Pagpili kag Pagkamay Salabton

Magpili kamo sini nga adlaw kon sin-o ang inyo alagdon; …apang nahanungod sa akon kag sa akon panimalay, magaalagad kami sa Ginuo (Josue 24:15).

Magapili ako sang maayo sangsa malain kag magabaton sang responsibilidad para sa akon mga desisyon.

Kinahanglanon nga mga Inagihan sa Panindugan

Kompletuha ang masunod nga tatlo ka kinahanglanon nga mga inagihan sa panindugan. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Ang isa ka anak nga babayi sang Dios makahimo sang maalam nga mga desisyon kag makasolbar sang mga problema. Basaha ang 1 Nefi 15:8; 2 Nefi 32:3; Alma 34:19–27; Eter 2–3; kag Doctrine and Covenants 9:7–9. Magtuman sang isa ka sulundan sang tayuyon nga pagtuon sang balaan nga mga kasulatan kag pagpangamuyo agud makabaton sang bulig sa paghimo sang personal nga mga desisyon pareho sang pagpili sang maayo nga mga kaabyanan, pagmangin maayo sa iban, pagbugtaw sa husto nga tion, ukon iban pa nga mga desisyon. Hambali upod sa isa ka ginikanan ukon lider kon paano ang regular nga pagtuon sang balaan nga mga kasulatan kag pagpangamuyo nakabulig sa imo sa paghimo sang husto nga mga desisyon.
Basaha ang brosyur nga Para sa Kusog sang mga Lamharon. Listaha sa imo journal ang tagsa ka sulundan sang matarong nga pamatasan nga ginasulat sa brosyur, kag irekord kon ngaa importante ang magpili sa paggawi sinang mga sulundan. Maggawi sang matarong nga mga sulundan paagi sa pagpili sang tatlo sining mga sulundan nga sa diin kinahanglan mo magtin-ad. Mahimo nga pilion mo ang mangin mas mapili parte sa telebisyon, musika, mga libro, ukon iban pa nga media, ukon mahimo mo nga mapatin-ad ang imo kaugdang, panghambal, ukon pagkamatinud-anon. Pagkatapos sang tatlo ka simana, ipaambit ang imo pag-uswag sa imo panimalay, sa imo klase, ukon sa isa ka lider.
Ang pagbuot, ukon ang ikasarang sa pagpili, isa sang pinakadako nga mga dulot sang Dios sa Iya kabataan. Magbasa parte sa pagbuot sa Josue 24:15; 2 Nefi 2; kag Doctrine and Covenants 82:2–10. Upod sa isa ka ginikanan ukon lider, hambali ang parte sa mga bugay kag mga responsibilidad sang pagbuot. Irekord sa imo journal ang imo paghangop sang pagbuot kag ang mga bunga sang mga pagpili kag mga buhat.

Dugang nga Mga Inagihan sa Panindugan

Kompletuha ang tatlo ka dugang nga mga inagihan sa panindugan. Mahimo ka nga makapili gikan sa masunod nga mga opsyon ukon magsulat tubtob sa duha sang imo kaugalingon. Kinahanglan aprobahan sang imo ginikanan ukon lider yadtong imo ginasulat mismo antes ka magsugod. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Magbasa parte sa paghinulsol sa Isaias 1:18; Alma 26:22; 34:30–35; Moroni 8:25–26; kag Doctrine and Covenants 19:15–20; 58:42–43. Irekord sa imo journal kon ano ang kahulugan sa imo sang paghinulsol. Tun-i ang proseso sang paghinulsol, magpangamuyo para sa giya, kag igawi ang mga prinsipyo sang paghinulsol sa imo kabuhi.
Ang Balaan nga Espiritu magabulig sa imo sa paghimo sang husto nga mga pagpili. Upod sa isa ka ginikanan, lider, ukon abyan, magtuon sing dugang parte sa Balaan nga Espiritu paagi sa pagbasa kag paghambal parte sa Ezequiel 36:26–27; Juan 14:26; 16:13; Mga Taga-Galacia 5:22–25; 2 Nefi 32:5; Moroni 10:4–5; kag Doctrine and Covenants 11:12–14. Dayon irekord sa imo journal kon paano ang Balaan nga Espiritu makabulig sa imo sa paghimo sang maayo nga mga desisyon sa imo adlaw-adlaw nga kabuhi. Magpangamuyo para sa kag maggawi nga takos sang dalayon nga pagpakig-upod sang Balaan nga Espiritu.
Tun-i ang tema sang Young Women kag kon ano ang ginatudlo sini sa imo parte sa kon sin-o ka, kon ano ang imo pagahimuon, kag kon ngaa pagahimuon mo ini. Listaha sa imo journal kon ano ang imo pagahimuon sa tagsa ka adlaw parte sa kaugdang, pagpakig-date, kag sa media agud mangin matinlo sing moral kag takos sa pagsulod sa templo. Irekord sa imo journal kon paano ining mga pagpili magabulig sa imo sa pagpabilin nga hilway kag malipayon.
Ang paghimo sang mga pagpili kabahin sang plano sang Amay nga Langitnon para sa aton. Basaha ang Moses 4:1–4; 7:32; kag 2 Nefi 9:51. Magsugod sang isa ka sulundan sang maalam nga pagdumala sang kuwarta paagi sa paghimo sang isa ka badyet para sa pagsupot kag paggasto sang imo kuwarta, dala ang pagbayad sang ika-pulo. Maggasto sang imo kuwarta suno sa badyet nga imo ginplastar sa labing kubos tatlo ka bulan. Magpahamtang sang mga prioridad nga nagatugot sa imo sa pagsabat sang imo labing importante nga mga panginahanglan antes magbakal sang mga butang nga imo luyag apang indi gid man kinahanglanon. Irekord sa imo journal kon ano ang imo natun-an kag kon paano ang pagsunod sining mga sulundan magapadayon sa pagpakamaayo sang imo kabuhi.

