Hugna 22

Pagpadayag: “Usa ka Mapadayonong Huni ug usa ka Naglanoglanog nga Pangamuyo”

Ang mapadayonong pagpadayag maoy mahinungdanong elemento sa ebanghelyo ni Jesukristo.

Gikan sa Kinabuhi ni Spencer W. Kimball

Si Presidente Spencer W. Kimball sa makausa misulti sa usa ka komperensya sa medya nga gihimo didto sa Arizona Temple Visitors’ Center. Usa ka reporter sa mga balita nangutana kaniya: “Gipaila ikaw isip presidente sa Ang Simbahan ni Jesukristo sa mga Santos sa Ulahing mga Adlaw ug usab isip usa ka propeta. Ang akong pangutana mao: Nakigsulti ba ang Dios kanimo? Ug kon mao, sa unsa nga paagi?” Si Presidente Kimball mitubag: “Oo. Ang Dios makigsulti sa iyang mga propeta karon, sama sa iyang pakigsulti sa mga propeta kaniadto ug ingon man siya makigsulti kanila sa umaabut nga mga adlaw. Imong mahinumduman nga si Amos misulat, ‘Sa pagkatinuod ang Dios dili magbuhat sa bisan unsa, gawas kon ang iyang tinago ipadayag niya sa iyang mga alagad ang mga manalagna.’ (Amos 3:7.) Usahay mosulti siya uban sa madungog nga tingog. Usahay mopadala siya sa iyang mga anghel, pareha sa iyang gibuhat ngadto ni Jose, ang ama-ama ni Jesus. Kasagaran kini pinaagi sa ligdong hinay nga tingog sa Dios ngadto sa espiritu diha sulod kanimo. Mao kana. Natubag ba nako ang imong pangutana, dong?”¹

Si Presidente Kimball misalig sa baruganan sa mapadayunong pagpadayag, mipahayag nga kadto ang “mahinungdanong elemento sa ebanghelyo sa buhing Ginoo ug Manluluwas, nga si Jesukristo.”² Kini nga pagsalig, miingon si Elder Neal A. Maxwell sa Korum sa Napulog Duha ka mga Apostoles, “klaro nga kabahin sa kinaiya niining espesyal kaayo nga tawo.”³ Si Presidente Kimball seryosong midawat sa iyang responsibilidad isip Presidente sa Simbahan, nasayud nga siya lamang ang tawo sa yuta kinsa gitugutan sa pagdawat sa pagpadayag alang sa Simbahan. Siya mipamatuod: “Nahibalo ako nga ang Ginoo mitawag kanako niini nga katungdanan. Nahibalo ako nga adunay mas maayong mga propeta, kay kanako, pero buot ako mobuhat sa tanan nakong mahimo sa pagpadayon sa buhat sa Ginoo ingon sa iyang buot nga kini mabuhat. Kada gabii ug buntag magluhod ako ug mag-ampo sa tibuok kasingkasing nga ang Ginoo modasig kanako ug mopadayag kanako sa direksyon nga kinahanglan akong subayon ug unsa ang kinahanglan nakong isulti sa katawhan niini nga Simbahan.”⁴

Sa tibuok niyang pagserbisyo isip Presidente sa Simbahan, nakadawat siya og mga pagpadayag aron paggiya sa mga Santos. Ang labing naila sa tanan niini nga mga pagpadayag miabut niadtong Hunyo 1978, sa dihang ang Ginoo mipadayag ngadto kaniya ug ngadto usab sa iyang mga kaigsoonan sa Unang Kapangulohan ug sa Korum sa Napulog Duha ka mga Apostoles nga ang mga panalangin sa priesthood, diin gidili sa uban, mahimo na karon nga maangkon sa tanang takus nga mga miyembro sa Simbahan (tan-awa sa Doktrina ug mga Pakigsaad, Opisyal nga Pahayag 2). Kini nga pagpadayag miabut human sa dugay nga mga katuigan diin ang ubang mga Presidente sa Simbahan namalandong ug nag-ampo kalabut niini nga butang.

