O Le Perisitua e Faavavau

“O le Perisitua Mekisateko… o se auala lea ua faaali mai ai mai le lagi le poto uma, mataupu faavae, o le ata o le faaolataga, ma mataupu taua taitasi uma.”

Mai le Soifuaga o Iosefa Samita

Ina ua maea ona la mauaina le Perisitua Arona ma le sauniga o le papatisoga, na oo mai ia Iosefa Samita ma Oliva ni faamanuiaga la te le i mauaina lava muamua. Na tusia faamaumau e le Perofeta: “Ina ua faapea ona faapupulaina o maua mafaufau, sa oo ina amata ona ma manino lelei i tusitusiga paia, ma sa oo ina faaalia ia i maua le uiga moni o ona fuaitau faigata, i se auala ma te lei mafai ona mauaina muamua, pe mafaufauina foi” (Iosefa Samita 2:74). Faatasi ai ma lenei malamalama faaopoopo mai, na la uunai ai i luma i la laua galuega o le faaliliuina o le Tusi a Mamona. Ae e le i mauaina e le Perofeta se faamanuiaga taua— lea sa tatau ai a o le i faatuina e ia le Ekalesia, faatulagaina tofi ma korama perisitua, ma faaee atu le mea foaifua o le Agaga Paia. E manaomia lona mauaina o le Perisitua Mekisateko.

E pei ona folafolaina mai e Ioane le Papatiso, na tuuina mai lenei faamanuiaga ia Iosefa ma Oliva i se taimi e le i umi talu ona mauaina le Perisitua Arona. O Aposetolo anamua o Peteru, Iakopo, ma Ioane na faaali mai ia i laua i se nofoaga filemu i talaane o le Vaitafe o le Susquehanna ma faaee le Perisitua Mekisateko i o laua luga. Na mulimuli ane tautino mai e Iosefa na ia faalogo i “le leo o Peteru, Iakopo, ma Ioane i le vao i le va o Heremoni, i le itumalo o Susquehanna ma Colesville i le itu malo o Broome, i le vaitafe o le Susquehanna, ua ta’utino mai o ia i latou lava ki o le malo, ma le augatupulaga o le atoatoaga o aso” (MFF 128:20).

I tausaga na sosoo ai, na asiasia Iosefa Samita e le tele o isi o e na umia le perisitua mai aso anamua. O nei avefeau mai le Atua na oo mai e toefuatai mai ki o le perisitua e manaomia ina ia faaatoatoaina ai faamanuiaga o le talalelei e mafai ona maua e le fanau a le Atua. Na latou oo mai foi e aoao le perofeta o le a tu i le ulu o le augatupulaga o le atoatoaga o aso.

Na faamalamalama mai e Peresitene Ioane Teila, o le Peresitene lona tolu o le Ekalesia e faapea: “O Mose, Elia, Elaia ma le tele o taitai o loo taua i Tusitusiga Paia, o e na galulue i augatupulaga eseese, na oo mai ma faaee atu i luga o Iosefa ia ki eseese, mana, aia tatau, avanoa ma [faatagaga] na latou olioli ai i lo latou taimi. … Po o a lava tulaga o le poto, o le malamalama, o le Perisitua, o mana, o faaaliga na faaeeina i luga o na tagata i tupuaga eseese, na toefuataiina mai i le lalolagi e ala i le auaunaga a i latou sa umia le Perisitua paia a le Atua, i tisipenisione eseese sa soifua ai.”¹

Na tautino mai foi e Perestene Teila: “Afai e te fesili ia Iosefa po o le a le ituaiga tagata e i ai Atamu, o le a ia ta’u atu ia te oe i le taimi lava lena; na te faamatalaina atu lona fuaitino ma ona foliga ma mea uma e uiga ia te ia. Atonu a na e fesili ia te ia po o a ituaiga tagata e i ai Peteru, Iakopo ma Ioane, semanu e mafai foi ona ia tauina atu ia te oe. Aisea? Aua na ia vaai ia te i latou.”²

