Kasumahan sang Programa para sa mga Ginikanan kag mga Lider

Katuyuan sang Personal nga Pag-uswag

Ang Personal nga Pag-uswag sang Young Women isa ka programa sang hinimuan nga gindesinyo sa pagbulig sa young women nga:

Magpabakod sang ila mga testimonya parte kay Jesucristo.
Magpabakod alangay sang ila mga panimalay sa karon kag sa palaabuton.
Maghanda nga mangin takos sa paghimo kag pagtipig sang sagrado nga mga kasugtanan sa templo.
Maghanda para sa ila mga papel kag mga responsibilidad sa palaabuton.

Ang young women nagaobra upod sa ila mga ginikanan, mga lider sang Young Women, kag iban pa nga dalayawon nga mga babayi sa pagpahamtang kag paglab-ot sang mga katuyuan nga base sa walo ka mga panindugan sang Young Women. Ang Personal nga Pag-uswag makabulig sa mga ginikanan kag mga lider sa pagpatin-ad sang ila kaangtanan sa young women samtang nagaulupod sila sa pag-obra.

Mga Responsibilidad sang mga Ginikanan kag mga Lider sang Young Women

Ipresentar ang Programa

Ang mga lider sang Young Women nagaabiabi sa tagsa ka young woman nga nagasulod sa programa sang Young Women kag sa iya mga ginikanan. Ang isa ka miyembro sang panguluhan sang klase sang young woman puede man makatambong. Ang mga lider nagahatag sa young woman sang isa ka libro nga Personal nga Pag-uswag sang Young Women, isa ka journal sang Personal nga Pag-uswag, kag sang sulo nga pendant sang Young Women. Ginapaathag nila ang programa sa iya kag ginapaisog ang iya mga ginikanan sa pag-obra upod sa ila anak sa pagpili kag pagkompleto sang mga inagihan kag mga proyekto sa Personal nga Pag-uswag. Ang mga lider dapat man nga mag-agda sang mga ginikanan sa tanan nga espesyal nga mga kahiwatan nga ginaentrahan sang ila anak nga babayi.

Siguroha ang Nagakaigo nga Pagsuporta

Ang isa ka young woman nagakinahanglan sang pagsuporta kag tayuyon nga pagpaisog sa pagkompleto sang Personal nga Pag-uswag. Mahimo ini nga maghalin sa mga ginikanan, mga lider, iban nga mga hamtong, kag mas magulang nga young women nga nakakompleto na sang Personal nga Pag-uswag. Kon ang isa ka young woman may limitado lang nga suporta gikan sa puluy-an agud magbulig sa iya sa pagkompleto sang Personal nga Pag-uswag, ang isa pa ka sister mahimo nga pangabayon nga mag-alagad bilang manuglaygay kag buligan sia, sa direksyon sang mga lider sang priesthood. Ining hamtong nga sister mahimo mag-aprobar sang mga inagihan kag mga proyekto sa panindugan kag magpirma sang libro sang Personal nga Pag-uswag sang young woman kon nakompleto na ang mga ini. Ang isa pa ka young woman nga nakakompleto sang Personal nga Pag-uswag mahimo man pangabayon sa paghatag sang bulig kag pagpaisog.

Irekord kag Kilalaha ang Pag-uswag

Ang mga ginikanan kag mga lider nagahatag sang regular nga mga oportunidad para sa young women nga magreport sang ila pag-uswag. Kon ang isa ka young woman nagareport sing regular, sarang sia makahimo sang kasumahan sang iya mga pagtinguha kag magpaambit sang kon ano ang iya natun-an kag kon paano ang iya testimonya nagbakod. Ang mga ginikanan kag mga lider nagakilala sang iya mga hinimuan, nagakompirmar sang iya paghangop kag paggawi sang mga prinsipyo sang ebanghelyo, kag nagatanyag sang pagpaisog para sa padayon nga pag-uswag. Ining mga paghinambalanay magabulig sa pagpatin-ad sang mapinalanggaon nga mga kaangtanan.

Mga Responsibilidad sang mga Lider sang Priesthood

Kon ang isa ka young woman nakakompleto sang bilog nga programa sang Personal nga Pag-uswag, ginainterbyu sia sang bishop nga nagagamit sang mga sulundan sa Para sa Kusog sang mga Lamharon bilang sulundan. Ginapamatud-an niya ang iya pagtambong sa sakrament miting, iya partisipasyon sa seminary, kag ang iya pagbasa sang Ang Libro ni Mormon. Sarang ini mangin kabahin sang iya tuigan ukon ika-anum-nga-bulan nga interbyu. Ang bishop nagapat-od sang katakos sang young woman sa pagbaton sang Pagkilala sang Young Womanhood kag nagapirma sa iya libro sang Personal nga Pag-uswag sa pagkilala sang iya pagkompleto sang kinahanglanon nga mga ginapangayo. Mahimo niya sia hatagan sang Pagkilala sang Young Womanhood sa isa ka sakrament miting ukon iban pa gid nga miting.

