Pasiuna

Ang Unang Kapangulohan ug ang Korum sa Napulog Duha ka mga Apostoles miestablisar sa han-ay sa Mga Pagtulun-an sa mga Presidente sa Simbahan aron sa pagtabang kanimo nga madugangan ang imong nasabtan sa gipahiuli nga ebanghelyo ug makapaduol ngadto sa Ginoo pinaagi sa mga pagtulun-an sa mga propeta sa ulahing mga adlaw. Samtang ang Simbahan magdugang og mga libro dinhi niini nga han-ay, makakolekta ikaw og mga libro sa pakisayran [reference] sa ebanghelyo diha sa imong balay.

Kining libroha naghisgot sa mga pagtulun-an ni Presidente Spencer W. Kimball, kinsa nagserbisyo isip Presidente sa Ang Simbahan ni Jesukristo sa mga Santos sa Ulahing mga Adlaw gikan sa Disyembre 30, 1973, hangtud sa Nobyembre 5, 1985.

Personal nga Pagtuon

Samtang ikaw magtuon sa mga pagtulun-an ni Presidente Kimball, tinguhaa ang inspirasyon sa Espiritu. Hinumdumi ang saad ni Nephi: “Siya nga sa makugihon nga paagi mangita makakaplag; ug ang mga misteryo sa Dios ipadayag ngadto kanila, pinaagi sa gahum sa Espiritu Santo” (1 Nephi 10:19). Sugdi ang imong pagtuon uban sa pag-ampo, ug padayon sa pag-ampo diha sa imong kasingkasing samtang ikaw magbasa.

Sa katapusan sa kada hugna [chapter], imong makita ang mga pangutana ug mga pakisayran sa kasulatan nga makatabang kanimo nga makasabut ug makagamit sa mga pagtulun-an ni Presidente Kimball. Hunahunaa ang pagribyu niini sa dili pa ikaw mobasa sa hugna.

Palandunga usab ang mosunod nga mga sumbanan:

Tan-awa ang mahinungdanong mga pulong ug mga hugpong sa mga pulong [phrases]. Kon makakita ikaw og usa ka pulong nga wala nimo masabti, gamit og diksyonaryo o laing tinubdan [source] aron mas makasabut pa sa kahulugan niini.
Hunahunaa ang kahulugan sa mga pagtulun-an ni Presidente Kimball. Mahimo nimong markahan ang tinagsang mga pulong ug mga han-ay sa mga pulong [sentence] nga makapatandog sa imong hunahuna ug kasingkasing.
Hunahunaa ang mga kasinatian nga anaa kanimo nga may kalabutan sa mga pagtulun-an ni Presidente Kimball.
Pamalandongi kon sa unsang paagiha ang mga pagtulun-an ni Presidente Kimball magamit nganha kanimo. Hunahunaa ang kabahin kon sa unsang paagi may kalabutan ang mga pagtulunan ngadto sa imong mga kabalaka o mga pangutana. Desisyoni kon unsay imong buhaton isip resulta sa unsay imong nakatunan.

Pagtulun-an gikan Niini nga Libro

Kini nga libro mahimong gamiton sa pagtudlo diha sa panimalay o sa simbahan. Ang mosunod nga mga sumbanan makatabang kanimo:

Hatagi og pagtagad ang mga Pulong ni Presidente Kimball ug sa mga Kasulatan

Misugo ang Ginoo nga dili kita motudlo og “lain nga mga butang gawas niana nga gisulat sa mga propeta ug sa mga apostoles, ug kana nga gitudlo [kanato] pinaagi sa Maghuhupay pinaagi sa pag-ampo diha sa hugot nga pagtuo” (D&P 52:9).

Ang imong buluhaton mao ang pagtabang sa uban nga makasabut ug makagamit sa ebanghelyo pinaagi sa mga pagtulun-an ni Presidente Kimball ug sa mga kasulatan. Ayaw ibaliwala kini nga libro o mag-andam og mga leksyon gikan sa laing mga materyal. Paggahin og usa ka mahinungdanong bahin sa leksyon sa pagbasa sa mga pagtulun-an ni Presidente Kimball niini nga libro ug sa paghisgot sa kahulugan ug kagamitan niini.

Awhaga ang mga partisipante sa pagtuon sa mga hugna sa dili pa ang mga miting sa Dominggo ug sa pagdala sa libro ngadto sa simbahan. Kon ila kining buhaton, mahimo silang mas andam pa sa pag-apil ug sa paglig-on sa usag-usa.

Tinguhaa ang Giya sa Espiritu Santo

Samtang ikaw mag-ampo alang sa panabang ug magkugi sa pag-andam, ang Espiritu Santo mogiya sa imong mga paningkamot. Motabang Siya nga imong mapasabut og maayo ang mga bahin sa kada hugna nga makapaawhag sa uban nga makasabut ug magamit ang ebanghelyo.

