Hugna 20

Ang Kababayen-an sa Simbahan

Matarung nga mga babaye kinsa magbuhat sa talagsaong mga responsibilidad nga gihatag kanila sa Dios maoy mga dagkong panalangin sa ilang mga pamilya, sa Simbahan, ug sa kalibutan.

Gikan sa Kinabuhi ni Spencer W. Kimball

“Natingala ako sa kamatinud-anon sa kadaghanan sa atong mga kaigsoonang babaye ug sa ilang lig-on nga debosyon sa kawsa sa pagkamatarung,” misulat si Presidente Spencer W. Kimball. Siya dayon miasoy sa mosunod:

“Ang journal sa akong kaugalingong talagsaon nga inahan mirekord sa usa ka tibuok kinabuhing pagka-mapasalamaton sa oportunidad sa pagserbisyo ug nagmahay lang nga wala na siya makahimo og dugang pa. Nakapahiyum ako sa dihang nagbasa ako bag-ohay pa lang sa nahisulat nga pinetsahan og Enero 16, 1900. Nag-alagad siya isip unang magtatambag sa among Relief Society sa Thatcher, Arizona, ug ang kapangulohan miadto sa panimalay sa usa ka sister diin ang usa ka masakiton nga batang masuso nakapugong sa inahan gikan sa pagpanahi. Ang akong inahan mikuha sa iyang kaugalingong makina, nagbalon og paniudto, dala ang iyang anak, ug ang taas nga lingkuranan para sa bata, ug dayon nagsugod sila og trabaho. Misulat siya nianang gabhiona, nakahimo kami og upat ka apron, upat ka parisan sa pantalon ug nakasugod og usa ka shirt para sa usa sa mga lalaki.’ Miundang sila pagka alas 4:00 sa hapon aron moadto sa usa ka haya, mao nga wala na kami makahuman og dugang pa niadto.’ Nalipay unta ako sa maong kahimoan, kaysa maghunahuna nga, ‘Bitaw, dili ra kaayo daghan.’

“Dayon human sa duha ka adlaw, ang Relief Society nagkita sa among panimalay para sa work meeting. ‘Daghang mitambong,’ misulat ang akong inahan, ug daghan kaayong nahuman.’ Dayon human nianang work meeting, walay reklamo siyang miadto sa board meeting.

“Mao kadto ang matang sa panimalay nga akong natawhan, usa nga gidumala sa babaye kinsa naghatag og serbisyo sa tanan niyang mga gibuhat. Kana mao ang matang sa panimalay nga nahimo sa akong asawa. Kana mao ang matang sa panimalay nga nahimo sa liboan ka talagsaong mga kababayen-an sa tibuok Simbahan.”¹

Si Presidente Kimball mitudlo nga mahinungdanon ang tanang matarung nga mga babaye diha sa plano sa Langitnong Amahan para sa Iyang mga anak. Miingon siya: “Ugma damlag, kon ang tibuok istorya sa karon ug sa miaging dispensasyon isaysay, mapuno kini sa madasigong mga istorya sa atong mga kababayenan, sa ilang kaalam ug sa ilang debosyon, sa ilang kaisug, tungod sa usa ka pagbati nga tingali, maingon nga ang mga babaye mao ang nahiuna didto sa lubnganan ni Ginoong Jesukristo human sa iyang pagkabanhaw, ang atong matarung nga mga babaye sagad talagsaon gayud ang pagkasensitibo sa mga butang nga adunay mahangturong sangputanan.”²

Mga Pagtulun-an ni Spencer W. Kimball

Kay gihatagan og lainlaing mga responsibilidad, ang mga babaye ug mga lalaki magtinabangay nga motrabaho isip managkauban sa kaangayan ug pagtahud.

