Kinaugali nga Diosnon

Magmangin-umalambit kamo sang kinaugali nga diosnon. … Magtinguha, sa pagdugang sa inyo pagtuo sang pagkahalangdon; kag sa pagkahalangdon idugang ang ihibalo; kag sa ihibalo ang pagpugong sang kaugalingon; kag sa pagpugong sang kaugalingon ang pagkalig-on; kag sa pagkalig-on ang pagkadiosnon; kag sa pagkadiosnon ang paghiliutod nga malulo; kag sa paghiliutod nga malulo ang paghigugma sa isigkatawo (2 Pedro 1:4–7).

Nakapanubli ako sang mga kinaugali nga diosnon, nga akon pagatinguhaan sa pagpauswag.

Kinahanglanon nga mga Inagihan sa Panindugan

Kompletuha ang masunod nga tatlo ka kinahanglanon nga mga inagihan sa panindugan. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Ano ang pila sang mga kinaugali nga diosnon sang isa ka anak nga babayi sang Dios? Basaha ang “Ang Panimalay: Isa ka Proklamasyon sa Kalibutan” (tan-awa sa pahina 101); 2 Pedro 1; Alma 7:23–24; kag Doctrine and Covenants 121:45. Sa imo kaugalingon nga mga pulong, listaha ang mga kinaugali nga diosnon nga ginahambalan sa imo pagbasa. Hunahunaa kon paano ka makatukib kag makapauswag sang tagsa sining mga kinaugali. Irekord ang imo mga ideya sa imo journal.
Bilang isa ka young woman, nabugayan ikaw sang diosnon nga babayin-on nga mga kinaiya. Dugangi ang imo paghangop kag pagdayaw sa pagkababayi. Basaha ang Mga Hulubaton 31:10–31 kag duha ka mga pamulong-pulong parte sa pagkababayi gikan sa isa ka pang-komperensya nga isyu sang mga balasahon nga pang-Simbahan. Repasuha kon ano ang ginasiling sang “Ang Panimalay: Isa ka Proklamasyon sa Kalibutan” (tan-awa sa pahina 101) parte sa pagkaasawa kag pagkailoy. Dayon pamangkuta ang imo iloy ukon isa pa gid ka iloy nga imo ginadayaw kon ano sa iya hunahuna ang importante nga mga kinaugali para mangin isa ka iloy. Listaha ang mga kinaugali sa imo journal. Dayon pilia ang isa sadtong mga kinaugali kag tinguhai ang magpauswag sini. Pagkatapos sang duha ka simana ireport ang imo kadalag-an sa isa ka ginikanan ukon lider.
Maghimo sang isa ka mas matawhay, malipayon nga klima sa imo puluy-an. Sa duha ka simana, maghimo sang isa ka pinasahi nga pagtinguha nga mapabakod ang imo kaangtanan sa isa ka miyembro sang panimalay sa pagpakita sang gugma paagi sa imo mga aksyon. Likawi ang paghusgar, pagpanghikay, ukon paghambal sing maparas, kag magbantay sang positibo nga mga kinaiya sa sina nga miyembro sang pamilya. Magsulat sang malip-ot nga mga pulong sang pagpaisog, magpangamuyo para sa sining miyembro sang panimalay, magpangita sang mga paagi agud makabulig, kag ipahayag sa pulong ang imo gugma. Ipaambit ang imo mga inagihan kag ang mga kinaugali nga diosnon nga imo natukiban sa sina nga miyembro sang panimalay ukon sa isa ka ginikanan ukon lider.

