« តើព្រះស្រឡាញ់ខ្ញុំដែរឬទេ ? » បុគ្គលប្ដូរភេទ ៖ ការយល់ដឹងអំពីខ្លួនឯង ( ឆ្នាំ ២០២០ )
« តើព្រះស្រឡាញ់ខ្ញុំដែរឬទេ ? » បុគ្គលប្ដូរភេទ ៖ ការយល់ដឹងអំពីខ្លួនឯង
តើព្រះស្រឡាញ់ខ្ញុំដែរឬទេ ?
ប្រាកដណាស់ ព្រះស្រឡាញ់អ្នក ។ ទ្រង់ស្គាល់ ហើយស្រឡាញ់បុត្រាបុត្រីរបស់ទ្រង់ទាំងអស់ ហើយជ្រាបដឹងអំពីឧបសគ្គដែលអ្នកប្រឈមជាមួយ ។ ប្រធាន ថូម៉ាស អេស ម៉នសុន បានពន្យល់ថា ៖ « សេចក្ដីស្រឡាញ់នោះមិនដែលផ្លាស់ប្ដូរឡើយ ។… វានៅទីនោះសម្រាប់អ្នក នៅពេលអ្នកសោកសៅ ឬសប្បាយ បាក់ទឹកចិត្ត ឬមានសង្ឃឹម ។ សេចក្តីស្រឡាញ់របស់ព្រះគឺមាននៅទីនោះសម្រាប់អ្នក ទោះបីអ្នកទទួលអារម្មណ៍ ឬមិនទទួលអារម្មណ៍ថា អ្នកសមនឹងទទួល [ វា ] ក្តី ។ វានៅទីនោះជានិច្ច » ( « We Never Walk Alone » Liahona ខែ វិច្ឆិកា ឆ្នាំ ២០១៣ ទំព័រ ១២៣–២៤ ) ។
ប្រធាន រ័សុល អិម ណិលសុន បានបង្រៀន ៖ « ព្រះវរបិតាសួគ៌មានព្រះទ័យចង់ឲ្យបុត្រាបុត្រីទ្រង់ ជ្រើសរើស ត្រឡប់ទៅផ្ទះទៅរកទ្រង់វិញ ជាងអ្វីៗទាំងអស់ ។ អ្វីៗទាំងអស់ដែលទ្រង់ធ្វើគឺត្រូវបានជំរុញដោយព្រះហឫទ័យចង់បានយ៉ាងខ្លាំងរបស់ទ្រង់ » ( « The Love and Laws of God » [ ការប្រជុំធម្មនិដ្ឋាននៅសាកលវិទ្យាល័យព្រិកហាំ យ៉ង់ ថ្ងៃទី ១៧ ខែ កញ្ញា ឆ្នាំ ២០១៩ ] speeches.byu.edu ) ។
គ្មានអ្វីដែលបង្ហាញពីសេចក្ដីស្រឡាញ់របស់ព្រះយេស៊ូវគ្រីស្ទប្រសើរជាងព្រះឆន្ទៈលះបង់ព្រះជន្មរបស់ទ្រង់ធ្វើឲ្យធួននឹងអំពើបាបរបស់មនុស្សលោក បង់ថ្លៃសងរាល់ការរងទុក្ខ និងភាពអយុត្តិធម៌ ហើយផ្ដាច់ចំណងនៃសេចក្ដីស្លាប់របស់មនុស្សទាំងអស់នោះទេ ( សូមមើល អាលម៉ា ៧:១១–១៣ ) ។
ស៊ីស្ទើរ សារ៉ុន អូប៊ែង បានបង្រៀន ៖ « ខ្ញុំសូមថ្លែងទីបន្ទាល់ថា បងប្អូនមានគេស្រឡាញ់ ។ ព្រះអម្ចាស់ដឹងថាបងប្អូនព្យាយាមខ្លាំងប៉ុណ្ណា ។ បងប្អូនកំពុងរីកចម្រើន ។ សូមបន្តឆ្ពោះទៅមុខ ។ ទ្រង់មើលឃើញការលះបង់លាក់កំបាំងរបស់បងប្អូនទាំងអស់ ហើយរាប់វាជាសេចក្ដីល្អរបស់បងប្អូន និងសេចក្ដីល្អនៃមនុស្សដែលបងប្អូនស្រឡាញ់ ។ ការងាររបស់បងប្អូនពុំឥតប្រយោជន៍ឡើយ ។ បងប្អូនមិននៅតែឯងទេ » ( « Christ: The Light That Shines in Darkness » Liahona ខែ ឧសភា ឆ្នាំ ២០១៩ ទំព័រ ៧៥–៧៦ ) ។