Ang mga kasulatan ug ang mga propeta klarong mitudlo kanato nga ang Dios, kinsa perpekto sa iyang kinaiya sa hustisya, “walay pinalabi sa mga tawo” (Mga Buhat 10:34).… Aduna kitay hingpit nga kaangayan isip iyang espirituhanong mga anak. Managsama kita isip mga dumadawat sa hingpit nga gugma sa Dios para sa kada usa kanato. Si anhing Elder John A. Widtsoe misulat:

“Ang dapit sa babaye diha sa Simbahan mao ang paglakaw sa kilid sa lalaki, dili sa atubangan kaniya ni sa ulahi kaniya. Sa Simbahan adunay hingpit nga kaangayan tali sa lalaki ug sa babaye. Ang ebanghelyo … gihimo sa Ginoo nga managsama para sa mga lalaki ug sa mga babaye.” (Improvement Era, Mar. 1942, p. 161).

Uban niadtong dakong mga pagpasalig, hinoon, ang atong mga tahas ug mga buluhaton managlahi. Kini mga mahangturong mga panaglahi––uban sa mga babaye nga gihatagan og dako kaayong mga responsibilidad sa pagkainahan ug pagkaigsoon ug mga lalaki nga gihatagan og dako kaayong mga responsibilidad sa pagkaamahan ug sa priesthood––pero walay lalaki kon walay babaye ni ang babaye nga walay lalaki diha sa Ginoo (tan-awa sa 1 Mga Taga-Cor. 11:11). Ang usa ka matarung nga lalaki ug usa ka matarung babaye mga panalangin para sa tanan niadtong kinabuhi nga ilang natandog.

Hinumdumi, sa kalibutan sa wala pa kita moabut dinhi, ang matinud-anong mga babaye gihatagan og piho nga mga buluhaton samtang ang matinud-anong mga lalaki giorden nang daan sa pihong mga tahas sa priesthood. Samtang kita dili na mahinumdom karon sa mga detalye, kini wala makapausab sa mahimayaong katinuoran nga atong gikasabutan kanhi.³

Usahay kita makadungog sa makahasol nga mga taho kon giunsa pagtratar ang mga babaye. Tingali kon kini mahitabo, kini resulta sa pagkawalay pagbati ug pagkawalay hunahuna, pero dili gayud unta kini mahitabo, mga kaigsoonan. Ang mga babaye sa Simbahan adunay trabaho nga himoon diin, bisan lahi, sama gayud ka importante sa buhat nga atong gihimo. Ang ilang mga buhat mao, sa pagkatinuod, ang samang sukaranang buluhaton nga kita gihangyo nga buhaton––bisan tuod ang atong mga tahas ug mga buluhaton managlahi.…

Ang atong igsoong mga babaye wala mangandoy nga ubos ra ang pagtan-aw kanila; sila nangandoy nga pagarespetohan ug tahuron isip atong mga igsoon ug atong mga kaparehas. Akong gihisgutan kining mga butanga, akong mga kaigsoonan, dili tungod kay ang mga doktrina o mga pagtulun-an sa Simbahan mahitungod sa mga babaye kadudahan, apan tungod kay sa ubang mga sitwasyon ang atong batasan anaa sa makaduda nga kalidad.⁴

Ang Relief Society maoy usa ka organisasyon sa Ginoo para sa mga babaye. Kini mokomplemento sa pagbansay sa priesthood nga gihatag sa mga lalaki. Adunay usa ka gahum niini nga organisasyon nga wala pa sa hingpit magamit aron pagpalig-on sa mga panimalay sa Zion ug pagtukod sa Gingharian sa Dios.…

… Sa iyang kaalam ug kalooy, ang atong Amahan mibuhat sa lalaki ug babaye nga magdepende sa usag usa alang sa hingpit nga pagtubo sa ilang potensyal. Tungod kay ang ilang kinaiyahan daw lahi, sila makakomplemento sa usag usa; tungod kay sila sa daghang mga paagi managsama, sila makasabut sa usag usa. Ayaw gayud itugot ang kasina sa usag usa tungod sa ilang panaglahi; himoa ang duha nga makatino unsa ang taphaw ra ug unsa ang nindot nga sukaranan niana nga panaglahi, ug mobuhat sumala sa ingon. Ug unta ang panag-igsoonay sa priesthood ug sa sisterhood sa Relief Society mahimong usa ka panalangin sa mga kinabuhi sa tanang mga miyembro niining talagsaong Simbahan, samtang kita motabang sa usag usa diha subay sa dalan sa kahingpitan.⁵

Ang Dios mitawag og mga babaye aron pagtabang sa pagpalambo, pagpanalipod, ug pagbantay sa panimalay ug sa pamilya.