Sa publiko, si Presidente Kimball wala mohisgot og dugay kalabut niini nga pagpadayag. Pero mihatag siya og mubong pahayag sa iyang mga pagpangandam sa pagdawat niini, ug matag karon ug unya mopaambit sa iyang nga gibati kalabut niini:

“Nasayud ako nga adunay usa ka butang sa among atubangan nga importante kaayo sa kadaghanan sa mga anak sa Dios. Nasayud ako nga madawat lamang nato ang mga pagpadayag sa Ginoo pinaagi sa pagpakatakus ug pagkaandam alang niini ug andam nga modawat niini ug pagpahimutang niini sa hustong pagkahimutang. Kada adlaw nag-inusara akong moadto ug uban sa dakong kabalaan ug kaligdong didto sa ibabaw nga mga kwarto sa templo, ug didto akong gihalad ang akong kalag ug gihalad ang akong mga paningkamot sa pagpadayon sa programa. Buot ako nga mobuhat unsa ang iyang buot ipabuhat. Nakigsulti ako kaniya kalabut niini ug miingon, ‘Ginoo, buot lamang ako nga mobuhat unsa ang husto. Wala kami maghimo og bisan unsa nga mga plano nga daw mapasundayagong makahaylo. Buot lamang kami sa mga butang nga pagbuot nimo, ug buot kami niini kon imong pagbuot ug dili hangtud nga ikaw magbuot.’ ”⁵

“Kami karon nga inyong gipaluyohan isip mga propeta, mga manalagna ug mga tigpadayag mibati ingon sa gibati sa unang mga kaigsoonan niadtong tingpamulak sa 1978 sa dihang ang pagpadayag miabut nga nagpahayag ‘nga ang mga Hentil kinahanglan mga isig ka manununod … ug tig-ambit sa iyang saad ni Kristo pinaagi sa ebanghelyo’ (Mga Tag-Efe. 3:6). Kini mao ang butang, nga si Pablo miingon, ‘diin sa ubang kapanahonan wala ipahayag sa mga anak sa tawo, sama sa gipadayag kini karon ngadto sa balaang mga apostoles ug mga propeta pinaagi sa Espiritu’ (Mga Taga-Efe. 3:5).

“May mahimayaon kaming kasinatian nga ang Ginoo klaro nga mipahayag nga ang panahon miabut na nga ang tanang takus nga mga lalaki ug mga babaye bisan asa mahimong isig ka manununod ug tig-ambit sa hingpit nga mga panalangin sa ebanghelyo. Buot ako nga kamo masayud, isip usa ka espesyal nga saksi sa Manluluwas, kon unsa ang akong gibati nga kaduol kaniya ug sa atong Langitnong Amahan samtang mihimo ako og daghang mga pagbisita didto sa ibabaw nga kwarto sa templo, moadto sa makadaghang higayon sa ubang mga adlaw nga naginusara. Giklaro kaayo sa Ginoo ngari kanako unsa ang angay nga buhaton. Wala kami magpaabut nga ang katawhan sa kalibutan makasabut sa maong mga butang, tungod kay sila dali ra kaayong makahatag sa ilang kaugalingong mga rason o ibale wala ang balaang proseso sa pagpadayag.”⁶

Agi og dugang sa pagpamatuod nga ang pagpadayag mogiya sa mga desisyon sa mga lider sa Simbahan, si Presidente Kimball mitudlo nga kitang tanan makadawat og pagpadayag aron paggiya sa atong mga kinabuhi ug sa paglig-on sa atong mga responsibilidad. Miingon siya, “Ang panalangin sa pagpadayag mao ang usa ka butang kinahanglang pangitaon sa tanan.”⁷

Mga Pagtulun-an ni Spencer W. Kimball

Ang Dios nga Amahan ug si Jesukristo matinguhaong makigsulti sa katawhan.

