Hugna 23

Magbalantay sa Panon

Adunay kasigurohan sa pagpaluyo ug sa pagsunod sa propeta ug sa ubang mga lider sa Simbahan.

Gikan sa Kinabuhi ni Spencer W. Kimball

Si Presidente Spencer W. Kimball kanunayng nagtudlo sa kamahinungdanon sa pagpaluyo sa lokal ug kinatibuk-ang mga lider sa Simbahan. Atol sa priesthood sesyon sa kinatibuk-ang komperensya niadtong Abril 1978, iyang gibalik paghinumdom ang iyang mga pagbati sa iyang kabatan-on kalabut sa matag tawo nga mialagad isip iyang bishop: “Kanunay kaming dunay buotan nga bishop. Kanunay gayud namo siyang gihigugma. Diha si Bishop Zundel ug Bishop Moody ug Bishop Tyler ug Bishop Wilkins. Gihigugma nako ang tanan nakong mga bishop. Nanghinaut ako nga ang tanan nakong batan-ong mga kaigsoonan nahigugma sa ilang mga bishop sama sa akong paghigugma.”¹

Sa laing pakigpulong miingon siya: “Nahinumdom ako nga paganhi niini nga tabernakulo [ang Salt Lake Tabernacle] isip batang lalaki gikan sa Arizona, uban sa akong amahan, aron sa pagtambong sa kinatibuk-ang komperensya. Naghinam-hinam ako nga naminaw sa tanang mga Kaigsoonan nga namulong.… Naghinamhinam ako sa ilang mga gisulti ug seryosong midawat sa ilang mga pasidaan, bisan sa kabatan-on pa. Niining mga tawhana lakip sa mga propeta sa Dios, sama niadtong mga propeta sa Basahon ni Mormon ug sa Biblia.”²

Si Presidente Kimball kanunayng nagpahayag og pasalamat sa mga miyembro tungod sa ilang kaandam sa pagpaluyo kaniya ug sa ubang mga lider sa Simbahan: “Bisan asa ako moadto, adunay dakong pagpakita sa gugma ug kabuotan, ug tungod niana mapainubsanon akong nagpasalamat. Kini nagpalig-on sa akong kalag. Ang inyong mga pag-ampo ug ang inyong gugma nakapalahutay kanako. Ang Ginoo naminaw sa inyong mga pag-ampo ug nanalangin kanako ug sa akong mga Kaigsoonan sa kahimsog ug kaligon ug migiya kanamo sa mga buluhaton sa iyang gingharian dinhi sa yuta. Tungod niini kaming tanan kinasingkasing nga mapasalamaton.”³ Misulti usab siya kabahin sa gugma nga iyang gibati ug sa ubang mga lider sa Simbahan para sa mga Santos: “Nahigugma kami kaninyo ug nangandoy sa inyong hingpit nga pag-uswag ug kalipay, diin kami nasayud nga moabut lamang pinaagi sa pagsunod sa mga awhag sa Dios nga gisangyaw pinaagi sa mga propeta ug mga lider.”⁴

Mga Pagtulun-an ni Spencer W. Kimball

Ang Ginoo mogiya sa Iyang Simbahan pinaagi sa balaanong gitudlo nga mga lider.

Ang Magtutudlo ug ang Manluluwas, ang Ginoong Jesukristo mismo, nagbarug sa ulohan niini nga Simbahan sa tanan niyang kahalangdon ug himaya. Nagdumala siya sa iyang mga gimbuhaton pinaagi sa iyang balaanong tinudlo ug gipaluyohan nga mga propeta ug mga apostoles.⁵

Ang mga kalihokan sa Simbahan ni Jesukristo gidumala sa Kapangulohan sa Simbahan ug sa Napulog Duha ka mga Apostoles, uban sa daghan pang mga General Authority nga nagabag, ug usab pinaagi sa mga presidente sa stake ug sa misyon ug sa mga bishop. Kini nga mga tawo mao ang magbalantay sa panon. Ang Ginoo mibutang niini nga mga tawo aron pagpangulo sa iyang gingharian sa yuta, ug diha kanila siya mihatag og awtoridad ug responsibilidad, ang kada usa anaa sa iyang piho nga kaakohan. Kini nga mga lalaki iyang gitugyanan sa Melchizedek Priesthood, nga mao ang iyang kaugalingong gahum ug awtoridad nga gitugyan sa kalalakin-an. Miila siya ug mitugot sa mga kalihokan niining pinili ug dinihogan nga mga sulugoon.⁶

