1 Ket ita, ay-ayatek a kakabsatko a lallaki, binasak dagitoy a banag tapno maammuanyo dagiti katulagan ti Apo nga intulagna kadagiti amin a balay ti Israel—

2 A nakisao isuna kadagiti Hudio, babaen kadagiti nasantuan a propetana, uray pay idi punganay, manipud iti nagsasaruno a henerasion, agingga a dumteng ti panawen a maisublidanto iti pudno a simbaan ken pangen ti Dios; inton maummongdanto kadagiti pagtaenganda kadagiti daga a tinawidda, ken maibangondanto iti amin a daga a naikari kadakuada.

3 Kitaen, ay-ayatek a kakabsatko, Isaok kadakayo dagitoy a bambanag tapno agrag-okayo, ket yangadyo ti uloyo iti agnanayon, gapu kadagiti itedto kadakayo a bendision ti Apo a Dios kadagiti annakyo.

4 Ta ammok nga inggaedyo ti panagsapulyo, adu kadakayo, a maammuan dagiti bambanag a mapasamak; gapuna ammok nga ammoyo a nasken nga agrakaya ken matay ti lasagtayo; nupay kasta, iti bagbagitayo makitatayonto ti Dios.

5 Wen, ammok nga ammoyo nga ipakitananto ti bagina kadagiti adda iti Jerusalem, a naggapuantayo; ta nasken a mapasamak daytoy kadakuada; ta nasken nga ipalubos ti naindaklan a Namarsua nga agbalin a sakup ti nainlasagan a bagi ti tao, ken matay para iti amin a tao, tapno agbalin a sakupna ti nainlasagan a bagi ti tao.

6 Ta kas mapasamak a matay amin a tao, tapno matungpal ti manangngaasi a plano ti maindaklan a Namarsua, nasken nga adda bileg ti panagungar, ken nasken a mapasamak iti tao ti panagungar gapu iti pannakatnag; ta immay ti pannakatnag gapu iti panaglabsing; ket gapu ta nagbalin a natnag ti tao nailaksidda manipud iti imatang ti Apo.

7 Gapuna, nasken nga agnanayon ti pannakasubbot—malaksid no agnanayonto ti pannakasubbot awanto ti bileg daytoy a panagrupsa a makawesan iti saan a panagrupsa. Gapuna, ti immuna a panangukom nga immay iti tao nasken nga agtaginayon koma nga awan ti patinggana. Ket no kasta, sigurado a malungsot daytoy a nainlasagan a bagi ken agrupsa iti daga, tapno saanen a bumangon.

8 O ti kinasirib ti Dios, ti asi ken paraburna! Ta kitaen, no saanen a bumangon ti nainlasagan a bagi nasken nga maiturayan dagiti espiritutayo iti dayta nga anghel a natnag manipud iti sidong ti Agnanayon a Dios, ket nagbalin a sairo, tapno saanen a bumangon.

9 Ket nasken nga agbalin dagiti espiritutayo a kas kenkuana, ket agbalintayo a sairo, dagiti anghel ti sairo, a mailaksid manipud iti immatang ti Diostayo, ket makipagnaed iti ama ti kinaulbod, iti panagrigat, a kas kenkuana; wen, iti dayta parsua a nangallilaw kadagiti immuna a nagannaktayo, a mabalbaliwanna ti bagina a kas anghel ti silaw, ket kiburenna ti sangkataw-an babaen kadagiti panagkukunsaba ti pammapatay ken amin a kita ti nalimed nga aramid ti kinasipnget.

10 O, anian ti kinaindaklan ti kinaimbag ti Diostayo, a nangisagana iti wagas para iti panaglibastayo manipud iti gemgem iti daytoy nakabutbuteng nga ulimaw; wen, dayta nga ulimaw, ipapatay ken impierno, nga awagak a pannakatay iti bagi, ken kasta met iti pannakatay t ti espiritu.

11 Ket gapu iti wagas ti panangsubbot ti Diostayo, ti Nasantuan ti Israel, yawatto daytoy nga ipapatay, a nasaok, a naindagaan, dagiti minatayna; a ti ipapatay isu ti tanem.

12 Ket yawatnanto daytoy nasaok a patay, daytoy naespirituan nga patay, dagiti minatayna; daytoy naespirituan nga patay ti impierno; gapuna, nasken a yawat ti patay ken impierno dagiti minatayda, ket nasken a yawat ti impierno dagiti espiritu nga adipenna, ket nasken a yawat ti tanem dagiti bagi nga adipenna, ket dagiti bagi ken dagiti espiritu ti tattao ket maisublinto iti tunggal maysa; ket babaen daytoy iti pannakabalin ti panagungar ti Nasantuan ti Israel.

