31. Efeso

O atigi fale o le fale mataaga Eleni i Efeso, lea sa talai ai le Aposetolo o Paulo. O ona po o le feagaiga Fou, sa tautaua ai Efeso i lena itu o le lalolagi ona o lona malumalu matagofie sa fauina e faamamalu i le atua fafine Roma ma le faapaupau o Tiana. O atigi fale i aso nei, sa avea muamua ai Efeso ma laumua o le itumalo Roma o Asia ma le laumua tele o le faatauga o oloa. O tagata gaosi siliva o le aai sa faatutuina ai le fefaatauaʼiga manuia i le faatauina atu o faatusa o Tiana.

O Mea Taua sa Tupu: Sa asiasi le Aposetolo o Paulo i Efeso ina ua lata i le faaiuga o lana malaga faafaifeautalai lona lua (Galu. 18:18–19). O lana malaga lona tolu sa ia nofo ai i le aai i tausaga e lua. Sa faamalosia ona ia alu ese ona o le faanunununu sa faia e tagata gaosi siliva o e sa afaina la latou pisinisi ina o talai Paulo e tetee i le tapuai atu i le atua fafine pepelo o Tiana (Galu. 19:1, 10, 23–41; 20:1). O le fale mataaga o Efeso o le fale mataaga sili ona tele sa fauina e tagata Eleni, ma le tulaga sa faafesagai ai soa a Paulo ma le au o tagata leaga (Galu. 19:29–31). Sa tusia e Paulo se tusi i tagata o le Ekalesia i Efeso i aso o lona nofopologa i Roma. O le tasi o paranesi e fitu o le Ekalesia i Asia sa tusitusi atu i ai le tusi a Faaaliga sa i Efeso (Faaa. 1:10–11; 2:1).