Ang mahimong matarung nga babaye usa ka mahimayaong butang sa bisan unsang panahon. Ang mahimong matarung nga babaye sa panahon sa katapusang dispensasyon niini nga yuta, sa dili pa ang ikaduhang pag-anhi sa atong Manluluwas, usa ka talagsaong balaanon nga tawag. Ang kalig-on ug impluwensya sa matarung nga babaye karon mahimong kapulo pil-on sa unsa kini sa mas malinawong mga panahon. Gibutang siya dinhi aron pagtabang sa pagpalambo, sa pagpanalipod, ug sa pagbantay sa panimalay––nga mao ang sukaranan ug labing balaang institusyon sa katilingban. Ang ubang institusyon sa katilingban mahimong mahunong ug gani mapakyas, pero ang matarung nga babaye makatabang sa pagluwas sa panimalay, nga malagmit mao ang katapusan ug mao lamang ang nahibaloan nga dangpanan sa ubang mga mortal taliwala sa kalisud ug kagubot.⁶

Basaha ninyo ang mga mantalaan, tan-awa ninyo ang telebisyon, paminawa ninyo ang radyo, basaha ninyo ang mga libro ug mga magasin, ug daghan ang moabut sa inyong hunahuna ang gihimo aron mopahisalaag kaninyo.… Ang uban nga mga butang nga ilang isulti kaninyo nga karong panahona mao: nga wala kinahanglana ang pagminyo; wala kinahanglan nga maminyo aron makabaton og mga anak; wala kinahanglana nga adunay mga anak; makaangkon kamo sa tanang kalibutanong kalipay nga wala kini nga mga obligasyon ug mga responsibilidad.… Adunay [daghan] nga mga paagi sa paghatag kaninyo niining gisayon-sayon lang, nga gitawag nga kagawasan. Sila moingon kaninyo nga kamo gikadinahan diha sa inyong mga panimalay, sa inyong mga bana, sa inyong mga anak, sa inyong buluhaton sa balay. Nagsulti ug nagsulat sila kaninyo kalabut sa usa ka kagawasan nga wala nila masayri.…

Si Eva, sa bag-ohay pa lang gikan sa mahangturong trono, nga daw nakasabut sa paagi sa kinabuhi, kay siya malipayon––malipayon!––nga sila mikaon sa gidili nga prutas.… Ang atong hinigugma nga inahan nga si Eva nagsugod sa tawhanong kaliwatan uban sa kamaya, gusto og mga anak, nagmaya sa kalipay nga ilang madala ngadto kaniya, andam sa pagdawat sa mga problema nga konektado sa pamilya, ingon man usab sa mga kalipay.…

Ang mga inahan adunay sagradong tahas. Sila kaabag sa Dios, ingon man sa ilang kaugalingong mga bana, una ang pagpanganak sa espiritung mga anak sa Dios ug dayon pagpadako niadtong mga anak aron sila makaalagad sa Dios ug mohupot sa iyang mga sugo.… Ang pagkainahan usa ka balaang tawag, usa ka sagrado nga dedikasyon alang sa pagpahinabo sa buhat sa Ginoo, usa ka pagpahinungod ug debosyon sa pagpadako ug pag-alima, sa pag-amuma sa lawas, hunahuna, ug espiritu niadtong kinsa nagpabilin sa ilang unang kahimtang ug kinsa mianhi sa yuta alang sa ilang ikaduhang kahimtang aron sa pagkat-on ug aron pagasulayan ug sa pagpaninguha ngadto sa pagkadios.⁷