Adunay miingon nga nagpuyo kita sa panahon nga ang Dios, kon aduna may Dios, mipili nga magpakahilum, pero Ang Simbahan ni Jesukristo sa mga Santos sa Ulahing mga Adlaw mipahayag sa kalibutan nga ang Amahan ug ang Anak wala magpakahilum. Madungog sila ug makigsulti tungod kay angay ug gikinahanglan, ug kanunay nga mopahayag sa pagkaandam, sa matinguhaon gayud, sa pagpabilin nga dunay komunikasyon ngadto sa mga tawo.⁸

Usa ka batid sa teyolohiya [theologian] mipadayag nga imposible alang sa tawo sa pag-ila sa Dios o pagkahibalo sa Dios. Kini sama ra nga moingon: “Wala gayud ako sukad makakatkat sa Mt. Ararat––wala gayuy usa nga makakatkat sa Ararat; o, wala gayud ako sukad makaligo sa tin-aw nga init-init nga mga tubig sa Adriatic––walay Adriatic Sea; o, wala gayud ako makakita sa lasangnong kinabuhi sa Kruger Park––walay Kruger Park; o, kanunay gayud akong himsog––mao nga, ang sakit nga giingon sa mga tawo, mga tipik lang sa ilang mga imahinasyon. Wala gayud ako makalakaw sa kapunawpunawan; mao nga, walay usa nga makalapas saylo sa kapunawpunawan.”

Mao nga kalain gayud kon moingon nga wala ako makadungog ni makakita sa Dios––busa, wala gayuy tawo nga sukad nakakita ni nakadungog sa Dios ni milakaw uban Kaniya. Pagkamapangahason ug pagkaarogante para ni bisan kinsa nga tawo nga moingon nga ang Dios dili maduol, wala ilhi, dili makita, dili madungog tungod kay kana nga tawo mismo wala makaandam sa iyang kaugalingon alang sa kasinatian.⁹

Angay nga hinumduman nga ang Dios dili makit-an pinaagi sa pagsiksik lamang, ni ang iyang ebanghelyo masabtan ug mapasalamatan pinaagi sa pagtuon lamang, tungod kay walay usa nga mahimong makaila sa Amahan o sa Anak pero “kaniya kang kinsa igakahimuot sa Anak ang pagpadayag kaniya.” (Lucas 10:22.) Ang tawo nga maduhaduhaon usa ka adlaw niana sa usa ka panahon o sa kahangturan magul-anong makakat-on nga ang iyang garbo mikuha kaniya sa iyang dakong kalipay ug pagtubo.¹⁰

Malipayon kita nga nakahibalo nga ang Dios niini nga kalibutan maoy usa ka Dios sa pagpadayag. Ang atong Ginoo makigsulti sa iyang hunahuna ug kabubut-on ngadto sa iyang mga anak sa yuta. Kon mosiksik kita niini, mopadayag siya sa iyang kaugalingon og labaw pa ug sa mas dako ug labaw nga kahingpit, ug makasabut kita kaniya ingon man nga kini posible sa mortal nga tawo nga makasabut sa Dios. Dili kita makasimba sa usa ka linalang nga atong kaugalingong hinimo o sa mga hinanduraw sa atong mga hunahuna. Mosimba kita sa usa ka linalang kinsa buhi, kinsa milalang, kinsa makigsulti kanato sa iyang kinaiya ug sa iyang mga hiyas ug sa kahalangdon sa iyang pagkatawo.¹¹

Dili ang Amahan nga si Elohim ni ang Anak nga si Jehovah mopahimulag sa iyang kaugalingon gikan sa mga anak sa tawo. Kini sila, ang mga tawo, maoy mipalayo sa ilang mga kaugalingon kon ugaling aduna may mga panagbulag. Ang Amahan ug ang Anak malipay nga makigsulti ug makig-uban sa mga tawo.…

… Bisan pa man sa tanang dios-dios nga gihimo sa mga tawo gihimo alang sa ilang mga kaugalingon ug sa pagkalibug nga may kalabutan niana, ang Buhi ug ang Tinuod nga Dios anaa sa langit ug maanaa alang sa iyang mga anak.¹²

Samtang ang ubang mga pagpadayag katingalahan, kadaghanan niini moabut nga tulugkaron nga mga impresyon sa hunahuna ug sa kasingkasing.

