Ang Mahangturong Priesthood

“Ang Melchizedek Priesthood … mao ang agianan diin ang tanang kahibalo, doktrina, plano sa kaluwasan, ug ang matag importanting butang nga gipadayag gikan sa langit.”

Gikan sa Kinabuhi ni Joseph Smith

Human nila madawat ang Aaronic Priesthood ug ang ordinansa sa bunyag, si Joseph Smith ug Oliver Cowdery nakasinati og mga panalangin nga wala nila sukad mahibaloi kaniadto. Ang Propeta mirekord: “Ang among mga hunahuna nga karon nadanagan, kami misugod og pag-angkon sa salabutan sa mga kasulatan, ug ang tinuod nga kahulugan ug katuyoan sa ilang labaw nga kahibulongan nga mga pulong nga gipadayag ngari kanamo sa usa ka paagi nga kami dili gayud unta makakat-on, ni sukad makahunahuna” ( Joseph Smith—Kasaysayan 1:74). Niining dugang nga panabut, nagpadayon sila sa ilang buluhaton sa paghubad sa Basahon ni Mormon. Apan ang Propeta wala pa makadawat og importante nga panalangin—kadtong gikinahanglan sa dili pa niya ma-organisar ang Simbahan, ma-establisar ang mga katungdanan ug mga korum sa priesthood, ug motugyan sa gasa sa Espiritu Santo. Kinahanglang madawat niya ang Melchizedek Priesthood.

Sumala sa gisaad ni Juan Bautista, kini nga panalangin gihatag ngadto ni Joseph ug Oliver human dayon sa ilang pagdawat sa Aaronic Priesthood. Ang karaang mga Apostoles nga sila si Pedro, Santiago, ug Juan nagpakita ngadto kanila sa hilit nga dapit duol sa Sapa sa Susquehanna ug mitugyan sa Melchizedek Priesthood diha kanila. Sa wala madugay si Joseph mipahayag nga siya nakadungog sa “tingog ni Pedro, Santiago, ug Juan sa kamingawan taliwala sa lalawigan sa Harmony, Susquehanna, ug sa lalawigan sa Colesville, Broome, diha sa Sapa sa Susquehanna, namahayag sa ilang mga kaugalingon nga naghupot sa mga yawe sa gingharian, ug sa dispensasyon sa kahingpitan sa mga panahon!” (D&P 128:20).

Sa mga katuigan nga misunod, si Joseph Smith gibisitahan sa daghang laing mga naghupot sa priesthood gikan sa karaang mga panahon. Kini nga mga mensahero nga gikan sa Dios miabut aron sa pagpahiuli sa mga yawe sa priesthood nga gikinahanglan aron ang hingpit nga mga panalangin sa ebanghelyo anaa alang sa mga anak sa Dios. Mianhi usab sila sa pagtudlo sa propeta kinsa mobarug nga pangulo sa dispensasyon sa kahingpitan sa mga panahon.

Si Presidente John Taylor, ang ikatulo nga Presidente sa Simbahan, mipasabut: Si Moises, Elijah, Elias ug sa daghang nagunang mga tawo nga gihisgutan sa mga Kasulatan, kinsa naglihok sa lain-laing mga dispensasyon, miabut ug mitugyan diha kang Joseph sa nagkalain-lain nga mga yawe, mga gahum, mga katungod, mga pribilihiyo ug [pagtugot] nga ilang naangkon sa ilang mga panahon…. Bisan unsa nga kahibalo, sa salabutan, sa Priesthood, sa mga gahum, sa mga pagpadayag gitugyan niadtong mga tawhana sa lain-laing mga panahon, gipahiuli pag-usab dinhi sa yuta pinaagi sa pagpangalagad ug pinaagi niadtong kinsa naghupot sa Priesthood sa Dios sa lain-laing mga dispensasyon diin sila nagpuyo.”¹

