Hugna 24

Pagpaambit sa Ebanghelyo

Kinahanglan kita nga magkugi og maayo sa pagpaambit sa ebanghelyo ngadto sa uban.

Gikan sa Kinabuhi ni Spencer W. Kimball

Atol sa pagbiyahe sa Quito, Ecuador, isip miyembro sa Korum sa Napulog Duha ka mga Apostoles, si Elder Spencer W. Kimball didto sa kan-anan sa hotel uban sa grupo nga naglakip sa upat ka batan-ong mga misyonaryo. “Mikomentaryo siya sa uban nga ang ilang waiter usa ka maayo og hitsura nga batan-ong lalaki ug mahimong maayong misyonaryo para sa Simbahan. Si Elder Kimball mi-order og pan ug gatas, dayon nangutana sa waiter kon duna ba siya’y mga anak didto sa balay. ‘Usa ka anak nga lalaki,’ ang waiter mitubag. ‘Ang pan ug gatas makapahimsog kaniya,’ si Elder Kimball miingon, ‘pero mas mohimsog pa siya kon imo siyang pakan-on sa pagkaon nga ihatag niining batan-ong mga lalaki.’ Ang waiter nahingangha. Dayon si Elder Kimball mipasabut nga kining batan-ong mga lalaki, mga misyonaryo nga adunay ikatudlo nga ebanghelyo ni Jesukristo. Ang waiter mipahayag og interes nga matudloan siya sa mga misyonaryo.”¹

Si Presidente Kimball kanunayng mopasabut sa mando sa Manluluwas nga ang ebanghelyo pagadad-on sa “tanang kalibutan” (Marcos 16:15). Mihangyo siya og dugang mga full-time nga mga misyonaryo, ilabi na sa batan-ong mga lalaki ug mas tigulang nga mga magtiayon, ug mipahinumdom siya sa tanang mga miyembro sa Simbahan sa pag-apil niining balaanong gisugo nga buluhaton. “Ang atong dakong panginahanglan, ug ang atong dakong tawag,” siya mitudlo, “mao ang pagdala sa mga tawo niini nga kalibutan sa kahayag sa salabutan aron pagbanwag sa ilang agianan gikan sa kangi-ub ug kangitngit ug ngadto sa kalipay, kalinaw, ug mga kamatuoran sa ebanghelyo.”²

Mga Pagtulun-an ni Spencer W. Kimball

Ang Ginoo misaad kanato og daghang mga panalangin samtang kita mopaambit sa ebanghelyo.

Adunay espirituhanong pamasin sa paghimo sa misyonaryong buhat, sa paghatag og mga referral, sa pagpakig-uban sa mga misyonaryo samtang sila naghatag sa mga panaghisgutan. Makapahinam kini ug magantihon. Ang mga oras, ang paningkamot, ang paghunahuna, ang tanan angay lang bisan kon usa lang ka kalag ang mopahayag og paghinulsol ug hugot nga pagtuo ug tinguha nga mabunyagan. Hunahunaa ang kanindot sa inyong bation kon sila moingon, “Kon ania kamo dinhi, ug magsultihanay kita kalabut niining mga butanga, kini daw sama nga ako mahinumdom sa mga butang nga ako nang nahibaw-an sa una,” o, “Dili kamo makabiya dinhi hangtud nga inyo kaming sultihan sa tanan ninyong nahibaloan kalabut sa gipahiuling Simbahan.”³

Ang pagpaambit sa ebanghelyo magdalag kalinaw ug kalipay sa atong kaugalingong mga kinabuhi, mopadako sa atong kaugalingong mga kasingkasing ug mga kalag alang sa uban, mopauswag sa atong kaugalingong hugot nga pagtuo, mopalig-on sa atong kaugalingong relasyon uban sa Ginoo ug mopauswag sa atong kaugalingong salabutan sa mga kamatuoran sa ebanghelyo.⁴