Ang kadalag-an sang isa ka young woman sa Personal nga Pag-uswag mahimo man makita kon mabaton niya ang iya mga sertipiko sang Beehive, Mia Maid, kag Laurel samtang nagauswag sia gikan sa isa ka klase pakadto sa isa.

Ang mga miyembro sang bishopric sarang maggamit sang ila mga interbyu sa young women agud kilalahon kag padasigon ang pag-uswag sang tagsa ka young woman. Ang Talian sa Pagbantay sang Personal nga Pag-uswag sang Young Women para sa mga Lider, nga ginamentenar sang panguluhan sang Young Women, mahimo makabulig sa mga miyembro sang bishopric. Ang mga pangulo sang stake dapat regular nga nagapamangkot sa mga bishop parte sa kaayuhan kag pag-uswag sang young women sa ila mga ward.

Mga Sulundan

Ang mga katuyuan kag mga ginapangayo sa programa nasulat sa atubang sining libro. Ang masunod nga dugang nga mga sulundan mahimo nga makabulig sa mga lider.

Mga Inagihan sa Panindugan

Ang isa ka young woman mahimo nga mag-obra sa mga panindugan sa bisan ano nga pagpasunod.
Luwas sang panindugan nga katakos, ang young women ginapaisog sa pagkompleto sang kinahanglanon nga mga inagihan sa panindugan antes magsugod sang proyekto sa sina nga panindugan.

Mga Proyekto sa Panindugan

Ang isa ka proyekto sa panindugan ginatuyo nga magbulig sa isa ka young woman sa paggawi sang kon ano ang iya natun-an gikan sa mga inagihan sa panindugan.
Ang isa ka young woman dapat maggamit sa labing kubos sang napulo ka oras para sa tagsa ka proyekto sa panindugan. Ang amo gihapon nga napulo ka oras indi pwede mabaton para sa sobra isa ka proyekto sa panindugan.
Ang young women mahimo nga mag-obra sing ulolupod sa mga proyekto. Apang, ang isa ka young woman kinahanglan maggamit sa labing kubos sang napulo ka oras sang iya kaugalingon nga tion kon ginagamit niya ang ina nga proyekto sa paghuman sang iya kaugalingon nga kinahanglanon sa Personal nga Pag-uswag.
Nga may pagtugot na ngadaan sang mga ginikanan ukon mga lider sang Young Women, ang maayong mga butang nga ginahimo sang young women sa puluy-an, Simbahan, eskuwelahan, seminary, kag sa komunidad mahimo magkompleto sang mga ginapangayo sa Personal nga Pag-uswag.

Pagkompleto sang Personal nga Pag-uswag

Kon ang isa ka young woman nakakompleto na sang mga ginapangayo sa Personal nga Pag-uswag antes magbiya saYoung Women, dapat sia pangabayon sa pagbulig sa iban nga young women nga padayon pa nga nagaobra sa Personal nga Pag-uswag. Dapat man sia paisogon sa pag-angkon sang Honor Bee ukon pagsulit sang programa.
Kon ang isa ka young woman wala nakakompleto sang tanan nga mga ginapangayo sa Personal nga Pag-uswag antes magbiya aa Young Women, dapat sia paisogon nga magpadayon sa pag-obra padulong sa pagbaton sang Pagkilala sang Young Womanhood. Ang mga iloy, mga lider, kag iban pa nga dalayawon nga mga babayi mahimo pangabayon sa pagsuporta sa iya sa paghimo sini.

Pagbantay kag Kadasigon sang Pag-uswag

Ang Talian nga Rekord sang Personal nga Pag-uswag, nga makit-an sa pahina 77 sining libro, nagasuma sang tagsa ka obra sang young woman sa Personal nga Pag-uswag.
Ang Talian sa Pagbantay sang Personal nga Pag-uswag sang Young Women para sa mga Lider makuha man bilang separado nga papel agud buligan ang mga lider sa pagbantay sang pag-uswag sang tagsa ka young woman (36655 861). Sarang ini magamit agud buligan ang mga lider alangay sang Young Women kag priesthood sa pag-obra upod sa kag pagkilala sang tagsa ka young woman.
Ang young women mahimo mag-obra sa ila kaugalingon nga kadasigon sa programa sang Personal nga Pag-uswag; apang, ginarekomendar nga ang isa ka young woman magkompleto sa labing kubos isa ka inagihan sa panindugan tagsa ka bulan kag isa ka proyekto sa panindugan kada anum ka bulan (duha sa isa ka tuig). Kon magsugod sia sa pag-obra pagsulod niya sa Young Women sa edad nga 12 kag magpadayon sa sining ginapanugyan nga kadasigon, magatapos sia kon mag-edad sia 16. May yara sia dayon sang duha ka tuig sa pag-angkon sang Honor Bee ukon sa pagsulit sang programa suno sa ginahatag nga suhestyon sa pahina 83.

