24. O Kapanaumi

O Kapanaumi, lea sa tu i le auvai i matu o le Sami o Kalilaia, sa avea ma laumua o le auaunaga a Iesu i Kalilaia (Mata. 9:1–2; Mare. 2:1–5). Sa avea ma laumua taua ma le manuia o le fagota ma faatauga o oloa, o le nofoaga foi o Nuuese atoa ma Iutaia. Ai lava e lei sili atu le faitau au fai o tagata i lo le 1,000 i le senituri muamua. Sa tu Kapanaumi i le magafa o auala fefaatauaʼiga taua, ma sa siomia i laueleele lafulemu. Sa faatutuina iinei e tagata tau o Roma fale faamalu ma fale teu oloa, lea sa faamalosia le faatulagaga faalenuu e ala i fale faaaoga faitele e lelei ona fauina. E ui ina tele ni vavega sa faia iinei, sa teena lautele ai le auaunaga a le Faaola e le nuu. O lea sa fetuuina e Iesu le aai (Mata. 11:20, 23–24). O ni tausaga mulimuli ane, sa paʼu ai Kapanaumi e avea ma atigi fale ma e le aina pea.

O Mea Taua sa Tutupu: Sa iloa Kapanaumi o le “aai lava” a le Faaola (Mata. 9:1–2; Mare. 2:1–5). Sa ia faia ni vavega e tele i lenei nofoaga. Mo se faataitaiga, sa ia faamaloloina tagata e toatele (Mare. 1:32–34), e aofia ma le auauna a le taitai o le toaselau (Luka 7:1–10), le tinā o le toalua o Peteru (Mare. 1:21, 29–31), le supa o le sa tuutuu ifo lona moega i se va i le tauluga o le fale (Mare. 2:1–12), ma le tagata sa gase lona lima (Mata. 12:9–13). O iinei foi sa tuliaese ai e Iesu ni agaga leaga e tele (Mare. 1:21–28, 32–34), faatuina ai le afafine o Iairo nai e ua oti (Mare. 5:22–24, 35–43), ma tuuina atu ai le lauga o le areto o le ola i le sunako i Kapanaumi (Ioane 6:24–59). Sa faatonuina e le Faaola Peteru na te maua se iʼa mai le Sami o Kalilaia, tatala lona gutu, ma maua se setatara e totogi ai le lafoga (Mata. 17:24–27).