Hugna 7

Personal nga Pagpamatuod

Ang sigurado nga kahibalo sa pagkatinuod sa ebanghelyo mao ang bukas nga pultahan alang sa dagkong mga ganti ug mga kalipay nga dili matukib sa pulong.

Gikan sa Kinabuhi ni Spencer W. Kimball

Niadtong 1947 si Elder Spencer W. Kimball nakadawat og sulat gikan sa iyang anak nga si Andrew, kinsa nagserbisyo og full-time nga misyon. Misulat si Andrew: “Giingnan nako ang usa ka tawo … nga nasayud ako sa pagkatinuod sa unsay akong gipanulti kaniya, ug miingon nga ang Espiritu Santo maoy nagpamatuod niini diri kanako.… Sa dihang ako kadtong gihunahuna pagkahuman nabalaka ako og gamay nga nabuhat nako ang maong butang.” Tungod sa iyang kabalaka miingon siya, “Akong gimatngonan nga dili na makapamatuod ngadto kang bisan kinsa nga mosobra na sa punto sa pag-ingon og ‘gibati nako, Mituo ako, ug uban pa.’ ”

Si Elder Kimball mibalos pagsulat sa iyang anak. “Siguro nasayud ako sa tanan gayud nga imong gibati,” miingon siya, “kay agi ko usab ang sama nga kasinatian sa akong misyon. Gusto nakong mahimong matinud-anon gayud sa akong kaugalingon ug sa programa ug sa Ginoo. Dihay higayon nga mopadayag ako sa mga pulong uban sa pagmatngon aron sulayan sa pagdasig ang uban nga ako mismo wala maninguha sa usa ka positibo, klaro kaayong pamahayag nga nasayud ako. Gibati usab nako ang gamayng pagduhaduha kabahin niana, kay sa higayon nga ako masulundon sa pagbuhat sa akong katungdanan bation nako ang Espiritu. Gusto gayud nakong isulti kon unsa gayud ang tinuod nakong gibati, nga ako nasayud, apan ako nagduhaduha. Kon magkaduol na ang paghimo nako sa positibo nga pamahayag, nakapahadlok kini kanako ug kon ako matinumanon ug espirituhanong nadasig, gusto nakong mopamatuod. Nagtuo ako nga ako nagmatinud-anon, matinud-anon kaayo, apan mihukom ako nga akong gilimbongan ang akong kaugalingon.…

“Sa walay pagduhaduha, sa adlaw nga mopamatuod ka ngadto sa imong investigator nga ikaw NASAYUD nga kini tinuod, ang Ginoo naninguha og maayo sa pagpadayag sa kamatuoran diha kanimo pinaagi sa gahum sa Balaang Espiritu. Samtang anaa kanimo ang Espiritu ug angay sa iyang pakig-uban ug gipanalipdan ang iyang balaan nga programa, bation kini nimo pag-ayo, apan sa pagkahuman nga ‘wala na ang Espiritu’ kanimo ug mosugod ka paghimog rason sa imong kaugalingon ug sa pag-usisa sa imong kaugalingon ug sa pagpangutana sa imong kaugalingon, gusto nimo nga mosibug.…

“Sa akong hunahuna wala akoy ikapangutana sa imong pagpamatuod. Sigurado ako nga ikaw (sama sa akong nahimo) adunay dili maihap nga bililhong mga bahin sa pagpamatuod sa kinatibuk-an sa imong pagkatawo nga nagahulat lamang sa mga kamot sa Agalon nga hanas sa Paglala aron pormahon ug hanigon ngadto sa usa ka tibuok nga kurtina nga adunay igo ug hingpit nga desinyo. Karon anak, sunda kining akong tambag ug AYAW NINYO PAGPALONGA ANG ESPIRITU, apan kon ang espiritu mohunghong, sunda ang iyang balaan nga pagdasig. Himoa kanunay nga angayan ka sa espirituhanon nga paagi ug paminawa ang mga pagdasig ug kon gibati nimo ang kaanindot isulti sa walay lipud-lipod ang imong mga gibati. Ang Ginoo mopalambo sa imong pagpamatuod ug motandog sa mga kasingkasing. Manghinaut ako nga ikaw masayud nga walay pagpanaway niini nga tambag, apan usa ka sulay nga pagtabang.…

