Ang Misyon ni Juan Bautista

“Si Juan [Bautista] naghupot sa Aaronic Priesthood, ug usa ka legal nga tigdumala, ug ang nag-una ni Kristo, ug miabut aron sa pag-andam sa dalan alang kaniya.”

Gikan sa Kinabuhi ni Joseph Smith

Didto sa Harmony, Pennsylvannia, atol sa tingtugnaw niadtong 1828–29, si Joseph Smith mipadayon sa pagtrabaho sa hubad sa Basahon ni Mormon, apan ang buhat nag-aginod. Dili lang kinahanglan nga motrabaho si Joseph sa iyang uma aron sa pagbuhi sa iyang pamilya, siya walay full-time nga tigsulat alang kaniya. Niining panahon sa panginahanglan, siya nahinumdom, “Nag-ampo ako sa Ginoo nga siya motabang kanako nga matuman ang buhat nga iyang gisugo kanako.”¹ Ang Ginoo misaad nga Siya mohatag sa tabang nga gikinahanglan ni Joseph Smith sa pagpadayon sa buhat sa paghubad (tan-awa sa D&P 5:34). Niadtong Abril 5, 1829, usa ka batan-ong magtutudlo nga ginganlan og Oliver Cowdery mikuyog sa igsoon sa Propeta nga si Samuel ngadto sa Harmony, aron makigkita ni Joseph. Si Oliver nakadungog mahitungod sa mga palid samtang nagpuyo sa panimalay sa mga ginikanan sa Propeta ug, human mag-ampo mahitungod niini, nakadawat og personal nga pagpadayag nga siya maoy tigsulat alang sa Propeta. Niadtong Abril 7, ang duha ka mga tawo nagsugod sa buhat sa paghubad, uban ni Oliver isip tigsulat.

Samtang si Joseph ug Oliver naghubad gikan sa mga palid, ilang nabasahan ang mga instruksyon sa Manluluwas ngadto sa mga Nephite mahitungod sa bunyag alang sa kapasayloan sa mga sala.² Niadtong Mayo 15, miadto sila sa kakahoyan duol sa panimalay sa Propeta aron sa pagpangutana sa Ginoo alang sa dugang panabut mahitungod niining mahinungdanong ordinansa. “Ang among mga kalag nag-ampo pag-ayo,” nahinumdom si Oliver Cowdery, “nga makahibalo unsaon namo nga makaangkon sa mga panalangin sa bunyag ug sa Espiritu Santo, sumala sa paagi sa Dios, ug kami naningkamot alang sa katungod sa mga amahan ug sa awtoridad sa balaan nga priesthood, ug sa gahum sa pagdumala sa sama.”³

Girekord ni Joseph Smith unsay nahitabo agig tubag sa ilang pag-ampo: Samtang kami nagbuhat sa ingon, nag-ampo ug nagtawag sa Ginoo, usa ka sulugoon nga gikan sa langit mikunsad sa usa ka panganod sa kahayag, ug samtang nagpandong sa iyang mga kamot kanamo, siya mi-orden kanamo, nag-ingon: Diha kaninyo akong kauban nga mga sulugoon, sa ngalan sa Mesiyas, ako motugyan sa Pagkapari ni Aaron, nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala; ug kini dili na pagakuhaon pag-usab gikan sa yuta hangtud nga ang mga anak ni Levi maghalad pag-usab og halad ngadto sa Ginoo diha sa pagkamatarung.

Siya miingon nga kining Aaronic Priesthood walay gahum sa pagpandong sa mga kamot alang sa gasa sa Espiritu Santo, apan nga kini kinahanglan gayud nga itugyan ngari kanamo sa umaabut….

Ang sinugo nga miduaw kanamo niini nga higayon mitugyan niini nga Priesthood ngari kanamo, miingon nga ang iyang ngalan mao si Juan, kadto gihapon nga gitawag og Juan Bautista sa Bag-ong Tugon, ug nga siya nagbuhat ubos sa instruksyon ni Pedro, Santiago ug Juan, kinsa naghupot sa mga yawe sa Priesthood ni Melchizedek, diin nga Priesthood, siya miingon, sa angay nga panahon itugyan ngari kanamo” ( Joseph Smith—Kasaysayan 1:68–70, 72).

