1 Qaphelani, kwenzekile okokuba mna, Nifayi, ndakhala kakhulu kuyo iNkosi uThixo wam, ngenxa yomsindo wabantakwethu.

2 Kodwa qaphelani, umsindo wabo waye wakhula ngokuchasene nam, kangangokuba baye bafuna ukuthabatha ubomi bam.

3 Ewe, baye bambombozela ngokuchasene nam, besithi: Umninawa wethu ucinga ukuba uza kulawula phezu kwethu; kwaye sifumene iimbandezelo ezininzi ngenxa yakhe; ngako oko, ngoku kufuneka simbulale, ukuze singabandezeleki ngakumbi ngenxa yamazwi akhe. Kuba qaphela, asimfuni ukuba abe ngumlawuli wethu; kuba kulilungelo lethu, bakhuluwa bakhe, ukulawula phezu kwaba bantu.

4 Ngoku andiwabhali phezu kwala macwecwe onke amazwi ababembombozela ngawo ngokuchasene nam. Kodwa kundanele ukuba ndithi, babefuna ukuthabatha ubomi bam.

5 Kwaye kwenzekile ukuba iNkosi indilumkise, ukuba mna, Nifayi, kufanele ndimke kubo kwaye ndisabele entlango, kunye nabo bonke abanako ukuhamba nam.

6 Ngako oko, kwenzekile okokuba mna, Nifayi, ndithabathe usapho lwam, kanjalo noZorami nosapho lwakhe, noSem, umkhuluwa wam kunye nosapho lwakhe, noYakobi noYosefu, abaninawa bam, kwakunye noodadewethu, kwaye nabo bonke abo babenakho ukuhamba nam. Kwaye bonke abo babenakho ukuhamba nam babengabo babekholelwa kwizilumkiso nezityhilelo zikaThixo; ngako oko, bawaphulaphula amazwi am.

7 Kwaye sazithabatha iintente zethu nazo naziphina izinto esasinako ukuba sizithabathe, kwaye sahamba entlango kangangesithuba seentsuku ezininzi. Kwaye emva kokuba sihambe kangangesithuba seentsuku ezininzi saye sazigxumeka iintente zethu.

8 Kwaye abantu bam banqwenela ukuba igama lendawo leyo siyibize Nifayi; ngako oko, saye sayibiza Nifayi.

9 Kwaye bonke abo babenam bagqiba ekubeni bazibize ngokuba ngabantu bakaNifayi.

10 Kwaye sathi saqwalasela ukuzigcina izigwebo, nemithetho, nemiyalelo yeNkosi kuzo zonke izinto, ngokomthetho kaMoses.

11 Kwaye iNkosi yayinathi; kwaye sathi saphumelela ngokugqithisileyo; kuba saye satyala imbewu, kwaye saye savuna kwakhona ngobuninzi. Kwaye saqalisa ukufuya impahla emfutshane, nemihlambi yeenkomo, neentlobo zonke zezilwanyana.

12 Kwaye mna, Nifayi, ndandithabathe nembali kanjalo eyayikrolwe phezu kwamacwecwe obhedu; kwanebhola, okanye isalathambombo, esasilungiselelwe ubawo ngesandla seNkosi, ngokwakoko kubhaliweyo.

13 Kwaye kwenzekile okokuba saye saqalisa ukuphumelela ngokugqithisileyo, kwaye sanda elizweni.

14 Kwaye mna, Nifayi, ndaye ndalithabatha ikrele likaLabhan, ngokohlobo lwalo ndaye ndenza amakrele amaninzi, hleze nangayiphina indlela abantu ngoku ababebizwa amaLeymenayithi baze basihlasele kwaye basitshabalalise; kuba ndandiyazi intiyo yabo kum nabantwana bam nabo babebizwa abantu bam.

15 Kwaye ndaye ndabafundisa abantu bam ukwakha izakhiwo, nokusebenza ngazo zonke iindidi zemithi, nezesinyithi, nezekopolo, nezobhedu, nezentsimbi eyomeleleyo, nezegolide, nezesilivere, kwaye nezentsimbi ekrwada exabisekileyo, ezazifumaneka ngobuninzi.

16 Kwaye mna, Nifayi, ndaye ndakha itempile; ndaze ndayakha ngokohlobo lwetempile kaSolomon ngaphandle nje kokuba yayingakhiwanga ngezinto ezininzi kangako ezixabisekileyo; kuba zazingenakho ukufumaneka elizweni, ngako oko, yayingenakho ukwakhiwa njengayo itempile kaSolomon. Kodwa uhlobo lokwakhiwa kwayo lwalwufana netempile kaSolomon; kwaye uhlobo lokwenziwa kwayo lwalucwenge ngokugqithisileyo.

