Mësimi 3 Materiali i Përgatitjes së Orës Mësimore

Natyra Jonë Hyjnore dhe Fati Ynë Hyjnor

Disa nga pyetjet më të rëndësishme që kemi në jetë, lidhen me origjinën dhe fatin tonë – kush jemi në të vërtetë dhe cili është potenciali ynë. Teksa e studioni këtë mësim, merrni parasysh se si e trajtoni veten dhe se si i trajtoni të tjerët. Si mund të ndryshojë kjo, në qoftë se e kujtoni gjithmonë natyrën tuaj hyjnore dhe fatin tuaj hyjnor?

Pjesa 1

Kush jam unë?

Profeti Jozef Smith dha mësim: “Nëse njerëzit nuk e kuptojnë karakterin e Perëndisë, ata nuk kuptojnë vetveten” (Mësimet e Presidentëve të Kishës: Jozef Smith [2009], f. 42). Shkrimet e shenjta ofrojnë një dëshmi të fuqishme rreth faktit se kush është Perëndia dhe cila është marrëdhënia jonë me Të.

Studioni në Përgatitje për Orën Mësimore

Lexoni te Veprat e Apostujve 17:29, Hebrenjve 12:9 dhe 1 Gjon 3:2, duke kërkuar se kush është Perëndia dhe çfarë mund të mësojmë rreth marrëdhënies sonë me Të.

Presidenti Diter F. Uhtdorf, në atë kohë i Presidencës së Parë, dha mësim këtë rreth marrëdhënies sonë me Perëndinë:

Ne jemi krijuar nga Perëndia i Plotfuqishëm. Ai është Ati ynë Qiellor. Ne jemi me të vërtetë fëmijët e Tij shpirtërorë. Ne jemi bërë nga një lëndë qiellore, më e çmuara dhe tepër e përpunuar, dhe si rrjedhojë mbartim brenda vetes lëndën e hyjnueshmërisë.

Megjithatë, këtu në tokë, mendimet dhe veprimet tona ndikohen negativisht nga ajo që është e shthurur, e pashenjtë dhe e papastër. Pluhuri dhe fëlliqësia e botës i njollosin shpirtrat tanë, duke e bërë të vështirë që ta njohim e ta kujtojmë qëllimin dhe natyrën e lindjes sonë.

Por kjo e gjitha nuk mund ta ndryshojë se kush jemi vërtet. Hyjnueshmëria themelore e natyrës sonë mbetet. (“Ai do t’ju Vendosë mbi Supet e Tij dhe do t’ju Çojë në Shtëpi”, Liahona, maj 2016, f. 104)

Shiheni materialin filmik “Your True Identity” (0:29) dhe mendoni rreth faktit se kush jeni dhe nga erdhët.

Profetët dhe apostujt kanë pohuar se “të gjitha qeniet njerëzore – meshkuj dhe femra, janë krijuar sipas shëmbëlltyrës së Perëndisë. Secili prej nesh është një bir ose bijë shpirtërore e dashur e prindërve qiellorë” (“Familja: Një Proklamatë drejtuar Botës”, ChurchofJesusChrist.org). Merreni parasysh se si mësimet vijuese mund ta shtojnë të kuptuarit tuaj rreth prindërve tuaj qiellorë:

Të gjithë burrat e gratë janë në ngjashmëri me Atin dhe Nënën universale dhe janë me kuptimin e plotë të fjalës bij e bija të Hyjnisë. …

Njeriu, si shpirt, u lind nga prindër qiellorë dhe arriti pjekuri në banesat e përjetshme të Atit, para se të vinte në tokë me një trup të përkohshëm [fizik]. (“Gospel Classics: The Origin of Man”, Ensign, shkurt 2002, f. 29, 30)

Presidenti Harold B. Li shpalli: “Ne harrojmë se kemi një Atë Qiellor dhe një Nënë Qiellore që janë akoma më të shqetësuar, ndoshta, se ati ynë dhe nëna jonë tokësore, dhe se ndikimet nga e përtejmja po punojnë vazhdimisht për t’u përpjekur që të na ndihmojnë kur ne bëjmë gjithçka mundemi” [Harold B. Lee, “The Influence and Responsibility of Women”, Relief Society Magazine, shkurt 1964, f. 85]. (Temat e Ungjillit “Nëna në Qiell”, topics.ChurchofJesusChrist.org)

Presidenti M. Rasëll Ballard i Kuorumit të Dymbëdhjetë Apostujve dha mësim gjithashtu: “Së pari dhe para së gjithash, ju jeni dhe do të jeni gjithmonë një fëmijë shpirtëror i Perëndisë” (“Children of Heavenly Father” [takim shpirtëror i Universitetit “Brigam Jang”, 3 mars 2020], f. 2, speeches.byu.edu). Presidenti Uhtdorf dha mësim se e vërteta që ne jemi fëmijët e mirëfilltë shpirtërorë të Perëndisë “[duhet ta] ndrysho[jë] mënyrën se si e shohim veten, vëllezërit dhe motrat tona dhe vetë jetën” (“Katër Tituj”, Liahona, maj 2013, f. 58).