Ang Ginoo nagsaad og dagkong mga panalangin alang kanato katugbang kon unsa kita kamaayo nga mipakig-ambit sa ebanghelyo. Makadawat kita og panabang gikan sa pikas bahin sa tabil samtang ang espirituhanong mga milagro mahitabo. Ang Ginoo miingon kanato nga ang atong mga sala mapasaylo og dali kon kita makadala og mga kalag ngadto ni Kristo ug magpabilin nga makanunayon sa paghatag og pagpamatuod ngadto sa kalibutan, ug siguradong ang kada usa kanato mangita og dugang tabang aron mapasaylo sa atong mga sala. (Tan-awa sa D&P 84:61.) Sa usa sa pinakamahinungdanon nga mga kasulatan sa misyonaryo, sa seksyon 4 sa Doktrina ug mga Pakigsaad, gisultihan kita nga kon kita moalagad sa Ginoo sa misyonaryong pag-alagad “uban sa tanan [sa atong] kasingkasing, gahum, hunahuna, ug kusog,” dayon kita mahimong “mobarug nga walay sala sa atubangan sa Dios sa katapusang adlaw” (bersikulo 2).

Ug, dugang pa, ang Ginoo miingon:

“Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!

“Ug karon, kon ang imong hingpit nga kalipay dako tungod sa usa ka kalag nga imong gidala ngari kanako diha sa gingharian sa akong Amahan, unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!” (D&P 18:15–16.)

Kon ang usa maghago sa tanan niyang mga adlaw ug modala bisan usa ka kalag! Unsa ka hingpit nga kalipay! Usa ka kalag! Unsa ka bililhon! O, nga ang Dios mohatag kanato nianang matang sa gugma alang sa mga kalag!⁵

Ang Ginoo mitugyan sa tanang mga miyembro sa Simbahan og usa ka responsibilidad sa pag-alagad isip Iyang mga mensahero.

Nagtinguha ako nga mas epektibo ug mas matinud-anon nga mapalambo diha sa mga kasingkasing sa tanang mga miyembro sa Simbahan ang pagsabut nga kon ang usa ka tawo tigulang na nga mahimong miyembro, tigulang na sab siyang mahimong misyonaryo; ug wala na kinahanglana nga igahin [set-apart] pa siya alang lamang niana nga tawag. Ang kada miyembro adunay obligasyon ug tawag sa pagpaambit sa ebanghelyo niadtong naglibot kaniya. Buot kami nga kada lalaki, babaye, ug bata modawat sa iyang tinuod nga responsibilidad. Kini mahinungdanon kaayo. Kay kini mao ang mensahe sa ebanghelyo: Nakadawat kita og mga panalangin gikan sa ebanghelyo, ug dayon mogawas kita ug mopaambit niana nga mga panalangin sa uban.

Kita karon bisi nga mga tawo; pero ang Ginoo wala moingon, “Kon kini komportable alang kanimo, ganahan ka bang mosangyaw sa ebanghelyo.” Miingon siya, “Busa himoa nga ang matag tawo makakat-on sa iyang katungdanan” (D&P 107:99) ug “Tan-awa … matag tawo kinsa napasidan-an magpasidaan sa iyang silingan.” (D&P 88:81.)

Atong hinumduman nga ang Dios maoy atong kauban niini. Siya ang atong katabang. Moabli siya sa agianan, kay siya ang mihatag sa sugo.⁶

Unsa ka makapahinam nga butang kini, akong mahal nga mga kaigsoonan kinsa mga isig kamiyembro sa gingharian sa Dios, nga pagasaligan sa Ginoo aron pag-alagad isip mga mensahero sa Iyang pulong ngadto sa atong mga kaigsoonan kinsa dili mga miyembro sa Simbahan. Sa makadiyot atong balihon ang sitwasyon––nga ikaw ang dili miyembro sa Simbahan pero ang imong silingan karon nga dili miyembro maoy Santos sa Ulahing mga Adlaw. Ganahan ka ba nga siya mopaambit sa ebanghelyo diha kanimo? Nan malipay ka ba sa bag-ong kamatuoran nga imong nakat-unan? Mouswag ba ang imong gugma ug respeto sa imong silingan nga mipaambit niini nga mga kamatuoran nganha kanimo? Siyempre, ang tubag sa tanan niini nga mga pangutana mahimong: Oo!⁷