17 Kwaye kwenzekile ukuba, mna, Nifayi, ndababangela abantu bam ukuba bakhuthale, kwaye basebenze ngezandla zabo.

18 Kwaye kwenzeka ukuba banqwenela ukuba ndibe ngukumkani wabo. Kodwa mna, Nifayi, ndandinqwenela ukuba bangabinayo ikumkani; nangona kunjalo, ndabenzela kangangoko kwakusemandleni am.

19 Kwaye qaphela, amazwi eNkosi aye ezalisekisiwe kubantakwethu, eyathi yawathetha ngokunxulumene nabo, ukuba ndibe ngumlawuli kwakunye notitshala wabo. Ngako oko, bendingumlawuli kwakunye notitshala wabo, malunga nemiyalelo yeNkosi, kwade kwaba lelo lixa abathi bafuna ukuthabatha ubomi bam.

20 Ngako oko, ilizwi leNkosi lazalisekiswa awalithetha kum, ethetha oku: Kangangokuba bengayi kuwaphulaphula amazwi akho baya kusikelwa ngaphandle ebusweni beNkosi. Kwaye qaphela, baye basikelwa ngaphandle ebusweni bayo.

21 Kwaye yenza ukuba isiqalekiso size phezu kwabo, ewe, kwasona isiqalekiso esibuhlungu, ngenxa yobugwenxa babo. Kuba qaphela, baye bazenza likhuni iintliziyo zabo ngokuchasene nayo, zaza zanjengenyengane; ngako oko, njengokuba babemhlophe, kwaye bebahle ngokugqithisileyo kwaye bebukeka, khona ukuze bangabi namtsalane kubantu bam iNkosi uThixo yathi yabenza ukuba babe nolusu olumnyama.

22 Kwaye itsho njalo iNkosi uThixo: Ndiya kubenza ukuba bacekiseke kubo abantu bakho, ngaphandle kokuba baya kuthi baguquke kubugwenxa babo.

23 Kwaye iya kuqalekiswa imbewu yalowo uthe wazivanga nembewu yabo; kuba nabo baya kuqalekiswa kwangeso siqalekiso. Kwaye iNkosi yakuthetha, kwaze kwenzeka.

24 Kwaye ngenxa yesiqalekiso sabo esasiphezu kwabo baye babangabantu abangamavila, bezele yintlonti kwanenkohliso, kwaye babezingela izilo ezingamaxhoba entlango.

25 Kwaye iNkosi uThixo yathi kum: Baya kuba sisibetho kwimbewu yakho, ukubavuselela ekubeni bandikhumbule; kwaye kangangokuba bengayi kundikhumbula, kwaye bawaphulaphule amazwi am, baya kubacinezela bade babatshabalalise.

26 Kwaye kwenzeka okokuba mna, Nifayi, ndimisele uYakobi noYosefu, ukuze babe ngababingeleli neetitshala kulo lonke ilizwe labantu bam.

27 Kwaye kwenzeka okokuba sihlale ngohlobo lolonwabo.

28 Kwaye iminyaka engamashumi amathathu idlule ukusuka kwilixa lokushiya kwethu iYerusalem.

29 Kwaye mna, Nifayi, andiyekanga ukubhala imbali phezu kwamacwecwe, endathi ndayenza yabantu bam kude kube ngoku.

30 Kwaye kwenzekile okokuba iNkosi uThixo yathi kum: Yenza amanye amacwecwe; kwaye uya kukrola izinto ezininzi ezilungileyo emehlweni am, ukunceda abantu bakho.

31 Ngako oko, mna, Nifayi, ukuze ndithobele imiyalelo yeNkosi, ndahamba ndaza ndenza la macwecwe endithe ndakrola phezu kwawo ezi zinto.

32 Kwaye ndakrola oko kukholekileyo kuThixo. Kwaye ukuba abantu bam bayakholiseka zizinto zikaThixo baya kukholiseka yimikrolo yam ephezu kwala macwecwe.

33 Kwaye ukuba abantu bam banqwenela ukwazi inxenye ethile engakumbi yembali yabantu bam mabaphengulule kwamanye amacwecwe am.

34 Kwaye kuyandanelisa ukuba ndithi amashumi amane eminyaka agqithile, kwaye sele sineemfazwe neembambano nabantakwethu.