I Fine’nana Na Lepblon Nephi
I Gubietna- A Yan Ministro- A
I historian Lehi yan i asagua-ña Sariah yan i kuattro na lalahen-ñiha manma fa’na’an (ginen i mas amko’) Laman, Lemuel, Sam, yan Nephi. Ha akonseha i Saina si Lehi para u huyong giya Jerusalem, sa’ hagas ha prufisiha gi taotao siha put i isao-ñiha ya ma espipiha para u ma destrosa i lina’la’-ña. Tres dihas hinanao-ñiha gi halom tano’ yan i familia-ña. Ha konne’ si Nephi i mañe’lu-ña tatte para Jerusalem para u ma espiha i notan Judios. I kuentan pinadesen-ñiha. Manma konne’ i hagan Ishmael siha para asaguan-ñiha ya manmalak i halom tano’. I pinadesen-ñiha gi halom tano. I biahen-ñiha gi kareran-ñiha. Manmatto siha gi dangkolo na tasi. I mañe’lon Nephi manlalalo’ nu guiya. Ha na’fanaburidu siha ya ha hatsa un batko. Ma agang i lugat Abondansia. Ma krusa i dangkolo na tasi para guatu gi tano’ prumesa yan meggai ta’lo’ biahen-ñiha mas. Este na tinige’ sigun i notan Nephi; pat, put otro, guahu, si Nephi tumuge’ este na tinige’.
Kapitulu 1
Si Nephi ha tutuhon i notan i taotao-ña — Si Lehi ha li’e’ gi imahen, troson guafi ya manaitai gi lepblon prufisiha — Ha tuna si Yu’os, ha pridika i finatton Mesias, yan ha prufisiha i ma destroson Jerusalem — Ma petsigi nu i Judios siha.
1 Guahu, si Nephi, mafañagu yu’ ginen manmaolek na mañaina siha, ya ginen este na ma fa’na’gue yu’ ni todu i tiningo’ tata-hu; ya meggai lini’e’-hu pinadesi siha gi duranten i lina’la’-hu siha, sinembatgo, hagas ha’ ha faburesi yu’ i Saina; hunggan, ya meggai tiningo’-hu put i minaolek yan mesterion Yu’os, entonses hu fa’tinas nota put i biahi-hu gi tiempo-ku.
2 Hunggan, hu fa’tinas nota gi lengguahen tata-hu, ni’ ha konsiste i tiningo’ i Judios yan i lengguahen i Ehipto na taotao siha.
3 Ya hu tungo’ ha’ na i nota ni’ hu cho’gue magahet; ya hu cho’gue ni’ mismo kannai-hu; ya hu cho’gue konsiste gi tiningo’-hu.
4 Pues matto i tiempo gi halom i primet sakkan anai rai si Zedekiah, rain Judah (Si tata-hu, si Lehi, sumaga giya Jerusalem gi todu i lina’la’-ña); ya guihi na sakkan meggai na prufeta siha manmatto ya ma sangani i taotao siha para u fanmañotsot, sino ma destrosa siempre Jerusalem.
5 Pues, matto i tiempo na si tata-hu si Lehi, manaitai gi Asaina, ni’ todu i nina’siña-ña, para i taotao-ña siha.
6 Pues, matto i tiempo anai mananaitai gi Saina, humuyong guafi ya sumaga gi acho’ gi fi’on-ña; ya meggai lini’e’-ña yan hiningok-ña, ya put este siha i lini’e’-ña yan hiningok-ña manlaolao gui’ mampos.
7 Pues matto i tiempo na humanao tatte para i gima’-ña giya Jerusalem; ya ha tomba gui’ gi kattre-ña, sa’ finattoigue nu i espiritu yan todu i lini’e’-ña.
8 Sa’ i espiritu gaige giya guiya, manli’e’ imahen, ya ha li’e’ si Yu’os matata’chong gi tronu-ña, ya ma urimayi meggai anghet siha ni’ mangakanta yan ma tutuna i Yi’os-ñiha.
