Hugna 16

Ang Adlaw nga Igpapahulay—Usa ka Kahimut-an

Ang adlaw nga Igpapahulay maoy usa ka adlaw alang sa aktibo, mahimayaon nga pagsimba.

Gikan sa Kinabuhi ni Spencer W. Kimball

Sa pagbiyahe ni Presidente Spencer W. Kimball sa tibuok Simbahan, nahimuot siya sa dihang iyang nakita nga ang mga Santos nagtahud sa adlawng Igpapahulay. Nag-istorya siya nga nakahimamat siya og duha gayud ka mga lalaki nga napanalanginan tungod sa ilang mga paninguha sa pagbalaan sa adlawng Igpapahulay:

“Bag-o pa lang sa usa ka stake akong giinterbyu ang usa ka tawo alang sa usa ka importante nga katungdanan diha sa organisasyon sa stake. Ug miingon ako ngadto kaniya, ‘Unsay imong trabaho?’ Ug mitubag siya, ‘nagdumala ako og istasyonan sa gasolina.’ Ug nangutana ako, ‘Mangabli ka ba sa adlaw nga Igpapahulay?’ Ang iyang tubag mao, ‘Dili, dili gayud.’ ‘Nan, giunsa man nimo sa pagpaigo sa imong kita? Kasagaran sa mga nagdumala og gasolinahan naghunahuna nga kinahanglan gayud nga mangabli sila sa adlaw nga Igpapahulay.’ ‘Napaigo ra man nako ang akong kita,’ miingon siya. ‘Maayo gayud ang Ginoo kanako.’ ‘May higpit ka ba kaayo nga ka kompetensya?’ Nangutana ako. ‘O, naa gyud,’ mitubag siya. ‘Sa atbang mao ang tawo nga kanunay nga mangabli sa tibuok adlaw nga Dominggo.’ ‘Ug wala ka gayud mangabli sukad?’ Nangutana ako. ‘Wala gayud, sir,’ matud pa niya, ‘ug mapasalamaton ako, nga maloloy-on ang Ginoo, ug aduna ako’y igo alang sa akong mga panginahanglan.’

“Didto ako sa lain nga stake, sa usa usab ka programa sa pagreorganisar, ug laing brother ang gihunahunaan alang sa usa sa pinakataas nga mga katungdanan, ug sa dihang amo siyang gipangutana sa iyang trabaho, miingon siya nga grocery ang iyang negosyo. ‘Nan, kasagaran sa mga tindahan kanunay nga mangabli sa adlaw nga Igpapahulay. Mangabli ka ba?’ ‘Sirad-an namo ang among tindahan ma-Dominggo,’ miingon siya. ‘Apan unsaon man nimo sa pagpakigkompetensya niining mga tawhana kinsa mangabli og pito ka adlaw matag semana?’ ‘Nakigkompetensya kami. Pero napaigo ra man ang among kita,’ maoy tubag niya. ‘Apan dili ba ang adlaw nga Igpapahulay maoy halin kaayo para ninyo?’ ‘Oo,’ ang tubag niya, ‘tingali kaduha pil-a ang among halin sa adlaw nga Igpapahulay kaysa mahimo sa laing adlaw, apan napaigo ra gihapon nga wala kini, ug nalooy ang Ginoo; maloloy-on kaayo siya; buotan kaayo siya.’… Ug wala ako makapugong sa pag-ingon, ‘Panalanginan ka sa Dios, akong matinudanon nga igsoon. Ang Ginoo dili mahimong makalimot niining ingon nga mga sakripisyo. Walay lama ang imong kinitaan. Siguro gayud nga dili kini makababag sa imong paglakaw paingon sa gingharian sa Dios.’”¹

Nakita ni Presidente Kimball ang adlaw nga Igpapahulay isip usa ka adlaw alang sa aktibo, mahimayaon nga pagsimba—panahon sa paghikalimot sa mga butang nga kalibutanon ug pagpuno sa adlaw sa matarung nga kalihokan. Mikutlo sa mga kasulatan, giawhag niya ang mga Santos sa paghimo sa adlaw nga Igpapahulay nga “usa ka kahimut-an” ug sa pagsugat sa adlaw uban sa “kamaya sa kasingkasing ug malipayon nga panagway” (Isaias 58:13; D&P 59:15).²

Mga Pagtulun-an ni Spencer W. Kimball

Ang Ginoo kanunay nga nagsugo sa Iyang katawhan sa pagtahud sa Igpapahulay nga adlaw.

