Taua o le Tagata Lava Ia

Ia manatua e taua tele le aoga o agaga i le silafaga a le Atua (MFF 18:10).

Ua i ai so’u taua e faavavau ma sa’u misiona paia o le a ou taumafai e faataunuu.

O Mea Faatonuina e Fai Mo Le Tulaga Faatauaina

Fai ia uma mea faatonuina nei e tolu mo le tulaga faatauaina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

O oe o se afafine o le Tama Faalelagi, na te silafia oe ma e alofa foi ia te oe. Faitau le Salamo 8:4–6; Ieremia 1:5; Ioane 13:34; Mataupu Faavae ma Feagaiga 18:10; Aperaamo 3:22–23; ma le Talafaasolopito a—Iosefa Samita 2:1–20. Tusi i lau api o talaaga pe o faapefea ona aoaoina oe e nei mau, e silafia e le Tama Faalelagi ia oe, e alofa ia te oe, ma e manatu tele mai ia te oe.
Aoao i le taua o faamanuiaga faapeteriaka i le suesue i ai i le Faamaoni i le Faatuatua ma lauga o konafesi aoao talu ai nei. Saili pe aisea e tuuina mai ai ma po o ai foi e mafai ona tuuina mai. Talanoa ma se tasi o ou matua po o se taitai o le Ekalesia pe faapefea ona e saunia e maua se faamanuiaga faapeteriaka ma auala e mafai ona aoao ai oe i lou lava taua ma faasinomaga ina ia avea ai ma taiala i lou olaga atoa. Afai e te lei mauaina sou faamanuiaga, saunia ia maua.
Faitau le Mataupu Faavae ma Feagaiga 18:10 ma le 121:45. Ia e faia mea uma e te mafaia e faamalosiau ai i isi ma latou lagonaina ai lo latou taua ma le aoga. Ia e matauina uiga taua ma uiga lelei o isi mo le lua vaiaso. Ia e faailoa atu e ala i lou talanoa atu i ai, pe tusi foi i ai. Ia e tusia i lau api o talaaga mea ua e aoaoina e uiga i le taua ma le aoga o tagata taitoatasi ma pe faapefea foi ona faatuputeleina lou mautinoa ina ua e faamalosiau atu i isi.

Nisi Mea E Fai Mo Le Tulaga Faatauaina

Fai ia uma nisi mea se tolu mo le tulaga faatauaina. E mafai ona e filifilia mai i mataupu nei pe tusia ni au lava mea e fai e oo atu i le lua. E tatau ona faamaonia e se tasi o ou matua po o se taitai, mea na e tusi e oe lava ae e te le i amataina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

Ua e saunia nei e faataunuu se misiona uiga ese i le lalolagi. Faitau le Mataupu Faavae ma Feagaiga 88:119. Ia tusia se lisi i lau api o talaaga o ou faamoemoega ma miti mo lou aiga i le lumanai, auaiga, ma aoaoga ma nisi o mea taua e te manao e ausia i lou olaga, e aofia ai le avea o se ava ma se tina. Ona tusi lea o se faatulagaga o le a avea ma fesoasoani ia te oe e ausia ai au sini. Faasoa atu lenei faatulagaga i se tasi o lou aiga, taitai, po o se uo.
Ia e auai i le faatinoina o se siva, lauga, musika, po o se tala faatino i le aoga, i le tou nuu, po o le lotu. Na avea faapefea lou auai i lenei gaoioiga ma mea ua faamalosia ai ou lagona i le taua ma le aoga ma lou talitonu ia te oe lava? Ia tusia ou manatu i lau api o talaaga.
Pe a e auai atu i le talafaasolopito o aiga, o le a e malamalama ai i lou faasinomaga ma le taua o oe lava ia. Talatalanoa ma tagata o lou aiga o loo soifua ina ia e aoao mai ai ni faamatalaga se tele e mafai ona e maua e uiga i le talafaasolopito o lou aiga. Ona faatumu lea o se pepa gafa o lou aiga ma tusi se lisi o sauniga o le malumalu ua maea ona fai mo tagata taitasi.
Ua tuuina atu e le Tama Faalelagi ia te oe ni meaalofa faapitoa. Faitau le 1 Korinito 12:4–12; 13; Moronae 7:12–13; 10:8–18; ma le Mataupu Faavae ma Feagaiga 46:11–26. Talosaga i se tagata o lo outou aiga, se taitai o Tamaitai Talavou, ma se uo latou te tusia i lalo ou uiga taua lelei ua tuuina atu e le Alii ia te oe. Tusi se lisi o au meaalofa i lau api o talaaga, ma tusi pe mafai faapefea ona e saga atiina ae nei meaalofa ma faaaoga e te auauna atu ai i lou aiga ma isi.

Ia Faatatau Ia Te Oe Lava Ia Mea E Fai Mo Le Tulaga Faatauaina

Galuega Faatino o le Tulaga Faatauaina

A uma ona e faia uma mea e ono e fai mo le tulaga faatauaina o le taua o le tagata lava ia, ona amatalia loa lea o se galuega faatino o le a fesoasoani ia te oe e te faataunuuina ai mea sa e aoaoina. O se taumafaiga taua tele lea e tatau ona alu ai itula e le itiiti ifo i le sefulu e faamaea ai. Ia e saili ma le agaga tatalo mo le taitaiga a le Agaga Paia e te filifilia ai se galuega faatino e tele sona aoga.

Ia faamaonia e se tasi o ou matua po o se taitai le galuega faatino ae e te lei amataina. Ia e tusia foi se iloiloga pe a maea ona e faia. O nisi nei o manatu mo se galuega faatino o se tulaga faatauaina.

Ua ia te oe se misiona tulaga ese ma le paia e faatinoina i le lalolagi ma ua faamanuiaina i ni taleni e faataunuu ai lenei misiona. Pe a o e faamaeaina se tasi o nei galuega faatino, o le a e molimauina le tulaga taua ma saofaga a isi ma ia matau au uunaiga i olaga o isi. Ia faaalia lou agaga faafetai ia i latou o loo outou galulue faatasi, ma ia tusi i lau api o talaaga ou aafiaga.

Tuufaatasi au lava talafaasolopito po o le talafaasolopito faaleaiga e faaaoga ai mea o loo tusia i api o talaaga, o ata, ma isi pepa taua.
Faasoa atu se tasi o au meaalofa e ala i le aoao atu pe fesoasoani i se tasi i se mataupu o le aoga, musika, o se taaloga, po o se tomai faatufugaga.
Fai se galuega faatino e faaleleia ai le tulaga e ola ai se tagata o loo manaomia se fesoasoani.
Taitai pe auai foi i le faatinoina o se aufaipese a le autalavou, o se tala faatino, se faaaliga taleni, po o se faaaliga tusiga ata.
Aoao se tomai o loo matua manaomia e falefaigaluega ina ia mafai ona fesoasoani ia te oe i lau galuega o i ai nei po o se galuega foi i le lumanai.

O la’u galuega faatino o le:

O la’u fuafuaga e faia ai la’u galuega faatino o le:

Faamaoniga

Aso ua fuafua e faamaea ai

O la’u iloiloga o le galuega faatino e (ia aofia ai ou lagona ma pe ua faateleina faapefea lou malamalama i le taua o le tagata lava ia):

Saini a se tasi o matua po o taitai

Aso

Aofai o itula na faaalu ai