Sa atong panahon karon, ingon man sa miaging panahon, daghang mga tawo nagpaabut nga kon duna man ugaling pagpadayag kini moabut uban sa makapatingalang kadasig, mga pagpakita nga makapakurog sa kalibutan. Alang sa kadaghanan kini lisud dawaton isip pagpadayag kadtong daghan kaayong mga panghitabo sa panahon ni Moises, sa panahon ni Joseph, ug sa atong kaugalingong panahon––kadto nga mga pagpadayag nga miabut sa mga propeta ingon nga tulugkaron, dili mabangbang nga mga impresyon nga miabut sa hunahunua sa mga propeta ug sa kasingkasing sama sa yamog nga gikan sa langit o sama sa kaadlawon nga nag-abug sa kangitngit sa kagabhion.

Nagpaabut sa katingalahan, ang usa ka tawo mahimong dili hingpit nga makabantay sa makanunayong pagdagayday sa gipadayag nga komunikasyon. Moingon ako, sa tumang pagpaubos, pero ingon man usab pinaagi sa gahum ug kusog sa nagdilaab nga pagpamatuod sa akong kalag, nga gikan sa propeta sa Pagpahiuli ngadto sa propeta sa atong kaugalingong panahon, ang linya sa komunikasyon wala maputol, ang awtoridad mapadayonon, usa ka kahayag, masanagon ug matuhopon, nagpadayon sa pagdan-ag. Ang tunog sa tingog sa Ginoo maoy usa ka mapadayonong huni ug naglanoglanog nga pangamuyo.¹³

Ang pagpadayag wala kanunay magpasabut nga “paglakaw uban sa Dios,” ni “pakig-atubang,” ni “sa ngabil ngadto sa dunggan.” Adunay daghang matang sa pagpadayag––ang uban mas katingalahan ug ang uban dili kaayo.¹⁴

Ang ubang pagpadayag moabut pinaagi sa mga damgo. Kadaghanan sa atong mga damgo mabalhinon ug walay kahulugan, pero ang Ginoo mogamit og mga damgo alang sa paglamdag sa iyang katawhan.… Si Nabucodonosor adunay usa ka damgo. (Tan-awa sa Daniel 2.) Gamhanan kaayo kadto nga kini iyang nakalimtan, pero si Daniel miabut ug mipahinumdom sa hari sa iyang damgo ug mihatag sa interpretasyon. Ang Ginoo mipahibalo niini ni Daniel alang sa usa ka piho nga rason.

Adunay damgo si Pedro diin iyang nakita ang usa ka habol nga gikan sa langit nga napuno sa tanang mga mananap ug mga hayop, ug kadto adunay piho kaayo nga kahulugan. (Tan-awa sa Mga Buhat 10:9–35.)…

Si Pablo sa iyang dakong kasinatian adunay susama nga matang sa pagpadayag pinaagi sa damgo. “Ug usa ka panan-awon mipakita ni Pablo sa gabii.” Ug nakadawat siya og mga panudlo nga gikinahangalan alang kaniya ug alang sa gingharian. (Mga Buhat 16:9.)…

Adunay laing katingalahan nga mga pagpadayag nga gihisgutan. Adunay pagtunga ni Moroni, usa ka indibidwal, usa ka nabanhaw nga tawo, sa pagpahibalik sa mahinungdanong rekord sa mga karaang tawo sa Amerika ug sa pagpahiuli sa ebanghelyo.…

Dayon miabut si Juan Bautista kinsa giputlan sa ulo sa hari usa ka higayon sa kahuyang … [dayon] sila si Pedro, Santiago ug Juan.… Busa miabut kadto, sa hinayhinay, ang pagpahiuli sa tanan, ug kini miabut pinaagi sa pagpadayag, pinaagi sa pananawon, pinaagi sa mga damgo, o pinaagi sa tulugkaron nga impresyon.

