Hugna 17

Ang Balaod sa Kaputli

Ang Ginoo adunay usa lamang ka lagda sa moralidad— hingpit nga pagkaputli alang sa mga lalaki ug mga babaye sa dili pa ang kaminyoon ug ang hingpit nga pagkamaunungon human sa kaminyoon.

Gikan sa Kinabuhi ni Spencer W. Kimball

Sa pagtambag sa mga miyembro sa Simbahan kabahin sa pagpakig-date, pagpangulitawo, ug kaminyoon, si Presidente Spencer W. Kimball mipasabut og maayo sa pagkamahinungdanon sa pagsunod sa balaod sa kaputli sa Ginoo ug ang pagkamaunungon. Mipahimangno usab siya batok sa pagsulay ni Satanas nga himoon ang paglapas niini nga balaod nga makatarunganon o dili makadaut. Nag-istorya siya kabahin sa batan-on nga managtiayon kinsa nadani niining panlimbong sa kaaway:

“Ang batan-ong lalaki miingon ‘Oo, nadani kami sa usag usa, apan wala namo hunahunaa nga sayop kini tungod kay naghigugmaay kami sa usag usa.’ Akong gihunahuna nga nasayop ako sa pagsabut niya. Sukad pa sa sinugdanan sa kalibutan, aduna nay dili maihap nga imoralidad, apan sa pagpaminaw niini nga gihatagan og pangatarungan sa usa ka batan-ong Santos sa Ulahing mga Adlaw ang nakapakugang kanako. Giusab niya, ‘Dili, dili kini sayop, tungod kay naghigugmaay kami sa usag usa.’

“Gibalikbalik nila kanunay kining gituohan nga butang salawayon nga nakumbinser nila ang ilang mga kaugalingon, ug migamot ang sayop nga pagtuo, ug luyo niini nga pagtuo, masupilon sila, nga sama og mahagiton, nga mibarug.”

Sa ilang pagpangatarungan, mitubag si Presidente Kimball, “Dili akong pinangga nga mga batan-on, wala kamo mahigugma sa usag usa. Hinoon, naibug kamo sa usag usa.… Kon tinuod nga nahigugma ang usa ka tawo ngadto sa lain ang maong tawo andam nga magpakamatay alang nianang tawhana kay sa mopasakit kaniya. Sa panahon sa pagpatuyang, ang putli nga gugma mawala ug mobanus ang kahigal.”¹

Mipamatuod usab si Presidente Kimball nga ang hingpit nga kalipay ug kalinaw moabut tungod sa pagsunod sa balaod sa kaputli. Nakita niya kini nga mga panalangin diha sa mga kinabuhi sa masulundon nga mga miyembro, sama niini nga kasinatian nga naangkon niya diha sa templo:

“Dinhi mao ang kalinaw ug panag-uyon ug mahinamon nga pagpaabut. Usa ka hapsay kaayo og pamarug nga batan-ong lalaki ug usa ka babaye nga nagsul-ob og hilabihan ka anindot nga bestida, matahum nga dili ikahulagway, nagluhod [diha] sa altar. Pinaagi sa awtoridad ug gahum nga gihatag, akong gipahayag ang langitnong seremonyas nga nagminyo ug nagbugkos kanila alang sa kahangturan dinhi sa yuta ug sa celestial nga mga kalibutan. Ang mga putli og kasingkasing atua didto. Ang langit atua didto.”²

Mga Pagtulun-an ni Spencer W. Kimball

Ang balaod sa kaputli nagdili sa tanang sekswal nga mga pakigrelasyon gawas sa kaminyoon.