Mga kaigsoonan, naghunahuna ako kon nagbuhat ba kaha kita sa tanan natong mahimo. Ganahan ba kitang mohimo sa atong buluhaton nga mao ang pagtudlo sa ebanghelyo sa uban? Andam ba kita sa pagdugang sa atong paningkamot? Sa pagpalapad sa atong mga panan-awon?⁸

Ang adlaw sa pagdala sa ebanghelyo ngadto sa uban pang mga lugar ug mga katawhan ania dinhi ug karon. Ato gayud nga hunahunaon ang atong obligasyon sa pagpaambit sa mensahe kaysa atong kaugalingong kahayahay. Ang mga tawag gikan sa Ginoo panagsa ra nga hayahay. Ang panahon ania na nga ang sakripisyo kinahanglang mas importanteng elemento sa Simbahan. Kinahanglan atong dugangan pa ang atong debosyon aron kita makahimo sa buhat nga gitagana sa Ginoo alang kanato nga kinahanglang buhaton.… Ang panamilit nga mga pulong sa Magtutudlo ngadto sa Iyang mga Apostoles sa hapit na ang Iyang Pagkayab mao ang, “Panglakaw kamo sa tibuok kalibutan, ug iwali ninyo ang maayong balita ngadto sa tibuok kabuhatan.

“Ang motuo ug magpabautismo maluwas; apan ang dili motuo pagahukman sa silot.” (Marcos 16:15–16.)

Dili gayud kita magduhaduha ni magluya sa pagbuhat og maayo. Kinahanglan atong dugangan pa ang atong kakugi. Dili lamang ang atong mahangturong kaayohan ang namiligro, pero ang mahangturong kaayohan usab sa kadaghanan sa atong mga kaigsoonan kinsa karon dili mga miyembro niini, sa tinuod nga Simbahan. Mahinamon ako sa mga pulong ni Propeta Joseph Smith sa iyang sulat nga gipadala sa Simbahan gikan sa Nauvoo niadtong Septyembre 6, 1842: “Kita dili ba mopadayon sa hilabihan kamahinungdanon nga katuyoan? Padayon.… Pagmaisugon … ug sa kanunay, ngadto sa kadaugan!” (D&P 128:22.)⁹

Pinaagi sa atong matarung nga impluwensya ug paningkamot, makatabang kita sa uban nga modawat sa gipahiuling ebanghelyo.

Ang miyembro-misyonaryong buhat mao ang yawe sa umaabut nga paglambo sa Simbahan.¹⁰

Ako nagtuo nga ang Ginoo sa yano nga paagi mibutang og daghang mga tawo kinsa andam nga mosulod sa iyang Simbahan diha sa atong grupo mismo nga mga higala ug mga kaila. Mohangyo kami nga kamo sa mainampuon nga paagi moila niadto nga mga tawo ug dayon mangayo og panabang sa Ginoo sa pagtabang kaninyo sa pagpaila ngadto kanila sa ebanghelyo.¹¹

Klaro gayud kini kanato nga kasagaran makigsandurot kita sa atong mga silingan sa dili pa kita mopasidaan kanila sa husto nga paagi. Ang atong mga silingan kinahanglan makasinati sa atong tininuod nga pakighigala ug pakigsandurot. Buot kami nga ang mga miyembro modani sa mga silingan, dili molutos kanila o mohadlok kanila.¹²

Ang ebanghelyo tinuod. Pinaagi sa pagtuon ug pagsunod sa mga baruganan niini ug sa pagpangayo og panabang sa Espiritu Santo, bisan kinsa nga matinguhaong mosiksik masayud sa iyang kaugalingon nga kini tinuod. Pero mas sayon kini nga sabton ug dawaton kon ang nagsiksik sa kamatuoran nakakita usab sa mga baruganan sa ebanghelyo nga naglihok diha sa kinabuhi sa ubang tumutuo. Walay mas dako nga serbisyo nga mahatag sa misyonaryo nga tawag niini nga Simbahan kaysa mahimong ehemplo sa positibong Kristohanong mga hiyas sa atong mga kinabuhi.¹³

Ang matarung nga mga miyembro, nga nagpuyo sa ebanghelyo pinaagi sa ehemplo, ingon man sa mga baruganan niini, mao ang pinakamaayong pagsangyaw sa Simbahan.¹⁴