Si Moises nanaog gikan sa nauyog, nag-aso nga bukid sa Sinai ug midala sa Napulo ka mga Sugo ngadto sa nahisalaag nga mga anak sa Israel, ang sukaranan nga mga lagda alang sa pamatasan sa kinabuhi. Kini nga mga sugo hinoon dili na bag-o. Nahibaloan na kini ni Adan ug sa iyang mga kaliwatan, kinsa gisugo sa pagsunod niini sukad pa sa sinugdanan, ug gibalik sa Ginoo ngadto ni Moises. Ug gani ang mga sugo nag-una pa sa kinabuhi sa yuta ug maoy kabahin sa pagsulay alang sa mga mortal nga gitukod didto sa konseho sa langit.

Ang una sa Napulo ka mga Sugo nagmando nga ang mga tawo mosimba sa Ginoo, ang ikaupat naggahin og usa ka adlaw nga Igpapahulay ilabi na sa ingon nga pagsimba:

“Dili ka magbaton og lain nga mga dios sa atubangan ko. […]

“Hinumduman mo ang adlaw nga igpapahulay, aron sa pagbalaan niini.

“Sa unom ka adlaw magbuhat ka, ug buhaton mo ang tanan nga imong buluhaton:

“Apan ang adlaw nga ikapito maoy usa ka adlaw nga igpapahulay alang kang Jehova nga imong Dios. Niining adlawa dili ka magbuhat, ikaw, bisan ang imong anak nga lalaki, bisan ang imong anak nga babaye, bisan ang imong sulogoon nga lalaki, bisan ang imong sulogoon nga babaye, bisan ang imong kahayopan, bisan ang imong dumuloong nga anaa sa sulod sa imong mga pultahan:

“Kay sa unom ka adlaw gibuhat ni Jehova ang langit ug ang yuta, ang dagat, ug ang tanan nga anaa niini, ug mipahulay sa ikapito ka adlaw; busa gipanalanginan ni Jehova ang adlaw nga igpapahulay, ug gibalaan niya kini.” (Exodo 20:3, 8–11.)

Sa kadaghanan, ang paglapas sa adlaw nga Igpapahulay dili kaayo mahinungdanon, apan sa atong Langitnong Amahan pagsupak kini sa usa sa pinakamahinungdanon nga mga sugo. Ebidensya kini sa pagkapakyas sa tawo sa pagsunod sa tinagsa tagsa nga pagsulay nga gipahiangay sa kada usa kanato sa wala pa gilalang ang kalibutan, “aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila.” (Abraham 3:25.)…

Ang maligdong nga sugo nga gidala gikan sa nagdahunog nga Bukid Sinai mao ang “Hinumduman mo ang adlaw nga igpapahulay aron sa pagbalaan niini.” Kana nga sugo wala gayud bakwia ni giusab. Hinoon, gilig-on kini sa moderno nga mga panahon:

“Apan hinumdumi nga dinhi niini, nga adlaw sa Ginoo, kamo mohalad sa inyong mga halad ug sa inyong mga sakramento ngadto sa Labing Halangdon, mokumpisal sa inyong mga kaigsoonan, ug sa atubangan sa Ginoo.

“Ug niini nga adlaw kamo dili mobuhat og bisan unsa nga butang, itugot lamang nga ang inyong pagkaon andamon uban sa usa ka katuyoan sa kasingkasing aron ang … inyong kalipay mapuno.” (D&P 59:12–13.)³

Ang adlaw nga Igpapahulay dili usa ka adlaw sa negosyo o paglingaw-lingaw.

Ako … moawhag diha sa tanang mga Santos sa bisan asa og usa ka labaw pa ka ligdong nga pagtahud sa Igpapahulay nga adlaw. Ang balaan nga adlaw sa Ginoo dali nga nawad-an sa mahinungdanong pagkasagrado niini sa tibuok kalibutan.… Gianam-anam pagguba sa tawo ang sagrado nga mga katuyoan sa adlaw nga Igpapahulay aron sa pagtinguha og katigayunan, kalingawan, ug sa pagsimba sa mini ug materyal nga dios-dios. Nagpadayon kami sa pag-awhag sa tanang mga Santos ug sa katawhan nga mahadlokon sa Dios sa tanang dapit sa pagtahud sa Igpapahulay nga adlaw ug sa pagbalaan niini. Ang mga negosyo dili mangabli sa adlaw nga Igpapahulay kon walay mamalit nila nianang balaan nga adlaw. Tinuod usab diha sa mga kaligoanan nga dapit, paugnat sa kusog nga mga panghitabo, ug ang kalingawan sa tanang matang nga lugar. Ang pagtinguha og katigayunan nagmadaugon, nga daw milabaw pa sa sugo sa Ginoo, “Ang akong mga adlaw nga igpapahulay pagabantayan ninyo, ug ang akong balaang puloyanan pagatahuron ninyo” (Lev. 19:30).⁴

