polokalama mo le auina atu o le talalelei i nuu uma o le lalolagi. Ou te ofo i le lototoa na ia galue ai. E oo lava i aso amata o le Ekalesia, i taimi o le pogisa o faigata, na valaauina alii e tuua fale ma aiga, e sopo atu i le sami, e folafola atu le Toefuataiga o le talalelei a Iesu Keriso. I le mafaufau o le Perofeta, o lana faaaliga e aofia ai le lalolagi atoa lava.

“Mo a tatou sauniga konafesi aoao faalua i tausaga taitasi, e faapotopoto tagata o le Ekalesia i Amerika i Matu, Tutotonu, ma Saute; i Motu o Peretania ma Aferika; i nuu o Europa; i konetineta ma motu o le Pasefika; ma le nuu mai anamua o Asia. O fua ia o le faaaliga a Iosefa Samita, le perofeta a le Atua. O ia moni lava o se tagatavaai maoae o le na vaai i lenei aso ma aso sili atu o le a oo mai a o agai i luma le galuega a le Alii i le fogaeleele.”²¹

O Peresitene Iosefa F. Samita: “Po o a lava nisi mea atonu na faia pe tulaga mai ai le Perofeta o Iosefa Samita, e le tatau ona tatou faagaloina le mea moni o ia o se tagata mai le miliona ma miliona o tagata ola na aina ai lenei lalolagi i lena taimi—pau lava lea o le tagata, na valaauina e le Atua, e ala i le siufofoga o le Atua Lava Ia, e tatalaina le augatupulaga o le Talalelei i le lalolagi mo le toe taimi; ma o le mea maoae lea ia tauave i mafaufau, na valaauina o ia e le Atua e faailoa mai le Talalelei i le lalolagi, e toefuatai mai le perisitua paia i le fanauga a tagata, e faatulagaina le Ekalesia a Iesu Keriso o le Au Paia o Aso e Gata Ai i le lalolagi, ma toefuataiina mai sauniga uma lava o le Talalelei, mo le faaolataga e le gata o e o loo ola, ae faapea foi e ua oti, ma na valaauina o ia i lenei misiona e le Atua Lava Ia. …

“… Sa i ai isi perofeta, ma o perofeta maoae foi, o e na auauna atu agelu ia i latou, ma isi o e na vaai i le tamatamailima o le Atua, ma e na tuuina atu i ai faaaliga sili atu pe itiiti ifo; ae o fea o i ai le tulaga mautu, ma o ai le tagata o le na faaali faatasi i ai le Tama ma le Faaola i o la peresona, ma faailoa atu i laua lava ia te ia? O fea o i ai lena tagata? E leai lava se mea ua tusia ai i le talafaasolopito [o le lalolagi], vagana ai le Perofeta o Iosefa Samita, ma na tupu i le taimi a o talavou o ia. O ia sa na o se talavou lava, pe a faatusa moni i ai, ina ua fasiotia faamaturo, ae na o le 38 tausaga lona matua.

“… O le Perofeta o Iosefa Samita … na fesootai ma le Tama ma le Alo ma talanoa ma agelu, ma na latou asia o ia, ma sa faaee atu faamanuiaga ma meaalofa ma ki o mana i ona luga ia e lei faaeeina atu muamua lava i se isi tagata ola e ese mai le Alo o le Atua Lava Ia. E lei i ai lava se tagata ua ola i luga i le fogaeleele na i ai uma lava ki o le Talalelei ma augatupulaga na faaeeina atu i ona luga e pei ona faaeeina atu i luga o le Perofeta o Iosefa Samita i le malumalu i Katelani ina ua asia o ia iina e le Alo o le Atua, e Mose, Elaia ma Elia, ma ina ua tatalaina le lagi ia te ia ma ia mauaina ki o mana ma pule ia na mafai ai ona ia faataatia le faavae o le galuega a le Atua, lautele ma loloto, e lilofia ai le lalolagi i le malamalama o le Atua, faatasi ma Lona mana ma le mamalu.”²²

O le galuega a Iosefa Samita ua faamanuiaina ai i latou o e na soifua i le lalolagi, i latou o e o loo soifua nei, ma i latou o e e lei fananau mai.