Si Presidente Taylor mipahayag: “Kon inyong pangutan-on si Joseph unsa nga klase sa tawo si Adan, sultihan kamo niya dihadiha, sultihan kamo niya sa iyang gidak-on ug panagway ug sa tanan nga mahitungod kaniya. Tingali makapangutana kamo unsa nga klase sa mga tawo sila si Pedro, Santiago ug Juan, ug siya makasulti kaninyo. Ngano man? Tungod kay siya nakakita kanila.”²

Niadtong Septyembre 1842, ang Propeta misulat ngadto sa Simbahan mipahayag sa iyang kalipay samtang siya namalandong sa kahibalo ug sa mga yawe sa priesthood nga karon gipahiuli dinhi sa yuta: “Ug usab, unsa ang atong nabati? Malipayon nga mga balita gikan sa Cumorah! Si Moroni, usa ka anghel gikan sa langit, nagpadayag sa katumanan sa mga propeta—ang basahon nga ipadayag…. Ug ang tingog ni Miguel, ang arkanghel; ang tingog ni Gabriel, ug ni Rafael, ug sa nagkalain-lain nga mga anghel, gikan ni Miguel o ni Adan hangtud karon nga panahon, nagpahayag sa ilang tanan nga mga dispensasyon, ilang mga katungod, ilang mga yawe, ilang mga dungog, ilang pagkaharianon ug himaya, ug sa gahum sa ilang pagkapari; naghatag og pagtulun-an ngadto sa lain nga pagtulun-an, naghatag og lagda ngadto sa lain nga lagda; karon gamay, ug lain nga panahon gamay; naghatag kanato og kalipay pinaagi sa pagpugong niana nga moabut, nagmatuod sa atong paglaum!” (D&P 128:20–21).

Mga Pagtulun-an ni Joseph Smith

Ang priesthood mahangturon ug gihuptan sa mga propeta sa matag dispensasyon.

“Dihay kutay sa awtoridad ug gahum gikan ni Adan hangtud karong panahona.”³

“Ang Priesthood unang gihatag ngadto ni Adan; naangkon niya ang First Presidency, ug naghupot sa mga yawe niini gikan sa henerasyon ngadto sa henerasyon. Naangkon niya kini didto sa Paglalang, sa wala pa maporma ang kalibutan, sama sa Gen. 1:26, 27, 28. Gihatag kaniya ang kamandoan sa tanang buhi nga nilalang. Siya si Miguel ang Arkanghel, nga gihisgutan diha sa mga Kasulatan. Dayon ngadto ni Noe, kinsa mao si Gabriel; nagbarug siya nga awtoridad sunod ni Adan diha sa Priesthood; gitawag siya sa Dios niini nga katungdanan, ug mao ang amahan sa tanang buhi sa iyang panahon, ug ngadto kaniya gihatag ang kamandoan. Kini nga mga tawo naghupot sa mga yawe una dinhi sa yuta, ug dayon didto sa langit.

“Ang Priesthood usa ka mahangturong baruganan, ug diha uban sa Dios gikan sa kahangturan, ug hangtud sa kahangturan nga walay sinugdanan sa mga panahon o katapusan sa mga katuigan [tan-awa sa Hubad ni Joseph Smith, Mga Hebreohanon 7:3]. Ang mga yawe kinahanglang dad-on gikan sa langit kon ang Ebanghelyo ipadala. Kon kini gipadayag gikan sa langit, pinaagi kini sa awtoridad ni Adan.

Si Daniel sa iyang ikapito nga kapitulo naghisgot sa Karaan sa mga Adlaw; nagpasabut siya sa pinakatigulang nga tawo, ang atong Amahan nga si Adan, si Miguel; iyang tawagon ang iyang tanang mga anak ug magpahigayon og konseho uban kanila sa pag-andam kanila alang sa ikaduhang pag-anhi sa Anak sa Tawo [tan-awa sa Daniel 7:9–11]. Siya (Adan) mao ang amahan sa tawhanong pamilya, ug nagdumala sa tanang mga espiritu sa tanang mga tawo, ug sa tanan nga adunay mga yawe kinahanglang mobarug sa iyang atubangan niining halangdong katiguman…. Ang Anak sa Tawo mobarug sa iyang atubangan, ug adunay ihatag kaniya nga himaya ug dominyon. Si Adan motugyan sa iyang pagkatinugyanan ngadto ni Kristo, nga gitugyan ngadto kaniya ingon nga naghupot sa mga yawe sa kalibutan, apan magpabilin nga magbarug nga pangulo sa tawhanong pamilya.