Ia Setema 1842, na tusia ai e le Perofeta se tusi i le Ekalesia e faailoa atu ai lona olioli a o ia mafaufau loloto i le malamalama ma ki o le perisitua ua toefuataiina mai nei i le lalolagi: “O lenei, foi, se a ea ua tatou faalogoina? O tala fiafia mai Kumora! O Moronae, o se agelu mai le lagi, ua talai mai le faataunuuina o le au perofeta—o le tusi e faaalia mai. … O le leo o Mekaeli le agelu sili; o le leo o Kaperielu, faapea ma Rafaele, ma agelu eseese, mai ia Mekaeli, po o Atamu e oo mai i nei ona po, ua tautino mai e i latou uma lo latou augatupulaga a latou aia tatau, a latou ki, o latou viiga, o latou paia ma mamalu, ma le mana o lo latou perisitua; ua tuuina mai fuaiupu, ma fuaiupu, o le mataupu ma le mataupu; o sina mea itiiti iinei, ma sina mea itiiti iina; ua tuuina mai ia i tatou le faamafanafanaga i le faaali mai o mea e oo mai ua faamaoni a’i lo tatou faamoemoe!” (MFF 128:20–21).

Aoaoga a Iosefa Samita

O le perisitua e tumau ma na umiaina e perofeta i augatupulaga uma.

“Ua i ai se fesootaiga o pule ma mana mai ia Atamu e oo mai i le taimi lenei.”³

“O le Perisitua na uluai tuuina atu ia Atamu; na ia te ia le Au Peresitene Sili, ma umia ki o le Perisitua mai lea tupulaga i lea tupulaga. Na ia mauaina i le Foafoaga, a o le i foafoaina le lalolagi, e pei ona i ai i le Kenese 1:26, 27, 28. Na tuuina atu ia te ia le pule i mea ola uma. O ia o Mekaeli le Agelu Sili, ua ta’uta’ua i Tusitusiga Paia. Ona tuuina atu lea o le perisitua ia Noa, o ia o Kaperielu; e sosoo mai ia Atamu lona tulai mai i le pule i le PerisitJohn Taylor, Deseret Newsua; na valaauina o ia e le Atua i lenei tofi, ma o ia o le tama o tagata ola uma i ona aso, ma na tuuina atu ia te ia le pule. O nei tagata na umia muamua ki i le lalolagi, ona umia ai lea i le lagi.

“O le Perisitua o se mataupu faavae tumau, ma na i ai faatasi ma le Atua mai le faavavau, ma e oo atu i le faavavau, e leai se amataga o aso po o iuga o tausaga [tagai Joseph Smith Translation, Hebrews 7:3]. E tatau ona aumaia ki mai le lagi i soo se taimi lava e aumaia ai le Talalelei. A oo ina faaalia mai i latou mai le lagi, e ala mai lea i le pule a Atamu.

“Na tautala Tanielu i lana mataupu lona fitu e uiga i le Anamua ona Aso; o lona uiga o le tagata sili ona matua, o lo tatou Tama o Atamu, Mekaeli; o le a ia valaauina faatasi lana fanau ma faia se fonotaga ma i latou e saunia i latou mo le afio mai o le Atalii o le Tagata [tagai Tanielu 7:9–14]. O ia [Atamu] o le tama o le aiga tagata, ma e pulefaamalumalu i luga o agaga o tagata uma, ma o latou uma e i ai ki e tatau ona tutu i ona luma i lenei fono tele. … O le Atalii o le Tagata e tu i ona luma, ma tuuina atu ia te ia le mamalu ma le pule. E tuuina atu e Atamu lana pulega ia Keriso, lea na tuuina atu ia te ia e umia ai ki o le vanimonimo, ae tumau ai i lona tulaga o le ulu o le aiga o le fanauga a tagata.

“… Na valaauina e Le Tama agaga uma lava i Ona luma i le foafoaga o le tagata, ma sa faatulagaina i latou. O ia (Atamu) o le ulu, ma na poloaiina ina ia uluuluola. Na muamua lava tuuina atu ia te ia ki, ma tuuina atu foi e ia i isi. O le a manaomia lona tuuina atu o se tala o lana pulega, ma faapena foi ona latou tuuina atu ia te ia.

“E faavavau le Perisitua. Na tuuina atu e le Faaola, Mose, ma Elia, ki ia Peteru, Iakopo, ma Ioane, i luga o le mauga, ina ua liua i latou i ona luma. E faavavau le Perisitua—ua leai se amataga o ona aso, po o se gataaga o ona tausaga; e leai sona tama, e leai sona tina, ma isi. Afai e leai se suiga o sauniga, e leai se suiga o le Perisitua. Po o fea lava e faia ai sauniga o le Talalelei, e i ai foi le Perisitua.