Karon, ang tanang mga pagpadayag sa balaang mga kasulatan wala moabut pinaagi sa katingalahan nga mga pagpakita. Samtang kamo magbasa sa Daang Tugon, inyong mahibaloan nga ang Ginoo nakigsulti. Misulti Siya ngadto ni Isaias, ni Jeremias, ug sa uban, pero kadto dili kanunay nga personal nga mga pagpakita. Sama kadto sa kasinatian ni Enos, kay samtang kamo magbasa sa basahon ni Enos diha sa Basahon ni Mormon, nagpuasa siya ug nag-ampo ug nagsiksik ug nangayo og mga impormasyon ug ilabi na sa kapasayloan sa iyang mga sala: “Ug samtang ako nakigbisog diha sa espiritu, tan-awa, ang tingog sa Ginoo midangat sa akong hunahuna pag-usab, nag-ingon:… “ (Enos 1:10.) Niana nga kahimtang, daghan kaayong mga pagpadayag ang midangat.

Busa ang pagpadayag miabut: usahay uban sa personal gayud nga pagpakita sa langitnong mga linalang.… Pero kadaghanan sa mga pagpadayag ni Propeta Joseph Smith sa iyang balaan nga rekord, ang Doktrina ug mga Pakigsaad, wala moabut niana nga kahimtang. Sila midangat isip tulugkaron nga mga impresyon.¹⁵

Kadaghanan sa narekord nga mga pagpadayag sa Doktrina ug mga Pakigsaad ug sa Biblia mga tulugkaron nga pagbati ug usa ka makapadasig nga pahimatngon nga pagtudlo gikan sa kahitas-an. Kini ang matang sa pagpadayag nga ang mga indibidwal kasagaran aduna alang sa ilang kaugalingon nga mga panginahanglan.¹⁶

Usahay dili nato mailhan ang mga [pagpadayag] kon kini moabut. Mag-ampo kita kanunay alang sa kaalam ug paghukom ug dayon atong bation nga kinahanglan kita mosubay niini nga direksyon. Diha niana adunay pagpadayag. Ang Ginoo mitubag niini nga mga pangutana nga inyong gitanyag.¹⁷

Unsa kaha nga pinulongan nga gamiton sa Ginoo? Pinaagi ni Propeta Joseph Smith, ang Ginoo mitambag ni Oliver Cowdery, kinsa naglibog kalabut sa usa ka tubag sa iyang mga pag-ampo:

“Sa pagkatinuod, sa pagkatinuod, ako moingon nganha kaninyo, kon ikaw nagtinguha og dugang nga kamatuoran, hinumdumi ang gabii nga ikaw misangpit kanako diha sa imong kasingkasing, nga ikaw unta mahibalo mahitungod sa kamatuoran niini nga mga butang.

“Wala ba ako magsulti og kalinaw nganha sa imong hunahuna mahitungod niini nga butang? Unsa ka labaw nga kamatuoran ang imong maangkon kay sa gikan sa Dios?” (D&P 6:22–23.)¹⁸

Pinaagi sa buhing mga propeta, ang Ginoo mopadayag sa Iyang kabubut-on alang sa Simbahan.

Sa tanang mga butang, nga kita kinahanglan nga labing mapasalamaton karon mao nga ang mga langit sa tinuoray naabli na gayud ug nga ang gipahiuli nga simbahan ni Jesukristo natukod diha sa bato sa pagpadayag. Ang nagpadayon nga pagpadayag sa pagkatinuod mao ang mismong dugo sa kinabuhi sa ebanghelyo sa buhing Ginoo ug Manluluwas, nga si Jesukristo.¹⁹

Ang mahinungdanon ug bililhon nga mga rekord sa karaang Amerika, uban sa mga pagtulun-an ni Kristo, laing pagpamatuod sa iyang kabalaan, naghan-ay sa Basahon ni Mormon, diin kita mipahayag nga balaang kasulatan, kauban ug nagpaluyo sa Biblia.