Pinasibo nga Mga Inagihan sa Panindugan

Proyekto sa Panindugan

Pagkatapos nga nakompleto mo ang anum ka mga inagihan sa panindugan nga pagpili kag pagkamay salabton, maghimo sang isa ka proyekto nga magabulig sa imo sa paggawi sang imo natun-an. Dapat ini mangin isa ka importante nga buluhaton nga magakinahanglan sa labing kubos napulo ka oras sa pagkompleto. Mainampuon nga magpangayo sang giya sang Balaan nga Espiritu sa pagpili sang isa ka makahulugan nga proyekto.

Paaprobahi sa imo ginikanan ukon lider ang proyekto antes ka magsugod. Magsulat sang isa ka ebalwasyon sa imo pagkahuman sini. Sa idalom amo ang pila ka mga ideya para sa isa ka proyekto sa panindugan.

Nga nagagamit sang Para sa Kusog sang mga Lamharon kag sa idalom sang direksyon sang imo mga ginikanan ukon mga lider, magtukod ukon mag-entra sa isa ka seminar, fashion show ukon iban pa nga kahiwatan agud makabulig sa imo kag sa iban pa nga mga lamharon sa pagpili sa paggawi sang mga sulundan sang Ginuo.
Sa idalom sang direksyon sang imo mga ginikanan ukon mga lider, magbulig sa pagplano kag pagdumala sang isa ka sinaot sang mga lamharon ukon iban pa nga kahiwatan nga nagapakita sang nagakaigo nga instruksyon sa pagsaot kag maayo nga musika, kasanagon, kag palibot.
Ebalwaha ang imo paggamit sang media kag teknolohiya. Magtuga kag mag-implementar sang isa ka plano sa pagpugong sang indi nagakabagay nga media sa pagsulod sa imo puluy-an. Siguroha nga ang imo plano nagapaisog sang makapaayo nga paggamit sang telebisyon, mga sine, musika, mga kompyuter, Internet, mga cell phone, kag iban pa nga mga sahi sang media sa puluy-an. Ipaambit ang imo ideya sa imo panimalay kag sa iban.
Magtuon sang tig-una nga pagliwat sang mga panapton kag mga pamaagi sa pagpanursi samtang ginapasibo mo ang imo mga bayo suno sa mga sulundan sang maugdang nga pagpamiste.
Magpili nga mangin mas mahipid sa imo puluy-an paagi sa pagkompleto sang isa ka proyekto sang pagpaninlo ukon pagpanghimos. Irekord sa imo journal kon paano ang paghimo sini nagbulig sa imo sa iban nga aspeto sang imo kabuhi.

Ang akon proyekto amo ang:

Ang akon plano sa paghimo sang akon proyekto amo ang:

Pagtugot

Ginabulobanta nga petsa sang pagkompleto

Ang akon ebalwasyon sang proyekto amo ang (isulat kon ano ang imo nabatyagan kag kon paano nagdugang ang imo paghangop parte sa pagpili kag pagkamay salabton):

Pirma sang ginikanan ukon lider

Petsa

Mga inoras nga nagamit