1 Kag karon natabo ini nga pagkatapos nga mahambal ni Alma ining mga pulong sa ila nagpungko sia sa duta, kag nagtindog si Amulek kag nagsugod sa pagtudlo sa ila nga nagasiling:

2 Mga kauturan ko, ginahunahuna ko nga imposible nga indi ninyo mahibal-an ang mga butang nga ginpanghambal parte sang pagkari ni Cristo, nga ginatudlo namon nga amo ang Anak sang Dios; huo, nahibal-an ko nga ining mga butang maalwan nga ginpanudlo sa inyo antes sang inyo pagsipak sa amon.

3 Kag tungod nagpangabay kamo sa akon pinalangga nga utod nga ipahibalo niya sa inyo kon ano ang inyo dapat himuon, tungod sang inyo mga pag-antos; kag naghambal sia sa inyo nga maghanda sang inyo mga kaisipan; huo, ginlaygayan niya kamo tuhoy sa pagtuo kag sa pagpaumod—

4 Huo, bisan pa nga magaangkon kamo sang pagtuo nga igo lang sa pagtanom sang pulong sa inyo mga tagipusuon, agud matilawan ninyo nga mag-eksperimento sang iya sini kaayo.

5 Kag nakita namon nga ang dako nga pamangkot nga yara sa inyo mga kaisipan amo ang kon bala ang pulong yara sa Anak sang Dios, ukon kon bala mangin wala sang Cristo.

6 Kag nakita man ninyo nga napamatud-an sang akon utod sa inyo, sa madamo nga beses, nga ang pulong yara kay Cristo padulong sa kaluwasan.

7 Ang akon utod nagsambit sang mga pulong ni Zenos, nga ang pagtubos nagaabot paagi sa Anak sang Dios, kag amo man sa mga pulong ni Zenoc; kag ginsambit man niya si Moises, agud ipakita nga ining mga butang matuod.

8 Kag karon, tan-awa, magapamatuod ako sa akon kaugalingon nga kabubut-on nga ining mga butang matuod. Tan-awa, ginasiling ko sa inyo, nga nakahibalo ako nga si Cristo magakari sa mga anak sang katawhan, agud dal-on sa iya kaugalingon ang mga kalapasan sang iya katawhan, kag magabayad sia para sa mga sala sang kalibutan; kay ang Ginuong Dios naghambal sini.

9 Kay kinahanglanon gid nga himuon ang pagbayad-sala; kay suno sa dako nga plano sang Wala’y Katapusan nga Dios kinahanglan gid nga may pagbayad-sala nga himuon, indi gani ang tanan nga tawo pat-od gid nga madula; huo, ang tanan nagpakatig-a; huo, ang tanan nalaglag kag nagtalang, kag pat-od gid nga madula luwas lang nga ini paagi sa pagbayad-sala nga kinahanglanon gid nga himuon.

10 Kay kinahanglanon gid nga mangin may isa ka dako kag katapusan nga halad; huo, indi isa ka halad nga tawo, kag indi man sapat, kag indi man bisan ano nga sari sang pispis; kay indi ini mangin isa ka tawhanon nga halad; kundi nga kinahanglan gid ini nga mangin isa ka wala’y dulonan kag wala’y katapusan nga halad.

11 Karon wala sing bisan sin-o nga tawo nga makahalad sang iya kaugalingon nga dugo nga magabayad para sa mga sala sang iban. Karon, kon ang isa ka tawo nakapatay; tan-awa ang aton bala layi, nga matarong, magakuha sang kabuhi sang iya utod? Ginasiling ko sa inyo, Indi.

12 Kundi ang layi nagapangayo sang kabuhi niya nga nakapatay; gani wala sing bisan ano nga butang nga kabus sa wala’y dulonan nga pagbayad-sala nga mangin igo na para sa mga sala sang kalibutan.

13 Gani, kinahanglanon gid nga mangin may isa ka dako kag katapusan nga halad, kag dayon mangin may, ukon kinahanglanon gid nga mangin may, pag-untat sang pagpaagay sang dugo; dayon ang layi ni Moises matuman; huo, tanan ini matuman, ang tagsa ka pintok kag kudlit, kag wala sing bisan ano nga indi matuman.

14 Kag tan-awa, amo ini ang bug-os nga kahulugan sang layi, ang tagsa ka tinipik nagatudlo sa sinang dako kag katapusan nga halad; kag inang dako kag katapusan nga halad amo ang Anak sang Dios, huo, wala’y dulonan kag wala’y katapusan.