Ang pag-anhi ni Juan Bautista usa ka importante nga hitabo sa kinabuhi ni Propeta Joseph Smith ug sa kauswagan sa gingharian sa Dios dinhi sa yuta. Bisan og si Joseph Smith nakakita sa Dios nga Amahan ug ni Jesukristo, nabisitahan sa langitnong mga mensahero, ug nakadawat sa bulawan nga mga palid ug sa abilidad sa paghubad niini, wala pa siya hatagi sa awtoridad ug gahum sa priesthood. Karon ang gahum sa Aaronic Priesthood gipahiuli sa yuta, ang gahum sa Melchizedek Priesthood sa dili madugay ipahiuli. Si Joseph Smith nahimong legal nga tigdumala sa gingharian sa Dios.

Mga Pagtulun-an ni Joseph Smith

Si Juan Bautista nakatuman sa importante nga mga misyon sa pagpangandam sa agianan sa Manluluwas ug sa pagbunyag Kaniya.

Mitambong ako og miting didto sa Templo [niadtong Enero 29, 1843]…. Akong gipahayag nga dihay duha ka mga pangutana nga gipangutana kanako mahitungod sa akong hilisgutan sa miaging Igpapahulay, nga akong gisaad nga tubagon diha sa publiko, ug pahimuslan kini nga mga kahigayunan.

“Ang pangutana gikan sa panultihon ni Jesus—‘Sultihan ko kamo, nga sa mga gianak og babaye, walay molabaw pa ka dako pa kay kang Juan, ngani ang labing gamay diha sa gingharian sa Dios dako pa kay kaniya.’ [Lucas 7:28.] Ngano nga si Juan giisip nga usa sa labing bantugan sa mga propeta? Ang iyang mga milagro dili maoy hinungdan sa iyang pagkabantugan [Tan-awa sa Juan 10:41.]

“Una. Gisaligan siya sa balaan nga misyon sa pag-andam sa dalan sa Ginoo. Kinsa ang gihatagan sa mao nga pagsalig kaniadto o sukad? Walay tawo.

“Ikaduha. Gisalig kaniya ang importante nga misyon, ug gikinahanglan gikan kaniya, ang pagbunyag sa Anak sa Tawo. Kinsa ang nakabaton sa dungog sa pagbuhat niana? Kinsa ang nakaangkon og dako nga pribilihiyo ug himaya? Kinsa ang nakagiya sa Anak sa Dios ngadto sa tubig sa bunyag, ug adunay pribilihiyo sa pagkakita sa Espiritu Santo nga mikunsad sa porma sa salampati, o sa timailhan sa salampati, sa saksi niana nga pagpangalagad? Ang timailhan sa salampati gipasiugdahan sa wala pa malalang ang kalibutan, usa ka saksi sa Espiritu Santo, ug ang yawa dili moabut pinaagi sa timailhan sa salampati. Ang Espiritu Santo usa ka personahe, ug anaa sa porma sa usa ka personahe. Dili kini limitado sa porma sa salampati, pero sa timailhan sa salampati. Ang Espiritu Santo dili mausab ngadto sa usa ka salampati; pero ang timailhan sa usa ka salampati gihatag ngadto ni Juan aron sa pagmatuod sa kamaturoan sa gibuhat, ingon nga ang salamapati usa ka timailhan o timaan sa kamatuoran ug pagkainosente.

“Ikatulo. Si Juan, nianang higayona, mao lamang ang legal nga tigdumala sa mga kalihokan sa gingharian diha sa yuta, ug naghupot sa mga yawe sa gahum. Ang mga Judeo mosunod sa iyang mga instruksyon o panghimarauton, sa ilang kaugalingong balaod, ug si Kristo Mismo mituman sa tanang pagkamatarung sa balaod nga Iyang gihatag ngadto ni Moises didto sa bukid, ug sa ingon niana misunod niini ug mipasidungog niini, imbis sa pagguba niini. Ang anak nga lalaki ni Zacarias nakigbisog sa mga yawe, sa gingharian, sa gahum, sa himaya gikan sa mga Judeo, pinaagi sa balaan nga pagdihog ug mando sa langit, ug niining tulo ka mga rason maoy nakapahimo kaniya nga labing bantugan nga propeta nga natawo sa usa ka babaye.