“Na faapefea ona tatou mauaina le Perisitua i aso e gata ai? Na faasolo mai i lalo, i lalo, i le faasologa tatau. O Peteru, Iakopo, ma Ioane na tuuina atu i ai ia te i latou ona latou tuuina atu ai lea i isi. O Keriso o le Faitaulaga Sili Silisili Ese; o Atamu e sosoo ai. Na tautala Paulo e uiga i le oo mai o agelu e manomanō e faapotopoto faatasi ma le Ekalesia—i le Atua o le faamasino aoao—o agaga o e ua amiotonu ua faaatoatoaina; ia Iesu le Puluvaga o le feagaiga fou [tagai Eperu 12:22–24].”⁴

O Perofeta na umiaina ki o le perisitua i aso anamua ua au faatasi mai i le faataunuuina o le galuega i le augatupulaga faaiu.

“Na ou vaai ia Atamu i le vanu o Adam-ondi-Ahman. Na ia faamaopoopo mai lana fanau ma faamanuia i latou i se faamanuiaga faapeteriaka. Na afio ifo le Alii i lo latou totonugalemu, ma na faamanuia e ia (Atamu) i latou uma, ma mua’i folafola atu ai mea e tatau ona oo mai ia i latou i le augatupulaga aupito lata mai.

“O le mea lea na faamanuia ai e Atamu lana fanau; na manao o ia e aumaia i latou i le afioaga o le Atua. Aua na latou faatalitali mo se aai, ma isi, [‘o lona mataisau ma le tufuga o le Atua lea’—Eperu 11:10]. Na faatalitali Mose e aumai le fanauga a Isaraelu i le afioaga o le Atua, e ala i le mana o le Perisitua, ae na le mafaia e ia. I uluai tupuaga o le lalolagi na latou taumafai e faatuina le mea lava e tasi; ma na i ai le au Elia na faatuina mai o e na taumafai e toefuataiina nei lava mamalu, ae e le ausia e i latou; ae na latou valoia le aso o le a faaalia mai ai lenei mamalu. Na tautala Paulo e uiga i le augatupulaga o le atoaga o taimi, pe a oo ina faaopoopo mai faatasi e le Atua mea uma i le mea e tasi, ma isi, [tagai Efeso 1:10]; ma o na tagata ua uma ona tuuina atu i ai ia ki, e tatau ona i ai iina; ma o i latou a aunoa ma i tatou e le mafai ona faatoatoaina lelei i latou.

“O nei tagata ua i le lagi, ae o a latou fanau o loo i le lalolagi. O loo naunau mai o latou loto mo i tatou. O le mafuaaga lea e auina mai ai e le Atua tagata i le lalolagi. ‘E aauina atu e le Atalii o le tagata ana agelu, latou te faapotopotoina nai lona malo mea uma e tausuai ai ma e amio leaga.’ [Mataio 13:41.] O nei sui faamoemoeina uma lava o le a o mai i lalo nei e tatou te au faatasi i le faataunuuina o lenei galuega.

“O le Malo o le Lagi e tusa ia ma le fua o le sinapi. O le fua o le sinapi e sili ona laitiiti, ae tupu ae ai foi le laau tele, ma ua momoe ai foi manu felelei i ona lala. [Tagai Mareko 4:30–32.] O manu o agelu ia. O le mea lea e o mai ai agelu, e au faatasi e faapotopoto mai a latou fanau, ma faapotopotoina i latou. E le mafai ona faaatoatoaina i tatou e aunoa ma i latou, e faapena foi i latou e aunoa ma i tatou; pe a oo ina maea ona faia ia mea, ona afio ifo ai lea o le Atalii o le Tagata, ae tietie Le ua mai Anamua Ona Aso; e mafai ona tatou o mai i le manomanō o agelu e faapotopoto faatasi ma i latou, e fesootai ai ma maua mai ai faatonuga mai ia i latou.”⁵

O sauniga perisitua na faavae mai lava i le amataga ma e tatau ona tausia i le ala ua tofia e le Atua.