Daghan kaayong mga babaye ang mogugol sa ilang panahon sa pakigsosyal, sa pamulitika, sa mga serbisyo publiko nga kinahanglan unta silang anaa sa panimalay aron sa pagtudlo ug pagbansay ug pagdawat ug paghigugma sa ilang mga anak ngadto sa kasiguroan.⁸

Wala gayuy mas labaw pang dungog nga ikahatag sa usa ka babaye kaysa pag-abag sa balaanong plano sa [Dios]. Gusto kong mosulti sa walay pagduha-duha nga ang usa ka babaye dili makakaplag og mas dako pa nga katagbawan ug kalipay ug kalinaw ug dili makahatag og mas labaw pa nga kontribusyon sa katawhan kaysa sa pagkamaalamon ug takus nga babaye ug sa pagpadako og buotang mga anak.⁹

Ang Ginoo misaad og mga panalangin sa mahangturong kinabuhi sa pamilya sa tanang matinud-anong mga babaye.

Ang uban kaninyo nawad-an sa inyong mga bana tungod sa kamatayon, ang uban tungod sa diborsyo. Ang uban kaninyo wala pa gayuy kahigayunan sa kaminyoon. Pero, kon itandi sa kahangturan, ang kakulang niini nga mga panalangin “sulod lamang sa mubo nga mga higayon” (tan-awa sa D&P 121:7).…

Hinumdumi, usab, samtang kita magpokus sa mga himaya ug kamahinungdanon sa kinabuhi sa pamilya dinhi, nga kitang tanan nasakop sa mahangturong pamilya sa atong Amahan sa Langit.

Pagmasaligon, usab, nga ang tanang matinud-anong mga sisters, kinsa, kay dili ilang sayop, walay kahigayunan sa ilang ikaduhang kahimtang nga ma-seal ngadto sa usa ka sa takus nga lalaki, makabaton gayud niana nga panalangin sa kahangturan. Sa mga higayon nga ikaw mangandoy nianang pagdawat ug paghigugma nga anaa sa kinabuhi sa pamilya dinhi sa yuta, palihug hibaloi nga ang atong Amahan sa Langit nasayud sa inyong kasubo, ug nga usa ka adlaw niana siya mopanalangin kaninyo labaw pa sa inyong kapasidad sa pagpahayag.

Usahay ang pagasulayan ug pamatud-an nagkinahanglan nga kita temporaryong paghikaw––pero ang matarung nga mga babaye ug mga lalaki usa ka adlaw niana makadawat sa tanan––hunahunaa kini, mga sisters––tanan nga anaa sa atong Amahan Dili lamang kini takus nga pagahulaton; kini takus nga pagapuy-an!

Pagkakaron, ang usa dili kinahanglan nga maminyo o usa ka inahan aron makahupot sa una ug sa ikaduhang mahinungdanong mga sugo––kadtong mahigugma sa Dios ug sa atong isigkatawo––diin si Jesus miingon nga nagasukad ang tibuok nga kasugoan ug ang tanang mga propeta.¹⁰

Kamo kinsa wala pa sa pagka karon makasinati sa tradisyonal nga tahas sa babaye, dili kay nagpili, kon dili tungod sa ubang mga rason nga dili nato mapugngan, sa gihapon makahimo og daghan aron pagtabang sa uban.¹¹

Ang kada babaye kinahanglan maninguha aron sa pagtuman sa iyang balaang potensyal.