Shënojini Mendimet Tuaja

Në një fletore ose program elektronik për mbajtje shënimesh, jepuni përgjigje njërës ose më shumë prej pyetjeve vijuese:

• Si mund të ndikojë të kuptuarit e natyrës sonë hyjnore te mënyra se si e trajtojmë veten dhe të tjerët? Kur keni pasur një përvojë ku keni qenë në gjendje të shihni përtej sjelljes ose qëndrimit fyes të dikujt dhe të shihni natyrën e tyre hyjnore?

• Cilët janë disa shembuj nga jeta e Shpëtimtarit që tregojnë se Ai e kuptonte natyrën hyjnore të të tjerëve? Në çfarë mënyrash mund ta imitoni Atë më mirë në mënyrën se si i trajtoni të tjerët?

Përgatituni që t’i shprehni disa nga mendimet tuaja në orën mësimore.

Pjesa 2

Çfarë ndryshimi mund të sjellë njohuria se jam fëmijë i Perëndisë?

Merreni parasysh thënien vijuese nga Motra Mishel D. Krejg, këshilltare në Presidencën e Përgjithshme të Të Rejave:

Sa më shumë ta kuptoni identitetin dhe qëllimin tuaj të vërtetë, thellë në shpirt, aq më shumë do të ndikojë te gjithçka në jetën tuaj. (“Sy për të Parë”, Liahona, nëntor 2020, f. 16)

Një përvojë që pati Moisiu pasi bisedoi ballë për ballë me Perëndinë dhe mësoi për natyrën e vet hyjnore e ilustron fuqinë që mund të ketë kjo njohuri për ne.

Studioni në Përgatitje për Orën Mësimore

Lexoni te Moisiu 1:3–6, 12–16, duke kërkuar mënyrën se si u fuqizua Moisiu duke e përqafuar natyrën e vet hyjnore.

Moisiu mposht tundimet e Satanit

Përsiatni në Përgatitje për Orën Mësimore

Mendoni me kujdes rreth mënyrës se si të kuptuarit e pasjes së prindërve hyjnorë dhe të natyrës suaj hyjnore ju ka ndihmuar t’u bëni ballë gënjeshtrave dhe tundimeve të kundërshtarit.

Pjesa 3

Cili është fati im hyjnor?

Merreni parasysh se sa keni mësuar dhe jeni rritur 10 vitet e fundit. Si një bir ose bijë e prindërve qiellorë, ju keni një kapacitet të jashtëzakonshëm për rritje. Në fakt, ju keni një fat hyjnor. (Shih “Familja Një Proklamatë drejtuar Botës”, ChurchofJesusChrist.org.)

Studioni në Përgatitje për Orën Mësimore

Lexoni te Romakëve 8:16–17, duke kërkuar atë që Apostulli Pal dha mësim rreth fatit tonë hyjnor.

Një bashkëtrashëgimtar është dikush që merr një trashëgimi të barabartë me trashëgimtarët e tjerë. Si i parëlinduri dhe i vetmi Bir i përkryer i Atit Qiellor, është e drejta e Jezu Krishtit që të trashëgojë gjithçka që Ati ka. Ata që janë të bindur dhe marrin bekimet e plota të Shlyerjes së Shpëtimtarit, do të trashëgojnë gjithashtu gjithçka që Ati ka (shih Romakëve 8:14–18; Galatasve 3:26–29; Doktrina e Besëlidhje 93:21–22). Kjo do të thotë se ne të gjithë e kemi potencialin për t’u bërë si Ati ynë Qiellor.