“O Atamu … o le uluai tagata, o lē o loo taua i le Tanielu o ‘Lē ua mai Anamuā Ona Aso [Tanielu 7:9], pe i se isi faaupuga, o lē muamua ma lē sili ona matua o tagata uma, o le tuaa sili ona matua, lea e ta’ua i isi vaega o ia o Mekaeli, aua o ia na muamua ma o le tama o tagata uma, e le gata i fanau, ae o lē foi na uluai umia faamanuiaga faaleagaga, o le na faaali i ai le ata o sauniga mo le faaolataga o ana fanau e oo i le iuga, ma o ia foi na uluai faaali i ai Keriso, ma e ala mai ia te ia ua faaali mai Keriso mai le lagi, ma o le a faaauau ai pea ona faaali mai e oo atu lava i le lumanai. Ua umia e Atamu ki o le augatupulaga o le faaatoaga o tausaga; o lona uiga, o augatupulaga o tausaga uma lava ua maea ona faaalia ma o le a faaalia e ala mai ia te ia mai le amataga e oo mai ia Keriso, ma mai ia Keriso e oo atu i le iuga o augatupulaga uma ia o le a faaalia mai. …

“… E faatulagaina e [le Atua] sauniga ina ia tumau e faavavau faavavau lava, ma faatu ai Atamu e leoleoina i latou, e faaalia mai i latou mai le lagi i tagata, po o le auina mai o agelu e faaalia mai i latou. ‘E le o agaga e auauna ea i latou uma, ua aauina e auauna ona o i latou o e a maua le ola?’ [Eperu 1:14.]

“O nei agelu ua i lalo o le taitaiga a Mekaeli po o Atamu, o lē galue i lalo o le taitaiga a le Alii. Mai le upusii o i luga ua tatou aoao mai ai na atoatoa lelei le malamalama o Paulo i fuafuaga a le Atua e faatatau i Lana fesootaiga ma tagata, ma o lena tofi paia ma le atoatoa na Ia faatuina i totonu ia te Ia lava, lea na Ia auina mai ai mana, faaaliga, ma mamalu.

“O le a le amanaiaina e le Atua i latou o e ua Ia le valaauina, faauuina, ma filifilia. I le amataga na valaauina e le Atua Atamu e ala i Lona lava siufofoga. ‘Ona valaau ai lea o Ieova le Atua ia Atamu ua faapea atu ia te ia, O fea o i ai oe? Ona tali mai lea o ia, Na ou faalogo atu i lou siufofoga i le faatoaga, ona ou fefe ai lea, aua ua ou le lavalavā; ona ou lafi lea.’ [Kenese 3:9–10.] Na maua e Atamu poloaiga ma faatonuga mai le Atua: o le faatulagaga lea mai le amataga.

“O lona mauaina o faaaliga, poloaiga ma sauniga i le amataga ua siliga ona finauina; ana leai pe na faapefea ea la ona amata ona latou osia taulaga i le Atua i se auala sa’o? Ma afai na latou osia taulaga, na tatau la ona tofia i latou e ala i le faauuga. Ua tatou faitau i le Kenese [4:4] o Apelu na avatu foi uluai tama a lana lafu, o e pepeti ai lava, ma ua silasila mai le Alii ia Apelu ma lana taulaga. …

“O lea la le natura o le Perisitua; o tagata uma taitoatasi e umia le Au Peresitene o lana augatupulaga, ma e tasi le tagata e umia le Au Peresitene o i latou uma, o Atamu lea; ma o Atamu e mauaina lana Au Peresitene ma lana pule mai le Alii, ae e le mafai ona mauaina e ia se atoatoa seiloga e oo ina avatu e Keriso le Malo i le Tama, lea o le a faataunuuina i le faaiuga o le augatupulaga faaiu.

“O le mana, mamalu ma faamanuiaga o le Perisitua e le mafai ona faaauauina e i latou o e na faauuina vagana ai ua faaauau pea lo latou amiotonu; aua o Kaino foi na tofia e osi taulaga, ae e le i osia i le amiotonu, ma na faamalaiaina. E faailoa mai ai, la, o le sauniga e tatau ona tausia i le auala tonu lava na tofia e le Atua; a leai o le a avea lo latou Perisitua ma faamalaiaga ae le o se faamanuiaga.”⁶

O le Perisitua Mekisateko o le auala lea ua faaalia mai ai e le Atua Ia lava ma Ana fuafuaga.