Malipay ug matingala kita sa husto nga paglambo ug mga pagpahayag sa daghang mga talento sa atong mga sisters.¹²

Modasig kami sa atong tanang mga sisters nga magpahimulos sa ilang mga kahigayunan sa pagdawat sa kahayag ug kahibalo gikan sa eskwelahan, sa personal nga pagtuon, ug sa Relief Society.¹³

Ihan-ay ninyo ang inyong mga tumong, batan-ong mga babaye, aron pagkab-ot ug pagsugakod. Padayon sa pagpaningkamot alang niini. Pagmainampuon ug mapainubsanon sa pagsiksik og kaalam ug kahibalo. Anaa kamo sa panahon sa inyong kinabuhi alang sa pagtuon ug pagpangandam. Pagkat-on taman sa inyong mahimo. Ang pagtubo moabut gikan sa paghan-ay sa inyong mga tumong nga taas ug pagkab-ot sa mga bitoon.¹⁴

Ang kada babaye, ug moingon ako kada babaye, kinahanglang moandam sa iyang kaugalingon alang sa kaminyoon ug sa mga responsibilidad sa panimalay. Wala na kamo magbasa niana sa mga magasin karon, pero kini tinuod gayud. Dasigon gayud siya nga mapasegarbohon sa pag-andam alang sa tinuod nga serbisyo sa pagkababaye. Kinahanglan mahimo siyang hanas sa mga butang nga magamit ug makapalambo sa iyang kinabuhi sa pamilya. Kinahanglang mapalambo ang iyang mga talento, mapalig-on ang iyang kahibalo ug pagpamatuod sa ebanghelyo, ug ganahang moserbisyo sa uban. Ang ubang mga babaye mahimong tawagon sa mga full-time nga misyon, ug ang tanan adunay oportunidad nga labawng magamit sa gingharian sa Dios kon sila nag-andam sa ilang mga kaugalingon.… Gusto nato nga ang atong mga babaye taas og edukasyon, tungod kay ang mga bata mahimong dili makabawi gikan sa kaignorante sa ilang mga inahan.¹⁵

Manghinaut kami nga kamo magpadayon ug mokab-ot nga edukasyon … nga moandam kaninyo alang sa kahangturan ingon man alang sa hingpit nga pagserbisyo sa mortalidad. Agi og dugang niadtong sukaranan ug mahinungdanon nga kahanas diin apil na ang homemaking, dunay ubang mga kahanas nga angay palambuon ug modugang sa inyong kaepektibo sa panimalay, diha sa Simbahan, ug diha sa komunidad.

Usab, kamo kinahanglan maalamon sa mga pagpili nga inyong himoon, pero dili kami buot nga ang mga babaye sa Simbahan mga walay kasayuran ug dili epektibo. Kamo mahimong mas maayong mga inahan ug mga asawa, dinhi niini nga kinabuhi ug sa kahangturan, kon kamo mopalambo sa mga kahanas nga gihatag kaninyo ug mogamit sa mga talento nga ang Dios mipanalangin kaninyo.¹⁶

Kami interesado sa atong mga sisters nga aduna sa tanang butang nga maayo. Kami nagtuo nga ang pagbaton niining tanan nga mga panalangin––kultura, pagpalunsay, edukasyon, kahibalo, kahingpit––aron ang mga inahan sa atong mga anak mahimong makapadako ug makatudlo kanila sa pagkamatarung.¹⁷

Akong usbon ang pagpasabut sa hilabihan ka dakong panginahanglan sa matag babaye sa pagtuon sa mga kasulatan. Gusto kami nga ang atong mga panimalay mapanalanginan uban sa mga sister nga maayo kaayo sa mga kasulatan––dili minyo o minyo, bata o tigulang, biyuda o nagpuyo uban sa pamilya.

Bisag unsa pa ang inyong kahimtang, samtang kamo mahimong mas labaw nga pamilyar sa mga kamatuoran sa mga kasulatan, kamo mas labaw nga epektibo sa paghupot sa ikaduhang dakong sugo, sa paghigugma sa inyong silingan sama sa inyong kaugalingon. Magpakabatid sa mga kasulatan––dili aron sa pagpabati og kaubos sa uban, kon dili aron sa pagbayaw kanila! Kay, kinsa man ang adunay dakong panginahanglan sa “pagtigum og bahandi” sa mga kamatuoran sa ebanghelyo (diin sila mahimong motawag sa panahon sa panginahanglan) kaysa sa mga babaye ug mga inahan kinsa nag-atiman og maayo ug sa pagtudlo?