“Ikaduha nga pangutana:—Sa unsa nga paagi nga ang labing gamay sa gingharian sa langit dako pa kay kaniya? [Tan-awa sa Lucas 7:28.]

“Agi’g tubag ako nangutana—Kinsa ang gipasabut ni Jesus nga ang labing ubos o gamay? Giisip si Jesus nga adunay pinakagamay nga pangangkon sa katungod sa gingharian sa Dios, ug [sa ingon] pinakaubos nga ilhon isip usa ka propeta; sama nga daw siya misulti—‘Siya nga giisip nga pinakagamay diha kaninyo mas labaw pa kay ni Juan—kana mao Ako.’”⁴

Kinahanglang adunay legal nga mga tigdumala sa gingharian sa Dios.

“Ang uban moingon nga ang gingharian sa Dios wala matukod dinhi sa yuta hangtud sa adlaw sa Pentecostes, ug nga si Juan [Bautista] wala magsangyaw sa bunyag sa paghinulsol alang sa kapasayloan sa mga sala; apan ako moingon, sa pangalan sa Ginoo, nga ang gingharian sa Dios gitukod dinhi sa yuta gikan pa sa panahon ni Adan hangtud karon. Kon adunay usa ka matarung nga tawo dinhi sa yuta diin ipadayag sa Dios ang Iyang pulong ug mohatag og gahum ug awtoridad sa pagpangalagad sa Iyang pangalan, ug kon adunay usa ka priesthood sa Dios—usa ka ministro nga adunay gahum ug awtoridad gikan sa Dios aron sa pagpangalagad sa mga ordinansa sa ebanghelyo ug modumala sa priesthood sa Dios, anaa ang gingharian sa Dios; ug ang sangputanan sa pagsalikway sa Ebanghelyo ni Jesukristo ug sa mga Propeta nga gipadala sa Dios, ang mga paghukom sa Dios miabut diha sa mga tawo, mga siyudad, ug mga nasud, sa lain-laing mga panahon sa kalibutan, nga mao ang nahitabo sa mga siyudad sa Sodom ug Gomorrah, nga gilaglag tungod sa pagsalikway sa mga Propeta….

“Mahitungod sa Ebanghelyo ug bunyag nga gisangyaw ni Juan, ako moingon nga si Juan miabut nagsangyaw sa Ebanghelyo alang sa kapasayloan sa mga sala; siya adunay awtoridad sa Dios, ug ang mga orakulo sa Dios nagauban kaniya, ug ang gingharian sa Dios sa makadiyot ingon og nagsalig lamang ni Juan. Ang Ginoo misaad ni Zacarias nga makabaton siya og anak kinsa kaliwat ni Aaron, ang Ginoo nga misaad nga ang priesthood magpadayon uban ni Aaron ug sa iyang kaliwat sa ilang tibuok henerasyon. Walay tawo nga mangunay sa pagpahiluna sa iyang kaugalingon diha sa maong katungdanan, kon dili sa Dios tinawag siya alang niini maingon kang Aaron [tan-awa sa Mga Hebreohanon 5:4]; ug si Aaron nakadawat sa iyang tawag pinaagi sa pagpadayag….

