1 Chiney e yibi buch ni fabin mereb i ragag nge taʼareb e duw e thimur make gaman nelʼ miriʼay e duw napʼan ni chuw Lehi u Jerusalem; u lan fare duw ni Lachoneus e ire pilung ko tapuf-oloboch nge am u gaʼangin yang fare nam.

2 Ere Nephi, ni fare pagael ni fak Helaman, e ke chuw u lan fare binaw nu Zarahemla, ni ke piiʼ gafalngin fapi plate ni brass, ngakʼ Nephi ni fare pagael ni fak, niʼir e bin thʼabi ilal e pagael ni fak, nge gubin fare chep ni kuʼun chaʼariy, nge gubin e pinʼen ni kuʼun chaʼariy nib thothup ko ngiyalʼ ni baʼaram ni chuw Lehi u Jerusalem.

3 Ma arame chuw nge yaen nga wuruʼ fare binaw, ma uw e gin ni yaen ngay, e dariy beeʼ ni manang; ma fare pagael i Nephi ni fak e yinʼ luwan nge chaʼariy fapi chep, arragon, fare chep ko pi gidiiʼ ney.

4 Me yibi buch u napʼan ni tabab e bin mereb i ragag nge lʼagruw e duw, ma musap gaed, fapi prophecy ko fapi profet e arame tabab ni nge muguʼuliyean nib felʼ rogon; ya arame tabab i mʼug e pow nge maʼangʼang ni gagyeg u fithikʼ fapi gidiiʼ.

5 Machane bay boech e gidiiʼ ni yoeg ni fapi thin e ke pag napʼan ni nge muguʼul, niʼir faram e weliy Samuel, ni fare Lamanite.

6 Mar tabab gaed ko falfalaenʼ ngakʼ pi walagraed, ma yaed be gaʼar: Musap gaed fare ngiyalʼ innʼem e ke thimur, ma fapi thin rokʼ Samuel e dawori muguʼul; ere, falfalaenʼ romed nge mich romed ni morngaʼagen e rennʼey e rib mʼay fan.

7 Me yibi buch nra tayed ba wagaey u gaʼangin yang fare nam; ma fapi gidiiʼ nib michaenʼraed e ri kirbaenʼ raed nib gel, ni richey ma fapinʼen ni kan weliy e dabi yibi buch.

8 Machane musap gaed, ur pired ni yaed ba miyuluy i sap nag fare rran nge fare nepʼ nge fare rran ni ra yaeni aw ni taʼareb e rran ni gowa dariy e nepʼ, ni nge yog ni ngar nanged ni mich roraed e dawori mʼay fan.

9 Chiney e yibi buch ni bay rebo rran ni ke dugliy e piʼin ni de michaenʼraed, ni gubin e piʼin nib michaenʼraed ko pi yalean nem e ngan liiʼraed riy ngar mʼaed ma kemus ni faʼanra yibi mʼug fapi pow, niʼir e ke piiʼ faʼanem i Samuel ni fare profet.

10 Chiney e yibi buch u napʼan ni guy Nephi, ni fare pagael ni fak Nephi, e re ngongol ney nib kireb ko gidiiʼ rokʼ, me ri sug gumʼirchaʼen ko kirbaenʼ.

11 Me yibi buch ni yaen nga wean nge pag ir nga dakean e buutʼ nibe siroʼ, me meybil nib almarin ngakʼ e Got rokʼ ni fan ngakʼ e pi gidiiʼ rokʼ, arragon, piʼin baʼaram ni yibe yaen ni ngan gatheayraed ni bachan e mich roraed ko fare yalean ko pi chitamangraed.

12 Me yibi buch ni meybil nib almarin e re rran nem ni poloʼ ngak fare Somoel; ere musap gaed, fare lam rokʼ Somoel e yib ngakʼ, nibe gaʼar:

13 Mu puged loelugmed ngalang ma nge pagaenʼmed; ya musap gaed, fare ngiyalʼ innʼem e ke yib, nre nepʼ innʼey e yira piiʼ fare pow, ma ra rebo rran riy ma kugub nga fayleng, ni nggu dag ko fayleng ni gura muguʼuliy gubin e pinʼen niʼug guy rogon ni nge weliy e pi profet rog nib thothup.

14 Musap gaed, ere nggub ko gidiiʼ rog, ni nge muguʼul gubin e pinʼen ni kug dag ngakʼ e gidiiʼ aram u napʼan ni sum e fayleng, ma nggu rinʼ laniyaenʼ row fare Chitamangiy nge fare Fak—rokʼ fare Chitamangiy ni bachag, nge rokʼ fare Fak ni bachan e dowef rog. Ere musap gaed, fare ngiyalʼ innʼem e ke yib, ma re nepʼ innʼey e yira piiʼ fare pow.

15 Me yibi buch ni fapi thin ni yib ngakʼ Nephi e muguʼul, ni boed rogon nni weliy; ya musap gaed, napʼan ni awe yalʼ ma dariy e lumor; ma fapi gidiiʼ e tabab i balyangaenʼraed ni bachan e dariy e lumor u napʼan ni ke nepʼ.

16 Ma boʼor e piʼin ni dawori michaenʼraed ko fapi thin rokʼ fapi profet, nra awgaed nga butʼ ni gowa kar mʼaed, ya kar nanged ni fare tanamen e mogothgoth ni kar tayed ni fan ngakʼ e piʼin nib michaenʼraed ko fapi thin rokʼ fapi profet e ke puth; ya fare pow ni kan piiʼ e ke taw ngay.