Dugang nga mga Inagihan sa Panindugan

Kompletuha ang tatlo ka dugang nga mga inagihan sa panindugan. Mahimo ka nga makapili gikan sa masunod nga mga opsyon ukon magsulat tubtob sa duha sang imo kaugalingon. Kinahanglan aprobahan sang imo ginikanan ukon lider yadtong imo ginasulat mismo antes ka magsugod. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Sauloha ang pang-sakramento nga mga pangamuyo sa Doctrine and Covenants 20:77, 79. Sa tion sang sakramento, magpamati sing maayo sa mga pangamuyo kag hunahunaa kon ano ang kahulugan sang pagdala sang ngalan ni Jesucristo sa imo kaugalingon kag kon paano ang paghimo sini magaapekto sang imo mga aksyon kag mga desisyon. Igawi ang pagtipig sang imo mga kasugtanan sa pagbunyag. Magsugod sa paghimo sang isa ka butang sa tagsa ka adlaw agud makilala kag mapauswag pa gid ang imo mga kinaugali nga diosnon kag agud magbulig sa imo sa pagdumdum pirme sang Ginuong Jesucristo. Pagkatapos sang duha ka simana, irekord ang imo inagihan sa imo journal.
Ang pagkamatinumanon isa ka kinaugali sang Manluluwas. Tinguhai nga mangin mas matinumanon sa imo mga ginikanan. Basaha ang Lucas 2:40–51 kag Juan 6:38. Pauswaga ang isa ka sulundan sang pagkamatinumanon sa imo paghimo sang isa ka pinasahi nga pagtinguha nga tratuhon ang imo mga ginikanan nga may pagtahod kag kaayo kag paghimo sang kon ano ang ginapangabay sang imo mga ginikanan nga imo himuon nga wala na kinahanglan sang pagpahanumdom. Pagkatapos sang duha ka simana, irekord sa imo journal kon paano ang pagmangin mas matinumanon nagtulod sa imo nga maluyag magpadayon sa paghimo sini kag kon paano ini nakabulig sa imo nga mahangpan ang imo kinaugali nga diosnon kag ang diosnon nga mga papel sang mga iloy kag mga amay.
Pauswaga ang imo mga kinaugali nga diosnon. Basaha ang Mateo 5:9; Juan 15:12; Mga Taga-Galacia 5:22–23; Mga Taga-Colosas 3:12–17; 1 Juan 4:21; kag Moroni 7:44–48. Sauloha ang imo paborito nga bersikulo gikan sa isa sining mga dinalan. Kilalaha ang mga kinaugali nga diosnon nga nahinambitan sa tanan sining balaan nga mga kasulatan kag listaha ang mga ini sa imo journal. Magpili sang isa ka kinaiya, kag sa sulod sang duha ka simana, magtinguha sa paghimo sini nga isa ka bahin sang imo adlaw-adaw nga kabuhi. Irekord ang imo pag-uswag kag mga inagihan sa imo journal.
Tun-i ang kahulugan sang pulong nga makigdaeton. Dayon magpangita kag magbasa sang lima ka balaan nga mga kasulatan nga nagatudlo parte sa mga makigdaeton. Magmangin isa ka halimbawa sang isa ka makigdaeton sa imo puluy-an kag sa eskuwelahan samtang nagalikaw ka sa pagpanghikay, pagreklamo, ukon paghambal sing maparas sa iban ukon parte sa iban. Magpangamuyo sa tagsa ka aga kag gab-i sa Amay nga Langitnon para sa bulig sa paghimo sini. Pagkatapos sang duha ka simana, isulat sa imo journal kon ano nga bag-o nga mga pamatasan ang gusto mo pauswagon, kon paano ang pagmangin isa ka makigdaeton kabahin sang imo kinaugali nga diosnon, kag kon paano ka magapadayon sa pagmangin isa ka makigdaeton.

Pinasibo nga Mga Inagihan sa Panindugan

Proyekto sa Panindugan

Pagkatapos nga nakompleto mo ang anum ka mga inagihan sa panindugan nga kinaugali nga diosnon, maghimo sang isa ka proyekto nga magabulig sa imo sa paggawi sang imo natun-an. Dapat ini mangin isa ka importante nga buluhaton nga magakinahanglan sa labing kubos napulo ka oras sa pagkompleto. Mainampuon nga magpangayo sang giya sang Balaan nga Espiritu sa pagpili sang isa ka makahulugan nga proyekto.

Paaprobahi sa imo ginikanan ukon lider ang proyekto antes ka magsugod. Magsulat sang isa ka ebalwasyon sa imo pagkahuman sini. Sa idalom amo ang pila ka mga ideya para sa isa ka proyekto sa panindugan.

Pauswagon ang isa ka abilidad nga sarang mo magamit sa imo puluy-an sa palaabuton, pareho sang pagpangluto, pagpanahi, pagpangaayo, pag-organisar, ukon pagdesinyo. Itudlo ina nga abilidad sa isa ka tawo, kag ipaathag kon paano ang pagtukod sang isa ka puluy-an sing kahusay (tan-awa sa D&C 109:8) isa sang imo diosnon nga mga papel.
Sa malawig nga tion, mag-alagad sa isa ka tawo nga yara sa panginahanglan, pareho sang isa ka lamharon nga iloy, isa ka tawo nga may mga kasablagan, ukon isa ka tigulang. Irekord sa imo journal kon paano ang imo pag-alagad nakabulig sa imo sa pagkilala sang kinaugali nga diosnon sa imo kaugalingon kag sa iban.
Listaha ang diosnon nga mga kinaugali kag mga papel sang mga kababayin-an pareho sang ginatudlo sa “Ang Panimalay: Isa ka Proklamasyon sa Kalibutan” (tan-awa sa pahina 101), kag maghimo sang isa ka proyekto nga makabulig sa imo sa pagtuon sing dugang parte sa isa sadtong mga papel ukon responsibilidad.
Nga nagagamit sang isa ka matinugahon nga abilidad sa handicraft nga imo natun-an, maghimo sang isa ka bagay para sa imo puluy-an sa karon ukon sa palaabuton. Irekord sa imo journal kon paano ang pagmangin matinugahon kabahin sang imo kinaugali nga diosnon kag kon paano ang pagpaambit sang imo pagkamatinugahon nagbugay sang iban.
Ang pag-obra sing may paghangpanay upod sa iban isa ka diosnon nga kinaiya (tan-awa sa D&C 38:27). Maghimo sang isa ka proyekto nga magatulod sang pag-isa sa imo kaparyentihan, sa imo eskuwelahan, ukon sa imo komunidad. Irekord sa imo journal kon paano ka makahimo sang kinalain kon mag-obra ka nga kaupod sa iban.

Ang akon proyekto amo ang:

Ang akon plano sa paghimo sang akon proyekto amo ang:

Pagtugot

Ginabulobanta nga petsa sang pagkompleto

Ang akon ebalwasyon sang proyekto amo ang (isulat kon ano ang imo nabatyagan kag kon paano nagdugang ang imo paghangop parte sa kinaugali nga diosnon):

Pirma sang ginikanan ukon lider

Petsa

Mga inoras nga nagamit