Presidenti Rasëll M. Nelson ndihmoi për të sqaruar se çfarë do të thotë fati ynë hyjnor:

Ne duhet të përgatitemi për vetë fatin tonë hyjnor – lavdinë, pavdekësinë dhe jetën e përjetshme. Këto bekime qiellore, që të gjitha, mund të jenë tonat, me anë të besnikërisë sonë. (“The Creation”, Ensign, maj 2000, f. 86)

Në mësimet e ardhshme, do të mësoni më shumë rreth mënyrës se si Jezu Krishti e bën të mundur për ne që të arrijmë fatin tonë hyjnor si trashëgimtarë të jetës së përjetshme. Sikurse dha mësim Presidenti Uhtdorf, kjo bëhet me hapa një e nga një:

Ne të gjithë e kemi parë një foshnjë që mëson të ecë. Ai bën një hap të vogël dhe lëkundet. Ai bie. A e qortojmë një përpjekje të tillë? Natyrisht që jo. Cili baba do ta ndëshkonte një foshnjë sepse pengohet? Ne nxitim, ne duartrokasim dhe ne lavdërojmë, sepse me çdo hap të vogël, fëmija po bëhet më shumë si prindërit e tij.

… Krahasuar me përsosmërinë e Perëndisë, ne të vdekshmit zor se jemi më shumë se foshnja të ngathëta, ngurruese. Por Ati ynë i dashur Qiellor na do të bëhemi më shumë si Ai dhe … ky duhet të jetë qëllimi ynë i përjetshëm gjithashtu. Perëndia e kupton se ne nuk arrijmë atje brenda një çasti, por duke i bërë hapat një e nga një. (“Katër Tituj”, Liahona, maj 2013, f. 58)

Përsiatni në Përgatitje për Orën Mësimore

Si e ndryshon thënia e Presidentit Uhtdorf mënyrën se si i shihni hapat tuaj ngurrues, të ngjashëm me të foshnjave? Në çfarë mënyrash mund ta ftoni Zotin t’ju ndihmojë që të vazhdoni të ecni përpara?

Doni më Shumë? (Me Dëshirë)

Ku mund të mësoj më shumë rreth fuqisë së përqafimit të identitetit tim hyjnor dhe rreth mënyrës se si të jetoj në lartësinë e duhur të fatit tim hyjnor?

Mësoni rreth fuqisë së njohurisë për identitetin tonë hyjnor nga përvoja e një të kthyere në besim në Kishë nga India. Presidentja Xhoi D. Xhons, ish-Presidentja e Përgjithshme e Fillores, e tregoi këtë përvojë në bisedën e saj “Vlerë e Pamasë” (Liahona, nëntor 2017, f. 13).

Në bisedën e tij “A Jam Unë Fëmijë i Perëndisë?” (Liahona, maj 2018, f. 12–14), Plaku Brajën K. Tejlor i Të Shtatëdhjetëve tregoi historinë e shoqes së tij, Xhenit, dhe mënyrën se si ajo e kapërceu hidhërimin dhe fajin ligështues duke e lejuar Shpëtimtarin ta ndihmonte që të pranonte dhe të besonte në natyrën e saj hyjnore.

Në materialin filmik “Our True Identity” (3:38), Presidenti Uhtdorf ilustron fuqinë e njohurisë rreth natyrës sonë hyjnore dhe fatit tonë hyjnor.

Çfarë kanë dhënë mësim udhëheqësit e Kishës rreth Nënës sonë në Qiell?

Mësime nga udhëheqësit e Kishës rreth Nënës sonë në Qiell mund të gjenden në esenë mbi Temat e Ungjillit me titull “Nëna në Qiell” (topics.ChurchofJesusChrist.org [https://www.churchofjesuschrist.org/study/manual/gospel-topics-essays/mother-in-heaven?lang=alb]).

Çfarë tjetër besojmë ne rreth natyrës së Perëndisë, Atit, dhe potencialit tonë për t’u bërë më tepër si Ai?

Mësoni nga mësimet e Profetit Jozef Smith rreth natyrës së Atit tonë Qiellor duke lexuar pjesën “Perëndia, Ati i Përjetshëm” (Mësimet e Presidentëve të Kishës: Jozef Smith [2009], f. 39–46).

Eseja “Bërja si Perëndia” (topics.ChurchofJesusChrist.org) [https://www.churchofjesuschrist.org/study/manual/gospel-topics-essays/becoming-like-god?lang=alb] tek Esetë mbi Temat e Ungjillit shtjellon bindjen tonë rreth potencialit për t’u bërë si Ati ynë Qiellor.

Shiheni materialin filmik “Earthly Father, Heavenly Father” (3:59) dhe mendoni rreth ndjenjave që Ati ynë Qiellor mund të ketë për secilin nga fëmijët e Tij.