Sukad sa [Unang Panan-awon ni Joseph Smith] niadtong 1820, dugang mga kasulatan nagpadayon sa pag-abut, lakip na ang daghan ug mahinungdanong mga pagpadayag nga nagdagayday sama sa walay katapusang nag-agas nga sapa gikan sa Dios ngadto sa iyang mga propeta sa yuta. Daghan niini nga mga pagpadayag narekord sa laing kasulatan nga gitawag og Doktrina ug mga Pakigsaad. Mikompleto sa atong mga kasulatan sa mga Santos sa Ulahing mga Adlaw mao ang Perlas nga Labing Bililhon, laing rekord sa pagpadayag ug gihubad nga mga sinulat sa karaan ug sa modernong mga propeta.

Adunay mga nagdahum nga sa pag-imprinta ug pagkahimo nga libro niining sagrado nga mga rekord, kana mao na ang “katapusan sa mga propeta.” Pero mopamatuod na usab kami sa kalibutan nga ang pagpadayag nagpadayon ug ang mga lungibtipiganan (vault) ug mga papeles sa Simbahan naglakip niini nga mga pagpadayag nga moabut kada bulan ug kada adlaw. Kami mopamatuod usab nga aduna, sukad niadtong 1830 sa dihang ang Simbahan ni Jesukristo sa mga Santos sa Ulahing mga Adlaw naorganisar, ug magpadayon kini, kutob sa panahon nga molungtad, usa ka propeta, nga giila sa Dios ug sa iyang mga tawo, kinsa magpadayon sa paghubad sa hunahuna ug kabubut-on sa Ginoo.²⁰

Samtang …, human sa pag-ampo ug pagpuasa, importanting mga desisyon ang gihimo sa mga [lider sa Simbahan], bag-ong mga misyon ug bag-ong mga stake gihimo, bag-ong mga sumbanan ug mga palisiya gisugdan, ang mga balita gibale wala ug gani gihunahuna isip usa lang ka tawhanong mga pagbanabana. Pero niadtong naglingkod diha sa gamay nga pundok ug naminaw sa mga pag-ampo sa propeta ug sa pagpamatuod sa tawo sa Dios; alang niadtong nakakita sa pagkamaalamon sa iyang pagtimbang-timbang ug sa kahait sa panabut sa iyang mga desisyon ug mga pagpahibalo, alang kanila siya sa pagkatinuod usa ka propeta. Sa pagpaminaw kaniya sa pagtapos og bag-ong mga kalamboan uban sa maong solemne nga mga pagpamahayag sama sa “ang Ginoo nahimuot”; “kana nga desisyon husto”; “ang atong Langitnong Amahan nagsulti,” maoy nindot nga masayran.²¹

Ang mga pagpadayag wala mohunong ug dili gayud mohunong. Kini nga gingharian sa Dios gipahimutang alang sa nahabiling panahon, dili na gayud magun-ob ni ihatag sa laing mga tawo. Kini magpadayon nga programa ug motubo hinuon kaysa mawala. Ang mga doktrina niini maayo kaayong pagkaestablisar, gani tungod sa pagtubo ug paglapad, ang gipalambo nga mga paagi gihatag aron pagtudlo sa ebanghelyo sa tibuok kalibutan. Dugang nga mga sulugoon gitawag tungod sa nagkadaghan nga buhat alang sa nagkadako nga kalibutan. Ang pagpadayag ug ubang mga milagro dili gayud mohunong gawas kon ang pagtuo mohunong. Kon adunay igong pagtuo, kining mga butanga magpadayon.

Ang propeta nga si Mormon mipasidaan: “Oo, alaot ngadto kaniya nga molimud sa mga pagpadayag sa Ginoo, ug moingon nga ang Ginoo dili na mobuhat pinaagi sa pagpadayag, o pinaagi sa mga panagna, o pinaagi sa mga gasa, o pinaagi sa pinulongan, o pinaagi sa mga pang-ayo, o pinaagi sa gahum sa Espiritu Santo!” (3 Ne. 29:6.)²²

Magpamatuod ako nga ang Simbahan magpadayon pinaagi sa mga pagpadayag sa Dios ngadto sa iyang balaang gitawag nga mga lider. Ang Labaw nga Makagagahum anaa uban niini nga mga tawo.²³

Kon kita mohupot sa mga sugo, mopakita og hugot nga pagtuo, ug sinserong mag-ampo, mopasarang kita sa atong mga kaugalingon sa pagdawat og personal nga pagpadayag.