“ … Ang Amahan mipatawag sa tanang mga espiritu diha sa Iyang atubangan sa paglalang sa tawo, ug mi-organisar kanila. Siya (Adan) mao ang pangulo, ug giingnan nga magdaghan. Ang mga yawe unang gihatag ngadto kaniya, ug pinaagi kaniya ngadto sa uban. Siya kinahanglang mosubay sa iyang pagkatinugyanan, ug sila ngadto kaniya.

“Ang Priesthood mahangturon. Ang Manluluwas, si Moises, ug Elias (Elijah], mihatag sa mga yawe ngadto ni Pedro, Santiago, ug Juan, didto sa bungtod, sa dihang nausab ang ilang panagway sa iyang atubangan. Ang Priesthood mahangturon—nga walay sinugdanan sa mga adlaw o katapusan sa mga tuig; walay amahan, inahan, uban pa. Kon walay kausaban sa mga ordinansa, walay kausaban sa Priesthood. Bisan kanus-a nga ipangalagad ang mga ordinansa sa Ebanghelyo, aduna gayuy Priesthood.

“Giunsa nato pag-angkon ang Priesthood sa katapusang mga adlaw? Miabut kini dinhi sumala sa naandan nga mga balaod. Gihatag kini ngadto nila ni Pedro, Santiago, ug Juan ug sila mihatag niini ngadto sa uban. Si Kristo mao ang Halangdong High Priest; sunod si Adan. Si Pablo naghisgot mahitungod sa Simbahan nga may moabut nga dili maihap nga mga anghel—ngadto sa Dios ang Maghuhukom sa tanan—sa mga espiritu sa makiangayon nga mga tawo nga nahimong hingpit; ngadto ni Jesus ang Tigpataliwala sa bag-ong pakigsaad [tan-awa sa Mga Hebreohanon 12:22–24].”⁴

Mga Propeta nga naghupot sa mga yawe sa priesthood sa karaang mga panahon nagkahiusa sa pagpahinabo sa buhat sa katapusan nga dispensasyon.

“Akong nakita si Adan didto sa walog sa Adan-ondi-Ahman. Iyang gitawag ang iyang mga anak ug mipanalangin kanila og patriyarkal nga mga panalangin. Ang Ginoo nagpakita sa ilang taliwala, ug siya (Adan) mipanalangin kanilang tanan, ug nanagna kon unsay mahitabo kanila sa ulahing henerasyon.

“Mao kini ang hinungdan nganong gipanalaginan ni Adan ang iyang kaliwat; gusto niyang dad-on sila ngadto sa atubangan sa Dios. Nangita sila sa usa ka siyudad, uban pa, [kansang magtutukod ug tigbuhat mao ang Dios’—Heb. 11:10]. Si Moises nagtinguha sa pagdala sa mga anak ni Israel ngadto sa atubangan sa Dios, pinaagi sa gahum sa Priesthood, apan dili siya makahimo. Sa unang mga panahon sa kalibutan naningkamot sila sa pagestablisar sa samang butang; ug dihay mga Elias nga natawo kinsa naningkamot sa pagpahiuli niini nga mga himaya, apan wala makaangkon niini; apan sila nanagna sa adlaw nga kini nga himaya ipadayag. Si Pablo naghisgot sa dispensasyon sa kahingpitan sa panahon, nga pundukon sa Dios ang tanang mga butang nga usa, uban pa. [Tan-awa sa Mga Taga-Efeso 1:10]; ug kadtong mga tawo nga gihatagan niini nga mga yawe, anaa nianang higayona; ug sila kon wala kita dili mahingpit.