13 O, anian a kinaindaklan ti plano ti Diostayo! Ta iti sabali a bangir, nasken a yawatna ti paraiso ti Dios dagiti espiritu ti nalinteg, ken yawatna ti tanem dagiti bagi a nalinteg; ket maisubli manen ti espiritu ken ti bagi ti tunggal maysa, ket agbalin amin a tao a saan nga agrupsa, ken saan a matay, ket sibibiagda a kararua, nga addaan iti naan-anay a pannakaammo a kas kadatayo iti nainlasagan a bagi, malaksid laeng ta naan-anayto ti pannakaammotayo.

14 Gapuna, maaddaantayonto iti naan-anay a pannakaammo kadagiti amin a nagbasolantayo, ken dagiti kinarugittayo, ken ti kinalamolamotayo; ket maaddaanto dagiti nalinteg iti naan-anay a pannakaammo iti panagrag-oda, ket ti kinalintegda, a nakawesan iti kinadalus, wen, uray pay iti kawes ti kinalinteg.

15 Ket mapasamakto nga inton makalasaten amin a tao manipud iti daytoy umuna a pannakatay nga agturong iti biag, agsipud ta nagbalinda nga imortal, nasken nga agparangda iti sango ti tugaw a pangukoman ti Nasantuan ti Israel; ket kalpasanna dumtengto ti panangukom, ket kalpasanna nasken a maukomda a mayannurot iti nasantuan a panangukom ti Dios.

16 Ket naipatalged, iti panagbiag ti Apo, a kas sibibiag ti Apo, ta insao ti Apo a Dios daytoy, ken isu ti agnanayon a saona, a saan a mapukaw, ta dagiti nalinteg nalintegdanto latta, ken dagiti narugit ket narugitdanto latta; gapuna, dagiti narugit isuda ti sairo ken dagiti anghelna, ket maitapuakda iti agnanayon nga apuy; a naisagana para kadakuada; ket kas dan-aw ti apuy ken asupre ti pannakatutuokda, a ti gil-ayabna agpangato nga agnanayon ken awan patinggana.

17 O ti kinaindaklan ken kinalinteg ti Diostayo! Agsipud ta aramidenna amin a balikasna, a nagtaud iti ngiwatna, ket nasken a matungpal ti paglinteganna.

18 Ngem, kitaen, dagiti nalinteg, dagiti santo ti Nasantuan ti Israel, isuda a namati iti Nasantuan ti Israel, isuda a nakaibtur kadagiti krus iti lubong, ken nangumsi iti pannakaibabain daytoy, tawidendanto ti pagarian ti Dios, a naisagana para kadakuada manipud iti pannakaparsua ti lubong, ken naan-anayto ti rag-oda iti agnanayon.

19 O ti kinaindaklan nga asi ti Diostayo, ti Nasantuan ti Israel! Agsipud ta insalakanna dagiti santona manipud iti nakabutbuteng nga olimaw a sairo, ken ipapatay, ken impierno, ken ti dan-aw ti apuy ken asupre, nga isu ti awan patinggana a panagtutuok.

20 O anian a kinaindaklan ti kinasanto ti Diostayo! Ta ammona amin a banag, ket awan ti uray ania a banag a saanna nga ammo.

21 Ket umayto isuna ditoy lubong tapno isalakanna ti amin a tao no dumngegda iti timekna; ta kitaen, ibturanna dagiti rigat ti amin a tao, wen, dagiti ut-ot ti amin a sibibiag a naparsua, agpapada a lallaki, babbai, ken ubbing, a kameng ti pamilia ni Adan.

22 Ket ibturanna daytoy tapno mapasamak ti panagungar iti amin a tattao, tapno agtakder ti amin iti sangona iti naindaklan nga aldaw ti panangukom.

23 Ket imbilinna kadagiti amin a tao a nasken nga agbabawida, ken mabuniaganda iti naganna, nga addaan naan-anay a pammati iti Nasantuan ti Israel, wenno saanda a maisalakan iti pagarian ti Dios.

24 Ket no saanda nga agbabawi ken mamati iti naganna, ken mabuniagan iti naganna, ken agibtur agingga iti panungpalan, nasken a madusada; agsipud ta kinuna ti Apo a Dios, ti Nasantuan ti Israel.

25 Gapuna, nangted isuna iti paglintegan; ket no awan ti naited a paglintegan awan ti pannusa; ket no awan ti pannusa awan ti panangeddeng; ket no awan ti panangeddeng dagiti asi ti Nasantuan ti Israel ti mangtunton kadakuada, gapu iti pannakasubbot, agsipud ta naisalakanda babaen ti bilegna.