Aron masabtan ang baruganan sa Simbahan kabahin sa lagda sa moralidad, hugot ug walay pagkausab namong gipahayag nga ang balaod sa Dios dili sama sa daan na kaayo nga mga butang nga isalikway. Ang Dios mao ra gihapon kaniadto, karon, ug sa kahangturan, ug ang iyang mga pakigsaad ug mga doktrina dili mausab; ug kon ang adlaw mag-anam og kabugnaw ug ang mga bitoon dili na mosanag, ang balaod sa kaputli sa gihapon mao ang sukaranan diha sa kalibutan sa Dios ug sa simbahan sa Ginoo. Ang karaan nga mga hiyas gihuptan sa Simbahan dili tungod kay karaan kini, kondili tungod kay matarung kini.³

Ang hingpit nga kaputli sa dili pa ang kaminyoon ug ang hingpit nga pagkamaunungon human sa kaminyoon mao gihapon ang sumbanan diin walay mahitabong pagsupak nga walay sala, kaalautan, ug pagkawalay kalipay.⁴

Kadtong kinsa nagbugalbugal sa kaminyoon, ug kadtong kinsa nag-ingon nga kinaraan ang pagtamud sa kaputli sa dili pa ang kaminyoon uban sa pagkamaunungon, maingon og desidido nga motukod og bag-ong palakaw sa ilang kaugalingon ug ipamugos kini sa uban. Wala ba nila makita kanang hilabihan nga paghinakog nga sa katapusan modangat ra ngadto sa hilabihan nga kamingaw? Wala ba nila kana makita, nga sa pagpangitag katagbawan, sa anam-anam mawala kanila ang hingpit nga kalipay? Wala ba nila kana makita nga ang ilang matang sa katagbawan magbunga og kakulang ug kahaw-ang diin walay daklit nga kalipay ang makaluwas kanila? Ang balaod sa pag-ani wala pa gayud mausab [tan-awa sa Mga Taga-Galacia 6:7].⁵

Ang unang mga apostoles ug mga propeta naghisgot og daghang mga sala nga salawayon ngadto kanila. Kadaghanan niini mao ang mga sala sa pakighilawas—pagpanapaw, pagkawalay pagbati, pagkahigal, pagka dili maunungon, walay pagpugong, mahilas nga sinultihan, dili putli, dautag tinguha, pakighilawas gawas sa kaminyoon. Naglakip kini sa tanang sekswal nga pakigrelasyon gawas sa kaminyoon—paghalok ug panghikaphikap sa lawas, sex perversion, masturbation, ug pagbutang sa tawo diha sa iyang hunahuna ug sa iyang sinultihan kabahin sa pakighilawas. Nalakip ang matag gitago ug sekreto nga sala ug tanang dili balaan ug malaw-ay nga mga hunahuna ug mga gawi. Usa sa pinakangil-ad niini mao ang pakighilawas sa duol nga kabanay [incest].⁶

Kon ang usa ka tawo adunay [homosekswal] nga mga tinguha ug mga kahilig, mabuntog niya kini nga maingon og siya adunay tinguha sa paghalok ug panghikaphikap sa lawas o pakighilawas sa wala pa ang kaminyoon o pagpanapaw. Ang Ginoo nanghimaraut niini nga binuhatan uban sa kakusog nga tugbang sa iyang panghimaraut sa pagpanapaw ug sa laing sama nga pakighilawas nga mga buhat.… Usab, sukwahi sa pagtuo ug pamahayag sa daghang mga tawo, kini nga [binuhatan], sama sa pakighilawas sa wala pa ang kaminyoon, mahimo nga mabuntog ug mapasaylo, apan usab, pinaagi lamang sa usa ka mahinuklugon ug tinud-anay nga paghinulsol, nga nagpasabut og hingpit nga pagbiya ug hingpit nga kausaban sa hunahuna ug buhat. Ang kamatuoran nga ang ubang mga gobyerno ug ang ubang mga simbahan ug daghang dautan nga mga tawo misulay sa pagminus sa ingon nga pamatasan gikan sa kriminal nga mga kalapasan ngadto sa personal nga kahigayunan nga wala makapausab sa kinaiya ni ang pagkabug-at sa binuhatan. Ang buotan nga mga tawo, maalamon nga mga tawo, mahadlokon sa Dios nga mga tawo sa tanang dapit sa gihapon misaway sa binuhatan nga dili takus nga anak nga mga lalaki ug mga babaye sa Dios, ug ang simbahan ni Kristo misaway niini ug nanghimaraut niini.… Kining makalilisang nga homosekswal nga sala nahinabo na sa tibuok kasaysayan sa kalibutan. Daghang mga siyudad ug sibilisasyon ang nangahanaw tungod niini.⁷

