1 Pues matto i tiempo na guahu, si Nephi, pumara yu’ kumuentusi i mañe’lu-hu, ya este ilek-ñiha: Un diklara makkat siha giya hami, mas ki siña en singon.

2 Pues matto i tiempo na hu sangani siha na hunggan hu tungo’ ha’ na makkat sinangan-hu kontra i manmala siha, konsiste gi minagahet; ya i husto-ku hustifika, yan hu testigu’i na u fanma hatsa hulo’ gi uttemo diha; entonses, i manisao, makkat para siha i minagahet, sa’ manchinachak siha giya talo’lo’.

3 Pues i mañe’lu-hu, yanggen manhusto hamyo, ya manmalago’ hamyo umekungok i minagahet, ya en atende, kosaki siña manmamokkat hamyo tunas hulo’ gi as Yu’os, pues ti en fanggonggong put i minagahet, ya en sangan: Un sangan makkat siha kontra hami.

4 Pues matto i tiempo na guahu, si Nephi hu pagat i mañe’lu-hu, ni’ todu dilihente, para u ma osge i otden i Saina.

5 Pues matto i tiempo na ma na’umitde siha gi me’nan i Saina; ya mumagof yu’ yan meggai hu tangnga para siha, ya puedi ma pokkati i chalan hinusto.

6 Pues, todu este ma sangan yan ma cho’gue anai sumasaga si tata-hu gi tento’ gi halom i kañada ni’ ha agang Lemuel.

7 Pues matto i tiempo na guahu, si Nephi, hu konne’ unu na hagan Ishmael para asagua-hu; yan lokkue’ i mañe’lu-hu ma konne’ i pumalu na hagan Ishmael para asaguan-ñiha; yan lokkue’ si Zoram ha konne’ i mas amko’ na hagan Ishmael para asagua-ña.

8 Pues si tata-hu ha kumple todu i otden i Saina siha ni’ ma na’i gui’. Yan lokkue’ guahu, si Nephi, meggai bendision-hu ginen i Saina.

9 Pues matto i tiempo na i bos i Saina ha kuentusi si tata-hu gi pupuengi, ya ha kumanda gui’ para u falak i halom tano’ gi egga’an.

10 Pues matto i tiempo na anai makmata si tata-hu gi egga’an, ya humanao huyong para i pettan i tento’, ai na minanman sa’ ha li’e’ gi edda’ aridondo na bola ni’ kuriosu ma fa’tinas-ña; ya finu na bronse. Ya guaha dos na akadidok lulok, ya unu ha punta i chalan ni’ para bai in hananaogue gi halom tano’.

11 Pues matto i tiempo na in rikohi todu i para bai in chile’ gi halom tano’, yan todu i tetenan na mantension-mami ni’ ha na’i ham i Saina; pues in chile’ todu klasi na simiya para i halom tano’.

12 Pues matto i tiempo na in chile’ i tento’-mami ya manhanao ham para i halom tano’, ya in krusa i saddok ni’ ma a’agang Laman.

13 Pues matto i tiempo na mangarera ham kuattro dihas, kasi haya pat hayan-kattan na direksion, ya in hatsa i tento’ ta’lo; yan in agang i lugat Shazer.

14 Pues matto i tiempo na in chile’ i flechan-mami ya manhanao ham gi halom tano’ para bai in fanespiha nengkanno’ para i familian-mami, ya despues di in espiha i nengkanno’ para i familian-mami, in bira ham ta’lo tatte para i familian-mami gi halom tano’, para i lugat Shazer. Ya manhanao ham ta’lo gi halom tano’, in tattitiyi i parehu na direksion, ya in hatme i mas maolek na lugat gi halom tano’, ni’ gaige gi kanton i Tasen Agaga’.

15 Pues matto i tiempo na mangarera ham meggai diha siha, ya manmamuno’ ham gaga’ para nengkanno’-mami nu i flecha, acho’, yan atupat-mami.

16 Pues in tattiyi i direksion i bola, ni’ gumigiha ham para i mas maolek na lugat gi halom tano’.

17 Pues despues di mangarera ham meggai diha siha, in hatsa i tento’ un ratu, kosaki siña mandeskansa ham yan para bai in fanmañule’ nengkanno’ para i familian-mami.

18 Pues matto i tiempo na anai guahu, si Nephi, humanao yu’ para bai fanespiha nengkanno’, hu hulok i flecha-ku, ni’ ma fa’tinas ni’ finu na lulok; pues despues di hu hulok i flecha-ku, manlalalo’ i mañe’lu-hu put i flecha-ku sa’ ti manmañule’ ham nengkanno’.

19 Pues matto i tiempo na in bira ham tatte para i familian-mami sin nengkanno’, ya mansen yayas ham, sa’ i kareran-mami, ya manmasa’pet ham put i minalago’-ñiha ni’ nengkanno’.

20 Pues matto i tiempo na si Laman yan Lemuel yan i lalahen Ishmael ma tutuhon manggonggong ta’lo, put i manmasa’pet-ñiha gi halom tano’; yan si tata-hu lokkue’ ha tutuhon gumonggong kontra, i Saina, i Yi’os-ña; hunggan, ya todu mansen piniti, esta nina’fanggonggong kontra i Saina.