26 Ta tungpalen ti pannakasubbot ti kasapulan ti hustisiana kadagiti amin nga awan ti naited a linteg, ta naisalakanda manipud iti dayta nakabutbuteng nga olimaw, a patay ken impierno, ken iti sairo, ken iti dan-aw ti apuy ken asupre, nga isu ti awan patinggana a panagtutuok; ket naisublida iti Dios a nangted iti angesda, nga isu ti Nasantuan ti Israel.

27 Ngem ay-ay pay ti tao a ti linteg ket nakaitedan, wen, nga addaan amin dagiti bilin ti Dios, a kas kadatayo, ket sumukir kadagitoy, ken sayangenna dagiti aldaw ti pannakapadasna, ta nakaay-ay-ay ti kasasaadna!

28 O dayta a nasikap a plano ti sairo! O ti kinapasindayag, ken kinarukop, ken kinamaag ti tao! Ipagarupda a no addaan adalda ket masiribda, ket saanda a dumngeg iti pammagbaga ti Dios, gapu ta dida ikankano, agsipud ta panunotenda nga ammoda babaen iti bukodda, gapuna, kinamaag ti kinasiribda ket saanda a magunggonaan iti daytoy. Ket maungawdanto.

29 Ngem nasayaat ti maaddaan iti adal no dumngegda kadagiti pammagbaga ti Dios.

30 Ngem ay-ay pay dagiti baknang, a nabaknang kadagiti bambanag iti lubong. Ta agsipud ta baknangda ket lalaisenda ti marigrigat, ken idadanesda ti napakumbaba, ket adda kadagiti gamengda ti puspusoda; gapuna, ti gamengda ti diosda. Ket kitaen, madadaeldanto met a kas ti gamengda.

31 Ken ay-ay pay dagiti tuleng a saan a dumngeg; agsipud ta maungawdanto.

32 Ay-ay pay dagiti bulsek a saan a makakita; gapu ta maungawdanto met.

33 Ay-ay pay dagiti nasukir ti panagpuspusona, gapu ta tinto pannakaammoda iti kinamanagbasolda ti mangdadael kadakuada iti maudi nga aldaw.

34 Ay-ay pay ti ulbod, agsipud ta maitappuakdanto iti impierno.

35 Ay-ay pay ti mammapatay nga irantana ti pumatay, agsipud ta matayto.

36 Ay-ay pay dagiti agaramid ti kinabalangkantis, agsipud ta maitapuakdanto iti impierno.

37 Wen, ay-ay pay dagiti agdaydayaw kadagiti didiosen, gapu ta ti sairo iti amin a sairo agragsak gapu kadakuada.

38 Ket, kas pakagupgopan, ay-ay pay dagiti amin a matay a sibabasol; agsipud ta agsublidanto iti Dios, ket makitadanto ti rupana, ket agtalinaeddanto kadagiti basbasolda.

39 O, patpatgek a kakabsatko, laglagipenyo ti kinaalingget ti panaglabsing a maibusor iti dayta Nasantuan a Dios, ket kasta met ti kinaalingget ti agpabus-oy kadagiti awis iti dayta maysa a nasikap. Laglagipenyo, a ti nailubongan a pampanunot ket ipapatay, ken ti naespirituan a pampanunot ket biag nga agnanayon.

40 O, patpatgek a kakabsatko, denggenyo dagiti balikasko. Laglagipenyo ti kinaindaklan ti Nasantuan ti Israel. Saanyo a kunaen a nagsaoak iti nadagsen a bambanag a maibusor kadakayo; agsipud ta no aramidenyo, lalaisenyonto ti kinapudno; gapu ta nasaok dagiti balikas ti Namarsua kadakayo. Ammok a nadagsen dagiti sasao ti kinapudno kadagiti amin a narugit; ngem saan nga agdanag dagiti nalinteg kadagitoy, gapu ta ay-ayatenda ti kinapudno ket saanda a mariribukan.

41 O ngarud, patpatgek a kakabsatko, umaykayo iti Apo, ti Nasantuan. Laglagipenyo a nalinteg ti dalanna. Kitaen, ti dalan para iti tao ket akikid, ngem deretso nga agturong daytoy iti imatangna, ket ti agbantay iti ruangan isu ti Nasantuan ti Israel; ket awan ti tinangdananna a katulongan sadiay, ket awan ti sabali a dalan malaksid ti ruangan; agsipud ta saan a maallilaw isuna, gapu ta Apo a Dios ti naganna.

