1 Kag natabo ini, sa pagsugod sang ika-treinta nga tuig sang pagginahum sang mga hukom, sa ika-duha nga adlaw sa una nga bulan, si Moroni nakabaton sing isa ka sulat halin kay Helaman nga nagapahayag sang mga kahimtangan sang katawhan sa sina nga bahin sang duta.

2 Kag amo ini ang mga pulong nga iya ginsulat nga nagasiling: Labing pinalangga ko nga utod nga Moroni, kag utod man sa Ginuo kag sa mga pag-antos sa aton pagpakig-away; tan-awa, pinalangga ko nga utod, may pila ako ka bagay nga isugid parte sa amon pagpakig-away sa sini nga bahin sang kadutaan.

3 Tan-awa, duha ka libo ka mga anak nga lalaki sadtong mga tawo nga gindala ni Amon halin sa duta sang Nefi—karon nahibal-an mo nga ang mga ini mga kaliwat ni Laman, nga kamagulangan nga anak nga lalaki sang aton amay nga si Lehi;

4 Karon indi ko na kinahanglan nga isaysay liwat sa imo ang parte sa ila mga tradisyon ukon sa ila pagkawala’y pagtuo kay nakahibalo ka parte sining tanan nga butang—

5 Gani tama na sa akon nga sugiran ko ikaw nga duha ka libo sining mga pamatan-on ang nagkapot sang ila mga armas sa giyera, kag luyag nga ako ang mangin lider nila; kag nagtindog kami agud pangapinan ang aton pungsod.

6 Kag karon nakahibalo ka man parte sa kasugtanan nga ginhimo sang ila mga amay, nga indi sila magkapot sang ila mga armas sa giyera batok sa ila mga kauturan agud magpaagay sang dugo.

7 Apang sa ika-beynte sais nga tuig, sang nakita nila ang aton mga pag-antos kag ang aton mga kabudlayan para sa ila, naghana na sila nga gub-on ang kasugtanan nga ila ginhimo kag magkapot sang ila mga armas sa giyera agud pangapinan kita.

8 Apang indi ko sila pagtugotan nga gub-on nila ini nga kasugtanan nga ila ginhimo, nga nagapati nga ang Dios magapabakod sa aton, sa bagay nga indi kita mag-antos sing dugang tungod sang pagtuman sang panumpa nga ila ginhimo.

9 Apang tan-awa, yari ang isa ka butang nga sa diin makaagom kita sang dako nga kalipay. Kay tan-awa, sa ika-beynte sais nga tuig, ako, si Helaman, naglakat sa pagpanguna sining duha ka libo ka mga pamatan-on padulong sa siyudad sang Judea, agud magbulig kay Antipus, nga imo pinili nga lider sang katawhan sa sina nga bahin sang duta.

10 Kag gintingob ko ang akon duha ka libo ka mga anak, (kay nagakaangay sila nga tawagon nga mga anak) sa kasoldadohan ni Antipus, nga sa amo nga kusog si Antipus nagkasadya sing tuman; kay tan-awa, ang iya kasoldadohan nabuhinan sang mga Lamanhon tungod ang ila mga puwersa nakapatay sang madamo gid sang aton mga tinawo, nga sa amo nga rason may kabangdanan kita sa pagkalisud.

11 Apang, mahimo naton nga mapaumpawan ang aton mga kaugalingon sa sining kamatuoran, nga nagkalamatay sila sa kawsa sang ila pungsod kag sang ila Dios, huo, kag malipayon sila.

12 Kag ang mga Lamanhon naghawid pa gid sang madamo bilang mga bihag, ang tanan sa mga ini mga puno nga kapitan, kay wala sila sing iban pa nga ginbilin nga buhi. Kag ginahunahuna naton nga yara sila sa sini nga tion sa duta sang Nefi; ina kon wala sila pagpamatya.

13 Kag karon amo ini ang mga siyudad nga gin-agaw sang mga Lamanhon paagi sa pagpaagay sang dugo sang madamo kaayo sang aton isganan nga mga tinawo:

14 Ang duta sang Manti, ukon ang siyudad sang Manti, kag ang siyudad sang Zisrom, kag ang siyudad sang Cumeni, kag ang siyudad sang Antipara.