Pagkilala sang Indibidwal nga Pag-uswag

Kon makompleto sang isa ka young woman ang mga inagihan kag mga proyekto para sa tagsa ka panindugan, magabaton sia sang isa ka simbolo (36654 861) kag sang laso para sa balaan nga mga kasulatan nga naangot sa sina nga panindugan. Iya igabutang ang simbolo sa pahina sang Hinimuan sa Panindugan sa Personal nga Pag-uswag sang iya libro (pahina 78). Pagagamiton niya ang laso bilang bookmark sa iya balaan nga mga kasulatan. Ining pagkilala sang iya pag-uswag puede ihatag sa isa ka miting sang Young Women.
Kada tuig, sa (kahiwatan nga) Halangdon nga Young Women, ang young women dapat kilalahon para sa ila mga hinimuan.
Ang kadalag-an sang isa ka young woman sa Personal nga Pag-uswag mahimo man makita kon mabaton niya ang iya mga sertipiko sang Beehive, Mia Maid, kag Laurel samtang nagauswag sia gikan sa isa ka klase pakadto sa isa. Ining mga sertipiko (Beehive, 08563 861; Mia Maid, 08565 861; Laurel, 08564 861) ginahatag sa idalom sang direksyon sang bishop. Ginakilala sini ang pagsulong sang isa ka young woman gikan sa isa ka grupo-sang-pangidaron pakadto sa isa.

Pagkilala sang Young Womanhood

Kon ang isa ka young woman nakakompleto sang iya obra sa tanan nga walo ka mga panindugan kag nainterbyu na sang bishop, mabaton niya ang Pagkilala sang Young Womanhood. Ining pagkilala may yara sang isa ka sertipiko (36651 861) kag isa ka medalyon nga bulawan ukon pilak (bulawan 08602 861; pilak, 08603 861). Ang isa ka miyembro sang bishopric mahimo magpresentar sang Pagkilala sang Young Womanhood sa isa ka sakrament miting.
Pagkatapos nga makompleto ang Pagkilala sang Young Womanhood, ang isa ka young woman mahimo magpadayon sa pag-uswag paagi sa pag-angkon sang Honor Bee charm (bulawan, 08562 861; pilak, 08578 861; tan-awa sa pahina 83). Ining pagkilala sang iya pag-uswag puede ihatag sa isa ka miting sang Young Women.
Ang mga award kag mga sertipiko mahimo nga makuha paagi sa isa ka distribution center sang Simbahan nga nagagamit sang mga pondo sang ward, nga wala sing bayran ang young women ukon ang ila mga ginikanan.

Mga Ginapangayo sa Personal nga Pag-uswag para sa mga Lider

Ang mga lider ginapaisog sa pag-obra sang Personal nga Pag-uswag upod ang young women. Yadto mismo nga mga nagapartisipar sa programa sang Personal nga Pag-uswag nakahangop sang programa sing mas maayo kag nagapahamtang sang maayo nga ehemplo para sundon sang young women. Mahimo nila mabaton ang Pagkilala sang Young Womanhood pagkatapos nga sila:

Mag-alagad sa kabilugan nga isa ka tuig bilang isa ka lider sang Young Women.
Magkompleto sang kinahanglanon nga mga inagihan sa panindugan sa tagsa sang walo ka mga panindugan.
Magkompleto sang tatlo ka mga proyekto sa panindugan, dugang na ang proyekto para sa katakos.

Partisipasyon sang mga Iloy

Ang mga iloy ginaabiabi sa pagpartisipar upod sang young women sa pag-angkon sang Pagkilala sang Young Womanhood. Ang mga iloy nagaobra gikan sa ila kaugalingon nga libro sang Personal nga Pag-uswag kag mahimo nga mag-angkon sang pagkilala upod sa ila anak nga babayi. Ginarekomendar nga ang isa ka anak nga babayi mag-angkon sang iya pagkilala antes ukon upod sa iya iloy.

Ang mga iloy mahimo magkompleto sang amo man nga mga ginapangayo pareho sang ila mga anak nga babayi, dala ang:

Magtambong sing regular sa sakrament miting (kon posible).
Maggawi sang mga sulundan sa Para sa Kusog sang mga Lamharon.
Magkompleto sang mga inagihan sa panindugan kag isa ka proyekto sa panindugan para sa tagsa sang walo ka mga panindugan.
Magsulat sa isa ka personal nga journal.
Magbasa sing regular sang Ang Libro ni Mormon.
Magrekord sang iya testimonya parte sa Manluluwas nga si Jesucristo.