Kining mga tawhana atua sa langit, apan ang ilang mga anak ania sa yuta. Ang ilang mga kasingkasing naghandom kanato. Ang Dios mopadala sa mga tawo tungod niini nga katarungan. ‘Ug ang Anak sa Tawo mopadala sa Iyang mga anghel, ug ilang pundukon gikan sa Iyang gingharian ang tanang mga butang nga nakapasilo ug sila nga nagbuhat og kadautan.’ [Mateo 13:41.] Kining tanang mga tawo nga adunay awtoridad manganaog ug moapil sa pagpahinabo niini nga buhat.

“Ang Gingharian sa Langit sama sa usa ka lugas sa liso sa mustasa. Ang liso sa mustasa gamay ra, apan mahimong dako nga kahoy, ug ang mga kalanggaman mobatog diha sa mga sanga. [Tan-awa sa Marcos 4:30–32.] Ang kalanggaman mao ang mga anghel. Sa ingon ang mga anghel manganaog, maghiusa sa pagpundok sa ilang mga anak, ug mopundok kanila. Dili mahimong hingpit kon wala sila, ni sila kon wala kita; kon nahimo na kining mga butanga, ang Anak sa Tawo mokunsad, ang Karaan sa mga Adlaw molingkod; kita moadto sa dili maisip nga mga anghel, nga adunay panagdait ug modawat og mga instruksyon gikan kanila.”⁵

Ang mga ordinansa sa priesthood na-establisar gikan sa sinugdanan ug kinahanglang magpabilin nga ingon niana sa paagi nga kini gitudlo sa Dios.

“Si Adan … mao ang unang tawo, nga gihisgutan ni Daniel nga ang ‘Karaan sa mga Adlaw’ [Daniel 7:9], o sa laing mga pulong, ang una ug ang karaan sa tanan, ang bantugan, ang halangdong katigulangan nga giingon sa laing dapit nga si Miguel, tungod kay siya mao ang una ug amahan sa tanan, dili lamang pinaagi sa kaliwat, apan ang una nga naghupot sa espirituhanong mga panalangin, ngadto kang kinsa gipahibalo ang plano sa mga ordinansa alang sa kaluwasan sa iyang mga kaliwat hangtud sa katapusan, ug pinaagi niini si Kristo unang gipadayag sukad karon. Si Adan naghupot sa mga yawe sa dispensasyon sa kahingpitan sa mga panahon; pananglit, ang dispensasyon sa tanang mga panahon gipadayag ug ipadayag pinaagi kaniya gikan sa sinugdanan ngadto ni Kristo, ug gikan kang Kristo hangtud sa katapusan sa tanang mga dispensasyon nga ipadayag pa….

“ … Ang [Dios] mihimo sa mga ordinansa nga susama hangtud sa kahangturan, ug mitudlo ni Adan sa pagbantay niini, sa pagpadayag niini gikan sa langit ngadto sa tawo, o sa pagpadala sa mga anghel sa pagpadayag niini. ‘Dili ba silang tanan mga espiritu man lamang nga sulugoon, nga gipadala aron sa pag-alagad, alang kanila nga maoy manununod sa kaluwasan?’ [Mga Hebreohanon 1:14.]

“Kini nga mga anghel ubos sa direksyon ni Miguel o Adan, kinsa naglihok ubos sa direksyon sa Ginoo. Gikan sa kinutlo sa ibabaw atong nakat-unan nga si Pablo hingpit nga nakasabut sa mga katuyoan sa Dios kalabut sa Iyang koneksyon sa tawo, ug kanang mahimayaon ug hingpit nga kapunongan nga Iyang gi-establisar sa Iyang Kaugalingon, diin Siya nagpadala og gahum, mga pagpadayag, ug himaya.

“Ang Dios dili modawat nianang wala Niya tawaga, ordinahe, ug pilia. Sa sinugdanan ang Dios mitawag kang Adan sa Iyang kaugalingong tingog. ‘Ug ang Ginoo mitawag kang Adan ug miingon ngadto kaniya, hain ka? Ug siya miingon, Hingdunggan ko ang imong tingog sa tanaman, ug nahadlok ako, kay hubo ako, ug ningtago ako.’ [Genesis 3:9–10.] Si Adan nakadawat og sugo ug mga instruksyon gikan sa Dios: Mao kini ang kapunongan gikan sa sinugdanan.