Unsa ang angayng buhaton sa kada miyembro, pinaagi sa maayong ehemplo ug sa paghatag og pagpamatuod, mao ang pagpakita ngadto sa dili mga miyembro uban sa kalipay sa pagpuyo sa ebanghelyo ug sa pagsabut ug sa ingon makatabang kanila sa pagdala ngadto sa kahimtang nga modawat sila sa mas pormal nga pagtudlo.¹⁵

Ang tinuod nga tumong sa epektibong pag-proselyte mao nga ang mga miyembro maoy mangita, dayon ang full-time nga mga misyonaryo ang motudlo.… Kon ang mga miyembro mao ang mangita aduna silay personal nga interes sa pakigsandurot, mas gamay ra ang mawala sa dili pa ang pagbunyag, ug kadtong nabunyagan na malagmit magpabiling aktibo.¹⁶

Ang atong tumong mao ang pag-ila sa pinakadaling panahon kutob sa mahimo kon hain sa mga anak sa Amahan ang espirituhanong andam nga magpadayon gayud ngadto sa pagpabunyag sa gingharian. Usa sa pinakamaayong paagi sa pagkasayud mao ang pagpaila sa atong mga higala, mga paryente, mga silingan ug mga kaila ngadto sa full-time nga mga misyonaryo.¹⁷

Usahay makalimot kita nga mas maayo pang isakripisyo ang gamayng kahiubos diha relasyon sa usa ka higala kaysa paghikaw kaniya sa kinabuhing dayon pinaagi sa pagpakahilum.¹⁸

Ayaw paghulat sa dugay nga pakigsandurot ni sa eksakto, perpektong higayon. Ang angay nga buhaton mao ang pagsuta kon sila ba ang gipili. “Ang [Akong] pinili maminaw sa akong tingog ug dili magpatig-a sa ilang mga kasingkasing.” (D&P 29:7.) Kon sila maminaw ug adunay kasingkasing nga abli alang sa ebanghelyo, kini mailhan dayon. Kon sila dili maminaw ug ang ilang kasingkasing tig-a uban sa pagduda o negatibo nga mga komentaryo, sila dili pa andam. Niini nga kahimtang, padayon sa paghigugma kanila ug pakigsandurot kanila ug paghulat sa sunod nga oportunidad sa pagsuta kon andam na ba sila. Dili mawala inyong panaghigalaay. Morespeto gihapon sila kanimo.

Siyempre, adunay mga kahigawad, pero wala gayuy bisag unsa nga mawala. Wala gayuy nawala nga higala tungod lang kay dili siya gusto nga mopadayon pagbisita ang mga misyonaryo. Ang miyembro makapadayon sa pakigsandurot nga walay kahadlok sa iyang pakighigala og espesyal nga relasyon uban niana nga pamilya. Usahay mas dugay alang sa uban sa pagbisita sa Simbahan kaysa sa uban. Ang miyembro kinahanglan mopadayon gayud gihapon sa pakigsandurot ug mosulay pag-usab sa sunod higayon alang sa pagkabig. Ayaw pagkawala sa paglaum tungod lang sa temporaryong kakulang sa pag-uswag. Adunay daghang mga istorya kalabut sa bili sa paglahutay sa misyonaryo nga pagserbisyo.¹⁹

Ang misyonaryong buhat naglakip sa paghigugma ug pagpadayon sa pakigsandurot sa bag-ong mga miyembro ug sa dili kaayo aktibo nga mga miyembro.

Kon kita mobunyag og usa ka tawo kini usa ka sala ang pagtugot kaniya nga sa hinay hinay lang mawala sa Simbahan ug sa ebanghelyo tungod lang kay kulang sa pakigdait. Ang pagpakigdait usa ka importanteng responsibilidad. Kinahanglan kitang makigdait sa tanang mosulod sa Simbahan. Mao kana ang rason nga buot kita nga ang mga miyembro mohimo sa misyonaryo nga buhat ingon man sa pagkuha og tabang gikan sa mga misyonaryo. Buot kita nga ang mga tawo … mogawas ug mohimo niini nga buhat tungod kay mga silingan pa gihapon sila human ang tawo mabunyagan. Makapakigdait pa gihapon sila kanila [sa silingan]; ila pa gihapon silang makuha ug modala kanila sa miting sa priesthood ; makadasig pa gihapon sila kanila ug makatabang kanila sa ilang mga home evening ug uban pa.²⁰