Atong nabantayan nga sa atong Kristohanon nga kalibutan sa daghang mga dapit aduna kitay establisimento sa negosyo nga abli alang sa pagnegosyo diha sa sagrado nga adlaw nga Igpapahulay. Sigurado kita nga ang tambal niini nag-agad sa atong mga kaugalingon, ang mamamalit nga publiko. Klaro nga ang mga tindahan ug mga balay pang negosyo dili magpabilin nga abli kon kita, ang katawhan, dili mamalit gikan nila. Palihug balika paghunahuna kining mga butanga. Dad-a kini ngadto sa inyong mga home evening ug hisguti kini uban sa inyong mga kabataan. Maanindot kaayo kini kon ang kada pamilya determinado sukad karon nga wala nay mamalit sa adlaw nga Igpapahulay.⁵

Nahimo na kitang usa ka dakong kalibutan sa mga naglapas sa adlaw nga Igpapahulay. Panahon sa adlaw nga Igpapahulay puno kaayo ang mga lanaw sa mga bangka, nagdasok ang mga baybayon, daghan kaayo ang nanulod sa mga sinehan, daghan kaayo ang nanagdula og golf. Ang adlaw nga Igpapahulay mao ang kinaham nga adlaw alang sa pagpakita sa kahanas sa pagpangabayo [rodeo], mga kombensyon, mga piknik sa pamilya; bisan ang mga dula sa bola gidula sa sagrado nga adlaw. “Padayon ang negosyo” mao ang pagya sa kadaghanan, ug ang atong balaan nga adlaw nahimong adlaw sa paglingawlingaw. Ug tungod kay daghan kaayong mga tawo ang mitagad sa adlaw isip adlaw sa paglingawlingaw, daghan usab ang nagsilbi sa mga panginahanglan sa mahigugmaon sa kalingawan ug mga nag-apas sa ganansya.…

Ang pagpangayam ug ang pagpangisda sa adlaw sa Ginoo wala magbalaan niini. Ang pagpananum o pag-ugmad o pag-ani sa mga abut diha sa adlaw nga Igpapahulay wala magbalaan sa adlaw sa Ginoo. Ang pagpangadto sa mga canyon aron magpiknik, ang pagtambong sa mga dula o pagpakita sa kahanas sa pagpangabayo [rodeo] o mga lumba o mga salida o ubang mga kalingawan nianang adlawa mao ang wala paghupot niini sa balaang paghandum.

Maingon og katingalahan, daghang mga Santos sa Ulahing mga Adlaw, matinud-anon sa ubang mga pagtahud, nangatarungan sa ilang mga kaugalingon sa wala pagtambong sa ilang mga miting sa simbahan para mangukasyon alang sa paglingawlingaw nga mga katuyoan, mobati nga ang pinakanindot nga pagpangisda mapakyas kon ang usa ka tawo dili makaadto sa suba sa unang adlaw sa panahon sa pangisda [fishing season] o dili kaayo taas ang bakasyon kon ang usa ka tawo dili dayon mosugod inig Dominggo o ang usa ka tawo mapakyas sa salida nga buot niyang tan-awon kon dili siya motan-aw sa adlaw nga Igpapahulay. Ug sa ilang paglapas sa adlaw nga Igpapahulay sa kasagaran i-uban nila ang ilang mga pamilya.…

Walay ikasaway sa makatarunganon nga paglingaw-lingaw— mga paugnat sa kusog, piknik, dula, ug salida sa sine. Ang tanan adunay mahimo alang sa pagpalagsik sa kinabuhi, ug ang Simbahan isip usa ka organisasyon aktibong nagpasiugda sa ingon nga mga kalihokan. Apan adunay tukma nga panahon ug dapit alang sa tanang angay nga mga butang—usa ka panahon alang sa pagtrabaho, panahon alang sa pagdula, panahon alang sa pagsimba.…

Tinuod nga daghang mga tawo ang kinahanglan gayud nga motrabaho sa adlaw nga Igpapahulay. Ug, sa pagkatinuod, pipila sa mga trabaho nga tinuod gayud nga gikinahanglan—pananglitan, ang pag-atiman sa masakiton—mahimong buhaton aron sa pagbalaan sa adlaw nga Igpapahulay. Bisan pa niana, sa ingon nga mga kalihokan ang atong mga katuyoan maoy pinakamahinungdanon nga hunahunaon.⁶

Usahay ang pagtahud sa adlaw nga Igpapahulay gihulagway isip usa ka sakripisyo ug pagpugong sa kaugalingon, apan dili kini mao. Pagpahiangay lamang kini sa mga kahigayunan ug pagpili sa pagabuhaton. Aduna pay igong panahon, ilabi na sa atong panahon sa kasaysayan sa kalibutan, sulod sa unom ka mga adlaw sa semana diin mobuhat sa atong buluhaton ug magdula. Daghan ang mahimo aron sa pag-organisar ug sa pagdasig og mga kalihokan sa adlaw sa semana, gawas sa adlaw nga Igpapahulay.⁷

Ang adlaw nga Igpapahulay mao ang adlaw alang kanato nga mabuhong sa pagka-espirituhanon pinaagi sa pagsimba ug sa takus nga mga buhat.

