Kasumahan sang Programa para sa Young Women

Katuyuan sang Personal nga Pag-uswag

Ang Personal nga Pag-uswag magabulig sa imo sa pagpabakod sang imo pagtuo kag testimonya kay Jesucristo samtang ginatun-an mo ang Iya mga pagpanudlo kag regular nga ginagawi ang mga ini sa imo kabuhi. Magabulig ini sa imo sa pagpabakod alangay sang imo karon nga pamilya kag sang imo palaabuton nga pamilya. Magabulig ini sa imo nga maghanda sa paghimo kag pagtipig sang sagrado nga mga kasugtanan kag pagbaton sang mga ordinansa sang templo. Kag magahanda ini sa imo nga mangin isa ka tampad, mapuslanon nga miyembro sang Ang Simbahan ni Jesucristo sang mga Santos sa Ulihing mga Adlaw.

Ang programa sang Personal nga Pag-uswag nagagamit sang walo ka mga panindugan sang Young Women sa pagbulig sa imo nga mahangpan sing mas bug-os kon sin-o ka, kon ngaa yari ka diri sa duta, kag kon ano ang imo dapat nga ginahimo bilang isa ka anak nga babayi sang Dios agud maghanda para sa adlaw nga magkadto ka sa templo sa paghimo sang sagrado nga mga kasugtanan. Magabulig ini sa imo sa paghanda para sa imo palaabuton nga mga papel bilang isa ka tampad nga babayi, asawa, iloy, kag lider sa ginharian sang Dios. Ang pagpartisipar sa Personal nga Pag-uswag nagatudlo sa imo sa paghimo sang mga pangako, sa pagtuman sang mga ini, kag pagreport sang imo pag-uswag sa isa ka ginikanan ukon lider. Ang mga sulundan nga imo ginatuman samtang ginahimo mo ang Personal nga Pag-uswag—pareho sang pangamuyo, pagtuon sang balaan nga mga kasulatan, pag-alagad, kag pagsulat sa journal— mangin personal nga adlaw-adlaw nga mga pamatasan. Ining mga pamatasan magapabakod sang imo testimonya kag magabulig sa imo sa pagtuon kag pag-uswag sa bilog mo nga kabuhi.

Mga Kinahanglanon

Agud makompleto ang programa sang Personal nga Pag-uswag, kinahanglan mo nga:

Magtambong sing regular sa sakrament miting (kon posible).
Maggawi sang mga sulundan sa Para sa Kusog sang mga Lamharon.
Magkompleto sang mga inagihan sa panindugan kag isa ka proyekto sa panindugan para sa tagsa sang walo ka mga panindugan.
Magsulat sa isa ka personal nga journal.
Magtambong sa seminary ukon magpartisipar sa programa sang indibidwal nga pagtuon sang ebanghelyo (kon may yara).
Magbasa sing regular sang Ang Libro ni Mormon.
Magrekord sang imo testimonya parte sa Manluluwas nga si Jesucristo.

Pagkahuman sining mga kinahanglanon, mangin kalipikado ka sa pagbaton sang Pagkilala sang Young Womanhood pagkatapos sang isa ka interbyu sa katakos upod sa imo bishop ukon branch president.

Paano Magsugod

Mahimo ka nga magsugod sa programa sang Personal nga Pag-uswag sa edad nga12 ukon sa tion sang imo pagbunyag kon yara ka sa tunga sang mga pangidaron nga 12 kag 18. Ang young women nga indi miyembro sang Ang Simbahan ni Jesucristo sang mga Santos sa Ulihing mga Adlaw ginaabiabi man sa pagpartisipar.

Sa imo pagsugod, magabaton ka sang isa ka sulo nga kulintas nga may yara sang logo nga sulo sang Young Women sa ini. Ang pagsuksok sining kulintas nagapakita sang imo pangako sa pagpaiwag sang imo kapawa kag sa pagtindog para sa kamatuoran kag pagkamatarong.