Dili kita makahatag og gibug-aton sa panginahanglan sa paghimo sa misyonaryo nga buhat diha sa sulod sa buluhaton sa priesthood nga pagtinabangay aron ang mga tigsusi mapakigdaitan ug maapil sa mga programa sa Simbahan sa ingon nga paagi nga sila sa dali lang mahimong aktibo ug matinud-anon nga mga miyembro. Nan, kini, ang laing paagi nga ang tanang mga miyembro sa Simbahan mahimong aktibo ug kanunay maapil sa misyonaryo nga serbisyo––pinaagi sa pakigdait, pakighigala, ug pagdasig sa bag-ong mga miyembro sa Simbahan.²¹

Gikinahanglan gayud nga kadtong nabunyagan na isip mga kinabig diha-diha dayon mahatagan og home teachers nga makigdait kanila sa personal kaayo ug mahingawaon nga kinaiya. Kini nga home teachers, magbuhat uban sa ilang kadagkuan sa priesthood, kinahanglang magsusi nga kada hamtong nga kinabig mahatagan og mahagitong kalihokan ingon man sa oportunidad ug pagdasig aron pagpalambo sa ilang kahibalo sa ebanghelyo. Kinahanglan siyang maabagan sa pag-establisar og pangsosyal nga relasyon uban sa mga miyembro sa Simbahan aron siya dili mobati nga nag-inusara samtang siya magsugod sa iyang kinabuhi isip aktibo nga Santos sa Ulahing mga Adlaw.²²

Kini usa ka inspirasyon ug kalipay nga makakita … sa mga Santos nga modawat ug motabang ug moabag ug moampo alang niadtong kinsa kada adlaw mosulod sa gingharian sa atong Ginoo. Padayon sa pagpakigdait sa usag usa––ug ang daghan pang uban kinsa mosulod sa Simbahan. Abi-abiha sila ug higugmaa ug pagpakigdait kanila.²³

Ang atong reponsibilidad isip mga managsoon sa Simbahan mao ang pagtabang sa pagkaplag sa agianan niadtong malagmit mawala, ug sa pagtabang nga makaplagan pag-usab ang bililhong bahandi niadtong kinsa nawad-an. Ang mga kasulatan klarong nagtudlo kanato nga kada miyembro adunay obligasyon sa paglig-on sa iyang isig ka mga miyembro.

Gani ang Manluluwas mahigugmaon nga mitudlo pag-ayo niini sa dihang siya miingon ni Pedro, “Kon ikaw mahibalik na kanako, lig-ona ang imong mga igsoon” (Lucas 22:32). Mahimo bang mosulti ako og ingon niana sa kada usa kaninyo: Kon kamo makabig na, palihug lig-ona ang inyong mga kaigsoonan. Adunay daghan nga gigutom, usahay wala makahibalo sa hinungdan sa ilang kagutom. Adunay espirituhanong mga kamatuoran ug mga baruganan nga mahimo nilang lig-on nga pundasyon sa ilang mga kinabuhi, seguridad sa ilang mga kalag, kalinaw sa ilang mga kasingkasing ug mga hunahuna kon kita lamang mohatag sa atong mga pag-ampo ug aktibo nga mga pagtagad ngadto kanila.…

Tingali adunay usa ka tawo nga moingon, “Bitaw, kita nakaila og usa ka lalaki o usa ka babaye nga dili gayud matandog.” Siyempre siya mahimong matandog gayud. Siya mahimong mabulahan ug matabangan! Adunay saad sa kasulatan. Atong mabasa, “Ang putli nga gugma dili gayud mapakyas.” (1 Mga-Taga Corinto: 13:8.) Dili gayud! Ang putli nga gugma, kon dugay nang gigamit, dili gayud mapakyas sa pagdala sa mga milagro niini sa indibidwal man, ngari kanato, kanatong duha, o sa uban nga naglibut sa indibidwal.