“Nga siya nakadawat og mga pagpadayag, mga kasugoan ug mga ordinansa sa sinugdanan labaw pa sa gahum sa panaglalis; lain pa giunsa nila pagsugod sa paghalad og mga sakripisyo ngadto sa Dios sa madawat nga paagi? Ug kon sila mohalad og sakripisyo sila kinahanglan nga gitugutan pinaagi sa ordinasyon. Atong mabasa sa Genesis [4:4] nga si Abel nagdala sa usa sa mga panganay sa iyang mga karnero ug sa mga matambok niini, ug gitamud sa Ginoo si Abel ug ang iyang mga halad….

“Kini, karon, mao ang kinaiya sa Priesthood, ang matag tawo naghupot sa Kapangulohan sa iyang dispensasyon, ug usa ka tawo naghupot sa Kapangulohan kanilang tanan, gani si Adan; ug si Adan nakadawat sa iyang Kapangulohan ug awtoridad gikan sa Ginoo, apan dili makadawat sa kahingpitan hangtud i-presentar ni Kristo ang Gingharian ngadto sa Amahan, nga mahitabo sa kaulahian sa katapusan nga dispensasyon.

“Ang gahum, himaya ug mga panalangin sa Priesthood dili makapadayon uban niadtong kinsa nakadawat lamang sa ordinasyon gawas kon magpadayon ang ilang pagkamatarung; kay si Cain gitugutan usab nga mohalad og sakripisyo, apan wala mohalad niini sa pagkamatarung, gitunglo siya. Nagpasabut kini, nga ang mga ordinansa kinahanglang pagasundon sa paagi nga kini gitudlo sa Dios; kon dili ang ilang Priesthood mahimong usa ka tunglo imbis usa ka panalangin.”⁶

Ang Melchizedek Priesthood mao ang agianan diin ang Dios mopadayag sa Iyang kaugalingon ug sa Iyang mga katuyoan.

“Adunay duha ka mga Priesthood nga gihisgutan sa mga Kasulatan, sa ato pa, ang Melchizedek ug ang Aaronic o Levitical. Bisan og adunay duha ka mga Priesthood, apan ang Melchizedek Priesthood naglakip sa Aaronic o Levitical Priesthood, ug mao ang pinakahalangdon, ug naghupot sa labing taas nga awtoridad nga may kalabutan sa Priesthood, ug sa mga yawe sa Gingharian sa Dios sa tanang panahon sa kalibutan ngadto sa labing ulahi nga kaliwat sa yuta, ug mao ang agianan diin ang tanang kahibalo, doktrina, sa plano sa kaluwasan, ug sa tanang importante nga butang ipadayag gikan sa langit.

Natukod kini sa wala pa ‘ang katukuran niini nga yuta, o sa nagkadungan pag-awit ang mga bitoon sa kabuntagon, o ang tanang mga anak sa Dios nagkaduyog sa pagsinggit sa kalipay’ [tan-awa sa Job 38:4–7], ug mao ang labing taas ug labing balaan nga Priesthood, ug sunod sa kapunongan sa Anak sa Dios, ug ang laing ubang Priesthood mga kabahin lamang, mga sanga, ang mga gahum ug mga panalangin nalakip sa maong Priesthood, ug gihuptan, gikontrolar, ug gigiyahan niini. Mao kini ang paagi diin ang Makagagahum nagsugod sa pagpadayag sa Iyang himaya sa sinugdanan sa paglalang niini nga yuta, ug pinaagi niini diin Siya mopadayon sa pagpadayag sa Iyang kaugalingon ngadto sa mga anak sa tawo hangtud karon, ug pinaagi niini Siya mopaila sa Iyang mga katuyoan hangtud sa katapusan sa panahon.”⁷