Ang adlaw nga Igpapahulay maoy usa ka adlaw nga balaan diin magbuhat og takus ug balaan nga mga butang. Ang paglikay sa trabaho ug paglingawlingaw mahinungdanon, apan dili pa igo. Ang adlaw nga Igpapahulay nagdasig og makaayo nga mga hunahuna ug mga buhat, ug kon ang usa ka tawo nagpahayahay lamang nga walay gibuhat diha sa adlaw nga Igpapahulay, nakalapas siya niini. Sa pagsunod niini, ang usa ka tawo kinahanglan nga magluhod nga mag-ampo, mangandam og mga leksyon, magtuon sa ebanghelyo, mamalandong, mamisita sa masakiton ug nagsubo, mosulat ngadto sa mga misyonaryo, matulog og kadiyot, mobasa og makaayo nga basahon, ug motambong sa tanang miting nianang adlawa diin siya gipaabut.⁸

Paghatag og higayon [diha sa adlaw nga Igpapahulay] nga magkauban isip mga pamilya aron sa pagsinultihanay sa usag usa, sa pagtuon sa mga kasulatan, sa pagbisita sa mga higala, mga paryente, ug sa masakiton ug nag-inusara. Pinakamaayong panahon usab kini sa pagtrabaho sa inyong mga journal ug genealogy.⁹

Sa pinulongang Hebreohanon ang adlaw nga Sabbath nagpasabut nga “pahulay.” Nangahulugan kini og hilum nga kalinaw, kalinaw sa hunahuna ug espiritu. Adlaw kini sa pagsalikway sa hinakog nga mga tinguha ug makalingaw nga mga kalihokan.

Ang adlaw nga Igpapahulay gihatag sa tanang mga henerasyon sa tawo alang sa walay katapusan nga pagpakigsaad [tan-awa sa Exodo 31:16]. Timaan kini tali sa Ginoo ug sa iyang mga anak hangtud sa hangtud [tan-awa sa Exodo 31:17]. Mao kini ang adlaw sa pagsimba ug sa pagpahayag sa atong pagtahud ug pagpasalamat ngadto sa Ginoo. Mao kini ang adlaw sa pagbiya sa matag kalibutanon nga kaikag ug mapainubsanong pagdayeg sa Ginoo, kay ang pagkamapainubsanon mao ang sinugdanan sa kahimayaan. Dili kini adlaw alang sa kasakitan ug pagbudlay kon dili alang sa pagpahulay ug matarung nga kamaya. Dili kini adlaw alang sa dakong salo-salo, kon dili adlaw sa yano nga mga pagkaon ug espirituhanon nga pagpista.… Adlaw kini nga pinaagi sa kalooy gihatag kanato sa atong Langitnong Amahan. Adlaw kini diin ang mga mananap buhian aron manibsib ug mopahulay, samtang ang daro gihipos didto sa kamarin ug wala gamita ang mga makinarya; usa ka adlaw diin ang amo ug ang empleyado, ang agalon ug ang sulugoon nagpahulay sa pagdaro, pagkalot sa yuta, paghago. Mao kini ang adlaw nga gisirad-an ang opisina ug gihunong una ang negosyo, ug mga kasamok gikalimtan; usa ka adlaw diin ang tawo temporaryo nga gibuhian gikan niadtong nag-una nga mando, “Sa singot sa imong nawong magakaon ikaw sa tinapay, hangtud nga mopauli ka sa yuta.…” [Tan-awa sa Genesis 3:19.] Mao kini ang adlaw diin ang mga lawas mahimong mopahulay, mga hunahuna mopahayahay, ug ang mga espiritu motubo. Mao kini ang adlaw diin ang mga kanta mahimong kantahon, mga pag-ampo ihalad, mga wali isangyaw, ug mga pagpamatuod ipadungog, ug diin ang tawo mahimo nga mosaka og taas, hapit mohurot sa panahon, luna, ug distansya tali sa iyang kaugalingon ug sa iyang Tiglalang.

