Pagtuo

Ang pagtuo indi ang pag-angkon sang isa ka himpit nga ihibalo sang mga butang; gani kon kamo may pagtuo nagalaum kamo sang mga butang nga indi makita, nga mga matuod (Alma 32:21).

Anak ako nga babayi sang Amay nga Langitnon, nga nagapalangga sa akon. Magatuo ako sa Iya wala’y katapusan nga plano, nga nasentro kay Jesucristo nga akon Manluluwas.

Kinahanglanon nga mga Inagihan sa Panindugan

Kompletuha ang masunod nga tatlo ka kinahanglanon nga mga inagihan sa panindugan. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Ang unang prinsipyo sang ebanghelyo amo ang pagtuo sa Ginuong Jesucristo. Magtuon parte sa pagtuo gikan sa balaan nga mga kasulatan kag sa buhi nga mga propeta. Basaha ang Mga Hebreo 11; Alma 32:17–43; Eter 12:6–22; kag Joseph Smith—History 1:11–20. Magbasa sang duha ka mga pamulong-pulong sa pangkabilugan nga komperensya parte sa pagtuo. Gamita ang imo kaugalingon nga pagtuo paagi sa pagsugod sang isa ka pamatasan sang pagpangamuyo sa imo kabuhi. Magsugod paagi sa pagsambit sing regular sang imo mga pangamuyo sa aga kag gab-i. Pagkatapos sang tatlo ka simana sang pagtuman sini nga sulundan, hambali upod sa isa ka ginikanan ukon lider kon ano ang imo natun-an parte sa pagtuo kag kon paano ang adlaw-adlaw nga personal nga pangamuyo nagpabakod sang imo pagtuo. Sa imo journal ipahayag ang imo mga balatyagon parte sa pagtuo kag pangamuyo.
Tukiba ang mga prinsipyo sang pagtuo nga gintudlo sang mga iloy sang mga pamatan-on nga mga soldado ni Helaman. Basaha ang Alma 56:45–48 kag 57:21. Repasuha kon ano ang ginasiling sang “Ang Panimalay: Isa ka Proklamasyon sa Kalibutan” (tan-awa sa pahina 101) parte sa papel sang isa ka iloy. Upod ang isa ka iloy, lola, ukon lider, hambali ang mga kinaiya nga kinahanglan sang isa ka babayi agud tudloan ang kabataan sa pag-angkon sang pagtuo kag sa pagbase sang ila mga desisyon sa mga kamatuoran sang ebanghelyo. Paano bala ining mga prinsipyo makabulig sa imo sa imo kabuhi karon kag makabulig sa imo sa paghanda nga magmangin isa ka tampad nga babayi, asawa, kag iloy? Irekord ang imo mga panghunahuna kag mga balatyagon sa imo journal.
Ang paggawi sang mga prinsipyo sang ebanghelyo nagakinahanglan sang pagtuo. Magbasa parte sa pagtuo sa Guide to the Scriptures [Sulundan sa Balaan nga mga Kasulatan] ukon True to the Faith. Ang pagtuo sa Manluluwas nga si Jesucristo nagapadulong sa pagbuhat. Magpili sang isa ka prinsipyo pareho sang pangamuyo, ika-pulo, pagpuasa, paghinulsol, ukon pagpakabalaan sang Adlaw nga inugpahuway [Sabbath day]. Sa imo kaugalingon nga puluy-an ukon sa sa pa gid ka lugar, magplano kag magpresentar sang isa ka leksyon sa family home evening parte sa kon paano ang pagtuo nagabulig sa imo sa paggawi sinang prinsipyo sang ebanghelyo. Kon puede, pangabaya ang isa ka miyembro sang panimalay sa pagpaambit sang isa ka inagihan nga nagpabakod sang iya pagtuo. Magpaambit man sang imo kaugalingon nga mga inagihan. Sa imo journal, magsulat sang isa sadtong mga inagihan kag ilaragway ang imo mga balatyagon parte sa pagtuo.