“Dili ko mahimong tapuson ang akong sulat kanimo nga dili mohatag sa akong pagpamatuod. Nasayud ako nga kini tinuod— nga si Jesus mao ang Tiglalang ug Manunubos; nga ang Ebanghelyo nga gipanudlo nato ug sa atong 3,000 ka mga misyonaryo gipahiuli ug gipadayag pinaagi sa matuod nga Propeta, nga si Joseph Smith, ug kini iya sa Dios, ug akong gipahinungod ang nahibiling bahin sa akong kinabuhi alang sa ‘pagsangyaw sa gingharian.’ Ako [nakapamatuod na] sa akong pagpamatuod sa walay lipud-lipod … ug ako kining ipamatuod pag-usab ug usab. Sigurado ako nga ang imong pagpamatuod mao usab gawas lang siguro nga ang imong bililhong mga bahin nanginahanglan pa nga lalahon [woven] ngadto sa usa ka hingpit nga kurtina diin dali ra kining matuman diha sa imong misyonaryo nga buhat samtang imong lugakan ang imong kasingkasing ug tugutan nga modumala kini sa imong hunahuna.

“Unta ang Dios motabang kanimo sa pagdala ngadto sa usa ka maanindot nga sumbanan sa bililhong mga bahin sa imong kasinatian ug inspirasyon ug unta ikaw sa kanunay uban sa nagatubo nga gahum mopadayon … sa pagpuyo ug pagtudlo sa walay katapusang kamatuoran.”¹

Mga Pagtulun-an ni Spencer W. Kimball

Matag-usa kanato makadawat ug pagpamatuod— usa ka pagpadayag gikan sa Langitnong Amahan pinaagi sa Balaang Espiritu.

Si Pedro gipangutana sa Manluluwas, “Apan kamo unsa may inyong sulti, kinsa man ako?” Ug si Pedro, nga namulong alang sa iyang mga kaigsoonan, sa ubang mga Apostoles, miingon, “Ikaw mao ang Kristo, ang Anak sa Dios nga buhi.” Ang misunod nga pulong sa Manluluwas makahuluganon. Miingon siya, “Dalaygon ikaw, Simon Barjona: kay wala kini ipadayag kanimog tawo, kondili gipadayag kini kanimo sa akong Amahan nga anaa sa langit” (Mateo 16:13–17).

Si kinsa ang nagpadayag niining makapahingangha nga kamatuoran ngadto kaniya? Ang atong Amahan sa Langit. Giunsa niya kini sa paghimo? Pinaagi sa pagpadayag. Kining nag-una nga kahibalo nga si Jesus mao ang Kristo, ang Manunubos, ang Manluluwas, wala magagikan kang bisan kinsang tawo o gikan sa bisan unsang basahon o gikan sa bisan unsang tunghaan sa kolehiyo. Si Pedro nakadawat niini direkta gikan sa atong Langitnong Amahan pinaagi sa pagpangalagad sa Balaang Espiritu.…

… Matag kalag niining kalibutana mahimong adunay pagpadayag, sama sa usa nga naangkon ni Pedro. Kana nga pagpadayag mahimo nga usa ka pagpamatuod, usa ka kahibalo nga si Kristo buhi, nga si Jesukristo mao ang Manunubos niining kalibutan. Ang matag kalag mahimong makaangkon niini nga kasiguroan, ug kon maangkon na niya kini nga pagpamatuod, kini nagagikan sa Dios ug dili gikan sa pagtuon lamang. Ang pagtuon usa ka importante nga elemento, sa tinuod lang, apan kana pagaubanan gayud sa pagtuon kanunay nga pag-ampo ug paningkamot, ug dayon kini nga padayag moabut.