“E lua Perisitua o loo ta’ua i Tusitusiga Paia, ua ta’ua, o le faa- Mekisateko ma le faa-Arona po o le faa-LevΠ. Ae ui lava o loo i ai Perisitua e lua, ae o le Perisitua Mekisateko e aofia ai ma le Perisitua Arona po o le Perisitua faa-LevΠ, ma e umia le pule sili ona maualuga lea e i ai i le Perisitua, ma o ki o le Malo o le Atua i tupuaga uma o le lalolagi e oo lava i le tupuaga o loo i ai i le lalolagi, ma o le auala lea o le poto uma, mataupu faavae uma, le ata o le faaolataga ma mataupu taua uma taitasi e faaalia mai le lagi.

“O lona faatulagaga na faia a o le i ‘faavaeina lenei lalolagi, pe pepese faatasi fetu o le taeao, ma alalaga fiafia atalii uma o le Atua’ [tagai Iopu 38:4–7], ma o le Perisitua silisili ona maualuga ma paia, ma mulimuli i le faatulagaga a le Alo o le Atua, ae o isi Perisitua uma ua na o ni vaega, vaevaega, mana ma faamanuiaga e ā lea Perisitua, ma e umia, faafoeina, ma taitaiina e ala i lea Perisitua. O le perisitua foi o le auala lea na amata ona faaalia mai ai e le Silisiliese Lona mamalu i le amataga o le foafoaga o lenei lalolagi, ma auala mai ai Lona faaauau pea ona faaali mai o Ia lava i le fanauga a tagata e oo mai lava i le taimi lenei, ma faailoa mai ai Ana fuafuaga e oo i le iuga.”⁷

“O le mana o le Perisitua Mekisateko o le i ai lea o le mana o le ‘ola e le uma;’ aua o le feagaiga e faavavau e le mafai ona motusia. … O le a le mana o Mekisateko? E le o le Perisitua o Arona lea e faia sauniga faaletino, ma le osiga o taulaga. O i latou e umia le atoatoaga o le Perisitua Mekisateko o tupu ma faitaulaga a le Atua Silisili Ese, e umiaina ki o mana ma faamanuiaga. E moni, o le perisitua o se tulafono atoatoa o le malo faaleatua, ma tulai ai e pei o le Atua e tuuina atu tulafono i le nuu, ma tuuina atu ola e le uma i atalii ma afafine o Atamu. …

“‘E leai sona tama, e leai sona tina, e leai ni ona tupuga, e leai se amataga i ona aso po o se gataaga i lona soifua, a ua faapei o le Alo o le Atua, ua tumau o ia o le faitaulaga e faavavau.’ [Eperu 7:3.] E umiaina e le Perisitua Mekisateko le aia mai le Atua e faavavau, ae le mai sona tupuga mai se tama ma tina; ma o lena perisitua e faavavau faapei o le Atua Lava Ia, e leai se amataga i ona aso po o se gataaga i lona soifua. …

“… O le Perisitua [Arona] faa-LevΠ, e aofia ai ositaulaga e faia galuega faaletino, [ua] faia e leai se tauto; ae o le Perisitua Mekisateko ua faia ma le tauto ma le feagaiga.”⁸

“O le Perisitua Mekisateko [e] le o se isi lava a o le Perisitua a le Alo o le Atua;. … o loo i ai sauniga faapitoa e a le Perisitua, ia e maua mai ai taunuuga faapitoa. … O se tasi o avanoa maoae o le Perisitua o le mauaina lea o faaaliga e faatatau i le mafaufau ma le loto o le Atua. O le avanoa foi o le Perisitua Mekisateko, e faatonu atu, e aoai atu, ma apoapoai atu, faapea foi le talia o faaaliga.”⁹

“O perisitua uma lava e faa-Mekisateko; ae peitai o loo i ai ni ona vaega po o tulaga eseese. … O perofeta uma lava na umia le Perisitua Mekisateko.”¹⁰

“Ou te apoapoai atu i tagata uma ina ia agai pea i le atoatoa, ma matua sailiili loloto lava i mea lilo o le faale-Atua. E le mafai e se tagata ona faia se mea mo ia lava vagana ua taitaiina o ia e le Atua i le ala sa’o; ma o le perisitua e mo le faamoemoe lena.”¹¹

E tatau i se tagata ona faatagaina e le Atua ma faauuina i le perisitua na te faia ai sauniga o le faaolataga.