“Ang gahum sa Melchizedek Priesthood mao ang pagbaton sa gahum sa ‘walay katapusan nga mga kinabuhi; kay ang walay katapusang pakigsaad dili mausab…. Unsa ang gahum sa Melchizedek? ‘Dili kadto ang Priesthood ni Aaron nga nangalagad sa gawas nga mga ordinansa, ug ang halad sa mga sakripisyo. Kadtong naghupot sa kahingpitan sa Melchizedek Priesthood mga hari ug mga pari sa Labing Halangdong Dios, naghupot sa mga yawe ug gahum ug mga panalangin. Gani, kana nga priesthood mao ang hingpit nga balaod sa teokrasya, ug magbarug samtang ang Dios mohatag sa mga balaod ngadto sa mga katawhan, mangalagad sa walay katapusang mga kinabuhi ngadto sa mga anak ni Adan….

“‘Walay amahan, ni inahan, ni kagikan, ug wala usab siyay sinugdanan sa mga adlaw ni katapusan sa kinabuhi, hinonoa ingon nga nahisama sa Anak sa Dios, magpadayon siya nga pari hangtud sa kahangturan.’ [Mga Hebreohanon 7:3.] Ang Melchizedek Priesthood naghupot sa katungod gikan sa mahangturong Dios, ug walay kaliwat gikan sa amahan ug inahan, ug nga ang priesthood sama sa ka mahangturon sa Dios sa Iyang Kaugalingon, nga walay sinugdanan sa mga adlaw ni katapusan sa kinabuhi….

“ … Ang Levitical [Aaronic] Priesthood, adunay mga priest nga mangalagad sa dayag nga ordinansa, gihimo nga walay panumpa, apan ang Priesthood ni Melchizedek pinaagi sa panumpa ug pakigsaad.”⁸

“Ang Melchizedek nga Halangdong Priesthood [mao] ang Priesthood sa Anak sa Dios; … adunay piho nga mga ordinansa nga nahisakop sa Priesthood, gikan diin moabut ang mga resulta…. Usa sa dakong kahigayunan sa Priesthood mao ang pag-angkon og mga pagpadayag sa hunahuna ug kabubut-on sa Dios. Kahigayunan usab sa Melchizedek Priesthood ang pagbadlong, pagsaway, sa pagpahimangno ingon man usab sa pagdawat og pagpadayag.”⁹

“Ang tanang priesthood Melchizedek; apan adunay lain-laing mga bahin o ang-ang niini…. Ang tanang mga propeta adunay Melchizedek Priesthood.”¹⁰

“Motambag ako sa tanan sa pagpadayon ngadto sa kahingpitan, ug mosiksik pag-ayo ug sa mga misteryo sa Pagkadios. Ang tawo walay mahimo sa iyang kaugalingon gawas kon ang Dios mogiya kaniya sa matarung nga agianan; ug ang priesthood alang niana nga katuyoan.”¹¹

Ang tawo kinahanglan nga adunay awtoridad sa Dios ug ma-ordinar ngadto sa priesthood aron makapangalagad sa mga ordinansa sa kaluwasan.

Mga Artikulo sa Hugot nga Pagtuo 1:5: “Kami nagtuo nga ang usa ka tawo kinahanglan gayud pagatawgon sa Dios, pinaagi sa pagpanagna, ug pinaagi sa pagpandong sa mga kamot niadto kinsa adunay pagtugot sa pagsangyaw sa Ebanghelyo ug sa pagpangalagad sa mga ordinansa niini.”¹²