Ang adlaw nga Igpapahulay mao ang adlaw sa pagpamalandong—aron sa paghunahuna og maayo sa atong mga kahuyang, sa pagkompisal sa atong mga sala ngadto sa atong mga kaubanan ug sa atong Ginoo. Mao kini ang adlaw nga magpuasa nga managsul-ob sa “panapton nga sako ug mga abo.” Mao kini ang adlaw nga magbasa og maayo nga mga libro, ang adlaw sa paghunahuna ug pamalandong, ang adlaw sa pagtuon sa mga leksyon alang sa priesthood ug kaabag nga mga organisasyon, ang adlaw sa pagtuon sa mga kasulatan ug sa pag-andam sa mga pagwali, ang adlaw sa pagkatulog og kadiyot ug pagpahulay ug pagpahayahay, ang adlaw sa pagbisita sa masakiton, ang adlaw sa pagsangyaw sa ebanghelyo, ang adlaw sa pag-proselyte, ang adlaw sa hilum nga pagbisita sa pamilya ug makigsuod sa atong mga anak, ang adlaw sa tukmang paghalad og gugma, ang adlaw sa pagbuhat og maayo, ang adlaw sa pag-inom sa tuburan sa kahibalo ug sa pagpanudlo, ang adlaw sa pagpangayo og pasaylo sa atong mga sala, ang adlaw sa pagbuhong sa atong espiritu ug sa atong kalag, ang adlaw sa pagpahiuli kanato ngadto sa atong espirituhanon nga pagkatawo, ang adlaw sa pag-ambit sa mga timaan sa sakripisyo ug pag-ula sa [Ginoo], ang adlaw sa paghunahuna sa mga kahimayaan sa ebanghelyo ug sa mahangturon nga gingharian, ang adlaw sa pagsaka sa taas nga agianan paingon sa atong Langitnong Amahan.¹⁰

Nanghinaut kami … nga bisan sa wala pa o pagkahuman sa inyong nagsunod-sunod nga mga miting matag Dominggo, magagad diha sa inyong naandan nga … eskedyul sa miting, inyong buhaton kon unsay gihangyo sa Manluluwas nga buhaton sa mga tinun-an nga mga Nephite: Human niya sila katudlo-i, Iya silang gihangyo sa pagpamauli sa ilang mga panimalay ug mamalandong ug iampo ang gisulti (tan-awa sa 3 Ne. 17:3). Ibutang nato kanang sumbanan sa hunahuna.¹¹

Ang usa ka hingpit ug buhong nga adlaw nga Igpapahulay naglakip sa pagtambong sa mga miting sa Simbahan ug sa pag-ambit sa sakrament.

Maingon nga ang ideya sa Ginoo sa hingpit ug buhong nga adlaw sa Igpapahulay mao ang pagsimba ug pagkat-on kaniya ug sa pag-ambit sa sakrament. Buot niya nga pun-on nato ang adlaw sa mahinungdanon ug espirituhanon nga mga kalihokan. Buot niya nga mobuhat kita niining mga butanga uban sa pagpasalamat ug malipayon nga mga kasingkasing ug mga panagway, ug dili sa hilabihang pagpangatawa. Buot niya nga motambong ang atong mga lalaki ug mga batang lalaki sa ilang miting sa priesthood nga nakaandam na sa ilang mga leksyon uban sa masadyaon nga kasingkasing. Buot niya nga ang mga tawo motambong sa Sunday School ug didto makakat-on sa iyang plano sa kaluwasan. Buot niya nga motambong ang iyang katawhan sa miting sa sakrament aron mokanta uban sa mga Santos ug moampo diha sa espiritu uban kaniya nga nag-ampo, ug moambit sa mga timaan sa sakrament, manumpa pag-usab sa hingpit nga pagkamatinudanon, walay pagduhaduha nga pagsunod, dili molikay sa mga buluhaton, usa ka makanunayon nga paghinumdom kaniya.¹²

Kinsa ang kinahanglan nga motambong sa mga miting sa sakrament? Ang sugo gisulti pinaagi sa Propeta ngadto niadtong “kansang mga tiil nagbarug ibabaw sa yuta sa Zion,” ang mga miyembro sa iyang simbahan [tan-awa sa D&P 59:3, 9]. Ang sugo dili lamang ngadto sa mga hingkod kon dili managsama nga naglakip usab sa batan-on ug tigulang.… Unsay mas maayo pang mabuhat sa mga ginikanan aron paglig-on sa pamilya kaysa tibuok pamilya, madako man ug magamay, nga mangadto isip usa ka grupo sa meetinghouse aron motambong sa miting sa sakrament? Didto makakat-on ang kabataan sa naandan nga kinaiya sa pagtambong, makapugong kanila sa paglapas sa adlaw nga Igpapahulay, ug bisan tuod kon bata pa kaayo, makakat-on sa mga pagtulun-an ug mga pagpamatuod, ug sa espiritu nga anaa diha. Ang mga lider sa stake ug ward ug korum kinahanglan nga mahimong ehemplo niining butanga ngadto sa mga tawo.¹³