Ang putli nga pakighilawas sa kinabuhi sa hustong kaminyoon maoy gitugot. Adunay panahon ug pagkaangay alang sa tanang mga butang nga may bili. Apan ang pakighilawas gawas sa legal nga kaminyoon naghimo sa indibidwal nga usa ka butang nga gamitonon, usa ka butang nga kapahimuslan, ug makahimo kaniya nga mailisan, mapahimuslan, ikasalikway.…

Ang gidili nga pakighilawas maoy usa ka hinakog nga buhat, usa ka pagbudhi, ug dili matinuoron. Ang pagdumili sa pagdawat og reponsibilidad maoy usa ka tinalawan, dili maunungon. Ang kaminyoon alang sa karon ug sa kahangturan. Ang pakighilawas sa wala pa ang kaminyoon ug ang tanang mga pagliko alang lamang karong adlawa, taknaa, para sa “karon” lang. Ang kaminyoon naghatag og kinabuhi. Ang pakighilawas sa wala pa ang kaminyoon mosangput sa kamatayon.⁸

Ang gugma makalingaw ug dili hakog, apan ang kahigal makadaut ug hakog.

Ang batan-ong lalaki kinsa nagsaad og popularidad, paglingawlingaw, kasiguroan, paglipaylipay, ug gani sa gugma dili matinud-anon sa iyang pagkatawo, kon ang tanan ra diay niyang mahatag mao ang kahinam ug ang yawan-on niini nga mga sangputanan—bug-at nga mga pagbati sa sala, kalagot, kasilag, kahadlok, dayon sa pagdumot, ug posible nga pagpamabdos nga dili lehitimo ug madungganon. Gipasalig niya ang iyang gugma apan ang tanan niyang gihatag mao ang kahigal. Sa ingon man usab, sa batan-ong dalaga nga mihatag sa kasayon sa iyang kaugalingon. Ang sangputanan mao ang kadaut sa kinabuhi ug pagkasinalikway sa kalag.…

Ug sa gihapon kining batan-ong mga tawo naghisgot og gugma. Unsa ka dunot nga gipaagi sa hilabihan ka maanindot nga pagkasulti! Ang bunga pait kaayo tungod kay ang kahoy nadunot. Ang ilang mga ngabil nagsulti, “gihigugma ko ikaw.” Ang ilang mga lawas nag-ingon, “giganahan ko nimo.” Ang gugma maloloyon ug makalingaw. Ang paghigugma mao ang paghatag, dili pagkuha. Ang paghigugma mao ang pag-alagad, dili pagpahimulos.…

Unsa ang gugma? Daghang mga tawo ang naghunahuna niini nga usa lamang ka pisikal nga pagdani ug sa kasagaran nagsulti sila og “nahigugma” ug “gugma sa unang panagkita.” … Ang usa ka tawo tingali madani dayon ngadto sa lain nga indibidwal, apan ang gugma mas labaw pa kay sa pisikal nga pagkadani. Kini maduluton, naglakip, ug malukupon. Ang pisikal nga pagkadani maoy usa lamang sa daghang mga elemento; kinahanglan gayud nga may hugot nga pagtuo ug pagsalig ug pagsinabtanay ug panaguban. Kinahanglan gayud nga may naandan nga mga mithi ug mga sumbanan. Kinahanglan gayud nga may pagkamaunungon ug panag-uban. Ang gugma mao ang pagkalimpyo ug paglambo ug pagsakripisyo ug pagka dili hakogan. Kini nga matang sa gugma dili gayud kapuyon o molubad, apan magpadayon diha sa kasakit ug kagul-anan, kakabus ug kawad-on, kalampusan ug kahigawad, karon ug sa kahangturan. Aron ang gugma magpadayon, kinahanglan gayud nga may makanunayon nga pagdugang sa pagsalig ug pagsinabtanay, sa kanunay ug kinasingkasing nga pagpakita og pasalamat ug pagbati. Kinahanglan gayud ang pagbaliwala sa kaugalingon ug sa makanunayon nga pagpakabana alang sa uban. Ang mga tinguha, paglaum, katuyoan, kinahanglan gayud nga kanunayng ipokus ngadto sa usa lamang ka agianan.…

Ang batan-ong lalaki nga manalipud sa iyang hinigugma batok sa tanang paggamit o pagpanamastamas, batok sa pagpanaway ug pagpakaulaw gikan sa iya mismong kaugalingon o sa uban, mahimo nga nagpakita og tiunay nga gugma. Apan ang batanong lalaki nga mogamit sa iyang kauban isip usa ka buhi nga dulaan aron paghatag sa iyang kaugalingon og temporaryo nga katagbawan—kana mao ang kahigal.