“Apan, miingon ang usa ka tawo, ang gingharian sa Dios dili matukod sa mga adlaw ni Juan, kay si Juan miingon nga ang gingharian ania na. Apan ako mangutana mas duol ba kini kanila kay diha sa mga kamot ni Juan. Ang mga tawo dili kinahanglang maghulat sa adlaw sa Pentecostes aron sa pagpangita sa gingharian sa Dios, kay anaa kini ni Juan ug siya migawas gikan sa kamingawan ug misinggit, ‘Paghinulsol kamo, kay ang gingharian sa langit haduol na’ [Mateo 3:2], sama sa pag-ingon, ‘Gikan dinhi ania kanako ang gingharian sa Dios ug moanha ako kaninyo, ania kanako ang gingharian sa Dios, ug makuha kini kaninyo, ug ako moanha kaninyo, ug kon dili ninyo kini dawaton, kamo panghimarauton;’ ug ang mga kasulatan nagrepresentar nga ang tibuok Jerusalem miadto sa bunyag nga gihimo ni Juan [tan-awa sa Mateo 3:5–6]. Adunay usa ka legal nga tigdumala, ug kadtong nabunyagan ubos sa usa ka hari; ug usab ang mga balaod ug mga orakulo sa Dios anaa diha; busa ang gingharian sa Dios anaa niini; kay walay tawo nga adunay mas maayong awtoridad sa pagpangalagad kay ni Juan; ug ang atong Manluluwas misunod niana nga awtoridad mismo sa Iyang kaugalingon pinaagi sa pagpabunyag ngadto ni Juan; busa ang gingharian sa Dios gipahimutang diha sa yuta, bisan sa mga adlaw ni Juan….

“… Si Kristo miabut sumala sa mga pulong ni Juan [tan-awa sa Marcos 1:7], ug Siya mas labaw pa kay ni Juan, tungod kay Siya naghupot sa mga yawe sa Melchizedek Priesthood ug sa gingharian sa Dios, ug kaniadto nagpadayag sa priesthood ni Moises, apan, si Kristo nagpabunyag ni Juan aron sa pagtuman sa tanang pagkamatarung [tan-awa sa Mateo 3:15]….

“… Si [Jesus] miingon, ‘Gawas kon ang tawo igaanak sa tubig ug sa Espiritu, dili siya makasulod sa gingharian sa Dios;’ ug, ‘ang langit ug yuta mangahanaw, apan ang akong mga pulong dili gayud mahanaw.’ [Juan 3:5; Mateo 24:35.] Kon ang usa ka tawo natawo sa tubig ug sa Espiritu, makasulod siya sa gingharian sa Dios. Klaro nga ang gingharian sa Dios diha sa yuta, ug si Juan nag-andam og mga hilisgutan alang sa gingharian, pinaagi sa pagsangyaw sa Ebanghelyo ngadto kanila ug pagbunyag kanila, ug siya nag-andam sa dalan alang sa Manluluwas, o miabut isip mag-uuna [forerunner], ug nag-andam og mga hilisgutan alang sa pagsangyaw ni Kristo, ug si Kristo nagsangyaw sa Jerusalem sa samang dapit diin si Juan nagsangyaw…. Si Juan … nagsangyaw sa samang Ebanghelyo ug bunyag nga gisangyaw ni Jesus ug sa mga apostoles sunod kaniya….

“Kon ang mga tawo makakaplag sa kabubut-on sa Dios ug makakita og tigdumala nga legal nga gitugutan gikan sa Dios, anaa ang gingharian sa Dios; apan kon kini wala, ang gingharian sa Dios wala. Ang tanang mga ordinansa, mga sistema, ug mga pagdumala dinhi sa yuta dili magamit sa mga anak sa mga tawo, gawas kon sila gi-ordinar ug gitugutan sa Dios, kay walay makaluwas sa usa ka tawo gawas pinaagi sa legal nga tigdumala, kay walay lain nga ilhon bisan sa Dios o mga anghel.”⁵

“Si Juan [Bautista] naghupot sa Aaronic Priesthood, ug usa ka legal nga tigdumala, ug ang nag-una ni Kristo, ug miabut aron sa pag-andam sa dalan alang kaniya…. Si Juan usa ka priest sa kapunongan ni Aaron sa atubangan ni Kristo….