Kon kamo sa tagsa-tagsa nakahibalo nga si Jesus dili lang kay usa ka batid sa pangatarungan apan siya sa pagkatinuod ang Anak sa Dios, nga siya mianhi sa kalibutan sa pamaagi nga atong giangkon nga mao gayud, ug nga siya migawas sa kalibutan alang sa katuyoan nga atong giangkon nga mao gayud—kon ikaw nakasiguro niini, ug nasayud nga si Joseph Smith usa ka propeta sa Dios ug nga kini mao ang matuod nga Simbahan nga gitukod ni Jesukristo, dayon ikaw aduna nay usa ka pagpadayag.²

Adunay mga tawo kinsa mopasigarbo sa ilang mga kaugalingon sa ilang intelihente nga panghunahuna, kinsa nagtuo nga sila makaugkat sa mga misteryo, apan dili gayud nila kini mahulagway o mapasabut o masabtan ang espirituhanong mga butang pinaagi sa ilang pangatarungan o pinaagi sa ilang mental nga pamaagi. Ang mga espirituhanong mga butang masabtan lamang pinaagi sa Espiritu. Kinahanglang magagikan kini sa kasingkasing ug dinha ang pagpamatuod makaplagan.³

Ang hingpit nga espirituhanong kahibalo mao ang usa ka bukas nga pultahan ngadto sa dagkong mga gasa ug mga kalipay nga dili matukib sa pulong. Ang pagbaliwala sa pagpamatuod mao ang pagsulod ngadto sa usa ka makabuta nga kangitngit, sa pagdala sa imong kaugalingon ngadto sa dili makita nga mga katalagman. Kanang tawhana angay nga kaloy-an kinsa nagalakaw sa kangitngit sa udtong tutok, kinsa nag-antus sa mga babag nga mahimo ra untang tangtangon, ug kinsa mopuyo sa kangiob sa pagkawalay kasigurohan ug pagkamadudahon nga wala kini kinahanglana. Ang espirituhanong kahibalo sa kamatuoran mao ang de kuryente nga suga nga nagdan-ag sa langob; ang hangin ug adlaw mipatibulaag sa gabon; ang dagkong kahimanan mibungkag sa mga nanagbabag sa agianan.⁴

Ang pagpamatuod maangkon ug maatiman pinaagi sa tinud-anay nga mga paningkamot.

Ang pagpamatuod usa ka personal nga pagpadayag—usa sa importanting mga gasa—ug mahimong matagamtam sa matag kalag kinsa andam mobayad sa kantidad.⁵

Usa ka maayo nga pangutana nga gipangutana sa mga minilyon sukad kini gihugpong [phrased] ni Joseph Smith: Unsaon man nako sa pagkahibalo kinsa kanilang tanan, kon duna man, sa mga organisasyon ang matuod, makadiyos, ug giila sa Ginoo?

Siya mihatag na sa yawe. Ikaw mahimong makahibalo. Dili ka na kinahanglang magduhaduha.… Ang kinahanglanong pamaagi mao ang: pagtuon, paghunahuna, pag-ampo, ug pagbuhat. Ang pagpadayag mao ang yawe. Ang Dios mopahibalo niini kanimo kon imo nang itugyan ug mahimong mapainubsanon ug madawaton. Kon gisalikway na ang tanang garbo sa giladmon sa imong mentalidad, kon aduna nay pag-ila atubangan sa Dios sa imong mga kalibog, kon aduna nay kontrol sa imong garbo, ug kon imo nang gitugyan ang imong kaugalingon ngadto sa gipanudlo sa Espiritu Santo, ikaw andam nang mosugod sa pagtuon.⁶