Niadtong gamay pa kaayo ako nga bata, gitudloan ako sa pagkaanad nga moadto sa mga miting sa sakrament. Dad-on ako kanunay ni mama. Kadtong mainit nga kahapunon nakahimo kanako nga katulugon og mosandig sa iyang paa aron matulog. Mahimong wala kaayo akoy nakat-unan sa mga wali, apan nakaton ako og pagkaanad sa “pagtambong sa miting.” Nagpabilin kanako ang pagkaanad sa tibuok kong kinabuhi.¹⁴

Walay gamay nga bata nga nasayud nga nagkat-on siya sa silaw sa adlaw, apan wala makamatngon nga ang kahayag nagdala og gahum ngadto sa iyang gamay nga lawas. Walay bata nga nasayud sa ka bililhon sa gatas sa iyang inahan ni sa pagkaon gikan sa giablihan nga mga lata nga naghatag kaniya og sustansya. Gani, anha diha niya kuhaa ang iyang kalig-on ug iyang gahum aron motubo nga sa katapusan mahimong hingkod nga tawo.…

Ug ang matag bata, nga wala masayud sa hingpit nga timailhan, makakat-on og daghan gikan sa miting sa sakrament. Makakat-on sila og usa ka butang sa matag higayon.¹⁵

Dili ba dako kaayo nga panahon ug paningkamot ang mausik kon matag Dominggo sa buntag mohunong kita ug moingon, “Motambong ba kaha ko o dili sa miting sa priesthood? Motambong ba kaha ko o dili sa miting sa sakrament karong adlawa? Moadto ba kita o dili kita mangadto?” Unsa ka dakong kausik sa paningkamot.… Husaya dayon kini.¹⁶

Usa ka suod nako nga kaila magpabilin sa panimalay sa matag adlaw nga Igpapahulay ug mangatarungan sa iyang kaugalingon pinaagi sa pag-ingon nga mas makapahimulos siya og daghan pinaagi sa pagbasa og maayo nga mga basahon diha sa panimalay kaysa pagtambong og miting sa sakrament ug maminaw sa usa ka dili maayo nga wali. Apan ang panimalay, ingon man ka sagrado, dili mao ang balay sa pag-ampo. Diha sa panimalay walay sakrament nga ipahigayon; diha dili makita ang pagpakigdait uban sa mga miyembro, ni ang pagkompisal sa mga sala ngadto sa mga kaigsoonan. Ang mga bukid mahimo nga pagatawagon og mga templo sa Ginoo ug ang mga kakahoyan ug mga sapa nga iyang binuhat, apan diha lamang sa balay tigumanan, o balay sa pagampo, matuman ang tanang gikinahanglan sa Ginoo. Ug mao nga iyang gipasabut kanato nga: “Kini angay nga ang simbahan magtigum kanunay aron sa pag-ambit sa pan ug bino agi og handumanan kang Ginoong Jesus.” (D&P 20:75.)¹⁷

Wala kita mangadto sa mga miting sa adlaw nga Igpapahulay aron lingawon o gani aron lamang pagatudloan. Mangadto kita aron mosimba sa Ginoo. Tinagsa tagsa nga katungdanan kini, ug bisan pa man kon unsay isulti diha sa pulpito, kon ang usa ka tawo buot nga mosimba sa Ginoo pinaagi sa espiritu ug kamatuoran, mahimo siya nga mobuhat sa ingon pinaagi sa pagtambong sa iyang mga miting, pag-ambit sa sakrament, ug mamalandong sa katahum sa ebanghelyo. Kon pakyas ang pagserbisyo alang kanimo, ikaw napakyas. Walay usa nga makasimba alang kanimo; kinahanglan gayud nga ikaw mismo ang mobuhat sa imong kaugalingong paghulat sa Ginoo.¹⁸

Ang Ginoo misaad og mga panalangin ngadto niadtong kinsa matinud-anon nga motahud sa adlaw nga Igpapahulay.