Dugang nga Mga Inagihan sa Panindugan

Kompletuha ang tatlo ka dugang nga mga inagihan sa panindugan. Mahimo ka nga makapili gikan sa masunod nga mga opsyon ukon magsulat tubtob sa duha sang imo kaugalingon. Kinahanglan aprobahan sang imo ginikanan ukon lider yadtong imo ginasulat mismo antes ka magsugod. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Magtuon pa gid sing dugang parte sa sakramento. Magbasa parte sa Katapusan nga Panihapon sa Mateo 26:26–28; Marcos 14:22–24; kag Lucas 22:17–20. Magsugod sang isa ka sulundan sang pagbinagbinag sa tion sang sakramento paagi sa pagpamati sing maayo sa pang-sakramento nga himno kag mga pangamuyo. Hunahunaa kon ngaa nagaambit kita sang tinapay kag tubig. Pagkatapos sang tatlo ka simana sang pagtuman sining sulundan, magsulat sa imo journal sang pila ka mga promisa nga imo ginahimo samtang nagaambit ka sang sakramento kag nagadumdom sang imo mga kasugtanan sa pagbunyag kag kon ano ang imo ginahimo agud tumanon inang mga promisa. Irekord sa imo journal kon paano ang imo paghangop sining mga promisa nagpabakod sang imo pagtuo sa Manluluwas.
Dugangi ang imo paghangop parte sa pagtubos ni Jesucristo sa aton gikan sa aton mga sala paagi sa pagbasa sang Isaias 53:3–12; Juan 3:16–17; Mga Taga-Roma 5; 2 Nefi 9:6–7, 21–26; Alma 7:11–13; 34:8–17; kag Doctrine and Covenants 19:15–20. Sa imo journal, isulat ang imo mga balatyagon parte sa Manluluwas kag kon ano ang Iya nahimo para sa imo. Ipaambit ang imo mga balatyagon sa isa ka testimony meeting.
Dugangi ang imo paghangop parte sa plano sang kaluwasan. Ang mga basehan para sa pagtuon amo ang 1 Mga Taga-Corinto 15:22; Bugna 12:7–9; 2 Nefi 9:1–28; 11:4–7; Doctrine and Covenants 76:50–113; 93:33–34; Moses 4:1–4; kag Abraham 3:24–27. Magdrowing ukon magkuha sang isa ka larawan nga nagapakita sang plano sang kaluwasan, dala ang pagkabuhi sang wala pa mabun-ag, pagkabun-ag, mortal nga kabuhi, kamatayon, paghukom, kag kabuhi pagkatapos sang paghukom. Nga nagagamit sining larawan, ipaathag ang plano sang kaluwasan sa imo klase, sa imo panimalay, ukon sa isa ka abyan. Hambali kon paano ang ihibalo parte sa plano nagaapekto sang imo mga aksyon, nagabulig sa imo sa paghangop sang imo pagkatawo, kag nakapabakod sang imo pagtuo.
Ang Ginuo nagsugo sa aton sa pagbayad sang ika-pulo [tithing]. Basaha ang Doctrine and Covenants 119 kag Malaquias 3:8–12. Tungod kay ang pagtuman sang layi sang ika-pulo isa ka pamatuod sang imo pagtuo, magbayad sang isa ka bug-os nga ika-pulo. Pagkatapos sang tatlo ka bulan, irekord sa imo journal kon paano ang pagbayad sang ika-pulo nakabulig sa imo pagtuo nga magtubo. Listaha ang mga bugay sa imo kabuhi, alangay nga dalagko kag magagmay, nga nag-abot tungod sang imo pagtuo sa prinsipyo sang ika-pulo.

Pinasibo nga Mga Inagihan sa Panindugan

Proyekto sa Panindugan

Pagkatapos nga nakompleto mo ang anum ka mga inagihan sa panindugan nga pagtuo, maghimo sang isa ka proyekto nga magabulig sa imo sa paggawi sang imo natun-an. Dapat ini mangin isa ka importante nga buluhaton nga magakinahanglan sa labing kubos napulo ka oras sa pagkompleto. Mainampuon nga magpangayo sang giya sang Balaan nga Espiritu sa pagpili sang isa ka makahulugan nga proyekto.

Paaprobahi sa imo ginikanan ukon lider ang proyekto antes ka magsugod. Magsulat sang isa ka ebalwasyon sa imo pagkahuman sini. Sa idalom amo ang pila ka mga ideya para sa isa ka proyekto sa panindugan.

Sauloha ang “Ang Buhi nga Cristo” (tan-awa sa pahina 102). Samtang ginahimo mo ini, binagbinaga ang impluwensya sang Manluluwas sa imo kabuhi kag kon paano ang imo pagtuo sa Iya nagdugang. Igawi ang pagsunod sang halimbawa sang Manluluwas.
Basaha ang Alma 32:28–43. Hunahunaa ang pagtuo bilang isa ka binhi samtang nagabulig ka sa pagtanom, pagtatap, kag pag-ani sang isa ka talamnan sang mga utan. Irekord sa imo journal kon paano mo sarang saguron, tatapon, kag pabakuron ang imo pagtuo.
Magtambong sa isa ka klase sang family history nga ginatudlo sa imo ward ukon branch. Magtipon sang matuod-tuod nga mga sugilanon sang imo mga paryente ukon sang iban nga nagpakita sang pagtuo, ukon mag-interbyu sang mga miyembro sang panimalay ukon sang iban kag irekord ang ila mga sugilanon.
Ilaragway ang bugay sang pagtuo paagi sa pagsulat sang isa ka orihinal nga sugilanon, binalaybay, ukon ambahanon ukon paagi sa pagkompleto sang isa ka visual arts nga proyekto nga nagalaragway sang imo pagtuo kay Jesucristo.

Ang akon proyekto amo ang:

Ang akon plano sa paghimo sang akon proyekto amo ang:

Pagtugot

Ginabulobanta nga petsa sang pagkompleto

Ang akon ebalwasyon sang proyekto amo ang (isulat kon ano ang imo nabatyagan kag kon paano nagdugang ang imo paghangop parte sa pagtuo):

Pirma sang ginikanan ukon lider

Petsa

Mga inoras nga nagamit