O Peresitene Iosefa F. Samita: “O le galuega na faia e Iosefa Samita ua le faapito i le na o le olaga nei, ae aofia ai foi ma le olaga a sau, ma le olaga sa i ai. I se isi faaupuga, e faatatau ia i latou sa soifua mai i le lalolagi, mo i latou o loo soifua ma i latou o le a soifua pe a uma i tatou. E le o se mea ua faatatau i le na o le tagata ao soifua i lenei lalolagi i le tino o aano ma ivi, ae mo le aiga uma o tagata mai le faavavau i le faavavau. … O le taunuuga, e pei ona ou fai atu ai, ua faaaloalogia Iosefa Samita, ua faamamaluina lona suafa; e fiasefulu afe o tagata e faafetai i le Atua i o latou loto ma mai le taele o o latou agaga mo le malamalama ua toefuataiina mai e le Alii i le lalolagi e ala mai ia te ia, ma o le mea lea latou te viia ai o ia ma molimau i lona taua. Ma e le faapito lenei mea i se nuu, po o se Setete, po o se atunuu, ae faalauaitele atu i atunuu uma, ituaiga, gagana ma tagata ia na talai atu i ai le Talalelei, e oo mai i le taimi nei.”²³

O Peresitene Iosefa Filitia Samita: “I le auala lava e tasi ua ou iloa ai o Iesu o le Keriso—ma e ala mai faaaliga ma le Agaga Paia—Ou te iloa o Iosefa Samita o se perofeta, ma sa avea [ma perofeta] ma e faavavau lava ona avea ma perofeta a le Atua.

“Ou te faaaloalo ma faamamalu i lona suafa paia. Faatasi ma lona uso, o lo’u tama matua, Peteriaka Ailama Samita, na ia faamaufaailogaina lana molimau i lona toto i le Falepuipui i Karefasi. Ma o au lava, na o au, ou te manao e avea o se meafaigaluega i aao o le Alii e faailoa atu i tuluiga o le lalolagi le faaolataga ua toe maua aua na faatuina e le Alii se tagatavaai maoae i lenei aso e toefaatuina lona malo i le lalolagi.

“I se agaga o le molimau ma le faafetai, ou te faaiu i nei upu musuia mai le Mataupu Faavae ma Feagaiga: ‘O Iosefa Samita, le Perofeta ma le Tagatavaai o le Alii, e sili atu ana mea ua faia, vagana o Iesu lava, mo le faaolataga o tagata i lenei lalolagi, i lo so o se isi lava tagata ola na ola ai.’ (MFF 135:3.)”²⁴

O Peresitene Gordon B. Hinckley, o loo saunoa i Karefasi, Ilinoi, i le aso 26 o Iuni, 1994, i le faamamaluina o le 150 tausaga o le maliu faamaturo o le Perofeta o Iosefa: “O le galuega mamalu, na amataina e ia o le na fasiotia i Karefasi, ua tupu i se auala faavavega ma le matagofie. … O lenei galuega ofoofogia, lea na tupu ae mai le valaauga faaperofeta o le taulealea o Palamaira, ua ‘oo mai nai le vaomatua o le pouliuli,’ ma o loo susulu ‘mai e pei o le matagofie o le masina, a e manino mai e pei o le la, ma matautia e pei o le fitafita ma tagavai,’ e pei ona tatalo le Perofeta o le a faapea (MFF 109:73). …

“Tatou te filemu i le agaga faaaloalo iinei i le afiafi nei. Tatou te tomanatu ai i le vavega o le ola na amata i mauga lanumeamata o Veremona ma faaiu iinei i le falepuipui i Karefasi. O lena soifua e lei umi. Ae o fua o lena soifua ua avea o se mea toetoe lava a le mafai ona malamalama ai.

“O lenei tuutuuga fuafuaina O Le Ekalesia a Iesu Keriso o le Au Paia o Aso e Gata Ai ua sili atu ona taua nai lo le ola lava ia i le afe ma afe o e ua maliliu o galulue ai. Ua o atu molimau i le lalolagi i le tai selau ma selau o afe e molimau atu e uiga i le valaauga o Iosefa Samita o le Perofeta a le Atua. O le perisitua paia ua toefuataiina e ala ia te ia, ua faaeeina atu i luga o le toatele e lemafaitaulia o alii o le faamaoni ma le amiomama o e ua faaofuina i lenei mana faalelagi. Ua oo atu le Tusi a Mamona i itu uma o le lalolagi, o se isi molimau i le Alii o Iesu Keriso.

“Ina ia sii mai se upumoni manino na tautalagia i aso ua leva i ni laasaga eseese, ‘o le toto o maturo e moni lava o le fatu o le Ekalesia.’ O molimau ia na faamaufaailogaina iinei i nofoaga lava nei, i luga o lenei eleele lea ua tatou feiloai ai nei, i lena aso vevela ma le susu i le 150 tausaga talu ai, lea ua faafaileleina nei le faatuatua o tagata i le lalolagi atoa.”²⁵

Fautuaga mo le Suesueina ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagata i itulau vii–xii.