… Nagtuo ako nga walay usa kinsa dili gayud makabig––o ingnon ta nga maaktibo pag-usab––kon ang matarung nga tawo mohimo og husto nga pagduol sa husto nga panahon sa husto nga paagi uban sa husto nga espiritu. Nasayud ako nga ang mga panalangin sa atong Amahan sa Langit moatiman sa atong mga paningkamot kon kita mag-andam sa atong mga kaugalingon, ug kon kita malipayong mopuyo sa baruganan sa ebanghelyo, ug kon kita mangayo og panabang sa Langitnong Amahan.…

Himoa nga ang mga home teacher sa korum sa priesthood, ang mga visiting teacher sa Relief Society, mga bana ug mga asawa, mga ginikanan ug mga anak, ug mga miyembro bisan asa kinsa nahigugma sa Ginoo ug nagtinguha sa paghimo sa iyang kabubut-on, mobalik ug uban sa gugma ug inspirasyon mohimo og matarung nga mga paghago nga gikinahanglan pinaagi sa pagtabang niadtong nanginahanglan. Ang temporaryong mga pagpakita og kaikag ug kadasig dili makakab-ot sa gitinguhang mga resulta. Pero ang atong gitinguhang mga resulta moabut, ug moabut nga mas sagad kaysa atong mahanduraw, kon kita mainampuon nga modugang sa atong mga paningkamot. Dili lamang ang piniling mga panalangin sa Ginoo ang moabut sa inyong mga kinabuhi ug sa mga kinabuhi sa uban, kondili mas mapaduol kita sa Ginoo ug mabati ang presensya sa Iyang gugma ug sa Iyang espiritu.²⁴

Ang mga ginikanan kinahanglan motabang sa mga anak pag-andam alang sa full-time nga misyonaryo nga pagserbisyo.

Nagkinahanglan kita sa mga batan-ong mga lalaki nga pangmisyonaryo’g edad sa Simbahan sa pagpadayon gani sa mas daghan pa kaysa karon nga ilang gihimo aron sila makasugod sa ilang makatarunganong responsibilidad, kahigayonan, ug panalangin isip mga sulugoon sa Ginoo diha sa misyonaryong kawsa. Pagkalig-on kaha kanato ug kanila kon ang tanang batan-ong mga lalaki nag-andam sa ilang mga kaugalingon alang sa buhat sa Ginoo!²⁵

Kon ako naghangyo og dugang nga mga misyonaryo, wala ako maghangyo sa mas daghang mga misyonaryo nga walay pagpamatuod o dili takus. Naghangyo ako nga kita mosugod og mas sayo ug mas maayong mobansay sa atong mga misyonaryo sa kada branch ug kada ward sa kalibutan. Kana maoy laing hagit––nga ang mga kabatan-onan makasabut nga kini dakong kahigayunan ang pag-adto sa misyon ug nga sila kinahanglan nga anaa sa maayong panglawas, maayong panghunahuna, maayo sa espirituhanon, ug nga “ang Ginoo dili makatan-aw sa sala uban sa labing gamay nga matang sa pagtugot.” [Alma 45:16.]

Naghangyo ako og mga misyonaryo kinsa maayo kaayong pagkatudlo sa mga doktrina sa ebanghelyo ug nabansay pinaagi sa pamilya ug sa mga organisasyon sa Simbahan, ug kinsa moabut sa misyon uban sa dakong tinguha. Naghangyo ako … nga kita mobansay og mas maayo, mas sayo, mas dugay sa umaabut nga mga misyonaryo, aron ang kada usa maghulat sa iyang misyon uban sa dakong kalipay.²⁶

Maghunahuna gayud kita og mas daghan. Kinahanglan mas maayo natong pagkaandam ang atong mga misyonaryo, dili lamang sa pinulongan apan uban sa kasulatan ug labaw sa tanan uban sa usa ka pagpamatuod ug nagdilaab nga tinguha nga mohatag og gahum sa ilang mga pulong.²⁷