Makaangkon kita og positibong kasiguroan sa ka tinuod sa usa ka personal nga Dios; ang padayong aktibo nga kinabuhi ni Kristo, managlahi sa lawas apan sama sa iyang Amahan; ang katinuod sa pagpahiuli pinaagi kang Joseph Smith ug sa ubang mga propeta sa organisasyon ug mga doktrina sa simbahan sa Dios sa yuta; ug ang gahum sa diosnon, may awtoridad nga priesthood nga gihatag ngadto sa tawo pinaagi sa mga pagpadayag gikan sa Dios. Kini mahibaloan sa matag responsabli nga tawo sama gayud kasiguro sa kahibalo nga ang adlaw mosubang. Ang kapakyasan sa pagkab-ot niini nga kahibalo mao ang pagdawat nga ang usa wala makabayad sa kantidad. Sama sa titulo [degree] sa akademik, kini maangkon pinaaagi sa tinud-anay nga mga paningkamot. Kana nga kalag kinsa nalimpyohan pinaagi sa paghinulsol ug sa mga ordinansa nakadawat niini kon siya nagtinguha ug naningkamot alang niini, usisahon kini sa dakong kakugi, magtuon, ug matinud-anong mag-ampo.⁷

Ang Manunubos namahayag:

“Ang akong doktrina dili sa akong kaugalingon, kondili iya sa nagpadala kanako.”

“Kon tuyoon ni bisan kinsa ang pagbuhat sa kabubut-on sa Dios, iyang mahibaloan, kon ang akong gitudlo iya ba sa Dios, o nagsulti ba lamang ako sa kinaugalingon kong kabubut-on.” (Juan 7:16–17.)

Unsa may gipasabut sa pagkahibalo sa doktrina? Mao kini ang dili matarug nga kasiguroan. Ang Ginoo mitanyag og usa ka bahandianong gasa pero madawat lang kini pinaagi sa paghimo sa mga piho nga mga kinahanglanon. Niini nga sitwasyon ang panalangin nga gisaad mao ang kahibalo sa kasagrado sa doktrina. Ug niining sitwasyona ang balaod o ang kinahanglanon mao nga ang usa kinahanglang “mosunod sa iyang kabubut-on.” …

… Ang taphaw nga pagdawat sa mga doktrina dili makahatag og pagpamatuod; walay dili husto nga pagsunod sa ebanghelyo ang makadala niana nga kasiguroan, apan ang tanan nga paningkamot nga sundon ang iyang mga kasugoan.

Kasagaran natong makita kini sa kinabuhi sa mga miyembro sa Simbahan. Ang usa miingon kanako diha sa stake nga akong gibisitahan, “gilikayan gayud nako kanunay ang tanang mga miting sa pagpamatuod [testimony meeting]. Dili nako matulon ang mga sentimental ug emosyonal nga mga pamahayag nga gihimo sa ubang tawo. Dili nako madawat kini nga doktrina gawas lang kon akong mapamatud-an ang tanan sa intelektwal ug sa pagpangatarungan mahatagan og pruweba.” Nakaila ako niining klaseha sa mga tawo sama sa uban nga akong nahimamat nga susama kaniya. Wala mahitabo nga sila mibuhat sa tanan aron sundon ang mga kasugoan: gamay o walay pagtuman sa ikapulo, gawas lang sa panagsa nga pagtambong sa mga miting, daghang nga pagpanaway sa mga doktrina, sa mga organisasyon, ug sa mga lider, ug nasayud kaayo kita nganong wala silay pagpamatuod. Hinumdumi nga ang Ginoo miingon:

“Ako, ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad” (D&P 82:10).

