1 Kag karon, si Jacob naghambal sang madamo pa gid nga mga butang sa akon katawhan sa sina nga tion; apang, ini lamang nga mga butang ang akon ginpahanabo nga masulat, kay ang mga butang nga akon nasulat tama na sa akon.

2 Kag karon ako, si Nefi, nagasulat sang madamo pa sang mga pulong ni Isaias, kay ang akon kalag nagakalipay sa iya mga pulong. Kay idapat ko ang iya mga pulong sa akon katawhan, kag ipadala ko ang mga ini sa tanan ko nga kaanakan, kay matuod gid nga nakita niya ang akon Manunubos, pareho sang akon pagkakita sa iya.

3 Kag ang akon utod nga si Jacob, nakakita man sa iya pareho sang akon pagkakita sa iya; gani, ipadala ko ang ila mga pulong sa akon mga kaanakan sa pagpamatuod sa ila nga matuod ang akon mga pulong. Gani, paagi sa mga pulong sang tatlo, ang Dios nagsiling, palig-onon ko ang akon pulong. Apang, ang Dios magapadala sing dugang nga mga saksi, kag pamatud-an niya ang tanan niya nga mga pulong.

4 Tan-awa, ang akon kalag nagakalipay sa pagpamatuod sa akon katawhan sang kamatuoran sang pagkari ni Cristo; kay, sa amo nga katuyoan ang layi ni Moises ginhatag; kag ang tanan nga butang nga ginhatag sang Dios halin pa sa ginsuguran sang kalibutan, sa tawo, amo ang mga pagsimbolo sa iya.

5 Kag ang akon kalag nagakalipay man sa mga kasugtanan sang Ginuo nga iya ginhimo sa aton mga amay; huo, ang akon kalag nagakalipay sa iya grasya, kag sa iya hustisya, kag gahum, kag kaluoy sa dako kag wala’y katapusan nga plano sang pagluwas halin sa kamatayon.

6 Kag ang akon kalag nagakalipay sa pagpamatuod sa akon katawhan nga luwas lang kon si Cristo magakari ang tanan nga tawo pat-od gid nga mawala.

7 Kay kon wala sang Cristo wala sang Dios; kag kon wala sang Dios wala kita, kay nangin wala kuntani sang pagtuga. Apang may isa ka Dios, kag sia amo si Cristo, kag magakari sia sa kabug-osan sang iya kaugalingon nga panahon.

8 Kag karon nagasulat ako sang pila sang mga pulong ni Isaias, agud nga kon sin-o man sang akon katawhan ang makakita sining mga pulong mahimo nga magpagsik sa ila mga tagipusuon kag magkasadya para sa tanan nga tawo. Karon amo ini ang mga pulong, kag mahimo ninyo nga idapat ang mga ini sa inyo kag sa tanan nga tawo.