“Ang mga yawe sa Aaronic Priesthood gihatag ngadto kaniya, ug siya mao ang tingog sa usa nga nagsinggit sa kamingawan, nag-ingon, ‘andama ninyo ang dalan alang sa Ginoo ug tul-ira ninyo ang iyang mga agianan.’ [Mateo 3:3.] …

“Ang Manluluwas miingon ngadto ni Juan, Kinahangalang bunyagan mo ako. Ngano man? Aron sa pagtubag sa akong mga balaod [tan-awa sa Mateo 3:15]…. Si Jesus walay legal nga tigdumala [gawas] ni Juan.

“Walay kaluwasan tali sa duha ka mga tabon sa Biblia nga walay legal nga tigdumala.”⁶

Ang tawo kinsa adunay espiritu ni Elias adunay “giandam nga buluhaton” nga gihatag ngadto kaniya sa Ginoo.

“Espiritu kini ni Elias nga gusto nakong unahon sa paghisgot, ug aron moabut sa hilisgutan, akong kutloon ang pagpamatuod gikan sa Kasulatan ug ihatag ang akong kaugalingong pagpamatuod.

“Sa sinugdanan, igo na ang pagsulti, nga ako miadto sa kakahoyan aron sa pagpangutana sa Ginoo, pinaagi sa pag-ampo, ang Iyang kabubut-on mahitungod kanako, ug ako nakakita og usa ka anghel nga si [Juan ang Bautista], ug iyang gipandong ang iyang mga kamot sa akong ulo, ug mi-ordinar kanako nga mahimong usa ka Priest sunod sa kapunongan ni Aaron, ug sa paghupot sa mga yawe niini nga Priesthood, ang mao nga katungdanan mao ang pagsangyaw og paghinulsol ug bunyag alang sa kapasayloan sa mga sala, ug usab sa pagbunyag. Apan ako gipahibalo nga kini nga katungdanan wala maglakip sa pagpandong sa mga kamot alang sa paghatag sa Espiritu Santo; nga kana nga katungdanan usa ka dako nga buluhaton, ug ihatag sa sunod, apan nga akong pagka-ordinar usa ka giandam nga buluhaton, o ang mag-una, nga mao ang espiritu ni Elias; kay ang espiritu ni Elias nag-una sa pag-andam sa dalan alang sa mas dako pa, nga mao ang nahitabo ni Juan Bautista. Miabut siya nga nagsinggit gikan sa kamingawan, ‘Andama ninyo ang dalan alang sa Ginoo, tul-ira ninyo ang iyang mga agianan.’ [Mateo 3:3.] Ug sila gipahibalo, kon sila makadawat niini, nga kini mao ang espiritu ni Elias [tan-awa sa Mateo 11:14]; ug si Juan sigurado kaayo sa pagsulti sa mga katawhan, siya dili mao ang Kahayag, apan gipadala aron sa pagsaksi niana nga Kahayag [tan-awa sa Juan 1:8].

“Iyang gisultihan ang mga katawhan nga ang iyang misyon mao ang pagsangyaw sa paghinulsol ug bunyag sa tubig, apan Siya mao ang moabut sunod kaniya nga mobunyag pinaagi sa kalayo ug sa Espiritu Santo [tan-awa sa Mateo 3:11].

“Kon usa pa siya ka impostor, naglihok unta siya lapas sa iyang awtoridad, ug mopahigayon og mga ordinansa nga dili apil niana nga katungdanan ug balaan nga tawag, ubos sa espiritu ni Elias.

“Ang espiritu ni Elias mao ang pag-andam sa dalan alang sa mas labaw pa nga pagpadayag sa Dios, diin [ang espiritu ni Elias] mao ang Priesthood ni Elias, o ang Priesthood nga gi-ordinar ngadto ni Aaron. Ug kon ang Dios mopadala og usa ka tawo nganhi sa kalibutan aron sa pag-andam alang sa mas importante nga buhat, ang paghupot sa mga yawe sa gahum ni Elias, nga gitawag nga doktrina ni Elias, bisan sa unang panahon sa kalibutan.