Faitau le aafiaga o loo faamatala i le itulau 577. Mafaufau pe mata e faapefea ni lagona o tagata ina ua latou mauaina le molimau o Polika Iaga e tatau ona suia Iosefa Samita o le taitai o le Ekalesia. E faapefea ona tatou mauaina se molimau o le Alii ua valaauina le Peresitene o le Ekalesia i le taimi nei?
Sa valoia e Iosefa o Aikupito ma isi perofeta anamua ia Iosefa Samita ma lana misiona (itulau 579). E pei ona faaalia i lenei mataupu, ua faaauau pea ona faamamafaina e perofeta o aso e gata ai le taua o Iosefa Samita. Aisea e te manatu ai ua gauai atu ia ituaiga o manatu ia Iosefa Samita, i luma atu ma tua mai o lana galuega i le lalolagi?
Suesue molimau i itulau 580–81 e uiga i le valaauga ae lei fanau mai Iosefa Samita. E faapefea ona suia lo tatou malamalamaaga i le misiona a Iosefa Samita i le lalolagi ina ua tatou “vaavaai i ai ma se malamalamaaga o le faavavau”?
Faitau molimau i itulau 582–84 e uiga i le Uluai Faaaliga. O le a le mea e avea ai lenei mea na tupu ma “mea silisili ona maoae na tupu i le lalolagi talu mai le toetu o le Alo o le Atua”? E faapefea ona avea le Uluai Faaaliga “o le faavae o lenei Ekalesia” ma le “mea lilo o lona malosi ma lona malosiaga”? O le a se mea ua fesoasoani ia te oe e maua ai se molimau i le Uluai Faaaliga?
O Peresitene Iosefa F. Samita na folafola mai, “o le Atua e ana le galuega na faataunuuina e Iosefa Samita—e le o Iosefa” (itulau 582). Aisea e te manatu ai o se tulaga taua lea e ta’ua e uiga i le misiona a Iosefa Samita?
E faatatau ia Iosefa Samita, na saunoa mai ai Peresitene Ioane Teila, “Ou te lei feiloai lava i se tagata e matua atamai e pei o ia” (itulau 584). Ae peitai, ua faailoa mai e Peresitene Teila ma isi Peresitene o le Ekalesia, o Iosefa Samita e lei tele ni avanoa mo aoaoga. Aisea na mafai ai e le Perofeta o Iosefa ona tupu tele i lona atamai? (Mo ni faataitaiga, tagai i itulau 583–87). A o tatou sailia le poto faaleagaga, e faapefea ona tatou mulimuli i faataitaiga a Iosefa Samita?
Toe iloilo itulau 587–92, matau upumoni ma sauniga na toefuataiina mai e le Alii e ala ia Iosefa Samita. Mafaufau pe faapefea e lou olaga ona ese pe afai e te lei iloaina le talalelei toefuataiina. Aisea e te faafetai ai mo Iosefa Samita ma lana misiona?

Mau E Faatatau I Ai: 2 Nifae 3:6–19; 27:6–26; 3 Nifae 21:9–11; MFF 1:17; 5:9–10; 21:1–6

Joseph preaching — “Na folafolaina i aufono o le faavavau” na tautino mai ai e Polika Iaga, “ae lei taitai faataatiaina faavae o le lalolagi, o [Iosefa Samita] e tatau ona avea ma tagata, i le augatupulaga faaiu o lenei lalolagi, e aumaia le afioga a le Atua i tagata.”

President Brigham Young — Peresitene Polika Iaga

President Ezra Taft Benson — Peresitene Ezra Taft Benson

President Heber J. Grant — Peresitene Heber J. Grant

President Howard W. Hunter — Peresitene Howard W. Hunter

President George Albert Smith — Peresitene Siaosi Alapati Samita

President John Taylor — Peresitene Ioane Teila

President Wilford Woodruff — Peresitene Uilifoti Uitilafi

President Lorenzo Snow — Peresitene Lorenzo Snow

President Harold B. Lee — Peresitene Harold B. Lee

President David O. McKay — Peresitene Tavita O. MaKei

President Spencer W. Kimball — Peresitene Spencer W. Kimball

President Gordon B. Hinckley — Peresitene Gordon B. Hinckley

President Joseph F. Smith — Peresitene Iosefa F. Samita

President Joseph Fielding Smith — Peresitene Iosefa Filitia Samita