15 Kag amo ini ang mga siyudad nga ila naangkon sang mag-abot ako sa siyudad sang Judea; kag nasalapoan ko si Antipus kag ang iya mga tinawo nga nagapangabudlay sa bug-os nila nga kusog agud pamakuran ang siyudad.

16 Huo, ginlapyo sila sa lawas kag amo man sa espiritu, kay nagpakig-away sila sing may kaisog sa adlaw kag nagpangabudlay sa gab-i agud amligan ang ila mga siyudad; kag gani nagbatas sila sang dako nga mga pag-antos sang tagsa ka sahi.

17 Kag karon desidido sila nga magdaug sa sini nga lugar ukon mapatay; gani may rason ka sa pagpati nga ining diutay nga puwersa nga akon gindala, huo, inang akon mga anak, naghatag sa ila sing dako nga mga paglaum kag tuman nga kalipay.

18 Kag karon natabo ini nga sang nakita sang mga Lamanhon nga nakabaton si Antipus sing mas dako nga kusog sa iya kasoldadohan, napilitan sila paagi sa mga sugo ni Ammoron nga indi magsalakay batok sa siyudad sang Judea, ukon batok sa amon, agud magpakig-away.

19 Kag gani ginpakamaayo kami sang Ginuo; kay kon nagsalakay sila sa amon sa sining amon kahuyang ayhan napamatay nila ang amon diutay nga kasoldadohan; apang gani naamligan kami.

20 Ginsugo sila ni Ammoron nga amligan ang mga siyudad nga ila naagaw. Kag gani natapos ang ika-beynte sais nga tuig. Kag sa pagsugod sang ika-beynte siyete nga tuig nahanda na namon ang amon siyudad kag ang amon mga kaugalingon sa pagpangapin.

21 Karon luyag namon nga ang mga Lamanhon ang magsalakay sa amon; kay indi namon luyag nga salakayon sila sa ila mga pamakod.

22 Kag natabo ini nga nagbutang kami sing mga espiya sa palibot, agud bantayan ang mga giho sang mga Lamanhon, agud nga indi sila makalabay sa amon sa gab-i ukon sa adlaw agud magsalakay sa iban pa namon nga mga siyudad nga yara sa norte.

23 Kay nahibal-an namon sa amo nga mga siyudad indi sila tuman kabakod agud sugataon sila; gani naghandum kami, nga kon maglabay sila sa amon, nga salakayon sila sa ila likod, kag gani awayon sila sa likod sa amo man nga tion nga ginasugata sila sa atubang. Naghunahuna kami nga madaug namon sila; apang tan-awa, napaslawan kami sa sining amon handum.

24 Wala sila nangisog nga maglabay sa amon upod ang ila bug-os nga kasoldadohan, kag wala man sila nangisog upod ang isa lang ka bahin sini, kay basi indi sila tuman kabakod kag mapierde sila.

25 Wala man sila nangisog sa pagsulong batok sa siyudad sang Zarahemla; kag wala man sila nangisog sa pagtabok sa ilaya sang Sidon padulong sa siyudad sang Nefias.

26 Kag gani, paagi sa ila mga puwersa, desidido sila sa pag-amlig sinang mga siyudad nga ila naangkon.

27 Kag natabo ini sa ika-duha nga bulan sini nga tuig, may gindala sa amon nga madamo nga panigana halin sa mga amay sang akon duha ka libo ka mga anak.

28 Kag amo man may ginpadala nga duha ka libo ka tawo sa amon halin sa duta sang Zarahemla. Kag gani nakahanda kami sing napulo ka libo ka tawo, kag mga panigana para sa ila, kag para man sa ila mga asawa kag sa ila mga anak.

29 Kag ang mga Lamanhon, nga nakakita sang amon puwersa nga nagadugang adlaw-adlaw, kag sang mga panigana nga nagaabot para sa amon suporta, nagsugod sila nga magkahadlok, kag nagsugod sa pagsalakay sing hinali, kon mahimo nga untaton ang amon pagbaton sang mga panigana kag kusog.

30 Karon sang nakita namon nga ang mga Lamanhon nagsugod nga indi mapahamtang sa sini nga paagi, luyag namon nga maghimo sing isa ka taktika nga makaapekto sa ila; gani nagsugo si Antipus nga maglakat ako upod ang akon lamharon nga mga anak sa kaingod nga siyudad, nga daw nagadala kami sing mga panigana sa kaingod nga siyudad.