15 Kag gani magadala sia sang kaluwasan sa tanan nga magapati sa iya ngalan; ini nga amo ang tinutuyo sining katapusan nga halad, nga pukawon ang mga balatyagon sang kaluoy, nga magadaug sang hustisya, kag magadala sang paagi sa mga tawo agud makaangkon sila sang pagtuo padulong sa paghinulsol.

16 Kag gani ang kaluoy makasabat sang mga ginapangayo sang hustisya, kag nagalikop sa ila sa mga butkon sang kasigurohan, samtang sia nga wala nagagamit sang pagtuo padulong sa paghinulsol sakop sang bug-os nga layi nga ginapangayo sang hustisya; gani sa iya lamang nga may pagtuo padulong sa paghinulsol nagaepekto ang dako kag wala’y katapusan nga plano sang pagtubos.

17 Gani kabay nga itugot sa inyo sang Dios, mga kauturan ko, nga magsugod kamo sa paggamit sang inyo pagtuo padulong sa paghinulsol, nga magsugod kamo sa pagpanawag sa iya balaan nga ngalan, agud nga kaluoyan niya kamo;

18 Huo, mag-ampo sa iya agud kaluoyan kamo; kay gamhanan sia sa pagluwas.

19 Huo, ipaubos ang inyo mga kaugalingon, kag magpadayon sa pagpangamuyo sa iya.

20 Mag-ampo sa iya kon yara kamo sa inyo mga uma, huo, para sa tanan ninyo nga mga panong.

21 Mag-ampo sa iya sa inyo mga balay, huo, para sa bug-os ninyo nga panimalay, sa aga, sa udtong-adlaw, kag sa gab-i.

22 Huo, mag-ampo sa iya batok sa gahum sang inyo mga kaaway.

23 Huo, mag-ampo sa iya batok sa yawa, nga amo ang kaaway sang tanan nga pagkamatarong.

24 Mag-ampo sa iya para sa mga patubas sang inyo mga uma agud mag-uswag kamo sa mga ini.

25 Mag-ampo para sa mga panong sang inyo mga uma agud magdamo ang mga ini.

26 Apang indi lamang ini; kinahanglan gid nga ibubo ninyo ang inyo mga kalag sa sulod sang inyo mga kwarto, kag sa inyo sekreto nga mga lugar, kag sa inyo mga kamingawan.

27 Huo, kag kon wala kamo nagaampo sa Ginuo, tugoti ang inyo mga tagipusuon nga mapuno, nga dalayon nga nagapangamuyo sa iya para sa inyo kaayohan, kag para man sa kaayohan sinang mga yara sa inyo palibot.

28 Kag karon, tan-awa pinalangga kong mga kauturan, ginasiling ko sa inyo, indi paghunahunaa nga amo lamang ini; kay pagkatapos nga nahimo na ninyo ining tanan nga butang, kon talikdan ninyo ang mga nagakinahanglan, kag ang hublas, kag indi pagbisitahan ang mga masakiton kag mga nagaantos, kag maghatag sang inyo manggad, kon may yara kamo, sa sinang mga nagakinahanglan—ginasiling ko sa inyo, kon indi ninyo paghimuon ang diin man sining mga butang, tan-awa, ang inyo pangamuyo wala sing pulos, kag wala kamo sing makuha, kag pareho kamo sang mga hipokrito nga nagapanghiwala sang pagtuo.

29 Gani, kon indi ninyo pagdumdumon ang mangin mahigugmaon sa isigkatawo, pareho kamo sang lagdo nga ginabasya sang manugtinlo, (ini nga wala sing pulos) kag ginatasak sang mga tiil sang mga tawo.

30 Kag karon, mga kauturan ko, luyag ko nga, pagkatapos nga nabaton ninyo ang madamo kaayo nga saksi, tungod nga ang balaan nga mga kasulatan nagapamatuod sining mga butang, magpalapit kamo kag magdala sang bunga nga nagakaigo sa paghinulsol.

31 Huo, luyag ko nga magpalapit kamo kag indi na magpatig-a sang inyo mga tagipusuon; kay tan-awa, subong na ang tion kag ang adlaw sang inyo kaluwasan; kag gani, kon maghinulsol kamo kag indi magpatig-a sang inyo mga tagipusuon, sa gilayon ang dako nga plano sang pagtubos mapahanabo sa inyo.

