Maayong mga Buhat

Gani pasigaha ninyo ang inyo suga sa atubang sining katawhan, agud nga makita nila ang inyo maayong mga buhat kag himayaon ang inyo Amay nga yara sa langit (3 Nefi 12:16).

Buligan ko ang iban kag ipasad ang ginharian paagi sa matarong nga pag-alagad.

Kinahanglanon nga mga Inagihan sa Panindugan

Kompletuha ang masunod nga tatlo ka kinahanglanon nga mga inagihan sa panindugan. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Tun-i kon ngaa ang pag-alagad isa ka tig-una nga prinsipyo sang ebanghelyo. Basaha ang Mateo 5:13–16; 25:34–40; Mga Taga-Galacia 6:9–10; Santiago 1:22–27; Mosias 2:17; 4:26; kag 3 Nefi 13:1–4. Sa masami ang iban nagahatag sang pag-alagad nga mahimo nga wala mo matalupangdi, pareho sang paghanda sang mga kalan-on, pagbasa ukon pagpamati sa magagmay nga kabataan, pagpanursi sang mga panapton, ukon pagbulig sa isa ka utod. Sa duha ka simana, irekord sa imo journal ang wala matalupangdi nga mga buhat sang pag-alagad nga ginahimo sang mga miyembro sang imo panimalay kag sang iban. Kilalaha ang ila pag-alagad sa pila ka makahulugan nga paagi.
Ang pag-alagad isa ka importante nga prinsipyo sang pangpanimalay nga pagpangabuhi. Magbulig sa pagplano sang mga pagkaon sang imo panimalay, magpangita sang pagkaon, kag maghanda sang bahin sang mga kalan-on sa duha ka simana. Sa sulod sina nga tion, buligi ang imo panimalay sa pagtililipon agud makigbahin sa mga tinion sang pagkaon. Ireport sa imo klase kon ano ang imo natun-an.
Basaha ang Mosias 18:7–10, kag sa imo journal maglista sang tatlo ka mga paagi nga makapaumpaw ka sa iban ukon makabulig sa ila sa pagdala sang ila mga palas-anon. Himoa ang mga butang sa imo listahan, kag sugiri ang isa ka miyembro sang panimalay ukon lider parte sa inagihan kag kon paano nabag-o ang imo panan-awan kag paghangop.

Dugang nga Mga Inagihan sa Panindugan

Kompletuha ang tatlo ka dugang nga mga inagihan sa panindugan. Mahimo ka nga makapili gikan sa masunod nga mga opsyon ukon magsulat tubtob sa duha sang imo kaugalingon. Kinahanglan aprobahan sang imo ginikanan ukon lider yadtong imo ginasulat mismo antes ka magsugod. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Magtudlo sang isa ka leksyon parte sa pag-alagad sa family home evening ukon sa isa pa gid ka kahiwatan. Maggamit sang mga larawan, musika, mga halimbawa, ukon mga pagpasundayag sa imo leksyon. Gamita ang manwal nga Gabayan nga Libro sa Pagpanudlo (item 34595 861) bilang isa ka basehan.
Basaha ang Doctrine and Covenants 58:26–28. Maghunahuna sang mga pamaagi nga ang isa ka young woman, kag ang isa ka asawa kag iloy, mahimo nga maggawi sini nga balaan nga kasulatan sa iya panimalay. Magpauswag sang isa ka sulundan sang pag-alagad sa imo kabuhi paagi sa pagpili sang isa ka miyembro sang panimalay nga imo mabuligan. Alagari inang tawo sa labing kubos isa ka bulan. Irekord sa imo journal ang imo mga aksyon kag mga balatyagon parte sa kon paano ini nagpatin-ad sang imo kaangtanan sa sina nga tawo.
Maggamit sa labing kubos tatlo ka oras nga nagahatag sang pag-alagad sa gwa sang imo panimalay. Magpangayo sa imo pangulo sang Relief Society sa ward ukon branch ukon sa isa ka lider sang komunidad sang mga suhestyon para sa pag-alagad. Halimbawa, mahimo ka magtatap sang kabataan samtang ang mga ginikanan nagatambong sa templo; magtipon, maghimo, ukon magkaayo sang mga hampanganan ukon mga hinampang para sa isa ka nursery; magbaton sang isa ka takay sa pagtinlo sang mitinghouse; ukon magpati sa mga sugo ukon magbasa para sa isa ka tawo nga indi makahalin sa puluy-an [tungod sang balatian ukon kasablagan] ukon mga iban pa nga yara sa panginahanglan. Irekord sa imo journal ang mga reaksyon sang tawo nga imo gin-alagaran kag posible nga mga katuyuan para sa palaabuton nga mga oportunidad sa pag-alagad.
Paagi sa imo maayong mga buhat, makita sang iban ang imo halimbawa kag ayhan maluyag nga makahibalo pa gid sing dugang parte sa ebanghelyo. Magpangamuyo para sa isa ka pang-misyonaryo nga inagihan. Basaha ang Mateo 24:14; 28:19; kag Doctrine and Covenants 88:81. Mag-agda sang isa ka abyan nga indi miyembro sang Simbahan ukon isa ka tawo nga indi-gawa aktibo sa pagkadto upod sa imo sa isa ka miting ukon kahiwatan sa Simbahan. Ipakilala ang imo abyan sa iban, kag siguroha nga nagaentra sia sa kahiwatan. Ipaambit ang imo testimonya parte sa ebanghelyo, kag agdaha sia sa pagtambong liwat.