Ang panalangin sa pagpadayag maoy usa ka butang nga kinahanglan pangitaon sa tanan. Ang matarung nga mga lalaki ug mga babaye nakakaplag nga ang espiritu sa pagpadayag anaa kanila aron mogiya sa ilang mga pamilya ug moabag kanila sa ilang ubang mga responsibilidad. Pero … mosiksik gyud kita aron mahimong sarang sa maong pagpadayag pinaagi sa pagpahimutang nga han-ay ang atong mga kinabuhi ug paghimo nga makaila sa Ginoo pinaagi sa atong kanunay ug naandan nga pagpakigsulti kaniya.²⁴

Ang Ginoo dili mopugos sa iyang kaugalingon diha sa mga tawo; ug kon dili sila motuo, dili sila pagabisitahon. Kon sila kontento nga modepende sa ilang kaugalingong limitado nga mga pangagpas ug mga interpretasyon, nan, dayag na lang, nga pasagdan sila sa Ginoo sa ilang gipiling kapalaran.…

… Ang samang mga pagpadayag, mga panan-awon, mga pangayo, ug mga pinulongan anaa karon ingon man sa bisan unsang panahon, basta anaa ang gikinahanglang pagtuo.²⁵

Ang Makagagahum anaa uban niini nga mga tawo. Makadawat kita sa tanang mga pagpadayag nga atong gikinahanglan kon kita mobuhat sa atong katungdanan ug mohupot sa mga sugo sa Dios.…

Hinumdumi:

Kon aduna may mata aron makakita, nan adunay mga pananawon aron modasig.

Kon aduna may dalunggan aron maminaw, nan adunay mga pagpadayag aron masinati.

Kon aduna may kasingkasing nga makasabut, hibaloi kini: nga ang makapabayaw nga mga kamatuoran sa ebanghelyo ni Kristo dili na kini itago ug misteryoso, ug ang tanang makugihong tigsiksik mahimong makaila sa Dios ug sa iyang plano.²⁶

Kay gihatagan man sila sa ilang kabubut-on, ang ilang Langitnong Amahan modani ug mogiya sa iyang mga anak, pero maghulat sa ilang mga pagpangaliya, sa ilang mga pag-ampo, sa ilang sinsero nga pagduol kaniya.…

Ang Ginoo matinguhaong motan-aw sa ilang unang nahigmatang mga tinguha ug sa ilang nasugdan nga mga paningkamot sa pagbuntog sa kangitngit. Kay gihatagan man sa kagawasan sa pagdesisyon, motugot siya sa tawo sa pagpangita sa iyang agianan hangtud siya makaabut sa kahayag. Pero kon ang tawo gutumon na, kon ang iyang mga bukton magsugod na sa pagkab-ot, kon ang iyang mga tuhod magsugod na sa pagluhod ug ang iyang tingog makapadayag na, nan, ug diha dayon niana ang atong Ginoo motulod sa kawanangan, moabli sa tabil, ug mopalingkawas sa mga tawo gikan sa kangitngit sa pipila ka babag ngadto sa kasiguroan, ngadto sa langitnong kahayag.²⁷

Kon ang usa ka tawo mobarug gikan sa iyang pag-ampo nga igo lang nagyamayama og mga pulong, kinahanglan mobalik siya og luhod ug magpabilin hangtud makaestablisar og komunikasyon diha sa Ginoo kinsa matinguhaon kaayo nga mopanalangin, pero kay gihatagan man ang tawo sa iyang kagawasan sa pagpili, dili mopugos sa iyang kaugalingon diha niana nga tawo.²⁸