“Ang misyon ni Juan limitado ngadto sa pagsangyaw ug pagbunyag; apan unsay iyang gibuhat legal; ug kon si Jesukristo moduol ni bisan kinsa sa mga tinun-an ni Juan, Siya mobunyag kanila pinaagi sa kalayo ug sa Espiritu Santo…. Si Juan wala molapas sa iyang katungod, apan matinud-anong mipahigayon niana nga anaa sa iyang katungdanan; ug sa matag bahin nianang dako nga bilding kinahanglang husto nga maandam ug mapahimuslan sa tukmang dapit niini; ug kinahanglang mahibaloan kinsa ang naghupot sa mga yawe sa gahum, ug kinsa ang wala, o kita mahimong mailad.

“Kana nga tawo kinsa naghupot sa mga yawe ni Elias adunay giandam nga buhat…. Ang espiritu ni Elias gipadayag ngari kanako, ug ako nasayud nga kini tinuod; busa mamulong ako uban ang kaisug, kay ako nasayud gayud sa akong doktrina nga tinuod.”⁷

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Basaha ang istorya ni Juan Bautista nga nagtugyan sa Aaronic Priesthood diha kang Joseph Smith ug ni Oliver Cowdery (mga pahina 93–94, 100). Unsay epekto niini nga hitabo diha ni Joseph ug Oliver? Unsa ang mga epekto niini nga hitabo diha sa inyong kinabuhi?
Basaha ang unang tibuok nga paragrap sa pahina 94, magtimaan nga si Juan Bautista mitawag kang Joseph ug Oliver nga “kauban nga mga sulugoon.” Sa unsa nga mga paagi nga kini nga pulong makatabang sa mga naghupot sa priesthood? Sa unsa nga mga paagi nga kini nga pulong makaimpluwensya sa atong inter-aksyon uban sa batan-ong mga lalaki kinsa naghupot sa Aaronic Priesthood?
Ribyuha ang seksyon sa hugna nga nagsugod sa pahina 95. Unsa ang inyong mga hunahuna ug mga pagbati mahitungod ni Juan Bautista ug sa misyon nga iyang gipahigayon panahon sa iyang mortal nga kinabuhi?
Si Propeta Joseph Smith mitudlo nga si Juan Bautista usa ka legal nga tigdumala” (mga pahina 99–101). Unsa sa inyong hunahuna ang gipasabut sa pulong “legal nga tigdumala” kalabut ngadto sa priesthood? Ngano nga “walay kaluwasan … kon wala ang legal nga tigdumala?” (pahina 85).
Samtang inyong basahon ang katapusang seksyon sa hugna (mga pahina 85–86), ribyuha usab ang kahulugan sa pulong nga “Elias” nga gihatag sa Bible Dictionary (tan-awa sa Bible Dictionary, pahina 663). Unsa ang espiritu ni Elias? Sa unsa nga paagi si Juan Bautista nag-andam sa dalan sa pag-anhi sa Manluluwas?
Si Joseph Smith miingon nga ang pagtugyan sa Aaronic Priesthood “usa ka giandam nga buhat” tungod kay kini nag-andam sa agianan sa butang nga mas labaw pa (mga pahina 100–01). Unsa ang mabuhat sa Aaronic Priesthood sa pag-andam sa pagdawat sa Melchizedek Priesthood? Unsa ang mabuhat sa mga ginikanan, mga apohan, mga magtutudlo, ug mga lider sa pagtabang kanila nga makaandam?

May Kalabutan nga mga Kasulatan: Mateo 3:1–17; 1 Nephi 10:7–10; Hubad ni Joseph Smith, Mateo 3:43–46

Joseph and Oliver receiving Aaronic priesthood — Gipahiuli ni Juan Bautista ang Aaronic Priesthood ngadto ni Joseph Smith ug Oliver Cowdery niadtong Mayo 15, 1829, nag-ingon” “Diha kaninyo akong kauban nga mga sulugoon, sa ngalan sa Mesiyas, ako motugyan sa Pagkapari ni Aaron.”

John the Baptist baptizing Christ — Ang Manluluwas miadto kang Juan Bautista aron magpabunyag tungod kay si Juan “naghupot sa Aaronic Priesthood, ug usa ka legal nga tigdumala.”