Pinasibo nga Mga Inagihan sa Panindugan

Proyekto sa Panindugan

Pagkatapos nga nakompleto mo ang anum ka mga inagihan sa panindugan nga maayong mga buhat, maghimo sang isa ka proyekto nga magabulig sa imo sa paggawi sang imo natun-an. Dapat ini mangin isa ka importante nga buluhaton nga magakinahanglan sa labing kubos napulo ka oras sa pagkompleto. Mainampuon nga magpangayo sang giya sang Balaan nga Espiritu sa pagpili sang isa ka makahulugan nga proyekto.

Paaprobahi sa imo ginikanan ukon lider ang proyekto antes ka magsugod. Magsulat sang isa ka ebalwasyon sa imo pagkahuman sini. Sa idalom amo ang pila ka mga ideya para sa isa ka proyekto sa panindugan.

Magbulig sa pagplano kag pag-entra sa isa ka proyekto sa pagtinlo ukon sa pagpatahum sang imo komunidad.
Maghanda nga mangin isa ka manugtatap sang puluy-an paagi sa pagtipon sang mga resipe, pagpangompra sang mga pagkaon kag paghanda sang mga kalan-on para sa imo panimalay.
Mag-obra upod sa isa ka miyembro sang panimalay sa pagtipon sang mga ngalan sang pila ka nagkalamatay na nga mga paryente nga indi nangin mga miyembro sang Simbahan. Pat-ura ang mga petsa sang ila pagkabun-ag kag pagkamatay kag ihanda ang ila mga ngalan agud dal-on sa templo. Magbulig sa pagplano sang isa ka pagbiyahe sa templo kag maghikot sang mga pagbunyag para sa sadtong mga paryente.
Maghanda sa pag-alagad sa iban paagi sa pagbaton sang paghanas para sa isa ka abilidad nga gamiton sa mga sitwasyon sang emerhensya, pareho sang first aid, pagpabalik sang pagginhawa ukon mga abilidad nga makaluwas sang kabuhi.
Mag-alagad sa iban. Magboluntaryo sa isa ka komunidad, magtipon sang mga butang sa pagsabat sang tawhanon nga mga panginahanglan, maggamit sang dugang nga tion sa pagbulig tatap sang isa ka bata ukon tigulang, ukon magtudlo sa eskuwelahan ukon sa imo komunidad.

Ang akon proyekto amo ang:

Ang akon plano sa paghimo sang akon proyekto amo ang:

Pagtugot

Ginabulobanta nga petsa sang pagkompleto

Ang akon ebalwasyon sang proyekto amo ang (isulat kon ano ang imo nabatyagan kag kon paano nagdugang ang imo paghangop parte sa maayong mga buhat):

Pirma sang ginikanan ukon lider

Petsa

Mga inoras nga nagamit