Ang katuyoan sa sugo [ang pagbalaan sa Igpapahulay nga adlaw] dili paghikaw sa tawo sa usa ka butang. Ang matag sugo nga gihatag sa Dios ngadto sa iyang mga sulugoon mao ang kaayohan niadtong kinsa makadawat og mosunod niini. Ang tawo mao ang makapahimulos pinaagi sa maampingon ug tukma nga pagsunod; ang tawo usab ang mag-antus pinaagi sa paglapas sa mga balaod sa Dios.…

Sa akong mga pagbiyahe akong nakit-an ang matinud-anon nga mga tawo nga palabyon ang maganansya unta sa adlaw nga Igpapahulay ug sa pagkupot sa gidili nga mga butang. Akong nakita ang mga bakero nga wala mohipus sa mga baka sa adlaw nga Igpapahulay, mga tindahan sa prutas sa daplin sa karsada, nga sa kasagaran abli sa tibuok adlaw ug gabii panahon sa tingpamunga og prutas, nga nanirado sa adlaw nga Igpapahulay, mga botika, mga karenderya, ug mga tindahan daplin sa karsada nga sirado sa adlaw sa Ginoo—ug morag paigo ra ang kita sa mga tagiya alang sa ilang mga panginahanglan, sa sama nga higayon mibati og tinuod nga katagbawan sa pagsunod sa balaod. Ug sa matag higayon nga makita nako kining buotan nga mga tawo nga palabyon kining matang sa kinitaan, malipayon ako ug mobati sulod sa akong kasingkasing sa pagpanalangin kanila tungod sa ilang hugot nga pagtuo ug pagkamakanunayon.¹⁹

Nasayud ako nga ang mga tawo dili gayud mag-antus, sa katapusan, sa bisag unsang pinansyal nga mga sakripisyo nga himoon unta, tungod kay ang [Dios] nagsugo kanato sa pagsunod sa iyang mga balaod ug dayon mihagit kanato:

“… sulayi ninyo ako karon, nagaingon ang Ginoo sa mga panon, kong dili ba buksan ko kaninyo ang mga tamboanan sa langit, ug buboan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini.” (Malaquias 3:10.)²⁰

Mahitungod niini nga sugo, ug sa uban pa, atong sundon si Propeta Josue: “Busa karon kahadloki ninyo ang Ginoo, ug sa kinasingkasing ug sa kamatuoran alagaron ninyo siya; … magpili kamo niining adlawa kong kinsa ang inyong alagaron; … apan alang kanako ug sa akong balay, kami magaalagad sa Ginoo.” (Jos. 24:14–15.)

Dayon makalaum kita alang sa mga panalangin nga gisaad sa mga anak sa Israel: “Pagabantayan ninyo ang akong mga adlaw nga igpapahulay, ug magbaton kamo ug kataha sa akong balaan nga puloy-anan: ako mao ang Ginoo.

“Kong magalakaw kamo sa akong kabalaoran ug pagabantayan ninyo ang akong mga sugo, ug pagabuhaton ninyo sila;

“Nan ako magahatag kaninyo sa mga ulan sa ilang panahon, ug ang yuta magahatag sa iyang mga abut, ug ang mga kahoy sa kapatagan magahatag sa ilang bunga.

“Ug ang inyong paggiuk magadangat kaninyo sa pagpamupo, ug ang pagpamupo magadangat sa tingpugas; ug magakaon kamo sa inyong tinapay sa pagkabusog, ug magapuyo kamo nga walay kadautan diha sa inyong yuta.

“Ug magahatag ako ug pakigdait diha sa yuta; ug magakatulog kamo ug walay bisan kinsa nga magahadlok kaninyo.” (Lev. 26:2–6.)²¹

Kon nahigugma kita sa Ginoo, tahuron nato ang Igpapahulay nga adlaw ug ibalaan kini.

Makita niini ang katarungan ngano nga ang Igpapahulay nga adlaw lisud kaayo nga sundon alang sa daghang mga tawo tungod kay gisulat gihapon kini sa mga papan nga bato imbis nga nahisulat diha sa ilang mga kasingkasing.…

.… Sa atong panahon sama ra nga [ang Ginoo] miila sa salabutan sa iyang katawhan, ug naniguro nga masabtan nila ang hingpit nga espiritu sa pagsimba ug sa pagtahud sa adlaw nga Igpapahulay sa dihang miingon siya ngadto kanila:

“Kamo mohalad og usa ka sakripisyo ngadto sa Ginoo nga inyong Dios diha sa pagkamatarung, gani niana nga usa ka masulub-on nga kasingkasing ug usa ka mahinulsulon nga espiritu.” (D&P 59:8.)

… Gihatag niya kanato ang una ug mahinungdanon nga sugo:

“Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.” (Mat. 22:37.)