Kon ikaw magtudlo, pag-ampo diha sa imong kasingkasing nga ang gahum sa Espiritu mag-uban sa imong mga pulong ug sa panaghisgot sa klase. Si Nephi miingon, “Kon ang tawo mamulong pinaagi sa gahum sa Espiritu Santo ang gahum sa Espiritu Santo modala niini ngadto sa mga kasingkasing sa mga katawhan” (2 Nephi 33:1; tan-awa usab sa D&P 50:13–22).

Pangandam sa Pagtudlo

Ang mga hugna niini nga libro gi-organisar aron motabang kanimo sa pag-andam sa pagtudlo. Hunahunaa usab ang mosunod nga mga sumbanan:

Tun-i ang hugna. Tun-i sa mainampoong paagi ang hugna aron makabaton og pagsalig diha sa imong panabut sa mga pagtulunan ni Presidente Kimball. Makatudlo ikaw uban sa mas dako pa nga sinseridad ug gahum kon ang iyang mga pulong nakaimpluwensya kanimo sa personal (tan-awa sa D&P 11:21). Samtang ikaw magbasa, hunahunaa ang mga panginahanglan niadtong imong tudloan. Mahimo nimong markahan ang mga bahin nga sa imong paminaw makatabang kanila. Timan-i ang mga ikaduhang ulohan [bold subheadings]. Naglatid kini sa nag-unang mga punto diha sa hugna.
Desisyoni kon unsang mga bahin ang gamiton. Ang kada hugna naglangkob og mas daghan pa kaysa imong matudlo sa usa ka leksyon. Imbis nga mosulay sa pagtudlo sa tibuok hugna, pilia sa mainampoong paagi ang mga bahin nga sa imong paminaw labing makatabang niadtong imong gitudloan.
Desisyoni kon unsaon sa pagpaila ang leksyon. Aron ganahan sila sa pagsugod sa leksyon, mahimo kang mopaambit og usa ka personal nga kasinatian o mohangyo sa mga partisipante sa pagbasa og usa ka istorya gikan sa sinugdanan sa hugna o motan-aw sa hulagway diha sa hugna. Dayon mahimo kang mangutana, “Unsa may gitudlo niini nga istorya (o hulagway) kabahin sa hilisgutan sa hugna?” Laing mga kapilian sa pagsugod sa leksyon naglakip sa pagbasa og kasulatan o kinutlo gikan sa hugna o magkanta og himno. Laing makatabang nga ideya mao ang pagpahibalo sa mga partisipante kon unsay nag-unang mga punto sa leksyon.
Desisyoni kon unsaon sa pag-awhag og panaghisgutan. Dinhi niini ikaw kinahanglang mogahin og dakong oras sa leksyon. Ribyuha ang mga sugyot kabahin sa pagpahigayon og makapalig-on nga mga panaghisgutan diha sa mga pahina x–xi niini nga libro. Mahimo kang mogamit sa mga pangutana gikan sa “Mga Sugyot alang sa Pagtuon ug Pagtudlo” diha sa katapusan sa hugna. Mahimo kang mag-andam og kaugalingon nimong hinimo. Ihatag ang mga pangutana nga makatabang niadtong imong gitudloan:
- Tan-awa kon unsay gitudlo. Kining klaseha sa mga pangutana makatabang sa mga partisipante nga makakita ug mahimong pamilyar sa pihong impormasyon diha sa mga pagtulun-an ni Presidente Kimball. Pananglitan, human matino ang usa ka pihong kinutlo, mahimo kang mangutana, “Unsa man ang pipila ka mahinungdanong mga pulong o hugpong sa mga pulong niini nga kinutlo?” o “Unsa may gihisgutan niini nga kinutlo?”
- Hunahunaa ang kahulugan. Kining klaseha sa mga pangutana makatabang sa mga partisipante nga mas makasabut sa mga pagtulun-an ni Presidente Kimball. Pananglitan, “Ngano kaha sa imong paminaw importante man kini nga pagtulunan?” o “Unsa may inyong mga hunahuna o mga pagbati kabahin niini nga kinutlo?” o “Unsa may kahulugan niini nga pagtulun-an nganha kaninyo?”
- Pagpaambit og mga kasinatian. Kini nga mga pangutana makapaawhag sa mga partisipante sa pagpangita og kalabutan sa unsay gisulti ni Presidente Kimball sa ilang personal nga mga kinabuhi. Pananglitan, “Unsa nga mga kasinatian ang inyong nasinati nga adunay kalabutan sa unsay gisulti ni Presidente Kimball?”
- Gamita kon unsay gitudlo. Kining mga pangutanaha makatabang sa mga partisipante nga maghunahuna kabahin sa mga paagi nga sila magpakabuhi sumala sa mga pagtulun-an ni Presidente Kimball. Pananglitan, “Unsa may gi-awhag ni Presidente Kimball nga atong buhaton? Sa unsa mang mga paagi nato maggamit ang iyang gisulti?”
Desisyoni kon unsaon pagtapus sa leksyon. Mahimo kang mopili sa pag-summarize sa leksyon diha-diha o mohangyo sa usa o duha ka mga partisipante sa pagbuhat sa ingon. Ingon nga gi-aghat sa Espiritu, pamatuod kabahin sa mga pagtulun-an nga imong gihisgutan. Mahimo usab ikaw nga modapit sa uban sa pagpaambit sa ilang mga pagpamatuod. Awhaga kadtong imong gitudloan sa pagsunod sa mga pag-aghat nga ilang nadawat gikan sa Espiritu Santo.

