Indibidwal nga Bili

Dumduma nga ang bili sang mga kalag dako sa panulok sang Dios (tan-awa sa D&C 18:9–10).

May akon wala’y dulunan nga bili upod ang akon kaugalingon nga diosnon nga misyon, nga akon pagatinguhaan sa pagtuman.

Kinahanglanon nga mga Inagihan sa Panindugan

Kompletuha ang masunod nga tatlo ka kinahanglanon nga mga inagihan sa panindugan. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Isa ikaw ka anak nga babayi sang Amay nga Langitnon, nga nakakilala sa imo kag nagapalangga sa imo. Basaha ang Salmo 8:4–6; Jeremias 1:5; Juan 13:34; Doctrine and Covenants 18:10; Abraham 3:22–23; kag Joseph Smith—History 1:1–20. Isulat sa imo journal kon paano ining balaan nga mga kasulatan nagatudlo sa imo nga ang Amay nga Langitnon nakakilala sa imo, nagapalangga sa imo kag nagabantay sa imo.
Magtuon parte sa importansya sang mga patriarchal blessing paagi sa pagtuon sang mga ini saTrue to the Faith kag pinakaulihi nga mga pamulong-pulong sa komperensya. Hibaloa kon ngaa ginahatag ang mga ini kag kon sin-o ang makahatag sang mga ini. Hambali upod sa isa ka ginikanan ukon lider sang Simbahan kon paano maghanda sa pagbaton sang isa ka patriarchal blessing kag kon paano ini makatudlo sa imo parte sa imo bili kag pagkatawo kag mangin giya sa bilog mo nga kabuhi. Kon wala mo pa mabaton ang imo bendisyon, maghanda sa pagbaton sini.
Basaha ang Doctrine and Covenants 18:10 kag 121:45. Himoa ang tanan nga imo masarangan sa pagpauswag sang iban kag pagpabatyag sa ila nga importante sila. Kada adlaw sa sulod sang duha ka simana, talupangda ang mapuslanon nga mga kinaiya kag mga kinaugali sang iban. Kilalaha ang mga ini sa hambal ukon sa sulat. Sa imo journal, isulat kon ano ang imo natun-an parte sa bili sang mga indibidwal kag kon paano ang imo kaugalingon nga pagsalig nagatubo kon ginapauswag mo ang iban.

Dugang nga Mga Inagihan sa Panindugan

Kompletuha ang tatlo ka dugang nga mga inagihan sa panindugan. Mahimo ka nga makapili gikan sa masunod nga mga opsyon ukon magsulat tubtob sa duha sang imo kaugalingon. Kinahanglan aprobahan sang imo ginikanan ukon lider yadtong imo ginasulat mismo antes ka magsugod. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Ikaw karon nagahanda sa pagtuman sang isa ka pinasahi nga misyon sa duta. Basaha ang Doctrine and Covenants 88:119. Sa imo journal maghimo sang listahan sang imo mga paglaum kag mga handum para sa imo palaabuton nga puluy-an, panimalay, kag edukasyon kag pila ka importante nga mga butang nga luyag mo himuon sa imo kabuhi, dala ang pagmangin isa ka asawa kag iloy. Dayon magsulat sang isa ka plano nga magabulig sa imo sa paglab-ot sang imo mga tinutuyo. Ipaambit ini nga plano sa isa ka miyembro sang pamilya, lider, ukon abyan.
Mag-entra sa isa ka saot, pamulong-pulong, musika, ukon pasundayag sa drama sa eskuwelahan, sa imo komunidad, ukon sa simbahan. Paano bala ang imo pag-entra sa sini nga kahiwatan nagpabakod sang imo mga balatyagon sang indibidwal nga bili kag pagsalig sa kaugalingon? Irekord ang imo mga panghunahuna sa imo journal.
Kon magpartisipar ka sa family history, imo mahangpan ang imo pagkatawo kag indibidwal nga bili. Magbisita sa imo buhi nga mga paryente agud hibaluon ang kadamuon sang impormasyon nga sarang makuha parte sa kasaysayan sang imo pamilya. Dayon magkompleto sang isa ka pedigree chart [tsart sang kaliwat] sang imo panimalay kag listaha ang mga ordinansa sang templo nga nakompleto na para sa tagsa ka tawo.
Ang Amay nga Langitnon naghatag sa imo sang pinasahi nga mga dulot. Basaha ang 1 Mga Taga-Corinto 12:4–12; 13; Moroni 7:12–13; 10:8–18; kag Doctrine and Covenants 46:11–26. Pangabaya ang isa ka miyembro sang panimalay, isa ka lider sang Young Women, kag isa ka abyan sa pagsulat sang positibo nga mga kinaiya nga ginhatag sang Ginuo sa imo. Listaha ang imo mga dulot sa imo journal, kag isulat kon paano mo mapadayon ang pagpauswag sining mga dulot kag paggamit sang mga ini sa pag-alagad sa imo panimalay kag sa iban.

Pinasibo nga Mga Inagihan sa Panindugan

Proyekto sa Panindugan

Pagkatapos nga nakompleto mo ang anum ka mga inagihan sa panindugan nga indibidwal nga bili, maghimo sang isa ka proyekto nga magabulig sa imo sa paggawi sang imo natun-an. Dapat ini mangin isa ka importante nga buluhaton nga magakinahanglan sa labing kubos napulo ka oras sa pagkompleto. Mainampuon nga magpangayo sang giya sang Balaan nga Espiritu sa pagpili sang isa ka makahulugan nga proyekto.

Paaprobahi sa imo ginikanan ukon lider ang proyekto antes ka magsugod. Magsulat sang isa ka ebalwasyon sa imo pagkahuman sini. Sa idalom amo ang pila ka mga ideya para sa isa ka proyekto sa panindugan.

May yara ka sang pinasahi kag diosnon nga misyon nga buhaton sa duta kag ginbugayan sang mga talento sa paghimo sining misyon. Sa imo pagkompleto sang isa sang masunod nga mga proyekto, masaksihan mo ang kaimportante kag kapuslanan sang iban kag makita man ang imo impluwensya sa mga kabuhi sang iban. Ipabutyag ang imo kapasalamatan sa yadtong imo mga nakaupod sa pag-obra, kag irekord ang imo mga inagihan sa imo journal.

Tipuna ang imo personal ukon pangpanimalay nga kasaysayan nga ginagamit ang mga sinulatan sa journal, mga larawan, kag importante nga mga papeles.
Magpaambit sang isa sang imo mga dulot paagi sa pagpanulin ukon pagtudlo sa isa ka tawo sang isa ka tulun-an sa eskwelahan, musika, isa ka hampang, ukon isa ka matinugahon nga abilidad.
Maghimo sang isa ka proyekto sa pagpatin-ad sang sitwasyon sa pangabuhi sang isa ka tawo nga yara sa panginahanglan.
Magdumala ukon mag-entra sa isa ka koro sang mga lamharon, isa ka drama, isa ka pagpasundayag sang mga talento, ukon isa ka art exhibit.
Magtuon sang isa ka makuwartahan nga abilidad nga makabulig sa imo sa isa ka palangabuhian sa karon nga panahon ukon sa palaabuton.

Ang akon proyekto amo ang:

Ang akon plano sa paghimo sang akon proyekto amo ang:

Pagtugot

Ginabulobanta nga petsa sang pagkompleto

Ang akon ebalwasyon sang proyekto amo ang (isulat kon ano ang imo nabatyagan kag kon paano nagdugang ang imo paghangop parte sa indibidwal nga bili):

Pirma sang ginikanan ukon lider

Petsa

Mga inoras nga nagamit