Dili mahunahuna nga ang usa ka tawo nga nahigugma sa Ginoo sa tibuok niyang kasingkasing ug sa tibuok niyang kalag ug kinsa adunay masulub-on nga kasingkasing ug usa ka mahinulsulon nga espiritu nakaila sa walay kinutuban nga mga gasa nga gihatag sa Ginoo kaniya mapakyas sa paggahin og usa ka adlaw diha sa pito sa pagtamud ug pagpasalamat, ug sa pagpalambo sa mga buhat sa Ginoo. Ang pagtahud sa adlaw nga Igpapahulay maoy usa ka timailhan sa gidak-on sa atong gugma alang sa atong Langitnong Amahan.²²

Kanunay nga malibug ang mga tawo kon unsay buhaton ug unsay dili buhaton: unsay takus ug unsay dili takus nga buhaton diha sa adlaw nga Igpapahulay. Apan kon ang usa ka tawo nahigugma sa Ginoo sa tibuok niyang kasingkasing, gahum, hunahuna, ug kusog, kon ang usa ka tawo makasalikway sa pagkahakog ug makapugong sa tinguha; kon ang usa ka tawo makasukod sa kalihokan sa adlaw nga Igpapahulay pinaagi sa sumbanan sa pagkahinimba, kon ang usa ka tawo matinud-anon sa iyang Ginoo ug sa iyang kaugalingon; kon ang usa ka tawo makahalad og usa ka “masulub-on nga kasingkasing ug usa ka mahinulsulon nga espiritu,” wala gayuy mahitabo nga paglapas sa adlaw nga Igpapahulay sa kinabuhi nianang tawhana.²³

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Ribyuha ang mga pahina 208–210. Hunahunaa ang kamahinungdanon sa paghatag sa Ginoo nganha sa adlaw nga Igpapahulay ug ngano nga ang adlaw nga Igpapahulay lahi sa ubang mga adlaw sa semana. Unsay nakahimo sa adlaw nga Igpapahulay nga “usa ka kahimut-an”?
Ribyuha ang mga pahina 210–212, sa pagpangita alang sa mga butang nga dili nato angay buhaton diha sa adlaw nga Igpapahulay. Ngano nga kining mga kalihokan dili angay sa adlaw nga Igpapahulay? Sa mga pahina 213–217, si Presidente Kimball mihatag og mga ehemplo sa “mahinungdanon ug espirituhanon nga mga kalihokan” alang sa adlaw nga Igpapahulay. Unsay nabuhat ninyo ug sa inyong pamilya aron mapalambo ang inyong pagtahud sa adlaw nga Igpapahulay?
Si Presidente Kimball miingon nga “ang mga katuyoan maoy pinakamahinungdanon nga hunahunaon” alang niadtong nagkinahanglan nga motrabaho sa adlaw nga Igpapahulay (pahina 212). Unsay buhaton sa mga tawo aron magpabilin ang espiritu sa pagsimba diha sa adlaw nga Igpapahulay kon gikinahanglan sila nga magtrabaho?
Unsay buot natong ipasabut kon moingon kita nga ang adlaw nga Igpapahulay mao ang adlaw sa pagpahulay? (Alang sa pipila ka mga ehemplo, tan-awa sa mga pahina 213–215.) Ngano nga sayop ang nagpakaharuhay lamang, nga walay gibuhat sa adlaw nga Igpapahulay?
Ribyuha ang mga katuyoan sa pagtambong sa mga miting sa Simbahan diha sa mga pahina 215–217. Kanus-a lang kamo mibati nga masimbahon diha sa miting sa Simbahan ug ngano? Unsaon ninyo paghimo sa inyong pagtambong ug pagsimba sa Simbahan nga labaw pa ka makahuluganon?
Si Presidente Kimball mipamatuod sa mga panalangin nga atong madawat kon atong ibalaan ang Igpapahulay nga adlaw (mga pahina 217–218; tan-awa usab ang mga istorya diha sa mga pahina 207, 209). Unsa nga mga panalangin ang inyong nadawat sa pagsunod ninyo niini nga sugo?
Diha sa family home evening o konseho sa pamilya, hunahunaa kon unsay mahimo sa inyong pamilya aron makatabang sa usag usa sa pagbalaan sa Igpapahulay nga adlaw.

May Kalabutan nga mga Kasulatan: Genesis 2:1–3; Marcos 2:23–28; 3:1–5; Mosiah 13:16–19; D&P 68:29

Sunday School — “Pagtawag sa adlaw nga Igpapahulay nga usa ka kahimut-an, ug sa balaan sa Ginoo” (Isaias 58:13).

family entering Church — Ang adlaw nga Igpapahulay “mao ang adlaw sa pagsimba ug pagpahayag sa atong pagtamud ug pagpasalamat sa Ginoo.”

family — Si Presidente Kimball nagtudlo nga ang adlaw nga Igpapahulay mao ang adlaw “sa hilum nga pagbisita sa pamilya.”