Mataupu Faavae o le Faatuatua 1:5: “Matou te talitonu e ao ina valaauina le tagata e le Atua, i le valoaga, ma le faaee atu o lima, o e o i ai le pule, e talai atu ai le talalelei ma faia sauniga o i ai.”¹²

“Matou te talitonu e le mafaia e se tagata ona taitaia le faaolataga e ala i le talalelei, i agaga o tagata, i le suafa o Iesu Keriso, vagana ua faatagaina o ia mai le Atua, e ala i faaaliga, pe ala i le faauuina o ia e se tasi o le ua auina mai e le Atua e ala i le faaaliga, e pei ona tusia e Paulo, Roma 10:14, Pe faapefea ona latou valaau atu i le ua latou le faatuatua i ai? pe faapefea foi ona latou faalogo atu, pe a leai se tala’i atu? pe faapefea foi ona latou tala’i atu, pe afai ua le aauina atu i latou? Ma o le a ou fesili atu, e faapefea ona aauina atu i latou e aunoa ma se faaaliga, po o se isi lava faailoga vaaia o le faaaliga a le Atua? E toe faapea atu, Eperu 5:4, ‘E le fai fua foi e se tasi lenei faiva mamalu, tau o le ua filifilia e le Atua, e faapei o Arona foi.’—Ma ou te fesili atu, na faapefea ona valaauina Arona, e aunoa ma le faaaliga?”¹³

“Na tau atu e le agelu ia Konelio e tatau ia te ia ona auina atu Peteru e aoao mai pe faapefea ona faaolaina [tagai Galuega 10:21–22]: Na mafai e Peteru ona papatiso, ae e le mafai e agelu, pe a i ai lava ē mautofiga ua tofia i la le tino o loo umia ki o le malo, po o le pule o le perisitua. O loo i ai se faamaoniga faaopoopo e tasi e uiga i lenei mataupu, ma e faapea ina ua faaali Iesu lava ia i a Paulo i lona ala i Tamaseko, na te le i tauina atu ia te ia pe faapefea ona faaolaina o ia. Na Ia faatulagaina i le ekalesia muamua Aposetolo, ma lona lua perofeta, latou te fai ai le galuega a auauna, ma ia faaatoatoaina ai le au paia, ma isi, [tagai Efeso 4:11–12]; ma talu ai o le tulafono sili o le lagi ia leai lava se mea e faia i le lalolagi e aunoa ma le faaalia o mea lilo i ana auauna o perofeta, e o gatasi ma le Amosa 3:7, o lea e lei mafai ona aoao mai e Paulo ni mea se tele mai le Alii e faatatau i lona valaauga i le faaolataga o tagata uma, e pei ona mafai ona ia aoaoina mai i se tasi o sāvali a Keriso ua valaauina i le valaauga e tasi faalelagi a le Alii, ma faaeeina i ai le mana e tasi mai luga—ina ia soo se mea foi latou te fusifusia i le lalolagi, e fusifusia foi lea i le lagi; o se mea foi latou te tālā i le lalolagi, e tatalaina foi lea i le lagi [tagai Mataio 16:19]”¹⁴

O se avanoa maoae le faalauteleina o soo se tofiga i le perisitua.

“[O le] Perisitua … e mafai ona faamalamalamaina i le faatusa o le tino tagata, lea e i ai vaega eseese, lea e i ai tofiga eseese e faatinoina; e manaomia uma lava i o latou tulaga, ma o le tino e le atoatoa e aunoa ma vaega uma. … Afai e malamalama se Ositaulaga i lona tiute, i lona valaauga, ma le galuega, ma talai atu e ala i le Agaga Paia, o lona fiafia e maoae e pei o ia o se tasi o le Au Peresitene; ma o ana auaunaga e manaomia i le tino, e pei foi ona manaomia i latou o Aoao ma Tiakono.”¹⁵