32 Kay tan-awa, ini nga kabuhi amo ang tion nga maghanda ang mga tawo agud mag-atubang sa Dios; huo, tan-awa ang adlaw sini nga kabuhi amo ang adlaw nga maghikot ang mga tawo sang ila mga pagpangabudlay.

33 Kag karon, pareho sang ginsiling ko sa inyo sang una, tungod nakaangkon kamo sang madamo kaayo nga saksi, gani, nagapakitluoy ako sa inyo nga indi ninyo pagpabuyan-buyanan ang adlaw sang inyo paghinulsol tubtob sa katapusan; kay pagkatapos sini nga adlaw sang kabuhi, nga ginhatag sa aton agud maghanda para sa wala’y katapusan, tan-awa, kon indi naton pagkaayohon ang aton tion samtang yara kita sa sini nga kabuhi, magaabot ang gab-i sang kadudulman nga sa diin wala na sing pagpangabudlay nga mahimo.

34 Indi kamo makasiling, kon yara na kamo sa sinang makahaladlok nga krisis, nga magahinulsol ako, nga magabalik ako sa akon Dios. Indi, indi kamo makasiling sini; kay inang amo gihapon nga espiritu nga nagaangkon sang inyo mga lawas sa tion nga maggwa kamo sa sining kabuhi, inang amo gihapon nga espiritu ang mangin may gahum sa pag-angkon sang inyo lawas sa sinang wala’y katapusan nga kalibutan.

35 Kay tan-awa, kon ginpabuyan-buyanan ninyo ang adlaw sang inyo paghinulsol bisan tubtob sa kamatayon, tan-awa, nasakop kamo sang espiritu sang yawa, kag pat-inan niya kamo nga iya; gani, ang Espiritu sang Ginuo magapalayo sa inyo, kag wala sing lugar sa inyo, kag ang yawa may bug-os nga gahum sa inyo; kag amo ini ang katapusan nga kahimtangan sang mga malain.

36 Kag ini nahibal-an ko, tungod ang Ginuo nagsiling nga wala sia nagapuyo sa di-balaan nga mga templo, kundi sa mga tagipusuon sang mga matarong sia nagapuyo; huo, kag nagsiling man sia nga ang mga matarong magapungko sa iya ginharian, agud indi na maggwa pa; apang ang ila mga biste dapat nga mapaputi paagi sa dugo sang Kordero.

37 Kag karon, pinalangga kong mga kauturan, luyag ko nga dumdumon ninyo ining mga butang, kag dapat ninyo hikoton ang inyo kaluwasan nga may kahadlok sa atubang sang Dios, kag indi na ninyo pagpanghiwalaon ang pagkari ni Cristo;

38 Nga indi na ninyo pagbatuan pa ang mga pagpabatyag sang Balaan nga Espiritu, kundi nga batonon ninyo ini, kag dal-on sa inyo kaugalingon ang ngalan ni Cristo; nga ipaubos ninyo ang inyo mga kaugalingon bisan tubtob sa yab-ok, kag simbahon ang Dios, kon sa bisan diin man kamo nga lugar, sa espiritu kag sa kamatuoran; kag magpangabuhi kamo nga nagapasalamat adlaw-adlaw, sa madamo nga mga kaluoy kag mga bugay nga iya ginahatag sa inyo.

39 Huo, kag ginalaygayan ko man kamo, mga kauturan ko, nga magbantay kamo sa pagpangamuyo sing dalayon, agud indi kamo madala sang mga pagsulay sang yawa, agud indi niya kamo madaug, agud indi niya kamo mangin sakop sa katapusan nga adlaw; kay tan-awa, wala sia sang maayo nga butang nga igapadya sa inyo.

40 Kag karon pinalangga kong mga kauturan, luyag ko kamo nga laygayan nga magpaumod, kag batason ninyo ang tanan nga sari sang mga pag-antos; nga indi kamo magpasipala batok sa mga nagtabog sa inyo tungod sang inyo tuman nga kaimolon, kay basi mangin mga makasasala kamo pareho sa ila;

41 Kundi nga magpaumod kamo, kag magbatas sinang mga pag-antos, nga may malig-on nga paglaum nga kamo sa pila ka adlaw magapahuway halin sa tanan ninyo nga pag-antos.