21 Pues matto i tiempo na guahu, si Nephi, mamadesi yu’ lokkue’ yan i mañe’lu-hu put i malingon i flecha-ku, yan i flechan-ñiha ni’ malingu i mueyi, ya mampos makkat, hunggan, esta ti siña manmañodda’ ham nengkanno’.

22 Pues matto i tiempo na guahu, si Nephi, hu kuentusi i mañe’lu-hu, sa’ ma na’mahettok i kurason-ñiha ta’lo, esta mangkekeha kontra i Saina, i Yi’os-ñiha.

23 Pues matto i tiempo na guahu, si Nephi, hu fa’tinas un flecha ginen i hayu, yan ginen un tunas na balas; pues hu atma yu’ nu i flecha, yan katupat, yan acho’. Pues ilek-ku gi as tata-hu: Amanu na bai hu hanao para bai hu fañule’ nengkanno’?

24 Pues matto i tiempo na ha faisen i Saina, sa’ ma na’umitde siha ginen i fino’-hu; sa’ meggai hu sangani siha ginen i minetgot i anti-hu.

25 Pues matto i tiempo na i bos i Saina matto gi as tata-hu; ya ma kastiga put i gumonggong-ña kontra i Saina, ya esta nina’sen fañotsot.

26 Pues matto i tiempo na i bos i Saina ilek-ña giya guiya: Atan i bola, ya siempre un li’e’ siha i manma tuge’.

27 Pues matto i tiempo na anai ha li’e’ si tata-hu ayu siha i ma tuge’ gi bola, muma’a’ñao mampos, yan lokkue’ i mañe’lu-hu yan i lalahen Ishmael yan i asaguan-ñiha.

28 Pues matto i tiempo na guahu, si Nephi, hu li’e’ i punto siha gi halom i bola, na machocho’cho’ konsiste gi fiet yan dilihente ni’ in na’i.

29 Pues ma tuge’ lokkue’ nuebu na tinige’, ni’ ti mappot ma taitai, ya ha na’komprende ham mas put i Saina; ya ma tuge’ yan ma tulaika kada ratu, konsiste gi fiet yan dilihente ni’ in na’i. Pues in li’e’ na ginen dikike’ siha, siña i Saina ha na’ huyong dangkolo siha.

30 Pues matto i tiempo na guahu, si Nephi, humanao yu’ hulo’ gi sabana, konsiste gi direksion ni’ ma na’i yu’ ginen i bola.

31 Pues matto i tiempo na hu puno’ siha i machalek na gaga’, ya hu chuli’i i familia-ku nengkanno’.

32 Pues matto i tiempo na hu bira yu’ tatte gi tento’-mami, ya hu kokonne’ i gaga’ siha ni’ hu puno’, pues anai ma li’e’ i nengkanno’, mansen magof. Pues matto i tiempo na ma na’umitde siha gi me’nan i Saina, ya ma na’i agradisimiento.

33 Pues matto i tiempo na manhanao ham ta’lo gi kareran-mami, ya in tattiyi i chalan taiguihi ha’ i tutuhon; ya despues di mangarera ham meggai diha siha, in hatsa ta’lo i tento’ siha, para bai in fandeskansa.

34 Pues matto i tiempo na matai si Ishmael, ya ma hafot gi lugat ni’ ma agang Nahom.

35 Pues matto i tiempo na i hagan Ishmael mampiniti mampos, put i malingon tatan-ñiha, yan put i pinadesen-ñiha gi halom tano’, ya manggonggong kontra as tata-hu, sa’ ha konne’ siha huyong ginen Jerusalem, ya ilek-ñiha: Matai tatan-mami; hunggan, ya meggai finamokkat-mami gi halom tano’, ya meggai pinadesen-mami, manñalang ham, manma’ho, yan manyayas ham; ya despues di este todu na pinadesi siempre manmatai ham gi halom tano’.

36 Pues, manggonggong kontra as tata-hu, yan guahu; ya manmalago’ na u ma bira siha tatte para Jerusalem.

37 Pues si Laman ilek-ña gi as Lemuel yan i lalahen Ishmael: Fanekungok, nihi ya ta puno’ si tata, yan i che’lu-ta as Nephi, ni’ ha po’lo na guiya gubietna-ta yan ma’estro-ta, giya hita ni’ mas manamko’ na mañ’lu-ña.

38 Pues ilek-ña na kuinentusi gui’ nu i Saina yan lokkue’ i anghet siha manministro giya guiya. Lao, atan, ta tungo’ na ha dadagi hit, ya ha sangangani hit este siha, ya meggai siha ha chocho’gue ginen i pikaru-ña, sa’ para u fa’baba i mata-ta ya ha hahasso, fana’an, para u konne’ hit gi halom tano’; ya an ha konne’ hit, para u na’rai yan gubietna gui’ kontra hita, ya para u cho’gue giya hita todu i malago’-ña yan i muna’mamagof gui’. Ya ginen este na manera si Laman na ha na’fambubu i kurason-ñiha.

39 Pues matto i tiempo na i Saina gumaige giya hami, hunggan, kontodu i bos i Saina matto giya hami ya meggai ha sangani yan ha lalatde siha; ya despues di manlinalatde nu i bos i Saina, manmaggem ya manmañotsot nu i isao-ñiha, ya ha bendisi ham i Saina ta’lo, ya ha na’guaha nengkanno’, ya ti manmatai ham.