Ako kining pagpamatuod kaninyo nga ang mga lider niining Ang Simbahan ni Jesukristo balaanong gitawag ug gigahin aron mogiya pinaagi sa espiritu sa pagpanagna maingon sa ubang mga dispensasyon.⁷

Ngadto sa matag miyembro sa Simbahan, ang Ginoo mihatag og mga lider uban sa tulo ka hut-ong: ang Bishop o ang Branch President, ang Stake President o ang Mission President, ug ang mga General Authority. Kini nga mga lider masaligan. Ang usa kanila mahimong limitado sa kahibalo, sa edukasyon o sa pagbansay, pero aduna siyay katungod sa mga pagpadayag sa Ginoo alang sa iyang mga tawo ug aduna siyay abli nga agianan ngadto sa Dios mismo.⁸

Sukad sa pagpalansang, aduna nay napulo ka liboan ka mga lalaki nga gitawag sa Manluluwas aron mohulip sa mga posisyon nga may kaakohan, wala kanila’y perpekto, pero ang tanan gitawag sa Ginoo ug gikinahanglan nga pagaabagan ug paluyohan niadtong kinsa mga umaabot nga mga disipulo sa Ginoo. Kana mao ang tinuod nga espiritu sa ebanghelyo.⁹

Ang pinili, giaprobahan, gi-ordinahan nga mga lider manalipod kanato batok sa “lipat-lipat sa mga tawo nga batid sa pagmugna’g kasaypanan.” [Mga Taga-Efeso 4:14.] Ang usa ka tawo dili gayud malingla kon siya mismo manalipod batok sa buta o sa dautang tiggiya pinaagi sa pagsunod sa Espiritu ug sa matarung nga mga lider sa Simbahan.¹⁰

Walay usa nga mas madasigon kaysa mga Kaigsoonan kinsa nagbarug nga pangulo niini nga Simbahan aron modawat sa maong paggiya tungod kay ang Ginoo mohatag kanila para sa kaayohan sa katawhan ug para sa mga katawhan sa Simbahan.¹¹

Nasayud ako nga ang Ginoo adunay komunikasyon sa iyang mga propeta, ug nga siya mopadayag sa kamatuoran sa iyang mga sulugoon karon sama sa iyang gibuhat sa mga panahon ni Adan ug Abraham ug Moises ug Pedro ug Joseph ug sa daghan pang uban sa tibuok kapanahonan. Ang mga mensahe sa Dios sa kahayag ug sa kamatuoran siguradong gihatag sa tawo karon sama sa uban pang dispensasyon.¹²

Ang mga propeta nagtudlo sa samang mga mensahe.

Ang uban mahimong matingala nganong ang mga General Authority mosulti og samang mga butang gikan sa usa ka komperensya ngadto sa laing komperensya. Samtang nagtuon ako sa mga gipamulong sa mga propeta sulod sa mga siglo, ang ilang mga sumbanan klaro kaayo. Mosiksik kita, sa mga pulong ni Alma, aron pagtudlo sa mga tawo “sa walay katapusang pagdumot batok sa sala ug kadautan.” Kita mosangyaw og “paghinulsol, ug hugot nga pagtuo kang Ginoong Jesukristo.” (Alma 37:32, 33.) Modayeg kita sa pagpaubos. Maninguha kita sa pagtudlo sa mga tawo “sa pagsalikway sa matag pagtintal sa yawa, uban sa ilang hugot nga pagtuo diha sa Ginoong Jesukristo.” (Alma 37:33.) Magtudlo kita sa atong mga tawo “nga dili gayud magluya sa maayo nga mga buhat.” (Alma 37:34.)

