Kapitulu 6
Si Nephi ha tuge’ siha put si Yu’os — I hangai-ña para u kombense i taotao para u ma espiha i Yi’os Abraham ya u fanma satba.
1 Pues guahu, si Nephi ti bai hu na’huyong i rasan tata-hu siha guini na patten i nota-hu; yan ni ngai’an na bai hu tuge’ guini gi plegu ni’ hu tutuge’; sa’ gaige esta gi nota ni’ ha gogo’te si tata-hu; pues, ti bai hu tuge’ guini.
2 Ya esta maolek ha’ para bai hu sangan na disendensian Joseph ham.
3 Ya ti ha estotba yu’ na ti hu tuge’ todu siha put si tata-hu, sa’ ti siña hu tuge’ todu gi plegu siha, sa’ hu diseha i kampo para bai hu tuge’ ayu siha i put si Yu’os.
4 Sa’ i entension-hu para bai hu kombense i taotao siha para u fanhihot gi as Yu’os Abraham, yan i Yi’os Isaac, yan i Yi’os Jacob, ya u fansatba.
5 Pues ti bai hu tuge’ ayu siha ni’ asentadu para i tano’, lao ayu siha i asentadu para si Yu’os yan para ayu siha ni’ manyini’usan.
6 Pues bai hu na’i i simiya-hu otden, na ti debi di u ma okupa i plegu siha ni’ ayu siha i tai bali para i famagu’on i taotao.