42 Ket ilukatannanto ti siasino man nga agtuktok kenkuana; ket dagiti masirib, ken dagiti nangato ti adal, ken dagiti nabaknang, a managpannakkel gapu iti adalda, ken kinasiribda, ken kinabaknangda—wen, isuda dagiti baybay-anna; ket malaksid no iwaksida dagitoy a bambanag, ket ibilangda dagiti bagida a maag iti sango ti Dios, ket agtamedda a sipapakumbaba, saannanto a ilukatan ida.

43 Ngem ti adda kadagiti masirib ken manakem mailimedto kadakuada iti agnanayon—wen, dayta kinaragsak a naisagana para kadagiti santo.

44 O, patpatgek a kakabsatko, laglagipenyo dagiti balikasko. Kitaen, uksobek dagiti kawesko, ket iwagwagko ida iti sangoyo; ikararagko iti Dios ti pannakaisalakanko ta kitaennak babaen iti nasiput a matana; gapuna, maammuanyonto iti maudi nga aldaw, inton maukomto amin a tao kadagiti aramidda, a sinaksian ti Dios ti Israel ti panangiwagsakko kadagiti basolyo manipud iti kaunggak, ket agtakderak a silalawag iti sangona, ket nailisiak iti darayo.

45 O, ay-ayatek a kakabsatko, tallikudanyo dagiti basolyo; iwaksiyo dagiti kawar a nangpungo kadakayo; umasidegkayo iti Dios a pundasion ti pannakaisalakanyo.

46 Isaganayo dagiti kararuayo iti dayta nadayag nga aldaw a pannakaipaay ti linteg kadagiti nalinteg, uray pay iti aldaw ti panangukom, tapno saankayo nga agarigenggen iti nakaal-aliingget a panagbuteng; tapno saanyo a malagip dagiti nakaay-ay-ay a panagbasol iti kinaan-anay, ket mapilitkayo nga agkuna: Nasantuan, nasantuan dagiti panangukomyo, O Apo Dios a Mannakabalin-amin—ngem ammok ti nagbasolak; linabsingko ti lintegmo, ket bukodko dagiti labsingko; ket inikutannak ti sairo, ta biktimaak ti nakaal-alingget a kinaleddaangna.

47 Ngem kitaen, kakabsatko, masapul kadi a riingenkayo ti nakaal-alingget a kinapudno dagitoy a banag? Riribukek kadi ti kaungganyo no natarnaw ti kapanunotanyo? Agbalinak kadi a napudno kadakayo a mayannurot iti kinalawag ti kinapudno no nawayawayaankayo iti basol?

48 Kitaen, no nasantuankayo isaok kadakayo ti maipanggep iti kinasanto; ngem gapu ta saankayo a nasantuan, ken bigbigendak a kas mannursuro, nasken unay nga isurok kadakayo dagiti bunga ti basol.

49 Kitaen, kagura ti kaunggak ti basol, ket pagragsakan ti pusok ti kinalinteg; ket dayawekto ti nasantuan a nagan ti Diosko.

50 Umaykayo, kakabsatko, tunggal maysa a mawaw, umaykayo iti dandanum; ken ti asino man nga awanan iti kuarta, umaykayo gumatang ken mangan; wen, umaykayo gumatang iti arak ken gatas nga awanan kuarta ken awanan gatad.

51 Gapuna, saankayo nga agbusbos iti kuarta iti awan pategna, wenno ti bannogyo para iti saan makapennek. Dumngegkayo a sireregta kaniak, ket laglagipenyo dagiti naibalikasko; ket umasidegkayo iti Nasantuan ti Israel, ket agbussogkayo kadagiti saan a maungaw, wenno marupsa, ket paragsakenyo dagiti kararuayo iti kinaadu iti kaimasan a makan.

52 Kitaen, patpatgek a kakabsatko, laglagipenyo dagiti balikas ti Diosyo; agkararagkayo kenkuana iti inaldaw, ket agyamankayo iti nasantuan a naganna iti rabii. Pagraksakenyo dagiti pusoyo.

53 Ket kitaen, anian a kinaindaklan dagiti katulagan ti Apo, ken anian a kinaindaklan ti pannakipulapolna kadagiti sangkataw-an; ket gapu iti kinaimbagna, ken parabur ken asina, inkarina kadatayo a saan a madadael amin dagiti kaputotantayo, a mayannurot ti lasag, ngem taginayonennanto ida; ket agbalindanto a nalinteg a sanga iti balay ti Israel kadagiti sumaruno a henerasion.

54 Ket ita, kakabsatko, adu pay ti kayatko nga ibaga kadakayo; ngem ipalawagkonto kadakayo iti masakbayan ti nabati kadagiti balikasko. Amen.