31 Kag magalakat kami malapit sa siyudad sang Antipara, nga daw magakadto kami sa masunod nga siyudad, sa mga dulonan malapit sa baybayon.

32 Kag natabo ini nga naglakat kami, nga daw dala ang amon nga panigana, agud magkadto sa sina nga siyudad.

33 Kag natabo ini nga si Antipus naglakat upod ang isa ka bahin sang iya kasoldadohan, nga ginbilin ang iban agud amligan ang siyudad. Apang wala sia naglakat tubtob nga nakahalin na ako upod ang akon diutay nga kasoldadohan, kag nakaabot na malapit sa siyudad sang Antipara.

34 Kag karon, sa siyudad sang Antipara napahamtang ang pinakamabakod nga kasoldadohan sang mga Lamanhon; huo, ang pinakamadamo.

35 Kag natabo ini nga sang napahibalo sila sang ila mga espiya, naglakat sila upod ang ila kasoldadohan kag nagsulong batok sa amon.

36 Kag natabo ini nga nalagyo kami sa ila atubang, pa-norte. Kag gani napahilayo namon ang labing mabakod nga kasoldadohan sang mga Lamanhon;

37 Huo, bisan malayo-layo na, sa bagay nga sang nakita nila ang kasoldadohan ni Antipus nga nagalagas sa ila, sa ila kusog, wala sila nagliso pa-tuo ukon pa-wala, kundi nga nagpadayon sang ila pagsulong sing tadlong padulong sa amon; kag, pareho sang amon nahunahuna, nagtuyo sila sa pagpamatay sa amon antes sila malab-ot ni Antipus, kag ini agud nga indi sila malikupan sang amon katawhan.

38 Kag karon si Antipus, sang nakita nga ara kami sa peligro, nagpadasig sang pagsulong sang iya kasoldadohan. Apang tan-awa, gab-i sadto; gani wala sila nakalab-ot sa amon, kag wala man si Antipus nakalab-ot sa ila; gani nagkampo kami para sa gab-i.

39 Kag natabo ini nga antes magkaagahon, tan-awa, ang mga Lamanhon nagalagas na sa amon. Karon indi kami tuman kabakod agud magpakig-away sa ila; huo, indi ako magtugot nga ang akon lamharon nga mga anak mahulog sa ila mga kamot; gani nagpadayon kami sa amon paglakat, kag naglakat kami pakadto sa kamingawan.

40 Karon wala sila nangisog sa pagliso sa tuo ukon sa wala kay basi malikupan sila; kag indi man ako magliso sa tuo ukon sa wala kay basi malab-ot nila ako, kag indi kami makabato sa ila, kundi nga magkalamatay kami, kag makapalagyo sila; kag gani nagpalagyo kami sa bilog sina nga adlaw padulong sa kamingawan, bisan tubtob nga magdulom.

41 Kag natabo ini nga sa liwat, sang mag-abot ang kasanag sang aga nakit-an namon ang mga Lamanhon nga nagahilapit na sa amon, kag nalagyo kami sa ila atubang.

42 Apang natabo ini nga wala pa naglawig ang ila paglagas sa amon sang nagdulog sila; kag sa aga ini sang ika-tatlo nga adlaw sang ika-pito nga bulan.

43 Kag karon, kon nalab-ot sila ni Antipus wala kami nakahibalo, apang nagsiling ako sa akon mga tinawo: Tan-awa, wala kita nakahibalo nga basi nagdulog sila sa tuyo nga pasalakayon kita batok sa ila, agud nga madakpan nila kita sa ila siod;

44 Gani ano ang inyo masiling, mga anak ko, atubangon bala ninyo sila agud magpakig-away?

45 Kag karon ginasiling ko sa imo, pinalangga kong utod nga Moroni, nga wala pa gid ako nakakita sang sa pagkadako nga kaisog, wala, wala sa tanan nga Nefinhon.