Kanang mga tawhana napakyas sa “paghimo unsay iyang gipabuhat,” maong eksakto lang nga, walay saad kanila.…

… Dili kini buta nga pagkamaunungon kon dili matinud-anon nga pagsunod ug pagliso sa mga yawe nga moabli sa sudlanan sa espirituhanong kahibalo. Ang Ginoo walay gipili tali sa iyang mga anak apan kalipay ang pag-angkon ug pagpanalangin kanatong tanan, kon ato siyang tugutan.⁸

Unsa may buhaton nimo sa imong pagpamatuod? Imo ba kining bairon sama sa kutsilyo nga gamiton sa atong mama sa paghiwa og karne? Imo ba lang kining pasagdan nga mahabol ug matay-an? … Ang pagpamatuod nga gamay sama ra sa usa ka rosas. Ayaw lang paulani; ayaw lang bu-bui sa makadiyot ug unsay mahitabo sa imong rosas? Mamatay kini. Ang imong pagpamatuod mamatay. Ang imong gugma mamatay. Ang tanang butang kinahanglang atimanon. Imong gipakaon ang imong lawas katulo sa usa ka adlaw. Ang Ginoo miingon nga atimanon ang imong mga pagpamatuod, himoon nga abtik ang imong espiritu, kinahanglan nimong pakaonon kini matag-adlaw.… Mao kana nganong miingon siya nga mag-ampo kada buntag ug kada gabii. Mao kana nganong miingon siya nga pag-ampo sa kanunay aron ang linya sa komunikasyon dili maputol.⁹

Kinahanglan kitang motambong sa mga miting sa pagpamatuod [testimony meeting].

Ang miting sa pagpamatuod usa sa mga pinakanindot nga miting sa [Simbahan] sulod sa tibuok bulan, kon anaa kanimo ang espiritu. Kon ikaw gilaayan sa usa ka miting sa pagpamatuod, adunay problema diha nimo, ug dili ang sa ubang tawo. Mahimo kang mobarug ug mohatag sa imong pagpamatuod ug hunahunaon nimo nga mao kini ang pinakaanindot nga miting niining bulana; apan kon ikaw maglingkod ug mag-ihap sa mga sayop nga grammar ug mokatawa sa tawo kinsa dili makasulti og tarung, laayan gyud ka.… Ayaw kini hikalimti! Kinahanglan kang manlimbasog alang sa imong pagpamatuod. Kinahanglan nimo ang padayon nga pagpanglimbasog!

Ang Ginoo namulong diha sa ika-60 nga seksyon sa Doktrina ug mga Pakigsaad, “Apan sa uban wala ako mahimuot pag-ayo kay sila dili mobuka sa ilang mga ba-ba” (D&P 60:2). Unsa man ang buot niyang ipasabut? Miingon siya nga kon dili nila kini gamiton, mawala gikan kanila ang unsay iyang gihatag kanila. Mawala kanila ang ilang espiritu. Mawala kanila ang ilang pagpamatuod. Ug kining dili mapalit nga butang nga anaa kanimo mahimong takulahaw lang mawala sa imong kinabuhi.

Matag bulan ang Unang Kapanguluhan ug ang Napulog Duha makigtigum kauban ang tanang General Authorities sa templo. Magpaambit sila sa pagpamatuod ug magbinayloay sa tagsa-tagsa ka pulong kon giunsa nila paghigugma ang usag-usa sama kaninyong tanan. Nganong ang mga General Authorities kinahanglan og miting sa pagpamatuod? Sa sama ra nga rason nga ikaw nagkinahanglan sa miting sa pagpamatuod. Sa imong hunahuna makalahutay ka ba ngadto sa tulo, ug unom, ug siyam, ug dose ka bulan nga dili mopaambit sa imong pagpamatuod ug maamumahan ang iyang kinatibuk-ang bili? …

Nasayud ka nga kining pagpamatuod usa ka talagsaon nga butang, usa ka pinaka-importante nga butang. Si bisan kinsa nga ministro og pari mahimong mokutlo og kasulatan ug mopresentar og diyalogo. Apan dili tanang pari og ministro makahimo sa pagpaambit sa iyang pagpamatuod. Ayaw paglingkod didto sa inyong miting panahon sa puasa ug linglahon ang imong kaugalingon ug moingon, “Siguro dili lang ko mopaambit sa akong pagpamatuod karon. Siguro dili kana makiangayon alang sa ubang mga miyembro tungod kay aduna na akoy daghan kaayo nga kahigayunan.” Ipaambit ang imong pagpamatuod. Ug ang usa ka minuto taas na kaayo alang sa paghimo niini.