Ang mga propeta mosulti sa samang mga butang tungod kay kita sa tinuoray nag-atubang og susamang mga problema. Mga kaigsoonan, ang solusyon niini nga mga problema wala mausab. Kini dili maayo nga parola kon mohatag og sayop nga signal aron paggiya sa kada barko nga mosulod sa dunggoanan. Kini dili maayong giya sa tigkatkat sa bukid kinsa, nasayud sa luwas nga rota sa kabukiran, modala sa iyang mga tawo nga gisalig kaniya sa dili matagna ug makuyaw nga agianan diin walay moagi nga makabalik pa.¹³

Ang mga lider sa Simbahan dili makahimo, matag higayon nga kami motudlo kaninyo, sa pagtanyag og bag-o o mas nindot nga agianan nga modala pagbalik sa presensya sa atong Langitnong Amahan. Ang agianan magpabiling mao ra gihapon. Busa, mga pagdasig kinahanglan kanunayng ihatag mahitungod sa samang mga butang ug ang mga pasidaan kinahanglan sublion. Tungod lang kay ang kamatuoran gisubli wala kini nakapaminus sa kaimportante o sa katinuod niana nga kamatuoran. Sa pagkatinuod, ang tugbang maoy tinuod.¹⁴

Mahanduraw nako nga kon ang Ginoo mismo magbarug sa Bungtod sa mga Oliba ug kon nagtudlo siya sa mga tawo, mosulti gihapon siya og samang mga butang nga gisulti na ug isulti pa [sa atong mga komperensya]. Mahanduraw nako nga kon siya nagbarug sa Lanaw sa Galilea sa mga sakayan sa kadagatan ug ang mga tawo nagbarug libot kaniya, nga siya mosulti sa gihapon sa samang mga butang: sa pagsunod sa mga sugo sa Dios, sa pagpabilin sa atong mga kaugalingon nga walay buling gikan sa kalibutan, ug tumanon ang kada sugo nga ang Dios mihatag kanato. Kana mao gayud ang iyang isulti, ug busa karon nagsulti siya niini nga mga butang pinaagi sa iyang mga sulugoon.¹⁵

Ang mga propeta kasagaran gibaliwala o gisalikway sa ilang kaugalingong panahon.

Sa dihang ang kalibutan mituman sa mga propeta, kini milambo; sa dihang kini mibaliwala kanila, ang resulta mao ang walay kalamboan, kaulipon, kamatayon.¹⁶

Bisan diha sa Simbahan daghan ang malagmit nagpanindot sa mga lubnganan sa mga propeta sa unang panahon pero sa hunahuna mibato sa buhing mga propeta [tan-awa sa Mateo 23:29–30, 34].¹⁷

Dili gayud nato buhaton ang mga sayop sa mga karaan. Daghan kaayong modernong mga relihiyon nagtuo sa mga propeta sama nila ni Abraham, ni Moises, ug ni Pablo, pero nagdumili sa pagtuo sa mga propeta karon. Ang mga karaan usab makadawat sa mga propeta sa nag-unang mga adlaw, pero gipanghimaraut ug gitunglo ang mga propeta nga ilang mga kadungan.¹⁸

Nagkadaiyang nga pasumangil ang gigamit sulod sa mga siglo aron pagsalikway niining balaanong mga mensahero [buhing mga propeta]. Adunay daghang mga pagdumili tungod kay ang propeta naggikan sa walay klarong lugar. “Aduna ba guy maayong butang gikan sa Nazaret?” (Juan 1:46.) Si Jesus gisugat usab sa pangutana, “Dili ba siya mao ang anak sa panday?” (Mateo 13:55.) Sa usa ka paagi o sa lain, ang pinakadaling paagi sa pagsalikway sa balaang mga propeta mao ang pagpangita og mga pasumangil, bisan pa kon bakak o dili katuohan, isalikway sa tawo aron ang iyang mensahe isalikway usab. Ang mga propeta nga dili madanihon, ug dili maayong mosulti, giisip nga walay bili. Imbis nga motubag sa mensahe ni Pablo, ang uban mitan-aw sa iyang pagkatawo nga luya ug miisip sa iyang gipamulong nga dili maayo [tan-awa sa 2 Mga Taga-Corinto 10:10]. Tingali ilang gihukman si Pablo sa kalidad sa iyang tingog o sa iyang estelo sa pagsulti, dili ang mga kamatuoran nga iyang gipamulong.