Ang batan-ong babaye nga naglihok sa iyang kaugalingong pagkamadanihon diha sa espirituhanon, maalamon, ug sa pisikal nga paagi apan dili mag-awhag og pisikal nga impluwensya sa iyang kapares sa pulong o sa sinina o panglihoklihok maoy nagpahayag og tinuod nga gugma. Ang batan-on nga babaye nga kinahanglan gayud nga manghikap ug moawhag ug mokarinyo ug manintal ug magpakita og kahigal ug pagpahimulos.…

Pagbantay sa panglingla sa yawa nga maghimo sa dautan nga maingon og maayo pinaagi sa pagtakuban nga nagtabon sa kinaiya niini. Ang mao nga himan mao ang pangatarungan nga ang kahigal maoy gugma.⁹

Bisan kon ang pakighilawas mahimong importante ug makatagbaw nga bahin sa kinabuhing minyo, kinahanglan gayud nga atong hinumduman nga ang kinabuhi wala himoa nga alang lamang sa pakighilawas.¹⁰

Ang panaghiusa sa lalaki ug babaye, bana ug asawa (ug bana ug asawa lamang), ang nag-unang katuyoan sa pagdala og mga anak sa kalibutan. Ang pakighilawas nga mga kasinatian wala gayud gituyo sa Ginoo nga mahimo lang nga dulaan o diha lamang sa pagtagbaw sa kahinam ug mga kahigal. Wala kami nahibaloan nga sugo gikan sa Ginoo nga ang tukma nga pakighilawas nga kasinatian tali sa mga bana ug mga asawa hingpit nga pagalimitihan sa paglalang ug mga anak, apan among nakit-an ang daghang ebidensya gikan ni Adan hangtud karon nga walay balaod nga sukad gihimo sa Ginoo alang sa pagpatuyang sa pakighilawas.¹¹

Kinahanglan gayud nga likayan nato ang mahilas nga talan-won ug ubang mga porma sa imoralidad.

Espirituhanon nga mga anak kita sa Dios, ug … kita ang pinakataas niya nga nilalang. Sa kada usa kanato may kalagmitan nga mahimong usa ka Dios—putli, balaan, tinuod, maimpluwensya, gamhanan, gawasnon sa kalibutanon nga gahum. Atong nakatunan gikan sa mga kasulatan nga kada usa kanato nag-angkon og mahangturon nga kinabuhi, nga sa sinugdanan pa kauban na kita sa Dios (Tan-awa sa Abr. 3:22). Kana nga salabutan naghatag kanato og usa ka talagsaon nga panabut sa kaligdong sa tawo.

Apan adunay bakakon nga mga magtutudlo bisag asa, naggamit sa pagkigpulong ug mahilas nga literatura, mga magasin, radyo, TV, law-ay nga mga pulong—nagsabwag og mga doktrina nga supak sa pagtuo nga nakaguba sa moral nga mga sumbanan, ug kini aron pagtagbaw sa kahigal sa unod.¹²

Among gisaway ang pornograpiya nga ingon og milukop sa kayutaan. Ang balaod naghimo og paningkamot sa pagpugong niini, apan ang pinakamaayo nga paagi sa pagsanta niini mao ang pagpahimo sa mga lalaki ug mga babaye, uban sa ilang mga pamilya, sa pagtukod og babag batok niini. Mangutana kami kaninyo, “Kamong buotan nga mga tawo sa inyong komunidad gusto niining mangil-ad nga bisyo nga modaut sa inyong mga pamilya ug sa inyong mga silingan?”¹³