Tinguhaa ang pinakamaayo sa tanan ninyong matarung nga mga paningkamot, ug sa tanang mga aspeto sa inyong mga kinabuhi.

Hinumdumi, mahal nga mga sisters, nga ang mahangturong mga panalangin nga naangkon ninyo pinaagi sa pagka-miyembro sa Ang Simbahan sa mga Santos sa Ulahing mga Adlaw mas dako kaayo kaysa ubang mga panalangin nga posible ninyong madawat. Walay mas dakong pag-ila nga moabut kaninyo niini nga kalibutan kaysa maila isip babaye sa Dios. Walay mas dako nga kadungganan nga mahimong matugyan kaninyo kaysa pagkaanak nga babaye sa Dios kinsa makasinati sa tinuod nga panag-inigsoonay sa mga babaye, pagka asawa, ug pagkainahan, o ubang mga tahas diin moimpluwensya sa mga kinabuhi alang sa kaayohan.…

… Kamong tanan kinahanglan nga moinom og maayo sa mga kamatuoran sa ebanghelyo kalabut sa mahangturong kinaiya sa inyong indibidwal nga mga ilhanan ug sa katalagsaon sa inyong personalidad. Kamo nanginahanglan, og daghan ug labaw pa, aron mobati sa hingpit nga gugma nga ang atong Amahan sa Langit anaa alang kaninyo ug aron mobati sa bili nga iyang gibutang diha kaninyo isip usa ka indibidwal. Palandonga kini nga mga kamatuoran, ilabi na niadtong mga higayon dihang (sa kahilum sa maong kahadlok nga inyong masinati isip usa ka indibidwal) kamo tingali mahibulong na hinuon ug maglibog.…

Walay mas dako ug mas mahimayaon nga han-ay sa mga saad nga gihatag sa mga babaye kaysa niadtong moabut tungod sa ebanghelyo ug sa Simbahan ni Jesukristo. Asa pa man diay kamo makat-on kinsa gayud kamo sa tinuoray? Asa pa man kamo mahatagan sa gikinahanglan nga mga pagpasabut ug mga pagseguro kalabut sa kinaiyahan sa kinabuhi? Gikan sa unsa pang ubang tinubdan kamo makat-on kalabut sa inyong kaugalingong katalagsaon ug pagkatawo? Gikan kang kinsa kamo makat-on sa mahimayaong plano sa kalipay sa atong Amahan sa Langit?¹⁸

Ang matarung nga mga babaye mahimong dungganang mga tigsalmot sa kalibutan ug sa gingharian sa Dios.

Wala pa gayuy panahon sa kalibutan nga ang tahas sa babaye nahimong mas makalibog. Wala pa gayuy panahon sa Simbahan nga ang mga babaye nakahimo og mas daghan aron pagpakita unsa ang ilang tinuod nga tahas sa kalibutan ug angay nga mahimo. Ang sangputanan ug ang impluwensya sa mga babaye ug sa mga inahan sa atong kalibutan mao ang pinakaimportante. Ang hunahuna nga “ang kamot nga nagtabyog sa duyan momando sa kalibutan” mas labaw nga tinuod karon kaysa sa kaniadto.¹⁹

Unsa ka espesyal kini para sa mga babaye sa Santos sa Ulahing Adlaw nga gihatagan og mahinungdanong mga buluhaton nga gihatag kanila sa atong Amahan sa Langit, ilabi na kaninyo nga gihatagan og kahigayunan nga matawo niini nga panahon sa katapusang dispensasyon. Pasagdi lang ang ubang mga babaye nga maningkamot og maayo … sa ilang hakog nga mga katuyoan. Kamo ang gikinahanglan kaayo nga puwersa para sa gugma ug kamatuoran ug pagkamatarung niini nga planeta.…