Ipadala ang inyong mga lalaki sa misyon. Sa higayon nga moabut sa inyong mga bukton ang batang masuso, sugdi sila pagtudlo. Makadungog sila sa inyong mga pag-ampo, magabii ug mabuntag. Makadungog sila sa inyong pag-ampo ngadto sa Ginoo aron pagtabang sa pag-abli sa mga pultahan sa tanang mga nasud. Makadungog sila kalabut sa misyonaryo nga buhat. Makadungog sila kaninyo nga nag-ampo para sa inyong mga bishop ug sa inyong mga presidente sa misyon ug sa tanan uban kinsa nag-alagad kaninyo, ug kini sa hinayhinay mahimong kabahin na kanila.²⁸

Hapit kada higayon nga makakita ako og batang lalaki, moingon ako, “ Mahimo unya ka nga dungganan nga misyonaryo, dili ba?” Inyong gitanum sa hunahuna sa bata ang liso. Kini sama ra sa mga tanum ug ubang tanaman. Kini motubo ug motubo, ug kon ang amahan ug inahan makigsulti sa ilang gamay nga batang lalaki … kalabut sa pag-adto sa misyon––samtang sila mga masuso pa, malagmit––nga kanang gamayng liso motubo ug motubo.²⁹

Maayo gayud alang sa mga ginikanan sa pagsugod og pagpaandam sa ilang anak nga mga lalaki sa pagtigum og kwarta sa sayo pa sa ilang mga kinabuhi. Tudloi sila sa espiritu sa pagtigum. Tudloi usab sila sa espiritu sa pagtuon ug sa pag-ampo kalabut sa ebanghelyo, nga sila mismo makakita sa ilang mga kaugalingon sa unsang paagi ang ebanghelyo mitrabaho sa ilang kaugalingong mga kinabuhi ug sa mga kinabuhi niadtong naglibot kanila. Tudloi sila sa espiritu sa pagserbisyo sa tibuok nilang mga tuig sa ilang pagdako ug ang kasinatian sa pagtabang sa uban sa paghisgut sa mga kalipay sa mensahe sa ebanghelyo sa ilang mga kinabuhi. Himoa nga sila mogamit sa ilang mga klase sa seminary ug sa institute ug mga kasinatian isip dapit sa pagbansay aron pag-angkon og espirituhanong kahibalo sa dakong bili sa ilang mga kaugalingon ug sa uban. Paandama sila pinaagi sa pagpabilin sa ilang mga kinabuhi nga limpyo ug takus ug sa tinguha uban sa ilang tibuok kasingkasing sa pagtabang sa Ginoo sa pagdala sa ebanghelyo niadtong kinsa andam na niini.³⁰

Naglaum ako nga ang kada pamilya maghimo sa home evening kada Lunes sa gabii sa walay pagkapakyas. Ang misyonaryong buhat mahimong usa sa mga lig-on nga mga punto nga pagahisgutan dinhi; ug ang amahan ug ang inahan ug ang mga anak sa ilang mga turno mohatag og mga pag-ampo nga masentro niining mahinungdanon kaayong elemento––nga ang mga pultahan sa mga nasud unta maabli para kanato ug unya, ikaduha, nga ang mga misyonaryo, ang batan-ong mga lalaki ug mga babaye sa Simbahan, unta maghinamhinam nga moadto sa mga misyon ug modala sa mga tawo ngadto sa Simbahan.³¹

Ang Simbahan nagkinahanglan og mga magtiayon nga moalagad isip mga misyonaryo.

Kon ang kahimsog ug ubang mga kondisyon motugot, ang mga ginikanan makalaum unya sa adlaw nga sila, usab, unta makaalagad sa misyon.³²

Morag nakalimot na kita, kitang tigulang na, nga miretiro na ug sayon ra kaayong makakita og lugar nga adtoan uban sa atong pagkamping nga ekipo ug uban sa atong ubang mga oportunidad. Sayon ra kaayo kitang motagbaw sa atong kaugalingong mga hunahuna ug sa ato mismong mga konsiyensya nga ang trabaho kinahanglang magpadayon––moingon kita, among paadtoon ang among mga lalaki.