Kon magtan-aw kita sa pagkadautan sa daghang mga tawo sa atong kaugalingong komunidad diha sa ilang determinasyon nga ipugos diha sa mga tawo ang malaw-ay nga mga pasundayag, bastos nga mga sinultihan, supak sa kinaiyahan nga mga binuhatan, makahunahuna kita, gikab-ot ba ni Satanas ang iyang makasasala, dautang kamot aron guyuron ngadto sa iyang pundok ang mga tawo dinhi sa yuta? Wala ba kitay igo nga buotang mga tawo nga nahibilin aron sa pagpahunong sa kadautan nga naghulga sa atong kalibutan? Nganong nagpadayon man kita sa pakig-uyon-uyon sa dautan ug nganong padayon man nga gipasagdan nato ang sala?¹⁴

Manghinaut kita nga unta ang atong mga ginikanan ug mga lider dili motugot sa pornograpiya. Basura gayud kini, apan karon gibaligya kini isip normal ug makatagbaw nga pagkaon.… Adunay sumpay tali sa pornograpiya ug ang hinay, nga aghat sa pakighilawas ug mga pagtuis.¹⁵

Ang sala nga sangputanan sa pornograpiya sa kaalaut nagpatunhay sa ubang mabug-at nga mga kalapasan, lakip na ang aborsyon.¹⁶

Dili kini katuohan sa pag-ingon nga ang pornograpiya walay epekto. Adunay usa ka piho nga kalambigitan ngadto sa krimen. Ang pagpatay, pagpangawat, pagpanglugos, prostitusyon, ug bisyo nga ginegosyo, maoy gitagbaw niining imoralidad. Ang pagbanabana sa krimen kabahin sa pakighilawas mao rag nagpakita og kalambigitan tali sa krimen ug pornograpiya.

Wala gayud kini makahatag og katilingbanong kaayohan. Giawhag namo ang mga pamilya sa pagpanalipod sa ilang mga anak sa tanang paagi kutob sa mahimo. Nagpuyo kita sa matuguton nga kalibutan, apan kinahanglan gayud nga atong sigurohon nga dili kita mahimong kabahin nianang matuguton nga kalibutan, nianang nagkaalaot nga kalibutan.¹⁷

Ang bisag asa nga mga miyembro sa Simbahan giawhag nga dili lamang mobatok sa midagsang nga pornograpiya, apan isip mga lungsuranon mobati og kaaktibo ug walay hunong sa pakigaway batok niining malimbungon nga kaaway sa katawhan sa tibuok kalibutan.…

… Tudloi ang inyong mga anak sa paglikay sa mahilas nga mga butang tungod kay makadaut kini. Isip mga lungsuranon, salmot sa pagpakig-away batok sa kalaw-ay diha sa inyong mga komunidad. Ayaw tugoti nga magpakahilum kamo nga dili na lang molihok tungod sa mga negosyante og pornograpiya nga miingon nga ang pagkuha sa malaw-ay nga butang mao ang paghikaw sa mga tawo sa ilang mga katungod sa gawasnong pagpili. Ayaw tugoti nga ihulagway nila ang kahilayan sa pakighilawas isip kagawasan.

Ang bililhon nga mga kalag anaa sa kakuyaw—mga kalag nga suod ug mahal sa kada usa kanato.¹⁸

Kinahanglan nga bantayan sa mga ginikanan ug mga lider ang mga bata ug mga batan-on batok sa imoral nga impluwensya.

Ang mga bata makat-on og sayo sa ilang mga kinabuhi gikan kaninyo nga kinahanglang dili gayud sila moapil sa bisan unsa nga matang sa imoral nga mga binuhatan. Dili kini ikasulti kanila sa makausa lang. Apan sa dili pa sila maminyo kinahanglang sultihan sila sa gatusan ka mga higayon, ug kinahanglang mahibalo sila nga dili lamang ang ilang pamilya ug ilang mga ginikanan ang naglaum niining mahinungdanon nga serbisyo, apan ang Ginoo usab sa langit, nga si Jesukristo, naglaum kanila nga magpabilin nga limpyo ug gawasnon sa imoralidad.¹⁹

Ang pagka dili putli mao ang dakong yawan-ong buhat karon. Sama sa kugita, molikus ang mga gaway niini sa usa ka tawo. Adunay daghang mga agianan nga modala sa mga batan-on ngadto niining pagkahugaw. Mahimo bang hisgutan nako ang pipila ka mga paagi nga makapukan sa kadungganan.