46 Kay pareho nga ginatawag ko sila halin pa sadto nga akon mga anak (kay sila tanan tuman pa kalamharon) sa amo man nagsiling sila sa akon: Amay, tan-awa ang aton Dios upod sa aton, kag indi sia magtugot nga malaglag kita; gani malakat kita; indi naton pagpamatyon ang aton mga kauturan kon indi nila kita paghilabtan; gani malakat kita, kay basi madaug nila ang kasoldadohan ni Antipus.

47 Karon wala pa gid sila makapakig-away halin sadto, apang wala sila nahadlok sa kamatayon; kag mas nahunahuna pa nila ang kahilwayan sang ila mga amay sangsa ila mga kabuhi; huo, gintudloan sila sang ila mga iloy, nga kon indi sila magduhaduha, pagaluwason sila sang Dios.

48 Kag ginsaysay nila sa akon ang mga pulong sang ila mga iloy nga nagasiling: Wala kami nagaduhaduha nga nahibal-an ini sang amon mga iloy.

49 Kag natabo ini nga nagbalik ako upod ang akon duha ka libo batok sining mga Lamanhon nga naglagas sa amon. Kag karon tan-awa, nalab-ot sila sang mga kasoldadohan ni Antipus, kag nagsugod ang isa ka makakululba nga inaway.

50 Ang kasoldadohan ni Antipus nga ginakapoy, tungod sang ila malawig nga paglakat sa tuman kalip-ot nga tion, nagahana na nga mahulog sa mga kamot sang mga Lamanhon; kag kon wala ako makabalik upod ang akon duha ka libo natuman kuntani nila ang ila katuyoan.

51 Kay si Antipus nalaglag sa espada, kag madamo sang iya mga lider, tungod sang ila kakapoy, nga gintuga sang kadasigon sang ila paglakat—gani ang mga tinawo ni Antipus, nga nagtalang-talang tungod sang pagkalaglag sang ila mga lider, nagsugod sa pag-isol sa atubang sang mga Lamanhon.

52 Kag natabo ini nga nagpakaisog ang mga Lamanhon, kag nagsugod sa paglagas sa ila; kag gani ang mga Lamanhon nagalagas sa ila sa dako nga kabaskog sang makalab-ot si Helaman sa ila likod upod ang iya duha ka libo, kag nagsugod sa pagpamatay sa ila sing tuman, sa bagay nga ang bug-os nga kasoldadohan sang mga Lamanhon nagdulog kag nagliso sa pagsalakay kay Helaman.

53 Karon sang nakita sang katawhan ni Antipus nga nagliso ang mga Lamanhon, ginpanipon nila ang ila mga tinawo kag nagsalakay liwat sa likod sang mga Lamanhon.

54 Kag karon natabo ini nga kami, ang katawhan ni Nefi, ang katawhan ni Antipus, kag ako upod ang akon duha ka libo, naglikop sa mga Lamanhon, kag ginpamatay sila; huo, sa bagay nga napilitan sila sa pagtugyan sang ila mga armas sa giyera kag sang ila man mga kaugalingon bilang mga bihag sa giyera.

55 Kag karon natabo ini nga sang naampo na nila ang ila mga kaugalingon sa amon, tan-awa, gin-isip ko ang mga pamatan-on nga nagpakig-away upod sa akon, nga nagakahadlok nga basi madamo sa ila ang nagkalamatay.

56 Apang tan-awa, sa akon dako nga kalipay, wala sing isa sa ila ang nalaglag sa duta; huo, nakig-away sila nga pareho nga may kusog sang Dios; huo, wala pa gid sing may nahibal-an nga mga tawo nga nakig-away nga may amo kamilagroso nga kusog; kag upod ang amo kabaskog nga gahum nagsalakay sila sa mga Lamanhon, sa bagay nga hinadlokan sila sa ila; kag sa sini nga kabangdanan gintugyan sang mga Lamanhon ang ila mga kaugalingon bilang mga bihag sa giyera.

57 Kag tungod wala kami sing lugar para sa amon mga bihag, nga mabantayan namon sila agud matago sila halin sa mga kasoldadohan sang mga Lamanhon, gani ginpadala namon sila sa duta sang Zarahemla, kag isa ka bahin sadtong mga tinawo nga wala napatay ni Antipus, upod sa ila; kag ang nagkalabilin gindala ko kag ginsimpon sila sa akon lamharon nga mga Amonhon, kag ginsugdan ang amon paglakat pabalik sa siyudad sang Judea.