Agdaha ang imo mga ginikanan sa pagbulig sa imo sa pagplano kag pagkompleto sang programa sang Personal nga Pag-uswag. Ang pagpaambit sining mga inagihan makapabakod sang imo kaangtanan sa ila. Ang imo iloy ukon isa pa gid ka dalayawon nga babayi mahimo mag-obra sa Personal nga Pag-uswag upod sa imo, kag mahimo ninyo maangkon ang Pagkilala sang Young Womanhood sing upod. Mahimo mo ilisan ang mga inagihan kag mga proyekto suno sa imo personal nga mga sirkumstansya, mga interes, kag mga panginahanglan nga may pagtugot na ngadaan sang isa ka ginikanan, isa ka lider sang Young Women, ukon isa pa gid ka hamtong.

Ang Personal nga Pag-uswag mahimo nga mangin kabahin sang maayong mga butang nga imo ginahimo sa puluy-an, simbahan, eskuwelahan, seminary, kag sa komunidad. Gamita ang index sa topiko sa likod sining libro sa pagpangita sang pat-od nga mga topiko nga interesado ka kag sa pagtuon kon paano ang mga ini sarang gamiton bilang kabahin sang Personal nga Pag-uswag. Dumdumon ang maghatag sang kredito sa imo kaugalingon para sa tanan nga maayong mga butang nga imo ginahimo sa tagsa ka adlaw. “Paagi sa diutay kag yano nga mga butang ginapahanabo ang dalagko nga mga butang” (Alma 37:6).

Mga Sulundan

Pagakompletuhon mo ang anum ka mga inagihan (tatlo nga kinahanglanon kag tatlo nga opsyunal) kag isa ka napulo-ka-oras nga proyekto sa tagsa sang una nga pito ka mga panindugan sang Young Women. Para sa panindugan nga katakos, imo pagakompletuhon ang apat ka kinahanglanon nga mga inagihan kag ang kinahanglanon nga proyekto sang pagbasa sang Ang Libro ni Mormon. Mahimo ka nga magsugod sa pagpili sang bisan ano nga panindugan kag mag-obra sa bisan ano nga pagpasunod.

Kon nakompleto mo na ang isa ka inagihan sa panindugan ukon isa ka proyekto sa panindugan, repasuha ini upod sa isa ka ginikanan, isa ka lider, ukon isa pa gid ka hamtong. Painisyali sa sina nga tawo [pirmahan sang una nga mga letra sang ngalan] ang nakompleto nga inagihan sa imo libro sang Personal nga Pag-uswag. Magtago sang rekord sang imo pag-uswag sa Talian nga Rekord sang Personal nga Pag-uswag (tan-awa sa pahina 77).

Mga Inagihan sa Panindugan

Ginarekomendar nga kompletuhon mo ang kinahanglanon nga mga inagihan sa isa ka panindugan antes magsugod sa opsyunal nga mga inagihan sa sina nga panindugan.
Sa opsyunal nga mga inagihan sa panindugan, mahimo ka nga magsulat tubtob sa duha sang imo kaugalingon nga mga inagihan sa tagsa ka panindugan ukon mag-ilis sang natigana nga mga inagihan agud ipabagay sa imo personal nga mga interes, mga tinutuyo, ukon mga sirkumstansya. Paaprobahi ang mga ini sa isa ka ginikanan, isa ka lider, ukon isa pa gid ka hamtong antes ka magsugod.

Mga Proyekto sa Panindugan

Kompletuha ang kinahanglanon nga mga inagihan sa isa ka panindugan antes magsugod sang proyekto sa sina nga panindugan, magluwas lang sang panindugan nga katakos. Mahimo ka magsugod sa pagbasa sang Ang Libro ni Mormon sa bisan ano nga tion.
Paaprobahi ang tagsa ka proyekto sa panindugan sa isa ka ginikanan, isa ka lider, ukon isa pa gid ka hamtong antes ka magsugod.
Mahimo mo agdahon ang iban nga magbulig sa imo sa imo mga proyekto sa panindugan, pero ang tagsa ka proyekto dapat mahatagan sa labing kubos napulo ka oras sang imo kaugalingon nga tiempo.