9 Pues matto i tiempo na ha li’e’ na humuyong Unu ginen i langet, ya ha ripara na i mina’lak-ña mas ki nu i semnak talo’ani.
10 Ya ha li’e’ lokkue’ dosse siha tumattitiyi gui’ ya i ma’lak-ñiha mas ki nu i puti’on siha.
11 Ya manmatto papa’ gi tano’ ya i fine’nana tumohge gi fi’on tata-hu, ya ha na’i lepblo, ya ha sangani para u taitai.
12 Pues matto i tiempo anai ha tataitai, hinatme nu i Espiriton i Saina.
13 Ya ha taitai ya ilek-ña, Ai, na nina’ma’ase’ Jerusalem, sa’ meggai lini’e’-hu baba siha. Ya meggai lokkue’ si tata-hu tinaitai-ña put Jerusalem — na siempre ma destrosa yan i taotao siha; meggai siempre ginen i sapble yan meggai siempre manma konne’ para Babilonia.
14 Pues matto i tiempo anai ha taitai yan ha li’e’ si tata-hu meggai siha, ha sangani i Saina meggai siha; tat komu: Dangkolo yan maolek i che’cho’-mu siha O Saina Yu’os yan Takhilo’ na Yu’os! I tronu-mu takhilo’ gi langet siha, yan i alentos-mu, i minaolek-mu, yan i yo’ase’-mu gaige gi todu i taotao gi tano’, ya put gai ase’ hao, ti un sedi na u fanma sa’pet ayu siha i manhanao guatu giya hayu.
15 Ya ginen este na manera i lengguahen tata-hu gi tuna-ña as Yu’os; ya magof i anti-ña ya i kurason-ña bula ginen i lini’e’-ña, hunggan, ni’ fina’nu’i gui’ nu i Saina.
16 Ya pa’go guahu, si Nephi, ti todu hu tuge’ i tinige’ tata-hu, sa’ meggai tinige’-ña ni’ lini’e’-ña ginen imahen yan guinifi; yan meggai lokkue’ tinige’-ña ni’ ha prufisiha yan ha sangani i famagu’on-ña, ya ti bai hu tuge’ todu papa’.
17 Lao bai hu tuge’ put i bida-hu siha. Bai hu na’kaddada’ notan tata-hu siha, gi plegu siha ni’ hu fa’tinas ni’ kannai-hu; pues, yanggen monhayan hu na’kaddada’ i notan tata-hu bai hu tuge’ put i lina’la’-hu.
18 Pues, ya-hu na un tungo’ na anai monhayan i Saina ha fa’nu’i si tata-hu, si Lehi, meggai siha ni’ na’manman, put i minayulang Jerusalem, humanao para i taotao siha, ya ha tutuhon prumufisiha yan ha diklara giya siha put ayu siha i ha li’e’ yan ha hungok.
19 Pues matto i tiempo na i Judios siha ma botleha gui’ put ayu siha i ha sangan; sa’ ha testigu magahet put i malan-ñiha yan i baba na bidan-ñiha siha yan ha testigu giya siha nu i lini’e’-ña yan hiningok-ña, yan ayu lokkue’ i tinaitai-ña gi lepblo, ha manifesta put i mamaila’ i Mesias, yan put i ma ridiman i tano’.
20 Ya anai ma hungok i Judios este siha manlalalo’ nu guiya; hunggan, parehu ha’ yan i prufetan antigu, ni’ manma yute’ huyong, manma daggao acho’ yan manma puno’; ya ma espiha gui’ lokkue’ para u ma puno’. Lao, guahu si Nephi, bai hu fa’nu’i hao na i mina’ase’ i Saina gaige gi todu siha i ha agang, ya ginen i hinenggen-ñiha, nina’fanmetgot siha tanto esta i alentos para u fanlibre.