… Ang mga kahingawa sa kalibutan daghan kaayo unya makapasamok, bisan ang buotang mga tawo malinga gikan sa pagsunod sa kamatuoran tungod kay sila mas miatiman pag-ayo sa mga butang sa kalibutan.…

Usahay ang mga tawo mipahimutang sa ilang mga kasingkasing sa mga butang ug sa pasidungog niini nga kalibutan nga sila dili makakat-on sa mga leksyon nga kinahanglan kaayo nga ilang makat-unan. Yano nga mga kamatuoran kasagaran gisalikway pabor sa pilosopiya sa tawo nga dili kaayo pugsanon, ug kini ang laing hinungdan sa pagsalikway sa mga propeta.…

Ang balaang mga propeta wala lamang modumili sa pagsunod sa sayop nga mga uso sa tawo, pero mibutyag niini nga mga kasaypanan. Dili ikatingala nga ang pagdawat sa mga propeta kanunay nga dili maayo. Kasagaran gayud nga ang mga propeta gisalikway tungod kay gisalikway nila pag-una ang sayop nga mga pamaagi sa ilang kaugalingong katilingban.…

Ang mga propeta adunay paagi sa pag-ukay sa kalibutananong hunahuna sa mga tawo. Kasagaran gayud nga ang balaang mga propeta masaypan nga mapintas ug matinguhaon nga mohimo og rekord aron makaingon nga, “Gisultihan ko na kamo niana.” Kadtong mga propeta nga akong nailhan mao ang pinakamahigugmaong mga tawo. Kini tungod sa ilang gugma ug integridad nga sila dili mahimong mousab sa mensahe sa Ginoo aron lamang nga ang mga tawo mobati og kahayahay. Buotan ra sila kaayo aron modaugdaug. Mapasalamaton kaayo ako nga ang mga propeta wala magtinguha nga mainila.¹⁹

Ang mga ginikanan kinahanglan motudlo sa ilang mga anak sa pagpaluyo ug pagsunod sa mga lider sa Simbahan.

Unsaon ninyo pagtudlo ang inyong mga anak sa paghigugma sa mga awtoridad sa Simbahan? Kon kamo kanunay nga mosulti og maayong mga butang kalabut sa presidency sa branch, sa presidency sa district, sa presidency sa misyon, ug sa Presidency sa Simbahan, ang inyong mga anak magtubo nga mahigugma sa maong mga kaigsoonan.²⁰

Mag-ampo kita alang sa mga lider sa Simbahan. Kon ang mga bata sa tibuok nilang kinabuhi sa ilang turno sa mga pag-ampo sa pamilya ug sa ilang sekretong mga pag-ampo mahinumdom sa atubangan sa Ginoo sa mga lider sa Simbahan, sila sigurado gayud nga dili mahulog ngadto sa pagbiya sa kamatuoran.…

Ang mga anak kinsa mag-ampo alang sa mga kaigsoonan magtubo nga naghigugma kanila, mosulti og maayo kalabut kanila, morespeto ug mosunod sa ilang mga ehemplo. Kadtong kinsa makadungog kada adlaw sa mga lider sa Simbahan nga giapil sa pag-ampo sa tumang paghigugma mahimo usab nga motuo sa mga sermon ug mga pag-awhag nga ilang madungog.

Kon ang batang mga lalaki makigsulti sa Ginoo mahitungod sa ilang bishop, sila mahimong seryosong modawat sa mga paginterbyu sa bishop diin gihisgutan ang mga pagtugyan sa priesthood ug mga panalangin sa misyon ug sa templo. Ug ang batang mga babaye usab makabaton og adunay dako kaayong respeto alang sa tanang mga pagtulun-an samtang sila mag-ampo alang sa mga lider sa Simbahan.²¹

Kadtong mosunod sa mga awtoridad sa Simbahan makakaplag og kasiguroan.

