« តើសាសនាចក្រមានគោលជំហរយ៉ាងដូចម្ដេច ចំពោះការផ្លាស់ប្ដូរភេទ ? » បុគ្គលប្ដូរភេទ ៖ ការយល់ដឹងអំពីខ្លួនឯង ( ឆ្នាំ ២០២០ )
« តើសាសនាចក្រមានគោលជំហរយ៉ាងដូចម្ដេច ចំពោះការផ្លាស់ប្ដូរភេទ ? » បុគ្គលប្ដូរភេទ ៖ ការយល់ដឹងអំពីខ្លួនឯង
តើសាសនាចក្រមានគោលជំហរយ៉ាងដូចម្ដេច ចំពោះការផ្លាស់ប្ដូរភេទ ?
« ថ្នាក់ដឹកនាំសាសនាចក្រប្រឹក្សាប្រឆាំងនឹងទម្រង់ការវេជ្ជសាស្ត្រ ឬការវះកាត់ដោយការជ្រើសរើស ក្នុងគោលបំណងដើម្បីព្យាយាមផ្លាស់ប្ដូរទៅជាភេទដែលផ្ទុយពីភេទកំណើតរបស់បុគ្គលម្នាក់ ( < ការកំណត់ភេទជាថ្មី > ) ។ ថ្នាក់ដឹកនាំផ្ដល់ដំបូន្មានថា ការធ្វើដូច្នោះនឹងជាបុព្វហេតុនៃការដាក់កំហិតសមាជិកភាពសាសនាចក្រ ។
« ថ្នាក់ដឹកនាំក៏ប្រឹក្សាប្រឆាំងនឹងការផ្លាស់ប្ដូរខាងសង្គមផងដែរ ។ ការផ្លាស់ប្ដូរខាងសង្គម រួមមានការផ្លាស់ប្ដូរការស្លៀកពាក់ ឬការតុបតែង ឬការផ្លាស់ប្ដូរឈ្មោះ ឬសព្វនាម ដើម្បីបង្ហាញខ្លួនឯងជាមនុស្សម្នាក់ផ្សេងពីភេទកំណើតរបស់គាត់ ឬរបស់នាង ។ ថ្នាក់ដឹកនាំផ្ដល់ដំបូន្មានផងដែរថា ពួកអ្នកដែលផ្លាស់ប្ដូរខាងសង្គម នឹងទទួលនូវការដាក់កំហិតសមាជិកភាពសាសនាចក្រមួយចំនួន សម្រាប់រយៈពេលនៃការផ្លាស់ប្ដូរនេះ ។
« ការដាក់កំហិតរួមមានការទទួល ឬអនុវត្តបព្វជិតភាព ការទទួល ឬការប្រើប្រាស់បណ្ណចូលព្រះវិហារបរិសុទ្ធ និងការទទួលការហៅមួយចំនួនរបស់សាសនាចក្រ ។ ថ្វីបើឯកសិទ្ធិនៃសមាជិកភាពមួយចំនួនត្រូវបានដាក់កំហិត ក៏ការចូលរួមផ្សេងៗទៀតនៅក្នុងសាសនាចក្រត្រូវបានស្វាគមន៍ ។
« បុគ្គលប្ដូរភេទដែលមិនស្វែងរកការផ្លាស់ប្ដូរខាងវេជ្ជសាស្ត្រ ការវះកាត់ ឬការផ្លាស់ប្ដូរខាងសង្គម ទៅជាភេទផ្ទុយ ហើយមានភាពសក្ដិសម អាចទទួលការហៅរបស់សាសនាចក្រ បណ្ណចូលព្រះវិហារបរិសុទ្ធ និងពិធីបរិសុទ្ធនៃព្រះវិហារបរិសុទ្ធ ។
« កុមារ យុវវ័យ និងមជ្ឈិមវ័យមួយចំនួនត្រូវបានទទួលវេជ្ជបញ្ជាការព្យាបាលដោយអរម៉ូន ដោយអ្នកជំនាញវេជ្ជសាស្ត្រដែលមានអាជ្ញាប័ណ្ណ ដើម្បីសម្រួលដល់ដំណាក់កាលឈឺចាប់របស់ភេទ ឬកាត់បន្ថយគំនិតចង់ធ្វើអត្តឃាត ។ មុនពេលបុគ្គលម្នាក់ចាប់ផ្ដើមការព្យាបាលបែបនោះ វាសំខាន់ថាគាត់ ឬនាង ( ព្រមទាំងឪពុកម្ដាយរបស់អនីតិជន ) យល់អំពីហានិភ័យ និងអត្ថប្រយោជន៍ដែលអាចមាន ។ ប្រសិនបើសមាជិកទាំងនេះមិនព្យាយាមផ្លាស់ប្ដូរទៅជាភេទផ្ទុយ ហើយមានភាពសក្ដិសម ពួកគេអាចទទួលការហៅរបស់សាសនាចក្រ បណ្ណចូលព្រះវិហារបរិសុទ្ធ និងពិធីបរិសុទ្ធនៃព្រះវិហារបរិសុទ្ធ ។
« ប្រសិនបើសមាជិកម្នាក់សម្រេចចិត្តដើម្បីផ្លាស់ប្ដូរឈ្មោះ ឬសព្វនាមដែលគាត់ ឬនាងពេញចិត្ត នោះឈ្មោះពេញចិត្តអាចត្រូវបានកត់សម្គាល់នៅក្នុងប្រអប់ឈ្មោះដែលពេញចិត្តនៅក្នុងកំណត់ត្រាសមាជិកភាព ។ បុគ្គលនោះអាចត្រូវបានហៅតាមឈ្មោះដែលពេញចិត្តនៅក្នុងវួដ » ( « បុគ្គលប្ដូរភេទ » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៣៨.៦.២១ ) ។
« សាសនាចក្រពុំប្រកាន់ជំហរមួយលើបុព្វហេតុនៃមនុស្សដែលកំណត់អត្តសញ្ញាណខ្លួនពួកគេជាបុគ្គលប្ដូរភេទនោះទេ » ( ក្បួនខ្នាតទូទៅ ៖ ៣៨.៦.២១) ។