17 Ma arame tabab ni ngar nanged ni fachaʼ ni Fak Got e ridab ki nʼuw napʼan make mʼug; arragon, ma ngan ngochngoch nag i weliy, ni gubin e gidiiʼ u dakean gaʼangin yang e fayleng ko ngael nge madaʼ ko ngek, ngu lan e nam ko leluʼoch ngu lan e nam ko yimuch, e ri balyangaenʼraed mar awgaed nga butʼ.

18 Ya yaed manang ni fapi profet e kuʼur micheged e pinnʼey ni ke yoʼor e duw, ma fare pow ni kan piiʼ e ke taw ngay ke muʼ; ma arame ra tabab gaed ko morus ni bachan e denen roraed nge mich roraed ni dariy.

19 Me yibi buch ni dariy e lumor e re nepʼ nem ni poloʼ, ya ba tamilang ni gowa ba lukungun e misiwʼ. Me yibi buch ni mʼug e yalʼ ni kakadbul bayay, ni woed rogon ni kuma mʼug; mar nanged ni ireram fare rran ni yira gargeleg fare Somoel riy, ni bachan e fare pow ni kan piiʼ.

20 Me yibi taw ngay ni buch, arragon, gubin banʼen, ni mos ko tin baʼachig, ni boed rogon fapi thin ni yoeg fapi profet.

21 Me yibi buch niki mʼug ba tʼuf nib beʼech, ni boed rogon fare bugithin.

22 Me yibi buch ko re ngiyalʼ innʼem iyaen nga mʼon ni tabab fare Moʼoniyanʼ, ko baen iyaen u fithikʼ fapi gidiiʼ, ni ngar ʼelʼel niged gumʼirchaʼraed, ni fan e nge dabi michaenʼraed ko fapi pow nge maʼangʼang ni kar guyed; machane yug aram rogon ni bay e pi baen ney nge pi sasaliyeb ney ma bagaʼ ni oren fapi gidiiʼ e michaenʼraed, me lʼagaenʼ raed ngakʼ fare Somoel.

23 Me yibi buch ni Nephi e iyaen u fithikʼ fapi gidiiʼ, nge ku boech e gidiiʼ, ni yaed be tawfe nigey nga dakean e kalngaenʼ, niʼir e yib e manʼaegfan ko pi denen riy. Ma aray rogon ni fapi gidiiʼ e tabab ni nge yog e gapas ngoraed bayay u lan fare nam.

24 Ma arame mʼay e pi togopluw, ma kemus ni buchʼuw e gidiiʼ nra tabab gaed ko machib, ni yaed be nomeg ni ngar micheged u dakean e pi chep nib thothup ni daki tʼuf ni ngan fol ko fare motochiyel ku Moses. Ireray e gin nra oloboch gaed riy, ya darur nanged fan fapi chep nib thothup.

25 Me yibi buch ni denʼuw napʼan riy me lʼagaenʼ raed, me puluw u wunʼraed e minaenʼ ni yaed bay u fithikʼ, ya kan dag ngoraed ni fare motochiyel e dawori muguʼul, ma rra muguʼul ni mos ko tin nib achig; arragon, yib e thin ngoraed ni rra muguʼul; arragon, dariy bang fa boechi yang riy ni ra chuw nge madaʼ ko ngiyalʼ ni ke muguʼul ni gaʼangin; ere lan e re duw ney me yibi tamilang laniyaenʼraed ko minaenʼ roraed mar pogofay niged e pi kireb roraed.

26 Ere aray rogon ni mʼay e bin mereb i ragag nge lʼagruw e duw, nni fek e thin nib mangil iyib ngakʼ fapi gidiiʼ ni bachan e fapi pow ni ke yibi buch, ni rogon e thin ko fare prophecy rokʼ gubin fapi profet nib thothup.

27 Me yibi buch ni bin mereb i ragag nge dalip e duw e ki mʼay u fithikʼ e gapas, ma kemus ni fapi Gadianton ni moroʼroʼ, ni yaed ma paer u fithikʼ e pi burey, ni kar suguyed dakean fare nam; ya kari noemow napʼan e tagilʼ raed nge yungin ni yaed ma miith riy ni arame daryog ni nge gel fapi gidiiʼ ngoraed; ere ri yoʼor e mathang pogofan nra tayed, mab almarin e cham nra tayed u fithikʼ fapi gidiiʼ.

28 Me yibi buch nu lan e bin mereb i ragag nge aningeg e duw ma kar taw gaed nga ba dodow ni kar yoʼor gaed, ni bachan e bayoʼor fa piʼin nra chuw gaed ko fapi Nephites ni kar miil gaed nga ranoed ngoraed, ni ireray e nʼen ni yib nag e kirbaenʼ nib gel ngakʼ e tin baʼaram e Nephites ni kar magaey gaed u lan fare binaw.

29 Ma kubay rebi tapgin e kirbaenʼ nib gel u fithikʼ fapi Lamanites; ya musap gaed, boʼor e bitir roraed ni kar gaʼgaed ma kar ilal gaed, ni kar pired roraed, ni wawliyraed boech fapi Zoramites nga orel, u dakean e sasalap lʼugun nge pi sabaenbaen roraed ngoraed, ni ngar uned ngakʼ fapi Gadianton ni moroʼroʼ.

30 Ere aray rogon niki gafgow fapi Lamanites, ma aram me lulʼaenʼ raed ko mich roraed nge tin nib matʼaw banʼen, ni bachan e pi ngongol ni kireb ko fare mfen ni kafini sum.