“Kita nagtuo nga walay tawo nga makapangalagad sa kaluwasan pinaagi sa ebanghelyo, ngadto sa mga kalag sa mga tawo, sa pangalan ni Jesukristo, gawas kon siya gitugutan gikan sa Dios, pinaagi sa pagpadayag, o pinaagi sa pag-ordinar sa usa ka tawo nga gipadala sa Dios pinaagi sa pagpadayag, sama sa gisulat ni Pablo, Mga Taga Roma 10:14, ‘Apan unsaon man sa mga tawo sa pagpangaliya kaniya nga wala nila tuhoi? Ug unsaon man nila sa pagtuo kaniya nga wala gayud nila hidunggi? Ug unsaon man nila sa pagkadungog kon walay magwawali?’ Ug ako mangutana, ug unsaon sila sa pagpadala kon walay pagpadayag, o ubang makita nga gipakita sa Dios? Ug usab, sa Mga Hebreohanon 5:4, ‘Ug walay tawo nga mangunay sa pagpahiluna sa iyang kaugalingon diha sa maong katungdanan, kon dili sa Dios tinawag siya alang niini maingon kang Aaron.’—Ug ako mangutana, giunsa sa pagtawag si Aaron, pinaagi sa pagpadayag?”¹³

“Ang anghel misulti ni Cornelio nga siya kinahanglang moadto ni Pedro aron makahibalo kon unsaon aron maluwas [tan-awa sa Mga Buhat 10:21–2]: Si Pedro makabunyag, ug ang anghel dili makabunyag, kon adunay legal nga mga opisyal sa yuta nga naghupot sa mga yawe sa gingharian, o sa awtoridad sa priesthood. Adunay laing dugang ebidensya niini nga punto, ug nga si Jesus mismo sa dihang nagpakita ngadto ni Pablo sa pagpadulong sa Damascus, wala mopahibalo kaniya kon unsaon aron siya maluwas. Iyang gipahiluna sa Simbahan una ang mga Apostoles, ug ikaduha ang mga propeta, alang sa pagsangkap sa mga balaan, alang sa paglig-on sa lawas ni Kristo, uban pa. [tan-awa sa Mga Taga-Efeso 4:11–12]; ug isip labing importante nga lagda sa langit mao nga wala gayuy himoon dinhi sa yuta nga dili ipadayag ang sekreto ngadto sa iyang mga sulugoon ang mga propeta, sumala sa Amos 3:7, mao nga si Pablo dili makakat-on og daghan gikan sa Ginoo kalabut sa iyang katungdanan sa naandan nga kaluwasan sa tawo, sama sa iyang makat-unan gikan sa usa sa mga ambasador nga gitawag sa samang langitnong tawag sa Ginoo, ug gitugahan sa samang gahum gikan sa kahitas-an—aron kon unsay ilang pagaluagan dinhi sa yuta, pagaluagan didto sa langit; ug unsay ilang pagabugkuson dinhi sa yuta pagabugkuson didto sa langit [tan-awa sa Mateo 16:19].”¹⁴

Dako kaayo nga kahigayunan ang pagpalambo sa bisan unsang katungdanan sa priesthood.

“[Ang] Priesthood … mahimong ihulagway pinaagi sa lawas sa tawo, nga adunay lain-laing mga miyembro, nga adunay lain-laing mga katungdanan nga buhaton; ang tanan gikinahanglan sa ilang dapit, ug ang lawas dili kompleto kon wala ang tanang mga miyembro…. Kon ang usa ka Priest nakasabut sa iyang katungdanan, sa iyang calling, ug pangalagad, ug mosangyaw pinaagi sa Espiritu Santo, ang iyang kalipay sama ka dako kon siya anaa sa Kapangulohan, ug ang iyang pagserbisyo gikinahanglan sa lawas, sama usab niadtong mga Teacher ug mga Deacon.”¹⁵

Si Eliza R. Snow mireport: “Si [Joseph Smith mihatag] og mga instruksyon mahitungod sa lain-laing mga katungdanan, ug ang panginahanglan sa matag indibidwal nga naglihok sa dapit nga alang kaniya, ug moserbisyo sa daghang mga katungdanan diin sila gitudlo. Naghisgot siya sa kinaiya sa daghang mga tawo nga naghunahuna sa mga mas ubos nga mga katungdanan sa Simbahan nga walay dungog, ug masinahon nga nagtan-aw sa ranggo sa uban kinsa gitawag sa pagdumala kanila; nga kini kabuang ug walay hinungdan nga pagbati sa tawo nga magtinguha sa ubang mga katungdanan kay sa niadtong gitudlo sa Dios nga ilang buhaton; nga mas maayo pa alang sa mga indibidwal sa pagpalambo sa ilang kaugalingong mga calling.”¹⁶