Ang pipila nahimong panagsa ra diha sa kalihokan sa simbahan ug mopalayo sa ilang mga kaugalingon gikan sa makapadalisay ug mapanalipdanon nga mga impluwensya sa Simbahan. Ang ebanghelyo mao ra og ikaduha na lamang sa ilang personal nga mga tinguha. Mopalta na sila sa ilang mga miting, nagtugot sa mga buluhaton sa eskwelahan, sosyal nga kinabuhi, o negosyo o propesyon nga mohulip sa mahinungdanon nga mga kalihokan sa simbahan ug sa ebanghelyo hangtud nga ang ilang mga pagbati nganha sa Simbahan ug sa mga sumbanan niini maluya.

Ang lain pa sa daghang mga butang nga modala ngadto sa pagkadili putli mao ang pagka dili ligdong. Karon daghan nga batanong mga babaye ug batan-ong mga lalaki ang mapagarbuhon sa ilang kahibalo sa mga panghitabo sa kinabuhi. Abi nila og nahibalo na sila sa tanang mga tubag. Maghisgut sila kabahin sa pakighilawas nga sama ka gawasnon nga maghisgut og kabahin sa mga sakyanan ug mga salida sa sine ug mga sinina. Ug ang espiritu sa pagkawalay kaligdong molambo hangtud nga ingon og wala nay butang nga sagrado.²⁰

Walay katarungan ngano ang mga babaye kinahanglang magsul-ob og mubo nga sinina o sa laing bahin sihag nga bistida tungod kay mao na kini karon ang kalibutanon nga estilo. Makahimo kita og atong kaugalingong estilo.…

Ni paghatag og katarungan alang sa batan-ong mga lalaki sa paghubo ug pagpakita sa ilang mga lawas. Ang mga lalaki mahimong mopakita og kaisug ug maayo nga paghukom kon dasigon nila ang higala nilang batan-ong mga babaye sa pagsul-ob og tarung nga sinina. Kon ang batan-ong lalaki dili makig-date sa usa ka batan-ong babaye nga nagsul-ob og dili tarung nga sinina, sa dili madugay mausab ra ang estilo.…

Ang Ginoo misaad ngadto sa maisugon, “Ang tanang butang ko imo usab.” Aron maabut kining mahabog nga gitas-on ug walay kinutuban nga mga panalangin, ayaw og palabya ang mga kahigayunan. Padayon sa inyong mga kinabuhi nga buotan ug limpyo ug lunsay, aron walay moabut nga kapakyasan. Sa paghimo niini, mas maayo nga maglikay sa “tanang dagway sa kadautan” ug “ang paghimo og dautan.”²¹

Dili nato palabihan ang pagkawalay kaligdong isip usa sa mga laang nga likayan kon buot kita molikay sa tintasyon ug magpabilin sa atong mga kaugalingon nga limpyo.²²

Akong isugyot … ang mosunod nga sumbanan. Ang bisan unsa nga pag-date o panagpares-pares sa sosyal nga mga panag-uban kinahanglan nga iuswag hangtud nga mag-edad sa dili moubos sa 16 o pataas pa, ug bisan pa gani niana kinahanglan mohimo gihapon og daghang pagmatngon sa mga pagpili ug sa pagkamatinuoron. Kinahanglan nga limitahan gihapon sa mga batanon sa pagpakig-uban sulod sa pipila ka tuig, tungod kay ang lalaki magmisyon pa kon mag-edad na siya og 19 anyos.

Ang pagpakig-date ug ilabi na sa permanente nga pagpakig-date sa usa lamang ka lalaki sa sayong pangidaron maoy labing makuyaw. Modaut kini sa katahum sa kinabuhi. Hikawan kamo niini sa makalingaw ug buhong nga mga kasinatian; mohatag kini og kinutuban sa panaghigala, makapakunhod kini sa mga kaila nga bililhon unta sa pagpili og kapares alang sa karon ug sa kahangturan.