Ikaw adunay pagpamatuod! Sa tinuod lang kinahanglan kini nga matukod ug mapataas ug mapadako; ug mao kana ang imong gibuhat. Sa matag higayon nga ikaw mopaambit sa imong pagpamatuod magkalig-on kini.¹⁰

Ang mga pagpamatuod ipahayag pinaagi sa mga pulong nga yano apan puno sa gahum.

“Nasayud ako nga kini tinuod.” Tungod kay kanang pipila ka mga pulong gilitok sulod na sa usa ka bilyon nga higayon sa minilyon nga katawhan wala kini makapahimo niana nga sum-ol. Dili gayud kini makapuol. Gibati nako ang kalooy alang niadtong mga tawo nga mosulay paggamit og laing mga pulong, tungod kay walay laing mga pulong sama sa “Nasayud ako.” Walay mga pulong nga magpahayag sa halawom nga pagbati nga mahimong magagikan sa kasing kasing sa tawo sama sa “Nasayud ako.”¹¹

Ang uban sa atong buotan nga mga tawo mahadlok kaayo sa pagsubli-subli nga ilang ilikay ang pagsulti sa ilang pagpamatuod pinaagi sa paghisgut og laing mga butang nga walay labot. Ayaw gayud kahasol kabahin sa kapuol sa pagpamatuod. Kon ang Presidente sa Simbahan mopaambit sa iyang pagpamatuod, siya moingon, “Nasayud ako nga si Joseph Smith tinawag sa Dios, usa ka diosnon nga representante. Nasayud ako nga si Jesus mao ang Kristo, ang Anak sa buhing Dios.” Tan-awa, pareho ra nga butang nga gipanulti sa matag-usa kaninyo. Mao kana ang pagpamatuod. Dili kini matigulang, dili gayud matigulang! Sultihi ang Ginoo kanunay kon unsa kadako ang imong gugma kaniya.

Ang pagpamatuod dili usa ka pagpahimangno; ang pagpamatuod dili usa ka sermon (walay usa kaninyo nga anaa diha aron manambag sa uban); dili kini usa ka sugilanon sa biyahe. Anaa ka dinha aron ipaambit ang imong kaugalingong pagsaksi. Makapahingangha gayud kon unsay imong masulti sulod sa 60 ka segundos pinaagi sa pagpamatuod, o 120, o 240, o bisan pila ka oras ang ihatag kanimo, kon ikaw mohisgut lang gayud kabahin sa pagpamatuod. Gusto namong mahibaloan kon unsa ang imong gibati. Gihigugma ba nimo ang buluhaton, tinuod? Malipayon ka ba sa imong buluhaton? Gihigugma ba nimo ang Ginoo? Nalipay ka ba nga ikaw miyembro sa Simbahan?¹²

Isulti lang kon unsa ang imong gibati sa sulod. Mao kana ang pagpamatuod. Sa higayon nga ikaw mosugod sa pagsangyaw sa uban, ang imong pagpamatuod natapos. Sultihi lang kami kon unsa ang imong gibati, unsay gisulti sa imong hunahuna ug kasingkasing ug sa tanang bahin sa imong kaunuran.¹³

Sayud nang daan, sa natural nga dagan sa mga panghitabo, nga ako kinahanglang mobarug atubangan sa Ginoo ug manubag sa tanan nakong mga gipamulong, ako karong idugang ang akong personal ug ligdong nga pagpamatuod nga ang Dios, ang Mahangturong Amahan, ug ang nabanhaw nga Ginoo, nga si Jesukristo, mipakita ngadto sa batang si Joseph Smith. Akong ipamatuod nga ang Basahon ni Mormon usa ka hinubad gikan sa karaan nga rekord sa mga katawhan sa kanasuran didto [sa] kasadpang bahin, diin sila milambo ug nahimong gamhanan dihang ila nga gisunod ang mga kasugoan sa Dios, apan hilabihan ang pagkagun-ob pinaagi sa grabe nga mga gubat sa dihang ilang gikalimtan ang Dios. Kini nga basahon nagpamatuod sa buhi nga kamatuoran sa Ginoo nga si Jesukristo isip Manluluwas ug Manunubos sa katawhan.