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Ribyuha ang istorya ni Pedro, Santiago, ug Juan nga nagtugyan sa Melchizedek Priesthood kang Joseph Smith ug Oliver Cowdery (pahina 119–21). Unsa nga mga panalangin nga inyong nadawat ug sa inyong pamilya tungod kay gipahiuli ang Melchizedek Priesthood?
Sa kinatibuk-an niini nga hugna, si Joseph Smith nagpamatuod sa kutay sa awtoridad sa priesthood pinaagi sa pagpulipuli sa mga propeta. Ngano sa inyong pagtuo nga kini nga doktrina importante nga iyang itudlo sa iyang panahon? Ngano nga kinahanglan kitang makasabut niini nga doktrina karon? Sa unsa nga paagi nga ang kutay sa awtoridad nga gihulagway ni Joseph Smith nagpasabut sa linya sa awtoridad sa priesthood sa usa ka tawo?
Samtang kamo magbasa niini nga hugna, timan-i ang paggamit ni Propeta Joseph Smith sa mga pulong nga walay katapusan, mahangturon, ug kahangturan. Unsay ikasulti niini nga mga pulong mahitungod sa kinaiya ug kaimportante sa priesthood?
Si Joseph Smith mitudlo nga ang Dios “mihan-ay sa mga ordinansa nga susama ra hangtud sa kahangturan” ug nga “ang mga ordinansa kinahanglang sundon sa paagi nga gitudlo sa Dios” (mga pahina 125–26). Sa unsa nga paagi nga kini nga mga pagtulun-an nakapadugang sa inyong pagsabut sa mga ordinansa sa ebanghelyo?
Ribyuha ang mga pagtulun-an ni Propeta Joseph Smith mahitungod sa Melchizedek Priesthood (mga pahina 126–29). Hunahunaa kon sa unsa nga paagi nga ang Melchizedek Priesthood gikinahanglan sa tanang mga aspeto sa ebanghelyo. Unsa ang inyong mga hunahuna ug mga pagbati samtang kamo namalandong sa Melchizedek Priesthood niining paagiha?
Ribyuha ang katapusang duha ka mga paragrap sa hugna (pahina 131). Sa unsa nga paagi nga inyong nakita nga ang matag miyembro sa Simbahan adunay importanting bahin sa buhat sa Ginoo? Unsay mogawas nga resulta kon kita “magselos” niadtong kinsa gitawag sa pagserbisyo isip mga lider sa Simbahan? Hunahunaa kon unsay inyong mahimo sa pagpalambo sa inyong kaugalingong calling?

May kalabutan nga mga Kasulatan:Alma 13:1–12; D&P 27:5–14; 84:33–44, 109–10; 107:6–20; 121:34–46

Melchizedek Priesthood being conferred — Ang karaang mga Apostoles nga sila si Pedro, Santiago, ug Juan mitugyan sa Melchizedek Priesthood ngadto ni Joseph Smith ug Oliver Cowdery. Ang mga yawe [sa priesthood],” mipahayag ang Propeta, kinahanglang dad-on gikan sa langit kon ang Ebanghelyo ipadala.

Adam-ondi-Ahman — “Akong nakita si Adan didto sa walog sa Adan-ondi-Ahman. Iyang gitawag ang iyang mga anak ug mipanalangin kanila og patriyarkal nga mga panalangin. Ang Ginoo nagpakita sa ilang taliwala.”

setting apart — “Kami nagtuo nga ang usa ka tawo kinahanglan gayud pagatawgon sa Dios, pinaagi sa pagpanagna, ug pinaagi sa pagpandong sa mga kamot niadto kinsa adunay pagtugot sa pagsangyaw sa Ebanghelyo ug sa pagpangalagad sa mga ordinansa niini.”