Gusto ba kamo og paggiya? Nag-ampo ba kamo sa Ginoo alang sa inspirasyon? Gusto ba kamong mobuhat og matarung o buot ba kamong mobuhat unsa ang inyong gustong buhaton, husto ba kini o dili? Gusto ba kamong mobuhat og pinakamaayo alang kaninyo sa katapusan o hain ang mas nindot kay sa karon lang? Nag-ampo ba kamo? Kapila kamo nag-ampo? Giunsa ninyo pagampo? Nag-ampo ba kamo sama sa pag-ampo sa Manluluwas sa kalibutan didto sa Getsemani o nangayo ba kamo kon unsa ang inyong gusto wala igsapayan kon angay ba kini? Gisulti ba ninyo sa inyong mga pag-ampo: “Ang imong pagbuot ang matuman”? Misulti ba kamo nga, “Langitnong Amahan, kon imo akong dasigon ug mopabati kanako sa husto, akong buhaton ang matarung”? O, nag-ampo ba kamo, “Ihatag kanako ang akong gusto o total kuhaon ko man gyud kini”? Miingon ka ba: “Amahan sa Langit, nahigugma ako kanimo, mituo ako kanimo, kahibalo ako nga ikaw nasayud sa tanan. Matinuoron ako. Sinserong matinguhaon ako sa pagbuhat og matarung. Nasayud ako nga makakita ikaw sa katapusan gikan sa sinugdanan. Makakita ikaw sa umaabut. Makatino ikaw kon uban niini nga kahimtang sa akong pagpresentar, makabaton ako og kalinaw o kagubot, kalipay o kaguol, kalampusan o kapakyasan. Sultihi ako, palihug, hinigugmang Langitnong Amahan, ug akong isaad nga buhaton ko unsa ang imong ipabuhat kanako.” Nag-ampo ba kamo nianang paagiha? Wala ba kamo magtuo nga malagmit maalamon kini? Aduna ka bay igong kaisug sa pag-ampo sa ingon?²⁹

Ang Ginoo mohatag kaninyo sa tubag sa inyong mga pangutana ug sa inyong mga pag-ampo kon kamo maminaw. Dili kinahanglan nga kining tanan moabut pinaagi sa propeta.… Pero ang tanang tawo, kon sila adunay igong katakus ug duol kaayo sa Ginoo, mahimong makabaton og mga pagpadayag.³⁰

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Ribyuha ang asoy ni Presidente Kimball nga midawat sa 1978 nga pagpadayag kabahin sa priesthood (mga pahina 296–297). Samtang ang ubang mga aspeto sa kasinatian ni Presidente Kimball lahi niana nga pagpadayag, unsa nga mga aspeto sa iyang kasinatian nga komon sa tanan natong mga paningkamot aron pagdawat og pagpadayag? Sa unsang paagi nga makasunod kita sa iyang ehemplo?
Ribyuha ang seksyon nga nagsugod sa pahina 297. Unsa ang inyong isulti sa usa ka higala kinsa mosulti nga ang Dios nagpakahilum? Unsa nga mga kasulatan o mga kasinatian nga ikapaambit ninyo sa inyong higala?
Unsa ang ubang mga paagi nga ang pagpadayag mahimong moabut? (Alang sa ubang mga ehemplo, tan-awa sa mga pahina 299–302.) Si Presidente Kimball mitudlo nga kadaghanan sa mga pagpadayag moabut isip usa ka tulugkaron nga impresyon kaysa katingad-an nga mga pagpakita. Unsaon nato pag-ila kon ang usa ka hunahuna o pagbati gikan sa Ginoo? (Tan-awa sa pahina 302.)
Nganong nagkinahanglan kita og buhing mga propeta agi og dugang sa mga kasulatan? (Alang sa pipila ka mga ehemplo, tan-awa sa mga pahina 302–304.) Sa unsang paagi kamo napanalanginan pinaagi sa mga pagpadayag sa Presidente sa Simbahan?
Unsa nga tambag ang inyong mahatag sa usa ka tawo kinsa nagtinguha sa paggiya gikan sa Ginoo? (Tan-awa sa mga pahina 304–307.)

May Kalabutan nga mga Kasulatan: 1 Mga Hari 19:9–12; Moroni 10:3–5; D&P 1:38; 8:2–3; 43:1–4; 76:5–10