… Akong mahal nga mga sisters, mosugyot ako kaninyo og usa ka butang nga wala pa masulti kaniadto sa ingon niini nga paagi. Ang dakong pagtubo nga moabut sa Simbahan sa katapusang mga adlaw moabut tungod kay daghang buotang mga babaye sa kalibutan (kang kinsa adunay may labaw ka sensitibong pagbati nga espirituhanon) ang mapaduol sa Simbahan sa tumang kadaghan. Kini mahitabo sa kahimtang nga ang mga babaye sa Simbahan moaninaw sa pagkamatarung ug sa ilang pagkamaayo og abilidad sa pagpahayag sa ilang mga kaugalingon ug sa kahimtang nga ang mga babaye sa Simbahan makita nga talagsaon ug lahi––sa malipayong paagi––gikan sa mga babaye sa kalibutan.… Busa mao kana nga ang babayeng mga ehemplo sa Simbahan nga mahimong mahinungdanong kusog sa gidaghanon ug sa espirituhanong pagtubo sa Simbahan niining katapusang mga adlaw.…

Gihigugma namo kamo mga sisters. Aduna kami pagsalig kaninyo. Kami nalipay sa inyong debosyon. Kami natandog gayud pag-ayo sa inyong presensya … nga kabahin niining dispensasyon diin ang inyong mga talento ug espirituhanong kalig-on gikinahanglan kaayo.²⁰

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Ribyuha ang istorya sa pahina 268 ug sa unang paragrap sa pahina 269. Unsa ang mga makadasig nga mga istorya nga moabut sa inyong hunahuna mahitungod sa mga babaye sa inyong pamilya ug sa Simbahan?
Pagtuon sa ikatulong tibuok nga paragraph sa pahina 272. Sumala sa ilang managlahing mga kinaiyahan ug mga responsibilidad, sa unsang paagi nga ang mga lalaki ug mga babaye makatabang sa usag usa? Sa unsang paagi nga sila magkatinabangay isip managkauban diha sa pamilya? diha sa Simbahan?
Ngano nga ang matarung nga babaye karon hilabihan ka importante ug usa ka “dungganong tawag”? (pahina 272). Sa unsang mga paagi nga ang kalibutan naningkamot sa pagpatipas sa mga babaye gikan sa ilang tawag? Sa unsang paagi kita makatabang sa batan-ong mga lalaki ug mga babaye nga mopasalamat niining dungganong tawag?
Samtang kamo mobasa sa pahina 274 ug ang unang tulo ka mga paragrap sa pahina 275, palandonga unsa ang gisulti niini nga mga pagtulun-an kalabut sa gugma sa Amahang Langitnon para sa tanan Niyang mga anak.
Unsa ang pipila ka mga paagi nga ang mga babaye sa Simbahan makatuman sa ilang balaanong potensyal? (Tan-awa sa mga pahina 275–276.) Unsaon sa mga lalaki sa Simbahan pagsuporta sa mga paningkamot sa mga babaye sa Simbahan? (Tanawa sa mga pahina 271–272.)
Palandonga ang paragrap nga magsugod sa ilalum sa pahina 279. Unsa ang nakapadani kaninyo niini nga pamahayag? Sa unsang paagi niining panagna kalabut sa pagtubo sa Simbahan ang natuman na karon?

May Kalabutan nga mga Kasulatan: Mga Proverbio 31:10–31; Mga Taga-Efeso 5:22–29; Alma 56:41–48; D&P 25:1, 5–10; Moises 3:18, 21–25

President and Sister Kimball — Si Presidente Spencer W. Kimball ug iyang asawa, si Camilla.

mother teaching children — “Ang pagkainahan usa ka balaang tawag, usa ka sagrado nga halad aron pagpatuman sa buhat sa Ginoo.”

woman praying — Walay mas dako ug mas mahimayaon nga han-ay sa mga saad nga gihatag sa mga babaye kaysa niadtong moabut tungod sa ebanghelyo ug sa Simbahan ni Jesukristo.