1 Pues matto i tiempo na ma adora si Yu’os, ya manhanao mo’na yan guahu; ya meggai kuriosu che’cho’-mami nu i hayu. Ya kada ratu ha fa’nu’i yu’i Saina taimanu na manera para bai hu cho’gue i hayon i batko.

2 Pues guahu, si Nephi, ti hu cho’gue i hayu siha taimanu tiningo’ taotao; ti hu hatsa i batko lokkue’ taimanu tiningo’ taotao; lao hu hatsa ginen i manera ni’ ha fa’nu’i yu’ i Saina, entonses, ti parehu yan i tiningo’ taotao.

3 Pues guahu, si Nephi humanao yu’ para i sabana, ya manaitai yu’ gi Saina; ya i Saina ha fa’nu’i yu’ meggai siha.

4 Pues matto i tiempo na anai hu na’fonhayan i batko, sigun gi fino’ i Saina, ma li’e’ i mañe’lu-hu na maolek, ya gef maolek i che’cho’; entonses ma na’umitde siha ta’lo gi me’nan i Saina.

5 Pues matto i tiempo na i bos i Saina matto gi as tata-hu, para bai in fangahulo’

6 Pues matto i tiempo na guihi na ogga’an despues di in pripara todu, meggai fruta yan katne ginen i halom tano’, yan meggai na anibat, yan prubension siha konsiste gi tinago’ i Saina, manhanao ham para i batko, yan todu i guinahan-mami yan simiya-siha, yan hafa siha in chile’ ta’lo, kada unu konsiste gi idat-ña; entonses, manhanao ham papa’ para i batko, yan i asaguan-mami yan famagu’on-mami.

7 Pues, si tata-hu ha liles dos na lahi gi halom tano’; i amko’ ma fa’na’an si Jacob ya i heben si Joseph.

8 Pues matto i tiempo na despues di manhanao ham todu para i batko, ya in chile’ todu i prubension yan kosas-mami ni’ ma kumanda ham, manhanao ham gi tasi ya mansinigon ham nu i manglo’ para i tano’ prumesa.

9 Ya anai sigi ha’ ham manhanao meggai diha siha, ginen i manglo’, ai, i mañe’lu-hu yan i lalahi-na siha si Ishmael yan i asaguan-ñiha duru manmagof, ya duru mambaila, manganta, yan meggai tai setben kuentos-ñiha, hunggan, esta manmaleffa hafa ginen manu na alentos kumonne’ siha; hunggan mansen desatento.

10 Pues guahu, si Nephi, mampos yu’ susto na u lalalo’ i Saina giya hami, ya u na’dañu ham put i inhuestisian-mami, ya eyu i bai in fanma kalammot gi taddong i tasi, entonses, guahu, si Nephi, hu tutuhon kumuentusi siha kon katma; lao ai, mambubu giya guahu, ilek-ñiha: Ti bai in sedi i mas hoben na che’lon-mami para u gubietna ham.

11 Pues matto i tiempo na si Laman yan Lemuel ma konne’ yu’ ya ma godde yu’ ni’ tali, ya ma mattrata yu’; sinembatgo, i Saina ha sedi para u na’huyong i alentos-ña, para u na’magahet i fino’-na ni’ ha sangan put i manmala siha.

12 Pues matto i tiempo na despues di ma godde yu’ ti siña yu’ kalamten, ya i kompas, ni’ ma pripara ginen i Saina, pumara macho’cho’.

13 Entonses, ti ma tungo’ amanu na u ma sugon i batko, pues matto dangkolon pakyo, hunggan, dangkolo yan tiripblen pakyo, ya manhanao ham tatte gi hanom tres dihas; ya manma’a’ñao sa’ u fanmatmos gi tasi, sinembatgo, ti ma sotta yu’.

14 Pues gi mina’kuattro na diha, anai manhanao ham tatte, duru mas bibu i pakyo.

15 Pues matto i tiempo na esta para bai in ma kalammot nu i tinaddong i tasi. Pues despues esta kuattro dihas ham gi tasi, ma li’e’ i mañe’lu-hu na i sentensian Yu’os gaige giya siha, ya siempre manma kondena solu manmañotsot ni’ binaban-ñiha; entonses, manmatto giya guahu, ya ma na’kallo i gedde ni’ gaige gi kannai-hu, ni’ esta sen mambula; yan lokkue’ patas-hu sen mambula, ya mampos manehyok.

16 Sinembatgo, hu bira yu’ guatu as Yu’os, ya hu tuna todu i diha; ya ti kumuentos yu’ kontra i Saina put i pinadesi-hu siha.

17 Pa’go, si tata-hu, si Lehi, meggai ha sangani siha, yan lokkue’ i lalahen Ishmael; lao, ai, ma espanta hayi para u kuentos para guahu; ya i manaina-hu ni’ manamko’, meggai trinisten-ñiha sa’ i famagu’on-ñiha, ya manmalangu esta mankinama.

18 Put i trinisten-ñiha yan i piniten-ñiha, yan i baban che’cho’ mañe’lu-hu, manma konne’ hihot esta para u fanasodda’ yan i Yi’os-ñiha, hunggan, i a’apaka’ gapot ulon-ñiha esta para u ma konne’ papa’ gi edda’; hunggan, esta para u fanma yute’ kon piniti gi halom i fetgon na naftan.

19 Ya si Jacob yan Joseph lokkue’, sa’ hoben, ma nisisita sostansia, mantriste sa’ i pinadesen nanan-ñiha; yan lokkue’ i asagua-hu yan i lago’-ña yan i tinayuyot-ña, yan i famagu’on-hu, ti ha na’maggem i kurason i mañe’lu-hu para u ma sotta yu’.

20 Ya taya’ solu i alentos Yu’os, siña umespanta siha kon destrosu, para u na’maggem i kurason-ñiha; entonses, anai ma li’e’ na para u fanma kalammot gi taddong i tasi, manmañotsot ni’ bidan-ñiha, pues ma sotta yu’.

21 Pues matto i tiempo na anai ma sotta yu’, hu chule’ i kompas, ya macho’cho’ amanu hu diseha. Pues matto i tiempo na hu tayuyuti i Siana; ya anai manaitai yu’ pumara i manglo’, yan i pakyo, ya matto dangkolo na katma.

22 Pues matto i tiempo na guahu, si Nephi, hu giha i batko, ya manlayak ham ta’lo para i tano’ prumesa.

23 Pues matto i tiempo na despues di manlayak ham meggai diha siha, manmatto ham gi tano’ prumesa; ya manhalom ham gi tano’, ya in hatsa i tento’-mami; ya in agang tano’ prumesa.

24 Pues matto i tiempo na in tutuhon manggualo’, ya in tutuhon manmananom simiya siha; hunggan, in tanom i simiya siha gi tano’, ni’ in chule’ ginen Jerusalem. Pues matto i tiempo na mandokko’; entonses, manma bendisi ham abondansia.

25 Pues matto i tiempo na in sedda’ gi tano’ prumesa, anai manhahanao ham gi halom tano’, meggai siha na klasen gaga’ halom tano’, kontodu i guaka yan i nubiyu, yan i buliku yan i kabayu, yan i chiba yan i chiban halom tano’, yan todu manera na gaga’ halom tano’, ni’ para u ma usa nu i taotao. Ya in sedda’ todu klasen lulok, kontodu oru, yan plata, yan kopble.