Samtang nangandam ka sa pagtudlo, mahimo ikaw nga mangita og mga ideya diha sa Teaching, No Greater Call (36123), part B, mga hugna 14, 16, 28, ug 29; o diha sa Teaching Guidebook (34595).

Pahigayon og mga Panaghisgutan nga Makahatag og Kaayohan

Ang mosunod nga mga sumbanan makatabang kanimo sa pagawhag ug pagpahigayon og mga panaghisgutan nga makahatag og kaayohan:

Tinguhaa ang giya sa Espiritu Santo. Moaghat siya kanimo sa pagpangutana o sa pagpaapil sa mga tawo diha sa panaghisgutan.
Tabangi ang mga partisipante nga mohatag og pagtagad sa mga pagtulun-an ni Presidente Kimball. Ipabasa kanila ang iyang mga pulong aron makasugod og panaghisgutan ug sa pagtubag og mga pangutana. Ibalik pag-usab ang mga panaghisgutan nga nagsugod na sa pagsukwahi sa hilisgutan o kanang hinimohimo [speculative] o makapalalis [contentious].
Kon angay, ipakigbahin ang mga kasinatian nga may kalabutan sa mga pagtulun-an diha sa hugna.
Awhaga ang mga partisipante sa pagpakigbahin sa ilang mga hunahuna, sa pagpangutana, ug sa pagtudlo sa usag usa (tan-aw sa D&P 88:122). Pananglitan, mahimo kang mohangyo kanila sa pagkomentaryo sa unsay gisulti sa uban, o mahimo nimong itumong ang usa ka pangutana ngadto sa pipila ka mga partisipante.
Ayaw kahadlok kon dunay kahilum human ikaw makapangutana. Sa kasagaran kadtong imong gitudloan nagkinahanglan og panahon sa paghunahuna o sa pagtan-aw sa ilang mga libro sa dili pa sila mopakigbahin sa ilang mga ideya, mga pagpamatuod, ug mga kasinatian.
Paminaw pag-ayo, ug paningkamuti ang pagsabut sa mga komentaryo sa kada usa. Pasalamati ang ilang partisipasyon.
Kon ang mga partisipante mopakigbahin og daghang mga ideya, ilista kini nga mga ideya diha sa pisara o hangyoa ang usa ka tawo sa pagbuhat sa ingon.
Pangita og daghang mga paagi sa pag-apil sa mga partisipante diha sa panaghisgutan. Pananglitan, mahimo nimo silang pahisguton sa mga pangutana diha sa ginagmay nga mga grupo o uban sa tawo nga naglingkod tapad nila.
Hunahunaa ang pagkontak og sayo sa usa o duha ka mga partisipante. Hangyoa sila sa pag-adto sa klase nga andam sa pagtubag sa usa sa mga pangutana nga imong gi-andam.
Ayaw putla ang maayong panaghisgutan aron lang mahuman ang tanang materyal nga imong gi-andam. Unsay mas importante mao nga ang mga partisipante mobati sa impluwensya sa Espiritu ug molambo ang ilang pasalig sa pagsunod sa ebanghelyo.

Impormasyon mahitungod sa mga Tinubdan nga Gikutloan Niining Libroha

Ang mga pagtulun-an ni Presidente Kimball niining libroha direkta nga mga kinutlo gikan sa lainlaing mga tinubdan. Kining mga kinutlo mipabilin sa punctuation, spelling, capitalization, ug paragraphing sa orihinal nga mga tinubdan gawas kon ang editoryal o tipograpikal nga mga kausaban gikinahanglan aron sayon basahon. Tungod niini nga katarungan, makamatikod ka og ginagmay nga kausaban diha sa teksto.

Si Presidente Kimball usab kasagaran mogamit og mga termino sama sa mga lalaki, lalaki, o mga katawhan nga nagpasabut sa tanang mga tawo, lalaki ug babaye. Kanunay siyang mogamit sa pronoun nga he nga nagpasabut sa lalaki ug babaye. Komon kini nga pinulongan sa iyang panahon. Bisan pa sa kalahian tali niining maong pinulongan ug sa bag-o nga paggamit, ang mga pagtulun-an ni Presidente Kimball maggamit sa mga babaye ug lalaki.