Katakos

Ang babayi nga takos sin-o bala ang makakita? kay ang iya bili labaw pa gid sa mga rubi (Mga Hulubaton 31:10).

Magahanda ako sa pagsulod sa templo kag magpabilin nga matinlo sing moral kag takos.

Ang akon mga panghunahuna kag mga buhat magasandig sa mataas nga mga sulundan sang moralidad.

Kinahanglanon nga mga Inagihan sa Panindugan

Kompletuha ang masunod nga apat ka kinahanglanon nga mga inagihan sa panindugan. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Ang katakos isa ka sulundan sang panghunahuna kag pamatasan nga nasandig sa mataas nga mga sulundan sang moralidad. Ini may dala nga kaputli [chastity] kag katinlo sing moral. Ang gahum sa pagtuga sang dutan-on nga kabuhi isa ka mataas nga gahum nga ginhatag sang Dios sa Iya mga anak. Iya ginmando nga ining gahum gamiton lamang sa tunga sang isa ka lalaki kag isa ka babayi, nga legal nga nakasal bilang mag-asawa. Tun-i ang kahulugan kag importansya sang kaputli kag katakos paagi sa pagbasa sang Jacob 2:28; “Ang Panimalay: Isa ka Proklamasyon sa Kalibutan” (tan-awa sa pahina 101); kag ang seksyon sa sekswal nga kaputli sa Para sa Kusog sang mga Lamharon.Basaha man ang Artikulo sang Pagtuo numero trese kag Mga Hulubaton 31:10–31. Sa imo journal, isulat ang ginpromisa nga mga bugay sang sekswal nga pagkatinlo kag katinlo sing moral kag ang imo pangako nga mangin putli.
Ang paggawi sing takos “sa tanan nga mga tinion kag sa tanan nga mga butang, kag sa tanan nga mga duog” nagapaangay sa imo sa dalayon nga pagpakig-upod sang Balaan nga Espiritu. Kon ikaw ginabunyagan kag ginakompirmar, ginahatagan ikaw sang dulot sang Balaan nga Espiritu sa paggiya sang tanan nga aspeto sang imo kabuhi. Bangod ang Balaan nga Espiritu wala nagapuyo sa mahigko nga mga tabernakulo, ang paggawi sing takos isa ka kinahanglanon agud maangkon ang pagpakig-upod sang Balaan nga Espiritu kag mabaton ang mga bugay sang mga ordinansa sang templo. Basaha ang masunod nga mga palasandigan sa balaan nga mga kasulatan kag hibalua ang mga ginpromisa nga mga bugay: Juan 14:26–27; 15:26; 2 Nefi 32:1–5; kag Doctrine and Covenants 45:57–59; 88:3–4; 121:45–46. Sa imo journal, irekord kon ano ang imo natun-an, kag isulat ang parte sa isa ka tion sang imo nabatyagan ang paggiya sang Balaan nga Espiritu.
Maghanda nga mangin takos sa pagsulod sa templo kag sa pagpartisipar sa mga ordinansa sang templo. Basaha ang Alma kapitulo 5. Maghimo sang listahan sang mga pamangkot ni Alma. Sabta ang mga pamangkot para sa imo kaugalingon , kag maghimo sang listahan sang mga butang nga sarang mo himuon kag pagahimuon mo sa paghanda sang imo kaugalingon nga mangin matinlo sing moral kag takos sa pagsulod sa templo kag sa pagbaton sang tanan nga mga bugay nga ginpromisa sang aton Amay nga Langitnon sa Iya pinalangga nga mga anak nga babayi.
Bangod ang Manluluwas nagapalangga sa imo kag naghatag sang Iya kabuhi para sa imo, sarang ka maghinulsol. Ang paghinulsol isa ka buhat sang pagtuo kay Jesucristo. Basaha ang Moroni 10:32–33, ang libro ni Enos, kag ang seksyon sa paghinulsol sa Para sa Kusog sang mga Lamharon. Ang sakripisyo sang Manluluwas nga tuboson kita gikan sa aton mga sala naghimo nga posible para sa imo nga mapatawad sang imo mga sala. Basaha ang pang-sakramento nga mga pangamuyo sa Doctrine and Covenants 20:77, 79. Pat-ura nga mag-ambit sing takos sang sakramento sa tagsa ka simana kag pun-a ang imo kabuhi sang maayong mga kahiwatan nga magadala sang espirituwal nga gahum. Sa imo paghimo sini, mangin mas mabaskog ka sa imo ikasarang sa pagbato sa tentasyon, pagtipig sang mga kasuguan, kag mangin mas pareho kay Jesucristo. Pat-ura kon ano ang sarang mo himuon sa adlaw-adlaw sa pagpabilin nga matinlo sing moral kag takos, kag isulat ang imo plano sa imo journal.

Proyekto sa Panindugan

Mahimo mo sugdan ining kinahanglanon nga proyekto sa panindugan sa bisan ano nga tion.

Ang Manluluwas nagpili nga maggawi sang kabuhi nga takos. Sunda ang Iya pagpahanumdom nga “magtuon sa akon” (tan-awa sa D&C 19:23) paagi sa pagbasa sang bilog nga Ang Libro ni Mormon: Isa pa ka Katipan nahanungod kay Jesucristo. Ipaanggid ang balaan nga mga kasulatan sa imo kabuhi kag mga sirkumstansya. Samtang nagabasa ka, irekord sing regular ang imo mga panghunahuna sa imo journal. Talupangda ang halimbawa sang Manluluwas. Ano ang ginhimo Niya kag sadtong mga nagsunod sa Iya sa paggawi sang takos nga mga kabuhi? Pagkatapos sang imo pagbasa, irekord ang imo testimonya.

“Ginsugiran ko ang mga kauturan nga Ang Libro ni Mormon amo ang labing husto sa ano man nga libro sa duta, kag amo ang bato nga pamag-ang sang aton relihiyon, kag ang isa ka tawo magmangin mas malapit sa Dios paagi sa pagsunod sang mga pagsulundan sini, sangsa diin man nga libro” (Joseph Smith, sa pauna sang Ang Libro ni Mormon).

Ang Akon Testimonya parte sa Ang Libro ni Mormon

“Kag kon inyo mabaton ining mga butang, ginalaygayan ko kamo nga mamangkot kamo sa Dios, ang Wala’y Katapusan nga Amay, sa ngalan ni Cristo, kon ining mga butang indi matuod; kag kon kamo mamangkot sa isa ka bunayag nga tagipusuon, sa matuod-tuod nga tinutuyo, nga may pagtuo kay Cristo, ipakita niya ang kamatuoran sini sa inyo, paagi sa gahum sang Balaan nga Espiritu” (Moroni 10:4).

Pirma sang ginikanan ukon lider

Petsa

Mga inoras nga nagamit