Aduna gayuy mga higayon alang sa pagsayaw, sa pagbiyahe, sa pagpanag-uban, sa pagpakig-date ug gani sa permanente nga pagpakig-date sa usa lamang ka tawo nga mosangput sa relasyon nga modala sa mga batan-on ngadto sa balaan nga templo alang sa mahangturong kaminyoon. Apan ang pagpahigayon mao ang pinakamahinungdanon. Sayop ang pagbuhat bisan sa husto nga mga butang diha sa sayop nga panahon sa sayop nga dapit ubos sa sayop nga mga kahimtang.²³

Padayuna ang inyong kinabuhi nga limpyo ug gawasnon sa tanang dili balaanon ug dili lunsay nga mga hunahuna ug mga binuhatan. Likayi ang tanang mga pakig-uban nga makapaulaw ug makapaubos sa halangdon, matarung nga mga sumbanan nga gipahimutang alang kanato. Dayon ang inyong kinabuhi molambo og maayo ug ang kalinaw ug hingpit nga kalipay ang mopalibut kaninyo.²⁴

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Itandi ang managtiayon nga gihulagway ni Presidente Kimball diha sa pahina 223 uban sa managtiayon nga iyang gisulti diha sa unang paragrap sa pahina 225. Unsa kahay naggiya niining Santos sa Ulahing mga Adlaw nga managtiayon ngadto sa ingon nga pagkalahi sa mga kinaiya ug mga binuhatan?
Basaha ang ikaduhang paragrap sa pahina 225. Unsa kahay ikasulti nimo ngadto sa usa ka tawo nga nag-ingon nga kinaraan na ang kaputli? (Alang sa pipila ka mga ehemplo, tan-awa sa mga pahina 225–227.) Unsa kaha ang mga sangputanan sa pagbaliwala sa balaod sa kaputli? Unsay pipila ka mga panalangin sa pagsunod niini?
Hunahunaa kon unsaon ninyo sa pagkompleto niini nga hugpong sa mga pulong: Ang paghigugma mao ang . Ang pagkahigal mao ang . (Alang sa pipila ka mga ehemplo, tan-awa sa mga pahina 227–229.) Sa unsa nga paagi nga ang atong pagsabut sa gugma makaimpluwensya sa atong mga hunahuna ug mga binuhatan?
Ngano sa inyong hunahuna nga si Presidente Kimball ug daghang mga lider sa Simbahan sukad pa kaniya nagpahimangno batok sa mahilas nga basahon? (Tan-awa sa mga pahina 229–231.) Sa unsa nga paagi kita makig-away sa pagsab-wag ug sa pag-impluwensya sa mahilas nga basahon? Unsa kahay atong mabuhat diha sa atong mga pamilya aron sa “pagtukod og babag batok niini”?
Ribyuha ang mga sumbanan sa mga pahina 231–234. Ngano nga kinahanglang itudlo og sayo sa mga ginikanan ug mga lider ang balaod sa kaputli diha sa kinabuhi sa bata? Unsay mabuhat sa mga ginikanan ug mga lider aron matabangan ang mga batan-on aron magpabilin nga matinud-anon ngadto sa Simbahan ug sa mga sumbanan niini? Unsa may mga kapanguhaan nga gihatag sa Simbahan aron matabangan ang mga batan-on nga makasabut ug maghupot sa mga sumbanan sa Simbahan?
Unsa man ang kalabutan sa kaligdong ug kaputli?
Unsay ipasabut sa pagkaligdong sa atong pamaagi sa pagsinina? Sa unsa nga mga paagi kita “makahimo og atong kaugalingong estilo”? (pahina 228). Unsay ipasabut sa pagkaligdong diha sa atong pinulongan ug pamatasan? Sa unsa nga paagi kita makatabang sa mga batan-on nga makasabut sa panginahanglan og kaligdong sa tanang mga aspeto sa ilang mga kinabuhi?

May Kalabutan nga mga Kasulatan: 1 Mga Taga-Corinto 6:9, 18–20; Jacob 2:7; Alma 39:3–5, 9; 3 Nephi 12:27–30; D&P 42:22–23, 40–41; 59:6

bride and groom at temple — “Ang kaminyoon alang sa karon ug sa kahangturan.… Ang kaminyoon naghatag og kinabuhi.”

young couple on date — Si Presidente Kimball naghatag og klaro nga mga lagda alang sa kabatan-onan kinsa makig-date.