Integridad

Tubtob nga mapatay ako indi ko pag-isikway gikan sa akon ang akon [integridad] (Job 27:5).

Magaangkon ako sang moral nga kaisog sa pagpalig-on sang akon mga aksyon suno sa akon ihibalo sang husto kag sala.

Kinahanglanon nga mga Inagihan sa Panindugan

Kompletuha ang masunod nga tatlo ka kinahanglanon nga mga inagihan sa panindugan. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Ang integridad amo ang kabubut-on kag kaluyag sa paggawi suno sa aton mga ginapatihan kag mga sulundan. Basaha ang Moroni 10:30–33 kag hunahunaa kon ano ang kahulugan sang “dumilian ang inyo kaugalingon sang tanan nga mga pagkadi-diosnon.” Basaha ang brosyur nga Para sa Kusog sang mga Lamharon. Hunahunaa kon paano nagkalain ang mga sulundan sang Ginuo sa mga sulundan sang kalibutan. Irekord sa imo journal ang nagakaigo nga mga sulundan para sa pamatasan, pamiste, kag pagsinugilanon, amo man sa mga balasahon, mga sine, telebisyon, Internet, musika, mga cell phone kag iban pa nga media. Isulat man ang imo plano sa pagpabilin nga matinlo sing moral kag takos sa pagtambong sa templo. Pagkatapos sang pagtipig sang imo mga sulundan sa labing kubos isa ka bulan, isulat ang imo mga balatyagon sa imo journal kag magpadayon sa pagtipig sang imo pangako.
Maghimo sang isa ka kinaugalingon nga ebalwasyon sang imo personal nga integridad. Pamangkuta ang imo kaugalingon sang masunod nga mga pamangkutanon: Nagalikaw bala ako sa kutso-kutso; di-nagakaigo nga mga lahog, pagpamuyayaw kag pagkabulgar, kag paglango-lango parte sa sagrado nga mga topiko? Lubos bala ako nga tampad, matinlo sing moral, matinud-anon, masandigan, kag masaligan sa akon buluhaton sa eskuwelahan kag sa iban pa nga mga kahiwatan? Magpangamuyo adlaw-adlaw para sa kusog kag para sa giya sang Balaan nga Espiritu nga magbulig sa imo sa pagpangabuhi nga may integridad. Isulat sa imo journal ang mga butang nga sarang mo himuon agud pauswagon ang imo personal nga integridad kag sa labing kubos isa ka bag-o nga pamatasan nga luyag mo pauswagon.
Ang Manluluwas amo ang perpekto nga halimbawa sang integridad; Iya ginhimo kon ano ang Iya ginpromisa sa Amay nga Iya pagahimuon. Basaha ang 3 Nefi 11:10–11. Tun-i ang mga kabuhi sang pila ka mga inidibidwal sa balaan nga mga kasulatan nga nagpangabuhi nga may integridad. Basaha ang Genesis 39; ang libro ni Ester; Job 2:3; 27:3–6; Daniel 3 kag 6; Mga Binuhatan 26; Doctrine and Covenants 124:15; kag Joseph Smith—History 1:21–25. Sa imo journal pat-ura ang mga paagi nga ining mga tawo nagpakita sang integridad. Hunahunaa ang isa ka tion kon san-o nag-angkon ka sang kaisog sa pagpakita sang integridad, labi na gid kon san-o indi ini nangin mahapos ukon popular. Ipaambit ang imo inagihan kag ang imo mga balatyagon parte sini sa isa ka testimony meeting ukon leksyon ukon sa isa ka ginikanan ukon lider.

Dugang nga Mga Inagihan sa Panindugan

Kompletuha ang tatlo ka dugang nga mga inagihan sa panindugan. Mahimo ka nga makapili gikan sa masunod nga mga opsyon ukon magsulat tubtob sa duha sang imo kaugalingon. Kinahanglan aprobahan sang imo ginikanan ukon lider yadtong imo ginasulat mismo antes ka magsugod. Papirmahi kag pasulati sang petsa sa imo ginikanan ukon lider ang tagsa ka inagihan sa imo pagkahuman sini.