Ang pagkamiyembro sa Simbahan kanunay nga luwas kon mosunod sila’g maayo sa mga panudlo ug mga pag-awhag ug sa pagpangulo sa mga awtoridad sa Simbahan.²²

Ang mga awtoridad nga gibutang sa Ginoo sa iyang Simbahan naghan-ay alang sa mga tawo sa Simbahan og usa ka pasilonganan, usa ka dapit nga dangpanan, sa laing pagkasulti, kasaligan nga mga lider. Wala gayuy bisan usa dinhi niini nga Simbahan ang mahisalaag palayo kon siya mismo mopaduol og maayo sa mga Awtoridad sa Simbahan nga gibutang sa Ginoo sa iyang Simbahan. Kini nga Simbahan dili gayud mahisalaag; ang Korum sa Napulog Duha dili gayud modala kaninyo ngadto sa sayop nga agianan; kini wala gayud ug dili gayud mahitabo. Mahimong mga indibidwal nga magduda; dili gayud mahitabo nga ang kadaghanan sa Konseho sa Napulog Duha maanaa sa sayop nga bahin sa bisan unsang panahon. Ang Ginoo mipili kanila, mihatag siya kanila og piho nga mga responsibilidad. Ug kadtong mga tawo nga magaduol kanila mahimong luwas sa kuyaw. Ug, giingon nga, kon ang usa mosugod na pag-agi sa iyang kaugalingong dalan nga mosupak sa awtoridad, anaa siya sa grabing kakuyaw. Dili ko moingon nga kadtong mga lider nga gipili sa Ginoo mao na gayud ang pinakamaayo, ni ang pinakabatid nga tawo, apan sila ang mga pinili, ug kay pinili man sa Ginoo mao nga sila ang iyang giila nga awtoridad, ug ang mga tawo kinsa mopaduol kanila adunay seguridad.²³

Kon atong sundon ang ebanghelyo ug motuman sa tambag sa mga lider sa Simbahan, mabulahan kita nga makalikay sa daghang mga problema nga midagsang sa kalibutan.²⁴

Maminaw kita niadtong atong gipaluyohan isip mga propeta ug mga manalagna, ingon man sa ubang mga kaigsoonan, ingon ba og ang atong kinabuhing dayon nagdepende niini, tungod kay kini mao gayud!²⁵

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Hunahunaa kon sa unsang paagi ang inyong kinabuhi napanalanginan samtang kamo mipaluyo sa mga lider sa Simbahan sa tulo ka hut-ong ingon sa gihulagway ni Presidente Kimball (tanawa sa pahina 312). Samtang kamo magbuhat sa ingon, unsa nga mga kasinatian ang miabut sa inyong hunahuna?
Ribyuha ang seksyon nga nagsugod sa pahina 313. Unsa ang ubang nagbalik-balik nga mga mensahe nga inyong namatikdan sa bag-ohay nga kinatibuk-ang mga komperensya?
Ribyuha ang ikatulo ug ikaupat nga mga paragrap sa pahina 314. Ngano sa inyong hunahuna nga ang ubang mga tawo maglisud og sunod sa buhing mga propeta? Unsa sa bag-ong mga ehemplo ang miabut sa inyong hunahuna?
Unsa ang atong buhaton aron pagdasig sa mga bata ug sa uban aron morespeto ug mosunod sa mga lider sa Simbahan? (Alang sa ubang mga ehemplo, tan-awa sa pahina 316.)
Ribyuha ang katapusang seksyon sa hugna. Nganong luwas man sa kakuyaw kon mosunod sa tambag sa mga lider sa Simbahan?

May Kalabutan nga mga Kasulatan: Mga Taga-Efeso 2:19–20; 4:11–16; Helaman 13:24–29; D&P 1:14, 38; 21:4–6; 121:16–21

President Kimball greeting people — Si Presidente Kimball mitimbaya sa mga tawo sa iyang pagsulod sa Salt Lake Tabernacle alang sa kinatibuk-ang komperensya.

Paul teaching — “Imbis nga motubag sa mensahe ni Pablo, ang uban mitan-aw sa iyang pagkatawo nga luya ug miisip sa iyang gipamulong nga dili maayo.”