Kadasigon sang Pag-uswag kag Pagkilala

Mahimo ka mag-obra suno sa imo kaugalingon nga kadasigon, pero dapat nga dalayon ka nga naga-obra sa labing kubos isa ka inagihan ukon proyekto. Ang masunod ginarekomendar:
- Magkompleto sa labing kubos isa ka inagihan tagsa ka bulan kag isa ka proyekto tagsa ka anum ka bulan (duha ka proyekto sa isa ka tuig).
- Magtambong sing regular sa sakrament miting kag magpartisipar sa seminary (kon posible).
- Makigkita sa isa ka miyembro sang imo bishopric sa labing kubos kis-a sa isa ka tuig agud hambalan ang imo kadalag-an sa Personal nga Pag-uswag, ang imo mga pagtinguha sa paggawi sang mga sulundan sa Para sa Kusog sang mga Lamharon, kag bisan ano nga mga pamangkot nga mahimo may yara ka.
Kon ang tanan nga mga inagihan kag ang proyekto sa isa ka panindugan nakompleto na, ang imo lider magakilala sang imo hinimuan sa isa ka miting sang Young Women kag magapresentar sa imo sang isa ka simbolo nga ibutang sa imo Hinimuan sa Panindugan sa Personal nga Pag-uswag nga pahina sa sini nga libro (tan-awa sa pahina 78) kag isa ka laso nga ibutang sa imo balaan nga mga kasulatan.
Makaangkon ka sang oportunidad sa pagpaambit sang imo mga hinimuan sa Personal nga Pag-uswag sing tuigan sa Halangdon nga Young Women.
Ang imo kadalag-an sa Personal nga Pag-uswag mahimo man makita kon mabaton mo ang imo mga sertipiko sang Beehive, Mia Maid, kag Laurel samtang nagauswag ka gikan sa isa ka klase pakadto sa isa.

Pagkompleto sang Personal nga Pag-uswag

Kon nakompleto mo na ang tanan nga mga inagihan kag mga proyekto sa panindugan sang Personal nga Pag-uswag, isulat ang imo testimonya parte sa Manluluwas nga si Jesucristo sa pahina 79. Repasuha ang “Pagkilala sang Young Womahood” nga seksyon sini nga libro upod sa isa ka ginikanan, isa ka lider, ukon isa pa gid ka hamtong (pahina 76). Dayon magskedyul sang isa ka pagpainterbyu sa imo bishop agud mapirmahan niya ang rekomendasyon sa pahina 82 kag maplano ang pagpresentar sang imo sertipiko kag medalyon sa Pagkilala sang Young Womanhood.
Ginarekomendar nga mag-obra ka sa Personal nga Pag-uswag sa bilog mo nga tion sa Young Women, bisan pagkatapos nga nabaton mo na ang Pagkilala sang Young Womanhood. Ang mga panugyan sa kon paano padayunon ang pag-uswag yara sa seksyon nga “Ano ang Akon Himuon Kon Makompleto Ko ang Personal nga Pag-uswag?” (pahina 83). Repasuha ini upod sa isa ka ginikanan, isa ka lider, ukon isa pa gid ka hamtong. Mahimo ka magpili nga maangkon ang Honor Bee charm nga ipahamtang sa imo kulintas upod sa imo medalyon, ukon mahimo mo suliton ang bilog nga programa. Ginapaisog ka man nga buligan ang iban nga young women sa ila Personal nga Pag-uswag. Paagi sa pagpadayon sang imo pag-uswag, magapabilin ka sa alagyan padulong sa templo kag magapauswag sang mga kinaiya nga magabulig sa imo sa bilog mo nga kabuhi.