Ang mga iloy mahimo magpili sang lain nga mga opsyon para sa opsyunal nga mga inagihan sa panindugan kag mga proyekto sa panindugan gikan sa ila mga anak. Ang mga inagihan kag mga proyekto mahimo nga mapirmahan kag masulatan sang petsa sang ila anak nga babayi, ila bana, isa ka lider sang Young Women ukon isa ka hamtong. Ginapat-od sang bishop nga ang mga ginapangayo nakompleto na. Ang pagkilala kag pagbakal sang mga materyales para sa pagkilala dapat ipakig-angot sa mga lider sang Young Women kag sa bishopric.

Mga Ginapangayo sa Personal nga Pag-uswag para sa Iban nga Luyag Mag-obra sa Programa

Ang iban nga mga babayi nga luyag magpartisipar kag magkompleto sang Personal nga Pag-uswag makahimo sini paagi sa pagkompleto sang amo man nga mga ginapangayo sa young women kag paagi sa pagbulig sang isa ka young woman sa isa ka bahin sang iya Personal nga Pag-uswag. (Tan-awa ang mga ginapangayo para sa mga iloy sa pahina 92.)

Pagdugang sang Personal nga Pag-uswag sa mga Leksyon sa Domingo kag sa Mutual

Ang pag-obra sing ulolupod sa isa ka inagihan sa Personal nga Pag-uswag bilang kabahin sang isa ka leksyon sa Domingo sarang makahatag sa mga lider kag young women sang oportunidad nga hambalan ang mga prinsipyo nga ginatudlo kag ang paggawi sang mga ini sa mga kabuhi sang young women. Ang mga reperensya sang Personal nga Pag-uswag sarang makit-an sa mga materyales sa kurikulum sang Young Women.

Ang mga kahiwatan sa Personal nga Pag-uswag mahimo nga mangin kabahin man sang Mutual. Halimbawa, ang tanan nga young women makabulig sa isa ka proyekto sa panindugan sang isa ka young woman. Ang pag-obra sing ulolupod sa isa ka proyekto sarang makabulig sa pagpaisog sa young women nga magpadayon sa pag-uswag. Ang amo nga mga kahiwatan sang grupo dapat planohon sing mainampuon kag sing maayo agud sigurohon nga ang programa sang Personal nga Pag-uswag nagapabilin nga personal para sa tagsa ka young woman.

Pagpasibo sa Indibidwal kag Lokal nga mga Panginahanglan

Ang mga inagihan sa panindugan kag mga proyekto sa panindugan mahimo ipasibo suno sa personal ukon lokal nga mga sirkumstansya, mga interes, kag mga panginahanglan nga may pagtugot na ngadaan sang mga ginikanan kag mga lider. Kon nagahimo sang bisan ano nga mga pagliwat ukon pagkalain para sa isa ka indibidwal, ang mga lider dapat magbinagbinag sang mangin epekto sinang mga pagliwat sa iban nga young women. Pagkatapos sang maid-id nga pagbinagbinag sang mga ginikanan kag mga lider, ang mga pagpasibo sarang mahimo agud sabton ang mga panginahanglan sang young women nga may mga kasablagan ukon mga limitasyon sa edukasyon, agud sabton ang mga pang-kultura ukon pang-indibidwal nga mga panginahanglan, ukon agud tugotan ang young women nga indi miyembro sa pagpartisipar.

Kon ang isa ka young woman magbuylog sa Simbahan ukon mangin aktibo sa Young Women pagkaligad sang edad nga 16, ang iya mga kinahanglanon sa pagkompleto sang programa sang Personal nga Pag-uswag amo ang:

Magtambong sing regular sa sakrament miting (kon posible).
Maggawi sang mga sulundan sa Para sa Kusog sang mga Lamharon.
Magkompleto sang kinahanglanon nga mga inagihan sa panindugan sa tagsa sang walo ka mga panindugan. (Indi niya kinahanglan nga kompletuhon ang opsyunal nga mga inagihan.)
Magkompleto sang isa ka proyekto sa panindugan para sa tagsa sang walo ka mga panindugan.
Magtambong sa seminary (kon may yara).
Magbasa sing regular sang Ang Libro ni Mormon.
Magrekord sang iya testimonya parte sa Manluluwas nga si Jesucristo.

Ining mga ginapangayo mahimo man tumanon sang young women sa iban nga mga sirkumstansya nga napat-od sang lokal nga mga lider sang Young Women.