Na lipoti mai e Eliza R. Snow: “[Na tuuina atu e Iosefa Samita] faatonuga e faatatau i tofiga eseese, ma le taua i tagata taitoatasi o le galue i le vaega ua tofia i ai o ia, ma ia faataunuuina tofiga eseese ua tofia i ai i latou. Na ia tautala i le manatu o le tele o tagata e faapea o tofi maualalalo i le Ekalesia e le mamalu, ma vaai i ai ma le fuā i tulaga o isi ua valaauina e pulefaamalumalu ia te i latou; ma o le valea ma le sese lena o le loto faaletagata mo se tagata o loo tau saili atu mo isi tofiga e ese mai i valaauga ua valaauina i ai i latou e le Atua e faataunuuina; ma e sili ai i tagata taitoatasi le faalautele o lo latou lava valaauga. … E tatau i tagata uma taitoatasi ona na o le saili lava e faalauteleina lona lava tofiga ma lona valaauga.”¹⁶

Fautuaga mo Suesuega ma le Aoaoaina Atu

Mafaufau i manatu nei ao e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau vii–xii.

Toe iloilo le tala ia Peteru, Iakopo, ma Ioane a o faaeeina atu le Perisitua Mekisateko i luga o Iosefa Samita ma Oliva Kaotui (itulau 107). O a ni faamanuiaga ua maua e oe ma lou aiga ona ua toefuataiina mai le Perisitua Mekisateko?
I le mataupu atoa lava, o loo molimau Iosefa Samita e uiga i se fesootaiga i le pule o le perisitua e ala i se faasologa o perofeta. Aisea e te manatu ai sa taua lenei mataupu faavae mo ia e aoao mai i ona aso? Aisea e manaomia ai lo tatou malamalama i lenei mataupu faavae i le asō? E faapefea e le fesootaiga o le pule lea na faamatala mai e Iosefa Samita ona fesootai ma le laina o le pule o le perisitua o se tagata?
A o e faitauina lenei mataupu, matau le faaaogaina e le Perofeta o Iosefa Samita o upu tumau, faavavau, ma le vavau. O le a le mea e ta’u atu ia te oe e nei upu e uiga i le natura ma le taua o le perisitua?
Sa aoao mai e Iosefa Samita o le Atua “na faatuina sauniga ina ia tutusa e faavavau faavavau lava” ma “o sauniga e tatau ona tausia i le ala tonu na tofia ai e le Atua” (itulau 110–111). E faateleina faapefea e nei aoaoga lou malamalama i sauniga o le talalelei?
Toe iloilo aoaoga a le Perofeta o Iosefa Samita e uiga i le Perisitua Mekisateko (itulau 114–116). Mafaufau pe faapefea ona manaomia le Perisitua Mekisateko i vaega uma lava o le talalelei. O a ni ou manatu ma lagona a o e manatunatu loloto faapea i le Perisitua Mekisateko?
Toe iloilo parakalafa faaiu e lua i le mataupu (itulau 117–118). Ua faapefea ona e vaai o loo faia e tagata taitoatasi o le Ekalesia se vaega taua i le galuega a le Alii? O le a se taunuuga e oo i ai pe a tatou “vaai ai ma le fuā” ia i latou o e ua valaauina e auauna e avea ma taitai i le Ekalesia? Mafaufau po o le a se mea e mafai ona e faia e faalauteleina ai lou lava valaauga.

Mau E Faatatau I Ai: Alema 13:1–12; MFF 27:5–14; 84:33–44, 109–10; 107:6–20; 121:34–46

Melchizedek Priesthood being conferred — Na faaee atu e Aposetolo anamua o Peteru, Iakopo, ma Ioane le Perisitua Mekisateko i luga o Iosefa Samita ma Oliva Kaotui. “O ki [o le perisitua],” na tautino mai ai e le Perofeta, “e tatau ona aumaia mai le lagi i soo se taimi e auina mai ai le Talalelei.”

“Na ou vaai ia Atamu i le vanu o Adam-ondi-Ahman. Na ia faamaopoopo mai lana fanau ma faamanuia i latou i se faamanuiaga faapeteriaka. Na afio ifo le Alii i lo latou totonugalemu.”

setting apart — “Matou te talitonu e ao ina valaauina le tagata e le Atua, i le valoaga, ma le faaee atu o lima, o e o i ai le pule, e talai atu ai le talalelei ma faia sauniga o i ai.”