Ang tanan kanato aduna niini nga responsibilidad. Dili ang tanan kanato makahimo, pero daghan kaayo kanato ang makahimo.³³

Puwede kitang makagamit sa mga gatusan ka mga magtiayon, mga tigulang na nga pareha sa uban kaninyo, kinsang mga anak nangadagko na, nga miretiro na sa ilang mga negosyo, kinsa mahimong moadto … aron pagtudlo sa ebanghelyo. Makagamit kita sa mga gatusan ka nga magtiayon. Moadto lang kamo ug makigsulti sa inyong bishop––kana ra gayud ang inyong kinahanglang buhaton. Sutlihi siya, “Andam kaming moadto, kon imo kaming magamit.” Nagtuo ako nga malagmit matawag gayud kamo.³⁴

Buhat kini sa Ginoo. Anaa kita sa iyang buluhaton. Piho siyang nagsugo kanato, ug gani wala kita mailhi sa daghang mga tawo sa kalibutan. Kini ang panahon nga baksan ang atong mga bat-ang ug mopadayon uban sa bag-ong dedikasyon niining mahinungdanong buhat. Misaad kita, ikaw ug ako, nga mobuhat niini. Unta kita mosulti sama niadtong batan-ong lalaki, nga nakaplagan sa templo uban sa nahingawang mga ginikanan, naglingkod taliwala sa mga doktor, “Kinahanglan anhi gayud ako sa balay sa akong Amahan.” [Lucas 2:49.]³⁵

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Sa unsang mga paagi nga ang misyonaryong buhat “usa ka espirituhanong kasinatian”? (pahina 322). Samtang kita mopaambit sa ebanghelyo, unsa “kamahinamon ug kamagantihon” nga mga kasinatian ang atong maangkon? (Alang sa ehemplo, tanawa ang istorya sa pahina 321.)
Ribyuha ang mga pahina 322–323, sa pagpangita sa mga panalangin nga atong madawat kon kita mopaambit sa ebanghelyo. Kanus-a kamo nakasinati sa bisan unsa niini nga mga panalangin?
Basaha ang ikaupat nga tibuok paragrap sa pahina 324. Unsa sa inyong hunahuna ang gipasabut sa “pagdugang sa atong kakugi” ug sa “pagdugang sa atong paningkamot”? Sa unsang paagi kita makasunod niini nga tambag sa misyonaryong buhat?
Ribyuha ang seksyon nga magsugod sa pahina 325. Paghunahuna kalabut sa o paghisgut sa pihong tambag nga inyong makit-an sa pagpaambit sa ebanghelyo uban sa pamilya ug sa mga higala. Sama pananglit: (a) Unsa ang atong mabuhat aron sa “pagpakigdait sa atong mga silingan”? (b) Sa unsang mga paagi nga mahimo kitang usa ka “tigpaila” alang sa Simbahan? (c) Unsa ang ubang mga kakuyaw sa paghulat sa “husto, perpektong higayon” sa pagpaambit sa ebanghelyo? (d) Unsa may atong buhaton kon ang atong mga sakop sa pamilya ug mga higala dili modawat sa atong imbitasyon nga makat-on sa ebanghelyo?
Unsa ang ubang mga panginahanglan sa bag-ong mga miyembro? Sa mga miyembro nga dili kaayo aktibo? Unsa ang atong mabuhat sa pagtabang kanila? (Tan-awa sa mga pahina 328–329.)
Unsa ang mga kinaiya nga gipangita sa mga lider sa Simbahan sa full-time nga mga misyonaryo? (Alang sa pipila ka mga ehemplo, tan-awa sa mga pahina 329–331.) Unsa ang mabuhat sa mga ginikanan ug sa uban aron pagtabang sa mga anak nga makapalambo niini nga mga kinaiya? Unsa ang pipila ka mga paagi nga ang mga ginikanan ug ang mga anak makasunod sa tambag ni Presidente Kimball sa pagtigum og kwarta alang sa misyon?
Si Presidente Kimball miawhag sa tigulang nga mga magtiayon sa pag-alagad og mga misyon (mga pahina 331–334). Unsa ang ubang mga kapilian ug mga kahigayunan nga mahatag sa Simbahan sa magtiayon nga mga misyonaryo? Unsa ang mabuhat sa mga magtiayon aron pag-andam sa pag-alagad? Giunsa ninyo paghimo ang misyonaryong buhat sa inyong kasamtangang kinabuhi?

May Kalabutan nga mga Kasulatan: Mosiah 3:20; Alma 26:1–16; Helaman 6:3; Moroni 6:3–4; D&P 84:88