Pangitaa ang pulong nga integridad [integrity] sa isa ka diksyonaryo. Interbyuha ang imo iloy, lola, ukon isa pa gid ka babayi nga imo ginarespeto parte sa iya paghangop kag paggawi sang pulong. Maghimo sang listahan sang mga pamaagi nga sarang mo mapalig-on ang imo mga aksyon santo sa imo ihibalo sang husto kag sayop, kag irekord sa imo journal ang kahulugan sa imo sang pag-angkon sang integridad.
Magtuon parte sa pagtindog bilang isa ka saksi. Basaha ang Mosias 18:9. Dayon irekord sa imo journal kon paano ka personal nga “makatindog bilang [isa ka saksi] sang Dios sa tanan nga mga tinion kag sa tanan nga mga butang, kag sa tanan nga mga duog.” Magpili sang isa ka personal nga pamatasan nga kinahanglan mo nga pauswagon agud nga mangin mas maayo ka nga halimbawa. Pauswaga ang integridad sa imo kabuhi samtang ginagawi mo ang imo bag-o nga pamatasan sa tatlo ka simana. Irekord ang imo pag-uswag sa imo journal.
Ang paggawi sang layi sang puasa isa ka oportunidad sa paggamit sang integridad. Sa isa ka gintalana nga Domingo nga inugpuasa [fast Sunday], maglikaw sa pagkaon kag ilimnon sa duha ka sagunson nga mga kalan-an kag mag-amot sa tanyag-puasa [fast offering] sang imo panimalay. Maghunahuna sang pat-od nga katuyuan samtang nagapuasa ka. Mahimo ka nga magpuasa para sa isa ka nagamasakit nga abyan, sa pagdaug sang isa ka malain nga pamatasan, sa pag-angkon sang isa ka pinasahi nga bugay para sa imo kaugalingon ukon sa lain nga tawo, ukon sa pagpasalamat. Sugori kag tapusa ang imo puasa sa isa ka pangamuyo.
Listaha ang mga isyu, mga tendensiya, kag mga problema nga nagapaluya sang panimalay. Basaha ang mensahe sang Unang Panguluhan sa pahina 1 sini nga libro, “Ang Panimalay: Isa ka Proklamasyon sa Kalibutan” (tan-awa sa pahina 101), kag ang seksyon parte sa panimalay sa Para sa Kusog sang mga Lamharon. Dayon usisaa sa Liahona ang laygay sadtong aton ginasuporta bilang mga propeta, mga manugtulok [seers], kag mga manugbugna [revelators]. Isulat sa imo journal ang imo plano sa pagpabakod sang imo panimalay sa karon kag ang mga panindugan kag mga tradisyon nga luyag mo ipahamtang sa imo panimalay sa palaabuton.

Pinasibo nga Mga Inagihan sa Panindugan

Proyekto sa Panindugan

Pagkatapos nga nakompleto mo ang anum ka mga inagihan sa panindugan nga integridad, maghimo sang isa ka proyekto nga magabulig sa imo sa paggawi sang imo natun-an. Dapat ini mangin isa ka importante nga buluhaton nga magakinahanglan sa labing kubos napulo ka oras sa pagkompleto. Mainampuon nga magpangayo sang giya sang Balaan nga Espiritu sa pagpili sang isa ka makahulugan nga proyekto.

Paaprobahi sa imo ginikanan ukon lider ang proyekto antes ka magsugod. Magsulat sang isa ka ebalwasyon sa imo pagkahuman sini. Sa idalom amo ang pila ka mga ideya para sa isa ka proyekto sa panindugan.

Irekord ang mga halimbawa sang mga paagi nga ang mga miyembro sang panimalay nagpakita sang kalidad sang integridad sa ila mga kabuhi.
Ang pag-angkon sang integridad nagakahulugan sang pagtipig sang imo mga pangako. Kilalaha kag tipigi ang imo mga pangako sa iban samtang nagaentra ka bilang miyembro sang isa ka grupo ukon organisasyon ukon sa isa ka posisyon sang liderato sa imo eskuwelahan ukon komunidad.
Nga nagagamit sang 1 Timoteo 4:12 bilang imo giya, magtukod kag maghimo sang isa ka kahiwatan nga magabulig sa imo sa paggawi nga “magmangin [halimbawa] ka sa mga nagatuo.”
Ang paghimo kag pagtipig sang mga kasugtanan sa templo nagakinahanglan sang integridad. Maghanda sa paghimo sang mga kasugtanan sa templo paagi sa paghimo kag pagsul-ob sang isa ka panapton nga nagasibo sa mga sulundan sang maugdang nga pamiste nga ginapaathag sa brosyur nga Para sa Kusog sang mga Lamharon kag sa mga pulong sang buhi nga mga propeta.
Sa mga pamulong-pulong nga ginhatag sang mga General Authority, usisaa ang mga topiko parte sa integridad kag pagkamatinud-anon. Tun-i kon ngaa ining mga prinsipyo importante sa imo kalipayan kag pagpanghanda para sa templo. Maghimo sang isa ka bagay (pareho sang isa ka larawan, isa ka libro sang mga sinambit nga mga pulong, ukon isa ka bagay nga binorda sang kamot) nga magapahanumdom sa imo sa tagsa ka adlaw sang imo pangako nga mangin matinud-anon kag tampad sa tanan nga mga tinion kag makilal-an tungod sang imo personal nga integridad.

Ang akon proyekto amo ang:

Ang akon plano sa paghimo sang akon proyekto amo ang:

Pagtugot

Ginabulobanta nga petsa sang pagkompleto

Ang akon ebalwasyon sang proyekto amo ang (isulat kon ano ang imo nabatyagan kag kon paano nagdugang ang imo paghangop parte sa integridad):

Pirma sang ginikanan ukon lider

Petsa

Mga inoras nga nagamit