Akong ipamatuod nga ang balaang priesthood, ang Aaronic ug ang Melchizedek, uban sa katungod nga mobuhat sa ngalan sa Dios, gipahiuli dinhi sa yuta pinaagi ni Juan Bautista, ug ni Pedro, ug Santiago, ug Juan; nga ang uban pang mga yawe ug awtoridad napahiuli usab; ug nga ang gahum ug awtoridad niadtong nagkalainlaing mga diosnong gasa ania na kanato karon. Niini nga mga butang akong ipamatuod ang akong ligdong nga pagsaksi ngadto sa tanan nga makadungog kanako. Akong isaad sa pangalan sa Ginoo nga ang tanang maminaw sa among mensahe, ug modawat ug mosunod sa ebanghelyo, motubo diha sa pagtuo ug panabut. Makadawat sila og dugang nga kalinaw sa ilang kinabuhi ug sa ilang panimalay ug pinaagi sa gahum sa Balaang Espiritu makapanulti sa susama nga mga pulong sa pagpamatuod ug kamatuoran.¹⁴

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Ribyuha ang sulat ni Elder Spencer W. Kimball para sa iyang anak nga si Andrew (mga pahina 87–89), nga mangita sa ikatandi sa usa ka pagpamatuod ngadto sa usa ka kurtina [tapestry]. Unsay mga kasinatian ug mga pagbati nga mokompleto sa imong personal nga “bililhong mga bahin sa pagpamatuod”? Hunahunaa kon unsa ang gihimo sa Ginoo sa pagtabang kanimo nga malala [weave] ang imong mga bahin sa pagpamatuod ngadto sa usa ka kurtina.
Sa imong hunahuna unsay gikatabang niini kang Andrew Kimball sa pagdawat sa sulat gikan sa iyang amahan? Unsang mga kahigayunan ang anaa sa mga ginikanan aron mapaambit ang ilang mga pagpamatuod uban sa ilang mga anak? Unsaon man nimo sa pagtabang ang mga kabatan-onan nga makadawat ug makaila sa mga espirituhanong pag-aghat nga modala ngadto sa pagpamatuod?
Ribyuha sa makadiyot ang mga pahina 91–94, sa pagpangita sa mga pulong ug hugpong sa mga pulong nga gigamit ni Presidente Kimball sa paghulagway sa atong mga paningkamot aron makabaton ug makapalig-on sa atong mga pagpamatuod. Kon ang usa ka tawo mobati nga ang iyang pagpamatuod nagpaling-paling, unsa may mahimo ninang tawhana?
Tun-i ang mga panambag ni Presidente Kimball kabahin sa mga miting sa puasa ug pagpamatuod (mga pahina 94–95). Ngano kaha sa imong hunahuna duna man kita niining mga miting? Ngano nga ang atong mga pagpamatuod mag-anam og kalig-on kon ato kining ipaambit? Unsa may atong mahimo sa pagsiguro nga ang tesimony meeting mahimo nga usa sa pinakanindot nga miting niana nga bulan alang kanato?
Ribyuha ang tambag ni Presidente Kimball kon unsaon gayud nato sa pagpaambit ang atong mga pagpamatuod (mga pahina 96–97). Nganong ang mga pulong “Nasayud ako” aduna may mas kusog nga gahum?

May Kalabutan nga mga Kasulatan: 1 Mga Taga-Corinto 12:3; 1 Pedro 3:15; Alma 5:45–46; Moroni 10:4–7; D&P 42:61; 62:3